Iran Consulate: ఆగంతుకుడి అనుమానాస్పద కదలికలు.. ఇరాన్‌ కాన్సులేట్‌ వద్ద కలకలం!

పారిస్‌: ఫ్రాన్స్‌ (France) రాజధాని పారిస్‌లోని ఇరాన్‌ దౌత్య కార్యాలయం (Iran consulate) వద్ద శుక్రవారం కాసేపు ఉత్కంఠభరిత పరిస్థితులు కొనసాగాయి. పేలుడు పదార్థాలతో కూడిన జాకెట్‌ ధరించిన ఓ వ్యక్తి గ్రనేడ్‌ పట్టుకుని టెహ్రాన్‌ కాన్సులేట్‌ వద్ద తిరుగుతున్నట్లు సమాచారం అందడంతో అధికారులు అప్రమత్తమయ్యారు. పోలీసులు, ప్రత్యేక ఏజెంట్లు, అగ్నిమాపక సిబ్బంది హుటాహుటిన రంగంలోకి దిగారు. ప్రత్యేక ఆపరేషన్‌ నిర్వహించి.. దౌత్య కార్యాలయం పరిసరాలను జల్లెడ పట్టారు.

ఇరాన్‌లో భారీ పేలుళ్లు.. అన్నంత పని చేసిన ఇజ్రాయెల్‌!

ఒకవైపు ఇరాన్‌- ఇజ్రాయెల్‌ల మధ్య పరస్పర దాడులతో పశ్చిమాసియాలో ఉద్రిక్త పరిస్థితులు, మరోవైపు ఒలింపిక్స్‌కు ఆతిథ్యం ఇచ్చేందుకు పారిస్ సిద్ధమవుతున్న తరుణంలో ఈ పరిణామం చోటుచేసుకోవడంతో అంతా ఉరుకులు పరుగులు పెట్టారు. ఎట్టకేలకు అనుమానితుడిని అదుపులోకి తీసుకున్నారు. అయితే.. అతడి వద్ద గానీ, వాహనంలో గానీ ఎలాంటి ఆయుధాలు లభించలేదని అధికారులు తెలిపారు. ఆ వ్యక్తి ఎవరో గుర్తించే పనిలో నిమగ్నమైనట్లు చెప్పారు. కాన్సులేట్‌ వద్ద ప్రత్యేక బందోబస్తు ఏర్పాటు చేశారు.