Ukraine: బేకరీపై భీకర దాడి.. 28 మంది మృతి!

కీవ్‌: ఉక్రెయిన్‌ (Ukraine)లోని రష్యా ఆక్రమిత లుహాన్స్క్‌ ప్రాంతంపై భీకర దాడి జరిగింది. ఈ ఘటనలో లిసిచాన్స్క్‌ నగరంలోని ఓ బేకరీ ధ్వంసం కాగా.. దాదాపు 28 మంది మృతి చెందారు. మరణించిన వారిలో ఓ చిన్నారి కూడా ఉన్నట్లు రష్యా (Russia) అధికారులు వెల్లడించారు. శిథిలాల కింద చిక్కుకుపోయిన మరో 10 మందిని కాపాడినట్లు తెలిపారు. ఇది కీవ్‌ బలగాల పనేనని ఆరోపించారు. ఈ ఘటనపై ఉక్రెయిన్‌ ఇంకా స్పందించలేదు.

పశ్చిమాసియాలో అమెరికా ప్రతీకార దాడులు

మరోవైపు.. మాస్కో దళాలు సుమీ ప్రాంతంలో 16 చోట్ల దాడులు చేశాయని కీవ్‌ సైన్యాధికారులు ఆదివారం వెల్లడించారు. గత నెలలోనూ డొనెట్స్క్‌లోని ఓ మార్కెట్‌పై జరిగిన క్షిపణి దాడిలో 27 మంది మృతి చెందిన విషయం తెలిసిందే. ఇరుదేశాల మధ్య యుద్ధం మొదలై దాదాపు రెండేళ్లవుతున్నా.. పరిస్థితులు సద్దుమణగడం లేదు. యుద్ధం ఎప్పుడు ముగుస్తుందో చెప్పలేమని ఉక్రెయిన్‌ అధ్యక్షుడు జెలెన్‌స్కీ ఇటీవల వ్యాఖ్యానించారు.