బ్రెజిల్‌లో భారీ ఆపరేషన్‌.. 60 మంది డ్రగ్స్‌ ముఠా సభ్యుల మృతి

రియో డి జనీరో: బ్రెజిల్‌లోని రియో డి జనీరోలో మాదకద్రవ్యాల ముఠాలే లక్ష్యంగా బ్రెజిల్‌ పోలీసులు చేపట్టిన భారీ ఆపరేషన్‌లో 60 మంది ప్రాణాలు కోల్పోయారు. 81 మంది అరెస్టయ్యారు. నలుగురు పోలీసులు కూడా మరణించారు. మాదకద్రవ్యాల రవాణా ముఠా ‘రెడ్‌ కమాండ్‌’ లక్ష్యంగా అలెమావో, పెన్హా జిల్లాల్లో మంగళవారం ఉదయం ఆపరేషన్‌ను చేపట్టినట్లు బ్రెజిల్‌ తెలిపింది. ఇందులో దాదాపు 2,500 మంది పోలీసులు, భద్రతా సిబ్బంది పాల్గొన్నట్లు వెల్లడించింది. పోలీసులు రంగంలోకి దిగగానే ప్రతిగా రెడ్‌ కమాండ్‌ కాల్పులు ప్రారంభించిందని, బ్యారికేడ్లు తగలబెట్టి.. డ్రోన్లను ఉపయోగించి బాంబుల వర్షం కురిపించిందని తెలిపింది. ఎదురు కాల్పుల్లో సుమారు 60 మంది నేరస్థులు హతమైనట్లు సంబంధిత వర్గాలు వెల్లడించాయి. ఆపరేషన్‌ అనంతరం 75 రైఫిల్స్‌తో పాటు 200కిలోల మాదకద్రవ్యాలను పోలీసులు స్వాధీనం చేసుకున్నారు. ఈ ఆపరేషన్‌ను ఐక్యరాజ్యసమితి మానవ హక్కుల సంస్థ తీవ్రంగా ఖండించింది. దీనిపై స్వతంత్ర దర్యాప్తునకు పిలుపునిచ్చింది.