Starship: ప్రపంచంలోనే అతిపెద్ద రాకెట్‌.. చివరి క్షణంలో ప్రయోగం వాయిదా!

వాషింగ్టన్‌: అంతరిక్ష రంగంలో చరిత్ర సృష్టించాలనుకున్న ఎలాన్‌ మస్క్‌(Elon Musk)కు చెందిన ‘స్పేస్‌ఎక్స్‌ (SpaceX)’ సంస్థకు మరింత నిరీక్షణ తప్పేలా లేదు. ప్రపంచంలోనే అతిపెద్ద రాకెట్‌ ప్రయోగానికి అన్ని సిద్ధం చేసుకోగా.. చివరి క్షణంలో వాయిదా పడింది. సాంకేతిక కారణాలతో ప్రయోగాన్ని వాయిదా వేసినట్లు తెలుస్తోంది. తమ రాకెట్‌ను తిరిగి ఎప్పుడు ప్రయోగిస్తామనేది త్వరలో వెల్లడిస్తామని ‘స్పేస్‌ఎక్స్‌’ సంస్థ ట్వీట్‌ చేసింది.

రెండు సెక్షన్ల (బూస్టర్‌, స్పేస్‌క్రాఫ్ట్‌) ఈ ‘స్టార్‌షిప్‌ (Starship)’ రాకెట్‌ పొడవు ఏకంగా 120 మీటర్లు(400 అడుగులు) ఉండటం గమనార్హం. అమెరికా దక్షిణ టెక్సాస్‌లోని బోకా చీకా తీరం నుంచి భారత కాలమానం ప్రకారం సాయంత్రం 6.50 సమయంలో ఇది నింగిలోకి దూసుకెళ్లాల్సింది. కానీ, చివరి క్షణంలో ప్రయోగం వాయిదా పడింది. ప్రస్తుతానికి దీన్ని టెస్ట్‌- ఫ్లైట్‌ కోసమే ప్రయోగించనున్నారు.

ఈ భారీ వ్యోమనౌక దాదాపు 250 టన్నుల బరువును మోయగలదు. 100 మందిని అంతరిక్షయానానికి తీసుకెళ్లగలదు. చంద్రుడు, అంగారకుడిపై యాత్రలకు వీలుగా దీన్ని రూపొందించినట్లు తెలుస్తోంది. దాదాపు గంటన్నర పాటు సాగే టెస్ట్‌ ఫ్లైట్‌లో భాగంగా.. ప్రయోగం ప్రారంభమైన మూడు నిమిషాలకు బూస్టర్ విడిపోయి గల్ఫ్ ఆఫ్ మెక్సికోలో పడేలా దీన్ని రూపొందించారు. స్పేస్‌క్రాఫ్ట్‌ మాత్రం భూమి చుట్టు దాదాపు ఒక పరిభ్రమణం సాగించి, హవాయి సమీపంలో పడిపోయేలా తయారుచేశారు.