israel: సిరియాలోని ఇరాన్‌ ఎంబసీపై ఇజ్రాయెల్‌ వైమానిక దాడి.. పలువురు మృతి

డమాస్కస్‌: సిరియా రాజధాని డమాస్కస్‌లో ఉన్న ఇరాన్‌ (Iran) రాయబార కార్యాలయ కాన్సులర్‌ విభాగంపై ఇజ్రాయెల్‌ (Israel) వైమానిక దాడి చేసింది. ఈ ఘటనలో ఇరాన్‌కు చెందిన సీనియర్‌ సైనిక సలహాదారుతో పాటు ఇతర సిబ్బంది మృతి చెందారు. ఈ విషయాన్ని సిరియా అధికారులు, అక్కడి స్థానిక మీడియా వెల్లడించింది. దాడి ఘటనలో కుప్పకూలిన కాన్సులర్‌ భవనం పక్కనే రాయబార కార్యాలయం ఉంది. ఈ దాడిలో చనిపోయిన ఇరాన్‌ మిలిటరీ సలహాదారు జనరల్‌ అలీ రెజా జెహ్‌దీ 2016 వరకు లెబనాన్‌, సిరియా దేశాల్లో ఖుద్స్‌ బలగాలకు నేతృత్వం వహించారు. ప్రస్తుతం దాడి జరిగిన ప్రాంతంలో సహాయ చర్యలు కొనసాగుతున్నాయి.   

దాడి ఘటనపై ఇజ్రాయెల్‌ స్పందించలేదు. ఈ ఘటనను ఇరాన్‌ రాయబారి హొస్సేన్‌ అక్బరీ ఖండించారు. ఏడుగురు చనిపోయినట్లు ఆయన తెలిపారు. భవనానికి కాపాలాగా ఉన్న ఇద్దరు పోలీసులు సైతం గాయపడినట్లు పేర్కొన్నారు. ఇజ్రాయెల్‌ ప్రతిదాడి ఎదుర్కోక తప్పదని, ఇంతే స్థాయిలో ప్రతీకారం తీర్చుకుంటామని హెచ్చరించారు. ఈ ఘటనను ప్రపంచమంతా ఖండించాలని ఇరాన్‌ విదేశాంగ అధికార ప్రతినిధి పేర్కొన్నారు.