Mumbai: ముంబయిలోకి వచ్చే లైట్‌ మోటార్‌ వాహనాలకు నో టోల్‌ ఫీజు: ఏక్‌నాథ్ శిందే

మహారాష్ట్ర అసెంబ్లీ ఎన్నికలు సమీపిస్తున్న వేళ ఏక్‌నాథ్ శిందే ప్రభుత్వం కీలక ప్రకటన చేసింది. ముంబయిలోకి ప్రవేశించే లైట్ మోటార్ వాహనాలకు ఇకపై టోల్ ఫీజు ఉండబోదని ప్రకటించింది. ముంబయిలో సీఎం శిందే నేతృత్వంలో జరిగిన మంత్రివర్గ సమావేశంలో ఈ నిర్ణయం తీసుకున్నారు. ముంబయి నగరంలోకి ప్రవేశించే టోల్‌ ప్లాజాల వద్ద లైట్ మోటార్ వాహనాలకు ఇకపై టోల్ ఫీజు వసూలు చేయబోమని సీఎం శిందే తెలిపారు. కార్లు, ఎస్ యూవీలకు మాత్రమే ఈ నిర్ణయం వర్తిస్తుందని వెల్లడించారు. ఈ అర్ధరాత్రి నుంచే ఉత్తర్వులు అమల్లోకి వచ్చాయని పేర్కొన్నారు. అలాగే, మహారాష్ట్ర స్టేట్ స్కిల్‌ డెవలప్‌మెంట్  సెంటర్‌కు దివగంత పారిశ్రామికవేత్త రతన్ టాటా పేరును పెట్టేందుకు మంత్రివర్గం ఆమోదం తెలిపినట్లు చెప్పారు.