Pakistan: ఇమ్రాన్‌ పార్టీపై నిషేధం..? ఆ వార్తలకు సమాధానం ఇచ్చిన పాక్‌ మంత్రి

ఇస్లామాబాద్‌: పొరుగు దేశం పాకిస్థాన్‌(Pakistan)లో రాజకీయ అస్థిరత కొనసాగుతోంది. మాజీ ప్రధాని ఇమ్రాన్‌ ఖాన్(Imran Khan) అరెస్టు తర్వాత అది తీవ్రరూపం దాల్చింది. అరెస్టు తదనంతర పరిణామాలపై పాక్‌ ప్రభుత్వం ఆగ్రహంగా ఉంది. దేశంలోని ఘర్షణలకు ఇమ్రాన్‌ పార్టీ పీటీఐనే కారణమని, దానిని నిషేధించాలని యోచిస్తున్నట్లు వార్తలు వస్తున్నాయి. వాటిపై రక్షణ శాఖ మంత్రి ఖవాజా అసిఫ్ స్పందించారు. 

‘పీటీఐపై నిషేధం విధించే అంశం పరిశీలనలో ఉంది. ఆ పార్టీ దేశంలో తీవ్ర విధ్వంసం సృష్టించింది. గతంలో ఎన్నడూ అలా జరగలేదు. ఆ తీరును ఏ మాత్రం సహించలేం’ అని అసిఫ్ మండిపడ్డారు. అవినీతి ఆరోపణలపై మే 9న ఇమ్రాన్‌ ఖాన్‌(Imran Khan)ను అరెస్టు చేసిన సంగతి తెలిసిందే. ఆ తర్వాత ఆర్మీ, ప్రభుత్వ కార్యాలయాలపై నిరసనకారులు దాడులు చేశారు. కొన్నింటికి నిప్పంటించారు. దాంతో దాయాది దేశం రణరంగంలా మారిపోయింది. దాంతో భారీ సంఖ్యలో ఆందోళనకారులను ప్రభుత్వం అదుపులోకి తీసుకుంది. ఆ ఘటనలకు పాల్పడింది పీటీఐ కార్యకర్తలేనని అధికారపక్షం ఆరోపించింది. అయితే ఆ హింసతో తమకు ఏ సంబంధం లేదని పీటీఐ ఆ ఆరోపణలను తోసిపుచ్చుతోంది.