Literary Award: చాట్‌జీపీటీ సాయంతో నవల.. రచయిత్రికి దేశ అత్యున్నత సాహిత్య పురస్కారం!

ఇంటర్నెట్‌ డెస్క్‌: రీ కుడాన్‌ (33) అనే జపాన్‌ నవలా రచయితను ఆ దేశ అత్యున్నత సాహిత్య పురస్కారం (Akutagawa Prize) వరించింది. ‘టోక్యో-టు డోజో-టు (Tokyo Sympathy Tower)’ పేరుతో రాసిన సైన్స్‌ ఫిక్షన్‌ నవలకు ఈ ఉత్తమ అవార్డు వచ్చింది. ఈ పుస్తకంపై న్యాయనిర్ణేతలు కూడా ప్రశంసలు గుప్పించారు. తాజాగా దీనిపై ఆ రచయిత్రి స్పందిస్తూ.. తన నవలలో కొంతమేరకు చాట్‌ జీపీటీ (ChatGPT)ని ఉపయోగించినట్లు అంగీకరించారు. దీంతో ఈ అంశం కాస్త చర్చనీయాంశమయ్యింది.

‘చాట్‌జీపీటీ వంటి కృత్రిమమేధను ఉపయోగించుకొని ఈ నవలను రాశా. ఈ పుస్తకంలో దాదాపు 5శాతం ఏఐ నుంచి నేరుగా సేకరించిందే. నా సృజనాత్మకతను మరింత వ్యక్తీకరించడానికి సాంకేతికతను ఉపయోగించుకోవాలని భావిస్తున్నా’ అని రీ కుడాన్‌ పేర్కొన్నారు. భారీ జైలును సృష్టించే క్రమంలో ఓ ఆర్కిటెక్టుకు ఎదురైన సమస్యల చుట్టూ తిరిగే ఈ నవలపై మిశ్రమ స్పందన వస్తోంది.

కళాకారులు, రచయితలు కృత్రిమ మేధను ఉపయోగించే అంశం ప్రపంచవ్యాప్తంగా భిన్నాభిప్రాయాలు వ్యక్తమవుతున్నాయి. జపాన్‌ రచయిత్రే కాకుండా జర్మనీ కళాకారుడు ఏఐని వినియోగించి తీసిన ఓ ఫొటోగ్రఫీ ప్రతిష్ఠాత్మక అవార్డు గెలుచుకోవడం గతంలో వివాదాస్పదమైంది. నిర్వాహకులు ఆ కళాకారుడిపై తొలుత అసంతృప్తి వ్యక్తం చేసినప్పటికీ.. చివరకు అతడి వివరణతో వెనక్కి తగ్గారు. ఏఐపై చర్చ జరగాలన్న ఉద్దేశంతోనే దరఖాస్తు చేసుకున్నానని చెప్పిన ఆయన చివరకు ఆ అవార్డును తిరస్కరించారు.