Breaking | Feedback | ePratibha | E-PAPER | Pratibha

నదిలో పడిపోయిన బస్సు.. ప్రమాదంలో చిక్కుకున్న 40 మంది ప్రయాణికులు

Updated : 05 Aug 2023 22:23 IST

సంక్షిప్త వార్తలు - చిత్ర వార్తలు

05/08/2023 21:38(IST)

నదిలో పడిపోయిన బస్సు.. ప్రమాదంలో చిక్కుకున్న 40 మంది ప్రయాణికులు

ఝార్ఖండ్‌: ఝార్ఖండ్‌లోని గిరిద్ జిల్లాలో ప్రమాదం జరిగింది.అదుపు తప్పి ఓ బస్సు బడాకర్‌ నదిలో పడిపోయింది. ప్రమాద సమయంలో 40 మంది ప్రయాణికులు బస్సులో ఉన్నారు. సమాచారం అందుకున్న జిల్లా కలెక్టర్‌, ఎస్పీ సంఘటన స్థలికి బయల్దేరి వెళ్లారు. ఉన్నతాధికారులు ఘటనాస్థలికి అంబులెన్స్‌లు పంపించారు. అయితే ఎంత మంది మృతి చెందారన్నదానిపై స్పష్టత లేదు.

05/08/2023 21:33(IST)

విశాఖలో మద్యం మత్తులో యువకుడి వీరంగం

విశాఖపట్నం: విశాఖపట్నంలో మద్యం మత్తులో ఓ యువకుడు వీరంగం సృష్టించాడు. తన కారుతో ఏడు చోట్ల వాహనాలను ఢీకొట్టి పరారయ్యాడు. బాధితులు కారును వెంబడించి సిరిపురం వద్ద పట్టుకున్నారు. ఈ మేరకు పోలీసులు కేసు నమోదు చేశారు.

05/08/2023 21:30(IST)

చార్మినార్‌కు ఏర్పాటు చేసిన మల్టీకలర్‌ లైటింగ్‌ను ప్రారంభించిన కిషన్‌ రెడ్డి

హైదరాబాద్‌: కేంద్రమంత్రి కిషన్‌ రెడ్డి చార్మినార్‌కు ఏర్పాటు చేసిన మల్టీకలర్ లైటింగ్‌ను ప్రారంభించారు.ఈ లైటింగ్ కాంతుల్లో చార్మినార్‌ వెలిగిపోతోంది.

05/08/2023 21:15(IST)

Hyderabad: ‘సర్కారు నౌకరి’ టీమ్‌ ప్రెస్‌మీట్‌

గాయని సునీత తనయుడు ఆకాశ్‌ను హీరోగా పరిచయం చేస్తూ.. దర్శకేంద్రుడు రాఘవేంద్రరావు నిర్మిస్తున్న చిత్రం ‘సర్కారు నౌకరి’. గంగనమోని శేఖర్ దర్శకుడు. చిత్రబృందం ప్రెస్‌మీట్ నిర్వహించింది.

05/08/2023 20:46(IST)

విద్యుత్‌ సంస్థల యాజమాన్యంతో జేఏసీ జరిపిన చర్చలు విఫలం

అమరావతి: విద్యుత్‌ సంస్థల యాజమాన్యంతో జేఏసీ జరిపిన చర్చలు విఫలమయ్యాయి. దీంతో జేఏసీ ఆందోళనకు పిలుపునిచ్చింది. ఈ నెల 10 నుంచి నిరవధిక సమ్మెకు వెళ్తున్నట్లు ప్రకటించింది. ఈ నెల 8న విజయవాడ విద్యుత్‌ సౌధ వద్ద మహా ధర్నా చేపట్టనున్నట్లు నాయకులు తెలిపారు.

05/08/2023 20:38(IST)

మర్రిపాడు స్టాక్‌ పాయింట్ బిల్లుతో ఇసుక తరలింపు

నెల్లూరు: మర్రిపాడు స్టాక్‌ పాయింట్ బిల్లులతో ఇసుక తరలింపు చేస్తున్నారు. ఇసుక రీచ్‌ అనుమతులను నిలిపివేసినా.. ఇసుక తరలింపు కొనసాగుతోంది. అనుమతులు చూపించాలంటూ సిబ్బందితో జనసేన నేతల వాగ్వాదం జరిగింది.

05/08/2023 19:52(IST)

నున్న పోలవరం కాలువలో పడి యువకుడు మృతి

విజయవాడ: నున్న పోలవరం కాలువలో పడి యువకుడు మృతి చెందాడు. ఈతకు దిగి బొమ్మారెడ్డి హరికృష్ణారెడ్డి(28) మృతి చెందినట్లు స్థానికులు తెలిపారు. హరికృష్ణారెడ్డి ఆస్ట్రేలియాలో ఉన్నత విద్య చదువుతున్నాడు.

05/08/2023 19:48(IST)

కీలక ఘట్టం విజయవంతం.. జాబిల్లి కక్ష్యలోకి చంద్రయాన్‌- 3

బెంగళూరు: జాబిల్లిపై పరిశోధనల కోసం భారత అంతరిక్ష పరిశోధనా సంస్థ (ISRO) ప్రయోగించిన చంద్రయాన్‌-3.. తన ప్రయాణంలో కీలక ఘట్టాన్ని విజయవంతంగా పూర్తి చేసింది. ఇప్పటి వరకు భూమి చుట్టూ కక్ష్యలను పూర్తిచేసుకుని, ‘ట్రాన్స్‌ లూనార్‌ కక్ష్య’లో జాబిల్లివైపు దూసుకెళ్లిన ఈ వ్యౌమనౌక.. ఇకనుంచి చంద్రుడి చుట్టూ చక్కర్లు కొట్టనుంది. ఈ మేరకు ‘చంద్రయాన్‌-3’ని చందమామ కక్ష్యలోకి ప్రవేశపెట్టే ప్రక్రియను ఇస్రో విజయవంతంగా నిర్వహించింది.

05/08/2023 19:33(IST)

మద్దెలమడుగులో విద్యార్థి గల్లంతు

చిత్తూరు: వెదురుకుప్పం మండలం మద్దెలమడుగులో విద్యార్థి గల్లంతయ్యాడు. గల్లంతైన సురేంద్రరెడ్డి(23) బీఎస్సీ అగ్రికల్చర్‌ విద్యార్థిగా గుర్తించారు. విద్యార్థి స్వస్థలం కడప జిల్లా బనగానపల్లెగా పోలీసులు గుర్తించారు.

05/08/2023 19:31(IST)

Mr.Pregnant: ‘మిస్టర్‌ ప్రెగ్నెంట్‌’ ట్రైలర్‌ లాంచ్‌ ఈవెంట్‌.. సందడి చేసిన నాగార్జున!

యువ నటుడు సోహెల్ ప్రధాన పాత్రలో నటించిన చిత్రం ‘మిస్టర్ ప్రెగ్నెంట్’. ఈ సినిమా ఆగస్టు 18న ప్రేక్షకుల ముందుకు రానుంది. ఈ సందర్భంగా చిత్ర ట్రైలర్‌ లాంచ్‌ ఈవెంట్‌ను ఘనంగా నిర్వహించారు. ప్రముఖ హీరో నాగార్జున ముఖ్య అతిథిగా హాజరై సందడి చేశారు.

05/08/2023 19:24(IST)

గర్భిణికి ప్రసవం చేసిన నర్సు.. శిశువు మృతి!

సూర్యాపేట: తుంగతుర్తి ప్రభుత్వ ఆసుపత్రి వద్ద ఉద్రిక్త పరిస్థితి నెలకొంది. ఆసుపత్రిలో ప్రసవ సమయంలో శిశువు మృతి చెందింది. వైద్యులు లేకపోవడంతో గర్భిణికి నర్సు ప్రసవం చేసింది. ఈక్రమంలో శిశువు మృతి చెందింది. ఆసుపత్రి నిర్లక్ష్యం వల్లే శిశువు మరణించిందనే ఆరోపణలతో బాధితులు ఆందోళన చేశారు.

05/08/2023 19:05(IST)

కానిస్టేబుల్‌ హత్య కేసులో కీలక వీడియోలు బహిర్గతం

విశాఖపట్నం: విశాఖలో కానిస్టేబుల్‌ హత్య కేసులో కీలక వీడియోలు బహిర్గతం అయ్యాయి. హత్యకు ముందు భర్తతో ప్రేమగా ఉన్నట్లు వీడియోలో రికార్డు అయ్యింది. మద్యం తెచ్చి, మటన్‌ వండి తను మంచిదని భర్తతో మెప్పించినట్లు తెలుస్తోంది. మత్తులో ఉన్న కానిస్టేబుల్‌ రమేశ్‌ను పడుకోబెట్టి వీడియోలు తీసినట్లు సమాచారం. నిందితులను రిమాండ్‌కు తరలించారు. శివజ్యోతి, రామారావు, నీలకు 14 రోజుల జ్యూడీషియల్‌ రిమాండ్‌ విధించారు.

05/08/2023 18:53(IST)

శాసనసభ రేపటికి వాయిదా

హైదరాబాద్: జీఎస్టీ చట్ట సవరణ బిల్లుకు శాసనసభ ఆమోదం తెలిపింది. పంచాయతీ రాజ్‌ చట్ట సవరణ బిల్లును మంత్రి ఎర్రబెల్లి దయాకర్‌ రావు శాసనసభలో ప్రవేశపెట్టారు. రాష్ట్రంలో కొత్త గ్రామ పంచాయతీల ఏర్పాటు కోసం ఈ బిల్లును ప్రవేశపెట్టారు. పంచాయతీరాజ్‌ చట్ట సవరణ బిల్లుకు అసెంబ్లీ ఆమోదం తెలిపింది. శాసన సభ రేపటికి వాయిదా పడింది.

05/08/2023 18:47(IST)

‘చంద్రయాన్‌-3’లో కాసేపట్లో కీలకమైన ప్రక్రియ

చంద్రయాన్‌ -3లో కాసేపట్లో కీలకమైన ప్రక్రియ జరగనుంది. కాసేపట్లో చంద్రుడి కక్ష్యలోకి వెళ్లేలా లూనార్‌ ఆర్బిట్‌ ఇనసర్షన్‌ ప్రక్రియ జరగనున్నట్లు సమాచారం. ప్రస్తుతం లూనార్‌ ట్రాన్స్‌ఫర్‌ ట్రాజెక్టరీలో చంద్రుడి కక్ష్య దిశగా ప్రయాణిస్తోంది. మరో 18 రోజులు చంద్రుడి కక్ష్యలోనే చంద్రయాన్‌ -3 ఆర్బిటర్‌ తిరగనుంది.

05/08/2023 18:44(IST)

సెల్‌ఫోన్‌ వినియోగదారులకు తీవ్ర అసౌకర్యం

సెల్‌ఫోన్‌ వినియోగదారులకు తీవ్ర అసౌకర్యం కలిగింది. రింగ్ కాకుండానే కాల్‌డ్రాప్‌లతో వినియోగదారులు అవస్థలు పడ్డారు. మధ్యాహ్నం నుంచి సెల్‌ఫోన్‌ నెట్‌వర్క్‌ పనిచేయలేదు. అన్ని నెట్‌వర్క్‌ ఫోన్లదీ ఇదే తరహా సమస్య.

05/08/2023 18:12(IST)

మరికొద్ది సేపట్లో నెల్లూరుకు చంద్రబాబు

నెల్లూరు: చంద్రబాబు నాయుడు మరికొద్ది సేపట్లో నెల్లూరుకు చేరుకోనున్నారు. నెల్లూరులోని కస్తూరి దేవి ఫంక్షన్ హాల్‌లో సాగునీటి ప్రాజెక్టుల విధ్వంసంపై యుద్ధభేరి సభ నిర్వహించనున్నారు. ఈ సందర్భంగా తెలుగు గంగ, సోమశిల, పెన్నా డెల్టా ప్రాజెక్టులపై రైతులు, నాయకులతో ఆయన సమీక్షించనున్నారు.

05/08/2023 18:09(IST)

పీఎస్‌లో ఉపసర్పంచి ఆత్మహత్యాయత్నం

కామారెడ్డి: మాచారెడ్డి పీఎస్‌ పరిధిలో వాడి గ్రామ ఉపసర్పంచి ఆత్మహత్యకు ప్రయత్నించారు. పీఎస్‌లో ఉపసర్పంచి నర్సారెడ్డి గడ్డిమందు తాగేందుకు ప్రయత్నించారు. ఈ క్రమంలో పోలీసులు అడ్డుకున్నారు. భూమి విషయంలో ఉపసర్పంచి, వార్డ్‌ మెంబర్ మధ్య ఘర్షణ జరుగుతుందని సమాచారం.

05/08/2023 17:55(IST)

వరద ప్రాంతాల్లో తెదేపా నేతల పర్యటన

అల్లూరి జిల్లా: చింతూరు ఏజెన్సీ వరద ప్రాంతాల్లో తెదేపా నేతలు పర్యటించారు. దీంతో ముంపు ప్రాంతాల బాధితులను నేతలు చినరాజప్ప, జ్యోతుల నెహ్రూ పరామర్శించారు. వరదల వల్ల ప్రతి ఇంటికీ రూ. 20 వేల వరకు నష్టం జరిగిందని చినరాజప్ప చెప్పారు.

05/08/2023 17:47(IST)

ఓయూ పీఎస్‌ పరిధిలో నలుగురు స్కూల్ విద్యార్థుల అదృశ్యం

హైదరాబాద్‌: ఓయూ పీఎస్‌ పరిధిలో నలుగురు స్కూల్ విద్యార్థులు అదృశ్యమయ్యారు. హబ్సిగూడలోని శ్రీ సాయి పబ్లిక్ స్కూల్‌లో ఆరో తరగతి చదువుతున్న నలుగురు విద్యార్థులు అదృశ్యమైనట్లు పోలీసులు తెలిపారు. విద్యార్థులు పాఠశాల నుంచి బయటికి వెళ్లినట్లు స్కూల్‌ యాజమాన్యం తెలిపింది. దీంతో స్కూల్ వద్ద విద్యార్థుల తల్లిదండ్రులు ఆందోళన చేశారు. ఓయూ పోలీసులకు ఫిర్యాదు చేశారు.

05/08/2023 17:31(IST)

రేపు ఏపీలోని 18 రైల్వే స్టేషన్ల అభివృద్ధికి శంకుస్థాపన

ఆంధ్రప్రదేశ్‌ రాష్ట్రంలోని 18 రైల్వే స్టేషన్ల అభివృద్ధికి ఆదివారం ప్రధాని నరేంద్ర మోదీ వర్చువల్‌గా శంకుస్థాపన చేయనున్నారు. అమృత్‌ భారత్‌ పథకం కింద అభివృద్ధి పనులకు రూ.453.5 కోట్లు మంజూరయ్యాయి.

05/08/2023 17:23(IST)

నంద్యాలలో కూరగాయల మార్కెట్‌లో అగ్నిప్రమాదం

నంద్యాల పట్టణం: జిల్లా కేంద్రంలోని గాంధీచౌక్‌ వద్ద ఉన్న కూరగాయల మార్కెట్‌లో షార్ట్‌ సర్య్కూట్‌ వల్ల భారీ అగ్ని ప్రమాదం సంభవించిందని అగ్రిమాపక అధికారి యోగేశ్వర్‌ రెడ్డి తెలిపారు. ఈ ప్రమాదంలో మార్కెట్‌లో నిలువ చేసిన పండ్లు కాలిపోయినట్లు చెప్పారు. విషయం తెలుసుకున్న అగ్నిమాపక సిబ్బంది ఘటన స్థలానికి చేరుకుని మంటలను అదుపు చేశారు. సమీపంలో నిలిచి ఉన్న ఒక ఆటో, రెండు కార్లు, తోపుడు బండ్లు దగ్ధం అయ్యాయి. పండ్ల వ్యాపారులకు సుమారు రూ. 50 లక్షల నష్టం వాటిల్లిందని అంచనా వేశారు. ఈ మేరకు నష్టాన్ని దర్యాప్తు చేస్తున్నట్లు అగ్నిమాపక అధికారి తెలిపారు.

05/08/2023 17:20(IST)

కర్ణాటకలో విధానాలనే తెలంగాణలోనూ అమలు చేస్తాం: కేసీ వేణుగోపాల్

హైదరాబాద్‌: కాంగ్రెస్ పార్లమెంట్ పరిశీలకులతో సీనియర్‌ నేత కేసీ వేణుగోపాల్ సమావేశం ముగిసింది. కర్ణాటకలో అమలు చేసిన విధానాలనే తెలంగాణలోనూ అమలు చేస్తామని కేసీ వేణుగోపాల్ స్పష్టం చేశారు. ప్రతి నియోజకవర్గంలో టికెట్ ఆశావహులతో సంబంధం లేకుండా నేతల మధ్య సమన్వయం చేయాలని పరిశీలకులను ఆదేశించారు. పార్టీ నేతలెవరైనా గీత దాటితే చర్యలు తప్పవని హెచ్చరించారు. భారాసను సింగిల్ ఎజెండాతో ఎదుర్కోవాలని నిర్ణయం తీసుకున్నారు. భారాసకు వ్యతిరేక, కాంగ్రెస్‌కు అనుకూల అంశాలతో ఎజెండా ఖరారు చేసేందుకు పీఏసీలో చర్చించాలని ఈ సమావేశంలో నిర్ణయించారు.

05/08/2023 16:56(IST)

బెంగళూరులో సాఫ్ట్‌వేర్‌ ఉద్యోగి, కుటుంబ సభ్యులు మృతి

బెంగళూరులో సాఫ్ట్‌వేర్‌ ఉద్యోగి, ఆయన కుటుంబ సభ్యులు మృతి చెందారు. సాఫ్ట్‌వేర్‌ ఉద్యోగి గుండు వీరార్జున అలియాస్‌ గోపీ స్వస్థలం మచిలీపట్నం. అనుమానాస్పద స్థితిలో గోపీ, ఆయన భార్య, ఇద్దరు పిల్లలు మృతి చెందారు. 3 నెలలుగా భార్య, కుమార్తెలతో గోపీ బెంగళూరులో ఉంటున్నారు.

05/08/2023 16:46(IST)

‘గ్రామాల్లో రూ.లక్ష విలువైన పని కూడా చేయలేని పరిస్థితి’

మంగళగరిరి: జనసేన కార్యాలయంలో సర్పంచులతో పవన్‌ కల్యాణ్‌ సమావేశం నిర్వహించారు. సమావేశంలో సర్పంచుల సంఘం అధ్యక్షుడు చిలకలపూడి పాపారావు తన అభిప్రాయాలు తెలిపారు. స్థానిక సంస్థల ఎన్నికల్లో వైకాపా ఆగడాలను ఎదుర్కొని నిలబడ్డామని తెలిపారు. 30 నెలలు దాటినా పంచాయతీలకు నిధులు రాని పరిస్థితి నెలకొందని తెలిపారు. తమ మీద కక్ష కట్టి, కేసులు పెట్టి అరెస్టు చేయించారని చెప్పారు. 14, 15వ ఆర్థిక సంఘం నిధులు దారి మళ్లించారని అన్నారు. గ్రామాల్లో రూ.లక్ష విలువైన పని కూడా చేయలేని పరిస్థితి నెలకొందని ఆవేదన వ్యక్తం చేశారు.

05/08/2023 16:45(IST)

ఎలక్ట్రిక్‌ స్కూటర్ షోరూమ్‌ను ప్రారంభించిన తారలు

హైదరాబాద్‌లోని నారాయణగూడలో సినీ నటీమణులు ఇషా చావ్లా, హెబ్బా పటేల్‌ ఓ ఎలక్ట్రిక్‌ స్కూటర్‌ షోరూమ్‌ను ప్రారంభించారు. ఈ సందర్భంగా వారు సెల్ఫీలు దిగి సందడి చేశారు.

05/08/2023 16:41(IST)

శ్రీకాళహస్తికి చేరుకున్న చంద్రబాబు

శ్రీకాళహస్తి: తెదేపా అధినేత చంద్రబాబు నాయుడు శ్రీకాళహస్తికి చేరుకున్నారు. ఆయనకు పార్టీ కార్యకర్తలు ఘనస్వాగతం పలికారు. ఏపీ సీడ్స్‌ నుంచి బేరి వీధిలోని పెళ్లి మండపం వరకు చంద్రబాబు రోడ్‌ షో నిర్వహించారు. రోడ్‌ షోకు పార్టీ కార్యకర్తలు పెద్దఎత్తున తరలివచ్చారు.

05/08/2023 16:31(IST)

బుర్రిపాలెంలో సూపర్‌ స్టార్‌ కృష్ణ విగ్రహావిష్కరణ

తెనాలి: తెనాలి మండలం బుర్రిపాలెం గ్రామంలో సూపర్ స్టార్ కృష్ణ విగ్రహాన్ని కృష్ణ కుటుంబసభ్యులు ఘనంగా ఆవిష్కరించారు. ఈ సందర్భంగా కృష్ణ కుటుంబసభ్యులు మాట్లాడారు. సూపర్ స్టార్ కృష్ణ పేరు చిరకాలం గుర్తుండిపోయేలా రాబోయే రోజుల్లో సేవా కార్యక్రమాలు చేపడతామన్నారు. కృష్ణ జ్ఞాపకాల్ని గ్రామంలో పదిలంగా నిలుపుతామని వారు పేర్కొన్నారు. కృష్ణ సోదరుడు ఘట్టమనేని ఆదిశేషగిరిరావు, కుమార్తెలు మంజుల, పద్మావతి, ప్రియదర్శిని, అల్లుడు సుధీర్ బాబు, సినీ ప్రముఖులు, నాయకులు హాజరయ్యారు.

05/08/2023 16:28(IST)

అసెంబ్లీ ఎదుట పెట్రోల్ పోసుకుని వ్యక్తి ఆత్మహత్యాయత్నం

హైదరాబాద్‌: అంజిరెడ్డి అనే వ్యక్తి అసెంబ్లీ ముందు పెట్రోల్ పోసుకుని ఆత్మహత్యాయత్నం చేశాడు. సకాలంలో స్పందించిన పోలీసులు పెట్రోల్ పోసుకున్న వ్యక్తిపై నీళ్లు చల్లారు. ఆత్మహత్యాయత్నానికి ప్రయత్నించిన వ్యక్తిని అదుపులోకి తీసుకున్నారు.

05/08/2023 16:26(IST)

‘చంద్రముఖి 2’.. కంగనా రనౌత్‌ ఫస్ట్‌లుక్‌ చూశారా?

రాఘవ లారెన్స్‌ ప్రధాన పాత్రలో పి. వాసు దర్శకత్వంలో తెరకెక్కుతున్న చిత్రం ‘చంద్రముఖి 2’. బాలీవుడ్‌ నటి కంగనా రనౌత్‌ కీలక పాత్ర పోషిస్తున్నారు. వినాయక చవితికి ఈ సినిమా ప్రేక్షకుల ముందుకు రానుంది. ఈ సందర్భంగా కంగనా రనౌత్‌ ఫస్ట్‌లుక్‌ ఫొటోను చిత్రబృందం ట్విటర్‌లో పంచుకుంది. ఈ ఫొటోలో కంగనా ఆసక్తికరంగా కనిపిస్తున్నారు.

05/08/2023 16:19(IST)

గవర్నర్ తిప్పి పంపిన బిల్లులకు మండలిలో మరోసారి ఆమోదం

హైదరాబాద్‌: గవర్నర్ తిప్పి పంపిన నాలుగు బిల్లులను మరోసారి మంత్రులు శాసన మండలిలో ప్రవేశపెట్టారు. తెలంగాణ మున్సిపల్ చట్ట సవరణ బిల్లు 2022ను, తెలంగాణ పబ్లిక్ ఎంప్లాయిమెంట్ రెగ్యులేషన్ చట్ట సవరణ బిల్లు 2022ను రీకన్సిడరేషన్ కోసం మంత్రి హరీశ్‌రావు సభలో ప్రవేశపెట్టారు. తెలంగాణ స్టేట్ ప్రైవేట్ యూనివర్సిటీస్ ఎస్టాబ్లిష్‌మెంట్‌ అండ్ రెగ్యులేషన్ అమెండ్‌మెంట్‌ బిల్ 2022ను సభలో రీకన్సిడరేషన్ కోసం మంత్రి సబితా ఇంద్రారెడ్డి ప్రవేశపెట్టారు. తెలంగాణ పంచాయతీరాజ్ చట్ట సవరణ బిల్లు 2023ను రిఫరెన్స్ కోసం మంత్రి ఎర్రబెల్లి దయాకర్ రావు సభలో ప్రవేశపెట్టారు. బిల్లులను మరోసారి శాసనమండలి ఆమోదించింది.

05/08/2023 16:17(IST)

ఎల్‌టీటీ ఎక్స్‌ప్రెస్‌కు ఈ నెల 9 నుంచి దువ్వాడలో స్టాప్‌

విశాఖ: ఎల్‌టీటీ ఎక్స్‌ప్రెస్‌కు ఈ నెల 9 నుంచి దువ్వాడలో స్టాప్‌ ఉంటుందని రైల్వే శాఖ తెలిపింది. స్వర్ణ జయంతి ఎక్స్‌ప్రెస్‌కు ఈ నెల 10 నుంచి దువ్వాడలో స్టాప్‌ ఉంటుందని చెప్పారు.

05/08/2023 16:12(IST)

తెలంగాణలో సంక్షేమమే తప్ప సంక్షోభం లేదు: కేటీఆర్‌

హైదరాబాద్‌: సంక్షేమంతో పాటు మౌలిక వసతులకు ప్రాధాన్యం ఇస్తున్నట్లు మంత్రి కేటీఆర్‌ శాసనసభలో తెలిపారు. రాష్ట్ర బడ్జెట్‌ అంటే విపక్షాలకు జమ ఖర్చుల లెక్క మాత్రమే అని.. భారాసకు మాత్రం రాష్ట్ర ప్రజల జీవనరేఖ అని చెప్పారు. మౌలిక వసతులపై బడ్జెట్‌లో 26 శాతం ఖర్చు పెడుతున్నట్లు వివరించారు. తెలంగాణ నమూనా అంటే సమగ్ర, సమ్మిళిత అభివృద్ధి అని పేర్కొన్నారు. తెలంగాణలో సంక్షేమమే తప్ప సంక్షోభం లేదని చెప్పారు. వ్యవసాయం, పారిశ్రామిక, సేవారంగం దూసుకుపోతున్నాయని తెలిపారు.

05/08/2023 16:03(IST)

కానిస్టేబుల్‌ రమేశ్‌ హత్య కేసు.. కోర్టులో నిందితుల హాజరు

విశాఖ: కానిస్టేబుల్‌ రమేశ్‌ హత్య కేసులో పోలీసులు దర్యాప్తు చేస్తున్నారు. నిందితులు ముగ్గురికి వైద్య పరీక్షలు నిర్వహించాక ఎంవీపీ పోలీసులు కోర్టు ఎదుట హాజరుపర్చారు. హత్య కేసులో వీడియో, సెల్‌ఫోన్‌ ఆధారాలను పోలీసులు పొందుపర్చారు.

05/08/2023 15:48(IST)

కొవ్వాడ ప్లాంట్‌ అంత త్వరగా కార్యరూపం దాల్చడం కష్టమే: ఈఏఎస్‌ శర్మ

విశాఖ: పర్యావరణ, అణుశక్తి శాఖలకు విశ్రాంత ఐఏఎస్‌ ఈఏఎస్‌ శర్మ లేఖ రాశారు. రియాక్టర్ల సరఫరాలో జాప్యంతో కొవ్వాడ ప్లాంట్‌కు ఖర్చు పెరుగుతోందని వెల్లడించారు. రియాక్టర్లు, యురేనియం ధరలతో అణు విద్యుత్‌ ఖర్చు కూడా పెరుగుతోందని తెలిపారు. వినియోగదారులు భరించలేనంతగా యూనిట్ ధర పెరగొచ్చని చెప్పారు. భూములు తీసుకొని రైతుల జీవితాలు ఎందుకు అస్తవ్యస్తం చేయాలని ప్రశ్నించారు. కొవ్వాడ ప్లాంట్‌ అంత త్వరగా కార్యరూపం దాల్చడం కష్టమని చెప్పారు. వందల మంది మత్స్యకారుల ఉపాధిని ఎందుకు దెబ్బతీశారని ఈఏఎస్‌ శర్మ ప్రశ్నించారు.

05/08/2023 15:44(IST)

తితిదే ఛైర్మన్‌గా భూమన కరుణాకర్‌రెడ్డి

తితిదే ఛైర్మన్‌గా భూమన కరుణాకర్‌రెడ్డిని నియమించారు. తితిదే ఛైర్మన్‌గా ఆయన రెండేళ్లపాటు సేవలందించనున్నారు. తితిదే ఛైర్మన్‌గా నియమించిన సీఎం జగన్‌కు భూమన కరుణాకర్‌రెడ్డి ధన్యవాదాలు తెలిపారు. గతంలోనూ భూమన కరుణాకర్‌రెడ్డి తితిదే ఛైర్మన్‌గా పనిచేశారు.

05/08/2023 15:32(IST)

చంద్రబాబు ప్రాజెక్టుల యాత్రను అడ్డుకునేందుకు వైకాపా కుట్ర: పీతల సుజాత

తెదేపాను, చంద్రబాబు నాయుడిని చూస్తే వైకాపాకు వణుకు పుడుతోందని తెదేపా నాయకురాలు పీతల సుజాత అన్నారు. చంద్రబాబు ప్రాజెక్టుల యాత్రను అడ్డుకునేందుకు వైకాపా కుట్ర చేస్తోందని ఆరోపించారు. రాబోయే రోజుల్లో వైకాపా తగిన మూల్యం చెల్లించుకుంటుందని తెలిపారు.

05/08/2023 15:20(IST)

చట్ట వ్యతిరేకంగా వ్యవహరించిన వారిపై కఠిన చర్యలు తీసుకోవాలి: బొత్స

విజయనగరం రింగురోడ్డు: చిత్తూరు జిల్లా పుంగనూరులో శుక్రవారం చోటు చేసుకున్న ఘటన దురదృష్టకరమని.. ఇలాంటి చర్యలు రాష్ట్రంలో పునరావృతం కాకూడదని కోరుకుంటున్నట్లు మంత్రి బొత్స సత్యనారాయణ వ్యాఖ్యానించారు. చట్టవ్యతిరేకంగా వ్యవహరించిన వారిపై కఠిన చర్యలు తీసుకోవాలని ఆయన ప్రభుత్వాన్ని డిమాండ్ చేశారు. విజయనగరం సమీపం గాజులరేగలో నిర్మాణంలో ఉన్న ప్రభుత్వ వైద్య కళాశాల భవనాలను మంత్రి విడదల రజని, డిప్యూటీ స్పీకర్ కోలగట్ల వీరభద్రస్వామితో కలసి మంత్రి బొత్స సత్యనారాయణ పరిశీలించారు. ఈ సందర్భంగా మీడియా అడిగిన ప్రశ్నకు మంత్రి బొత్స సమాధానమిస్తూ.. పుంగనూరులో జరిగిన ఘటన దురదృష్టకరమన్నారు. చట్టాలను ఎవరైనా గౌరవించాలని చెప్పారు.

05/08/2023 15:12(IST)

ఓటు హక్కు కోసం మరోసారి దరఖాస్తు చేసుకున్న నిమ్మగడ్డ రమేష్‌

గుంటూరు: ఏపీ రాష్ట్ర ఎన్నికల సంఘం మాజీ ప్రధాన అధికారి నిమ్మగడ్డ రమేష్ ఓటు హక్కు కోసం మరోసారి దరఖాస్తు చేసుకున్నారు. గుంటూరు జిల్లా దుగ్గిరాలలోని తన నివాసంలో ఓటు హక్కు కోసం దరఖాస్తు చేసుకున్నారు. ఇంటింటా ఓటు హక్కు తనిఖీల్లో భాగంగా దుగ్గిరాలలో తన ఇంటికి వచ్చిన బీఎల్‌వో అధికారికి ఓటు హక్కు దరఖాస్తు ఫారాన్ని అందించారు. హైదరాబాద్‌లోని తన ఓటును అక్కడి ఎన్నికల సంఘం కార్యాలయంలో సరెండర్ చేశానని.. తాజాగా ఏపీలోని తన స్వగ్రామంలో ఓటు హక్కు కోసం నమోదు చేసుకున్నానని రమేష్ చెప్పారు. లోపభూయిష్టమైన వ్యవస్థ వల్ల గతంలో తన మొదటి దరఖాస్తు తిరస్కరణకు గురైందన్నారు. ఈ సారైనా ప్రభుత్వం ఎలాంటి అడ్డంకులు సృష్టించకుండా తనకు ఓటు హక్కు కల్పించాలని కోరారు.

05/08/2023 15:05(IST)

వైకాపా దొంగదెబ్బకు కొండలు, గుట్టలు, వాగులు, వంకలు మాయం: లోకేశ్‌

వినుకొండ: రాష్ట్రంలో వైకాపా దొంగదెబ్బకు కొండలు, గుట్టలు, వాగులు, వంకలు మాయమవుతున్నాయని తెదేపా జాతీయ ప్రధాన కార్యదర్శి నారా లోకేశ్‌ విమర్శించారు. యువగళం పాదయాత్రలో భాగంగా వినుకొండ నియోజవర్గం ఈపూరు పుచ్చకాయల బోడులోని కొండ వద్ద సెల్ఫీ ఛాలెంజ్ విసిరారు. 3.16 ఎకరాల విస్తీర్ణంలోని కొండను ఎమ్మెల్యే బొల్లా బ్రహ్మానాయుడు నేతృత్వంలో ఆయన అనుచరులు ఇష్టారాజ్యంగా తవ్వేసి కోట్లాది రూపాయల గ్రావెల్ దోచేశారని లోకేశ్ ఆరోపించారు. అధికారం కోల్పోయేనాటికి ఆంధ్రప్రదేశ్‌లో కొండలు అనేవి కనిపించకూడదని వైకాపా ప్రభుత్వం ఒట్టు పెట్టుకున్నట్లుగా కనిపిస్తోందని ఎద్దేవా చేశారు. ప్రకృతి సంపదను యథేచ్ఛగా దోచేస్తున్న జగన్ అండ్ కోకు రాష్ట్ర ప్రజలు బోడిగుండు కొట్టించే రోజులు దగ్గర్లోనే ఉన్నాయని లోకేశ్‌ హెచ్చరించారు.

05/08/2023 14:50(IST)

జైపుర్‌ రైలు కాల్పుల్లో మరణించిన వ్యక్తి భార్యకు ప్రభుత్వ ఉద్యోగం

హైదరాబాద్‌: జైపుర్ రైలు కాల్పుల్లో మరణించిన సయ్యద్ సైఫుద్దీన్ సతీమణి అంజుమ్ షాహీన్‌కు ప్రభుత్వ ఉద్యోగం ఇచ్చారు. కులీ కుతుబ్ షా పట్టణాభివృద్ధి సంస్థలో ఆఫీస్ సబార్డినేట్‌గా ఆమెకు ఉద్యోగం కల్పించారు. ఆమెకు జియాగూడలో రెండు పడకల గదుల ఇంటిని ప్రభుత్వం కేటాయించింది. అంజుమ్ షాహీన్‌కు వితంతు పింఛన్ మంజూరు చేశారు. సైఫుద్దీన్ ముగ్గురు కూతుళ్లకు భారాస తరపున రూ. రెండు లక్షలు, మజ్లిస్ తరపున రూ.లక్ష చొప్పున బ్యాంకులో డిపాజిట్ చేశారు.

05/08/2023 14:43(IST)

అమరరాజా సంస్థ బస్సు, ఉద్యోగులపై వైకాపా దాడిని ఖండించిన సీపీఐ

అమరావతి: అమరరాజా సంస్థ బస్సు, ఉద్యోగులపై వైకాపా దాడిని సీపీఐ ఖండించింది. వైకాపా అరాచక శక్తులు విధ్వంసం సృష్టిస్తుంటే పోలీసులు ఏం చేస్తున్నారు? అని సీపీఐ ప్రశ్నించింది. జగన్‌ సర్కార్‌ వేధింపులతో ఇప్పటికే అమరరాజా తెలంగాణకు తరలిపోయిందని వివరించింది.

05/08/2023 14:35(IST)

వర్షాలకు నష్టపోయిన రైతులకు పరిహారం అందలేదు: బండి సంజయ్‌

హైదరాబాద్‌: వర్షాలకు నష్టపోయిన రైతులకు పరిహారం అందలేదని భాజపా నేత బండి సంజయ్‌ అన్నారు. ఆయన మీడియాతో మాట్లాడారు. ఎకరానికి రూ. 10 వేలు నష్టపరిహారం ఇస్తానని ప్రభుత్వం చెప్పినా అందలేదని ఎద్దేవా చేశారు. కేసీఆర్‌ పాత పథకాలను బంద్‌ చేసి.. కొత్త పథకాలను ప్రారంభిస్తున్నారని వివరించారు. మద్యానికి మాత్రం మూడు నెలల ముందే టెండర్లు వేస్తున్నారని ఎద్దేవా చేశారు. కార్మికులకు నష్టం కలగొద్దనే గవర్నర్‌ ఆర్టీసీ బిల్లును క్షుణ్ణంగా పరిశీలిస్తున్నారని తెలిపారు.

05/08/2023 14:29(IST)

మల్లేశ్వర స్వామి ఆలయ వాచ్‌మెన్‌ హత్య.. కేసు నమోదు!

వైఎస్సార్‌ జిల్లా: పార్నపల్లి మల్లేశ్వర స్వామి ఆలయ వాచ్‌మెన్‌ ఈశ్వరయ్య(75)ను హత్య చేశారు. లింగాల మండలం పార్నపల్లి కోన మల్లేశ్వర స్వామి ఆలయం వద్ద ఈ ఘటన జరిగింది. హత్య ఘటనపై పోలీసులు కేసు నమోదు చేసి దర్యాప్తు చేస్తున్నారు.

05/08/2023 14:23(IST)

రాజేంద్రనగర్‌లోని పాఠశాలలో ఉద్రిక్తత

రంగారెడ్డి: రాజేంద్రనగర్‌లోని ఓ పాఠశాలలో ఉద్రిక్త వాతావరణం నెలకొంది. విద్యార్థినిపై పీఈటీ టీచర్‌ అసభ్యంగా ప్రవర్తించాడంటూ విద్యార్థిని తల్లిదండ్రులు పాఠశాలలో ఫర్నీచర్‌ను ధ్వంసం చేశారు. ప్రిన్సిపల్‌, ఉపాధ్యాయులపై వారు దాడి చేశారు. అనంతరం అత్తాపూర్‌ పీఎస్‌లో విద్యార్థిని తల్లిదండ్రులు ఫిర్యాదు చేశారు.

05/08/2023 14:12(IST)

ఓటమి భయంతోనే జగన్‌ ఫ్యాక్షన్‌ రాజకీయాలు: కన్నా లక్ష్మీనారాయణ

సత్తెనపల్లి: ఓటమి భయంతోనే జగన్‌ ఫ్యాక్షన్‌ రాజకీయాలు చేస్తున్నారని మాజీ మంత్రి కన్నా లక్ష్మీనారాయణ అన్నారు. సత్తెనపల్లిలో నిర్వహించిన మీడియా సమావేశంలో ఆయన మాట్లాడారు. చంద్రబాబు సభలకు, లోకేశ్ పాదయాత్రకు ప్రజాధరణ పెరిగిందని తెలిపారు. చంద్రబాబు పర్యటనలో వైకాపా గుండాలు దాడికి పాల్పడ్డారని చెప్పారు. పోలీసులు ప్రజాస్వామ్యాన్ని కాపాడాలని కోరారు. ఈ నెల 9న సత్తెనపల్లి నియోజకవర్గంలో యువగళం పాదయాత్ర చేయనున్నట్లు ప్రకటించారు.

05/08/2023 14:07(IST)

వరికెపుడిసెల ప్రాజెక్టును వైకాపా ప్రభుత్వం గాలికి వదిలేసింది: లోకేశ్‌

పల్నాడు జిల్లా బొమ్మరాజుపల్లిలో సుగాలి సామాజిక వర్గం ప్రతినిధులతో తెదేపా జాతీయ ప్రధాన కార్యదర్శి నారా లోకేశ్‌ ముఖాముఖి నిర్వహించారు. ఈ సందర్భంగా ఆయన మాట్లాడుతూ.. ఎస్టీల సంక్షేమం, అభివృద్ధి చేసింది తెదేపా అని తెలిపారు. ఎన్టీఆర్‌ హయాంలో ఐటీడీఏను ఏర్పాటు చేశారని గుర్తుచేశారు. చంద్రబాబునాయుడు గిరిజన తండాల్లో రోడ్లు, తాగునీటి సౌకర్యాలు కల్పించారని చెప్పారు. వరికెపుడిసెల ప్రాజెక్టును వైకాపా ప్రభుత్వం గాలికి వదిలేసిందని ఆరోపించారు. తెదేపా అధికారంలోకి వచ్చిన మూడేళ్లలో వరికెపుడిసెల పూర్తిచేస్తామని లోకేశ్‌ హామీ ఇచ్చారు.

05/08/2023 13:56(IST)

ఉద్యోగాలను క్రమబద్ధీకరించాలని డిమాండ్‌

హైదరాబాద్: మత్స్య శాఖలో ఒప్పంద ఉద్యోగులుగా పనిచేస్తున్న ఫిషరీస్ ఫీల్డ్ ఆఫీసర్స్, ఫిషరీస్ ఫీల్డ్ అసిస్టెంట్స్‌, ఫిషర్‌మెన్‌ ఉద్యోగులను క్రమబద్ధీకరించాలని ఇందిరాపార్క్ ధర్నా చౌక్‌లో నిరసన చేపట్టారు. కార్యక్రమంలో మత్స్య కార్మిక సంఘం రాష్ట్ర అధ్యక్షుడు గోరంకుల నరసింహ తదితరులు పాల్గొన్నారు.

05/08/2023 13:49(IST)

పుంగనూరు దాడికి సంబంధించి 40 మందిని అదుపులోకి తీసుకున్నాం: డీఐజీ

చిత్తూరు: పుంగనూరు దాడిపై చిత్తూరులో డీఐజీ అమ్మిరెడ్డి మీడియా సమావేశం నిర్వహించారు. ఈ సందర్భంగా ఆయన మాట్లాడుతూ.. అనుమతి లేని ప్రాంతంలో చంద్రబాబునాయుడు ర్యాలీ నిర్వహించారని తెలిపారు. పోలీసులపై రాళ్లు, సీసాలతో ఆందోళనకారులు దాడి చేశారని చెప్పారు. ఒక వజ్ర వాహనం, మరో పోలీసు వ్యాన్‌ ధ్వంసం చేశారని వివరించారు. దాడులకు సంబంధించి 40 మందిని అదుపులోకి తీసుకున్నట్లు డీఐజీ అమ్మిరెడ్డి చెప్పారు. వీడియో ఫుటేజ్‌ ఆధారంగా మరికొందరిని అదుపులోకి తీసుకుంటామని వివరించారు.

05/08/2023 13:41(IST)

ఉద్యోగులను మాత్రమే ప్రభుత్వంలోకి తీసుకుంటున్నాం: ప్రభుత్వం

హైదరాబాద్‌: ఆర్టీసీ బిల్లుపై ప్రభుత్వం గవర్నర్‌కు వివరణ పంపింది. ఉద్యోగులను మాత్రమే ప్రభుత్వంలోకి తీసుకుంటున్నామని తెలిపింది. ఆర్టీసీ సంస్థ యథాతథంగా కొనసాగుతుందని చెప్పింది. కేంద్ర వాటా, గ్రాంట్లు, రుణాల వివరాలు అవసరం లేదని వివరించింది. కార్పొరేషన్‌ కొనసాగుతున్నందున విభజన చట్టానికి ఇబ్బంది లేదని తెలిపింది. ఉద్యోగుల ప్రయోజనాలను పూర్తిగా పరిరక్షిస్తామని వివరణ ఇచ్చింది. పింఛన్లు, తదితరాలకు సంబంధించి ఎలాంటి అయోమయం లేదని స్పష్టతనిచ్చింది.

05/08/2023 13:34(IST)

గవర్నర్‌ నిర్ణయం.. చరిత్రాత్మక నిర్ణయం: అశ్వత్థామరెడ్డి

హైదరాబాద్‌: గవర్నర్‌ లేవనెత్తిన 5 ప్రశ్నల్లో 4 కార్మికుల ప్రయోజనాలకు సంబంధించినవేనని అశ్వత్థామరెడ్డి అన్నారు. కార్మికులకు రెండు పీఆర్సీలు పెండింగ్‌లో ఉన్నాయని గవర్నర్‌ గుర్తుచేశారని చెప్పారు. ఆదరాబాదరాగా బిల్లు రూపొందిస్తే కార్మికులు ఇబ్బందుల్లో పడతారని ఆమె చెప్పారని తెలిపారు. గవర్నర్‌ నిర్ణయం.. చరిత్రాత్మక నిర్ణయమని చెప్పారు.

05/08/2023 13:31(IST)

ఇమ్రాన్‌ ఖాన్‌కు మూడేళ్ల జైలు శిక్ష

పాక్‌ మాజీ ప్రధాని ఇమ్రాన్‌ ఖాన్‌కు గట్టి ఎదురుదెబ్బ తగిలింది. తోషాఖానా అవినీతి కేసులో ఆయనకు మూడేళ్ల జైలు శిక్ష విధిస్తూ పాకిస్థాన్‌ కోర్టు తీర్పునిచ్చింది. అంతేగాక, ఆయనపై ఐదేళ్ల పాటు అనర్హత వేటు వేసింది.

05/08/2023 13:26(IST)

జగన్‌ ఫ్యాక్షన్‌ పాలనలో ప్రజాస్వామ్యం మరోసారి ఖూనీ అయింది: లోకేశ్‌

హైదరాబాద్‌: అమర్‌రాజా బస్సుపై వైకాపా దాడిని తెదేపా జాతీయ ప్రధాన కార్యదర్శి నారా లోకేశ్ ఖండించారు. జగన్‌ ఫ్యాక్షన్‌ పాలనలో ప్రజాస్వామ్యం మరోసారి ఖూనీ అయిందని తెలిపారు. బంద్‌ పేరుతో వైకాపా అల్లరి మూకలు దాడులు చేస్తున్నాయని చెప్పారు. శాంతిభద్రతలు కాపాడాల్సిన పోలీసులు ఎక్కడ ఉన్నారని లోకేశ్‌ ప్రశ్నించారు.

05/08/2023 13:19(IST)

ఇలాంటి దాడులు చూస్తే ఎవరైనా పరిశ్రమలు పెడతారా: చంద్రబాబు

అమర్‌రాజా బస్సుపై వైకాపా నాయకుల దాడిని తెదేపా అధినేత చంద్రబాబు నాయుడు ఖండించారు. బస్సుపై దాడి ఘటన వీడియోను ఆయన పరిశీలించారు. వైకాపా చర్యలతో ప్రజల్లో తిరుగుబాటు మొదలైందని చెప్పారు. ఇప్పటికే అమర్‌రాజా తెలంగాణకు తరలిపోయిందని తెలిపారు. ఇలాంటి దాడులు చూస్తే ఎవరైనా పరిశ్రమలు పెడతారా అని ప్రశ్నించారు.

05/08/2023 13:13(IST)

చంద్రబాబు పైనే దాడులు జరుగుతుంటే సామాన్యుల పరిస్థితేంటి: కేశినేని

ఆంధ్రప్రదేశ్‌ రాష్ట్రంలో శాంతిభద్రతలపై ప్రధాని నరేంద్ర మోదీకి ఫిర్యాదు చేస్తామని ఎంపీ కేశినేని నాని అన్నారు. తమ ఎంపీల బృందం సోమవారం ప్రధాని మోదీని కలుస్తుందని చెప్పారు. శాంతిభద్రతలు సరిగా లేకుంటే అభివృద్ధి జరగదన్నారు. వైకాపా మీద వ్యతిరేకత పెరిగినందునే దాడులు చేస్తున్నారని వివరించారు. చంద్రబాబు పైనే దాడులు జరుగుతుంటే సామాన్యుల పరిస్థితి ఏమిటని ప్రశ్నించారు. ఐఏఎస్‌, ఐపీఎస్‌లు నేతల కోసం కాకుండా ప్రజల కోసం పనిచేయాలని కేశినేని కోరారు.

05/08/2023 13:02(IST)

మా సమస్యలపై గవర్నర్‌ సానుకూలంగా స్పందించారు: టీఎంయూ

హైదరాబాద్‌: గవర్నర్‌తో టీఎంయూ నేతల చర్చలు ముగిశాయి. బిల్లు ఆమోదించాలని గవర్నర్‌ తమిళిసై సౌందరరాజన్‌ను కోరినట్లు ఆ సంఘం నేత థామస్‌రెడ్డి చెప్పారు. గవర్నర్‌ తమ సమస్యలు విన్నారని, సానుకూలంగా స్పందించారని తెలిపారు. కార్మికుల ప్రయోజనాలే తనకు ముఖ్యమని ఆమె చెప్పారని పేర్కొన్నారు. త్వరలోనే బిల్లు ఆమోదం పొందుతుందని ఆశాభావంతో ఉన్నట్లు థామస్‌రెడ్డి చెప్పారు.

05/08/2023 12:45(IST)

1.50 లక్షల మంది గిరిజనులకు పోడు పట్టాల ద్వారా లబ్ధి: ఎమ్మెల్సీ కవిత

శాసన మండలిలో గిరిజన సంక్షేమంపై లఘుచర్చలో ఎమ్మెల్సీ కవిత పాల్గొన్నారు. 1.50 లక్షల మంది గిరిజనులకు పోడు పట్టాల ద్వారా లబ్ధి చేకూరిందని ఆమె తెలిపారు. రాష్ట్రానికి ఎస్టీ సబ్‌ప్లాన్ నిధులను కేంద్రం ఇవ్వట్లేదని విమర్శించారు. మణిపుర్‌లో తెగల మధ్య కొట్లాట పెట్టి చలి కాచుకుంటున్నారని ఆరోపించారు. విభజించి ఓట్లు దండుకోవాలని భాజపా చూస్తోందని కవిత తెలిపారు. బ్రిటీషర్లు మెదలు పెట్టింది‌‌.. భాజపా ఆచరిస్తోందని ఎద్దేవా చేశారు.

05/08/2023 12:42(IST)

శాసన మండలిని సందర్శించిన విద్యార్థులు

హైదరాబాద్‌: వివిధ పాఠశాలల విద్యార్థులు శాసన మండలిని సందర్శించారు. ఎమ్మెల్సీలు కవిత, సురభి వాణీదేవి వారిని ఆహ్వానించారు. కవిత మండలి పనితీరును విద్యార్థులకు వివరించారు. శాసన మండలి ఛైర్మన్‌ గుత్తా సుఖేందర్‌రెడ్డి విద్యార్థులతో ముచ్చటించారు.

05/08/2023 12:38(IST)

సెల్‌ టవర్‌ ఎక్కి పంచాయతీ కార్మికుల నిరసన

మద్నూరు: కామారెడ్డి జిల్లాలోని మద్నూరులో సెల్‌ టవర్ ఎక్కి గ్రామ పంచాయతీ కార్మికులు నిరసన వ్యక్తం చేశారు. తమ ఉద్యోగాలను క్రమబద్ధీకరించాలని నెల రోజులుగా నిరవధిక సమ్మె చేస్తున్నా ప్రభుత్వం పట్టించుకోవడంలేదని ఆవేదన వ్యక్తం చేశారు. సమాచారం తెలుసుకున్న పోలీసులు టవర్‌ వద్దకు వచ్చి కార్మికులను సముదాయించడంతో గంట తర్వాత టవర్ దిగారు.

05/08/2023 12:30(IST)

సర్వసభ్య సమావేశాన్ని బహిష్కరించిన అధికార పార్టీ ఎంపీటీసీలు

శ్రీకాకుళం: టెక్కలిలో మండల పరిషత్‌ సర్వసభ్య సమావేశం నిర్వహించారు. సమావేశాన్ని అధికార పార్టీ ఎంపీటీసీ సభ్యులు బహిష్కరించారు. అభివృద్ధి పనులకు తమను భాగస్వామ్యం చేయట్లేదని వారు ఆరోపించారు. మండల పరిషత్‌ నిధుల కేటాయింపులో సరైన సమాచారం ఇవ్వట్లేదని తెలిపారు. అభివృద్ధి చేయకుంటే ఓట్ల కోసం ప్రజల వద్దకు ఎలా వెళ్లాలని ఆవేదన వ్యక్తం చేశారు. న్యాయం జరగకపోతే సీఎంను కలిసి తేల్చుకుంటామని ఎంపీటీసీ సభ్యులు వెల్లడించారు.

05/08/2023 12:24(IST)

అసెంబ్లీ ముట్టడికి యత్నించిన పీడీఎస్‌యూ నేతల అరెస్ట్‌

హైదరాబాద్‌: అసెంబ్లీ ముట్టడికి పీడీఎస్‌యూ నాయకులు యత్నించారు. ఈ నేపథ్యంలో పోలీసులు వారిని అరెస్ట్‌ చేశారు. పీడీఎస్‌యూ నేతలు ఫీజు రీయింబర్స్‌మెంట్‌ విడుదల చేయాలని డిమాండ్‌ చేశారు. డీఎస్సీ డైరెక్టర్‌ జారీ చేసిన సర్క్యులర్‌ను వెనక్కి తీసుకోవాలని డిమాండ్‌ చేశారు.

05/08/2023 12:20(IST)

అసెంబ్లీ ముట్టడికి మున్నూరు కాపు నేతల యత్నం

హైదరాబాద్‌: అసెంబ్లీ ముట్టడికి మున్నూరు కాపు నేతలు యత్నించారు. మున్నూరు కాపులకు ప్రత్యేక కార్పొరేషన్‌ ఏర్పాటు చేయాలని, రూ.500 కోట్లు కేటాయించాలని డిమాండ్‌ చేశారు. మున్నూరు కాపు నేతలను పోలీసులు అడ్డుకొని అరెస్ట్‌ చేశారు.

05/08/2023 12:16(IST)

శ్రీబాలాజీ రిజర్వాయర్‌లో నాలుగేళ్లలో తట్టెడు మట్టి కూడా ఎత్తలేదు: చంద్రబాబు

రేణిగుంట: శ్రీబాలాజీ రిజర్వాయర్‌లో నాలుగేళ్లలో తట్టెడు మట్టి కూడా ఎత్తలేదని తెదేపా అధినేత చంద్రబాబునాయుడు ఆరోపించారు. వైకాపా ప్రభుత్వం చెరువుల అభివృద్ధిని అటకెక్కించిందని తెలిపారు. చిత్తూరు జిల్లా వ్యాప్తంగా 1,147 ఎకరాల్లో చెరువుల ఆక్రమణ జరిగిందని చెప్పారు. 75 ఎకరాల చెరువు విస్తీర్ణం పూడ్చి మరీ కబ్జా చేశారని ఆరోపించారు. జగన్‌ వచ్చాక చిత్తూరులో 25 ప్రాజెక్టులు ప్రీ క్లోజర్‌ చేశారని ఆగ్రహం వ్యక్తం చేశారు.

05/08/2023 12:09(IST)

దుర్గాభవాని ఆలయంలో చోరీ

హైదరాబాద్‌: మల్కాజిగిరి పోలీసుస్టేషన్ పరిధిలోని గౌతంనగర్ రైల్వే గేట్ సమీపంలో దుర్గాభవాని ఆలయంలో శుక్రవారం రాత్రి చోరీ జరిగింది. దొంగలు గోడకు కన్నం పెట్టి లోనికి చొరబడి 20 తులాల బంగారం, రెండు కిలోల వెండి, కౌంటర్‌లోని రూ.80 వేల నగదును దోచుకెళ్లారు. వాటితో పాటు సీసీ కెమెరాలకు సంబంధించిన డీవీఆర్‌ను తీసుకెళ్లారు. మల్కాజిగిరి పోలీసులు సంఘటనా స్థలానికి చేరుకొని దర్యాప్తు చేస్తున్నారు.

05/08/2023 12:05(IST)

అసెంబ్లీ ముట్టడికి యూత్‌ కాంగ్రెస్‌ నేతల యత్నం

హైదరాబాద్‌: అసెంబ్లీ ముట్టడికి యూత్‌ కాంగ్రెస్‌ నేతలు ప్రయత్నించారు. అల్మాస్‌గూడ గ్రీన్‌ జోన్‌ ఎత్తివేయాలని వారు డిమాండ్‌ చేశారు. గ్రీన్‌ జోన్‌ ఎత్తివేస్తూ మంత్రి సబితా ఇంద్రారెడ్డి వెంటనే ప్రకటన చేయాలని డిమాండ్‌ చేశారు. యూత్‌ కాంగ్రెస్‌ నేతలను పోలీసులు అరెస్ట్ చేశారు.

05/08/2023 11:59(IST)

గవర్నర్‌తో ఆర్టీసీ యూనియన్‌ నాయకుల చర్చలు

హైదరాబాద్‌: గవర్నర్‌ తమిళిసై సౌందరరాజన్‌తో వీడియోకాన్ఫరెన్స్‌ ద్వారా ఆర్టీసీ యూనియన్‌ నాయకులు చర్చిస్తున్నారు. పుదుచ్చేరి నుంచి గవర్నర్‌ చర్చల్లో పాల్గొన్నారు. చర్చల్లో 10 మంది టీఎంయూ నాయకుల బృందం పాల్గొంది. టీఎంయూ అధ్యక్ష, కార్యదర్శులు ఎ.ఆర్‌.రెడ్డి, థామస్‌రెడ్డి తదితరులు ఉన్నారు.

05/08/2023 11:53(IST)

ఆర్టీసీ బిల్లుపై రాజ్‌భవన్‌కు ప్రభుత్వం వివరణ

హైదరాబాద్‌: ఆర్టీసీ బిల్లుపై రాజ్‌భవన్‌కు ప్రభుత్వం వివరణ పంపింది. గవర్నర్‌ తమిళిసై సౌందరరాజన్‌ బిల్లుపై అభ్యంతరాలను లేవనెత్తి వివరణ కోరగా.. ప్రభుత్వం ఈమేరకు స్పందించింది.

05/08/2023 11:50(IST)

ఉత్తరాఖండ్‌లో కొండచరియలు విరిగిపడి ముగ్గురు మృతి

ఉత్తరాఖండ్‌లో కొండచరియలు విరిగిపడి ముగ్గురు మృతి చెందారు. 17 మంది గల్లంతయ్యారు. కేదార్‌నాథ్‌కు 16 కిలోమీటర్ల దూరంలో కొండ చరియలు విరిగిపడ్డాయి. ఎన్డీఆర్‌ఎఫ్‌ బృందం గాలింపు చర్యలు చేపట్టింది.

05/08/2023 11:46(IST)

విజయవాడలో రాష్ట్రస్థాయి సదస్సు

విజయవాడ: జనచైతన్య వేదిక ఆధ్వర్యంలో విజయవాడలో ‘విద్యుత్‌ సంస్కరణలు- ప్రజలపై భారాలు’ అంశంపై రాష్ట్రస్థాయి సదస్సు ఏర్పాటు చేశారు. సదస్సుకు తెదేపా నేత సోమిరెడ్డి చంద్రమోహన్‌రెడ్డి, కాంగ్రెస్‌ నేత తులసిరెడ్డి హాజరయ్యారు.

05/08/2023 11:40(IST)

పెద్దిరెడ్డి అవినీతిని చంద్రబాబు బయటపెడుతున్నారనే గొడవలు: నల్లారి కిషోర్‌కుమార్‌రెడ్డి

రేణిగుంట: పెద్దిరెడ్డి అవినీతిని చంద్రబాబు బయటపెడుతున్నారనే గొడవలు చేస్తున్నారని తెదేపా నేత నల్లారి కిషోర్‌కుమార్‌రెడ్డి అన్నారు. రేణిగుంటలో నిర్వహించిన తెదేపా నేతల మీడియా సమావేశంలో ఆయన మాట్లాడారు. వైకాపా కార్యకర్తలు వీరంగం సృష్టిస్తుంటే పోలీసులు వారికే వంతపాడుతున్నారని ఆరోపించారు. ఎమ్మెల్సీ భూమిరెడ్డి మాట్లాడుతూ.. పుంగనూరు వద్ద పోలీసుల సహకారంతోనే వైకాపా శ్రేణులు కంటైనర్లు అడ్డుపెట్టాయని అన్నారు. దాడికి ప్రతిదాడి ఉంటుందని వైకాపా శ్రేణులు గుర్తించాలని చెప్పారు. ఎన్ని అడ్డంకులు సృష్టించినా శ్రీకాళహస్తిలో చంద్రబబాబు సభ జరిగి తీరుతుందని వివరించారు.

05/08/2023 11:24(IST)

పుంగనూరు ఘటనపై గవర్నర్‌ను కలిసిన తెదేపా నేతల బృందం

అమరావతి: పుంగనూరు, తంబళ్లపల్లి ఘటనలపై తెదేపా నేతల బృందం గవర్నర్‌ జస్టిస్‌ అబ్దుల్‌ నజీర్‌ను కలిశారు. గవర్నర్‌ను కలిసిన వారిలో వర్ల రామయ్య, నిమ్మల రామానాయుడు, బొండా ఉమ, గద్దె రామ్మోహన్‌, అశోక్‌ బాబు ఉన్నారు. శుక్రవారం నాటి దాడుల వీడియో క్లిప్పింగ్‌లు, ఫొటోలను గవర్నర్‌కు అందజేశారు.

05/08/2023 11:17(IST)

దోర్నాలలో తెదేపా పాదయాత్ర.. అడ్డుకునేందుకు మోహరించిన పోలీసులు

ప్రకాశం: దోర్నాలలో తెదేపా పాదయాత్రను అడ్డుకునేందుకు పోలీసులు మోహరించారు. మార్కాపురం, వై.పాలెం నాయకులు నారాయణరెడ్డి, ఎరిక్షన్‌బాబు ఆధ్వర్యంలో పాదయాత్ర చేపట్టారు. పాదయాత్రకు అనుమతి లేదంటూ పోలీసులు అడ్డుకునే ప్రయత్నం చేస్తున్నారు.

05/08/2023 11:13(IST)

ఆర్టీసీ యూనియన్‌ నాయకులకు గవర్నర్‌ ఆహ్వానం

హైదరాబాద్‌: ఆర్టీసీ యూనియన్‌ నాయకులను గవర్నర్‌ తమిళిసై సౌందరరాజన్‌ రాజ్‌భవన్‌కు ఆహ్వానించారు. వీడియో కాన్ఫరెన్స్‌ ద్వారా నాయకులతో మాట్లాడతానని తెలిపారు. ఉదయం 11.30 గంటలకు మాట్లాడతానని తెలిపారు.

05/08/2023 11:08(IST)

ఆర్టీసీ బిల్లును తక్షణమే ఆమోదించాలి: ఆర్టీసీ ఐకాస

హైదరాబాద్‌: ఆర్టీసీ బిల్లును తక్షణమే ఆమోదించాలని ఆర్టీసీ ఐకాస డిమాండ్‌ చేసింది. ఆర్టీసీ బిల్లును గవర్నర్‌ ఆపడం భావ్యం కాదని చెప్పింది. బిల్లును సభలో ప్రవేశపెట్టేందుకు గవర్నర్‌ చర్యలు చేపట్టాలని ఐకాస సభ్యులు కోరారు.

05/08/2023 10:56(IST)

అనంతపురం జిల్లా వ్యాప్తంగా తెదేపా నాయకులపై పోలీసుల ఆంక్షలు

పుంగనూరు దాడి ఘటనపై నిరసన తెలపకుండా ఉమ్మడి అనంతపురం జిల్లావ్యాప్తంగా తెదేపా నాయకులపై పోలీసులు ఆంక్షలు విధించారు. హిందూపురంలో తెదేపా నాయకుడు రమేశ్‌తో పాటు మరికొందరిని గృహ నిర్బంధం చేశారు. సి.కె.పల్లిలో నిరసనకు వెళ్తున్న పరిటాల సునీతను అడ్డుకునే యత్నం చేశారు. మరూరు టోల్‌గేట్‌ వద్ద పోలీసులు భారీగా మోహరించారు. సి.కె.పల్లిలో పలువురు తెదేపా నాయకులను పోలీసు స్టేషన్‌కు తరలించారు.

05/08/2023 10:52(IST)

వినుకొండ నియోజకవర్గంలో కొనసాగుతున్న నారా లోకేశ్‌ యువగళం

వినుకొండ నియోజకవర్గంలో తెదేపా జాతీయ ప్రధాన కార్యదర్శి నారా లోకేశ్‌ యువగళం పాదయాత్ర కొనసాగుతోంది. ఈవూరు మండలం వనికుంట శివారు నుంచి శనివారం పాదయాత్ర ప్రారంభమైంది. యువగళంలో భాగంగా మధ్యాహ్నం బొమ్మరాజపల్లిలో సుగాలీ సామజికవర్గం ప్రతినిధులతో ముఖాముఖి నిర్వహించనున్నారు.

05/08/2023 10:48(IST)

తాడిపత్రి రోడ్డు ప్రమాదంలో 4కు చేరిన మృతుల సంఖ్య

అనంతపురం జిల్లాలో జరిగిన రోడ్డు ప్రమాదంలో మృతుల సంఖ్య 4కు చేరింది. తాడిపత్రి మండలం రావివెంకటపల్లెలో కారు చెట్టును ఢీకొంది. కారు కొన్న యజమాని స్నేహితులకు విందు ఇచ్చాడు. విందు ముగించుకొని తిరిగి వస్తుండగా కారు చెట్టును ఢీకొంది.

05/08/2023 10:42(IST)

‘జగనన్న ముద్దు.. ఈ ఎమ్మెల్యే మాకొద్దు’.. బొల్లాకు వ్యతిరేకంగా పోస్టర్లు

పల్నాడు జిల్లా: వినుకొండలో వాల్‌పోస్టర్ల కలకలం నెలకొంది. వైకాపా ఎమ్మెల్యే బొల్లా బ్రహ్మనాయుడికి వ్యతిరేకంగా పోస్టర్లు వేశారు. ‘జగనన్న ముద్దు.. ఈ ఎమ్మెల్యే మాకొద్దు’ అని వాటిలో పేర్కొన్నారు. వైకాపా ఎమ్మెల్యే బొల్లా తీరును సొంత పార్టీ నేతలు వ్యతిరేకిస్తున్నారు. పోస్టర్లపై నియోజకవర్గంలో ఆసక్తికర చర్చ సాగుతోంది.

05/08/2023 10:36(IST)

ఆర్టీసీ బిల్లులోని ఐదు అంశాలపై వివరణ కోరిన గవర్నర్‌

హైదరాబాద్‌: ఆర్టీసీ బిల్లులోని ఐదు అంశాలపై గవర్నర్‌ తమిళిసై సౌందరరాజన్‌ వివరణ కోరారు. ఆర్టీసీలో కేంద్ర గ్రాంట్లు, వాటాలు, లోన్లు గురించి ఎలాంటి వివరాలు లేవని ఆమె తెలిపారు. విభజన చట్ట ప్రకారం ఆర్టీసీ స్థితిని మార్చడంపై వివరాలు లేవని చెప్పారు. ఆర్టీసీ ఉద్యోగుల ప్రయోజనాలు ఎలా కాపాడతారని ప్రశ్నించారు. ఆర్టీసీ ఉద్యోగులందరికీ ప్రభుత్వ ఉద్యోగులతో సమానంగా పింఛన్‌ అందిస్తారా అని గవర్నర్‌ సందేహం వ్యక్తం చేశారు.

05/08/2023 10:23(IST)

రాజ్‌భవన్‌ వద్ద ఆర్టీసీ కార్మికుల నిరసన

హైదరాబాద్‌: నెక్లెస్‌ రోడ్డులోని అంబేడ్కర్ విగ్రహం వద్దకు ఆర్టీసీ ఉద్యోగులు భారీగా చేరుకున్నారు. ఆర్టీసీ బస్సుల్లో కార్మికులు, ఉద్యోగులు తరలివచ్చారు. నెక్లెస్‌ రోడ్డు నుంచి రాజ్‌భవన్‌కు ర్యాలీగా వెళ్లారు. రాజ్‌భవన్‌ వద్ద గవర్నర్‌కు వ్యతిరేకంగా నిరసన తెలపనున్నారు. ఆర్టీసీ బిల్లుకు గవర్నర్‌ ఆమోదం తెలపాలని కార్మికులు డిమాండ్‌ చేస్తున్నారు. రాజ్‌భవన్‌ వద్ద పోలీసులు భారీ బందోబస్తు ఏర్పాటు చేశారు. ఈ మార్గంలో రాకపోకలకు ప్రయాణికులు ఇబ్బందులు పడుతున్నారు.

05/08/2023 10:15(IST)

ప్రభుత్వం ఆర్టీసీ ఉద్యోగులకు 2 పీఆర్సీలు బకాయి ఉంది: ఈటల

హైదరాబాద్‌: ఆర్టీసీ ఉద్యోగులను ప్రభుత్వంలో విలీనం చేయడాన్ని స్వాగతిస్తున్నామని ఈటల రాజేందర్‌ అన్నారు. అసెంబ్లీ మీడియా పాయింట్‌ వద్ద ఆయన మాట్లాడారు. ఆర్టీసీ విలీనం భాజపాకు ఇష్టం లేదని ప్రచారం జరుగుతోందని, అందులో వాస్తవం లేదని తెలిపారు. కావాలని గవర్నర్‌పై విమర్శలు చేస్తున్నారని చెప్పారు. ఆర్టీసీ ఉద్యోగులను బలవంతంగా రాజ్‌భవన్‌ పంపుతున్నారని పేర్కొన్నారు. ఆర్టీసీ ఉద్యోగులను తప్పుదోవ పట్టిస్తున్నారని వివరించారు. ప్రభుత్వం ఆర్టీసీ ఉద్యోగులకు 2 పీఆర్సీలు బకాయి ఉందని ఈటల గుర్తుచేశారు.

05/08/2023 10:05(IST)

మంచిర్యాలలో బావిలో పడి దొంగ మృతి

మంచిర్యాలలో బావిలో పడి దొంగ మృతి చెందాడు. ఐబీ చౌరస్తా వద్ద ఉన్న ఓ ఇంట్లోకి దొంగ చోరీకి వెళ్లాడు. ఈక్రమంలో ప్రమాదవశాత్తు బావిలో పడి మృతి చెందాడు. బావి నుంచి దుర్వాసన రావడంతో స్థానికులు పోలీసులకు సమాచారం ఇచ్చారు. మృతుడి వివరాల కోసం పోలీసులు విచారణ చేపట్టారు.

05/08/2023 10:01(IST)

లారీని ఢీకొన్న బస్సు.. ముగ్గురికి తీవ్రగాయాలు

కావలి: బోగోలు మండలం కప్పరాళ్లతిప్ప జాతీయ రహదారిపై జరిగిన రోడ్డు ప్రమాదంలో ముగ్గురికి తీవ్ర గాయాలయ్యాయి. శనివారం వేకువజామున జరిగిన ప్రమాదంలో ఆర్టీసీ బస్సు డ్రైవర్‌తో పాటు అందులో ప్రయాణిస్తున్న ఇద్దరికి తీవ్రగాయాలయ్యాయి. క్షతగాత్రులను ఆస్పత్రికి తరలించి చికిత్స అందిస్తున్నారు. విజయవాడ వైపు వెళ్తున్న ఈ ఆర్టీసీ బస్సు ఓవర్‌టేక్‌ చేయబోయి ముందున్న లారీని ఢీకొంది. ఈ ప్రమాదంపై బిత్రగుంట పోలీసులు కేసు నమోదు చేసుకొని దర్యాప్తు చేపట్టారు. ప్రమాదం జరిగిన సమయంలో బస్సులో మొత్తం 30 మందికి పైగా ప్రయాణికులున్నారు.

05/08/2023 09:55(IST)

ఎల్లారెడ్డి ఎమ్మెల్యే సురేందర్‌ పేరుతో ఫేక్‌ ఇన్‌స్టాగ్రామ్‌ అకౌంట్‌

కామారెడ్డి: ఎల్లారెడ్డి ఎమ్మెల్యే సురేందర్‌ పేరుతో దుండగులు ఫేక్‌ ఇన్‌స్టాగ్రామ్‌ అకౌంట్‌ సృష్టించారు. ఈ సైబర్‌ నేరగాళ్లు ఎమ్మెల్యే పేరుతో డబ్బులు అడుగుతున్నారు. నకిలీ ఇన్‌స్టాగ్రామ్‌ ఖాతాను బ్లాక్‌ చేయాలని ఎమ్మెల్యే సురేందర్‌ కోరారు. ఎవరూ డబ్బులు పంపవద్దని ఆయన సూచించారు.

05/08/2023 09:48(IST)

ఆలయంలో చోరీకి యత్నం.. దొంగలను పట్టుకున్న కానిస్టేబుల్‌కు తీవ్రగాయాలు

గుంటూరు: గుంటూరు జిల్లా తెనాలిలోని వైకుంఠపురం ఆలయంలో చోరీకి వచ్చిన దొంగలు బీభత్సం సృష్టించారు. నలుగురు దుండగులు ఆలయంలో తలనీలాలు చోరీ చేసేందుకు ప్రయత్నించారు. దీంతో వాచ్‌మెన్‌ వెంటనే డయల్‌ 100 ద్వారా పోలీసులకు సమాచారం ఇచ్చారు. పోలీసులు ఘటనా స్థలికి చేరుకోగా దొంగలు నలుగురు అప్రమత్తమై పారిపోయేందుకు ప్రయత్నించారు. ఈక్రమంలో కానిస్టేబుల్ రమేష్‌.. దొంగ నవీన్‌ను పట్టుకునే ప్రయత్నం చేశాడు. ఈక్రమంలో నవీన్ తోయడంతో కానిస్టేబుల్ రమేష్ 12అడుగుల రేకుల షెడ్డుపై నుంచి కింద పడటంతో తీవ్ర గాయాలయ్యాయి. దుండగుల్లో ఇరువురు పరారీ కాగా మరో ఇద్దరిని పోలీసులు అదుపులోకి తీసుకున్నారు. దుండగులు జీవన్ తేజ్, సాయికుమార్, నవీన్ కాగా మరొకరి పేరు తెలియలేదు. గాయపడిన కానిస్టేబుల్ రమేష్‌ను గుంటూరులోని ప్రైవేటు ఆసుపత్రికి తరలించి వైద్య సేవలు అందిస్తున్నారు.

05/08/2023 09:35(IST)

బోదలవీడులో మరోసారి దాడి.. తెదేపా సానుభూతిపరుడికి తీవ్రగాయాలు

పల్నాడు: వెల్దుర్తి మండలం బోదలవీడులో మరోసారి దాడి జరిగింది. పోలీసులకు ఫిర్యాదు చేశారనే ఆగ్రహంతో తెదేపా సానుభూతిపరుడు కోటయ్య కుటుంబంపై వైకాపా నాయకుడు కృష్ణమూర్తి కుటుంబ సభ్యులు శనివారం మరోసారి దాడికి దిగారు. ఈ ఘటనలో కోటయ్య తలకు తీవ్రగాయాలు కాగా.. ఆసుపత్రికి తరలించారు. మూడు రోజులుగా దాడి జరుగుతున్నా కేసు నమోదు చేయలేదని బాధితులు వాపోతున్నారు.

05/08/2023 09:26(IST)

కుప్పంలో బస్సుపై వైకాపా కార్యకర్తల దాడి

కుప్పం పట్టణం: వైకాపా నిరసనలో భాగంగా శుక్రవారం అర్ధరాత్రి కుప్పం చేరుకున్న బస్సుపై వైకాపా కార్యకర్తలు దాడి చేశారు. 40 మందితో కుప్పం డిపో బస్సు కృష్ణగిరి నుంచి తిరుమల వెళ్తుండగా ఈ ఘటన చోటు చేసుకంది. బస్సుపై దాడి చేయడంతో తమిళనాడువాసులు భయాందోళనకు గురయ్యారు. ప్రయాణికులు ఉదయం వరకు ఆర్టీసీ బస్టాండ్‌లోనే బిక్కుబిక్కుమంటూ గడిపారు. వైకాపా కార్యకర్తల దాడిలో బస్సు పాక్షికంగా దెబ్బతింది. కుప్పంలో వైకాపా పిలుపుమేరకు బంద్ పాటించాలంటూ వైకాపా కార్యకర్తలు దుకాణాలను బలవంతంగా మూయించారు. వస్త్ర దుకాణంలోని దుస్తులను బయటపడేశారు.

05/08/2023 09:07(IST)

మూగవేదన

బొబ్బిలి పట్టణంలోని నాయుడుకాలనీలో ఉన్న మురుగు కాలువలో శుక్రవారం ప్రమాదవశాత్తూ ఓ ఆవు పడిపోయి, ఇరుక్కుపోయింది. చిన్న కాలువ కావడం, పక్కనే కట్టడం ఉండటంతో బయటకు రాలేక విలవిల్లాడింది. మూగజీవి అరుపులు విన్న స్థానికులు చేరుకుని.. తాడు సహాయంతో కష్టపడి బయటికి తీశారు. దీంతో ప్రాణాపాయం తప్పింది. కాలువలపై పలకలు లేకపోవడంతో సమస్య ఏర్పడింది. ఇటీవల పుర కౌన్సిల్‌ సమావేశంలోనూ కౌన్సిలర్లు ఈ విషయాన్ని ప్రస్తావించారు.

05/08/2023 09:07(IST)

ఇలా వెళ్తే.. అందరి కళ్లూ ఇటే!

ఈ చిత్రాన్ని చూస్తుంటే రహదారిపై బోటు ప్రయాణిస్తున్నట్లుంది కదూ! శుక్రవారం విశాఖపట్నం జిల్లా ఆనందపురం వద్ద జాతీయ రహదారిపై భారీ టూరిజం బోటుతో ఓట్రాలీ లారీ కోల్‌కతా వైపు వెళుతుండగా అందరూ ఆసక్తిగా

05/08/2023 08:32(IST)

భళా చంద్రిక

బనగానపల్లి మండల పరిధిలోని టంగుటూరు గ్రామానికి చెందిన చంద్రిక వ్యవసాయ ట్రాక్టర్‌ను నడుపుతూ సేద్యం చేస్తున్నారు. తండ్రికి సాయంగా అప్పుడప్పుడూ ట్రాక్టరుతో పొలం పనులు చేస్తుంటానని ఆమె తెలిపారు.

05/08/2023 08:31(IST)

ఓపీ పత్రం.. ప్రచారాస్త్రం

వైకాపా ప్రభుత్వం ప్రచారం కోసం ప్రతి అవకాశాన్ని వాడుకుంటోంది. అధికారులు సైతం ఇందుకు తమవంతు సహకరిస్తూ స్వామిభక్తి చాటుకుంటున్నారు. ఇందుకు ఈ ఓపీ పత్రమే ఉదాహరణ. కేంద్ర ప్రభుత్వం అమలు చేస్తున్న ఆయుష్మాన్‌ భారత్‌ కార్యక్రమంలో భాగంగా నంద్యాల సర్వజన ఆసుపత్రిలో కొత్తగా ఈ-హాస్పిటల్‌ విధానం ప్రారంభించారు. ఇందులో భాగంగా స్మార్ట్‌ఫోన్‌ ఉన్న రోగులు క్యూఆర్‌ కోడ్‌ను స్కాన్‌చేసి ఓపీ కోసం పేరు నమోదు చేసుకోవచ్చు. ఇందుకోసం క్యూఆర్‌ కోడ్‌తో రూపొందించిన పత్రాలు, ఓపీ పత్రాల్లో ముఖ్యమంత్రి జగన్‌మోహన్‌రెడ్డి ఫొటోలు ముద్రించడం పట్ల విమర్శలు వ్యక్తమవుతున్నాయి. సరైన వైద్యం అందించలేకున్నా.. ఆసుపత్రి ఓపీ పత్రంపై కూడా సీఎం బొమ్మ వేయడం విడ్డూరమని కొందరు రోగులు పేర్కొంటున్నారు.

05/08/2023 08:29(IST)

ముగిసిన ఆర్టీసీ కార్మికుల 2 గంటల నిరసన

హైదరాబాద్‌: తెలంగాణ మజ్దూర్‌ యూనియన్‌ (టీఎంయూ) ఇచ్చిన పిలుపుతో ఆర్టీసీ కార్మికులు నిరసనకు దిగారు. రాష్ట్రవ్యాప్తంగా ఉదయం 6 నుంచి 8 గంటల వరకు విధులకు దూరంగా ఉన్నారు. అనంతరం యథాతథంగా బస్సులు ప్రయాణిస్తున్నాయి. అయితే, కొన్ని ప్రాంతాల్లో ఇంకా సర్వీసులు ప్రారంభం కాలేదు.

05/08/2023 08:18(IST)

పెన్నహోజలం..!

తుంగభద్ర జలాలు పెన్నహోబిలం లక్ష్మీనరసింహస్వామి క్షేత్రాన్ని తాకాయి. దీంతో ఆలయ పరిసరాల్లో జలసవ్వడి మొదలైంది. ఈ క్షేత్రం మీదుగా తుంగభద్ర ఎగువ కాలువ ఎంపీఆర్‌ జలాశయం దిశగా ప్రవహిస్తోంది. పచ్చని చెట్ల మధ్య.. ఆహ్లాద వాతావరణంలో జలపాతం కనువిందు చేస్తోంది. స్వామిని దర్శించుకున్న అనంతరం భక్తులు జలపాతం వద్ద సందడి చేస్తున్నారు.

05/08/2023 08:18(IST)

కోనేటిలో అలనాటి నాణేలు

మంగళగిరి శ్రీపానకాల లక్ష్మీనృసింహస్వామి పుష్కరిణి (పెదకోనేరు) పూడికతీతలో పురాతన రాగి నాణేలతోపాటు ఇత్తడి, కంచు వస్తువులు లభించాయి. దేవాదాయశాఖ అధికారులు వాటిని శుక్రవారం ప్రదర్శించారు. ఆంజనేయస్వామి చిత్రాన్ని ముద్రించిన బంగారపు రూపు, పెద్దసైజులో 25 రాగినాణేలు, మధ్యస్తంగా ఉన్నవి ఆరు, చిన్నవి అయిదు నాణేలు లభించాయి. ఇవి 1818-1940 సంవత్సరాల మధ్యలోని నాణేలు. ఒక రాగి భరిణి, ఇత్తడి వినాయకుడి ప్రతిమలు మూడు, ఒక రాగి ప్లేటు, వేంకటేశ్వరస్వామి, ఆలివేలు మంగమ్మ ఇత్తడి ప్రతిమలు, ముత్యాల హారానికి మూడు పగడాలు కలిగిన ఇత్తడి బిళ్ల ఉంది. మూడు ఇత్తడి చెంబులు, ఒక కంచు గంట, ఒక ఇత్తడి గంట, మేడిన్‌ జర్మనీకి చెందిన ఇత్తడి గ్లాసు, దాని అడుగు భాగాన క్వీన్‌ హెచ్‌ అని ఆంగ్లంలో ఉన్న పదాలతోపాటు దానిపై క్వీన్‌ చిత్రం చెక్కి ఉంది.

05/08/2023 08:15(IST)

శ్రీకాళహస్తిలో ఉద్రిక్తత

శ్రీకాళహస్తి: తిరుపతి జిల్లా శ్రీకాళహస్తిలో ఉద్రిక్తత నెలకొంది. తెదేపా ఫ్లెక్సీలు తొలగించాలని పురపాలక అధికారులు ఆదేశాలు జారీ చేశారు. అనుమతులున్నా ఫ్లెక్సీలను ఎందుకు తొలగిస్తారని తెదేపా శ్రేణులు నిరసనకు దిగారు. తమ అధినేత చంద్రబాబు రోడ్డు షో ఉన్న నేపథ్యంలో ఇలా నిర్ణయాలు తీసుకోవడమేంటని అధికారులతో తెదేపా శ్రేణులు వాగ్వాదానికి దిగారు. ఈ క్రమంలో శ్రీకాళహస్తిలో ఉద్రిక్తత నెలకొంది.

నదిలో పడిపోయిన బస్సు.. ప్రమాదంలో చిక్కుకున్న 40 మంది ప్రయాణికులు

తాజా వార్తలు (Latest News)

రైలుబండి.. దొంగలున్నారు జాగ్రత్తండీ

ఆటల్లో మనమెక్కడ?ఐదేళ్ల వైకాపా పాలనలో క్రీడలపై తీవ్ర నిర్లక్ష్యం

మంచి దొంగ!.. చోరీకొచ్చి.. నీళ్లు తాగి.. డబ్బులు పెట్టి

గుడిమెట్ల కొండల్లో వజ్రాల వేట

ప్రాణాలతో స్వదేశానికి వస్తానని అనుకోలేదు: గల్ఫ్‌ బాధితుడు వీరేంద్రకుమార్‌

పేదలకు ఇళ్లు కట్టిస్తానని టోకరా.. ఎమ్మెల్యేనే బురిడీ కొట్టించిన నిందితుడి అరెస్టు

సుఖీభవ

చదువు