Ukraine: ఉక్రెయిన్‌ ఎదురుదాడి ప్రారంభం.. బఖ్‌ముత్‌లో ముందుకు

జపొరీజియాలో ఆఖరి రియాక్టరూ మూసివేత

కీవ్‌: ఉక్రెయిన్‌ భారీస్థాయిలో రష్యాపై ఎదురుదాడి ప్రారంభించింది. డొనెట్స్క్‌, బఖ్‌ముత్‌ సహా చాలా ప్రాంతాల్లో తమ దళాలు ముందుకు దూసుకుపోతున్నాయని కీవ్‌ తెలిపింది. ముఖ్యంగా బఖ్‌ముత్‌లో మాస్కో దళాలను వెనక్కి నెడుతున్నట్లు ప్రకటించింది. ఈ నగరాన్ని తాము పూర్తిగా కైవసం చేసుకున్నామని గత వారం రష్యా ప్రకటించిన సంగతి తెలిసిందే. మరోవైపు శత్రువు భారీస్థాయి ఎదురుదాడి విఫలమైందని రష్యా అధ్యక్షుడు వ్లాదిమిర్‌ పుతిన్‌ పేర్కొన్నారు. కీవ్‌ దళాలను నిలువరిస్తున్నామని, అవి ముందుకు కదలడం లేదని.. అనుకున్న లక్ష్యాలను అవి సాధించలేదని తెలిపారు. మరోవైపు జపొరీజియా అణువిద్యుత్కేంద్రానికి సంబంధించి కీలక ప్రకటన వెలువడింది. ఆఖరి అణురియాక్టర్‌ కార్యకలాపాలను కూడా నిలిపివేసినట్లు ఉక్రెయిన్‌ అణు సంస్థ ఎనర్గో ఆటమ్‌ తెలిపింది. కఖోవ్కా డ్యాం పేల్చివేతతో ఈ నిర్ణయం తీసుకున్నట్లు తెలుస్తోంది.