Breaking | Feedback | ePratibha | E-PAPER | Pratibha

తెదేపా నేతలపై వైకాపా నాయకుల దాడి

Updated : 12 Jul 2023 01:24 IST

12/07/2023 00:52(IST)

తెదేపా నేతలపై వైకాపా నాయకుల దాడి

అనంతపురం జిల్లా తాడిపత్రిలో తెదేపా నాయకులపై వైకాపా నాయకులు దాడి చేశారు. ఈ దాడిలో నలుగురికి తీవ్రగాయాలయ్యాయి. వైకాపాకు వ్యతిరేకంగా విలేకర్ల సమావేశం నిర్వహించిన తెదేపా నేతలపై దాడులు జరిగాయి. గన్నేవారిపల్లెలో అభివృద్ధి పనులు అడ్డగింతపై మీడియా సమావేశం నిర్వహించిన గోపాల్‌పై వైకాపా నాయకులు దాడి చేశారు. గాయపడిన గోపాల్‌ను తాడిపత్రి ఆసుపత్రికి తరలించారు. కత్తులు, కర్రలతో ఆసుపత్రికి వచ్చిన వైకాపా శ్రేణులు మరోసారి దాడికి పాల్పడ్డారు. ఆసుపత్రిలో లైట్లు ఆపి మరీ తెదేపా నేతలపై దాడి చేశారు.

12/07/2023 00:32(IST)

గ్రామ పంచాయతీ ఎన్నికల్లో తృణమూల్‌ కాంగ్రెస్‌ సత్తా

కోల్‌కతా: పశ్చిమ బెంగాల్‌ గ్రామ పంచాయతీ ఎన్నికల్లో అధికార తృణమూల్‌ కాంగ్రెస్‌ పార్టీ హవా కొనసాగుతోంది. రాష్ట్ర ఎన్నికల కమిషన్‌ వెల్లడించిన గణాంకాల ప్రకారం మంగళవారం రాత్రి 10.30 గంటల వరకు వెలువడిన ఫలితాల్లో టీఎంసీ 28,985 స్థానాల్లో విజయఢంకా మోగించింది. మరో 1,540 గ్రామ పంచాయతీల్లో ముందంజలో నిలిచింది. భాజపా 7,764 గ్రామ పంచాయతీలను కైవసం చేసుకోగా, 417 స్థానాల్లో ఆధిక్యంలో కొనసాగుతోంది. లెఫ్ట్‌ ఫ్రంట్‌ 2,468 గ్రామ పంచాయతీల్లో విజయం సాధించగా, సీపీఐ(ఎం) ఒంటరిగా 2,409 స్థానాలను కైవసం చేసుకుంది. మరో 260 స్థానాల్లో ఆధిక్యంలో నిలిచింది. ఇక కాంగ్రెస్‌ పార్టీ 2,022 స్థానాల్లో విజయం సాధించింది. 139 స్థానాల్లో ఆధిక్యంలో ఉంది. ఇక ఇతర పార్టీలు 725 పంచాయతీలను కైవసం చేసుకున్నారు. స్వంతత్ర అభ్యర్థులు, టీఎంసీ రెబెల్స్‌ 1,656 స్థానాల్లో గెలుపొందారు.

ఇక పంచాయతీ సమితి ఫలితాల్లో సైతం టీఎంసీ సత్తా చాటుతోంది. మొత్తం 9,728 స్థానాలకు నిర్వహించిన ఎన్నికల్లో ఆ పార్టీ 2,155 స్థానాల్లో విజయం సాధించింది. మరో 493 సమితిల్లో ముందంజలో ఉంది. భాజపా 214 స్థానాల్లో గెలిచింది. 113 స్థానాల్లో ఆధిక్యంలో ఉంది. సీపీఐ(ఎం) 47, కాంగ్రెస్‌ 38 స్థానాల్లో విజయం సాధించాయి. రాష్ట్ర వ్యాప్తంగా మొత్తం 63,329 గ్రామ పంచాయతీలకు ఎన్నికలు నిర్వహించారు.

11/07/2023 23:39(IST)

మనాలీ పర్యటనలో హైదరాబాద్‌ వాసులు.. సహాయం చేయాలని అభ్యర్థన

హైదరాబాద్‌: భారీ వర్షాలతో ఉత్తరాది రాష్ట్రాలు విలవిల్లాడుతున్నాయి. హిమాచల్‌ప్రదేశ్‌, పంజాబ్‌, దిల్లీ, హరియాణా, ఉత్తరాఖండ్‌ తదితర చోట్ల భారీ వరదలతో నదులన్నీ ఉప్పొంగుతున్నాయి. రోడ్లపై ఎక్కడికక్కడ నీరు చేరి ప్రజలు బిక్కుబిక్కుమంటున్నారు. హిమాచల్‌ ప్రదేశ్‌లోని మనాలిలో ప్రకృతి అందాలను చూసేందుకు వెళ్లి 30 మంది హైదరాబాద్‌ వాసులు అక్కడ చిక్కుకుపోయారు. భారీ వర్షాల కారణంగా కొండ చరియలు విరిగిపడుతుండడంతో వారు ఎటూపోలేక ఆందోళన చెందుతున్నారు. ఈసంఘటనకు సంబంధించి ఓ యువకుడు ట్విట్టర్లో పోస్ట్‌ చేశాడు. నాలుగురోజులుగా అక్కడే చిక్కుకుపోయామని, స్వస్థలాలకు చేరుకోవడానికి సహాయం చేయాలి అని ప్రభుత్వాన్ని సాయం కోరాడు.

11/07/2023 23:28(IST)

ఉచిత విద్యుత్ కాంగ్రెస్ పథకమే: బండ్ల గణేశ్‌

తానా మహాసభలో టీపీసీసీ అధ్యక్షుడు రేవంత్‌ రెడ్డి చేసిన వ్యాఖ్యలు తెలంగాణలో రాజకీయంగా దుమారం రేపుతున్నాయి. తాజాగా ఈ అంశంపై ప్రముఖ నిర్మాత బండ్ల గణేశ్ ట్విటర్‌ వేదికగా స్పందించారు. ‘ఉచిత విద్యుత్ కాంగ్రెస్ పథకమే. దానిపై పేటెంట్ హక్కు కాంగ్రెస్‌కే ఉంది. రేవంత్ రెడ్డి ఉచిత విద్యుత్ గురించి మాట్లాడిన మాటలను భారాస వక్రీకరించింది. తెలంగాణలో 8 గంటల ఉచిత విద్యుత్ సరిపోతుందని రేవంత్‌ అన్నారు. కానీ మేము 24 గంటలకు ఉచిత విద్యుత్ ఇచ్చి తీరుతాం. కాంగ్రెస్ ప్రభుత్వమే ఉచిత విద్యుత్ ప్రారంభించిన విషయం భారాస నాయకులు గుర్తుంచుకోవాలి. వైయస్‌ఆర్‌ ఉచిత విద్యుత్ కోసం పోరాటం చేస్తుంటే కేసీఆర్‌.. చంద్రబాబు పక్కన ఉన్నారు. కాంగ్రెస్ పార్టీ ఉచిత విద్యుత్‌కు కట్టుబడి ఉంది. మేము రైతు డిక్లరేషన్‌లో ఇచ్చిన హామీ మేరకు పని చేస్తాం. రేవంత్ రెడ్డి విద్యుత్ కొనుగోళ్లలో జరిగిన అక్రమాలపై మాత్రమే మాట్లాడారు’ అని బండ్ల ట్వీట్‌ చేశారు.

11/07/2023 23:19(IST)

గ్రామ పంచాయతీ ఎన్నికల్లో టీఎంసీ హవా

కోల్‌కతా: పశ్చిమ బెంగాల్‌ గ్రామ పంచాయతీ ఎన్నికల్లో అధికార తృణమూల్‌ కాంగ్రెస్‌ హవా కొనసాగుతోంది. సాయంత్రం 7.30 గంటల వరకు రాష్ట్ర ఎన్నికల కమిషన్‌ వెల్లడించిన గణాంకాల ప్రకారం 27,985 గ్రామ పంచాయతీల్లో ఫలితాలు వెలువడ్డాయి. వీటిలో టీఎంసీ 18,606 సీట్లను గెలుచుకోగా, మరో 8,180 పంచాయతీల్లో ఆధిక్యంలో ఉంది. ఇక విపక్ష భాజపా 4,482 పంచాయతీలను కైవసం చేసుకోగా, మరో 2,419 స్థానాల్లో ఆధిక్యంలో ఉంది. మొత్తం 63,329 గ్రామ పంచాయతీలకు ఎన్నికలు నిర్వహించారు.

11/07/2023 22:41(IST)

గుంటూరు నగరంలో వాలంటీర్లకు చేదు అనుభవం

గుంటూరు: గుంటూరు నగరంలో వాలంటీర్లకు చేదు అనుభవం ఎదురైంది. రింగురోడ్డులోని ఓ అపార్ట్‌మెంట్‌కు వెళ్లిన వాలంటీర్లు ఆధార్‌ డేటా బేస్ ఆధారంగా సమాచారం సేకరణకు ప్రయత్నించారు. గతంలో వచ్చి ఆధార్‌ వివరాలు తీసుకెళ్లారు.. మళ్లీ ఎందుకు వచ్చారంటూ అపార్ట్‌మెంట్‌ వాసులు నిలదీశారు. దాదాపు గంటకు పైగా వాలంటీర్లను నిర్బంధించారు. నగరపాలక సంస్థ అధికారులు విజ్ఞప్తి చేయడంతో స్థానికులు వారిని వదిలేశారు.

11/07/2023 22:31(IST)

రైలు ఢీకొని రెండు ఏనుగులు మృతి

కియోంఝార్‌: ఒడిశాలోని కియోంఝార్‌ జిల్లాలో గూడ్సు రైలు ఢీకొని రెండు ఏనుగులు మృతిచెందగా.. మరో ఏనుగుకు తీవ్ర గాయాలైనట్టు అటవీశాఖ అధికారులు వెల్లడించారు. ఈ ఘటన సోమవారం రాత్రి జఖర్‌పుర బన్సపాని రైల్వే లైన్‌లో బ్రాహ్మణిపాల్‌ ఫారెస్ట్‌ రేంజ్‌లో చోటుచేసుకుందన్నారు. ఏనుగుల గుంపు రైల్వే ట్రాక్‌ను దాటుతుండగా గూడ్సు రైలు ఢీకొట్టినట్టు తెలిపారు.

11/07/2023 22:26(IST)

హిమాచల్‌ ప్రదేశ్‌లో వరదలు.. దిల్లీ తెలంగాణ భవన్‌లో కంట్రోల్‌ రూమ్‌

హైదరాబాద్‌: హిమాచల్‌ ప్రదేశ్‌లోని పర్యాటక ప్రాంతాల్లో చిక్కుకున్న వారి కోసం న్యూదిల్లీలోని తెలంగాణ భవన్‌లో కంట్రోల్‌ రూమ్‌ ఏర్పాటు చేసినట్టు మంత్రి కేటీఆర్‌ తెలిపారు. ఏదైనా సమాచారంకోసం 9643723157, 9871999044 నెంబర్లలో సంప్రదించాలని సూచించారు.

11/07/2023 22:21(IST)

ప్రొద్దుటూరులో భారీగా నగదు స్వాధీనం

ప్రొద్దుటూరు నేరవార్తలు: వైఎస్సార్ జిల్లా ప్రొద్దుటూరులో ఎలాంటి ఆధారాలు లేని రూ.37.97 లక్షల నగదును పోలీసులు స్వాధీనం చేసుకున్నారు. స్థానిక అమ్మవారిశాల వీధిలో ఇద్దరు వ్యక్తులు అనుమానస్పదంగా ఉండటంతో పోలీసులు వారిని తనిఖీ చేశారు. ఒకరి వద్ద సంచిలో, మరొకరి వద్ద నడుముకున్న బెల్ట్ కవర్లో డబ్బులు ఉన్నట్లు గుర్తించారు. నగదుకు సంబంధించిన ఆధారాలు అడగ్గా చూపించకపోవడంతో స్వాధీనం చేసుకుని తిరుపతి ఆదాయపన్ను శాఖ అధికారులకు అప్పగించినట్టు ప్రొద్దుటూరు సీఐ రాజారెడ్డి తెలిపారు.

డబ్బుతో ఉన్న ఇద్దరు వ్యక్తులు తాడిపత్రికి చెందిన షేక్షావలి అలియాస్ నూర్, షాబుద్దీన్‌గా గుర్తించారు. షేక్షావలి తాడిపత్రిలో బంగారం దుకాణం నిర్వాహకుడు కాగా షాబుద్దీన్ ఆ షాపులో వర్కర్ గా పని చేస్తున్నాడని పోలీసులు తెలిపారు. వారిద్దరూ బంగారం కొనుగోలు చేసేందుకు ప్రొద్దుటూరు వచ్చినట్లుగా తెలుస్తోంది. పెద్ద మొత్తంలో బిల్లులు లేని నగదు గుర్తించిన సీఐ రాజారెడ్డి, ఎస్సై అమర్నాథ్ రెడ్డిలను ఏఎస్పీ ప్రేరణకుమార్ అభినందించారు.

11/07/2023 22:17(IST)

TS: సచివాలయంలో ప్రార్థనా మందిరాల ప్రారంభోత్సవ తేదీ ఖరారు

హైదరాబాద్: తెలంగాణ సచివాలయ ప్రాంగణంలో పునర్నిర్మించిన నల్ల పోచమ్మ దేవాలయం, మసీదు, చర్చిని వచ్చే నెల 25వ తేదీన ప్రారంభించనున్నారు. ఈ మేరకు ముఖ్యమంత్రి కేసీఆర్ ప్రారంభ తేదీని ఖరారు చేశారు. సంబంధిత మత పెద్దలను సంప్రదించి అందరికీ ఆమోదయోగ్యమైన తేదీని సీఎం ఖరారు చేశారు. సచివాలయ సంఘం కార్యవర్గంతోనూ ముఖ్యమంత్రి చర్చించారు. హిందూ సంప్రదాయాలను అనుసరించి పూజారుల సమక్షంలో నల్ల పోచమ్మ విగ్రహ ప్రతిష్ఠాపన చేసి దేవాలయాన్ని ముఖ్యమంత్రి పున:ప్రారంభించనున్నారు. ఇస్లాం, క్రిస్టియన్ మతాల సంప్రదాయాలను అనుసరించి ఆయా మత పెద్దల ఆధ్వర్యంలో మసీదు, చర్చిని ప్రారంభించనున్నారు.

11/07/2023 22:10(IST)

వైకాపా ఎమ్మెల్యే విక్రమ్‌రెడ్డికి చేదు అనుభవం

మర్రిపాడు: నెల్లూరు జిల్లా ఆత్మకూరు నియోజకవర్గ వైకాపా ఎమ్మెల్యే విక్రమ్‌రెడ్డికి మర్రిపాడు మండలంలో చేదు అనుభవం ఎదురైంది. గడపగడపకు మన ప్రభుత్వం కార్యక్రమంలో ఎమ్మెల్యేను మహిళల నిలదీశారు. గ్రామంలో మద్యం నిషేధించాలని కోరారు. గుంతల రోడ్లు, వీధి దీపాలు లేక ఇబ్బంది పడుతున్నామని ఆవేదన వ్యక్తం చేశారు.

11/07/2023 21:44(IST)

జూనియర్‌ పంచాయతీ కార్యదర్శులకు గుడ్‌ న్యూస్‌

హైదరాబాద్‌: తెలంగాణలోని జూనియర్‌ పంచాయతీ కార్యదర్శులకు (జేపీఎస్‌) ముఖ్యమంత్రి కేసీఆర్‌ గుడ్‌ న్యూస్‌ చెప్పారు. పంచాయతీ కార్యదర్శులను క్రమబద్ధీకరించాలని నిర్ణయించారు. నాలుగేళ్ల సర్వీసు కాలాన్ని పూర్తి చేసుకున్న ఉద్యోగులను రెగ్యులరైజ్‌ చేయాలని అధికారులను ఆదేశించారు. లక్ష్యాన్ని మూడింట రెండొంతులు చేరుకున్న వారిని క్రమబద్ధీకరించాలని సీఎం ఆదేశించారు. ఈ మేరకు ప్రొబేషన్‌ పూర్తయిన కార్యదర్శుల పనితీరును అధికారులు పరిశీలించనున్నారు.

11/07/2023 21:20(IST)

ఉచిత విద్యుత్‌ పేరుతో రైతులను మోసం చేస్తోన్న భారాస: సీతక్క

హైదరాబాద్‌: కాంగ్రెస్‌, భారాస మధ్య ఉచిత విద్యుత్‌ అంశంపై మాటల తూటాలు పేలుతున్నాయి. తానా సభల్లో పాల్గొనేందుకు అమెరికా వెళ్లిన పీసీసీ అధ్యక్షుడు రేవంత్‌రెడ్డి మీడియాతో మాట్లాడుతూ.. ఉచిత విద్యుత్‌పై చేసిన వ్యాఖ్యలు రాజకీయ వర్గాల్లో దుమారం రేపాయి. రేవంత్‌ వ్యాఖ్యలపై భారాస నేతలు తీవ్ర స్థాయిలో స్పందించారు. తాజాగా భారాస నేతల వ్యాఖ్యలపై ములుగు ఎమ్మెల్యే సీతక్క కౌంటర్‌ ఇచ్చారు. ఈమేరకు ట్విటర్‌లో ఓ వీడియో పోస్టు చేశారు. ‘‘భారాస ప్రభుత్వం 24 గంటల ఉచిత విద్యుత్‌ పేరుతో రైతులను మోసం చేస్తోంది. 12 గంటల నాణ్యమైన ఉచిత విద్యుత్‌ ఇవ్వడం లేదన్న విషయం ఏ సబ్‌ స్టేషన్‌కు వెళ్లినా తెలుస్తోంది. తొమ్మిదేళల్లో విద్యుత్‌ సంస్థలకు రూ.60వేల కోట్లు అప్పుల్లో ముంచిన ఘనుడు సీఎం కేసీఆర్‌’’ అని విమర్శించారు.

11/07/2023 20:58(IST)

వీఆర్‌ఏల సర్దుబాటుపై సీఎం కేసీఆర్‌ కీలక నిర్ణయం

హైదరాబాద్‌: గ్రామ రెవెన్యూ సహాయకులు(వీఆర్‌ఏ)ల విద్యార్హతలు, సామర్థ్యాల మేరకు నీటి పారుదల, ఇతర శాఖల్లో సర్దుబాటు చేయాలని సీఎం కేసీఆర్‌ ఆదేశించారు. సచివాలయంలో మంత్రులు, ఉన్నతాధికారులతో చర్చింన సీఎం .. కీలక నిర్ణయాలు తీసుకున్నారు. వీఆర్‌ఏల సేవలు విస్తృతంగా వినియోగించుకోవాలని, వారి అభిప్రాయం మేరకు చర్యలు తీసుకోవాలని నిర్ణయించారు.

11/07/2023 20:42(IST)

వెనుకబడిన జిల్లాల అభివృద్ధికి నిధులు కేటాయించండి: హరీశ్‌రావు విజ్ఞప్తి

దిల్లీ: దిల్లీలో కేంద్ర ఆర్థిక శాఖమంత్రి నిర్మలా సీతారామన్‌ అధ్యక్షతన జరిగిన 50వ జీఎస్టీ కౌన్సిల్‌ సమావేశంలో పాల్గొన్న తెలంగాణ మంత్రి హరీశ్‌రావు రాష్ట్రానికి సంబంధించిన వివిధ అంశాలను ప్రస్తావించారు. దాదాపు రూ.700 కోట్లు జీఎస్‌టీ సెస్‌, రూ.120 కోట్లు ఐజీఎస్‌టీ విడుదల చేయాలని కోరినట్టు హరీశ్‌రావు తెలిపారు. తెలంగాణలో వెనుకబడిన జిల్లాల అభివృద్ధికి నిధులు విడుదల చేయాలని విజ్ఞప్తి చేసినట్లు చెప్పారు. ఆంధ్రప్రదేశ్‌ పునర్‌ వ్యవస్థీకరణ చట్టం ప్రకారం మూడేళ్లకు కలిపి రూ.1,350 కోట్లు విడుదల కాలేదని, వెంటనే విడుదల చేయాలని వినతిపత్రం ఇచ్చినట్టు చెప్పారు. అనంతరం కేంద్ర జల్‌శక్తి శాఖ మంత్రి గజేంద్రసింగ్‌ షెకావత్‌ను కలిసిన హరీశ్‌రావు.. నూతన కృష్ణా ట్రైబ్యునల్‌ ఏర్పాటు, నీటి ప్రాజెక్టులకు సంబంధించిన అంశాలపై చర్చించినట్టు తెలిపారు.

11/07/2023 20:12(IST)

కునో పార్కులో మరో చీతా మృతి

మధ్యప్రదేశ్‌లోని కునో నేషనల్‌ పార్క్‌లో మరో చీతా ప్రాణాలు కోల్పోయింది. దక్షిణాఫ్రికా నుంచి తీసుకొచ్చిన వాటిల్లో ఒకటైన మగ చీతా తేజస్‌ మెడపై గాయాలతో మంగళవారం మధ్యాహ్నం 2గంటల సమయంలో మృతిచెందింది. ఈ చీతా మృతికి గల కారణాలు పోస్టుమార్టం పూర్తయిన తర్వాతే తెలుస్తాయని పేర్కొన్నారు.

11/07/2023 19:53(IST)

సికింద్రాబాద్‌లో భారీ చోరీ.. నిందితుల కోసం గాలింపు

సికింద్రాబాద్: సికింద్రాబాద్‌లో భారీ చోరీ జరిగింది. సింధి కాలనీ డిమ్మిపాన్ షాప్ ప్రాంతంలో నివాసం ఉంటున్న రాహుల్ గోయల్ ఇంట్లో ఈ చోరీ జరిగింది. ఐదేళ్ల నుంచి రాహుల్ ఇంట్లో పనిచేస్తున్న నేపాల్‌కు చెందిన కమల్, అతని కుటుంబం ఈ చోరీకి పాల్పడినట్లు పోలీసులు తెలిపారు. ఈనెల 9న కుటుంబ సమేతంగా రాహుల్‌ నగర శివారు ప్రాంతంలోని ఫామ్‌హౌస్‌కి వెళ్లాడు. సోమవారం ఇంటికి వచ్చి చూసేసరికి ఇంటి తాళాలు పగలగొట్టి ఉన్నట్లు గుర్తించాడు. ఇంట్లోని రూ. 49 లక్షల నగదు, నాలుగు కిలోల బంగారు ఆభరణాలు, 10 కిలోల వెండి ఆభరణాలు చోరీ చేసినట్లు బాధితుడు తెలిపాడు. చోరీకి గురైన మొత్తం నాలుగు నుంచి ఐదు కోట్ల విలువ ఉంటుందని ఫిర్యాదులో పేర్కొన్నాడు. ఇంట్లో పనిచేసే వాళ్లు కనిపించకపోవడంతో రాహుల్‌ వారిపై పోలీసులకు ఫిర్యాదు చేశాడు. పోలీసులు నిందితుల కోసం గాలిస్తున్నారు.

11/07/2023 19:43(IST)

గీతం డీమ్డ్‌ వర్సిటీ, నేవల్‌ డాక్‌యార్డు మధ్య అవగాహన ఒప్పందం

విశాఖ: గీతం డీమ్డ్‌ వర్సిటీ, నేవల్‌ డాక్‌యార్డు మధ్య అవగాహన ఒప్పందం కుదిరింది. ఇంజినీరింగ్‌ విద్యార్థులకు డాక్‌యార్డులో 6 వారాల ఇంటర్న్‌షిప్‌కు ఒప్పందం కుదిరింది. మెకానికల్‌, ఎలక్ట్రికల్‌, ఎలక్ట్రానిక్స్‌, కమ్యూనికేషన్‌ విద్యార్థులకు ఈ ఇంటర్న్‌షిట్‌ అందిస్తున్నారు. ఈ మేరకు ఒప్పందంపై గీతం వర్సిటీ, డాక్‌యార్డు అధికారులు సంతకాలు చేశారు.

11/07/2023 19:36(IST)

నేను ఆరోగ్యంగానే ఉన్నా: కొడాలి నాని

విజయవాడ: తాను ఆరోగ్యంగానే ఉన్నానని గుడివాడ ఎమ్మెల్యే కోడాలి నాని తెలిపారు. విజయవాడ కోర్టుకు కేసు వాయిదా నిమిత్తం వచ్చిన ఆయన మీడియాతో మాట్లాడారు. తాను అనారోగ్యానికి గురైనట్లు వచ్చిన వార్తలను ఆయన ఖండిచారు. తెదేపా తనపై అసత్య ప్రచారాలు చేస్తుందని ఆరోపించారు.

11/07/2023 19:26(IST)

కోడికత్తి కేసు విచారణను రేపటికి వాయిదా వేసిన కోర్టు

విజయవాడ: కోడికత్తి కేసుపై విచారణను కోర్టు రేపటికి వాయిదా వేసింది. ఈరోజు జరిగిన విచారణలో వాదనలు వినిపించారు. ఎన్‌ఐఏ కోర్టులో విచారణ జరగలేదని జగన్‌ తరఫు న్యాయవాది వెంకటేశ్వర్లు వాదించారు. రేపు ఎన్‌ఐఏ తరఫున పీపీ, నిందితుడి తరఫున న్యాయవాది వాదనలు వినిపించనున్నారు. నిందితుడి తరఫున న్యాయవాది అబ్దుస్‌ సలీం ఎన్‌ఐఏ కోర్టులో పిటిషన్ దాఖలు చేశారు.

11/07/2023 19:18(IST)

భారత్‌ - జపాన్‌ సంయుక్త నౌకా విన్యాసాలు.. ముగింపు వేడుక!

విశాఖ: బంగాళాఖాతంలో నిర్వహించిన జపాన్ - భారత్ సంయుక్త నౌకా విన్యాసాలు మంగళవారం ముగిశాయి. జైమెక్స్ 2023 భారత యుద్ద నౌకలు, దిల్లీ, కమోర్ట, శక్తి సహా నౌకలతో పాటు జపాన్ యుద్ధ నౌక సమిదారే సహా, హెలికాప్టర్లు, జలాంతర్గామి, అత్యాధునిక కమ్యూనికేషన్ వ్యవస్థలతో ఈ విన్యాసాలు నిర్వహించడం విశేషం.

11/07/2023 19:03(IST)

బీఆర్క్‌ ప్రవేశాలకు నోటిఫికేషన్ విడుదల

హైదరాబాద్‌: రాష్ట్రంలో పది కాలేజీల్లో 830 బీఆర్క్ సీట్ల భర్తీకి నోటిఫికేషన్ విడుదలైంది. ఈ నెల 12 నుంచి 22 వరకు ఆన్‌లైన్ రిజిస్ట్రేషన్లు ఉంటాయని జేఎన్‌ఏఎఫ్‌ఏయూ తెలిపింది. ఈనెల 23 నుంచి 31 వరకు ధ్రువపత్రాల పరిశీలన ఉంటుంది. ఆగస్టు 5, 6 తేదీల్లో బీఆర్క్ వెబ్ ఆప్షన్లకు అవకాశం కల్పించారు. ఆగస్టు 8న బీఆర్క్ సీట్లకు ఎంపికైన అభ్యర్థులను వెల్లడిస్తారు. మిగిలిన సీట్లకు ఆగస్టు 13, 14న రెండో విడత వెబ్ ఆప్షన్లు ఉంటాయని తెలిపారు. ఆగస్టు 16న రెండో విడత బీఆర్క్ సీట్ల కేటాయింపు ఉంటుంది. ఆగస్టు 16న బీఆర్క్ స్పాట్ అడ్మిషన్ల మార్గదర్శకాలు విడుదల చేయనున్నట్లు అధికారులు తెలిపారు. సెప్టెంబరు 1న బీఆర్క్ తరగతులు ప్రారంభమవుతాయి.

11/07/2023 18:56(IST)

త్వరలో డీఎస్సీ ప్రకటన: ఏపీ మంత్రి బొత్స

అమరావతి: ఉపాధ్యాయ పోస్టుల భర్తీకి త్వరలో డీఎస్సీ నోటిఫికేషన్‌ విడుదల చేస్తామని ఏపీ విద్యాశాఖ మంత్రి బొత్స సత్యనారాయణ తెలిపారు. వచ్చే నెలలో డీఎస్సీ ప్రకటన ఉండే అవకాశముందన్నారు. ఉపాధ్యాయ ఖాళీల భర్తీ ప్రకటన కోసం సీఎం కసరత్తు చేస్తున్నారని మంత్రి బొత్స తెలిపారు.

11/07/2023 18:54(IST)

యువతుల గదిలో రహస్యంగా సీసీ కెమెరాలు.. యజమాని అరెస్ట్‌

జూబ్లీహిల్స్: జూబ్లీహిల్స్‌లో దారుణం జరిగింది. యువతులు కిరాయికి ఉంటున్న గదిలో ఇంటి యజమాని సమీర్‌ రహస్యంగా సీసీ కెమెరాలు పెట్టాడు. ఇంట్లో యువతులు బట్టలు మార్చుకుంటున్న దృశ్యాలను యజమాని కంప్యూటర్‌లో చిత్రీకరించాడు. అనుమానం వచ్చి పరిశీలించిన యువతి పోలీసులకు ఫిర్యాదు చేసింది. ఈ మేరకు కేసు నమోదు చేసి నిందితుడు సమీర్ షేక్‌ను అరెస్ట్ చేసినట్లు పోలీసులు తెలిపారు.

11/07/2023 18:52(IST)

బెంగళూరులో ఘోరం.. టెక్‌ కంపెనీ ఎండీ, సీఈవో దారుణ హత్య

బెంగళూరు: కర్ణాటకలోని బెంగళూరు నగరంలో దారుణ ఘటన చోటుచేసుకుంది. ఓ సాఫ్ట్‌వేర్‌ కంపెనీ సీఈవో, మేనేజింగ్ డైరెక్టర్‌ దారుణ హత్యకు గురయ్యారు. అదే సంస్థలో పనిచేసిన మాజీ ఉద్యోగి వీరిద్దరినీ కత్తితో దాడి చేసి హత్య చేసినట్టు పోలీసులు వెల్లడించారు.

11/07/2023 18:49(IST)

బాలిక అనుమానాస్పద మృతి కేసులో ట్విస్ట్‌.. కన్న తల్లే హంతకురాలు!

కుషాయిగూడ: కుషాయిగూడ బాలిక అనుమానాస్పద మృతి కేసులో ఆసక్తికర పరిణామాలు చోటు చేసుకున్నాయి. వివాహేతర సంబంధానికి అడ్డు వస్తుందని తల్లి కల్యాణి ఆ బాలికను హత్య చేసినట్లు పోలీసులు తెలిపారు. బాలిక తండ్రి ఆటోడ్రైవర్‌ కాగా.. కల్యాణి మరో యువకుడితో అక్రమ సంబంధం పెట్టుకున్నట్లు పోలీసుల విచారణలో తేలింది. కల్యాణి ఈ నెల 1న దిండుతో బాలికను హత్య చేసి నిద్రలో చనిపోయినట్లు ప్రచారం చేసింది.

11/07/2023 18:45(IST)

నీటి కొలనులో పడి ఇద్దరు చిన్నారులు మృతి

మహబూబ్‌నగర్‌: నీటి కొలనులో పడి ఇద్దరు చిన్నారులు మృతి చెందిన ఘటన హనుమాన్‌తాండలో చోటు చేసుకుంది. పాఠశాలకు సెలవు ఉండటంతో శివ(9), గణేశ్‌(9) ఇద్దరు స్నానానికి వెళ్లి అక్కడే మృతి చెందారు.

11/07/2023 18:33(IST)

ఏలూరులో ముగిసిన జనసేన వారాహి విజయ యాత్ర

ఏలూరు జిల్లాలో జనసేన వారాహి విజయ యాత్ర ముగిసింది. మూడు రోజుల పర్యటనను ముగించుకొని జనసేన అధినేత పవన్‌ కల్యాణ్‌ తాడేపల్లిగూడెం బయలుదేరారు. బుధవారం తాడేపల్లిగూడెం బహిరంగ సభలో పవన్‌ పాల్గొంటారు.

11/07/2023 18:22(IST)

జేపీఎస్‌ల క్రమబద్ధీకరణపై కేసీఆర్‌ సమీక్ష

హైదరాబాద్‌: జూనియర్‌ పంచాయతీ కార్యదర్శుల (జేపీఎస్‌) క్రమబద్ధీకరణపై సీఎం కేసీఆర్‌ సమీక్షిస్తున్నారు. వీఆర్‌ఏ, వీఆర్వోల సర్దుబాటుపై అధికారులతో సమీక్ష చేస్తున్నారు. సచివాలయంలో గుడి, మసీదు, చర్చి ప్రారంభ తేదీలపైనా కేసీఆర్ చర్చిస్తున్నారు.

11/07/2023 18:11(IST)

నేతన్నల యోగక్షేమాలకు కట్టుబడి ఉన్నాం: కేటీఆర్‌

హైదరాబాద్‌: నేతన్నల వారోత్సవాలు ఘనంగా జరపాలని మంత్రి కేటీఆర్‌ అన్నారు. నేతన్న చేయూత, నేతన్న బీమాను విస్తృత పరచాలన్నారు. నేతన్నల యోగక్షేమాలకు కట్టుబడి ఉన్నామని తెలిపారు. ప్రతి నేత అభివృద్ధి చెందాలన్నదే ప్రభుత్వ లక్ష్యమని వివరించారు. శిల్పారామాల్లో చేనేత మ్యూజియాలను ఏర్పాటు చేయాలన్నారు. చేనేత మార్కెటింగ్‌కు ఆర్టీసీ, రైల్వేల సహకారం తీసుకోవాలని సూచించారు.

11/07/2023 18:03(IST)

‘గాండీవధారి అర్జున’ ప్రీ టీజర్‌ వచ్చేస్తోంది!

వరుణ్‌ తేజ్‌ హీరోగా ప్రవీణ్ సత్తారు దర్శకత్వంలో తెరకెక్కుతున్న చిత్రం ‘గాండీవధారి అర్జున’. ఈ సినిమా ప్రీ టీజర్‌ను బుధవారం ఉదయం 10.08 గంటలకు విడుదల చేయనున్నట్లు చిత్రబృందం తెలిపింది.

11/07/2023 18:01(IST)

భారాసకి భాజపా B టీమ్‌ అని మరోసారి నిరూపితమైంది: రేవంత్‌

హైదరాబాద్‌: కాంగ్రెస్‌, భారాస మధ్య మాటల యుద్ధం తారస్థాయికి చేరింది. రేవంత్‌ రెడ్డి ట్విటర్‌ ద్వారా స్పందించారు. ‘‘భారాసకి భాజపా ‘బి’టీమ్‌ అని మరోసారి నిరూపితమైంది. రాహుల్‌ గాంధీపై అనర్హత వేటుకు నిరసనగా బుధవారం చేపట్టే ‘సత్యాగ్రహ దీక్ష’ని నీరు గార్చాలని, ఉచిత విద్యుత్‌పైకి దృష్టి మరల్చాలని ప్రయత్నిస్తోంది. భారాస ప్రభుత్వం 24 గంటల ఉచిత విద్యత్‌ పేరుతో రైతులను మోసం చేస్తోంది. 12 గంటల నాణ్యమైన ఉచిత్‌ విద్యుత్‌ ఇవ్వడం లేదన్న విషయం ఏ సబ్‌ స్టేషన్‌కు వెళ్లినా తెలుస్తుంది. తొమ్మిదేళ్లలో విద్యుత్‌ సంస్థలకు రూ.60వేల కోట్లు అప్పుల్లో ముంచి, తన అవినీతికి బలిపెట్టిన ఘనుడు కేసీఆర్‌. ఈ మోసాలకు నిరసనగా రాష్ట్ర వ్యాప్తంగా అన్ని మండల కేంద్రాల్లో సబ్‌ స్టేషన్ల ముందు కేసీఆర్‌ దిష్టిబొమ్మను దగ్ధం చేయాల్సిందిగా కాంగ్రెస్‌ శ్రేణులకు పిలుపునిస్తున్నా’’ అని రేవంత్‌రెడ్డి ట్విటర్‌లో పేర్కొన్నారు.

11/07/2023 17:38(IST)

ఖాళీగా ఉన్న స్థానిక సంస్థలకు ఎప్పటిలోగా ఎన్నికలు నిర్వహిస్తారు: హైకోర్టు

హైదరాబాద్‌: తెలంగాణలో ఖాళీగా ఉన్న స్థానిక సంస్థలకు ఎన్నికలు ఎప్పుడు నిర్వహిస్తారని హైకోర్టు ప్రశ్నించింది. ఎప్పట్లోగా ఎన్నికలు నిర్వహిస్తారో ఈనెల 28లోగా చెప్పాలని రాష్ట్ర ప్రభుత్వాన్ని హైకోర్టు ఆదేశించింది. ఖాళీగా ఉన్న స్థానిక సంస్థల ఎన్నికలు నిర్వహించాలన్న పిల్‌పై మంగళవారం హైకోర్టులో విచారణ జరిగింది. 220 పంచాయతీలు, 94 ఎంపీటీసీ, నాలుగు జెడ్పీటీసీ, 5,364 వార్డులు, 344 ఉపసర్పంచి స్థానాలు ఖాళీగా ఉన్నాయని పిటిషనర్‌ ధర్మాసనం దృష్టికి తెచ్చారు. దీనిపై వివరణ ఇవ్వాలని మార్చిలోనే ప్రభుత్వానికి, ఎస్‌ఈసీకి హైకోర్టు నోటీసులు జారీ చేసింది. ఎప్పట్లోగా ఎన్నికలు నిర్వహిస్తారో చెప్పేందుకు ప్రభుత్వం గడువు కోరడంతో విచారణను హైకోర్టు ఈనెల 28కి వాయిదా వేసింది.

11/07/2023 17:38(IST)

హిమాచల్‌ ప్రదేశ్‌ వరదల్లో చిక్కుకున్న తెలుగు వైద్య విద్యార్థులు

హిమాచల్‌ ప్రదేశ్‌ వరదల్లో తెలుగు మెడికో విద్యార్థులు చిక్కుకున్నారు. ఉస్మానియా కళాశాలలో జనరల్‌ మెడిసిన్‌ పూర్తి చేసిన వైద్య విద్యార్థులు గత నెల 28న మరో ఇద్దరితో కలిసి లద్దాఖ్‌, మనాలి వెళ్లినట్లు సమాచారం. వారు ఈనెల 8న మనాలి నుంచి స్నేహితులతో మాట్లాడారు. ఆ తర్వాత వారు ఫోన్‌లో అందుబాటులోకి రాలేదు.

11/07/2023 17:32(IST)

కోడికత్తి కేసులో లోతుగా విచారణ చేపట్టాలి: జగన్‌ తరఫు న్యాయవాదులు

కోడికత్తి కేసులో విచారణ కొనసాగుతోంది. జగన్‌ తరఫున వాదనలు లిఖిత పూర్వకంగా ఇవ్వాలని గత విచారణలో ఆదేశించారు. గతంలో జగన్ తరఫు న్యాయవాదులు 2 పిటిషన్‌లు దాఖలు చేశారు. ఈ కేసులో మరింత లోతుగా విచారణ చేపట్టాలని జగన్‌ తరఫు న్యాయవాదులు మరో పిటిషన్ దాఖలు చేశారు. జగన్‌కు వ్యక్తిగత హాజరు నుంచి మినహాయింపు ఇవ్వాలని కోరారు.

11/07/2023 17:24(IST)

శాకాంబరి దేవీగా పోలమాంబ అమ్మవారు

మక్కువ: పార్వతీపురం మన్యం జిల్లా మక్కువ మండలంలోని శంబర పోలమాంబ అమ్మవారు శాకాంబరి దేవిగా భక్తులకు దర్శనమిచ్చారు. ఆషాఢమాసం సందర్భంగా పోలమాంబ అమ్మవారి వనంగుడి, చదురుగుడి ఆలయాల్లో ఉన్న అమ్మవార్లకు వివిధ రకాల కూరగాయలతో అలంకరణ చేశారు. మంగళవారం ఆలయ ఈవో వి. రాధాకృష్ణ ఆధ్వర్యంలో అమ్మవారికి ప్రత్యేక పూజలు చేపట్టారు. భక్తులు పెద్ద సంఖ్యలో అమ్మవారిని దర్శించుకుని మొక్కులు చెల్లించుకున్నారు.

11/07/2023 17:24(IST)

అవినీతి వల్లే సీఎం కేసీఆర్‌ ముఖం చాటేస్తున్నారు: లక్ష్మణ్‌

హైదరాబాద్‌: అవినీతి వల్లే సీఎం కేసీఆర్‌.. ప్రధానికి ముఖం చాటేస్తున్నారని భాజపా ఎంపీ లక్ష్మణ్‌ ఆరోపించారు. నాంపల్లిలోని భాజపా కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ.. రాష్ట్రంలో జరుగుతున్న అవినీతి పట్ల ప్రధాని మోదీ అవేదనతో ఉన్నారని తెలిపారు. అన్ని రాష్ట్రాల సీఎంలు కేంద్ర అభివృద్ధి పనుల్లో భాగస్వాములు అవుతున్నారని గుర్తు చేశారు. రాబోయే ఎన్నికల్లో 30 శాతం కమిషన్‌ ప్రభుత్వాన్ని ప్రజలు తిప్పికొడతారన్నారు. ‘‘ దేశంలోనే అత్యంత అవినీతి ప్రభుత్వం భారాస సర్కార్‌. దళితబంధు పథకంలో భారాస ఎమ్మెల్యేలు అవినీతికి పాల్పడుతున్నారు. భారాస నేతలు ఒకరి అవినీతి ఒకరు బయటపెట్టుకుంటున్నారు’’ వచ్చే ఎన్నికల్లో ప్రజలు భాజపాను తప్పకుండా ఆదరిస్తారని లక్ష్మణ్‌ తెలిపారు.

11/07/2023 17:13(IST)

రూ.16వేలు లంచం తీసుకుంటూ ఏసీబీకి చిక్కిన వైద్యారోగ్యశాఖ ఉద్యోగి

అమరావతి: గుంటూరు జిల్లా మంగళగిరిలోని రాష్ట్ర కుటుంబ సంక్షేమశాఖ కమిషనర్‌ కార్యాలయంలో ఉద్యోగి లంచం తీసుకుంటూ ఏసీబీకి పట్టుబడ్డారు. కమిషనర్‌ కార్యాలయంలో సూపరింటెండెంట్‌గా పనిచేస్తున్న సయ్యద్‌ లతీఫ్ రూ.16వేలు లంచం తీసుకుంటుండగా ఏసీబీ అధికారులు వలపన్ని పట్టుకున్నారు. అంతర్గత జిల్లాల నర్సుల బదిలీల్లో చేతివాటం ప్రదర్శించి ఏసీబీకి చిక్కారు. సత్యనారాయణ తన భార్య ఉద్యోగ బదిలీ కోసం లతీఫ్‌ను సంప్రదించారు. ఫైల్‌ ముందుకు తీసుకెళ్లాలంటే రూ.16వేలు లంచం కావాలని డిమాండ్‌ చేశారు. దీంతో సత్యనారాయణ ఏసీబీ అధికారులను ఆశ్రయించారు. మంగళవారం ఉదయం కార్యాలయం బయట లంచం సొమ్ము తీసుకుంటుండగా ఏసీబీ అధికారులు పట్టుకున్నారు.

11/07/2023 17:13(IST)

ఉచిత విద్యుత్‌ పేరుతో రూ.60వేల కోట్ల అవినీతి: మధుయాష్కీ గౌడ్‌

హైదరాబాద్: ఉచిత విద్యుత్‌ పేరుతో రూ.60వేల కోట్ల అవినీతి జరిగిందని కాంగ్రెస్‌ నేత మధుయాష్కీ గౌడ్‌ అన్నారు. విద్యుత్‌ కొనుగోలు చేసి మంత్రులు కేటీఆర్‌, జగదీశ్‌రెడ్డి రూ.వేల కోట్ల కమీషన్లు తీసుకున్నారని ఆరోపించారు. రైతుబంధు, ఉచిత విద్యుత్‌ వెనుక భారీగా అవినీతి జరిగిందన్నారు. గాంధీభవన్‌లో నిర్వహించిన మీడియా సమావేశంలో మధుయాష్కీ మాట్లాడారు. రైతుబంధు ఇచ్చిన సీఎం కేసీఆర్‌.. మిగతా ప్రయోజనాలను రద్దు చేశారని విమర్శించారు. భారాస ఎన్ని గంటలు విద్యుత్‌ ఇస్తుందో చెప్పాలని డిమాండ్ చేశారు. కాంగ్రెస్‌ ప్రభుత్వం ఉచిత విద్యుత్‌ను కొనసాగిస్తుందని మధుయాష్కీ గౌడ్‌ స్పష్టం చేశారు.

11/07/2023 17:04(IST)

యూసీసీ బిల్లు పాస్‌ అయితే కేసీఆర్‌ పాకిస్థాన్‌కు వెళ్లాల్సిందే: ఎంపీ ధర్మపురి అరవింద్‌

హైదరాబాద్‌: ముఖ్యమంత్రి కాదు.. మెదట సీతక్కను పీసీసీ చేయగలరా? దీనికి రేవంత్ రెడ్డి సమాధానం చెప్పాలి అని నిజామాబాద్‌ ఎంపీ ధర్మపురి అరవింద్‌ అన్నారు. ఆయన మీడియాతో మాట్లాడారు. సీతక్కను సీఎం చెస్తామని రేవంత్ రెడ్డి ఎందుకు చెప్పలేదని ప్రశ్నించారు. యూసీసీ బిల్లు ఉభయసభలో పాస్ అయ్యాక సీఎం కేసీఆర్ పాకిస్థాన్‌క్‌ వెళ్లాల్సిందే అని ఎద్దేవా చేశారు. ముస్లిం ఓట్లు గంపగుత్తగా కాంగ్రెస్‌కు పడుతాయన్న భయం కేసీఆర్‌లో మొదలైందని చెప్పారు. యూసీసీ బిల్లుకు భారాస మద్దతు ఇవ్వకున్నా బిల్లు పాస్ అవుతుందని ధీమా వ్యక్తం చేశారు.

11/07/2023 17:00(IST)

మృతుల కుటుంబాలకు పరిహారం ప్రకటించిన ఆర్టీసీ

అమరావతి: పెళ్లి బృందం ప్రయాణిస్తున్న ఆర్టీసీ బస్సు సోమవారం అర్ధరాత్రి దాటిన తర్వాత ప్రకాశం జిల్లా దర్శి సమీపంలో సాగర్‌ కాల్వలోకి దూసుకెళ్లిన విషయం తెలిసిందే. ఈ ప్రమాదంలో ఏడుగురు మృతి చెందగా, 18మంది గాయపడ్డారు. మృతుల కుటుంబాలకు రూ.5లక్షల చొప్పున పరిహారం అందించనున్నట్టు ఆర్టీసీ ప్రకటించింది. ప్రమాదంలో గాయపడిన వారికి వైద్య ఖర్చులు భరిస్తామని ఆర్టీసీ ఈడీ తెలిపారు.

11/07/2023 16:51(IST)

మహిళల టీ20 మ్యాచ్‌.. బంగ్లాదేశ్‌పై 8 పరుగుల తేడాతో భారత్‌ విజయం

భారత్‌, బంగ్లాదేశ్‌ జట్ల మధ్య జరిగిన మహిళల టీ20 క్రికెట్‌ మ్యాచ్‌లో టీమిండియా 8 పరుగుల తేడాతో విజయం సాధించింది. తొలుత బ్యాటింగ్ చేసిన భారత్‌ 8 వికెట్లు కోల్పోయి 95 పరుగులు చేసింది. అనంతరం బ్యాటింగ్‌కు దిగిన బంగ్లా 87 పరుగులకు ఆలౌట్‌ అయ్యింది. దీంతో భారత్‌ 2-0తో సిరీస్‌ను కైవసం చేసుకుంది.

11/07/2023 16:28(IST)

రైల్వే ఉన్నతాధికారులతో అశ్విని వైష్ణవ్‌ సమీక్ష

దిల్లీ: దేశవ్యాప్తంగా వర్షాల తీవ్రత పెరిగిన నేపథ్యంలో రైళ్ల రాకపోకలకు సంబంధించి ప్రత్యామ్నాయ ఏర్పాట్లపై రైల్వే శాఖ మంత్రి అశ్విని వైష్ణవ్ సమీక్ష నిర్వహించారు. పలుచోట్ల రైల్వే లైన్లకు వర్షాల వల్ల అడ్డంకులు ఏర్పడినట్లు తెలిపారు. మరి కొన్నిచోట్ల రాకపోకలు సాగించేందుకు ఆటంకాలు తలెత్తడంతో చేపడుతున్న చర్యలపై చర్చించారు. రైల్వే బోర్డు వార్ రూమ్ పర్యవేక్షణ చేపడుతున్న చర్యలు, వివిధ రాష్ట్రాల్లో పరిస్థితులపై అధికారులతో చర్చించినట్లు సమాచారం.

11/07/2023 16:12(IST)

బండి సంజయ్‌కు బర్త్‌ డే విషెస్‌ తెలిపిన కిషన్‌ రెడ్డి

భాజపా నేత బండి సంజయ్ పుట్టిన రోజు సందర్భంగా ఆ పార్టీ రాష్ట్ర అధ్యక్షుడు కిషన్‌ రెడ్డి ఆయనకు ట్విటర్ వేదికగా శుభాకాంక్షలు తెలిపారు. వీరిద్దరు కలిసి దిగిన ఫొటోను కిషన్‌ రెడ్డి ట్విటర్‌లో పంచుకున్నారు. ‘మీరు సంపూర్ణ ఆరోగ్యంతో జీవించాలని కోరుకుంటున్నా’ అని ట్వీట్‌ చేశారు.

11/07/2023 16:10(IST)

Tomato: బర్త్‌డే గిఫ్ట్‌గా మహిళకు టమాటాలు!

ఠానే: దేశంలో టమాటా (Tomato) ధరలు ఆకాశాన్నంటుతుండటంతో వాటిని కొనాలంటేనే సామాన్యుడు వెనకడుగు వేస్తున్న పరిస్థితి నెలకొంది. ఈ నేపథ్యంలో ప్రజల వినూత్న ఆలోచనలు, పలు ఆసక్తికర సన్నివేశాలు వార్తల్లో నిలుస్తున్నాయి. తాజాగా మహారాష్ట్రలో ఓ మహిళకు ఆమె బంధువులు పుట్టినరోజు కానుకగా 4కేజీల టమాటాలను ఇచ్చి సర్‌ప్రైజ్‌ చేశారు. ఒకప్పుడు కిలో రూ.20గా ఉన్న టమాటా ధరలు ప్రస్తుతం మార్కెట్లో కిలో రూ.140కి చేరడంతో సామాన్యులకు భారంగా మారుతోంది. ఈ క్రమంలో కల్యాణ్‌ ప్రాంతంలోని కొచాడిలో ఉండే సోనాల్‌ బోర్సే అనే మహిళకు ఆమె బంధువులు ఆదివారం రోజున బర్త్‌ డే బహుమతిగా 4కేజీల టమాటాలు పంపారు. అయితే, ఆమె కేక్‌ కోస్తున్న సమయంలో టేబుల్‌పై ఆ టమాటాల బాస్కెట్‌ను ఉంచిన వీడియో సామాజిక మాధ్యమాల్లో వైరల్‌గా మారింది.

11/07/2023 16:08(IST)

ఐస్‌లాండ్‌లో బద్దలైన అగ్నిపర్వతం

ఐస్‌లాండ్‌ రాజధాని రేకియావిక్‌కు సమీపంలోని భారీ అగ్ని పర్వతం బద్దలైంది. ఐస్‌లాండ్‌ విశ్వవిద్యాలయంలోని జియాలజీ శాస్త్రవేత్తలు, విద్యార్థులు విస్ఫోటనాన్ని గమనించి కొలతలు సేకరించారు. పర్వతం నుంచి లావా, హానికరమైన వాయువులు వస్తుండటంతో ప్రజలను అప్రమత్తం చేశారు.

11/07/2023 15:53(IST)

కాంగ్రెస్‌ దుష్ట విధానాలకు పాల్పడుతోంది: కేటీఆర్‌

మంత్రి కేటీఆర్‌ కాంగ్రెస్‌పై తీవ్రంగా మండిపడ్డారు. ఉచిత విద్యుత్‌ రద్దుకు కాంగ్రెస్‌ కుట్రలు చేస్తోందని ఆరోపించారు. 3 గంటల విద్యుత్‌ చాలనటం కాంగ్రెస్‌ దుష్ట విధానాలకు నిదర్శనమని దుయ్యబట్టారు. 24 గంటల విద్యుత్ వెలుగులను వదులుకుందామా అని ఆయన ప్రశ్నించారు. కటిక చీకట్ల కాంగ్రెస్‌ కాలాన్ని మళ్లీ తెచ్చుకుందామా?అని అన్నారు. తెలంగాణ రైతులు ఆలోచించుకోవాలని ట్విటర్‌లో పేర్కొన్నారు.

11/07/2023 15:47(IST)

రోడ్లపై ఆకతాయిల హల్‌చల్‌

హైదరాబాద్‌: హైదరాబాద్ రోడ్లపై ఆకతాయిలు హల్‌చల్‌ చేశారు. మాదాపూర్, గచ్చిబౌలి రోడ్లు, కేబుల్ బ్రిడ్జిపై బైకులతో విన్యాసాలు చేశారు. బైక్ వెనకాల యువతులను ఎక్కించుకుని స్టంట్స్ వేశారు. సైబరాబాద్‌లోని రద్దీ రోడ్లపై ద్విచక్రవాహనాలతో హల్‌చల్‌ చేశారు.

11/07/2023 15:44(IST)

వైకాపా నేతల మాటలకు నా భార్య కూడా ఏడుస్తోంది: పవన్‌ కల్యాణ్‌

ఏలూరు: రాజకీయాలపై తనకు స్పష్టమైన అవగాహన ఉందని.. అందుకే నిలబడినట్లు జనసేన అధినేత పవన్‌ కల్యాణ్‌ అన్నారు. ఏలూరు నియోజకవర్గ నేతలు, వీరమహిళలతో పవన్‌ భేటీ అయ్యారు. ఆయన మాట్లాడుతూ.. ‘‘ఎవరో పెట్టిన పార్టీని వైకాపా వాళ్లు తీసుకున్నారు. యువజనులు, శ్రామికులు, రైతులకు ఏమీ చేయని పార్టీ.. వైకాపా. నన్ను బెదిరించారు. డబ్బుతో మభ్యపెట్టాలని చూశారు. జగన్‌ అంటే కోపం లేదు.. ప్రభుత్వ విధానాలపైనే ద్వేషం. ప్రజల వ్యక్తిగత సమాచారం మొత్తం వాలంటీర్ల వద్ద ఉంది. అమ్మాయిల అదృశ్యంపై వైకాపా నేతలు ఎందుకు స్పందించరు?విషయాన్ని పక్కదోవ పట్టించేందుకే నాపై విమర్శలు. వైకాపా నాయకుల మాటలకు నా భార్య కూడా ఏడుస్తోంది’’ అని పవన్‌ అన్నారు.

11/07/2023 15:43(IST)

భాజపా రాష్ట్ర కార్యాలయంలో నాయకుల సమావేశం

హైదరాబాద్: భాజపా కార్యాలయంలో రాష్ర్ట పదాధికారుల సమావేశం ప్రారంభమైంది. ఆ పార్టీ రాష్ట్ర అధ్యక్షుడు కిషన్‌ రెడ్డి అధ్యక్షతన ఈ సమావేశం నిర్వహిస్తున్నారు.
జాతీయ కార్యదర్శి, రాష్ట్ర సహాయ ఇన్‌ఛార్జి అరవింద్ మీనన్ ముఖ్య అతిథిగా హాజరయ్యారు. లక్ష్మణ్, ఈటల రాజేందర్, డీకే, అరుణ, జితేందర్ రెడ్డి, అరవింద్, సోయం బాపూరావు తదితరులు పాల్గొన్నారు.

11/07/2023 15:33(IST)

ఉచిత విద్యుత్ కాంగ్రెస్ పథకమే: మల్లు రవి

హైదరాబాద్: ఉచిత విద్యుత్ పేటెంట్ హక్కు కాంగ్రెస్‌దేనని టీపీసీసీ సీనియర్ నాయకుడు మల్లు రవి అన్నారు. ఉచిత విద్యుత్‌పై రేవంత్ రెడ్డి మాటలను భారాస వక్రీకరించిందని చెప్పారు. రేవంత్ రెడ్డి విద్యుత్ కొనుగోళ్లలో జరిగిన అక్రమాలపై మాట్లాడారని తెలిపారు. కాంగ్రెస్ ప్రభుత్వమే ఉచిత విద్యుత్‌ను ప్రారంభించిందని గుర్తు చేశారు. కాంగ్రెస్ పార్టీ ఉచిత విద్యుత్‌కు కట్టుబడి ఉందన్నారు.

11/07/2023 14:47(IST)

రేవంత్ రెడ్డి వ్యాఖ్యలపై స్పందించిన కోమటిరెడ్డి వెంకటరెడ్డి

హైదరాబాద్‌: కాంగ్రెస్‌లో పీసీసీ నిర్ణయం ఫైనల్ కాదని ఎంపీ కోమటి రెడ్డి వెంకట్‌ రెడ్డి అన్నారు. పీసీసీ అధ్యక్షుడు రేవంత్ రెడ్డి వ్యాఖ్యలపై ఆయన స్పందించారు. రేవంత్ రెడ్డి ఏం మాట్లాడారో పూర్తిగా తనకు తెలియదని వివరించారు. రైతులకు 24 గంటల ఉచిత కరెంటు ఇచ్చింది వైఎస్‌ఆర్‌ అని గుర్తు చేశారు. కాంగ్రెస్ అధికారంలోకి వస్తే 24గంటల ఉచిత విద్యుత్ ఇస్తామని తెలిపారు. కాంగ్రెస్‌ అంటే రేవంత్ రెడ్డి.. రేవంత్ రెడ్డి అంటే కాంగ్రెస్ అనడం జోక్‌గా ఉందన్నారు.

11/07/2023 14:42(IST)

కాంగ్రెస్ రైతుల పార్టీ: పొన్నం ప్రభాకర్‌

హైదరాబాద్‌: దేశంలో రైతులకు అనుకూలంగా పనిచేసిన పార్టీ కాంగ్రెస్ ఒక్కటే అని మాజీ ఎంపీ పొన్నం ప్రభాకర్‌ అన్నారు. గాంధీభవన్‌లో మీడియాతో మాట్లాడారు. రేవంత్ రెడ్డి వ్యాఖ్యలను వక్రీకరించి భారాస మాట్లాడుతోందని అన్నారు. కాంగ్రెస్ అంటేనే రైతులు.. రైతులు అంటేనే కాంగ్రెస్ పార్టీ అని వివరించారు.

11/07/2023 14:39(IST)

ఈడీ డైరెక్టర్‌ సంజయ్‌ పదవీకాలం పొడిగింపు కుదరదు: సుప్రీం కోర్టు

దిల్లీ: ఈడీ డైరెక్టర్‌ సంజయ్‌ కుమార్‌ మిశ్రా పదవీకాలం పొడిగింపు కుదరదని సుప్రీంకోర్టు తేల్చి చెప్పింది. ఈ మేరకు మిశ్రా పదవీకాలం పొడిగింపు చట్టవిరుద్ధమని తెలిపింది.

11/07/2023 14:24(IST)

గుంటూరు కలెక్టరేట్ వద్ద ఉద్రక్తత

గుంటూరు: గుంటూరు కలెక్టరేట్‌ వద్ద అంగన్వాడీల ఆందోళనలో స్వల్ప ఉద్రిక్తత చోటు చేసుకుంది. కలెక్టరేట్‌ ముట్టడికి యత్నించిన అంగన్వాడీ కార్యకర్తలను పోలీసులు అడ్డుకున్నారు. ఈ క్రమంలో పోలీసులతో అంగన్వాడీ కార్యకర్తలు వాగ్వాదానికి దిగి గేట్లు తోసుకుని లోపలికి వెళ్లడానికి ప్రయత్నించారు.

11/07/2023 14:21(IST)

కేటీఆర్ దిగజారుడు తనాన్ని ప్రదర్శిస్తున్నారు: కాంగ్రెస్‌ వర్కింగ్ ప్రెసిడెంట్

హైదరాబాద్‌: రేవంత్ రెడ్డి ఉచిత విద్యుత్ వాక్యాలను మంత్రి కేటీఆర్ వక్రీకరించి మాట్లాడారని కాంగ్రెస్‌ పార్టీ వర్కింగ్ ప్రెసిడెంట్ మహేష్ కుమార్ గౌడ్ అన్నారు. ఆయన మీడియాతో మాట్లాడారు. కేటీఆర్ రైతులను తప్పుదోవ పట్టించేలా వ్యవహరిస్తున్నారని ఎద్దేవా చేశారు. కేటీఆర్ దిగజారుడు తనాన్ని ప్రదర్శించారని ఆరోపించారు. రాష్ట్రంలో ఉచిత విద్యుత్ ఇచ్చింది కాంగ్రెస్ పార్టీనేనని చెప్పారు. ప్రస్తుతం ఉచిత విద్యుత్ వెనుక రూ. వేల కోట్ల అవినీతి ఉందని ఆరోపించారు. ఇదే అంశాన్ని రేవంత్ రెడ్డి మాట్లాడితే కేటీఆర్‌ వక్రీకరించి చెప్పారని వివరించారు. కాంగ్రెస్‌ పార్టీ రైతులకు మద్దతు ఇస్తుందని తెలిపారు. కాంగ్రెస్‌ అధికారంలోకి వచ్చాక 24 గంటల కరెంట్ ఇస్తుందన్నారు.

11/07/2023 14:13(IST)

సోలార్‌ కంచె తగిలి వ్యక్తి మృతి

హైదరాబాద్‌: కొంపల్లిలో సోలార్‌ కంచె తగిలి వ్యక్తి మృతి చెందాడు. ఓ ఇంటి చుట్టూ ప్రహరీ గోడపై సోలార్‌ కంచె ఏర్పాటు చేశారు. ఈ క్రమంలో ఓ వ్యక్తి దొంగతనం కోసం వచ్చి మృతి చెందినట్లు పోలీసులు అనుమానిస్తున్నారు.

11/07/2023 14:10(IST)

పెట్టుబడులు, ఉద్యోగాల పేరుతో భారీ మోసం

హైదరాబాద్‌: పెట్టుబడులు, ఉద్యోగాల పేరుతో భారీ మోసం వెలుగు చూసింది. కోటిపల్లి శ్రీనివాస్‌ అనే వ్యక్తి బాధితుల నుంచి రూ. కోట్లలో వసూలు చేసినట్లు పోలీసులు గుర్తించారు. ఏడాదిలో రెట్టింపు డబ్బు ఇస్తానని వారిని నమ్మబలికాడు. బాధితులు శ్రీనివాస్‌పై రాయదుర్గం పీఎస్‌లో ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేపట్టారు. నిందితుడు శ్రీనివాస్‌ పరారీలో ఉన్నట్లు పోలీసులు గుర్తించారు. శ్రీనివాస్‌ మూడేళ్లుగా ఇదే తరహాలో మోసాలు చేస్తున్నట్లు తెలిపారు.

11/07/2023 14:04(IST)

అంబులెన్స్‌ అత్యవసర హారన్‌.. ఎందుకో తెలుసా?

హైదరాబాద్: అంబులెన్స్ అత్యవసర హారన్ ఉపయోగించడంతో ట్రాఫిక్ పోలీసులు నారాయణగూడ సిగ్నల్ వద్ద ట్రాఫిక్‌ను క్లియర్ చేశారు. తొలుత అంబులెన్స్ డ్రైవర్ సిగ్నల్ దాటి ముందుకు వచ్చాడు. ఆ తర్వాత డ్రైవర్‌ కాస్త ముందుకు వచ్చి రహదారి పక్కన వాహనాన్ని నిలిపి బజ్జీలు, కూల్ డ్రింకులు తీసుకున్నాడు. వెంటనే అంబులెన్స్ వద్దకు వచ్చి అందులో రోగి ఎవరు లేనట్లు ట్రాఫిక్ కానిస్టేబుల్ నిర్ధారించుకున్నాడు. రోగి ఉన్నాడనే ఉద్దేశంతోనే మిగతా వాహనాలను ఆపి అంబులెన్స్‌కు గ్రీన్ సిగ్నల్ ఇచ్చినట్లు ట్రాఫిక్‌ కానిస్టేబుల్‌ డ్రైవర్‌కు తెలిపాడు. బజ్జీల కోసం ఎందుకు అంత వేగంగా అత్యవసర హారన్ ఉపయోగించారని అంబులెన్స్ డ్రైవర్‌ ప్రశ్నించాడు. దీంతో అంబులెన్స్‌లో రోగి ఉన్నాడని బుకాయించేందుకు అంబులెన్స్ డ్రైవర్ ప్రయత్నించాడు. ఈ దృశ్యాలను మొత్తం వీడియోలో ట్రాఫిక్ కానిస్టేబుల్ చిత్రీకరించాడు. సదరు వీడియోను డీజీపీ అంజనీ కుమార్ ట్వీట్ చేశారు. అత్యవసర సమయాల్లో ఉపయోగించే హారన్‌లను దుర్వినియోగం చేయొద్దని అంబులెన్సు డ్రైవర్లకు డీజీపీ సూచించారు. అలా చేస్తే చట్ట ప్రకారం చర్యలు తీసుకోవాల్సి వస్తుందని హెచ్చరించారు.

11/07/2023 13:56(IST)

హైదరాబాద్‌ అభివృద్ధిపై కేటీఆర్‌ పిట్ట కథలు చెబుతున్నారు: చింతల రామచంద్రారెడ్డి

హైదరాబాద్: ప్రపంచంలోని అద్భుతమైన పది నగరాల్లో హైదరాబాద్ నగరం ఒకటని భాజపా రాష్ట్ర ఉపాధ్యక్షుడు చింతల రామచంద్రారెడ్డి అన్నారు. హైదరాబాద్ అభివృద్ధి కోసం రూ. లక్ష కోట్లు ఖర్చు చేసినట్లు కేటీఆర్‌ ట్విటర్‌లో పిట్ట కథలు చెబుతున్నారని ఎద్దేవా చేశారు. రూ. లక్ష కోట్లు ఖర్చు పెడితే రెండు సెంటి మీటర్ల వర్షానికే హైదరాబాద్ ఎందుకు మునిగిపోతుందని ప్రశ్నించారు. బెంగుళూరు తరువాత అత్యధిక జన సాంద్రత ఉన్న నగరం హైదరాబాద్‌ అన్నారు. ఇతర నగరాలతో పోలిస్తే అతి తక్కువ బడ్జెట్ గ్రేటర్ హైదాబాద్‌దేనని చెప్పారు. లక్ష కోట్లు ఎక్కడ ఖర్చు పెట్టారో కేటిఆర్ చెప్పాలన్నారు.

11/07/2023 13:49(IST)

తెలంగాణలో రాగల మూడు రోజులు మోస్తరు వర్షాలు

హైదారాబాద్: రాష్ట్రంలో రాగల మూడు రోజులు తేలికపాటి నుంచి మోస్తరు వర్షాలు కురుస్తాయని వాతావరణ శాఖ తెలిపింది. ఉత్తర, ఈశాన్య తెలంగాణ జిల్ల్లాల్లో అక్కడక్కడ భారీ వర్షాలు పడే అవకాశం ఉందని అధికారులు వివరించారు. ఈరోజు ఉరుములు, మెరుపులతో కూడిన వర్షం పడే అవకాశాం ఉందని వాతావవరణ శాఖ తెలిపింది.

11/07/2023 13:45(IST)

పోలీస్ స్టేషన్‌లలో సీసీ కెమెరాల ఏర్పాటుపై హైకోర్టు విచారణ

హైదరాబాద్‌: పోలీస్ స్టేషన్‌లలో సీసీ కెమెరాల ఏర్పాటుపై హైకోర్టు విచారణ చేపట్టింది. రాష్ట్రంలోని 774 పీఎస్‌లలో.. 369 పీఎస్‌లలో సీసీ కెమెరాలు ఏర్పాటు చేసినట్లు ప్రభుత్వం తెలిపింది. మరో 293 పీఎస్‌లలో సీసీ కెమెరాల ఏర్పాటు ప్రక్రియ జరుగుతోందని వివరించింది. ఇదే అంశంపై సుప్రీంకోర్టులో విచారణ జరుగుతోందని ప్రభుత్వ న్యాయవాది చెప్పారు. సుప్రీంకోర్టులో కేసు ఉన్నందున ఇక్కడ పిల్‌పై విచారణ అవసరం లేదని హైకోర్టు తెలిపింది. సుమోటో పిల్‌గా హైకోర్టు విచారణను ముగించింది.

11/07/2023 13:37(IST)

వైఎస్ భాస్కర్ రెడ్డి, ఎంవీ కృష్ణారెడ్డి పిటిషన్ల తదుపరి విచారణ ఈనెల 20కి వాయిదా

వివేకా హత్య కేసులో వైఎస్ భాస్కర్ రెడ్డి, ఎంవీ కృష్ణారెడ్డి పిటిషన్లపై హైకోర్టు విచారణ చేపట్టింది. దస్తగిరిని ఆప్రువర్‌గా మార్చడాన్ని సవాల్ చేస్తూ భాస్కర్ రెడ్డి, ఎంవీ కృష్ణారెడ్డి పటిషన్ దాఖలు చేశారు. ఇందులో ఛార్జిషీట్‌ కూడా దాఖలు చేసినట్లు హైకోర్టు విచారణలో తేలింది. వివేకా హత్య కేసు చార్జిషీట్‌ను సీబీఐ కోర్టు వెనక్కి ఇచ్చిందని లాయర్లు తెలిపారు. వైఎస్ భాస్కర్ రెడ్డి, ఎంవీ కృష్ణారెడ్డి పిటిషన్లపై తదుపరి విచారణ ఈనెల 20కి వాయిదా వేసింది.

11/07/2023 13:31(IST)

సిలిండర్‌ పేలి ఏడుగురికి గాయాలు.. ఆరుగురి పరిస్థితి విషమం

దోమలగూడ: పిండి వంటలు చేస్తుండగా ప్రమాదవశాత్తు సిలిండర్‌ పేలి ఏడుగురు తీవ్రంగా గాయపడ్డారు. ఈ ఘటన నగరంలోని దోమలగూడ పోలీస్‌స్టేషన్ పరిధిలో మంగళవారం చోటుచేసుకుంది. పోలీసులు తెలిపిన వివరాల ప్రకారం.. దోమలగూడలో నివాసం ఉంటున్న పద్మ బోనాల పండగ సందర్భంగా తన కూతురు, అల్లుడు, బంధువులను మూడు రోజుల క్రితమే ఇంటికి పిలిపించింది. మొత్తం ఇంట్లో ఏడుగురు ఉన్నారు. ఉదయం పిండి వంటలు చేస్తున్న సమయంలో గ్యాస్‌ లీకై ఒక్కసారిగా సిలిండర్‌ పేలి మంటలు వ్యాపించాయి. ఇది గమనించిన స్థానికులు పద్మ కుటుంబసభ్యులను రక్షించే ప్రయత్నం చేశారు. అప్పటికే వారు తీవ్రంగా గాయపడ్డారు. వీరిని గాంధీ ఆసుపత్రికి తరలించారు. విషయం తెలుసుకున్న అగ్నిమాపక సిబ్బంది, ఎమ్మెల్యే ముఠా గోపాల్‌ సంఘటనా స్థలానికి చేరుకొని స్థానికులను అడిగి వివరాలు తెలుసుకున్నారు. ప్రస్తుతం ఆరుగురి పరిస్థితి విషమంగా ఉందని దోమలగూడ ఇన్‌స్పెక్టర్‌ శ్రీనివాస్‌ తెలిపారు. విషమంగా ఉన్నవారిలో ముగ్గురు చిన్నారులు అభినవ్ (8), శరణ్య (6), విహార్ (3) ఉన్నట్లు పోలీసులు తెలిపారు.

11/07/2023 13:06(IST)

రైతులకు కాంగ్రెస్‌ ప్రథమ శత్రువు: జగదీశ్‌రెడ్డి

కాంగ్రెస్‌ నేతలకు ఇంట్లో 24 గంటల విద్యుత్‌ ఉండాలిగానీ, రైతులకు వద్దా? అని మంత్రి జగదీశ్‌రెడ్డి ప్రశ్నించారు. రైతులకు ప్రథమ శత్రువు కాంగ్రెస్‌ పార్టీయేనని ఆయన వ్యాఖ్యానించారు. ‘‘ దేశంలో వ్యవసాయ రంగాన్ని నాశనం చేసింది కాంగ్రెస్‌ పార్టీ. గతంలో రైతుల పట్ల కాంగ్రెస్‌ పార్టీ కక్షపూరితంగా పాలన చేసింది. గతంలో రైతులకు 9 గంటల ఉచిత విద్యుత్‌ హామీ ఇచ్చారు.

11/07/2023 13:05(IST)

అమరావతి రాజధాని కేసు డిసెంబరుకు వాయిదా

దిల్లీ: అమరావతి రాజధాని వ్యవహారంలో దాఖలైన పిటిషన్లపై విచారణను సుప్రీంకోర్టు డిసెంబర్‌కు వాయిదా వేసింది. పూర్తిస్థాయి విచారణ డిసెంబర్‌లో చేపడతామని జస్టిస్‌ సంజీవ్‌ ఖన్నా, జస్టిస్‌ బేలా ఎం త్రివేది ధర్మాసనం వెల్లడించింది. కేసును అత్యవసరంగా విచారణ చేపట్టాలని రాష్ట్ర ప్రభుత్వ తరఫు న్యాయవాది సుప్రీంను కోరగా.. నవంబర్‌ వరకు రాజ్యాంగ ధర్మాసనాల కేసులు ఉన్నాయని తెలిపింది. డిసెంబర్‌లోపు అత్యవసరంగా కేసు విచారణ సాధ్యం కాదని సుప్రీం స్పష్టం చేసింది.

11/07/2023 12:57(IST)

అంగన్వాడీ వర్కర్ల ఆందోళన.. అరెస్ట్‌

విశాఖపట్నం: ప్రభుత్వం.. అంగన్వాడీ వర్కర్లను క్రమబద్ధీకరించాలని, కనీస వేతనాన్ని రూ.26 వేలకు పెంచాలని వర్కర్లు విశాఖపట్నంలో ఆందోళన చేపట్టారు. స్థానిక జీవీఎంసీ గాంధీ విగ్రహం 36 గంటల పాటు నిరసన దీక్షా చేపట్టారు. దీంతో అంగన్వాడీ వర్కర్లను పోలీసులు అరెస్టు చేశారు.

11/07/2023 12:53(IST)

కావలిలో కొనసాగుతున్న లోకేశ్‌ ‘యువగళం’ పాదయాత్ర

కావలి: నారా లోకేశ్‌ యువగళం పాదయాత్రలో భాగంగా మండలంలోని కొత్తపల్లి గ్రామస్థులతో నిర్వహించిన రచ్చబండ కార్యక్రమానికి హాజరయ్యారు. అనంతరం కొత్తపల్లిలోని శ్రీ వీరబ్రహ్మేంద్ర స్వామి ఆలయంలో ఆయన ప్రత్యేక పూజలు చేశారు. స్థానిక యువకులతో ముఖాముఖి నిర్వహించారు. ఈ సందర్భంగా వారు అడిగిన ప్రశ్నలకు లోకేశ్‌ సమాధానమిచ్చారు.

11/07/2023 12:45(IST)

తల్లి మందలించిందని యువతి ఆత్మహత్య

రెజిమెంటల్ బజార్: తల్లి మందలించిందని మనస్తాపానికి గురైన ఓ యువతి రైలు కిందపడి ఆత్మహత్య చేసుకుంది. సికింద్రాబాద్ జీఆర్పీ పోలీసుల కథనం ప్రకారం.. కృష్ణాజిల్లా బ్రహ్మపురం ప్రాంతానికి చెందిన అల్లం పాండు రంగా, శ్యామల దంపతులు గత 20ఏళ్లుగా ఘట్‌కేసర్‌ పరిధిలో నివాసం ఉంటున్నారు. వీరి కుమార్తె నాగ భవాని(18) ఫీర్జాదిగూడలోని ఓ స్టోర్‌లో పని చేస్తుంది. ప్రతినెల ఆమెకు వచ్చిన జీతం డబ్బులను ఇంట్లో ఇచ్చేది. అయితే ఈ నెల జీతం డబ్బులు ఇంట్లో ఇవ్వకపోవడంతో తల్లి అడిగితే ఖర్చు చేసినట్లు చెప్పింది. ఈ విషయంలో సోమవారం తల్లి మందలించింది. అదేరోజు రాత్రి అందరూ భోజనం చేసి నిద్రపోయిన తర్వాత ఇంట్లోంచి వెళ్లిపోయిన ఆమె రైలు కింద పడి ఆత్మహత్య చేసుకుంది. మృత దేహాన్ని ఆసుపత్రికి తరలించారు.

11/07/2023 12:36(IST)

వాలంటీర్‌ వ్యవస్థ రాజ్యాంగ విరుద్ధం: సోము వీర్రాజు

రాజమహేంద్రవరం: వాలంటీర్‌ వ్యవస్థ రాజకీయ దురుద్దేశంతో ఏర్పాటైందని భాజపా నేత సోము వీర్రాజు అన్నారు. ఆయన మీడియాతో మాట్లాడారు. వాలంటీర్‌ వ్యవస్థ రాజ్యాంగ విరుద్ధమైందని ఆరోపించారు. ఎన్నికల్లో గెలుపు కోసమే ఈ వాలంటీర్‌ వ్యవస్థను తీసుకొచ్చినట్లు వివరించారు.

11/07/2023 12:30(IST)

ప్రగతి భవన్‌కు చేరుకున్న ఎమ్మెల్యే రాజయ్య

హైదరాబాద్‌: స్టేషన్ ఘన్‌పూర్ ఎమ్మెల్యే రాజయ్య ప్రగతి భవన్‌కు చేరుకున్నారు. కేటీఆర్‌ను కలిసే అవకాశం ఉందని పార్టీ వర్గాలు తెలిపాయి. ఇటీవల కడియం శ్రీహరిపై ఆయన తీవ్ర విమర్శలు చేసిన విషయం తెలిసిందే.

11/07/2023 12:28(IST)

ఉప్పొంగుతున్న బొగత జలపాతం

వాజేడు: ములుగు జిల్లా వాజేడు మండలంలోని బొగత జలపాతం ఉప్పొంగుతోంది.. ఛత్తీస్‌గడ్ అడవుల నుంచి వస్తున్న వరద నీటితో జలపాతం ఉవ్వెత్తున ఎగసిపడుతోంది. ఈ సుందర దృశ్యాలను తిలకించేందుకు పెద్ద సంఖ్యలో పర్యాటకులు వస్తున్నారు.

11/07/2023 12:23(IST)

న్యాయవాద దంపతుల హత్య కేసులో ఇద్దరు నిందితులకు బెయిల్‌

హైదరాబాద్‌: న్యాయవాద దంపతులు గట్టు వామనరావు, పీవీ నాగమణిల హత్య కేసుపై నేడు సుప్రీంకోర్టులో విచారణ జరిగింది. ఈకేసుకు సంబంధించి ఇద్దరు నిందితులు.. ఏ-3 లక్ష్మ, ఏ-5 కుమార్‌లకు అత్యున్నత న్యాయస్థానం బెయిల్‌ మంజూరు చేసింది. బెయిల్‌ పిటిషన్లపై జస్టిస్‌ బోపన్న, జస్టిస్‌ సుందరేష్‌ ధర్మాసనం విచారణ చేపట్టగా.. తుది ఛార్జిషీట్‌ దాఖలు చేసినట్లు నిందితుల తరఫు లాయర్లు తెలిపారు. స్థానిక కోర్టులో విచారణ జరుగుతున్నట్లు వివరించారు. వాదనలు విన్న ధర్మాసనం.. ట్రయల్‌ కోర్టు నిబంధనల మేరకు బెయిల్‌ మంజూరు చేస్తున్నట్లు ఉత్తర్వులు ఇచ్చింది.

11/07/2023 12:14(IST)

నూతన వంతెన నిర్మాణం కోసం రైతుల ఆందోళన

తాళ్లరేవు: కాకినాడ జిల్లా తాళ్లరేవు మండలంలో రైతులు ఆందోళనకు దిగారు. ఇంజరం వద్ద కుంగిన వంతెన స్థానంలో నూతన వంతెన నిర్మాణం చేపట్టాలని నిరసనకు దిగారు. ఏపీ కౌలు రైతు సంఘం ఆధ్వర్యంలో రహదారిపై రాస్తారోకో చేశారు. రైతుల ఆందోళనలతో యానాం, రామచంద్రపురం వెళ్లే వాహనాలు నిలిచిపోయాయి.

11/07/2023 11:45(IST)

నేపాల్‌లో హెలికాప్టర్‌ గల్లంతు

నేపాల్‌లో ఓ హెలికాప్టర్‌ జాడ గల్లంతైంది. ఆ సమయంలో దానిలో ఆరుగురు ప్రయాణిస్తున్నారు. వీరిలో ఐదుగురు విదేశీయులే. ఈ హెలికాప్టర్‌ సోలుకుంభా నుంచి కాఠ్‌మాండూకు ప్రయాణిస్తుండగా దాని జాడ అదృశ్యమైంది. అధికారులు అప్రమత్తమై దానితో సంబంధాలు నెలకొల్పేందుకు యత్నిస్తున్నారు.

11/07/2023 11:33(IST)

త్రిసభ్య ధర్మాసనానికి ఆర్‌ -5 జోన్‌ కేసుల విచారణ

అమరావతి: రాజధాని అమరావతిలో ఇతర ప్రాంతాల వారికి ఇళ్ల స్థలాలు ఇచ్చేందుకు ఏర్పాటు చేసిన ఆర్‌-5 జోన్‌పై నేడు ఆంధ్రప్రదేశ్‌ హైకోర్టులో విచారణ జరిగింది. రాజధాని అంశాల కేసులను విడదీసి ఆర్‌- 5 జోన్‌ పిటిషన్లపైనే విచారించాలని ఉన్నత న్యాయస్థానం స్పష్టం చేసింది. ఈ కేసులకు సబంధించిన విచారణను త్రిసభ్య ధర్మాసనానికి హైకోర్టు అప్పగించింది. అనంతరం విచారణను ఈనెల 17కు వాయిదా వేసింది.

11/07/2023 11:24(IST)

వేటపాలెంలో రోడ్డు ప్రమాదం.. ఇద్దరు మృతి

వేటపాలెం: ఆంధ్రప్రదేశ్‌లోని బాపట్ల జిల్లా వేటపాలెంలో రోడ్డు ప్రమాదం జరిగింది. చల్లారెడ్డిపాలెం వద్ద ద్విచక్రవాహనాన్ని.. కోళ్ల వ్యాను ఢీకొట్టింది. ఈ ఘటనలో ఇద్దరు యువకులు మృతి చెందారు. మృతులు సూర్యకుమార్‌(19), ఇమ్మిడిశెట్టి అజయ్‌(19)గా గుర్తించారు.

11/07/2023 11:24(IST)

ప్రారంభమైన జీఎస్‌టీ మండలి సమావేశం

వస్తు, సేవల పన్ను (జీఎస్‌టీ) మండలి 50వ సమావేశం మంగళవారం ప్రారంభమైంది. దిల్లీలోని విజ్ఞాన్‌భవన్‌ వేదికగా కేంద్ర ఆర్థిక మంత్రి నిర్మలా సీతారామన్‌ నేతృత్వంలో సమావేశం జరుగుతోంది. తెలంగాణ, ఏపీ ఆర్థిక మంత్రులు హరీశ్ రావు, బుగ్గన రాజేంద్రనాథ్ రెడ్డి ఈ భేటీలో పాల్గొన్నారు.

11/07/2023 11:23(IST)

ఇజ్రాయెల్‌ న్యాయ సంస్కరణలకు ఆ దేశ పార్లమెంట్‌ ప్రాథమిక ఆమోదం..!

దేశ సుప్రీం కోర్టు అధికారాలను నియంత్రిస్తూ ఇజ్రాయెల్‌ ప్రభుత్వం ప్రవేశపెట్టిన బిల్లుకు అక్కడి పార్లమెంట్‌ ప్రాథమికంగా ఆమోదముద్ర వేసింది. ప్రధాని బెంజిమన్‌ నెతన్యాహూ చేపట్టిన న్యాయసంస్కరణల్లో భాగంగా ఈ బిల్లు పార్లమెంటు వద్దకు వచ్చింది. ఈ బిల్లు ప్రతిపక్షాల్లో, దేశ వ్యాప్తంగా తీవ్ర ఆందోళనలకు కారణమైంది. అంతర్జాతీయంగా అమెరికా వంటి దేశాలు కూడా దీనిని ఇప్పటికే తప్పు పట్టాయి.

11/07/2023 11:09(IST)

నెల్లూరు ఏపీ జెన్‌కోలో అగ్నిప్రమాదం

ముత్తుకూరు: నెల్లూరు జిల్లా ముత్తుకూరు మండలం ఏపీ జెన్‌కోలో అగ్నిప్రమాదం జరిగింది. కృష్ణపట్నం పోర్టు నుంచి ఏపీ జెన్‌కోకు బొగ్గు సరఫరా చేసే కన్వేయర్‌ బెల్ట్‌కు మంటలు అంటుకున్నాయి. సుమారు 100మీటర్ల మేర కన్వేయర్‌ బెల్ట్‌ దగ్ధమైనట్లు సమాచారం. విద్యుత్‌ షార్ట్‌సర్క్యూట్‌ కారణమై ఉండచవచ్చి అధికారులు అనుమానిస్తున్నారు. రెండు అగ్నిమాపక వాహనాలతో మంటలార్పుతున్నారు.

11/07/2023 11:08(IST)

అరసాడ- మురగడాం ప్రాంతంలో ఏనుగుల గుంపు సంచారం

బలిజిపేట: మండలంలోని మురగడాం - అరసాడ సువర్ణముఖీ నదీతీరంలో ఏనుగుల గుంపు సంచారం మళ్లీ అందోళన కలిగిస్తోంది. నాలుగు నెలల కిందట బలిజిపేట పరిసర ప్రాంతాల్లో సంచరించిన ఎనిమిది ఏనుగులు ప్రస్తుతం అరసాడ నదీ తీరంలో ప్రజలను భయభ్రాంతులకుగురిచేస్తున్నాయి. ఇవి మురగడాం తోటల్లో తిరుగుతున్నాయి. అటవీశాఖ, పోలీస్ అధికారులు వీటి కదలికలపై పర్యవేక్షిస్తున్నారు.

11/07/2023 11:01(IST)

శ్రీవారి ఆలయంలో శాస్త్రోక్తంగా కోయిల్‌ ఆళ్వార్‌ తిరుమంజనం

తిరుమల : తిరుమల శ్రీవారి ఆలయంలో జూలై 17వ తేదీన సాలకట్ల ఆణివార ఆస్థానం పర్వదినాన్ని పుర‌స్క‌రించుకుని మంగళవారం కోయిల్‌ ఆళ్వార్‌ తిరుమంజనం శాస్త్రోక్తంగా జ‌రిగింది. ఈ సందర్భంగా తితిదే ఈవో ఏవీ ధర్మారెడ్డి మీడియాతో మాట్లాడారు. సంవత్సరంలో నాలుగుసార్లు ఉగాది, ఆణివార ఆస్థానం, బ్రహ్మోత్సవాలు, వైకుంఠ ఏకాదశి పర్వదినాల ముందు వచ్చే మంగళవారం కోయిల్‌ ఆళ్వార్‌ తిరుమంజనం నిర్వహించడం ఆనవాయితీగా వస్తోందన్నారు.

11/07/2023 10:58(IST)

ఆర్టికల్‌ 370 రద్దు.. సుప్రీంలో ఆగస్టు 2 నుంచి విచారణ

దిల్లీ: జమ్మూ కశ్మీర్‌కు ప్రత్యేక ప్రతిపత్తి కల్పించే రాజ్యాంగంలోని ఆర్టికల్‌ 370 రద్దుపై దాఖలైన పిటిషన్లను నేడు సుప్రీంకోర్టు పరిశీలించింది. ఆగస్టు 2 నుంచి పూర్తిస్థాయిలో విచారణను చేపడతామని అత్యున్నత న్యాయస్థానం వెల్లడించింది. ఆగస్టు 2 నుంచి విచారణ చేపట్టి ముగిస్తామని ప్రధాన న్యాయమూర్తి జస్టిస్‌ డి.వై.చంద్రచూడ్‌ నేతృత్వంలోని ఐదుగురు సభ్యుల రాజ్యాంగ ధర్మాసనం తెలిపింది.

11/07/2023 10:50(IST)

కొనసాగుతున్న అంగన్వాడీల 36 గంటల దీక్ష

పార్వతీపురం టౌన్‌: పార్వతీపురం మన్యం జిల్లా కేంద్రం కలెక్టరేట్ వద్ద అంగన్వాడీ సిబ్బంది చేపట్టిన 36 గంటల దీక్ష కొనసాగుతోంది. సమస్యలు పరిష్కరించాలని కోరుతూ చేపట్టిన దీక్షకు మంచి స్పందన వచ్చిందని అంగన్వాడి సిబ్బంది పేర్కొన్నారు. ఈ సందర్భంగా ప్రభుత్వం ఇచ్చిన హామీలను నెరవేర్చాలని నాయకులు డిమాండ్ చేశారు.

11/07/2023 10:45(IST)

ఘజియాబాద్‌లో ఘోర ప్రమాదం.. ఆరుగురి మృతి

ఉత్తరప్రదేశ్‌లోని ఘాజియాబాద్‌ వద్ద ఘోర ప్రమాదం జరిగింది. ఓ కారును స్కూల్ బస్సు ఢీకొనడంతో ఆరుగురు మృతిచెందారు. మృతుల్లో ఇద్దరు చిన్నారులున్నారు. దిల్లీ-మేరఠ్‌ ఎక్స్‌ప్రెస్‌వేపై ఈ ఘటన జరిగింది.

11/07/2023 10:28(IST)

పాఠశాల బస్సుకు ప్రమాదం

ఆస్పరి: కర్నూలు జిల్లా ఆస్పరి మండలం కలపర్రి వద్ద పాఠశాల బస్సు ప్రమాదానికి గురైంది. అదుపుతప్పి గొయ్యిలోకి ఒరిగిపోయింది. ఈ ఘటనలో ఆరుగురు విద్యార్థులకు గాయాలయ్యాయి. దొడగొండ నుంచి కైరుప్పలకు వెళ్తుండగా ఈ ఘటన జరిగింది.

11/07/2023 10:27(IST)

ఐస్‌ల్యాండ్‌ రాజధాని వద్ద బద్దలైన అగ్నిపర్వతం

ఐస్‌ల్యాండ్‌ రాజధాని రెక్జావిక్‌ వద్ద భారీ అగ్నిపర్వతం సోమవారం బద్దలైంది. రెండేళ్ల వ్యవధిలో ఈ పర్వతం బద్దలుకావడం మూడోసారని ఆ దేశ వాతావరణశాఖ వెల్లడించింది. ప్రస్తుతం ఆ ప్రాంతంలో లావా వెదజల్లుతోంది. నగరం చుట్టుపక్కల మొత్తం నల్లటి పొగమేఘం కమ్మేసింది. రెక్జావిక్‌ నగరానికి 30 కిలోమీటర్ల దూరంలో భారీగా లావా వ్యాపిస్తోంది. ఈ వారం వేల సంఖ్య స్వల్ప భూకంపాలను ఈ ప్రాంతంలో గుర్తించారు.

11/07/2023 10:25(IST)

ఉక్రెయిన్‌లో శాంతికి భారత్‌ పాత్రను ఆహ్వానిస్తాం: అమెరికా

ఉక్రెయిన్‌లో శాంతి సాధనకు భారత్‌ కీలక పాత్ర పోషించడాన్ని తాము ఆహ్వానిస్తామని అమెరికా వెల్లడించింది. ఈ విషయాన్ని స్టేట్‌ డిపార్ట్‌మెంట్‌ ప్రతినిధి మాథ్యూ మిల్లర్‌ పేర్కొన్నారు. భారత్‌ లేదా ఆ దేశ ప్రధాని నరేంద్ర మోదీ రష్యా-ఉక్రెయిన్‌ మధ్య సంఘర్షణ నివారణకు ప్రయత్నిస్తున్నారా..? అన్న ప్రశ్నకు సమాధానంగా మిల్లర్‌ ఈ విషయాన్ని వెల్లడించారు.

11/07/2023 10:24(IST)

గంటపాటు జలాసనం వేసిన ఏపీ ఉపసభాపతి

విజయనగరం రింగురోడ్డు: ప్రపంచ స్మిమ్మింగ్‌ డే సందర్భంగా ప్రజల్లో జలక్రీడలపై చైతన్యం కల్పించేందుకు విజయనగరం నియోజకవర్గ ఎమ్మెల్యే, ఉప సభాపతి కోలగట్ల వీరభద్రస్వామి మంగళవారం నగరంలో ఆక్వా స్విమ్మింగ్‌ ఫూల్‌లో గంటపాటు జలాసనం వేశారు. ఈ సందర్భంగా ఉపముఖ్యమంత్రి పీడక రాజన్నదొర, సభాపతి తమ్మినేని సీతారాం, విద్యాశాఖ మంత్రి బోత్స సత్యనారాయణ, మాజీ మంత్రి, ఎమ్మెల్యే ధర్మాన కృష్ణదాస్‌ తదితరులు పాల్గొన్నారు. ఈ కార్యక్రమాన్ని తిలకించేందుకు పెద్ద ఎత్తున నగర వాసులు వైకాపా నాయకులు, కార్యకర్తలు తదితరులు పాల్గొన్నారు.

App

తెదేపా నేతలపై వైకాపా నాయకుల దాడి

తాజా వార్తలు (Latest News)

మృత్యువుతో గెలిచి.. పదిలో మెరిసి

వాట్సప్‌లో కొత్త ఖాతాల నుంచి సందేశాలు రావిక..?

#ఆఫీస్‌ పికాకింగ్‌.. కార్పొరేట్ ప్రపంచంలో మరో ట్రెండ్‌.. ఏమిటిది?

నేటి రాశి ఫలాలు.. 12 రాశుల ఫలితాలు ఇలా... (02/05/24)

‘అద్దె ఇల్లే సో బెటరు’.. కారణం చెప్పిన బాంబే షేవింగ్ కంపెనీ సీఈఓ

గూగుల్‌తో ఇంగ్లిష్‌ ప్రాక్టీస్‌.. కొత్త ఏఐ ఫీచర్‌ను ఎలా వాడాలి?

సుఖీభవ

చదువు