Breaking | Feedback | ePratibha | E-PAPER | Pratibha

మన విద్యా విధానంలో కళలకు చోటివ్వాలి: వెంకయ్య నాయుడు

Updated : 02 Sep 2023 21:19 IST

సంక్షిప్త వార్తలు - చిత్ర వార్తలు

02/09/2023 23:27(IST)

రోడ్డుప్రమాదంలో ఇద్దరు యువకులు మృతి

అనంతపురం జిల్లాలో జరిగిన రోడ్డు ప్రమాదంలో ఇద్దరు యువకులు మృతి చెందారు. విడపనకల్లు మండలం పొలికి వద్ద రెండు బైక్‌లు ఢీకొన్న ఘటనలో శికారి బాలు(18), వర్ధన్‌ (20) మృతి చెందారు. ప్రమాదంలో మరో నలుగురు గాయపడ్డారు. వారిని సమీపంలోని ఆసుపత్రికి తరలించి చికిత్స అందిస్తున్నారు.

02/09/2023 21:47(IST)

నిర్మల్‌లో ఆరేళ్ల బాలుడిని కిడ్నాప్ చేసేందుకు యత్నం

నిర్మల్‌: నిర్మల్‌లో ఆరేళ్ల బాలుడిని కిడ్నాప్ చేసేందుకు యత్నించిన వ్యక్తిని పోలీసులు పట్టుకున్నారు. ఆడుకుంటున్న బాలుడిని అపహరించేందుకు యత్నించిన ఘటన నిర్మల్ జిల్లా కేంద్రంలో కలకలం సృష్టించింది. నిర్మల్ జిల్లా కేంద్రంలోని ప్రభుత్వ ప్రసూతి ఆసుపత్రిలో పనిచేస్తున్న ఓ వైద్య ఉద్యోగిని తన ఆరేళ్ల కుమారుడితో పాటు ఆసుపత్రికి వచ్చింది. ప్రాంగణంలో ఒంటరిగా ఆడుకుంటున్న బాలుడిని గమనించిన వ్యక్తి శనివారం సాయంత్రం బాలుడిని పహరించాడు. స్థానికులు గమనించి అతడిని వెంబడించారు. కొద్దిదూరం పారిపోయిన అతడిని వివేక్ చౌక్ వద్ద పట్టుకొని దేహశుద్ధి చేశారు. అనంతరం బాలుడిని కుటుంబసభ్యులకు, నిందితుడిని పోలీసులకు అప్పగించారు. ఈ విషయమై పట్టణ సీఐ పురుషోత్తం చారిని సంప్రదించగా.. బాలుడి వద్ద ఉన్న చరవాణిని ఎత్తుకెళ్లే ఆలోచనతో ఆ వ్యక్తి బాలుడిని కిడ్నాప్‌ చేయడానికి ప్రయత్నించాడని సీఐ తెలిపారు.

02/09/2023 21:16(IST)

అధికారుల తనిఖీలు.. 20 ఎర్రచందనం దుంగలు స్వాధీనం!

వైఎస్‌ఆర్‌ జిల్లా: చింతకొమ్మ దిన్నె మండలం గుర్రంగుంపు తండా వద్ద తనిఖీలు నిర్వహించారు. ఈ తనిఖీల్లో ముగ్గురు స్మగ్లర్లు అరెస్ట్‌ అయ్యారు. 20 ఎర్ర చందనం దుంగలు, కారును పోలీసు అధికారులు స్వాధీనం చేసుకున్నారు.

02/09/2023 21:13(IST)

మన విద్యా విధానంలో సంగీతం, నృత్యానికి చోటివ్వాలి: వెంకయ్య నాయుడు

విశాఖపట్నం: విశాఖపట్నంలో జాతీయ సంగీత, నాటకోత్సవాల్లో మాజీ ఉప రాష్ట్రపతి వెంకయ్యనాయుడు పాల్గొన్నారు. ప్రముఖ వయోలిన్‌ విద్వాంసులు అన్నవరపు రామస్వామిని సత్కరించారు. మన విద్యా విధానంలో సంగీతం, నృత్యానికి చోటివ్వాలని వెంకయ్యనాయుడు అన్నారు. అహింస, శాంతి, సామరస్యాలకు సంగీతం, నృత్యం దోహదం చేస్తాయని ఆయన వివరించారు.

02/09/2023 21:10(IST)

విద్యుత్‌ కోతలపై గజపతి నగరంలో తెదేపా నిరసన

విజయనగరం: విజయనగరంలో విద్యుత్‌ కోతలపై గజపతి నగరంలో తెదేపా నిరసన తెలిపింది. నియోజకవర్గ ఇన్‌ఛార్జి కేఏ నాయుడు ఆధ్వర్యంలో కొవ్వొత్తుల ర్యాలీ నిర్వహించారు. పార్టీ కార్యాలయం నుంచి నాలుగు రోడ్ల కూడలి వరకు తెదేపా శ్రేణులు ర్యాలీ తీశారు.

02/09/2023 21:09(IST)

నెల్లూరు జిల్లాలో వర్షం.. నిలిచిన విద్యుత్‌ సరఫరా!

నెల్లూరు: జిల్లాలోని పలు చోట్ల ఉరుములు, మెరుపులతో కూడిన వర్షం కురిసింది. సైదాపురం, బోగోలు, కావలి, ఉలవపాడు, గుడ్లూరు మండలాల్లో వర్షం కురిసింది. దీంతో పలు చోట్ల విద్యుత్‌ సరఫరా నిలిచిపోయింది.

02/09/2023 20:32(IST)

కొద్ది వారాల్లోనే నల్గొండలో ఐటీ హబ్‌ ప్రారంభం: కేటీఆర్‌

హైదరాబాద్‌: కొద్ది వారాల్లోనే నల్గొండలో ఐటీ హబ్‌ ప్రారంభం చేయనున్నట్లు మంత్రి కేటీఆర్ తెలిపారు. ద్వితీయ శ్రేణి నగరాల్లోనూ ఐటీ రంగం అభివృద్ధికి చర్యలు తీసుకోనున్నట్లు కేటీఆర్‌ తెలిపారు. అన్ని రంగాల్లో ఐటీ హబ్‌ కోసం వేగంగా ప్రయత్నాలు చేస్తున్నట్లు చెప్పారు.

02/09/2023 20:10(IST)

ఉత్తమ ఉపాధ్యాయుల అవార్డులను ప్రకటించిన రాష్ట్ర ప్రభుత్వం

హైదరాబాద్‌: రాష్ట్ర ప్రభుత్వం ఉత్తమ ఉపాధ్యాయుల అవార్డులను ప్రకటించింది. 10 మంది ప్రధానోపాధ్యాయులు ఈ అవార్డుకు ఎంపికయ్యారు. 20 మంది స్కూల్‌ అసిస్టెంట్లు, పీజీటీ, టీజీలకు ఈ అవార్డులు వరించాయి. 11 మంది ఎస్జీటీలు, ఒక లెక్చరర్‌ను ఎంపిక చేశారు. ఈనెల 5న ఉపాధ్యాయ దినోత్సవం రోజున పురస్కారాలను ప్రదానం చేయనున్నారు.

02/09/2023 19:47(IST)

సామాన్య భక్తుడిగా దర్శనానికి వెళ్లిన తితిదే ఛైర్మన్‌

తిరుమల: సామాన్య భక్తుడిగా తితిదే ఛైర్మన్‌ భూమన కరుణాకర్‌ రెడ్డి వైకుంఠం 2 క్యూ కాంప్లెక్స్ నుంచి స్వామి వారి దర్శనానికి వెళ్లారు. మెటల్ డిటెక్టెర్ ద్వారా స్వయంగా తనిఖీలు చేయించుకొని వైకుంఠం- 2 క్యూలైన్ లోకి ప్రవేశించారు.

02/09/2023 19:44(IST)

హైదరాబాద్‌లో ‘రైతే రాజైతే’ పుస్తకావిష్కరణ

హైదరాబాద్: హైదరాబాద్‌లో ‘రైతే రాజైతే’ పుస్తకావిష్కరణ జరిగింది. మాజీ సీఎం వై.ఎస్‌. రాజశేఖర్‌ రెడ్డి వర్ధంతి సందర్భంగా ఈ పుస్తకాన్ని ఆవిష్కరించారు. ఈ సందర్భంగా దిగ్విజయ్‌ సింగ్ మాట్లాడారు. వైఎస్‌ఆర్‌ ముక్కుసూటి మనిషి అని కొనియాడారు. వైఎస్సార్‌తో తనకున్న అనుబంధం విడదీయరానిదని చెప్పారు. పార్టీ నిర్మాణంలో యుక్త వయస్సు నుంచే వైఎస్‌ఆర్‌ కీలకంగా పని చేశారని గుర్తు చేశారు.

02/09/2023 19:29(IST)

ప్రభుత్వ ఇళ్లపై ఉన్న ట్యాంకులను ఎత్తుకెళ్లిన ఇద్దరు అరెస్ట్‌

షాద్‌నగర్: ప్రభుత్వ ఇళ్లపై ఉన్న ట్యాంకులను ఎత్తుకెళ్లిన ఇద్దరిని పోలీసులు అరెస్ట్‌ చేశారు. రెండుపడగ గదుల ఇళ్లపై ఉన్న నీటి ట్యాంకులను దొంగలు ఎత్తుకెళ్లారు. షాద్‌నగర్ శివారు హాజిపల్లి ప్రభుత్వ గృహసముదాయంలో చోరీ జరిగింది. ఇద్దరు నిందితుల నుంచి 17 సింటెక్స్‌ ఓవర్ హెడ్‌ ట్యాంకులను స్వాధీనం చేసుకున్నారు.

02/09/2023 19:20(IST)

మంచిర్యాల జిల్లా మందమర్రిలో అమానుష చర్య

మందమర్రి పట్టణం: మేకను దొంగతనం చేశాడని నెపంతో దళిత యువకునితో పాటు పశువుల కాపరిని వేలాడదీసి కొట్టిన సంఘటన మంచిర్యాల జిల్లా మందమర్రిలో శనివారం వెలుగులోకి వచ్చింది. వివరాల్లోకి వెళ్తే.. మందమరికి చెందిన కొమురాజుల రాములు అతని భార్య స్వరూప, కొడుకు శ్రీనివాస్ అంగడి బజార్ ప్రాంతంలో నివాసం ఉంటున్నారు. పట్టణ శివారులోని గంగ నీళ్ల పంపుల సమీపంలో మేకల షెడ్డులో మేకలను పెంచుతున్నారు. సుమారు 20 రోజుల క్రితం మంద నుంచి ఒక మేక కనిపించకుండా పోయింది. దీంతో పశువుల కాపరి తేజ, దళితుడైన అతని స్నేహితుడు చిలుముల కిరణ్‌పై అనుమానంతో ఇద్దరినీ షెడ్డు వద్దకు పిలిపించారు. కింద పొగ పెట్టి వారిద్దరిని వేలాడదీసి తీవ్రంగా కొట్టి వదిలేశారు. శుక్రవారం ఇంటి నుంచి బయటకు వెళ్లిన కిరణ్ రాత్రి అయినా ఇంటికి రాకపోవడంతో కుటుంబసభ్యులు ఆందోళన చెందారు. ఈ క్రమంలో తన తమ్ముణ్ణి కట్టేసి కొట్టిన విషయం తెలియడంతో బాధితుని సోదరుడు పోలీసులకు ఫిర్యాదు చేశారు.

02/09/2023 19:03(IST)

గుడివాడ వైకాపాలో రచ్చకెక్కిన విభేదాలు

కృష్ణా: గుడివాడ వైకాపాలో విభేదాలు రచ్చకెక్కాయి. ఎంపీ బాలశౌరి, ఎమ్మెల్యే కొడాలి నాని వర్గీయుల మధ్య విభేదాలు తలెత్తాయి. స్థానిక ఎమ్మెల్యే లేకుండా ఎంపీ పింఛన్ల పంపిణీ కార్యక్రమం చేపట్టారు. దీంతో జిల్లా ఉపాధ్యక్షుడు హనుమంతరావు, బస్సు యజమాని సుధాకర్‌ల మధ్య వాగ్వాదం జరిగింది.

02/09/2023 17:37(IST)

ఏపీ ప్రభుత్వంపై కృష్ణా బోర్డుకు తెలంగాణ ఫిర్యాదు

ఏపీ ప్రభుత్వంపై కృష్ణా బోర్డుకు తెలంగాణ ఫిర్యాదు చేసింది. కేఆర్‌ఎంబీ ఛైర్మన్‌కు ఈఎన్సీ మురళీధర్‌ లేఖ రాశారు. అనుమతి లేకుండా శ్రీశైలం కుడి కాల్వ లైనింగ్‌ పనులు చేపడుతున్నారని ఫిర్యాదు చేశారు. అనుమతుల్లేకుండా పనులు చేపట్టవద్దని ఎన్జీటీ ఆదేశాలు ఇచ్చిందని తెలిపారు. ఏపీ చేపడుతున్న పనులను తక్షణమే నిలువరించాలని కోరారు.

02/09/2023 17:29(IST)

సీఎం కేసీఆర్‌, మంత్రి ఎర్రబెల్లి, ఆరూరి రమేష్ చిత్రపటాలకు క్షీరాభిషేకం

వర్ధన్నపేట: వీవోఏల సేవలను గుర్తించిన సీఎం కేసీఆర్‌కు వర్ధన్నపేటలో వీవోఏలు కృతజ్ఞత సభ నిర్వహించారు. ఈ సందర్భంగా కేసీఆర్‌, ఎర్రబెల్లి దయాకర్ రావు, ఆరూరి రమేష్ చిత్ర పటాలకు క్షీరాభిషేకం చేశారు. వివోఏల కృతజ్ఞత సభలో వర్ధన్నపేట ఎమ్మెల్యే ఆరూరి రమేష్ హాజరై ప్రసంగించారు.

02/09/2023 17:26(IST)

చిత్రహింసలు పెట్టి భర్తను హతమార్చిన భార్య

మెదక్‌: మద్యం తాగి వేధిస్తున్నాడని భర్తను భార్య చిత్రహింసలు పెట్టి హతమార్చింది. ఘనపూర్‌లో భర్త వెంకటేశ్‌ను ఆయన భార్య బంధువులతో కలిసి కడతేర్చింది. బాధితుడిని ఓ ఇంట్లో బంధించి దాడి చేసి, యాసిడ్‌ పోసింది. దీంతో బాధితుడు డయల్‌ 100కు ఫోన్‌ చేసి సమాచారం ఇచ్చాడు. పోలీసులు వెంకటేశ్‌ను విడిపించి ఆసుపత్రికి తరలించారు. ఆసుపత్రిలో చికిత్స పొందుతూ బాధితుడు మృతి చెందాడు.

02/09/2023 17:24(IST)

వై.ఎస్‌. రాజశేఖర్‌ రెడ్డి వర్ధంతి సందర్భంగా కాంగ్రెస్‌ నాయకుల నివాళి

వరంగల్‌: మాజీ ముఖ్యమంత్రి డాక్టర్ వై.ఎస్. రాజశేఖర్ రెడ్డి వర్ధంతి సందర్భంగా వరంగల్‌ జిల్లా కాంగ్రెస్ పార్టీ కార్యాలయంలో ఘన నివాళి అర్పించారు. ఈ సందర్భంగా పార్టీ నాయకులు వైఎస్‌ఆర్‌ సేవలను కొనయాడారు.

02/09/2023 17:16(IST)

కారును ఢీకొన్న లారీ.. ఇద్దరు మృతి

వైఎస్‌ఆర్‌ కడప జిల్లా ముద్దనూరు మండలం ఓబుళాపురం వద్ద కారును లారీ ఢీకొంది. ఈ ప్రమాదంలో ఇద్దరు మృతి చెందగా, ఒకరికి తీవ్ర గాయాలయ్యాయి. కారు కడప నుంచి తాడిపత్రికి వెళ్తుండగా ఈ ప్రమాదం చోటు చేసుకుంది.

02/09/2023 17:07(IST)

తాగునీటి సమస్య ఉన్నా ప్రత్యామ్నాయ ఏర్పాట్లు చేయడం లేదు: తెదేపా

కర్నూలు: తీవ్రమైన వర్షాభావ పరిస్థితుల నేపథ్యంలో కర్నూలు నగరానికి తాగునీటి సమస్య పొంచి ఉన్నా ప్రభుత్వం ప్రత్యామ్నాయ ఏర్పాట్లు చేయడం లేదని తెదేపా నేతలు విమర్శించారు. ఆ పార్టీ రాష్ట్ర కార్యదర్శి సోమిశెట్టి వెంకటేశ్వర్లు, జిల్లా అధ్యక్షుడు బీటీ నాయుడు సమ్మర్ స్టోరేజీ ట్యాంక్‌ను పరిశీలించారు. సుంకేసుల జలాశయంలో నీరు తక్కువగా ఉండటం, కేసీ కెనాల్‌కు నీరు విడుదల చేయకపోవడంతో సమ్మర్‌ స్టోరేజీ ట్యాంకులో నీరు రోజురోజుకూ తగ్గిపోతోందని తెలిపారు. మరికొన్ని రోజుల్లో కర్నూలుకు తీవ్రమైన తాగునీటి సమస్య తలెత్తే ప్రమాదం ఉందని గుర్తుచేశారు.

02/09/2023 17:04(IST)

వరంగల్‌లో శ్రీ వేంకటేశ్వర స్వామిని దర్శించుకున్న ఎమ్మెల్యే దంపతులు

వరంగల్: వరంగల్ బట్టల బజార్‌లోని శ్రీ వేంకటేశ్వర స్వామివారిని వరంగల్‌ తూర్పు ఎమ్మెల్యే నన్నపునేని నరేందర్‌ సతీ సమేతంగా దర్శించుకొని ప్రత్యేక పూజలు చేశారు.

02/09/2023 16:58(IST)

కేంద్రం నిధులు కేటాయించినా రాష్ట్ర ప్రభుత్వం వినియోగించుకోవడం లేదు: టీజీ వెంకటేశ్‌

కర్నూలు సమీపంలోని గార్గేయపురం గ్రామంలో భాజపా ఆధ్వర్యంలో ‘నా మట్టి.. నా దేశం’ కార్యక్రమం నిర్వహించారు. ఈ కార్యక్రమంలో రాజ్యసభ మాజీ సభ్యుడు టీజీ వెంకటేశ్‌ పాల్గొని ఇంటింటికి వెళ్లి మట్టిని సేకరించారు. ఈ సందర్భంగా ఆయన మీడియాతో మాట్లాడుతూ... దేశ ప్రజలను సమైక్యం చేసేందుకే ప్రధానమంత్రి ఈ కార్యక్రమాన్ని ప్రారంభించారని తెలిపారు. గ్రామాల్లో అభివృద్ధి కోసం భాజపా కృషి చేస్తోందని చెప్పారు. నరేంద్ర మోదీ నాయకత్వం భారతదేశానికి ఎంతో అవసరమన్నారు. కేంద్ర ప్రభుత్వం ఎన్నో నిధులు కేటాయించినా రాష్ట్ర ప్రభుత్వం సద్వినియోగం చేసుకోవడం లేదని విమర్శించారు.

02/09/2023 16:49(IST)

భారం పెరుగుతున్నా సంక్షేమ పథకాలను అమలు చేస్తున్నారు: పట్నం మహేందర్ రెడ్డి

సంగారెడ్డి: ప్రభుత్వంపై భారం పెరుగుతున్నా సంక్షేమ పథకాలను ముఖ్యమంత్రి కేసీఆర్ అమలు చేస్తున్నారని మంత్రి పట్నం మహేందర్ రెడ్డి అన్నారు. సంగారెడ్డి జిల్లా కర్థనూరు ఫేజ్-2లో నిర్మించిన రెండు పడక గదుల ఇళ్లను 500 మంది లబ్ధిదారులకు ఆయన పంపిణీ చేశారు.

02/09/2023 16:43(IST)

చర్లపల్లి రైల్వే స్టేషన్‌ అభివృద్ధి పనులను పరిశీలించిన దక్షిణ మధ్య రైల్వే జీఎం

సికింద్రాబాద్: చర్లపల్లి రైల్వే స్టేషన్‌లో శాటిలైట్ టెర్మినల్ పనుల పురోగతిని దక్షిణ మధ్య రైల్వే జనరల్ మేనేజర్ అరుణ్ కుమార్ జైన్ పరిశీలించారు. మౌలిక సదుపాయాల పనులు, ఇతర ప్రయాణికుల సౌకర్యాలకు సంబంధించిన పనుల పురోగతిని జనరల్ మేనేజర్‌కు అధికారులు వివరించారు. జనరల్ మేనేజర్ బృందాన్ని అభినందించి పనులను మరింత వేగవంతం చేయాలని ఆయన ఆదేశించారు. నిర్మాణంలో ఉన్న స్టేషన్‌ నూతన భవనాన్ని అరుణ్‌ కుమార్‌ జైన్‌ పరిశీలించారు. కోచ్ నిర్వహణ సౌకర్యాలు, ఇతర మౌలిక సదుపాయాల పనుల పురోగతిని ఆయన సమీక్షించారు. జంట నగరాల్లో చర్లపల్లి రైల్వే స్టేషన్‌ నాలుగో అతిపెద్ద ప్యాసింజర్‌ టెర్మినల్‌గా అవతరించనుందన్నారు. విమానాశ్రయాలతో సమానంగా ఆధునిక సౌకర్యాలతో కొత్త టెర్మినల్‌ను అభివృద్ధి చేస్తున్నారని చెప్పారు.

02/09/2023 16:11(IST)

సొంత చెల్లే హంతకురాలు.. వీడిన దీప్తి హత్య కేసు మిస్టరీ

కోరుట్ల దీప్తి హత్య కేసు అంశంపై ఎస్పీ భాస్కర్‌ మీడియా సమావేశం నిర్వహించారు. సాంకేతిక ఆధారాలతో దీప్తి హత్య కేసును ఛేదించినట్లు తెలిపారు. ఎస్పీ తెలిపిన వివరాల ప్రకారం.. కారులో వెళ్తున్న చందన, ఆమె స్నేహితుడిని పోలీసులు ఆర్మూర్‌లో పట్టుకున్నారు. దీప్తిని చెల్లెలు చందన హత్య చేసినట్లుగా ప్రాథమికంగా నిర్ధారించారు. బాయ్‌ఫ్రెండ్ సహకారంతో ఆమె దీప్తిని హతమార్చిందని తెలిపారు.

02/09/2023 16:04(IST)

రోడ్ల మరమ్మతులు చేయలేని వ్యక్తి 3 రాజధానులు నిర్మిస్తారా?: చంద్రబాబు

కాకినాడ: ప్రతి ఒక్కరికీ ఉద్యోగం ఇచ్చే బాధ్యతను తాము తీసుకుంటామని తెదేపా అధినేత చంద్రబాబు నాయుడు అన్నారు. కాకినాడలో నిర్వహించిన తెదేపా జోన్‌-2 సమావేశంలో ఆయన మాట్లాడారు. ఇంటి నుంచే పని చేసుకునే వాతావరణం కల్పిస్తామని తెలిపారు. వెనుకబడిన వర్గాలు తెదేపాకు వెన్నెముక అని చెప్పారు. జాబు రావాలంటే బాబు రావాల్సిందే అని ప్రచారం చేయాలని సూచించారు. తాము అధికారంలో ఉంటే ఇప్పటికే పోలవరం పూర్తి చేసేవాళ్లమని చెప్పారు. రోడ్ల మరమ్మతులు చేయలేని వ్యక్తి 3 రాజధానులు నిర్మిస్తారా? అని చంద్రబాబు ప్రశ్నించారు.

02/09/2023 16:01(IST)

శ్రీవారి సేవలో గాయకుడు మనో

తిరుమల: ప్రముఖ గాయకుడు మనో శనివారం తిరుమల శ్రీవారిని దర్శించుకున్నారు. వీఐపీ ప్రారంభ విరామ దర్శన సమయంలో ఆయన కుటుంబ సమేతంగా స్వామివారి సేవలో పాల్గొన్నారు. తితిదే ఆలయ అధికారులు ఆయనకు స్వాగతం పలికి దర్శన ఏర్పాట్లు చేశారు. అనంతరం రంగనాయకుల మండపంలో పండితులు మనోకు ఆశీర్వచనాలిచ్చి శ్రీవారి తీర్థప్రసాదాలు అందజేశారు.

02/09/2023 15:58(IST)

మహబూబ్‌నగర్‌లో మెగా జాబ్‌ మేళా

మహబూబ్‌నగర్‌: మహబూబ్‌నగర్‌లోని మినీ శిల్పారామంలో మెగా జాబ్‌ మేళా నిర్వహించారు. మంత్రి శ్రీనివాస్‌ గౌడ్‌ ఈ జాబ్‌ మేళాను జ్యోతి ప్రజ్వలన చేసి ప్రారంభించారు. అనంతరం ధ్రువపత్రాల పంపిణీ చేశారు.

02/09/2023 15:53(IST)

తితిదే ధర్మకర్తల మండలి సభ్యులుగా ముగ్గురు ప్రమాణ స్వీకారం

తిరుమల: తితిదే ధర్మకర్తల మండలి సభ్యులుగా సీతారెడ్డి, విశ్వ‌నాధ‌రెడ్డి, స‌త్య‌నారాయ‌ణ శ‌నివారం తిరుమల శ్రీవారి ఆలయంలో ప్రమాణ స్వీకారం చేశారు. శ్రీవారి ఆలయంలో స్వామివారి సన్నిధిలో వారి చేత జేఈవో శ్రీ వీర‌బ్ర‌హ్మం ప్రమాణ స్వీకారం చేయించారు. స్వామివారి దర్శనానంతరం రంగనాయకుల మండపంలో వేద పండితులు వేదాశీర్వచనం చేశారు. అనంతరం వీరికి జేఈవో శ్రీవారి తీర్థ ప్రసాదాలు, చిత్రపటాన్ని అందజేశారు.

02/09/2023 15:50(IST)

శంషాబాద్‌ విమానాశ్రయంలో భారీగా డ్రగ్స్‌ పట్టివేత

హైదరాబాద్‌: శంషాబాద్‌ విమానాశ్రయంలో భారీగా డ్రగ్స్‌ స్వాధీనం చేసుకున్నారు. రూ.50 కోట్ల విలువైన 5 కిలోల కొకైన్‌ను డీఆర్‌ఐ అధికారులు స్వాధీనం చేసుకున్నారు. సింగపూర్‌, దిల్లీ నుంచి డ్రగ్స్‌ తరలిస్తున్న ముఠాను పట్టుకున్నారు.

02/09/2023 15:48(IST)

శ్రీ‌వారి సాల‌క‌ట్ల బ్ర‌హ్మోత్స‌వాలకు సెప్టెంబ‌ర్‌ 17న అంకురార్ప‌ణ

తిరుమల: శ్రీవారి సాల‌క‌ట్ల బ్రహ్మోత్సవాలు సెప్టెంబ‌ర్‌ 18 నుంచి 26వ తేదీ వరకు జరుగనున్నాయి. ఇందుకోసం సెప్టెంబ‌ర్‌ 17న అంకురార్ప‌ణ జ‌రుగ‌నుంది. బ్ర‌హ్మోత్స‌వాల నేప‌థ్యంలో సెప్టెంబర్‌ 12న కోయిల్ ఆళ్వార్ తిరుమంజ‌నం నిర్వ‌హిస్తారు. వాహ‌న‌సేవ‌లు ఉద‌యం 8 నుంచి 10 గంట‌ల వ‌ర‌కు, రాత్రి 7 నుంచి 9 గంట‌ల వ‌ర‌కు జ‌రుగుతాయి. బ్రహ్మోత్సవాల్లో స్వామివారికి వివిధ రకాల వాహన సేవలు చేయనున్నారు.

02/09/2023 15:46(IST)

సెప్టెంబ‌ర్‌లో తితిదే స్థానిక ఆల‌యాల్లో విశేష ఉత్స‌వాలు

తిరుమల: సెప్టెంబ‌ర్‌లో తితిదే స్థానిక ఆల‌యాల్లో విశేష ఉత్స‌వాలు నిర్వహించనున్నారు. సెప్టెంబ‌ర్‌ 7న గోకులాష్ట‌మి, ఎస్వీ గోశాల‌లో గోపూజ‌ చేయనున్నారు. సెప్టెంబ‌ర్‌ 9న తిరుప‌తి శ్రీ కోదండ‌రామాల‌యంలో శిక్యోత్స‌వం(ఉట్లోత్స‌వం) నిర్వహిస్తారు. సెప్టెంబ‌ర్‌ 10న శ్రీ గోవింద‌రాజ‌స్వామివారి చిన్న‌వీధి శిక్యోత్స‌వం ఉంటుంది. సెప్టెంబ‌ర్‌ 11న శ్రీ గోవింద‌రాజ‌స్వామివారి పెద్ద‌వీధి శిక్యోత్స‌వం, సెప్టెంబ‌ర్‌ 18న వినాయ‌క చ‌వితి రోజున‌ శ్రీ క‌పిలేశ్వ‌ర‌స్వామివారి ఆల‌యంలో వినాయ‌కోత్స‌వం నిర్వహిస్తారు. సెప్టెంబ‌ర్‌ 24 నుంచి 27వ తేదీ వ‌ర‌కు శ్రీ గోవింద‌రాజ‌స్వామివారి ఆలయంలో ప‌విత్రోత్స‌వాలు చేస్తారు. సెప్టెంబ‌ర్‌ 26 నుంచి 29వ తేదీ వ‌ర‌కు తిరుచానూరు శ్రీ ప‌ద్మావ‌తి అమ్మ‌వారి ప‌విత్రోత్స‌వాలు జరగనున్నాయి.

02/09/2023 15:44(IST)

ఫార్మా కంపెనీ ఎదుట దంపతుల ఆత్మహత్యాయత్నం

కామారెడ్డి: బిక్కనూరు మండలం జంగంపల్లి వద్ద ఫార్మా కంపెనీ ఎదుట దంపతులు ఆత్మహత్యాయత్నం చేశారు. తొలుత శివరాజు తన భార్య జ్యోతిపై పెట్రోల్‌ పోశాడు. అనంతరం కత్తితో పొడుచుకునేందుకు యత్నించాడు. దీంతో అప్రమత్తమైన ఫార్మా కంపెనీ సెక్యూరిటీ సిబ్బంది ఇద్దరిని అడ్డుకున్నారు. శివరాజు రెండు బస్సులను ఫార్మా కంపెనీకి అద్దెకు ఇచ్చాడు. అద్దె బస్సుల బిల్లులు చెల్లించకపోవడంతో శివరాజు నష్టపోయాడు. ఈక్రమంలో అద్దె బస్సుల బిల్లులు చెల్లించాలని దంపతులు ఆత్మహత్యాయత్నం చేశారు.

02/09/2023 15:35(IST)

ఈఫిల్ టవర్‌ను తాకిన ‘యువగళం’ అభిమానం

యువగళం అభిమానం ఈఫిల్ టవర్‌ను తాకింది. తెదేపా జాతీయ ప్రధాన కార్యదర్శి నారా లోకేశ్‌ యువగళం పాదయాత్ర 200 రోజులు పూర్తి చేసుకున్న సందర్భంగా పారిస్‌లోని ఈఫిల్ టవర్ వద్ద వినోద్‌ యువగళం జెండాను ప్రదర్శించి అభిమానాన్ని చాటుకున్నాడు. మంగళగిరి నియోజకవర్గానికి చెందిన పార్టీ కార్యకర్త వాసిరెడ్డి వినోద్ వచ్చే ఎన్నికల్లో తెదేపా అధికారం చేపట్టాలని ఆకాంక్షిస్తూ ఈఫిల్ టవర్ వద్ద తెదేపా, యువగళం జెండాలను ప్రదర్శించారు.

02/09/2023 15:29(IST)

ఖమ్మంలో పార్కింగ్‌తో కూడిన సోలార్‌ షెడ్‌ను ప్రారంభించిన మంత్రి

ఖమ్మం: ఖమ్మంలో పార్కింగ్‌తో కూడిన సోలార్ షెడ్‌ను మంత్రి పువ్వాడ అజయ్‌ కుమార్‌ ప్రారంభించారు. రాష్ట్రంలోనే ప్రథమంగా ఖమ్మం జిల్లా సమీకృత జిల్లా కార్యాలయాలలో రూ.1.58 కోట్లతో ఎర్పాటు చేసిన 200KW సామర్థ్యం కలిగిన సోలార్ పార్కింగ్ షెడ్‌ను ప్రారంభించారు. ఎమ్మేల్యే సండ్ర వెంకట వీరయ్య, జిల్లా కలెక్టర్ గౌతమ్, అధికారులు పాల్గొన్నారు.

02/09/2023 15:27(IST)

రాష్ట్ర ప్రభుత్వ అసమర్థత వల్లే కరెంటు కోతలు: వర్ల రామయ్య

రాష్ట్ర ప్రభుత్వ అసమర్థత, అవగాహన లేమి, చేతకానితనం వల్ల కరెంటు కోతలు విపరీతంగా పెరిగాయని తెదేపా పొలిట్ బ్యూరో సభ్యుడు వర్ల రామయ్య ఆరోపించారు. ఎన్నికలకు ముందు రైతులకు 9 గంటలు నిరాటంకంగా కరెంటు ఇస్తామని హామీ ఇచ్చి.. నేడు 3, 4 గంటలు కూడా కరెంటు ఇవ్వడంలేదంటూ మండిపడ్డారు. రాష్ట్ర ప్రభుత్వం కరెంటు కోతలతో కొట్టుమిట్టాడుతుంటే, సీఎం జగన్‌ విద్యుత్ శాఖను ఏనాడైనా సమీక్షించారా అని వర్లరామయ్య ప్రశ్నించారు.

02/09/2023 15:21(IST)

తెదేపా జోన్‌-2 సమావేశానికి హాజరైన చంద్రబాబు

కాకినాడలో తెదేపా జోన్‌-2 సమావేశం నిర్వహిస్తున్నారు. సభావేదిక వద్దకు పార్టీ అధినేత చంద్రబాబు నాయుడు చేరుకున్నారు. ‘బాబు ష్యూరిటీ - భవిష్యత్తుకు గ్యారెంటీ’ 45 రోజుల కార్యక్రమంపై ఆయన పార్టీ శ్రేణులకు దిశానిర్దేశం చేయనున్నారు.

02/09/2023 15:16(IST)

వీరిది డబుల్ ఇంజిన్ కాదు.. ట్రబుల్ ఇంజిన్: హరీశ్‌రావు

సంగారెడ్డి జిల్లా కొల్లూరులో రెండు పడక గదుల ఇళ్లను మంత్రి హరీశ్‌ రావు లబ్ధిదారులకు అందజేశారు. ఈ సందర్భంగా ఆయన మాట్లాడుతూ.. విలువైన స్థలంలో, ధనవంతులు ఉండే ప్రాంతంలో పేదలకు ఒక్క రూపాయి ఖర్చు లేకుండా రూ.60 లక్షల విలువైన ఇళ్లు ఇచ్చిన ఘనత కేసిఆర్ ప్రభుత్వానిదే అన్నారు. భాజపా వాళ్లకు మాటలు ఎక్కువ, చేతలు తక్కువ అని విమర్శించారు. రెండు పడక గదుల ఇళ్ల వద్ద ఆస్పత్రి, రేషన్ షాప్‌తో పాటు అన్ని మౌలిక వసతులు కల్పిస్తామని తెలిపారు. డబుల్ ఇంజిన్ సర్కార్ ఎక్కడైనా రెండు పడక గదులు ఇచ్చిందా అని ప్రశ్నించారు. వీరిది డబుల్ ఇంజిన్ కాదని, ట్రబుల్ ఇంజిన్ అని ఎద్దేవా చేశారు.

02/09/2023 15:09(IST)

అత్తాపూర్‌లో జరిగిన హత్య కేసులో నలుగురి అరెస్ట్

హైదరాబాద్‌: అత్తాపూర్‌లో జరిగిన రాహుల్ హత్య కేసును రాజేంద్రనగర్‌ పోలీసులు ఛేదించారు. నలుగురు నిందితులను అరెస్ట్ చేశారు. ఆస్తి తగాదాలే హత్యకు కారణమని రాజేంద్రనగర్ డీసీపీ జగదీశ్వర్ రెడ్డి తెలిపారు. ఆగస్టు 29న అత్తాపూర్‌లోని సెలబ్రిటీ జిమ్ వద్ద రాహుల్ హత్య జరిగింది. జిమ్ నుంచి బయటకు వస్తున్న సమయంలో పెప్పర్ స్ప్రే కొట్టి కత్తులతో దాడి చేసి హత్య చేశారు.

02/09/2023 14:35(IST)

తెలంగాణ గవర్నర్‌ పర్యటన సందర్భంగా ఫ్లెక్సీలు వేసిన యువకులు అరెస్ట్‌

అమరావతి: తెలంగాణ గవర్నర్‌ పర్యటన సందర్భంగా మంగళగిరి మండలంలో ఫ్లెక్సీలు వేసిన యువకులను పోలీసులు అరెస్ట్‌ చేశారు. రహదారుల దుస్థితిని తెలియజేస్తూ కురగల్లు గ్రామస్థులు ఫ్లెక్సీలు ఏర్పాటు చేశారు. కురగల్లు మీదుగా గవర్నర్‌ ఎస్‌ఆర్‌ఎంకు వెళ్లారు. గవర్నర్‌ రాక సందర్భంగా రాత్రి కంకరతో అధికారులు గుంతలను పూడ్చారు.

02/09/2023 14:28(IST)

తెలంగాణ వర్సిటీ వద్ద పొరుగు సేవల ఉద్యోగులు ఆందోళన

నిజామాబాద్‌: తెలంగాణ వర్సిటీ వద్ద పొరుగు సేవల ఉద్యోగులు ఆందోళన చేపట్టారు. వర్సిటీలో మళ్లీ అక్రమాలు జరుగుతున్నాయని నిరసన చేశారు. అర్చనను కాంట్రాక్టు ఉద్యోగిగా మార్చడంపై ఆందోళన చేశారు. ఔట్‌సోర్సింగ్‌ ఉద్యోగులను కాంట్రాక్ట్ ఉద్యోగులుగా గుర్తించాలని డిమాండ్‌ చేశారు.

02/09/2023 14:23(IST)

ఈదరపల్లిలో హత్యకు రాజకీయ కోణం లేదు: ఎస్పీ

కోనసీమ జిల్లాలోని ఈదరపల్లిలో శుక్రవారం జరిగిన రౌడీషీటర్‌ కిషోర్‌ హత్య కేసుకు సంబంధించిన వివరాలను ఎస్పీ శ్రీధర్‌ వెల్లడించారు. హత్యకు రాజకీయ కోణం లేదని ఆయన తెలిపారు. సామాజిక మాధ్యమాల్లో రెచ్చగొట్టే పోస్టింగులు పెడితే కఠిన చర్యలు తీసుకుంటామని హెచ్చరించారు.

02/09/2023 14:14(IST)

అబ్దుల్లాపూర్‌మెట్‌లో అదృశ్యమైన విద్యార్థి ఆచూకీ కోసం గాలింపు

రంగారెడ్డి: పది రోజుల క్రితం అబ్దుల్లాపూర్‌మెట్‌లో అదృశ్యమైన విద్యార్థి ఆంజనేయులు ఆచూకీ కోసం గాలిస్తున్నారు. అచ్చంపేటలో శుక్రవారం బస్సులో ప్రయాణించాడని కండక్టర్‌ సమాచారం ఇచ్చారు. మిస్సింగ్‌ పాంప్లెట్లను చూసి ఆంజనేయులును కండక్టర్‌ గుర్తుపట్టారు. కండక్టర్‌ సమాచారం మేరకు అచ్చంపేటలో సీసీ కెమెరాలను రాచకొండ పోలీసులు పరిశీలిస్తున్నారు.

02/09/2023 14:08(IST)

160 స్థానాలు గెలిచి చంద్రబాబు సీఎం కాబోతున్నారు: అచ్చెన్నాయుడు

కాకినాడ: అచ్చంపేట జోన్‌ 2 సమావేశంలో తెదేపా ఏపీ రాష్ట్ర అధ్యక్షుడు అచ్చెన్నాయుడు పాల్గొన్నారు. 160 స్థానాలు గెలిచి చంద్రబాబు సీఎం కాబోతున్నారని ఆయన తెలిపారు. తెదేపా అంటేనే సంక్షేమం అని చెప్పారు.

02/09/2023 14:05(IST)

ఆదిత్య ఎల్‌1 ప్రయోగంపై సీఎం కేసీఆర్‌ హర్షం

ఆదిత్య ఎల్‌1 ప్రయోగంపై సీఎం కేసీఆర్‌ హర్షం వ్యక్తం చేశారు. అంతరిక్ష పరిశోధనలో ఇస్రో మరో మైలురాయిని దాటిందని ఆయన తెలిపారు. ఇస్రో శాస్త్రవేత్తల ప్రగతి.. ప్రతి భారతీయుడిని గర్వపడేలా చేసిందని తెలిపారు. ఇస్రో ఛైర్మన్‌, శాస్త్రవేత్తలు, ఇతర సిబ్బందికి అభినందనలు తెలియజేశారు.

02/09/2023 13:58(IST)

ఇస్రో మరో అద్భుత మైలురాయిని సాధించింది: పురందేశ్వరి

సోలార్ మిషన్ లాంచింగ్ విజయవంతం కావడంపై భాజపా ఏపీ రాష్ట్ర అధ్యక్షురాలు పురందేశ్వరి స్పందించారు. ఇస్రో మరో అద్భుత మైలురాయిని సాధించిందని అన్నారు. ఇస్రో శాస్త్రవేత్తలు నిలకడగా అత్యుత్తమ ఫలితాలు అందించారని చెప్పారు.

02/09/2023 13:55(IST)

300 కిలోల గంజాయి స్వాధీనం

అల్లూరి జిల్లాలోని కొయ్యూరు మండలం గుమ్మడివానిపాలెం శివారులో గంజాయిని స్వాధీనం చేసుకున్నారు. జీడితోటలో నిల్వ ఉంచిన గంజాయి డంప్‌ను గుర్తించారు. తరలించేందుకు సిద్ధంగా ఉంచిన 300 కిలోల గంజాయిని స్వాధీనం చేసుకున్నారు. ఘటనా స్థలంలో కారు, ద్విచక్రవాహనాన్ని స్వాధీనం చేసుకున్నారు. 10 మంది నిందితులను అదుపులోకి తీసుకున్నారు.

02/09/2023 13:51(IST)

రాబోయే ఎన్నికల్లో చీరాల ఎమ్మెల్యేగా పోటీ చేసి గెలుస్తా: కరణం వెంకటేశ్‌

బాపట్ల జిల్లాలోని చీరాలలో నిర్వహించిన వైఎస్‌ రాజశేఖర్‌రెడ్డి వర్ధంతి కార్యక్రమంలో వైకాపా నేత కరణం వెంకటేశ్‌ పాల్గొన్నారు. వైఎస్‌ఆర్‌ విగ్రహానికి ఆయన నివాళి అర్పించారు. ఈ సందర్భంగా మాట్లాడుతూ.. సంక్షేమం, అభివృద్ధి రెండు కళ్లుగా జగన్‌ పాలన సాగుతోందని చెప్పారు. రాబోయే ఎన్నికల్లో చీరాల ఎమ్మెల్యేగా పోటీ చేసి గెలుస్తానని ధీమా వ్యక్తం చేశారు.

02/09/2023 13:45(IST)

భారత అంతరిక్ష పరిశోధన ఉన్నత శిఖరాలకు చేరాలి: జగన్‌

భారత్‌ ప్రయోగించిన మొదటి సోలార్ మిషన్ లాంచింగ్ విజయవంతం కావడంపై ఇస్రో శాస్త్రవేత్తలకు ఏపీ సీఎం జగన్‌ అభినందనలు తెలిపారు. భారత అంతరిక్ష పరిశోధన ఉన్నత శిఖరాలకు చేరాలని ఆయన ఆకాంక్షించారు.

02/09/2023 13:43(IST)

జగన్‌ అధికారంలోకి వచ్చాక రాష్ట్రంలో కరెంటు కష్టాలు: కళా వెంకట్రావు

శ్రీకాకుళం: జగన్‌ అధికారంలోకి వచ్చాక ఏపీ రాష్ట్రంలో కరెంటు కష్టాలొచ్చాయని కళా వెంకట్రావు ఆరోపించారు. శ్రీకాకుళంలో నిర్వహించిన మీడియా సమావేశంలో ఆయన మాట్లాడారు. రాష్ట్రానికి జగన్‌ గ్రహణం పట్టిందన్నారు. సరైన ప్రణాళిక లేకనే రాష్ట్రంలో విద్యుత్‌ కష్టాలు వస్తున్నాయని మండిపడ్డారు. విద్యుత్‌ ఉత్పత్తిదారులకు బిల్లులు చెల్లించకపోవడంతో తరలిపోయారని వివరించారు.

02/09/2023 13:37(IST)

పోలీసులకే రక్షణ లేకపోతే ప్రజలకు రక్షణ ఎలా ఉంటుంది: కన్నా లక్ష్మీనారాయణ

పోలీసులకే రక్షణ లేకపోతే ప్రజలకు రక్షణ ఎలా ఉంటుందని మాజీ మంత్రి కన్నా లక్ష్మీనారాయణ ప్రశ్నించారు. ముప్పాళ్ల పోలీసు స్టేషన్‌పై దాడిచేసి ఎస్సై కిషోర్‌ను గాయపర్చారని ఆయన తెలిపారు. దాడి చేసిన వైకాపా నాయకులను కఠినంగా శిక్షించాలని డిమాండ్‌ చేశారు. అరాచక ప్రభుత్వాన్ని గద్దె దించేందుకు ప్రజలంతా ఏకం కావాలని పిలుపునిచ్చారు.

02/09/2023 13:31(IST)

కాంగ్రెస్‌లో వైతెపా విలీనంపై చర్చలు తుది దశకు వచ్చాయి: వైఎస్‌ షర్మిల

కాంగ్రెస్‌లో వైతెపా విలీనంపై చర్చలు తుది దశకు వచ్చాయని వైఎస్‌ షర్మిల తెలిపారు. కేసీఆర్‌ అవినీతి పాలన అంతం కోసమే సోనియా గాంధీ, రాహుల్‌ గాంధీతో చర్చలు జరిపినట్లు వివరించారు. కేసీఆర్‌ పాలన పోతేనే తెలంగాణకు మంచి జరుగుతుందని చెప్పారు. కేసీఆర్‌కు వ్యతిరేకంగా అన్ని పార్టీలు కలిసిరావాలని పిలుపునిచ్చారు.

02/09/2023 13:25(IST)

పల్లా భూకబ్జాలన్నీ ఆధారాలతో సహా ఉన్నాయి: ముత్తిరెడ్డి

జనగామ: ఎమ్మెల్సీ పల్లా రాజేశ్వర్‌రెడ్డికి వ్యతిరేకంగా ఎమ్మెల్యే ముత్తిరెడ్డి యాదగిరిరెడ్డి ఆందోళన చేశారు. భారాస ఎస్సీ కార్యకర్తపై పల్లా వర్గం ఫిర్యాదు చేయడంతో ఆందోళన చేశారు. దళిత ద్రోహి పల్లా గో బ్యాక్‌ అంటూ ముత్తిరెడ్డి నినాదాలు చేశారు. ఎస్సీలపై పెట్టిన కేసులకు భారాస తరఫున ముత్తిరెడ్డి క్షమాపణలు తెలిపారు. దళితులపై కేసులు కేసీఆర్‌ నిర్ణయాలకు వ్యతిరేకమని చెప్పారు. పల్లా భూకబ్జాలన్నీ ఆధారాలతో సహా ఉన్నాయని పేర్కొన్నారు.

02/09/2023 13:17(IST)

ఇస్రో శాస్త్రవేత్తలకు ప్రధాని నరేంద్ర మోదీ అభినందనలు

భారత్‌ ప్రయోగించిన మొదటి సోలార్ మిషన్ లాంచింగ్ విజయవంతం కావడంపై ఇస్రో శాస్త్రవేత్తలకు ప్రధాని మోదీ అభినందనలు తెలియజేశారు. ఈ మేరకు ఎక్స్‌( ట్విటర్‌) వేదికగా స్పందించారు.

02/09/2023 13:15(IST)

వైఎస్‌ రాజశేఖర్‌ రెడ్డి విగ్రహానికి కాంగ్రెస్‌ నేతల నివాళి

హైదరాబాద్‌: దివంగత మాజీ ముఖ్యమంత్రి వైఎస్‌ రాజశేఖర్‌ రెడ్డి వర్ధంతి సందర్భంగా ఆయనకు కాంగ్రెస్ నాయకులు నివాళి అర్పించారు. హైదరాబాద్‌ పంజాగుట్ట కూడలిలోని వైఎస్‌ఆర్‌ విగ్రహానికి పూలమాలలు వేసి నివాళి అర్పించారు. కాంగ్రెస్‌ వర్కింగ్‌ కమిటీ సభ్యుడు రఘువీరారెడ్డి, సీఎల్పీ నేత భట్టి విక్రమార్క, పీసీసీ మాజీ అధ్యక్షుడు పొన్నాల లక్ష్మయ్య, ఏపీసీసీ అధ్యక్షుడు గిడుగు రుద్రరాజు, మాజీ ఎంపీ కేవీపీ రామచంద్రరావు, ప్రచార కమిటీ ఛైర్మన్‌ మధు యాష్కీ, వర్కింగ్‌ ప్రెసిడెంట్‌ అంజన్‌కుమార్‌ యాదవ్‌, రంగారెడ్డి డీసీసీ అధ్యక్షుడు నర్సింహారెడ్డి, ఖైరతాబాద్‌ కార్పొరేటర్‌ విజయారెడ్డి తదితరులు నివాళి అర్పించారు. వైఎస్‌ రాజశేఖర్‌ రెడ్డి చేసిన సేవలను వారు కొనియాడారు. ఆయన తీసుకొచ్చిన ఆరోగ్యశ్రీ, ఫీజు రీయింబర్స్‌మెంట్‌ లాంటి పథకాలు బడుగు బలహీన వర్గాల అభ్యున్నతికి దోహదం చేశాయని పేర్కొన్నారు.

02/09/2023 13:01(IST)

దళితులకు భూములు పంచిన చరిత్ర కాంగ్రెస్ ప్రభుత్వందే: జీవన్‌రెడ్డి

హైదరాబాద్‌: కాంగ్రెస్ దళిత డిక్లరేషన్‌పై మంత్రి కొప్పుల ఈశ్వర్ వ్యాఖ్యలను ఎమ్మెల్సీ జీవన్ రెడ్డి ఖండించారు. మంత్రి విమర్శలు హాస్యాస్పదంగా ఉన్నాయని తెలిపారు. దళిత సంక్షేమం జరిగింది కాంగ్రెస్ ప్రభుత్వం హయాంలోనే అని తెలిపారు. కేసీఆర్ సర్కార్‌ దళితులకు ఎన్ని ఇళ్లు నిర్మించిందని విమర్శించారు. ఇందిరమ్మ ఇళ్లు ఉన్న ఊళ్లో తాము ఓట్లు అడుగుతామని, డబుల్ బెడ్ రూమ్ ఇళ్లు ఉన్న ఊళ్లో కేసీఆర్ ఓటు అడగాలని చెప్పారు. దళితులకు భూములు పంచిన చరిత్ర కాంగ్రెస్ ప్రభుత్వందే అని వివరించారు.

02/09/2023 12:49(IST)

కొలిక్కి వచ్చిన దీప్తి అనుమానాస్పద మృతి కేసు

జగిత్యాల: కోరుట్ల దీప్తి అనుమానాస్పద మృతి కేసు కొలిక్కి వచ్చింది. జిల్లా ఎస్పీ భాస్కర్ శనివారం సాయంత్రం నిందితులను మీడియా ముందు ప్రవేశపెట్టనున్నట్లు సమాచారం. చందన, ఆమె స్నేహితుడు, డ్రైవర్‌గా భావిస్తున్న మరొకరు మొత్తం ముగ్గురిని ప్రకాశం జిల్లా ఒంగోలులో పోలీసులు అదుపులోకి తీసుకున్నారు.

02/09/2023 12:32(IST)

తాడేపల్లి జిల్లా పరిషత్‌ హైస్కూల్‌లో ర్యాగింగ్ కలకలం

గుంటూరుజిల్లాలోని తాడేపల్లి జిల్లా పరిషత్‌ హైస్కూల్‌లో ర్యాగింగ్ కలకలం సృష్టించింది. పాఠశాలలో ఎనిమిదో తరగతి బాలికలను
పదో తరగతి విద్యార్థి ర్యాగింగ్ చేస్తున్నాడని విద్యార్థుల తల్లిదండ్రులు ఆరోపించారు. యువకుడి వేధింపులు ఎక్కువ కావడంతో పోలీసు స్టేషన్‌లో ఫిర్యాదు చేశారు.

02/09/2023 12:24(IST)

ఎమ్మెల్సీ కవిత ట్వీట్‌.. కౌంటర్‌గా రేవంత్‌ మరో ట్వీట్‌

హైదరాబాద్‌: అప్పుడు దిల్లీ, ఇప్పడు దిల్లీ.. కానీ ఇప్పుడు వయా బెంగళూరు అని రేవంత్‌రెడ్డి తాజా పర్యటనను ఎద్దేవా చేస్తూ ఎమ్మెల్సీ కవిత ట్విటర్‌లో పోస్టు పెట్టారు. కాంగ్రెస్‌ పార్టీ అంటేనే తెలంగాణ ఆత్మ గౌరవాన్ని తాకట్టు పెట్టడం.. దిల్లీ గల్లీల్లో మోకరిల్లడమని విమర్శించారు.
ఈ ట్వీట్‌కు టీపీసీసీ చీఫ్‌ రేవంత్‌రెడ్డి కౌంటర్‌ ఇచ్చారు. గల్లీలో సవాళ్లు.. దిల్లీలో వంగి వంగి మోకరిల్లి వేడుకోలు అని ట్వీట్‌ చేశారు. మోదీకి కేసీఆర్‌ నమస్కరిస్తున్న ఫొటోను ఆయన జత చేశారు.

02/09/2023 12:06(IST)

ముప్పాళ్ల పోలీసు స్టేషన్‌లో వైకాపా నేతల వీరంగం.. ఎస్సైకి గాయాలు

పల్నాడు జిల్లాలోని ముప్పాళ్ల పోలీసు స్టేషన్‌లో శుక్రవారం అర్ధరాత్రి వైకాపా నేతలు వీరంగం సృష్టించారు. వైకాపా నేతల దాడిలో ముప్పాళ్ల ఎస్సై కిషోర్‌కు గాయాలయ్యాయి. మద్యం మత్తులో వైకాపా నేత వెంకటేశ్వర్‌రెడ్డి కారుపై సాయి, కిషోర్ దాడి చేశారు. వైకాపా నేత ఫిర్యాదుతో సాయి, కిషోర్‌ను పోలీసులు అదుపులోకి తీసుకున్నారు. యువకులను అప్పగించాలంటూ అర్ధరాత్రి వైకాపా నేత అనుచరులు పోలీసు స్టేషన్‌కు వెళ్లారు. స్టేషన్‌లోనే వారు సాయి, కిషోర్‌పై దాడి చేశారు. అనుచరులను స్టేషన్‌ నుంచి బయటకు పంపేందుకు యత్నించిన ఎస్సైపై వైకాపా నేత దాడి చేశారు. ఈ ఘటనలో ఎస్సై కిషోర్‌ ముఖంతో పాటు చేతికి గాయాలయ్యాయి.

02/09/2023 11:50(IST)

నింగిలోకి దూసుకెళ్లిన ఆదిత్య-ఎల్‌1 ఉపగ్రహం

శ్రీహరికోట: ఆదిత్య-ఎల్‌1 ఉపగ్రహం నింగిలోకి దూసుకెళ్లింది. తిరుపతి జిల్లాలోని సతీశ్‌ ధవన్‌ స్పేస్‌ సెంటర్‌ (షార్‌) నుంచి పీఎస్‌ఎల్‌వీ-సి57 వాహకనౌక ఆదిత్య-ఎల్‌1ను విజయవంతంగా నింగిలోకి మోసుకెళ్లింది. ఆదిత్య-ఎల్‌1 ఉపగ్రహం 4 నెలలపాటు ప్రయాణించి భూమి నుంచి సూర్యుడి దిశగా ఉన్న ‘ఎల్‌1’ (లగ్రాంజ్‌) పాయింట్‌ను చేరుకోనుంది. 15 లక్షల కిలోమీటర్ల దూరంలోని ఈ ప్రదేశంలోకి భారత్‌ ఉపగ్రహ ప్రయోగం చేపట్టడం ఇదే మొదటిసారి. ఈ ప్రదేశం నుంచి ఎలాంటి అవరోధాల్లేకుండా సూర్యుడిని నిరంతరం అధ్యయనం చేసే వీలుంది. ఇందులో 7 పరిశోధన పరికరాలున్నాయి.

02/09/2023 11:46(IST)

జనసేన పార్టీ కార్యాలయంలో పవన్‌ కల్యాణ్‌ పుట్టినరోజు వేడుకలు

మంగళగిరిలోని జనసేన పార్టీ కార్యాలయంలో పార్టీ అధినేత పవన్‌ కల్యాణ్‌ పుట్టినరోజు వేడుకలు ఘనంగా నిర్వహించారు. నాదెండ్ల మనోహర్‌ కేక్‌ కట్‌ చేశారు. అనంతరం మెగా రక్తదాన శిబిరం ప్రారంభించిన ఆయన రక్తదానం చేశారు.

02/09/2023 11:33(IST)

75 మంది ఉత్తమ ఉపాధ్యాయులకు సెప్టెంబర్‌ 5న అవార్డుల ప్రదానం

దిల్లీ: సెప్టెంబర్‌ 5న ఉపాధ్యాయ దినోత్సవం సందర్భంగా రాష్ట్రపతి ద్రౌపదీ ముర్ము 75 మంది ఉత్తమ ఉపాధ్యాయులకు 2023 సంవత్సరానికి గాను నేషనల్‌ టీచర్‌ అవార్డులను ప్రదానం చేయనున్నారు. అవార్డు విజేతలకు సంబంధించిన జాబితాను విడుదల చేశారు. వీరికి ధ్రువపత్రం, సిల్వర్‌ మెడల్‌తో పాటు రూ.50 వేల నగదు బహుమతి ఇవ్వనున్నారు.

02/09/2023 11:30(IST)

సీతారామ ప్రాజెక్టు పూర్తి కోసమే ఎన్నికల్లో పోటీ చేస్తున్నా: తుమ్మల

ప్రజల సహకారంతో ఖమ్మం జిల్లాను అభివృద్ధి చేసినట్లు తుమ్మల నాగేశ్వరరావు తెలిపారు. కాంగ్రెస్‌లో చేరాలని పొంగులేటి ఆహ్వానించారని చెప్పారు. సీతారామ ప్రాజెక్టులోకి గోదావరి జలాల విడుదల చూడాలన్నది తన లక్ష్యమని వివరించారు. సీతారామ ప్రాజెక్టు పూర్తి కోసమే ఎన్నికల్లో పోటీ చేస్తున్నట్లు తుమ్మల చెప్పారు. అందరి అభిప్రాయాలకు అనుగుణంగా నిర్ణయాలు తీసుకుంటానని పేర్కొన్నారు.

02/09/2023 11:29(IST)

అప్పుడు నన్ను.. ఇప్పుడు తుమ్మలను పార్టీ నుంచి వెళ్లగొట్టారు: పొంగులేటి

ఖమ్మం: తుమ్మల నాగేశ్వరరావుతో కాంగ్రెస్‌ నేత పొంగులేటి శ్రీనివాస్‌రెడ్డి భేటీ అయ్యారు. ఈ సందర్భంగా పొంగులేటి మాట్లాడుతూ.. తనను, మంత్రి అజయ్‌ను భారాసలోకి తుమ్మల నాగేశ్వరరావు తీసుకెళ్లారని గుర్తుచేశారు. ప్రజలకు మంచి చేయాలనే భారాసలో చేరినట్లు చెప్పారు. అప్పుడు తనను, ఇప్పుడు తుమ్మలను పార్టీ నుంచి వెళ్లగొట్టారని విమర్శించారు. పార్టీ నుంచి పొమ్మనకుండా పొగ పెడుతున్నారని ఆరోపించారు. తుమ్మలను, ఆయన అనుచరులను కాంగ్రెస్‌లోకి ఆహ్వానిస్తున్నట్లు చెప్పారు.

02/09/2023 11:18(IST)

ఆదిత్య ఎల్‌1 మిషన్‌ విజయవంతం కావాలని విద్యార్థుల పూజలు

విశాఖ సంపత్‌ వినాయగర్‌ ఆలయం వద్ద విద్యార్థులు 108 కొబ్బరి కాయలు కొట్టారు. ఇస్రో ఆదిత్య ఎల్‌1 మిషన్‌ విజయవంతం కావాలని విద్యార్థులు ప్రత్యేక పూజలు చేశారు. జాతీయ జెండా చేతపట్టుకుని ఆల్‌ ది బెస్ట్‌ ఇస్రో అంటూ నినాదాలు చేశారు.

02/09/2023 10:46(IST)

ద్విచక్రవాహనాన్ని ఢీకొన్న ఆర్టీసీ బస్సు.. ఒకరికి తీవ్రగాయాలు

విజయవాడ శివారు గూడవల్లి వద్ద చెన్నై-కోల్‌కతా జాతీయ రహదారిపై ప్రమాదం చోటు చేసుకుంది. ఏలూరు నుంచి విజయవాడ వెళ్తున్న ఆర్టీసీ బస్సు.. ద్విచక్రవాహనాన్ని ఢీకొంది. ప్రమాదంలో బైక్‌పై ప్రయాణిస్తున్న యువకుడు సొంగ శ్రీనుకు తీవ్ర గాయాలయ్యాయి. స్థానికులు ఆయన్ను అంబులెన్స్ సాయంతో ఆసుపత్రికి తరలించారు. సమాచారం అందుకున్న పటమట పోలీసులు వివరాలు సేకరిస్తున్నారు.

02/09/2023 10:38(IST)

కాన్పు కోసం వచ్చిన మహిళ మృతి.. ఆసుపత్రి వద్ద బంధువుల ఆందోళన

ప్రకాశం: కాన్పు కోసం వచ్చిన మహిళ మృతి చెందడంతో యర్రగొండపాలెం ప్రభుత్వ ఆసుపత్రి ఎదుట కుటుంబ సభ్యులు ఆందోళన చేపట్టారు. సిజేరియన్‌తో కాన్పు చేసి బిడ్డను బయటకు తీశాక తల్లి నాగలక్ష్మి మృతి చెందారు. వైద్యుల నిర్లక్ష్యమే కారణమంటూ ఆసుపత్రి వద్ద బంధువులు ఆందోళన చేపట్టారు.

02/09/2023 10:25(IST)

అభిమానుల అభిప్రాయానికి అనుగుణంగా నడుస్తా: తుమ్మల

ఖమ్మం: మాజీ మంత్రి తుమ్మల నాగేశ్వరరావు నివాసం వద్ద అభిమానుల కోలాహలం నెలకొంది. ఉమ్మడి ఖమ్మం జిల్లా నుంచి ఆయన అభిమానులు తరలివస్తున్నారు. తుమ్మల నాగేశ్వరరావు పార్టీ మార్పు ఊహాగానాలతో అనుచరులు ఇంటికి చేరుకున్నారు. ఈ సందర్భంగా తుమ్మల మాట్లాడుతూ.. అభిమానులు, అనుచరులతో చర్చించి పార్టీ మార్పుపై నిర్ణయం తీసుకుంటానన్నారు. అభిమానుల అభిప్రాయానికి అనుగుణంగా నడుస్తానని చెప్పారు. కాంగ్రెస్‌ పార్టీ తనను ఆహ్వానించిందని పేర్కొన్నారు.

02/09/2023 10:17(IST)

పవన్‌ ప్రజల పక్షాన నిలిచి పోరాడుతున్నారు: లోకేశ్‌

తెదేపా జాతీయ ప్రధాన కార్యదర్శి నారా లోకేశ్‌ జనసేన అధినేత పవన్‌ కల్యాణ్‌కు పుట్టినరోజు శుభాకాంక్షలు తెలిపారు. పవన్‌ సమాజం పట్ల బాధ్యతతో ప్రజల పక్షాన నిలిచి పోరాడుతున్నారని చెప్పారు. ఆయురారోగ్యాలతో వందేళ్లు వర్ధిల్లాలని ఆకాంక్షించారు.

02/09/2023 10:15(IST)

ఏపీకి చేరుకున్న గవర్నర్ తమిళిసై

తెలంగాణ గవర్నర్ తమిళిసై హైదరాబాద్ నుంచి ఇండిగో విమానంలో గన్నవరం విమానాశ్రయానికి చేరుకున్నారు. విమానాశ్రయంలో కలెక్టర్ రాజాబాబు, ఇతర ఉన్నతాధికారులు ఆమెకు స్వాగతం పలికారు. అనంతరం రోడ్డు మార్గంలో విజయవాడ కనకదుర్గమ్మ ఆలయానికి గవర్నర్ తమిళిసై బయలుదేరి వెళ్లారు.

02/09/2023 10:13(IST)

ప్రకాశరావుపాలెం నుంచి ప్రారంభమైన యువగళం పాదయాత్ర

తెదేపా జాతీయ ప్రధాన కార్యదర్శి నారా లోకేశ్‌ పాదయాత్ర 202వ రోజు శనివారం తూర్పుగోదావరి జిల్లా నల్లజర్ల మండలం ప్రకాశరావుపాలెం నుంచి ప్రారంభమైంది. శనివారం పాదయాత్ర ఏలూరు జిల్లా ఉంగుటూరు నియోజకవర్గంలోకి ప్రవేశించనుంది.

02/09/2023 10:07(IST)

సెక్స్‌ రాకెట్‌ బారినపడిన మహిళలను రక్షించిన పోలీసులు

హైదరాబాద్‌: సెక్స్‌ రాకెట్‌ బారినపడిన మహిళలను పోలీసులు రక్షించారు. బంజారాహిల్స్‌, ఫిల్మ్‌నగర్‌లో సీసీఎస్‌ టీమ్‌తో కలిసి యాంటీ ట్రాఫికింగ్ సెల్‌ పోలీసులు దాడులు చేశారు. స్పా సెంటర్ల నిర్వాహకులు, పలువురు విటులను పోలీసులు అరెస్ట్ చేశారు.

02/09/2023 10:01(IST)

పవన్‌కు చంద్రబాబు బర్త్‌డే విషెస్‌

సినీ నటుడు, జనసేన పార్టీ అధ్యక్షుడు పవన్‌ కల్యాణ్‌కు తెదేపా అధినేత చంద్రబాబు నాయుడు ట్విటర్‌ వేదికగా జన్మదిన శుభాకాంక్షలు తెలిపారు. ‘ప్రజల మనిషిగా, సమాజ శ్రేయోభిలాషిగా రాష్ట్ర జనహితాన్ని కోరుకునే మీరు.. నిండు నూరేళ్లు ఆరోగ్య ఆనందాలతో వర్ధిల్లాలని మనసారా కోరుకుంటున్నాను.’ అని పోస్టు పెట్టారు.

02/09/2023 09:57(IST)

భూసేకరణ విషయంలో పోలీసులు, రైతుల ఘర్షణ

విజయవాడ: నున్న గ్రామంలో ఉద్రిక్తత చోటు చేసుకుంది. భూసేకరణ విషయంలో పోలీసులు, రైతుల మధ్య ఘర్షణ జరిగింది. ఈక్రమంలో పోలీసులు భారీగా మోహరించారు. హైకోర్టు స్టే ఉండగా ప్రభుత్వం పరిహారం చెల్లించకుండా భూములు ఎలా సేకరిస్తారని రైతులు ప్రశ్నిస్తున్నారు.

02/09/2023 09:47(IST)

నేడు జీహెచ్‌ఎంసీ పరిధిలో రెండు పడక గదుల ఇళ్ల పంపిణీ

హైదరాబాద్‌: జీహెచ్‌ఎంసీ పరిధిలోని 24 నియోజకవర్గాల్లో శనివారం రెండు పడక గదుల ఇళ్ల పంపిణీ చేపట్టనున్నారు. లబ్ధిదారులకు 8 ప్రాంతాల్లో 11,700 ఇళ్ల పంపిణీ చేయనున్నారు. కొల్లూరు, అమీన్‌పుర్‌లో ఇళ్ల పంపిణీలో మంత్రి హరీశ్‌రావు పాల్గొననున్నారు. కుత్బుల్లాపూర్‌, బాచుపల్లిలో మంత్రి తలసాని శ్రీనివాస్‌ యాదవ్‌, అహ్మద్‌గూడలో మంత్రి మల్లారెడ్డి, పటాన్‌చెరులో మంత్రి పట్నం మహేందర్‌రెడ్డి, బహదూర్‌పుర, ఫారూఖ్‌నగర్‌లో మంత్రి మహమూద్‌ అలీ, మహంకాల్‌లో మంత్రి సబితా ఇంద్రారెడ్డి పాల్గొననున్నారు. ప్రతాప్‌ సింగారంలో పద్మారావు గౌడ్‌, ఉప్పల్‌ శ్రీరాంనగర్‌లో మేయర్‌ విజయలక్ష్మి ఇళ్ల పంపిణీ చేయనున్నారు.

02/09/2023 09:47(IST)

హరి మావయ్య డేరింగ్ పొలిటీషియన్: లోకేశ్‌

నందమూరి హరికృష్ణ జయంతి సందర్భంగా తెదేపా జాతీయ ప్రధాన కార్యదర్శి నారా లోకేశ్‌ నివాళులర్పించారు. హరి మావయ్య జయంతి సందర్భంగా ఆయన జ్ఞాపకాలు ఒక్కసారిగా కళ్ల ముందు కదిలాయన్నారు. వెండితెరపై తన నటనతో అభిమానులకు ఆరాధ్య నటుడైన హరి మావయ్య డేరింగ్ పొలిటీషియన్ అని కొనియాడారు. అలంకరించిన పదవులకే వన్నె తెచ్చిన ఆయన తనకు నిత్య స్ఫూర్తి అని లోకేశ్‌ తెలిపారు.

02/09/2023 09:40(IST)

లారీ బోల్తా.. నిలిచిన ట్రాఫిక్‌

హైదరాబాద్‌: సూరారం ఠాణా పరిధిలోని కట్ట మైసమ్మ గుడి సమీపంలో.. నర్సాపూర్ ప్రధాన రహదారిపై బియ్యం లోడుతో వెళ్తున్న లారీ అదుపుతప్పి బోల్తా పడింది. రోడ్డుపై బియ్యం బస్తాలు పడటంతో కిలోమీటర్‌ మేర ట్రాఫిక్ నిలిచిపోయింది. డ్రైవర్ నిద్ర మత్తులో లారీ నడపడం వల్లే ఈ ప్రమాదం జరిగినట్లు పోలీసులు భావిస్తున్నారు. ప్రమాదంలో డ్రైవర్‌కు స్వల్ప గాయాలు కాగా, ఆస్పత్రికి తరలించారు. సంఘటనా స్థలానికి చేరుకున్న పోలీసులు.. ట్రాఫిక్‌ను నియంత్రించే పనిలో పడ్డారు.

02/09/2023 09:39(IST)

అమలాపురంలో 200 మంది పోలీసుల మోహరింపు

అమలాపురంలో 200 మంది పోలీసులను మోహరించారు. శుక్రవారం రౌడీషీటర్‌ హత్య తర్వాత దుకాణానికి నిప్పు పెట్టిన ఘటనలతో పోలీసులు అప్రమత్తమయ్యారు.
మరోవైపు మంత్రి విశ్వరూప్‌ కుమారుడు శ్రీకాంత్‌ను నిలదీసిన ఘటనలో ముగ్గురిపై కేసు నమోదు చేశారు. శ్రీకాంత్‌ను నిలదీసిన బాలు, శ్రీనివాస్‌, ప్రసాద్‌ను అదుపులోకి తీసుకున్నారు. ముగ్గురిని వదిలేయాలని అమలాపురం గ్రామీణ పోలీసు స్టేషన్‌ వద్ద బంధువులు ఆందోళన చేశారు. ఆందోళన చేసిన వారికి వైకాపా యువజన నాయకుడు వాసంశెట్టి సుభాష్‌ మద్దతు తెలిపారు. రెండు ఘటనల నేపథ్యంలో పోలీసులు అప్రమత్తమయ్యారు.

02/09/2023 09:29(IST)

గంజాయి తరలిస్తున్న రెండు అంతర్‌రాష్ట్ర ముఠాల అరెస్ట్‌

హైదరాబాద్‌: ఇతర రాష్ట్రాలకు గంజాయి తరలిస్తున్న రెండు అంతర్‌రాష్ట్ర ముఠాలను రాచకొండ పోలీసులు అరెస్ట్‌ చేశారు. వారి వద్ద నుంచి 270 కిలోల గంజాయిని స్వాధీనం చేసుకున్నారు. పోలీసులు ముఠాలోని ఆరుగురు సభ్యులను అరెస్ట్ చేశారు.

02/09/2023 09:17(IST)

హరికృష్ణకు చంద్రబాబు నివాళి

నందమూరి హరికృష్ణ జయంతి సందర్భంగా తెలుగుదేశం అధినేత చంద్రబాబు నివాళులర్పించారు. సినీ, రాజకీయ రంగాల్లో ఎంతోమందికి హరికృష్ణ ఆత్మీయుడిగా నిలిచారని గుర్తుచేశారు. నిండైన తెలుగుదనానికి ప్రతిరూపంగా తెలుగువారి అభిమానాన్ని పొందారన్నారు. హరికృష్ణతో తన అనుబంధాన్ని గుర్తుచేసుకుంటూ చంద్రబాబు ఈ మేరకు ట్వీట్‌ చేశారు.

02/09/2023 08:30(IST)

మహానంది ఆలయ సమీపంలో ఎలుగు బంటి

నంద్యాల జిల్లా మహానంది ఆలయ సమీపంలో ఎలుగు బంటిని స్థానికులు గుర్తించారు. ఆలయ అవరణలో తితిదే సత్రం వైపు వెళ్తున్న ఎలుగును గమనించిన స్థానికులు.. అరుపులు ఈలలు వేస్తూ తరిమారు. దీంతో పొలాల మీదుగా అడవిలోకి ఎలుగు వెళ్లి ఉండవచ్చని స్థానికులు భావిస్తున్నారు.

02/09/2023 08:28(IST)

వైయస్‌ఆర్‌ ఘాట్‌ వద్ద షర్మిల, విజయమ్మ నివాళి

దివంగత ముఖ్యమంత్రి వైఎస్‌.రాజశేఖర్‌రెడ్డి వర్ధంతి సందర్భంగా.. వైతెపా అధ్యక్షురాలు షర్మిల, ఆమె తల్లి విజయమ్మ ఇడుపుల పాయకు వచ్చారు. వైయస్‌ఆర్‌ ఘాట్‌ వద్ద వారు నివాళులర్పించారు.

మన విద్యా విధానంలో కళలకు చోటివ్వాలి: వెంకయ్య నాయుడు

తాజా వార్తలు (Latest News)

నీతి ఆయోగ్‌ భేటీ.. వికసిత్‌ ఏపీ-2047లోని అంశాలను ప్రస్తావించనున్న చంద్రబాబు

ప్రధాని మోదీ అధ్యక్షతన నీతి ఆయోగ్‌ సమావేశం ప్రారంభం

‘కల్కి’లో రాజమౌళి ఎలా భాగమయ్యారు..?: నాగ్‌అశ్విన్‌ ఏం చెప్పారంటే

మదనపల్లె దస్త్రాల దహనం కేసులో ఆరోరోజు విచారణ

ద్రవిడ్‌ సర్‌ప్రైజ్‌ వాయిస్‌ మెసేజ్‌.. భావోద్వేగానికి గురైన గంభీర్‌

జగన్.. మీకు ఎందుకు సంఘీభావం ప్రకటించాలి?: షర్మిల

సుఖీభవ

చదువు