Shehbaz Sharif: సౌదీ యువరాజుతో పాక్‌ ప్రధాని భేటీ.. ‘కశ్మీర్‌’ అంశంపై చర్చ

ఇంటర్నెట్‌ డెస్క్‌: పాకిస్థాన్‌ (Pakistan) ప్రధానమంత్రి షెహబాజ్‌ షరీఫ్‌ (Shehbaz Sharif) రెండోసారి పదవి చేపట్టిన అనంతరం తొలిసారి విదేశీ పర్యటన చేపట్టారు. సౌదీ అరేబియాకు వెళ్లిన ఆయన యువరాజు మహ్మద్‌ బిన్‌ సల్మాన్‌ (Mohammed bin Salman)తో భేటీ అయ్యారు. ఈసందర్భంగా ‘కశ్మీర్‌’ అంశంపైనా ఇరువురు నేతలు చర్చించినట్లు సంయుక్త ప్రకటనలో వెల్లడించాయి.

ఇరు దేశాల ప్రయోజనాలతో పాటు అంతర్జాతీయ పరిణామాలపై ఇరువురు నేతలు చర్చించారు. ద్వైపాక్షిక సంబంధాలు, వివిధ రంగాల్లో అభివృద్ధిపై ఉన్న అవకాశాలను సమీక్షించారు. ఈ క్రమంలో జమ్ముకశ్మీర్‌ అంశంపై చర్చలు జరిపారు. ఈ విషయాన్ని ఇరుదేశాలు ఓ ప్రకటనలో వెల్లడించాయి. భారత్‌- పాకిస్థాన్‌ నడుమ అపరిష్కృతంగా ఉన్న సమస్యల పరిష్కార మార్గాలపై చర్చించినట్లు తెలిపాయి. ముఖ్యంగా జమ్ముకశ్మీర్‌ వివాదాన్ని ప్రస్తావించారట. ఆ ప్రాంతంలో శాంతి, స్థిరత్వం నెలకొనడానికి రెండు దేశాలు జరపాల్సిన చర్చల అవసరం ఉందని అభిప్రాయపడినట్లు సమాచారం.

ఉగ్రవాదులను వదలబోమంటూ భారత రక్షణశాఖ మంత్రి రాజ్‌నాథ్‌ సింగ్‌ హెచ్చరికలపై పాకిస్థాన్‌ స్పందించింది. దానిని ఖండిస్తున్నట్లు పేర్కొన్న పాక్‌.. భారత్‌తో ఉన్న వివాదాల పరిష్కారానికి చర్చలు అవసరమని తెలిపింది. కాగా ఈ సమావేశంలో సౌదీ ప్రధానితో చర్చించిన అంశాలను పాక్‌ విదేశాంగ మంత్రిత్వ శాఖ ఓ ప్రకటనలో వెల్లడించింది.