Kate Middleton: ఇక కేట్‌ మిడిల్టన్‌ రాచరిక విధులకు తిరిగిరారా..?

లండన్: బ్రిటన్ యువరాజు విలియం సతీమణి, ప్రిన్సెస్‌ ఆఫ్ వేల్స్ కేట్‌ మిడిల్టన్ (Kate Middleton) క్యాన్సర్‌ (Cancer) బారినపడిన సంగతి తెలిసిందే. అప్పటినుంచి ఆమె గురించి ఎన్నో వార్తలు ప్రచారం అవుతున్నాయి. రాచరికవిధులకు ఎప్పటికీ తిరిగిరారన్నది తాజా కథనం. అమెరికాకు చెందిన ఓ మీడియా సంస్థ దీనిని ప్రచురించింది. ప్రజలు ఇంతకుముందు చూసిన విధంగా ఆమె కనిపించరని పేర్కొంది.

కేట్‌ (Kate Middleton) శస్త్రచికిత్స చేయించుకున్నారని జనవరిలో ప్రిన్స్‌ అండ్‌ ప్రిన్సెస్‌ ఆఫ్‌ వేల్స్‌ కార్యాలయం వెల్లడించిన సంగతి తెలిసిందే. ఆ తర్వాత క్యాన్సర్ బయటపడటంతో చికిత్స తీసుకుంటున్నారు. అప్పటి నుంచి ప్రజాజీవితానికి దూరంగా ఉన్నారు. అయితే తన ముగ్గురు పిల్లల విషయాలను మాత్రం చూసుకుంటున్నారని సన్నిహితవర్గాలు వెల్లడించాయి. ఆమె బాగానే కోలుకుంటున్నప్పటికీ.. రాచరిక విధులకు ఎప్పుడు వస్తారనే దానిపై స్పష్టత లేదని ఆ మీడియా సంస్థతో పేర్కొన్నాయి.

వైద్యులు అనుమతించిన తర్వాతే విధులకు రావొచ్చని, వచ్చే ఏడాది వరకు సమయం పట్టొచ్చని మునుపటి కథనాలు పేర్కొన్నాయి. ‘‘ఈ ఏడాది మొత్తం ఆమె డైరీ ఖాళీగానే ఉంటుంది. ప్రస్తుతానికి ఎలాంటి ప్రణాళికలు వేసుకోలేదు’’ అని ఓ సన్నిహిత వర్గాన్ని ఉటంకించాయి. కొద్దినెలలుగా కేట్‌ బాహ్య ప్రపంచానికి కనిపించకపోయేసరికి.. కోమాలోకి వెళ్లిపోయుండొచ్చనే వదంతులు వ్యాప్తి చెందాయి. ఆ క్రమంలోనే ఆమె ఒక వీడియో సందేశం విడుదల చేశారు. ‘‘మా పిల్లల్ని దృష్టిలో ఉంచుకొని జాగ్రత్తగా వ్యవహరిస్తున్నాం. మీరంతా మా మీద చూపిన ప్రేమ మరువలేనిది. ఈ చికిత్స పూర్తయ్యేవరకు మా గోప్యతకు సహకరిస్తారని ఆశిస్తున్నాం’’ అని వెల్లడించారు.