Khalistan protests: టొరంటోలో ఖలిస్థానీల నిరసన.. ప్రతిగా భారతీయుల ప్రదర్శన..!

ఇంటర్నెట్‌డెస్క్‌: కెనడా(Canada)లోని టొరంటో(Toronto) నగరంలో ఖలిస్థానీ మద్దతుదార్లు(Khalistan protests) ఆందోళన చేపట్టగా.. దీనికి దీటుగా భారత జాతీయులు కూడా స్పందించారు. శనివారం భారత కాన్సులేట్‌ కార్యాలయం ఎదుట ఇరు పక్షాలు పోటాపోటీగా జెండాలను పట్టుకొని ప్రదర్శనకు దిగాయి. తొలుత ఖలిస్థానీలు ఇక్కడకు వచ్చి ఆందోళన చేపట్టగా.. భారత్‌కు మద్దతుగా కూడా ప్రదర్శనలు మొదలయ్యాయి. 

మరోవైపు జులై 8వ తేదీన ఆందోళనలు చేపట్టాలని గత కొన్ని రోజులుగా ఖలిస్థాన్‌ మద్దతుదార్లు ఆన్‌లైన్‌లో ప్రచారం చేపట్టిన విషయం తెలిసిందే. ఈ నేపథ్యంలో అమెరికాలోని వాషంగ్టన్‌ డీసీలో ఉన్న భారత దౌత్యకార్యాలయానికి భద్రతను పెంచారు. ఇక్కడ కూడా ఖలిస్థాన్‌ మద్దతుదార్లు ఆందోళన చేపట్టే అవకాశం ఉన్నట్లు సమాచారం అందడంతో ఈ చర్యలు తీసుకున్నారు. ఇప్పటి వరకు ఎటువంటి అవాంఛనీయ ఘటన చోటు చేసుకోలేదు. భారత దౌత్యవేత్త తరణ్‌జీత్‌ సింగ్‌ సంధు ఎంబసీ వద్ద పరిస్థితిని పర్యవేక్షించారు.

• ఇదీ చదవండి: అబద్ధాలు చెప్పడంలో వీరే నంబర్‌ వన్‌

జులై 2వ తేదీ వేకువజాములో ఖలిస్థాన్‌ మద్దతుదారులు శాన్‌ఫ్రాన్సిస్కో(San Francisco) దౌత్యకార్యాలయానికి నిప్పంటించారు. అయితే, స్థానిక అగ్నిమాపక విభాగం వేగంగా స్పందించి మంటల్ని ఆర్పేశారు. ఈ ఘటనలో దౌత్య సిబ్బందికి ఎలాంటి గాయాలు కాలేదని అధికారులు తెలిపారు. అయితే, ఈ దాడిపై అమెరికా స్పందించింది. ‘దౌత్యకార్యాలయంపై విధ్వంసానికి పాల్పడటం, దహనం చేయడానికి చేసిన యత్నాలను అమెరికా తీవ్రంగా ఖండిస్తోంది. దౌత్యకార్యాలయాలు, విదేశీ దౌత్యవేత్తలపై హింసకు పాల్పడటం వంటి చర్యలను అమెరికాలో తీవ్ర నేరాలుగా పరిగణిస్తాం’అని యూఎస్‌ విదేశాంగ ప్రతినిధి మాథ్యూ మిల్లర్ అప్పట్లో ట్వీట్ చేశారు.