Pakistan: కమెడియన్‌ చెంప చెళ్లుమనిపించిన మహిళా సింగర్‌!

ఇంటర్నెట్‌ డెస్క్‌: పాకిస్థాన్‌కు (Pakistan) చెందిన ఓ కమెడియన్‌కు చేదు అనుభవం ఎదురయ్యింది. ఓ మహిళా సింగర్‌ చేతిలో చెంపదెబ్బలు తిన్నాడు. హనీమూన్‌కు  (Honeymoon) సంబంధించి గాయనిని సదరు కమెడియన్‌ ప్రశ్నించడంతో ఈ వివాదం మొదలయ్యింది. ఈ క్రమంలో తీవ్ర ఆగ్రహానికి గురైన ఆమె.. కమెడియన్‌ చెంప చెళ్లుమనిపించింది. లైవ్‌ షోలో జరిగిన ఈ వ్యవహారానికి సంబంధించిన వీడియో సామాజిక మాధ్యమాల్లో వైరల్‌గా మారింది.

Michelle Obama: బైడెన్‌కు ప్రత్యామ్నాయం మిషెల్‌ ఒబామా!

‘పబ్లిక్‌ డిమాండ్‌’ పేరుతో ఓ టీవీ ఛానెల్‌ నిర్వహించిన కార్యక్రమంలో పాకిస్థాన్‌ ప్రముఖ గాయని షాజియా మంజూర్‌, కమెడియన్‌ శేరీ నన్హాలు పాల్గొన్నారు. ఈక్రమంలో కమెడియన్‌ నన్హా నవ్వుతూ.. ‘మన వివాహం జరిగిన తర్వాత.. హనీమూన్‌ కోసం మోంటె కార్లోకు తీసుకెళ్తాను. ఏ క్లాస్‌లో వెళ్దామో చెప్తావా’ అంటూ షాజియాను అడిగాడు. దీంతో తీవ్ర ఆగ్రహానికి గురైన ఆమె.. అతడి చెంప చెళ్లుమనిపించింది. మహిళలతో ప్రవర్తించేది ఇలాగేనా అంటూ నిప్పులు చెరిగింది. గతంలోనూ అతడితో ఇటువంటి ఘటన ఎదురయ్యిందని వాపోయింది.

ఈ వివాదంలో జోక్యం చేసుకున్న నిర్వాహకులు ఆమెకు సర్దిచెప్పే ప్రయత్నం చేశారు. మరోసారి ఈ షోకు రానంటూ షాజియా అక్కడినుంచి వెళ్లిపోయారు. అయితే, ఈ వ్యవహారంపై సోషల్‌ మీడియాలో భిన్న వాదనలు వినిపిస్తున్నాయి. ఉద్దేశపూర్వకంగానే దీన్ని చిత్రీకరించి ఉండవచ్చని అనుమానం వ్యక్తంచేస్తూ పలువురు యూజర్లు కామెంట్లు పెట్టారు.