Ukraine: కుమారుడికి బర్త్‌డే గిఫ్ట్‌గా గ్రనేడ్‌.. అది కాస్తా పేలి మిలటరీ అడ్వైజర్‌ మృతి..!

ఇంటర్నెట్‌డెస్క్‌: తన కుమారుడికి గ్రనేడ్‌ను చూపించే క్రమంలో ఉక్రెయిన్‌ (Ukraine) అత్యున్నత సైనిక అడ్వైజర్‌ ఒకరు ప్రాణాలు కోల్పోయారు. అతడు ఆ దేశ మిలటరీ కమాండర్‌ ఇన్‌ చీఫ్‌కు సలహాదారుడిగా వ్యవహరిస్తున్నాడు. ఈ ఘటన సోమవారం చోటు చేసుకొంది. ‘‘నా స్నేహితుడు, సహాయకుడు మేజర్‌ హెన్నాడి చెస్ట్యకోవ్‌ విషాదకర పరిస్థితుల్లో ప్రాణాలు కోల్పోయాడు. అతడికి వచ్చిన బహుమతుల్లో గుర్తు తెలియని పరికరం పేలి మృతి చెందాడు’’ అని జనరల్‌ వాలేరి జలుజ్నీ ప్రకటించారు.

మరో వైపు ఈ ఘటనపై ఆ దేశ ఇంటరీయర్‌ మినిస్టర్‌ ఇగోర్‌ క్లైమెంకో వివరాలను వెల్లడించారు. ‘‘హెన్నాడి కుమారుడి పుట్టిన రోజు సందర్భంగా బహుమతుల రూపంలో ఒక గ్రనేడ్‌ల పెట్టె వచ్చింది. దీనిని అతడు తన కుమారుడికి చూపించాడు. ఆ సమయంలో ఆ బాలుడు గ్రనేడ్‌ను చేతిలోకి తీసుకొని రింగ్‌ను పట్టుకొని తిప్పడం మొదలుపెట్టాడు. దీంతో భయపడిన అతడు కుమారుడి వద్ద నుంచి గ్రనేడును తీసుకొని దూరంగా వెళ్లాడు. ఈ క్రమంలో అది పేలింది. హెన్నాడికి దానిని ఎవరు గిఫ్ట్‌గా ఇచ్చారో గుర్తించాం. మరి కొన్ని గ్రనేడ్లు కూడా ఆ బహుమతుల్లో  ఉన్నట్లు కనుగొన్నాం. దర్యాప్తు కొనసాగుతోంది’’ అని వెల్లడించారు. ఈ ఘటనలో 13 ఏళ్ల హెన్నాడి కుమారుడు కూడా తీవ్రంగా గాయపడ్డాడు.

తొలుత పోలీసులు దీనిని గిఫ్ట్‌బాంబు ఘటనగా అనుమానించారు. కానీ, ఆ తర్వాత అది సహచరుడి నుంచి అందిన బహుమతిగా గుర్తించారు.  మృతుడికి భార్య, నలుగురు పిల్లలు ఉన్నారు. రష్యాతో యుద్ధం మొదలైన నాటి నుంచి అతడు చురుగ్గా ఉక్రెయిన్‌ సైనిక వ్యూహాలను నడుపుతున్నాడు. గతేడాది ఇలానే ఓ బొమ్మలో పేలుడు పదార్థాలను ఉంచి క్రెమ్లిన్‌ సన్నిహితుడిగా పేరున్న ఓ మిలటరీ బ్లాగర్‌కు పంపారు. అది పేలి అతడు ప్రాణాలు కోల్పోయిన విషయం తెలిసిందే.