Zelensky: ఉక్రెయిన్‌పై రష్యా భీకర దాడి.. 50 మంది మృతి!

కీవ్‌: ఉక్రెయిన్‌- రష్యా యుద్ధ సంక్షోభం ఎంతకూ తెగడం లేదు! సైనిక చర్య పేరిట ఉక్రెయిన్‌ (Ukraine)పై పుతిన్‌ సేనలు దాడులు మొదలుపెట్టి ఇప్పటికే 19 నెలలు దాటింది. ఈ క్రమంలోనే మాస్కో మరోసారి విరుచుకుపడింది. ఖర్కివ్‌ (Kharkiv) ప్రాంతంలోని ఓ దుకాణం, కెఫెపై జరిపిన క్షిపణి దాడిలో 50 మంది మృతి చెందారు. మరో ఆరుగురు గాయపడ్డారు. ఇటీవలి నెలల్లో అత్యంత భీకర దాడి ఇదే. ఉక్రెయిన్‌ అధ్యక్షుడు జెలెన్‌స్కీ (Zelenskyy) ఈ ఘటనను తీవ్రంగా ఖండించారు. ‘రష్యన్‌ క్షిపణి దాడి క్రూరమైన నేరం. ఇది ఉద్దేశపూర్వకంగా జరిపిన ఉగ్రవాద దాడి’ అని రష్యాపై మండిపడ్డారు.

ఇరాన్‌ అక్రమ ఆయుధాలు ఉక్రెయిన్‌కు.. అమెరికా కీలక నిర్ణయం

ఖర్కివ్‌ రీజియన్‌ కుపియాన్స్క్‌ జిల్లాలోని గ్రోజా గ్రామంపై ఈ దాడి జరిగింది. ఈ ప్రాంతం రష్యా సరిహద్దులో ఉంది. గతేడాది ఇక్కడ కోల్పోయిన భూభాగాన్ని తిరిగి స్వాధీనం చేసుకునేందుకు మాస్కో దళాలు తీవ్రంగా ప్రయత్నిస్తున్నాయి. మృతుల్లో ఆరేళ్ల బాలుడూ ఉన్నట్లు స్థానిక గవర్నర్‌ వెల్లడించారు. ఈ క్రమంలోనే సహాయక చర్యలు చేపట్టేందుకు సంబంధిత బృందాలు రంగంలోకి దిగాయి. మరోవైపు.. ఈయూ సమావేశాల నేపథ్యంలో ప్రస్తుతం స్పెయిన్‌లో ఉన్న జెలెన్‌స్కీ.. ఉక్రెయిన్ గగనతల రక్షణ వ్యవస్థ బలోపేతానికి సాయం చేయాలని పాశ్చాత్య మిత్రదేశాలను అభ్యర్థించారు.