Pak-Bangladesh: పాక్, బంగ్లా మధ్య మరింత రక్షణ సహకారం

ఇస్లామాబాద్‌: రక్షణ రంగంలో మరింతగా సహకరించుకోవాలని పాకిస్థాన్, బంగ్లాదేశ్‌ నిర్ణయించుకున్నాయి. రెండు దేశాల మధ్య తరచూ సైనికాధికారుల పర్యటనలు కొనసాగాలని నిర్ణయం తీసుకున్నాయి. బంగ్లాదేశ్‌ పర్యటనలో ఉన్న పాకిస్థాన్‌ జాయింట్‌ చీఫ్స్‌ ఆఫ్‌ స్టాఫ్‌ కమిటీ ఛైర్మన్‌ జనరల్‌ సాహిర్‌ షంషద్‌ మీర్జా.. మంగళవారం బంగ్లా సైన్యాధిపతి జనరల్‌ వకీర్‌-ఉజ్‌-జమాన్‌తో సమావేశమయ్యారు. రెండు దేశాల మధ్య రక్షణ సహకారం విస్తరించడంపట్ల ఇందులో సంతోషం వ్యక్తమైంది. ‘ప్రాంతీయ, అంతర్జాతీయ భద్రత పరిస్థితులపై ఇరువురు సైనిక ప్రముఖులు చర్చించారు. రెండు దేశాల బంధాన్ని మరింత బలోపేతం చేయాల్సిన అవసరాన్ని గుర్తు చేసుకున్నారు. శిక్షణ, సంయుక్త విన్యాసాలు, ఉగ్రవాదాన్ని వ్యతిరేక పోరాటంలోని అనుభవాలను పంచుకోవడం వంటి అంశాలు చర్చకు వచ్చాయి’ అని మంగళవారం పాకిస్థాన్‌ సైన్యం అధికార ప్రతినిధి విడుదల చేసిన ప్రకటనలో పేర్కొన్నారు.