Israel: లెబనాన్‌కు క్షమాపణలు చెప్పిన ఇజ్రాయెల్‌ సైన్యం..!

ఇజ్రాయెల్‌ పొరపాటున జరిపిన దాడిలో లెబనాన్‌ సైనికుడు మృతి చెందాడు. దీనికి ఐడీఎఫ్‌ క్షమాపణ చెప్పింది.

Updated : 06 Dec 2023 14:06 IST

ఇంటర్నెట్‌డెస్క్‌: ఇజ్రాయెల్‌-హమాస్‌ యుద్ధం నేపథ్యంలో ఓ ఘటనకు సంబంధించి లెబనాన్‌కు ఐడీఎఫ్‌ క్షమాపణలు చెప్పింది. హెజ్‌బొల్లా సాయుధ గ్రూపును లక్ష్యంగా చేసుకుని జరిపిన దాడిలో పొరపాటున లెబనాన్‌ సైనికుడు మృతి చెందాడు. తొలుత ఇజ్రాయెల్‌ సైన్యం అడెస్సే ప్రాంతంలో జరిపిన బాంబు దాడిలో తమ సైనికుడు మృతి చెందినట్లు లెబనాన్‌ ఆర్మీ ప్రకటించింది. దీనిపై ఇజ్రాయెల్‌ డిఫెన్స్‌ ఫోర్సెస్‌ (ఐడీఎఫ్‌) స్పందిస్తూ.. తాము హెజ్‌బొల్లా లాంచ్‌, అబ్జర్వేషన్‌ పోస్టును లక్ష్యంగా చేసుకొని దాడి చేశామని వివరణ ఇచ్చింది. కానీ, ఈ దాడిలో అనుకోకుండా పలువురు లెబనాన్‌ సైనికులు గాయపడినట్లు తమకు తెలిసిందని పేర్కొంది. వాస్తవానికి ఆ దాడిలో లెబనాన్‌ సైన్యం తమ లక్ష్యం కాదని వెల్లడించింది. ‘‘ఈ ఘటనకు ఐడీఎఫ్‌ క్షమాపణలు చెబుతోంది. దీనిపై దర్యాప్తు చేపట్టనుంది’’ అని ఇజ్రాయెల్‌ సైన్యం ప్రకటించింది. మరోవైపు ఐరాస శాంతి పరిరక్షక దళం దీనిపై స్పందిస్తూ.. ప్రస్తుత యుద్ధంలో లెబనాన్‌ సైనికదళాలు పాల్గొనడం లేదని పేర్కొంది.

ఐడీఎఫ్‌ మాత్రమే గాజాను నిరాయుధీకరణ చేయగలదు: నెతన్యాహు

ప్రస్తుత యుద్ధం తర్వాత గాజాను నిరాయుధీకరించాల్సి ఉందని ఇజ్రాయెల్‌ ప్రధాని నెతన్యాహు ప్రకటించారు. మంగళవారం అర్ధరాత్రి ఆయన ప్రస్తంగిస్తూ.. ఐడీఎఫ్‌ (ఇజ్రాయెల్‌ డిఫెన్స్‌ ఫోర్సెస్‌) మాత్రమే అది చేయగలదన్నారు. ఏ అంతర్జాతీయ దళానికి ఈ బాధ్యతలు అప్పగించబోమని తేల్చిచెప్పారు. గతంలో కూడా అంతర్జాతీయ దళాలు గాజాలో అంతగా ప్రభావం చూపించలేకపోయాయని గుర్తు చేశారు. అందుకే అటువంటి ఏర్పాట్లను తాము అంగీకరించమని వెల్లడించారు.

‘దేశాన్ని ఏడిపిస్తూ.. తాను ఏడుస్తూ’: కన్నీళ్లు పెట్టుకున్న కిమ్‌.. వీడియో వైరల్‌

ప్రస్తుతం గాజాలో చేపట్టిన ఆపరేషన్‌లో తమ సైన్యం పైచేయి సాధించిందని నెతన్యాహు పేర్కొన్నారు. హమాస్‌ సంస్థలోని సగానికిపైగా బెటాలియన్‌ కమాండర్లను ఇప్పటికే ఇజ్రాయెల్‌ దళాలు హతమార్చాయని ఆయన వెల్లడించారు. తమ దళాలు గాజాలోని ఖాన్‌యూనిస్‌, జబల్య పట్టణాలను చుట్టుముట్టాయని పేర్కొన్నారు. 

హమాస్‌ అత్యాచారాలను ఖండించిన బైడెన్‌..

అక్టోబర్‌ 7వ తేదీన ఇజ్రాయెల్‌లోని మహిళలపై హమాస్‌ దళాలు జరిపిన అత్యాచారాలను అమెరికా అధ్యక్షుడు జోబైడెన్‌ ఖండించారు. ‘‘ఈ దాడిలో బాధితులు భయంకరమైన వివరాలను వెల్లడించారు. ‘హమాస్‌ ఉగ్రవాదులు జరిపిన లైంగిక హింసను నిస్సందేహంగా అందరూ బలంగా ఖండించాల్సిందే’’ అని బైడెన్‌ పేర్కొన్నారు. హమాస్‌ చర్యలపై డెమొక్రటిక్‌ పార్టీ ప్రతినిధి ప్రమీలా జైపాల్‌ సరైన విధంగా స్పందించలేదన్న విమర్శలు రావడంతో బైడెన్‌ స్వయంగా ప్రకటన చేయాల్సి వచ్చింది.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని