North Korea: తొలిసారిగా నిఘా ఉపగ్రహాన్ని ప్రయోగించిన ఉత్తర కొరియా

సియోల్‌: తరచూ బాలిస్టిక్‌ క్షిపణులను (Ballistic Missile) ప్రయోగిస్తూ శత్రు దేశాలను హెచ్చరించే ఉత్తర కొరియా (North Korea).. తాజాగా తమ దేశ రక్షణ చర్యల్లో మరో ముందడుగు వేసింది. తొలిసారిగా ఒక నిఘా ఉపగ్రహాన్ని(Spy Satellite) భూకక్ష్యలోకి ప్రవేశపెట్టింది. ఈ విషయాన్ని దక్షిణ కొరియా, జపాన్‌ నిర్థరించినట్లు అంతర్జాతీయ మీడియా పేర్కొంది. ఈ ఉపగ్రహం రూపకల్పనలో రష్యా నుంచి ఉత్తరకొరియా సాంకేతిక సహకారం తీసుకున్నట్లు సమాచారం. కొరియన్‌ పెనిన్సులా, చైనా మధ్య ఉన్న సముద్రం మీదుగా ఈ రాకెట్‌ నింగిలోకి దూసుకెళ్లిందని దక్షిణ కొరియా సైనికాధికారులు తెలిపారు. ఈ రాకెట్‌ శకలాలు ఆసియా భూభాగంలోనే పడే అవకాశాలున్నాయన్నారు. 

గతంలో రెండు సార్లు నిఘా ఉపగ్రహాన్ని భూకక్ష్యలోకి ప్రవేశపెట్టేందుకు కిమ్‌ ప్రభుత్వం విఫలయత్నం చేసింది. ఈ సారి రష్యా సహకారంతో ప్రయోగాన్ని విజయవంతం చేసింది. దీంతో దక్షిణ కొరియా, జపాన్‌, అమెరికా దేశాలు తమ సైన్యాన్ని అప్రమత్తం చేశాయి. అమెరికా, దక్షిణ కొరియా సైనిక కార్యకలాపాలను గమనించడంతోపాటు అణ్వస్త్ర సామర్థ్యాలను మెరుగుపర్చుకునేందుకే ఉత్తర కొరియా ఈ రాకెట్‌ ప్రయోగాలు చేస్తోందని న్యూయార్క్‌ టైమ్స్‌ పేర్కొంది.