Breaking | Feedback | ePratibha | E-PAPER | Pratibha

బ్యాంకు ఖాతాలు స్తంభించిన రైతులకూ రుణమాఫీ: నిరంజన్‌రెడ్డి

Updated : 19 Aug 2023 23:37 IST

సంక్షిప్త వార్తలు - చిత్ర వార్తలు

19/08/2023 23:54(IST)

రష్యా ప్రయోగించిన ‘లునా-25’లో సాంకేతిక సమస్య

మాస్కో: చంద్రుడిపై పరిశోధనల కోసం ఆగస్టు 10న రష్యా ప్రయోగించిన ‘లునా-25’లో శనివారం సాంకేతిక సమస్య వెలుగుచూసినట్లు ఆ దేశ అంతరిక్ష పరిశోధన సంస్థ రోస్‌కాస్మోస్‌ తెలిపింది. చంద్రుడిపై సాఫ్ట్‌ల్యాండింగ్‌లో భాగంగా నిర్దేశిత కక్ష్యలోకి ‘లునా-25’ని ప్రవేశపెట్టేముందు ఈ సమస్యను బయటపడ్డట్లు పేర్కొంది. దీంతో ఆటోమెటిక్‌ స్టేషన్‌లో అత్యవసర పరిస్థితి తలెత్తినట్లు తెలిపింది.

19/08/2023 23:23(IST)

కడెం జలాశయం నాలుగు గేట్ల ఎత్తివేత

నిర్మల్‌: నిర్మల్‌ జిల్లాలోని కడెం జలాశయానికి వరద ఉద్ధృతి పెరుగుతోంది. ప్రస్తుతం జలాశయానికి 48,700 క్యూసెక్కుల వరద వస్తోంది. అధికారులు నాలుగు గేట్లు ఎత్తి 37,000 క్యూసెక్కుల నీటిని దిగువకు విడుదల చేస్తున్నారు. జలాశయం పూర్తిస్థాయి నీటి మట్టం 700 అడుగులు కాగా.. ప్రస్తుతం 693 అడుగులకు చేరింది. దీంతో అధికారులు ఎప్పటికప్పుడు వరద ప్రవాహాన్ని అంచనా వేస్తూ అప్రమత్తంగా వ్యవహరిస్తున్నారు

19/08/2023 23:16(IST)

బ్యాంకు ఖాతాలు స్తంభించిన రైతులకూ రుణమాఫీ: నిరంజన్‌రెడ్డి

హైదరాబాద్: బ్యాంకు ఖాతాలు స్తంభించిన రైతులకూ రుణమాఫీ చేస్తామని తెలంగాణ వ్యవసాయశాఖ మంత్రి నిరంజన్‌రెడ్డి అన్నారు. రైతుల ఖాతాలకు నిధుల విడుదల ప్రక్రియ కొనసాగుతోందన్నారు. నిర్దేశిత సమయానికి రుణమాఫీ పూర్తి అవుతుందన్నారు. ఇప్పటి వరకు 16.6లక్షల ఖాతాలకు రూ.8089.7 కోట్లు బదిలీ చేసినట్లు నిరంజన్‌రెడ్డి తెలిపారు. రుణమాఫీ గురించి ఎవరూ ఆందోళన చెందవద్దన్నారు.

19/08/2023 23:12(IST)

రైతులపై దాడిని ఖండించిన కేంద్ర మంత్రి కిషన్‌రెడ్డి

హైదరాబాద్‌: నిర్మల్‌ జిల్లాలో రైతులపై జరిగిన దాడిని కేంద్ర మంత్రి కిషన్‌రెడ్డి ఖండించారు. అక్రమాలను ప్రశ్నిస్తున్న మా కార్యకర్తలపై దాడులా? అన్ని ప్రశ్నించారు. ప్రజాసమస్యలపై సీఎం కేసీఆర్‌ స్పందించాలన్నారు. మరోవైపు 10 మందితో కూడిన భాజపా ఎన్నికల కమిషన్‌ వ్యవహరాల కమిటీని కిషన్‌రెడ్డి ప్రకటించారు. మర్రి శశిధర్‌రెడ్డి ఛైర్మన్‌గా, దిలీప్‌కుమార్‌ కన్వీనర్‌గా ఉండనున్నారు.

19/08/2023 21:47(IST)

పోస్ట్ మెట్రిక్ ఉపకార వేతనాల కోసం రిజిస్ట్రేషన్లు ప్రారంభం: రాహుల్‌ బొజ్జా

హైదరాబాద్‌: ప్రస్తుత విద్యా సంవత్సరంలో పోస్ట్ మెట్రిక్ ఉపకార వేతనాల కోసం ఈ-పాస్ వెబ్ సైట్ ద్వారా రిజిస్ట్రేషన్లు ప్రారంభమయ్యాయి. నేటి నుంచి డిసెంబర్ 31 వరకు రిజిస్ట్రేషన్‌కు అవకాశం ఉందని ఎస్సీ అభివృద్ధి శాఖ కార్యదర్శి రాహుల్ బొజ్జా తెలిపారు. 2023 - 24 విద్యా సంవత్సరంలో కొత్తగా ఉపకార వేతనాల కోసం, రెన్యువల్ చేసుకునే వారు రిజిస్ట్రేషన్లు చేసుకోవచ్చని అన్నారు. ఎస్సీ, ఎస్టీ, బీసీ, ఈబీసీ, మైనార్టీ, దివ్యాంగ విద్యార్థులు ఉపకారవేతనాల కోసం రిజిస్ట్రేషన్ చేసుకోవాలని తెలిపారు. http://telanganaepass.cgg.gov.in పోర్టల్‌లో కళాశాలలు, విద్యార్థులకు రిజిస్ట్రేషన్ అవకాశం ఉందని రాహుల్ బొజ్జా చెప్పారు.

19/08/2023 21:39(IST)

మీర్‌పేట్‌లో పాఠశాల కాపలదారు బొజ్జమ్మ హత్య కేసును ఛేదించిన పోలీసులు

హైదరాబాద్‌: మీర్‌పేట్‌లో పాఠశాల కాపలదారు బొజ్జమ్మ హత్య కేసును పోలీసులు ఛేదించారు. బొజ్జమ్మను సోదరి కుమారుడు ఆంజనేయులు హత్య చేసినట్లు పోలీసులు వెల్లడించారు. మద్యానికి డబ్బులు ఇవ్వనందుకే ఆమెను హత్య చేసినట్లు పోలీసులు తెలిపారు.

19/08/2023 21:09(IST)

ఘోర ప్రమాదం..9 మంది జవాన్ల మృతి

ఇంటర్నెడ్‌ డెస్క్‌: లద్ధాఖ్‌లో ఘోర ప్రమాదం చోటుచేసుకుంది. లద్ధాఖ్‌ ఖేరీ పట్టణం సమీపంలో జవాన్లు ప్రయాణిస్తున్న వాహనం లోయలోకి దూసుకెళ్లింది. ఈ ఘటనలో 9 మంది ఆర్మీ జవాన్లు ప్రాణాలు కోల్పోయారు. మరికొంత మంది జవాన్లకు గాయాలయ్యాయి.

19/08/2023 20:43(IST)

తిరుపతి ఎస్వీ యూనివర్సిటీలో ఆర్‌. నారాయణమూర్తి సందడి

తిరుపతి శ్రీ వెంకటేశ్వర యూనివర్సిటీలోని శ్రీనివాస ఆడిటోరియంలో సినీనటుడు ఆర్‌. నారాయణమూర్తి సందడి చేశారు. విద్యార్థులు ఆర్‌. నారాయణ మూర్తితో సెల్ఫీలు దిగి మురిసిపోయారు.

19/08/2023 20:29(IST)

తొలి విడత వైద్య సీట్ల కేటాయింపు జాబితా వెల్లడికి హైకోర్టు అనుమతి

హైదరాబాద్‌: తొలి విడత వైద్య సీట్ల కేటాయింపు జాబితా వెల్లడికి హైకోర్టు అనుమతి తెలిపింది. రాష్ట్రంలోని 54 వైద్య కళాశాలల్లో తొలి విడత సీట్ల కేటాయింపునకు అనుమతులు జారీ అయ్యాయి. వైద్య కళాశాలల్లో సీట్లన్నీ స్థానికులకు రిజర్వ్‌ చేయడంపై హైకోర్టులో విచారణ జరిగింది.

19/08/2023 20:13(IST)

మద్యం దుకాణాలు దక్కించుకోడానికి వచ్చిన దరఖాస్తులు 1,31,490

హైదరాబాద్‌: 2620 మద్యం దుకాణాలు దక్కించుకోడానికి 2023లో 1,31,490 దరఖాస్తులు వచ్చాయి. రాష్ట్ర వ్యాప్తంగా 34 ఆబ్కారీ జిల్లాల పరిధిలో 2021లో 68,691 దరఖాస్తులు వచ్చినట్లు అధికారులు తెలిపారు. దరఖాస్తుల రుసుం ద్వారా ప్రభుత్వానికి రూ.2629.80 కోట్లు రాబడి వచ్చింది. అత్యధికంగా సరూర్ నగర్‌లో 10,908, శంషాబాద్‌లో 10811 దరఖాస్తులు వచ్చాయి.

19/08/2023 20:06(IST)

బహదూర్‌పురా పీఎస్‌ సమీపంలో ఓ వైపునకు ఒరిగిన భవనం

హైదరాబాద్‌: బహదూర్‌పురా పీఎస్‌ సమీపంలో భవనం ఓ వైపునకు ఒరిగింది. కార్పొరేటర్‌, జీహెచ్‌ఎంసీ అధికారులు ఘటనా స్థలానికి చేరుకున్నారు. భవనం సమీపంలోని ప్రజలను పోలీసులు ఖాళీ చేయించారు.

19/08/2023 19:49(IST)

Hyderabad: గురునానక్‌ ఇన్‌స్టిట్యూట్‌లో 19వ గ్రాడ్యుయేషన్‌ డే

హైదరాబాద్‌లోని గురునానక్‌ ఇన్‌స్టిట్యూట్‌లో 19వ గ్రాడ్యుయేషన్‌ డే నిర్వహించారు. ఈ సందర్భంగా విద్యార్థులకు ధ్రువపత్రాలు అందించారు. అనంతరం విద్యార్థులు ఫొటోలకు పోజులిస్తూ సందడి చేశారు.

19/08/2023 19:37(IST)

ఏడాదిన్నరగా నాపై సోషల్‌ మీడియాలో దుష్ప్రచారం చేస్తున్నారు: జగ్గారెడ్డి

సంగారెడ్డి: ఏడాదిన్నరగా తనపై సోషల్‌ మీడియాలో దుష్ప్రచారం చేస్తున్నారని కాంగ్రెస్‌ నేత జగ్గారెడ్డి అన్నారు. ఆయన మీడియాతో మాట్లాడారు. సంగారెడ్డిలో రాహుల్‌ యాత్ర బ్రహ్మాండంగా జరిగిందని గుర్తు చేశారు. యాత్ర బాగా నిర్వహించానని రాహుల్‌ తనని మెచ్చుకున్నట్లు చెప్పారు.

19/08/2023 19:18(IST)

పాదయాత్రలో లోకేశ్‌తో కలిసి నడిచిన వంగవీటి రాధా

అమరావతి: యువగళం పాదయాత్ర విజయవాడలో కొనసాగుతోంది. యువగళం పాదయాత్రలో భాగంగా లోకేశ్‌తో కలిసి వంగవీటి రాధా నడిచారు. ఈ క్రమంలో జై లోకేశ్‌.. జై రాధా.. అంటూ కార్యకర్తలు నినాదాలు చేశారు.

19/08/2023 18:52(IST)

కన్న కూతురిని చంపిన తండ్రి

హైదరాబాద్‌: బీహెచ్ఈఎల్‌లో దారుణం చోటుచేసుకుంది. కన్న కూతురిని ఓ తండ్రి బ్లేడుతో గొంతు కోసి చంపాడు. పోలీసులు తెలిపిన వివరాల ప్రకారం.. హైదరాబాద్‌లోని బీహెచ్ఈఎల్‌కు చెందిన చంద్రశేఖర్ తన కూతురు మోక్షజ(8)ను పాఠశాలకు వెళ్లి వెంట తీసుకొచ్చాడు. కారులో ఎక్కించుకొని కాస్త దూరం వెళ్లిన తర్వాత చంద్రశేఖర్ తన వెంట తెచ్చుకున్న బ్లేడ్‌తో గొంతు కోసి చంపాడు.

19/08/2023 18:09(IST)

రాయదుర్గం ఎస్‌బీఐ చీఫ్‌ మేనేజర్‌ అరెస్ట్‌

అనంతపురం: రాయదుర్గం ఎస్‌బీఐ చీఫ్‌ మేనేజర్‌ ఫణి కుమార్‌ను పోలీసులు అరెస్ట్‌ చేశారు. రూ. 1.07 కోట్లను కుటుంబసభ్యుల ఖాతాల్లోకి బదిలీ చేసినట్లు ఆయనపై ఆరోపణలు ఉన్నాయి. ఖాతాదారుల డబ్బును దారి మళ్లించాడని బ్యాంకు అధికారులు ఆయనపై ఫిర్యాదు చేశారు.

19/08/2023 18:06(IST)

న‌వంబ‌ర్‌ నెల‌ శ్రీవారి ఆర్జితసేవా టికెట్ల కోటా విడుదల

తిరుమల: భక్తులకు సౌకర్యవంతంగా ఉండేలా తితిదే షెడ్యూల్ ప్రకారం న‌వంబ‌ర్ నెల తిరుమల శ్రీవారి ఆర్జిత సేవలు, దర్శన టికెట్ల కోటాను విడుదల చేస్తోంది. ఇందులో భాగంగా న‌వంబర్‌ నెలకు సంబంధించిన సుప్రభాతం, తోమాల, అర్చన, అష్టదళపాదపద్మారాధన ఆర్జిత సేవల ఆన్‌లైన్ లక్కీడిప్ కోసం ఆగ‌స్టు 19వ తేదీ ఉదయం 10 గంటల నుంచి 21వ తేదీ ఉదయం 10 గంటల వరకు నమోదు చేసుకోవచ్చు. లక్కీడిప్‌లో టికెట్లు పొందిన భక్తులు సొమ్ము చెల్లించి వాటిని ఖరారు చేసుకోవాల్సి ఉంటుంది. కల్యాణోత్సవం, ఆర్జిత బ్రహ్మోత్సవం, ఊంజల్ సేవ, సహస్రదీపాలంకార సేవాటికెట్లను ఆగ‌స్టు 22వ తేదీ ఉదయం 10 గంటలకు విడుదల చేస్తారు. వ‌ర్చువ‌ల్ సేవా టికెట్లను ఆగ‌స్టు 22వ తేదీ మ‌ధ్యాహ్నం 3 గంటలకు విడుదల చేస్తారు. ఆంగప్రదక్షిణం టోకెన్ల కోటాను ఆగ‌స్టు 23వ తేదీ ఉదయం 10 గంటలకు విడుదల చేస్తారు. శ్రీ‌వాణి ట్రస్టు బ్రేక్ ద‌ర్శనం టికెట్లను ఆగ‌స్టు 23వ తేదీ ఉదయం 11 గంటలకు విడుదల చేస్తారు. వృద్ధులు, దివ్యాంగులకు ద‌ర్శన టోకెన్ల కోటాను ఆగ‌స్టు 23వ తేదీ మ‌ధ్యాహ్నం 3 గంటలకు విడుదల చేస్తారు. తిరుమ‌ల‌, తిరుప‌తిల‌లో వ‌స‌తి గ‌దుల బుకింగ్‌ను ఆగ‌స్టు 25వ తేదీ ఉద‌యం 10 గంటలకు విడుదల చేస్తారు.

19/08/2023 17:54(IST)

కంది మండలం చేర్యాలలో భారీగా రేషన్ బియ్యం పట్టివేత

సంగారెడ్డి: జిల్లాలోని కంది మండలం చేర్యాలలో భారీగా రేషన్ బియ్యాన్ని అధికారులు పట్టుకున్నారు. మూడు వేల క్వింటాళ్ల రేషన్ బియ్యాన్ని అధికారులు స్వాధీనం చేసుకున్నారు. హైదరాబాద్‌ నుంచి జోగిపేట వైపు ఈ బియ్యాన్ని తరలిస్తున్నట్లు గుర్తించారు.

19/08/2023 17:52(IST)

సికింద్రాబాద్‌ క్లాసిక్‌ గార్డెన్స్‌లో భాజపా ఎమ్మెల్యేల వర్క్‌షాప్

సికింద్రాబాద్‌: సికింద్రాబాద్‌ క్లాసిక్‌ గార్డెన్స్‌లో భాజపా ఎమ్మెల్యేలు వర్క్‌షాప్ నిర్వహించారు. ఈ వర్క్‌షాప్‌నకు భాజపా ఎన్నికల ఇన్‌ఛార్జి ప్రకాశ్‌ జావడేకర్‌ హాజరయ్యారు. ఈ వర్క్‌షాప్‌లో ఇతర రాష్ట్రాల భాజపా ఎమ్మెల్యేలు, కిషన్‌ రెడ్డి హాజరయ్యారు. ఈ నెల 27 వరకు రాష్ట్రంలో భాజపా ఎమ్మెల్యేల సమావేశాలు జరగనున్నాయి.

19/08/2023 17:41(IST)

భార్య కుటుంబంపై కోపంతో భర్త విషప్రయోగం

హైదరాబాద్‌: భార్య కుటుంబంపై కోపంతో ఓ భర్త విషప్రయోగం చేశాడు. ఈ విషం కలిపిన ఆహారం తిని నిందితుడి అత్త మహేశ్వరి మృతి చెందింది. భార్య, కుటుంబసభ్యులు ఆసుపత్రిలో చికిత్స పొందుతున్నారు. ఈ మేరకు పోలీసులు కేసు నమోదు చేసుకున్నారు. భర్త అజిత్‌ పరారీలో ఉన్నట్లు తెలిపారు.

19/08/2023 17:28(IST)

రైలు పట్టాలపై వ్యక్తి ఆత్మహత్య

మేడ్చల్ పోలీసు స్టేషన్ పరిధిలో వీకర్ సెక్షన్ కాలనీ వద్ద రైలు పట్టాలపై ఓ వ్యక్తి ఆత్మహత్య చేసుకున్నాడు. మృతుడిని మేడ్చల్ పట్టణానికి చెందిన శంకర్(45)గా పోలీసులు గుర్తించారు. శంకర్ మేడ్చల్‌లోని ఓ ప్రైవేటు కంపెనీలో ఉద్యోగం చేస్తున్నాడు. మృతుడికి కుమారుడు, కుమార్తె ఉన్నారు. స్థానికుల సమాచారంతో రైల్వే పోలీసులు సంఘటనా స్థలానికి చేరుకుని కేసు నమోదు చేసి దర్యాప్తు చేపట్టారు.

19/08/2023 17:22(IST)

గిరిజన మహిళపై దాడి చేయడమేనా ఫ్రెండ్లీ పోలీసింగ్‌: వీహెచ్‌

హైదరాబాద్‌: స్వాతంత్ర్యం వచ్చి ఇన్నేళ్లవుతున్నా మహిళలపై దారుణాలు జరుగుతూనే ఉన్నాయని కాంగ్రెస్‌ సీనియర్ నేత వి.హనుమంతరావు అన్నారు. గిరిజన మహిళపై విచక్షణారహితంగా దాడి చేయడమేనా ఫ్రెండ్లీ పోలీసింగ్‌ అని ప్రశ్నించారు. ఎల్బీనగర్‌లో పోలీసుల దాడిలో గాయపడిన గిరిజన మహిళ వరలక్ష్మిని హనుమంతరావు పరామర్శించారు. కర్మాన్‌ఘాట్‌లోని ఆసుపత్రిలో చికిత్స పొందుతున్న బాధితురాలు వరలక్ష్మికి తన వంతుగా ఆర్థిక సాయం చేస్తానని.. ప్రభుత్వం కూడా బాధిత మహిళకు రూ.5 లక్షలు ఇవ్వాలని డిమాండ్ చేశారు. ప్రభుత్వం స్పందించి బాధితురాలికి న్యాయం చేయకుంటే రోడ్డుపై బైఠాయించి ఆందోళన చేస్తానని హెచ్చరించారు.

19/08/2023 17:03(IST)

కాంగ్రెస్‌కు లీడర్లు లేరు.. భాజపాకు క్యాడర్‌ లేదు: హరీశ్‌రావు

హైదరాబాద్‌: ఈ నెల 23న మెదక్‌లో కలెక్టరేట్‌ను, ఎస్పీ కార్యాలయం, భారాస కార్యాలయాన్ని సీఎం కేసీఆర్‌ ప్రారంభిస్తారని మంత్రి హరీశ్‌రావు తెలిపారు. మెదక్‌లో కేసీఆర్‌కు కృతజ్ఞత సభ నిర్వహించనున్నట్లు ఆయన చెప్పారు. ప్రజల ఆకాంక్షలు నెరవేర్చేది సీఎం కేసీఆర్‌ మాత్రమే అని తెలిపారు. కాంగ్రెస్‌, భాజపాది మేకపోతు గాంభీర్యం అని విమర్శించారు. కాంగ్రెస్‌కు లీడర్లు లేరు.. భాజపాకు క్యాడర్‌ లేదని ఎద్దేవా చేశారు.

19/08/2023 17:03(IST)

అలిపిరిలో బాంబ్ బ్లాస్ట్ పేరుతో నకిలీ ఫోన్ చేసిన వ్యక్తి గుర్తింపు

తిరుమల: తిరుపతి అలిపిరి తనిఖీ కేంద్రంలో బాంబ్ బ్లాస్ట్ అవుతుందని నకిలీ ఫోన్ కాల్‌ చేసిన వ్యక్తిని పోలీసులు గుర్తించారు. ఈ మేరకు డీఎస్పీ భాస్కర్‌రెడ్డి వివరాలు వెల్లడించారు. అలిపిరిలో బాంబ్ బ్లాస్ట్‌తో 100 మంది చనిపోతారని ఈ నెల 15న కంట్రోల్‌ రూమ్‌కు నకిలీ కాల్‌ వచ్చింది. అప్రమత్తమైన సిబ్బంది దర్యాప్తు చేపట్టారు. ఈ క్రమంలో సేలానికి చెందిన మతిస్థిమితం లేని బాలాజీ ఫోన్‌ చేసినట్లు అధికారులు గుర్తించారు. తితిదేకు ఇబ్బంది కలిగించే వారిపైన కఠిన చర్యలు తీసుకుంటామని డీఎస్పీ తెలిపారు.

19/08/2023 16:58(IST)

26న చేవెళ్ల ప్రజాగర్జన సభ: రేవంత్‌రెడ్డి

హైదరాబాద్‌: ఈ నెల 26న సాయత్రం 4 గంటలకు చేవెళ్ల ప్రజాగర్జన సభ నిర్హహించనున్నట్లు టీపీసీసీ చీఫ్‌ రేవంత్‌రెడ్డి తెలిపారు. ఈ సభలోనే ఎస్సీ, ఎస్టీ డిక్లరేషన్‌ విడుదల చేస్తామని వివరించారు. ఏఐసీసీ జాతీయ అధ్యక్షుడు మల్లికార్జున ఖర్గే ఈ కార్యక్రమానికి హాజరవుతారని చెప్పారు. 21 నుంచి 25 వరకు నియోజకవర్గాల్లో క్షేత్రస్థాయి సమావేశాలుంటాయని రేవంత్ రెడ్డి వివరించారు. వరంగల్‌లో ఈ నెల 29న మైనారిటీ డిక్లరేషన్‌ విడుదల చేయనున్నట్లు తెలిపారు.

19/08/2023 16:48(IST)

శంషాబాద్ విమానాశ్రయంలో అక్రమంగా తరలిస్తున్న బంగారం పట్టివేత

శంషాబాద్‌ గ్రామీణం: శంషాబాద్ విమానాశ్రయంలో అక్రమంగా తరలిస్తున్న బంగారాన్ని అధికారులు స్వాధీనం చేసుకున్నారు. బ్యాంకాక్ నుంచి హైదరాబాద్‌కు వస్తున్న ప్రయాణికుడి వద్ద నుంచి 510.5 గ్రాముల బంగారాన్ని కస్టమ్స్‌ అధికారులు పట్టుకున్నారు. డీసీ పవర్‌ సప్లై మిషన్‌లో అక్రమంగా బంగారాన్ని తరలిస్తున్నట్లు అధికారులు గుర్తించారు.

19/08/2023 16:48(IST)

వైకాపా ప్రభుత్వాన్ని ప్రజలు ఖాతరు చేయలేదని స్పష్టమైంది: నిమ్మల రామానాయుడు

స్థానిక సంస్థల ఉపఎన్నికల పోలింగ్ సరళి చూశాక వైకాపా ప్రభుత్వాన్ని ప్రజలు ఖాతరు చేయలేదని స్పష్టమైందని తెదేపా ఎమ్మెల్యే నిమ్మల రామానాయుడు అన్నారు. వాలంటీర్లు ప్రలోభపెట్టినా, పోలీసులు భయపెట్టినా పల్లె ఓటర్లు పతనమయ్యే ప్రభుత్వాన్ని ఖాతరు చేయకుండా నిర్భయంగా తెదేపా అభ్యర్థులకే ఓటేశారన్నారు. రాష్ట్రవ్యాప్తంగా జరిగిన ఉపఎన్నికల్లో వాలంటీర్ల జోక్యాన్ని నిలువరించడంలో విఫలమైన కలెక్టర్లు, పోలీస్ అధికారులపై ఎన్నికల సంఘానికి ఫిర్యాదు చేస్తామని తెలిపారు. వైకాపా నేతల ప్రలోభాలు, బెదిరింపులు, అక్రమాలు, అరాచకాల్ని, వాలంటీర్ల జోక్యాన్ని కూడా ఆధారాలతో సహా ఎన్నికల కమిషన్ ముందుంచుతామన్నారు.

19/08/2023 16:47(IST)

ఇంటర్‌సిటీ రైలింజిన్‌లో పొగలు..

ఉదయ్‌పుర్‌- ఖజురహో ఇంటర్‌సిటీ ఎక్స్‌ప్రెస్‌ రైలు ఇంజిన్‌లో పొగలు రావడం కలకలం రేపింది. మధ్యప్రదేశ్‌లోని గ్వాలియర్‌ సమీపంలో ఈ ఘటన చోటుచేసుకుంది. వెంటనే అప్రమత్తమైన లోకోపైలట్లు.. రైలును నిలిపేశారు. పొగ నియంత్రణలోకి వచ్చిందని, అందరూ సురక్షితంగా ఉన్నారని రైల్వే అధికారులు తెలిపారు. అనంతరం వేరే ఇంజిన్‌ను రప్పించి రైలును పంపించారు. పొగలు రావడానికి గల కారణాలను అన్వేషిస్తున్నట్లు అధికారులు చెప్పారు.

19/08/2023 16:43(IST)

విమానంలో ఫస్ట్‌ ప్యాసెంజర్‌గా జగపతిబాబు

ప్రముఖ నటుడు జగపతిబాబు విమానంలో ప్రయాణిస్తున్న తన తాజా ఫొటోను ట్విటర్‌లో పంచుకున్నారు. ‘తొలిసారి ఫస్ట్‌ ప్యాసెంజర్‌గా విమానం ఎక్కాను. ఇక్కడి పరిస్థితిని చూస్తే.. ‘‘విమానం ఎగురుతుంది.. నువ్వు కాదు’’ అనే త్రివిక్రమ్‌ డైలాగ్‌ గుర్తొచ్చింది’ అని ట్వీట్‌ చేశారు.

19/08/2023 16:42(IST)

2024 ఫిబ్రవరిలో బయో ఆసియా సదస్సు: కేటీఆర్‌

బయో ఆసియా సదస్సు తేదీలను మంత్రి కేటీఆర్‌ ప్రారంభించారు. హైదరాబాద్‌ వేదికగా 2024 ఫిబ్రవరి 26, 27, 28 తేదీల్లో సదస్సు నిర్వహించనున్నట్లు తెలిపారు. డాటా అండ్‌ ఏఐ-రీడిఫైనింగ్‌ పాసిబిలిటీస్‌ థీమ్‌తో బయో ఆసియా సదస్సు నిర్వహించనున్నారు.

19/08/2023 16:37(IST)

పోలీసుల దాడిలో గాయపడిన మహిళకు న్యాయం చేయాలి: కాంగ్రెస్‌

హైదరాబాద్‌: కాంగ్రెస్‌ ఆధ్వర్యంలో గాంధీభవన్‌ వద్ద నిరసన చేపట్టారు. మహిళపై పోలీసులు దాడి చేసిన ఘటనలో న్యాయం చేయాలని డిమాండ్‌ చేశారు. బాధితురాలికి రూ.25 లక్షలు, ప్రభుత్వ ఉద్యోగం ఇవ్వాలని కోరారు. నిందితులపై ఎస్సీ, ఎస్టీ అట్రాసిటీ కేసు పెట్టాలని డిమాండ్‌ చేశారు.

19/08/2023 16:32(IST)

డబుల్‌ బెడ్‌రూమ్‌ ఇళ్ల పేరుతో డబ్బు వసూలు చేస్తున్న ముఠా అరెస్ట్‌

హైదరాబాద్‌: డబుల్‌ బెడ్‌రూమ్‌ ఇళ్లు ఇప్పిస్తామని డబ్బు వసూలు చేస్తున్న ముఠాను అరెస్ట్‌ చేశారు. అంబర్‌పేట్‌ పీఎస్‌ పరధిలో ఒక్కొక్కరు రూ.50 వేలు చెల్లించేలా ఒప్పందం కుదుర్చుకుని డబ్బుల వసూలు చేపట్టారు. నిందితుడిని పట్టుకొని భారాస నేతలు పోలీసులకు అప్పగించారు.

19/08/2023 16:28(IST)

మహబూబ్‌నగర్‌లో ‘తిరగబడదాం-తరిమికొడదాం’ ర్యాలీ

మహబూబ్‌నగర్‌: కాంగ్రెస్‌ ఆధ్వర్యంలో మహబూబ్‌నగర్‌లో ‘తిరగబడదాం-తరిమికొడదాం’ కార్యక్రమం నిర్వహించారు. పొంగులేటి శ్రీనివాస్‌రెడ్డి, జూపల్లి కృష్ణారావు, సంపత్‌కుమార్‌, చిన్నారెడ్డి పాల్గొన్నారు. కార్యక్రమంలో భాగంగా మహబూబ్‌నగర్‌ జిల్లా కేంద్రంలో ర్యాలీ నిర్వహించారు.

19/08/2023 16:24(IST)

లోకేశ్‌కు స్వాగతం పలుకుతూ పడవల ప్రదర్శన

విజయవాడ: పరవళ్లు తొక్కుతున్న కృష్ణా నదిపై నారా లోకేశ్‌కు ఘనస్వాగతం అంటూ బోట్స్ అసోసియేషన్ ప్రతినిధులు ఘనంగా ఆహ్వానం పలికారు. 2019 నుంచి ఇసుక పడవలను కృష్ణా నదిపై తిరగడాన్ని రద్దు చేయడాన్ని నిరసిస్తూ, తెదేపా అధికారంలోకి వస్తే తమ సమస్య పరిష్కారించాలంటూ ఈ మేరకు పడవల ప్రదర్శన చేపట్టారు. సుమారు 200 పడవలతో గుంటూరు జిల్లాలోని కొండవీటి వాగు నుంచి ప్రకాశం బ్యారేజీ మీదుగా విజయవాడ వరకు యువగళం జెండాలతో పడవల ప్రదర్శన చేశారు.

19/08/2023 16:17(IST)

ప్రమాదకర పరిశ్రమలన్నింటిలో ‘థర్డ్ పార్టీ సేఫ్టీ ఆడిట్’ చేయాలి: జవహర్‌రెడ్డి

అమరావతి: ఏపీ రాష్ట్రంలోని ప్రమాదకర పరిశ్రమలన్నింటిలో ‘థర్డ్ పార్టీ సేఫ్టీ ఆడిట్’ జరగాలని ప్రభుత్వ ప్రధాన కార్యదర్శి కేఎస్ జవహర్ రెడ్డి ఆదేశించారు. రసాయన పరిశ్రమల్లో ప్రమాదాల నివారణపై విజయవాడలోని సీఎస్ క్యాంపు ఆఫీస్‌లో సమీక్ష సమావేశం నిర్వహించారు. రసాయన సంబంధిత పరిశ్రమల్లో ప్రమాదాల నివారణకు కట్టుదిట్టమైన భద్రతా చర్యలు తీసుకోవాల్సిన అవసరం ఉందని తెలిపారు. పరిశ్రమల్లో ఆయా ద్రావకాల గాడత, వాటి స్వభావాన్ని ముందే పరీక్షించి తెలుసుకునేలా ప్రయోగశాలలు ఏర్పాటు చేయాలని పరిశ్రమలు, కర్మాగారాల శాఖల అధికారులను ఆదేశించారు. పరిశ్రమల్లో ఏటా ప్రమాదాల నివారణపై ప్రత్యేక మాక్ డ్రిల్ నిర్వహించాలని చెప్పారు. రెండేళ్ల కాలంలో రసాయన సంబంధిత పరిశ్రమల్లో 11 ప్రమాదాలు జరిగాయని.. అలాంటి ప్రమాదాలు పునరావృతం కాకుండా చర్యలు తీసుకోవాలని స్పష్టం చేశారు.

19/08/2023 16:09(IST)

విద్యాశాఖ అధికారులపై ఆగ్రహం వ్యక్తం చేసిన ప్రవీణ్‌ ప్రకాష్‌

ఆంధ్రప్రదేశ్ విద్యాశాఖ ముఖ్య కార్యదర్శి ప్రవీణ్ ప్రకాష్ విద్యాశాఖ అధికారులపై ఆగ్రహం వ్యక్తం చేశారు. శ్రీసత్యసాయి జిల్లా కదిరి మున్సిపల్ పాఠశాలలను ఆయన తనిఖీ చేశారు. కదిరిలోని వీవర్స్ కాలనీ, కుటాగుళ్ల పాఠశాలలను పరిశీలించారు. మధ్యాహ్న భోజనం కోసం వినియోగిస్తున్న కూరగాయల నాణ్యతను పరిశీలించారు. విద్యార్థులపై శ్రద్ధతో వ్యవహరించాలని, నాణ్యమైన భోజనం, విలువలతో కూడిన చదువును అందించాలన్నారు. అధికారులకు ఉపాధ్యాయులు మాత్రమే కనిపిస్తున్నారని, పిల్లల వైపు దృష్టి పెట్టలేదని ఆగ్రహం వ్యక్తం చేశారు. సొంత పిల్లల విషయంలోనూ ఇలానే వ్యవహరిస్తారా అంటూ ప్రశ్నించారు.

19/08/2023 15:57(IST)

జీహెచ్‌ఎంసీ ప్రధాన కార్యాలయం వద్ద ఒప్పంద ఉద్యోగులు ధర్నా

హైదరాబాద్‌: కనీస వేతనం కోరుతూ జీహెచ్‌ఎంసీ ప్రధాన కార్యాలయం వద్ద ఒప్పంద ఉద్యోగులు ధర్నా చేశారు. కనీస వేతనం రూ.24 వేలు ఇవ్వాలని కోరుతూ జీహెచ్‌ఎంసీ ఉద్యోగులు డిమాండ్‌ చేశారు. మున్సిపల్‌ కార్మికులకు సంక్షేమ పథకాలు ఇవ్వాలని కోరారు.

19/08/2023 15:46(IST)

చేజర్ల మండలం పాతపాడుతో తెదేపా, వైకాపాకు సమాన ఓట్లు

నెల్లూరు: చేజర్ల మండలం పాతపాడు వార్డు ఎన్నికలో రీకౌంటింగ్‌ చేస్తున్నారు. ఐదో వార్డు ఎన్నికల్లో తెదేపా, వైకాపా మద్దతుదారులకు సమాన ఓట్లు వచ్చాయి. ఇద్దరు సభ్యుల సహకారంతో అధికారులు రీకౌంటింగ్‌ చేస్తున్నారు.

19/08/2023 15:30(IST)

ఆదిలాబాద్‌ జిల్లాలో 2 కొత్త మండలాల ఏర్పాటుకు నోటిఫికేషన్‌

ఆదిలాబాద్‌ జిల్లాలో 2 కొత్త మండలాల ఏర్పాటుకు నోటిఫికేషన్‌ జారీ చేశారు. సాత్నాల, భోరాజ్‌ మండలాల ఏర్పాటుకు ప్రతిపాదనలు చేశారు. 18 గ్రామాలతో సాత్నాల, 28 గ్రామాలతో భోరాజ్‌ మండలాన్ని ఏర్పాటు చేయనున్నారు. అభ్యంతరాలు, వినతుల స్వీకరణకు 15 రోజుల గడువు ఇచ్చారు.

19/08/2023 15:25(IST)

భారాస ప్రభుత్వ సంక్షేమ పథకాలు అందని ఊరు, ఇల్లు లేవు: కేటీఆర్‌

హైదరాబాద్‌: మంత్రి కేటీఆర్‌ సమక్షంలో తలకొండపల్లి జడ్పీటీసీ సభ్యుడు వెంకటేశ్‌ గుప్తా భారాసలో చేరాడు. ఈ సందర్భంగా కేటీఆర్‌ మాట్లాడుతూ.. భారాస ప్రభుత్వం ఇచ్చే సంక్షేమ పథకాలు అందని ఊరు, ఇళ్లు లేవని తెలిపారు. రాష్ట్రంలో ప్రతి ఒక్కరికీ సంక్షేమ పథకాలు అందాయని చెప్పారు. జడ్పీటీసీ సభ్యుడు వెంకటేశ్‌కు మంచి పదవి ఇస్తామని తెలిపారు.

19/08/2023 15:21(IST)

ఒక్క ఓటుతో తెదేపా అభ్యర్థి విజయం.. రీకౌంటింగ్‌కు వైకాపా డిమాండ్‌

ఎన్టీఆర్‌ జిల్లా: తిరువూరు మండలం ఎర్రమాడులో ఉద్రిక్తత చోటు చేసుకుంది. ఏడో వార్డుకు జరిగిన ఎన్నికల్లో తెదేపా అభ్యర్థి ఒక్క ఓటుతో విజయం సాధించారు. వైకాపా నాయకులు రీకౌంటింగ్‌కు డిమాండ్‌ చేస్తున్నారు. దీంతో పోలింగ్‌ కేంద్రం వద్ద ఉద్రిక్తత నెలకొంది. పోలీసులు మోహరించారు.

19/08/2023 15:10(IST)

నాపై రాజకీయంగా కుట్రలు జరుగుతున్నాయి: ముత్తిరెడ్డి యాదగిరిరెడ్డి

జనగామ: తనపై రాజకీయంగా కుట్రలు జరుగుతున్నాయని జనగామ ఎమ్మెల్యే ముత్తిరెడ్డి యాదగిరిరెడ్డి తెలిపారు. కార్పొరేట్‌ పద్ధతిలో పల్లా రాజేశ్వర్‌రెడ్డి కుట్రలు చేశారని ఆరోపించారు. ఇంటెలిజెన్స్‌ సమాచారం కేసీఆర్‌ దృష్టికి వెళ్లిందని చెప్పారు. పల్లా ఏనాడూ జనగామ ప్రజలను ఆదుకోలేదని వివరించారు. తనకే టికెట్‌ ఇస్తున్నారని రాజేశ్వర్‌రెడ్డి ఎలా చెబుతున్నారని ప్రశ్నించారు. తనను ఓడించలేక.. తన ఇంట్లో చిచ్చుపెట్టారని ముత్తిరెడ్డి యాదగిరిరెడ్డి విమర్శించారు.

19/08/2023 15:09(IST)

గిరిజన మహిళపై దాడి చేస్తే సీఎం కేసీఆర్‌ స్పందించలేదు: ఈటల రాజేందర్‌

హైదరాబాద్: భాజపా రాష్ట్ర కార్యాలయంలో ఈటల రాజేందర్‌ మీడియా సమావేశం నిర్వహించారు. గిరిజన మహిళపై దాడి చేస్తే సీఎం కేసీఆర్‌ స్పందించలేదని ఆరోపించారు. ఇద్దరు కానిస్టేబుళ్లను సస్పెండ్ చేసి సరిపెట్టారని ఎద్దేవా చేశారు. ఇలాంటి ఘటనలపై సీఎం బాధ్యతారాహిత్యంగా వ్యవహరిస్తున్నారని వివరించారు.

19/08/2023 15:05(IST)

హత్యలు, అత్యాచారాల్లో బాధితులను ప్రలోభపెడుతున్నారు: బండి సంజయ్‌

కరీంనగర్: కరీంనగర్‌లో బండి సంజయ్‌ మీడియా సమావేశం నిర్వహించారు. పెద్దపల్లిలో బాలిక హత్య కేసును నీరు గార్చారని ఆయన ఎద్దేవా చేశారు. హత్యలు, అత్యాచారాల్లో బాధితులను ప్రలోభపెడుతున్నారని ఆరోపించారు. బాలిక మరణాన్ని ఆత్మహత్యగా తేల్చేశారని వివరించారు. దిశ కంటే దారుణమైన ఘటన ఇది అని అభివర్ణించారు. భారాస మంత్రే కేసును మూసే ప్రయత్నం చేస్తున్నారని తెలిపారు.

19/08/2023 15:03(IST)

ఎస్సై శివాజీని తక్షణం విధుల నుంచి తప్పించాలి: ముప్పాళ్ల సుబ్బారావు

తూర్పుగోదావరి: పోలీసుల చేతిలో చిత్రహింసలకు గురైన వెంకటప్రసాద్‌కు అండగా పౌరహక్కుల సంఘం రాష్ట్ర అధ్యక్షుడు ముప్పాళ్ల సుబ్బారావు నిలిచారు. ఎస్సీ యువకుడిపై థర్డ్‌ డిగ్రీ ప్రయోగించారని ఆయన తెలిపారు. ఆసుపత్రిలోకి రావద్దని కుటుంబ సభ్యులను బెదిరించారని చెప్పారు. ఆసుపత్రి బిల్లులను పోలీసులే చెల్లించారని తెలిపారు. కుటుంబ సభ్యుల డిమాండ్‌తో ఎస్సై శివాజీపై అట్రాసిటీ కేసు పెట్టారని చెప్పారు. ఎస్సై శివాజీని తక్షణం విధుల నుంచి తప్పించాలని డిమాండ్‌ చేశారు.

19/08/2023 14:31(IST)

పోలీసుల చేతిలో తీవ్రంగా గాయపడిన మహిళను పరామర్శించిన రఘునందన్‌రావు

హైదరాబాద్: హైదరాబాద్ పోలీసుల చేతిలో తీవ్రంగా గాయపడిన గిరిజన మహిళ వరలక్ష్మిని భాజపా ఎమ్మెల్యే రఘునందన్‌రావు పరామర్శించారు. కర్మాన్‌ఘాట్‌లోని జీవన్ ఆస్పత్రికి చేరుకొన్న ఎమ్మెల్యే బాధితురాలిని వివరాలు అడిగి తెలుసుకున్నారు. ఆయన మాట్లాడారు. పోలీసులు వరలక్ష్మి పట్ల అమానుషంగా ప్రవర్తించారని ఆయన ఆరోపించారు. ప్రతి చిన్న విషయానికి ట్విటర్‌లో స్పందించే కేటీఆర్ ఈ విషయంపై ఎందుకు స్పందించడం లేదని ప్రశ్నించారు. దాడికి పాల్పడిన పోలీసులపై చట్టపరమైన చర్యలు తీసుకోవాలని రఘునందన్ రావు డిమాండ్ చేశారు.

19/08/2023 14:28(IST)

ముషీరాబాద్‌లోని చెత్త సేకరణ దుకాణంలో పేలుడు

హైదరాబాద్: ముషీరాబాద్‌లోని చెత్త సేకరణ దుకాణంలో పేలుడు సంభవించింది. ఈ ప్రమాదంలో కార్మికుడు గాయపడ్డాడు. దీంతో కార్మికుడి పరిస్థితి విషమంగా ఉండటంతో గాంధీ ఆసుపత్రికి తరలించారు.

19/08/2023 14:24(IST)

కలుజువ్వలపాడు రోడ్డు ప్రమాదం.. పరిహారం చెల్లించాలని బంధువుల ధర్నా

ప్రకాశం: తర్లుపాడు మండలం కలుజువ్వలపాడు వద్ద రోడ్డుపై ధర్నా చేపట్టారు. యువకుల మృతి ఘటన బాధ్యులపై చర్యలు తీసుకోవాలని డిమాండ్‌ చేశారు. మృతుల కుటుంబాలకు రూ.25 లక్షలు పరిహారం చెల్లించాలని డిమాండ్‌ చేశారు. బంధువుల ధర్నాతో జాతీయ రహదారిపై భారీగా వాహనాలు నిలిచిపోయాయి. శుక్రవారం రాత్రి లారీ ఢీకొని బైక్‌పై వెళ్తున్న ముగ్గురు యువకులు మృతి చెందిన సంగతి తెలిసిందే.

19/08/2023 14:20(IST)

లోకేశ్‌ పాదయాత్ర.. 150 కార్లతో భారీ ర్యాలీ

ఉమ్మడి గుంటూరు జిల్లాలో లోకేశ్‌ పాదయాత్ర సందర్భంగా కార్ల ర్యాలీ నిర్వహించారు. జిల్లాలో 350 కిలోమీటర్ల పాదయాత్ర సందర్భంంగా మన్నవ మోహనకృష్ణ ఆధ్వర్యంలో 150 కార్లతో భారీ ర్యాలీ చేశారు. గుంటూరు పశ్చిమ నియోజకవర్గం నుంచి మంగళగిరి వరకు కార్ల ర్యాలీ చేపట్టారు. ఈ సందర్భంగా తెదేపా కార్యకర్తలు జైలోకేశ్.. జై యువగళం నినాదాలు చేశారు.

19/08/2023 14:14(IST)

19 మంది నకిలీ ట్రాన్స్‌జెండర్ల అరెస్ట్‌

హైదరాబాద్‌: వసూళ్లకు పాల్పడుతున్న 19 మంది నకిలీ ట్రాన్స్‌జెండర్ల ముఠాను అరెస్ట్‌ చేశారు. సికింద్రాబాద్‌, ప్యారడైజ్‌, జూబ్లీ బస్‌స్టేషన్‌ ట్రాఫిక్‌ సిగ్నల్స్‌ వద్ద మగవాళ్లే ట్రాన్స్‌జెండర్లుగా వేషం వేసుకొని వసూళ్లు చేపడుతున్నట్లు పోలీసులు గుర్తించారు. వీరంతా ఇతర రాష్ట్రాల నుంచి వచ్చి ముఠాగా ఏర్పడినట్లు పోలీసులు చెప్పారు.

19/08/2023 14:07(IST)

అక్రమంగా ఇసుక తవ్వకాలు జరుపుతున్నారంటూ గ్రామస్థుల ధర్నా

చిత్తూరు: అక్రమంగా ఇసుక తవ్వకాలు జరుపుతున్నారంటూ నెల్లూరు మండలం వేల్కూరు ఇసుక రీచ్‌ వద్ద గ్రామస్థులు ధర్నా చేశారు. తప్పుడు పత్రాలతో ఇసుక తరలిస్తున్నారని వారు ఆరోపించారు. ఇందుకు సంబంధించి పలు రికార్డులను గ్రామస్థులు స్వాధీనం చేసుకున్నారు.

19/08/2023 14:01(IST)

గాంధీ భవన్‌లో కాంగ్రెస్‌ బీసీ ఆశావహుల సమావేశం

హైదరాబాద్‌: గాంధీ భవన్‌లో కాంగ్రెస్‌ బీసీ ఆశావహులు సమావేశమయ్యారు. కార్యక్రమానికి ఓబీసీ రాష్ట్ర ఛైర్మన్‌ శ్రీకాంత్‌గౌడ్‌, కత్తి వెంకటస్వామి, చెరకు సుధాకర్‌, పొన్నం ప్రభాకర్‌ తదితరులు హాజరయ్యారు. బీసీలకు ఎన్ని సీట్లు కేటాయిస్తారో స్పష్టం చేయాలని నేతలు కోరుతున్నారు. బీసీల సీట్లలో బీసీలు మాత్రమే దరఖాస్తు చేసుకునేలా చూడాలని డిమాండ్‌ చేశారు. ఉదయ్‌పూర్ డిక్లరేషన్‌ అమలు చేయాలని కోరారు.

19/08/2023 13:55(IST)

మాచారెడ్డిలో కాంగ్రెస్‌ కార్యకర్తలపై భారాస కార్యకర్తల దాడి

కామారెడ్డి: మాచారెడ్డిలో కాంగ్రెస్‌ కార్యకర్తలపై భారాస కార్యకర్తలు దాడి చేశారు. షబ్బీర్‌ అలీ విజయం ఖాయమంటూ వాట్సాప్‌లో కాంగ్రెస్‌ కార్యకర్త మెసేజ్‌ చేశాడు. ఆ మెసేజ్‌ పెట్టిన కార్యకర్తపై శుక్రవారం రాత్రి భారాస కార్యకర్తలు దాడి చేశారు. కరెంటు తీసి ఇళ్లపై దాడి చేశారని కాంగ్రెస్‌ కార్యకర్తలు ఆరోపిస్తున్నారు. దాడి చేసిన భారాస కార్యకర్తలపై మాచారెడ్డి పోలీసు స్టేషన్‌లో ఫిర్యాదు చేశారు. కాంగ్రెస్‌ కార్యకర్తలపై దాడిని ఖండిస్తూ ఎస్పీకి షబ్బీర్‌ అలీ ఫిర్యాదు చేశారు. మాచారెడ్డిలో గాయపడ్డ కార్యకర్తలను షబ్బీర్‌ అలీ పరామర్శించారు.

19/08/2023 13:45(IST)

పోలీసులు మాతో రాజీ ప్రయత్నాలు చేశారు: శిరీష

తూర్పుగోదావరి: పోలీసులు తమతో రాజీ ప్రయత్నాలు చేశారని పోలీసుల చేతిలో చిత్రహింసలకు గురైన వెంకటప్రసాద్‌ భార్య శిరీష తెలిపారు. రాజీకి వచ్చేందుకు ఎంత డబ్బు కావాలో చెప్పమన్నారని ఆరోపించారు. తన భర్తను చిత్రహింసలకు గురిచేసిన వారిపై చర్యలు తీసుకోవాలని ఆమె డిమాండ్‌ చేశారు.

19/08/2023 13:38(IST)

బెగ్గింగ్‌ రాకెట్‌ వివరాలు వెల్లడించిన డీసీపీ

హైదరాబాద్‌: బెగ్గింగ్‌ రాకెట్‌ గురించి వెస్ట్‌జోన్‌ డీసీపీ జోయెల్‌ డేవిస్‌ వివరాలు వెల్లడించారు. పలు ఎన్జీవోలతో కలిసి ఈ నెల 15వ తేదీన హైదరాబాద్‌లోని పలు ప్రాంతాల్లో దాడులు చేసినట్లు తెలిపారు. కర్ణాటక గుల్బర్గా నుంచి ఒక 20 కుటుంబాలు ఇక్కడికి వచ్చి నగరంలోని పలు ప్రాంతాల్లో ఉంటున్నాయని చెప్పారు. 20 కుటుంబాలకు సంబంధించిన 70 మంది ఉన్నారని.. ప్రతి సోమవారం పారడైజ్ దగ్గర ఒక ప్రాంతంలో కలుసుకొని ప్రాంతాలను పంచుకొని అక్కడ బెగ్గింగ్ చేస్తున్నారని వివరించారు. రద్దీ సమయమైన సాయంత్రం సమయంలో బెగ్గింగ్ చేస్తున్నారని తెలిపారు. సుమారు రూ.6వేలు ఆర్గనైజర్‌కు ఇస్తారని వివరించారు. యాచన చేసే వారికి ఆర్గనైజర్‌ రోజుకు రూ.200 ఇస్తారని వివరించారు.

19/08/2023 13:28(IST)

హకీంపేటలోని తెలంగాణ స్పోర్ట్స్ స్కూల్ విద్యార్థుల ఆందోళన

శామీర్‌పేట్‌: హకీంపేట క్రీడా పాఠశాలలో ఓఎస్డీ హరికృష్ణపై లైంగిక వేధింపుల ఆరోపణలపై వాస్తవాలు బయటపెట్టాలని డిమాండ్‌ చేస్తూ ఆ పాఠశాలకు చెందిన విద్యార్థులు తరగతులు బహిష్కరించారు. పాఠశాల ప్రధాన గేటు వద్ద బైఠాయించి నిరసన వ్యక్తం చేశారు. పాఠశాలకు చెందిన సుమారు 300కు పైగా విద్యార్థులంతా పాఠశాల నుంచి ప్రధాన గేటు వరకు మాకు న్యాయం చేయాలంటూ నినాదాలు చేశారు. విద్యార్థులు ఆందోళన చేస్తున్నారన్న సమాచారంతో శామీర్‌పేట ఠాణా ఇన్‌స్పెక్టర్ ఘటనాస్థలికి చేరుకుని విద్యార్థులు బయటకు వెళ్లకుండా వారిని లోపలికి పంపించారు. అనంతరం విద్యార్థులు లోపలికి వెళ్లకుండా ప్రధాన గేటు వద్దనే బైఠాయించారు. లైంగిక వేధింపుల ఆరోపణల వాస్తవాలు తేల్చాలని ‘మా సారు.. మాకు కావాలంటూ..’ వారు నినాదాలు చేశారు.

19/08/2023 13:24(IST)

తాగునీరు అడిగితే మూత్రం తాగమన్నారు: వెంకటప్రసాద్‌

తూర్పు గోదావరి: దళిత యువకుడు వడ్డె వెంకటప్రసాద్‌ ఆసుపత్రి నుంచి డిశ్చార్జి అయ్యాడు. ఈ నెల 17న వెంకటప్రసాద్‌ను కడియం పోలీసులు తీసుకెళ్లి చిత్రహింసలకు గురి చేశారు. మహిళ అదృశ్యం కేసులో వెంకటప్రసాద్‌ను తీవ్రంగా కొట్టారు. ఈక్రమంలో అపస్మారక స్థితికి చేరకున్న బాధితుడిని హడావిడిగా ఆసుపత్రికి తరలించారు. డిశ్చార్జి అయిన అనంతరం వెంకటప్రసాద్‌ మాట్లాడుతూ.. కడియం ఎస్సై తీవ్రంగా కొట్టారని, దుర్భాషలాడారని తెలిపారు. తాగునీరు అడిగితే మూత్రం తాగమన్నారని చెప్పారు. చావుబతుకుల్లో ఉన్న తనను ఆసుపత్రికి తరలించారని, స్టేట్‌మెంట్‌పై సంతకం తీసుకున్నారని చెప్పారు.

19/08/2023 13:16(IST)

రానున్న 3 రోజుల్లో తెలంగాణలో వర్షాలు

హైదరాబాద్‌: శనివారం తెలంగాణ రాష్ట్రంలో చాలాచోట్ల తేలికపాటి నుంచి మోస్తరు వర్షాలు కురిసే అవకాశముందని హైదరాబాద్‌ వాతావరణ కేంద్రం తెలిపింది. ఆది, సోమ వారాల్లో కొన్నిచోట్ల వర్షం కురిసే అవకాశం ఉందని ప్రకటించింది. రాష్ట్రంలో శనివారం అక్కడక్కడ కొన్ని జిల్లాల్లో భారీ వర్షాలు కురిసే అవకాశం ఉందని చెప్పింది. శని, ఆది, సోమవారాల్లో అక్కడక్కడ ఉరుములు, మెరుపులతో కూడిన వర్షాలు వచ్చే అవకాశం ఉందని తెలిపింది.

19/08/2023 13:11(IST)

కర్మాన్‌ఘాట్ వద్ద మహిళల ఆందోళన.. 2 కిలోమీటర్ల ట్రాఫిక్‌ జామ్‌

హైదరాబాద్‌: కర్మాన్‌ఘాట్ వద్ద మహిళా సంఘాలు ఆందోళన చేపట్టాయి. పోలీసుల చేతిలో గాయపడ్డ మహిళకు న్యాయం చేయాలని డిమాండ్‌ చేశారు. దీంతో కర్మాన్‌ఘాట్‌ నుంచి బైరమల్‌గూడ వరకు 2 కిలోమీటర్ల మేర ట్రాఫిక్‌ జామ్‌ ఏర్పడింది.

19/08/2023 13:07(IST)

ముగిసిన సర్పంచి, వార్డు సభ్యుల ఎన్నికల పోలింగ్‌

ఏపీలో సర్పంచి, వార్డు సభ్యుల ఉప ఎన్నికల పోలింగ్ ముగిసింది. దీంతో ప్రస్తుతం క్యూలో నిల్చున్న వారికి మాత్రమే ఓటు వేసే అవకాశం కల్పించారు. మధ్యాహ్నం 2 గంటల నుంచి ఓట్ల లెక్కింపు జరగనుంది.

19/08/2023 13:03(IST)

రాహుల్‌, మల్లికార్జున ఖర్గే కులగణన చేపడతామని హామీ ఇచ్చారు: వీహెచ్‌

హైదరాబాద్‌: గాంధీ భవన్‌లో నిర్వహించిన మీడియా సమావేశంలో కాంగ్రెస్‌ సీనియర్‌ నేత వి.హనుమంతరావు మాట్లాడారు. రాహుల్‌ గాంధీ, మల్లికార్జున ఖర్గే కులగణన చేపడతామని హామీ ఇచ్చారని చెప్పారు. దీనిపై రెండు సార్లు ప్రధాని మోదీని కలిసినా ప్రయోజనం లేకపోయిందని చెప్పారు. సెప్టెంబర్‌ 6న బీసీ గర్జన సభ నిర్వహించాలని భావిస్తున్నట్లు తెలిపారు. కార్యక్రమానికి కర్ణాటక సీఎం సిద్ధరామయ్య ముఖ్య అతిథిగా హాజరవుతారని చెప్పారు. రేవంత్‌రెడ్డికి భద్రత కల్పించాలని డిమాండ్‌ చేశారు.

19/08/2023 12:59(IST)

పల్లాకు వ్యతిరేకంగా ఎమ్మెల్యే ముత్తిరెడ్డి వర్గీయుల ఆందోళన

జనగామలో పల్లా రాజేశ్వర్‌రెడ్డికి వ్యతిరేకంగా ఎమ్మెల్యే ముత్తిరెడ్డి యాదగిరిరెడ్డి వర్గీయులు ఆందోళన చేశారు. పల్లా గో బ్యాక్‌ అంటూ నినాదాలు చేశారు. జనగామ చౌరస్తాలో పల్లా రాజేశ్వర్‌రెడ్డికి వ్యతిరేకంగా నిరసన వ్యక్తం చేస్తూ బైఠాయించారు.

19/08/2023 12:42(IST)

మైనార్టీలకు రూ.లక్ష ఆర్థిక సాయం చెక్కుల పంపిణీ

హైదరాబాద్‌: ఎల్బీ స్టేడియంలో మైనార్టీలకు రూ.లక్ష ఆర్థిక సాయం అందజేశారు. మైనార్టీ ఫైనాన్స్‌ కార్పొరేషన్‌ ద్వారా ఈ కార్యక్రమం చేపట్టారు. హోం మంత్రి మహమూద్‌ అలీ లబ్ధిదారులకు చెక్కులను పంపిణీ చేశారు.

19/08/2023 12:38(IST)

ప్రొద్దుటూరులో వైకాపా నాయకుల వాగ్వాదం

ప్రొద్దుటూరు నేరవార్తలు: వైఎస్‌ఆర్‌ కడప జిల్లా ప్రొద్దుటూరు మండలం కొత్తపల్లి పంచాయతీ పరిధిలో అధికార పార్టీకి చెందిన ఇరువర్గాల మధ్య వాగ్వాదం జరిగింది. పోలింగ్ కేంద్రం సమీపంలో వైకాపా ఎమ్మెల్యే రాచమల్లు శివ ప్రసాద్ రెడ్డి వర్గీయులు ఉన్నారన్న సమాచారంతో అదే పార్టీకి చెందిన కొత్తపల్లి సర్పంచి కొనిరెడ్డి శివ చంద్రా రెడ్డి వర్గీయులు అక్కడికి వెళ్లారు. దీంతో ఎమ్మెల్యే రాచమల్లు శివ ప్రసాద్ రెడ్డి వర్గీయులు, సర్పంచి శివ చంద్రా రెడ్డి వర్గీయుల మధ్య వాగ్వాదం చోటు చేసుకుంది. విషయం తెలుసుకున్న పోలీసులు వెంటనే అక్కడికి చేరుకుని ఇరువర్గాలను చెదరగొట్టారు. కొత్తపల్లె 13వ వార్డుకు వర్గ విభేదాలతో అధికార పార్టీకి చెందిన అభ్యర్థులు వేర్వేరుగా పోటీ చేస్తున్నారు. ఎమ్మెల్యే రాచమల్లు శివ ప్రసాద్ రెడ్డి మద్దతుదారు బ్రహ్మానందరెడ్డి, సర్పంచి శివ చంద్రా రెడ్డి తనయుడు హర్షవర్ధన్ రెడ్డిల మధ్య పోటీ జరుగుతోంది.

19/08/2023 12:36(IST)

గన్నవరం ఎమ్మెల్యే కాన్వాయ్‌కు ప్రమాదం

తెలంగాణలోని సూర్యాపేట జిల్లా చివ్వెంల మండలం కాశీంపేట వద్ద గన్నవరం ఎమ్మెల్యే వల్లభనేని వంశీ కాన్వాయ్‌కు ప్రమాదం జరిగింది. కాన్వాయ్‌లోని చివరి రెండు వాహనాలు ఢీకొన్నాయి. ప్రమాదంలో ఎవరికీ ఎటువంటి గాయాలు కాలేదు.

19/08/2023 12:33(IST)

బస్సులో 12 తులాల బంగారు ఆభరణాలు మాయం

సికింద్రాబాద్‌: మారేడుపల్లి పోలీసు స్టేషన్‌లో బంగారం అపహరణ కేసు నమోదైంది. బస్సులో ప్రయాణిస్తున్న మహిళకు చెందిన 12 తులాల బంగారు ఆభరణాలు చోరీకి గురయ్యాయి. హిమబిందు అనే మహిళ ఫిర్యాదు మేరకు చైతన్యపురి పోలీసుస్టేషన్‌లో జీరో ఎఫ్‌ఐఆర్ నమోదు చేసి మారేడుపల్లికి బదిలీ చేశారు. హిమబిందు తన బంధువుల ఇంట్లో శుభకార్యానికి జగిత్యాల వెళ్లింది. ఇంటికి వచ్చి బ్యాగ్‌ పరిశీలించగా బంగారం కనిపించకపోవడంతో ఫిర్యాదు చేసింది.

19/08/2023 12:25(IST)

ప్లాస్టిక్‌ నియంత్రణపై తిరుమలకు వచ్చే భక్తులకు అవగాహన కల్పిస్తున్నాం: పెద్దిరెడ్డి

తిరుపతి: 120 మైక్రాన్ల కంటే తక్కువైన ప్లాస్టిక్ వస్తువులు తిరుమలకు తీసుకురావద్దని మంత్రి పెద్దిరెడ్డి రామచంద్రారెడ్డి తెలిపారు. తిరుపతిలో పీసీబీ కార్యాలయ భవనాన్ని ఆయన ప్రారంభించారు. రూ.16.93 కోట్లతో గ్రీన్‌ బిల్డింగ్‌ కాన్సెప్ట్‌తో 5 అంతస్తుల భవన నిర్మాణం చేపట్టారు. ఈ సందర్భంగా ఆయన మాట్లాడుతూ.. గ్రీన్‌, రెడ్, ఆరంజ్‌ కేటగిరీలో పరిశ్రమలు వస్తున్నాయని తెలిపారు. ఆక్వా పరిశ్రమలో కాలుష్య నియంత్రణకు చర్యలు తీసుకుంటున్నట్లు చెప్పారు. ప్లాస్టిక్‌ నియంత్రణపై తిరుమలకు వచ్చే భక్తులకు అవగాహన కల్పిస్తున్నట్లు చెప్పారు. తిరుపతిలో పీసీబీ జోనల్‌ కార్యాలయం ఏర్పాటు చేస్తామని తెలిపారు.

19/08/2023 12:13(IST)

బోథ్‌లో పొంగిపొర్లుతున్న వాగులు

ఆదిలాబాద్‌: బోథ్‌ మండలంలో శుక్రవారం రాత్రి నుంచి ఎడతెరిపి లేని వర్షం కురుస్తోంది. దీంతో బోథ్‌ కండ్రే వాగు, నక్కలవాడ, కోట వాగులు పొంగిపొర్లుతున్నాయి. దీంతో వాహనాల రాకపోకలకు అంతరాయం ఏర్పడింది.

19/08/2023 12:10(IST)

వేలేరులో కడియం శ్రీహరికి వ్యతిరేకంగా నినాదాలు

హనుమకొండ: వేలేరులో కడియం శ్రీహరికి వ్యతిరేకంగా ఎమ్మెల్యే రాజయ్య వర్గీయులు నినాదాలు చేశారు. స్టేషన్ ఘన్‌పూర్‌ ఎమ్మెల్యే టికెట్‌ కడియంకు ఇవ్వొద్దని ఆందోళన చేశారు. నిరసనలో వేలేరు ఎంపీపీ, జడ్పీటీసీ, మండల నాయకులు పాల్గొన్నారు.

19/08/2023 12:06(IST)

కుట్రలో భాగంగానే దేవినేని అవినాష్ ఇంటికి జగన్‌: బుద్దా వెంకన్న

కుట్రలో భాగంగానే శుక్రవారం దేవినేని అవినాష్ ఇంటికి ముఖ్యమంత్రి జగన్‌మోహన్‌ రెడ్డి వెళ్లారని తెదేపా సీనియర్‌ నేత బుద్దా వెంకన్న ఆరోపించారు. లోకేశ్‌ పాదయాత్రను, గన్నవరంలో బహిరంగసభను అడ్డుకునేందుకు కుట్ర జరుగుతోందని ఆరోపించారు. ఇందులో భాగంగానే ఇరువురి భేటీ జరిగిందని మండిపడ్డారు. ఎప్పుడో ప్రారంభించిన హోటల్‌ను మరోసారి సీఎం ప్రారంభించడమేంటని ప్రశ్నించారు. ఎవరైనా లోకేశ్‌ పాదయాత్రను అడ్డుకోవాలని చూసినా, ఇబ్బందులు కలిగించాలని చూసినా దీటైన జవాబు ఇస్తామని హెచ్చరించారు.

19/08/2023 12:00(IST)

ఉత్తమ పోలీసు స్టేషన్‌గా రాజేంద్రనగర్‌ పీఎస్‌

హైదరాబాద్‌: రాజేంద్రనగర్‌ పీఎస్‌ ఉత్తమ పోలీసు స్టేషన్‌గా ఎంపికైంది. ఈ నేపథ్యంలో హోం శాఖ ప్రతినిధుల బృందం పోలీసు స్టేషన్‌ పరిశీలనకు వచ్చింది. మేడిపల్లి, మీర్‌చౌక్‌, రాజేంద్రనగర్‌ పోలీసు స్టేషన్‌లను ఈ బృందం పరిశీలించనుంది. కేసుల ఛేదనలో రాజేంద్రనగర్‌ పోలీసుస్టేషన్‌ ముందు వరుసలో ఉంది.

19/08/2023 11:51(IST)

అమెరికాలో ఫార్మ్‌ ప్రోగ్రెస్‌ షోకు మంత్రి నిరంజన్‌రెడ్డికి ఆహ్వానం

హైదరాబాద్‌: అమెరికాలోని ప్రతిష్ఠాత్మక ఫార్మ్‌ ప్రోగ్రెస్‌ షోకు మంత్రి నిరంజన్‌రెడ్డిని ఆహ్వానించారు. ఈ నెల 29 నుంచి 31 వరకు మూడు రోజుల పాటు ఈ షోను నిర్వహించనున్నారు. అమెరికాలోని ఇల్లినాయిస్‌ డెకాటూర్‌లో వ్యవసాయ ప్రగతి ప్రదర్శన జరగనుంది. అధునాతన వ్యవసాయ ఉత్పత్తులు, సాంకేతికత, రసాయనాలు, పరికరాలు, విత్తన సాంకేతికతల గురించి ఇందులో వివరించనున్నారు. ఈ సందర్భంగా నిరంజన్‌రెడ్డి మాట్లాడుతూ.. భారాస ప్రభుత్వంతో వ్యవసాయానికే తొలి ప్రాధాన్యం అని తెలిపారు. కేసీఆర్‌ అనుమతితో అమెరికా వెళ్లేందుకు సిద్ధమయ్యారు.

19/08/2023 11:39(IST)

విజయవాడలో లోకేశ్‌కు ఘనంగా స్వాగత ఏర్పాట్లు

విజయవాడ: తెదేపా జాతీయ ప్రధాన కార్యదర్శి నారా లోకేశ్‌ యువగళం పాదయాత్ర శనివారం విజయవాడలోకి ప్రవేశించనుంది. యాత్ర ప్రకాశం బ్యారేజ్‌ మీదుగా జిల్లాలోకి రానుంది. దీంతో బ్యారేజ్‌ను తెదేపా శ్రేణులు స్వాగత ఫ్లెక్సీలతో నింపాయి. కేశినేని చిన్ని భారీ ఫ్లెక్సీలు, స్వాగత ద్వారాలు ఏర్పాటు చేశారు. లోకేశ్‌కు స్వాగత ఏర్పాట్లను కేశినేని చిన్ని, బుద్ధా వెంకన్న పరిశీలించారు.

19/08/2023 11:33(IST)

కేసీఆర్‌ను హ్యాట్రిక్‌ సీఎంగా కూర్చోబెట్టాలి: కేటీఆర్‌

హైదరాబాద్‌: తెలంగాణ వచ్చాక హైదరాబాద్‌లో ఇది 36వ ఫ్లైఓవర్‌ అని మంత్రి కేటీఆర్‌ అన్నారు. స్టీల్‌ బ్రిడ్జి ప్రారంభోత్సవంలో ఆయన ప్రసంగించారు. ఇందిరాపార్క్‌ను అద్భుతంగా తీర్చిదిద్దే బాధ్యత తమదని చెప్పారు. నాయిని నర్సింహారెడ్డి రాష్ట్ర అభివృద్ధిలో కీలక పాత్ర పోషించారని గుర్తుచేశారు. స్టీల్‌ బ్రిడ్జికి నాయిని నర్సింహారెడ్డి పేరు పెట్టాలని సీఎం కేసీఆర్‌ ఆదేశించారని చెప్పారు. కేసీఆర్‌ను హ్యాట్రిక్‌ సీఎంగా కూర్చోబెట్టాలని కోరారు.

19/08/2023 11:28(IST)

చలివెందులలో పోలింగ్‌ కేంద్రం వద్ద వైకాపా మద్దతుదారుల డబ్బు పంపిణీ

సత్యసాయి: హిందూపురం మండలం చలివెందులలో పోలింగ్‌ కేంద్రం వద్ద వైకాపా మద్దతుదారులు ఓటర్లకు డబ్బులు పంచారు. తెదేపా నేతలు వారి డబ్బు పంపిణీని అడ్డుకోవడంతో.. ఇరువర్గాల మధ్య వాగ్వాదం చోటు చేసుకుంది. బహిరంగంగా డబ్బు పంచుతున్నా పోలీసులు పట్టించుకోవడం లేదని తెదేపా నేతలు ఆగ్రహం వ్యక్తం చేశారు.

19/08/2023 11:22(IST)

ఓటమి భయంతోనే వైకాపా అక్రమాలు: ధూళిపాళ్ల నరేంద్ర

ఓటమి భయంతో పంచాయతీ ఉప ఎన్నికల్లో వైకాపా అక్రమాలకు పాల్పడుతోందని తెదేపా సీనియర్‌ నేత ధూళిపాళ్ల నరేంద్ర ఆరోపించారు. దెందులూరు నియోజకవర్గం వీరమ్మకుంటలో తెదేపా కార్యకర్తలపై వైకాపా రౌడీల దాడి దుర్మార్గమని ఆయన అన్నారు. ఎమ్మెల్యే అబ్బయ్య చౌదరి అండ చూసుకునే వైకాపా కార్యకర్తలు దాడులకు తెగబడ్డారని దుయ్యబట్టారు. అధికార పార్టీ అక్రమాలు, దాడులు, దౌర్జన్యాలకు పోలీసులు వత్తాసు పలకడం దుర్మార్గమన్నారు. అధికార పార్టీకి ఒక రూల్‌, ప్రతిపక్షానికి ఒక రూల్‌ పెట్టారా అంటూ మండిపడ్డారు. అసెంబ్లీ ఎన్నికల తర్వాత ఎమ్మెల్యే అబ్బయ్య చౌదరి దెందులూరు నుంచి పారిపోవడం ఖాయమని అన్నారు. వీరమ్మకుంటలో చోటు చేసుకున్న ఘటనపై ఎన్నికల అధికారులు స్పందించాలని, దాడులకు తెగబడిన వారిపై కేసులు నమోదు చేయాలని డిమాండ్‌ చేశారు.

19/08/2023 11:13(IST)

హైదరాబాద్‌లో స్టీల్‌ బ్రిడ్జి ప్రారంభం

హైదరాబాద్‌: వీఎస్టీ-ఇందిరా పార్క్‌ స్టీల్‌ బ్రిడ్జిని మంత్రి కేటీఆర్‌ ప్రారంభించారు. రాష్ట్రంలోనే తొలి సారిగా మెట్రో బ్రిడ్జిపై నుంచి స్టీల్‌ బ్రిడ్జి ఏర్పాటు చేశారు. ఈ బ్రిడ్జికి మాజీ మంత్రి నాయిని నర్సింహారెడ్డి పేరు పెట్టారు.

19/08/2023 11:09(IST)

రేవంత్‌రెడ్డి సమక్షంలో కాంగ్రెస్‌లో చేరికలు

హైదరాబాద్‌: టీపీసీసీ చీఫ్‌ రేవంత్‌రెడ్డి సమక్షంలో నాగర్‌కర్నూల్‌ జిల్లా బిజినేపల్లి భారాస నేతలు కాంగ్రెస్‌లో చేరారు. సర్పంచులు వెంకటస్వామి, అమృత్‌రెడ్డి, తిరుపతయ్య, ఎంపీటీసీ అంజి, మాజీ సర్పంచులు అలియా నాయక్‌, రాంచందర్‌, మాజీ ఎంపీపీ రాములు, వార్డు సభ్యులు, కార్యకర్తలు కాంగ్రెస్‌లో చేరారు. జూబ్లీహిల్స్‌లోని నివాసంలో రేవంత్‌రెడ్డి వారికి కండువా కప్పి పార్టీలోకి ఆహ్వానించారు.

19/08/2023 11:03(IST)

గడ్డెన్న వాగు ప్రాజెక్టులో పెరుగుతున్న నీటిమట్టం

నిర్మల్ జిల్లా భైంసాలోని గడ్డెన్న వాగు ప్రాజెక్టులో నీటిమట్టం పెరుగుతోంది. ప్రాజెక్టులోకి ప్రస్తుతం 3,200 క్యూసెక్కుల వరద ప్రవాహం వచ్చి చేరుతోంది. దీంతో అధికారులు ప్రాజెక్టు ఒక గేటు ఎత్తి 3,600 క్యూసెక్కుల నీటిని దిగువన ఉన్న సుద్ద వాగులోకి విడుదల చేస్తున్నారు.

19/08/2023 10:57(IST)

దుర్గం చెరువు మెట్రో స్టేషన్‌ వద్ద గుర్తుతెలియని వ్యక్తి మృతి

హైదరాబాద్‌: దుర్గం చెరువు మెట్రో స్టేషన్‌ వద్ద గుర్తుతెలియని వ్యక్తి మృతి చెందాడు. మృతుడు రోజూ మద్యం తాగి మెట్రో స్టేషన్‌ వద్ద నిద్రించేవాడని స్థానికులు తెలిపారు. మాదాపూర్‌ పోలీసులు కేసు నమోదు చేసి దర్యాప్తు చేస్తున్నారు.

19/08/2023 10:54(IST)

భార్య గొంతు కోసి హతమార్చిన భర్త

పశ్చిమ గోదావరి: ఆకివీడులో భార్యను గొంతుకోసి భర్త హత్య చేశాడు. భార్య సంధ్యారాణిని హత్య చేసి రాంబాబు పోలీసులకు లొంగిపోయాడు. వారు రెండేళ్ల క్రితం ప్రేమ వివాహం చేసుకున్నట్లు పోలీసులు తెలిపారు. కుటుంబ కలహాల వల్లే హత్య చేసినట్లు చెప్పారు.

19/08/2023 10:53(IST)

కేంద్ర ఎన్నికల సంఘానికి ఎమ్మెల్యే ఏలూరి సాంబశివరావు మరో లేఖ

ఓట్ల తొలగింపులో వైకాపా అక్రమాలను పేర్కొంటూ కేంద్ర ఎన్నికల సంఘానికి పర్చూరు ఎమ్మెల్యే ఏలూరి సాంబశివరావు మరో లేఖ రాశారు. తెదేపా సానుభూతిపరుల ఓట్లు తొలగిస్తున్నారని ఫిర్యాదు చేశారు. పర్చూరు నియోజకవర్గంలో 7 వేల ఓట్లు తొలగించేందుకు ప్రయత్నిస్తున్నారని తెలిపారు. అధికార పార్టీ నేతలు అక్రమాలకు పాల్పడుతున్నారని ఆరోపించారు. ఓట్ల తొలగింపులో అధికారుల ప్రమేయం కూడా ఉందని చెప్పారు. ఆన్‌లైన్‌లో వచ్చే దరఖాస్తులపై విచారణ జరపాలని కోరారు.

19/08/2023 10:42(IST)

జలజీవన్ మిషన్ నిధుల వినియోగంలో నరసాపురం ప్రథమ స్థానం: ముదునూరి ప్రసాదరాజు

జలజీవన్ మిషన్ నిధుల వినియోగంలో నరసాపురం నియోజకవర్గం రాష్ట్రంలోనే ప్రథమ స్థానంలో ఉందని రాష్ట్ర ప్రభుత్వ చీఫ్ విప్ ముదునూరి ప్రసాదరాజు అన్నారు. పశ్చిమ గోదావరి జిల్లా నరసాపురం మండలం లక్ష్మణేశ్వరం గ్రామంలో సీపీడబ్ల్యూఎస్ పథకం వద్ద రూ.2.7 కోట్లతో నిర్మించనున్న ‘రాపిడ్ ఫిల్టర్ యూనిట్’ నిర్మాణానికి ఆయన శంకుస్థాపన చేస్తారు. ఈ సందర్భంగా ఏర్పాటు చేసిన సభలో మాట్లాడుతూ... సీపీడబ్ల్యూఎస్ ద్వారా లక్ష్మణేశ్వరం గ్రామం నుంచి తొమ్మిది గ్రామాలకు తాగునీటి సరఫరా జరుగుతుందన్నారు. ప్రతి ఇంటికి కుళాయి కనెక్షన్ ఇచ్చి స్వచ్ఛమైన తాగునీరు అందించాలన్నది ప్రభుత్వ లక్ష్యం అన్నారు. ఈ నాలుగేళ్లలో నియోజకవర్గంలోని 45 గ్రామ పంచాయతీల్లో సుమారు రూ.67 కోట్ల నిధులు వెచ్చించి కొత్త పైప్‌లైన్‌ నిర్మాణంతో పాటు ప్రతి ఇంటికి కుళాయి కనెక్షన్ పనులు చేపట్టినట్లు వివరించారు.

19/08/2023 10:25(IST)

పంచాయతీ, వార్డు సభ్యుడిని గెలిపించుకోలేని దుస్థితిలో జగన్: నక్కా ఆనంద్‌బాబు

ఒంగోలు: తెదేపా నేత, కొండపి ఎమ్మెల్యే డోలా బాలవీరాంజనేయస్వామిని గృహ నిర్భందం చేయడం దుర్మార్గమని మాజీ మంత్రి నక్కా ఆనంద్‌బాబు అన్నారు. సీఎం జగన్ మోహన్ రెడ్డి తీరు ప్రజాస్వామ్య వ్యవస్థకు గొడ్డలివేటుగా మారిందని ఆయన మండిపడ్డారు. పంచాయతీ, వార్డు సభ్యుడిని కూడా గెలిపించుకోలేని దుస్థితిలో జగన్ ఉన్నాడంటూ దుయ్యబట్టారు. ఎన్నికల కోడ్ ఉల్లంఘిస్తున్న వైకాపా నేతలను వదిలిపెట్టి తెదేపా నేతలను ఏవిధంగా అరెస్టు చేస్తారని ప్రశ్నించారు. స్థానిక ఎమ్మెల్యేకు స్థానికంగా తిరిగే హక్కు లేదా, దళిత ఎమ్మెల్యేకు ప్రభుత్వం ఇచ్చే గౌరవం ఇదేనా అంటూ మండిపడ్డారు.

19/08/2023 10:16(IST)

ఓటు హక్కుపై అవగాహన.. జిల్లా కేంద్రాల్లో 5కే రన్‌

ఓటు హక్కు వినియోగం, ఆవశ్యకతపై తెలంగాణ రాష్ట్ర వ్యాప్తంగా అవగాహన కార్యక్రమం నిర్వహించారు. ‘నేను కచ్చితంగా ఓటు వేస్తాను’ అనే నినాదంతో జిల్లా కేంద్రాల్లో 5కే రన్‌ నిర్వహించారు. హైదరాబాద్‌లోని రాజేంద్రనగర్‌లో జీహెచ్‌ఎంసీ అధికారుల ఆధ్వర్యంలో 5కే రన్‌ నిర్వహించారు. కొత్తగూడెంలో పోస్టాఫీస్‌ నుంచి సెంట్రల్‌ పార్క్‌ వరకు రన్‌ నిర్వహించారు. యాదాద్రి భువనగిరిలో కలెక్టర్‌ వినయ్‌ కృష్ణ ఆధ్వర్యంలో 5కే రన్‌ ఏర్పాటు చేశారు. మహబూబాబాద్‌లో నిర్వహించిన 5కే రన్‌లో కలెక్టర్‌ శశాంక, ఎస్పీ శరత్‌చంద్ర పాల్గొన్నారు.

19/08/2023 10:06(IST)

శ్రీరామ్‌సాగర్‌ ప్రాజెక్టులోకి 30 వేల క్యూసెక్కుల ప్రవాహం

నిజామాబాద్‌: రాత్రి నుంచి కురుస్తున్న వర్షాలతో నదుల్లో ప్రవాహం పెరిగింది. గోదావరి నది ప్రవాహంతో శ్రీరామ్‌సాగర్‌ ప్రాజెక్టులోకి 30 వేల క్యూసెక్కుల ప్రవాహం వచ్చి చేరుతోంది. శ్రీరామ్‌సాగర్‌ పూర్తిస్థాయి నీటి మట్టం 1091 అడుగులు కాగా.. ప్రస్తుత నీటిమట్టం 1090 అడుగులుగా నమోదైంది. శ్రీరామ్‌సాగర్‌ ప్రాజెక్టు నీటి నిల్వ సామర్థ్యం 90 టీఎంసీలు కాగా.. ప్రస్తుత నీటి నిల్వ సామర్థ్యం 85.3 టీఎంసీలుగా నమోదైంది.

19/08/2023 09:54(IST)

విజయనగరం జిల్లాలోని 24 మండలాల్లో పంచాయతీ ఎన్నికలు

విజయనగరం జిల్లాలో శనివారం 24 మండలాల్లోని 54 పంచాయతీల పరిధిలో 6 సర్పంచి, 54 వార్డు సభ్యులు స్థానాలకు ఉప ఎన్నిక ప్రారంభమైంది. ఉదయం 7.00 గంటలు నుంచి ఓటర్లు తమ ఓటు హక్కును వినియోగించుకుంటున్నారు. మధ్యాహ్నం ఒంటి గంట వరకు పోలింగ్ జరుగనుంది. జిల్లా కలెక్టర్ ఎస్.నాగలక్ష్మి, జేసీ మయూర్ అశోక్ తదితరులు ఏర్పాట్లు పర్యవేక్షిస్తున్నారు.

19/08/2023 09:48(IST)

బెంగళూరులో ఉద్యాన్‌ ఎక్స్‌ప్రెస్‌లో మంటలు

బెంగళూరు: కేఎస్‌ఆర్‌ రైల్వేస్టేషన్‌లో ఉద్యాన్‌ ఎక్స్‌ప్రెస్‌లో మంటలు చెలరేగాయి. అగ్నిమాపక సిబ్బంది మంటలు ఆర్పుతున్నారు. ఈ ప్రమాదం నుంచి ప్రయాణికులు సురక్షితంగా బయటపడ్డారు.

19/08/2023 09:46(IST)

వనుదర్రు పంచాయతీ ఎన్నికల్లో రిగ్గింగ్‌

ఏలూరు: ముదినేపల్లి మండలం వనుదర్రు పంచాయతీ ఎన్నికల్లో అక్రమాలు చోటు చేసుకున్నాయి. వైకాపా ఎమ్మెల్యే ఆధ్వర్యంలో రిగ్గింగ్‌ జరుగుతోందని తెదేపా నేతలు ఆరోపిస్తున్నారు. పోలింగ్‌ బూత్‌ వద్ద ఎమ్మెల్యే దూలం నాగేశ్వరరావు కుమారుడు ఉన్నాడు.

19/08/2023 09:41(IST)

పాకాల సర్పంచి ఉపఎన్నికలో ఉద్రిక్తత

ప్రకాశం: సింగరాయకొండ మండలం పాకాల సర్పంచి ఉపఎన్నికలో ఉద్రిక్తత చోటు చేసుకుంది. ఏడుగురు తెదేపా కార్యకర్తలను పోలీసులు అదుపులోకి తీసుకున్నారు. కొండపి ఎమ్మెల్యే స్వామి ఇంటి వద్ద పోలీసు బందోబస్తు ఏర్పాటు చేశారు. వైకాపా ఇన్‌ఛార్జిని వదిలి తమను అడ్డుకుంటున్నారని ఎమ్మెల్యే స్వామి ఆరోపించారు.

19/08/2023 09:36(IST)

వీరమ్మగుంట ఎన్నికల్లో ఉద్రిక్తత

ఏలూరు: పెదపాడు మండలం వీరమ్మగుంట ఎన్నికల్లో ఉద్రిక్తత చోటు చేసుకుంది. పంచాయతీ ఎన్నికల్లో తెదేపా కార్యకర్తలపై వైకాపా కార్యకర్తలు దాడి చేశారు. వైకాపా ఎమ్మెల్యే అబ్యయ్య చౌదరి సమక్షంలో తెదేపా కార్యకర్తలపై దాడులు చేశారు. రెండు పార్టీల వారిని పోలీసులు చెదరగొట్టి భద్రత పెంచారు. వీరమ్మగుంటలోకి రాకుండా చింతమనేనిని పోలీసులు అడ్డుకున్నారు.

19/08/2023 09:27(IST)

డివైడర్ ఢీకొన్న కారు.. చెలరేగిన మంటలు

సత్యసాయి జిల్లా బనగానపల్లె మండలం మామిళ్లపల్లి వద్ద కారులో మంటలు చెలరేగాయి. టైరు పేలి కారు డివైడర్‌ను ఢీకొనడంతో మంటలు చెలరేగాయి. సాఫ్ట్‌వేర్‌ ఉద్యోగి నారాయణస్వామి త్రుటిలో ప్రమాదం నుంచి తప్పించుకున్నాడు. బెంగళూరు నుంచి అనంతపురం వస్తుండగా ప్రమాదం చోటు చేసుకుంది.

19/08/2023 08:08(IST)

శౌచాలయంలో బంధించి మహిళపై అత్యాచారం

హైదరాబాద్‌లోని హుమాయున్‌నగర్‌ పీఎస్‌ పరిధిలో దారుణం జరిగింది. చెవిటి, మూగ మహిళపై ఓ యువకుడు దారుణానికి ఒడిగట్టాడు. ఎవరూ లేని సమయంలో మహిళను శౌచాలయంలో బంధించి అత్యాచారానికి పాల్పడ్డాడు. ఆపై శౌచాలయంలోనే మహిళను ఉంచి గడియపెట్టి వెళ్లిపోయాడు.

19/08/2023 08:02(IST)

తరగని.. ‘తల్లి’ప్రేమ..

సృష్టిలో ఎన్ని ప్రాణులున్నా.. వాటన్నింటిలోనూ తల్లిప్రేమ, ఆప్యాయతలు ఒకటే. అక్కయ్యపాలెంలో ఓ చెట్టుపైన కాకి తన పిల్లలకు నోట్లో ఆహారం పెట్టి తల్లిప్రేమలోని గొప్పదనాన్ని చాటింది. విశాఖలో కనిపించిన ఈ దృశ్యాన్ని న్యూస్‌టుడే క్లిక్‌మనిపించింది.

19/08/2023 07:51(IST)

బస్టాండే వారికి పూలపాన్పు

గుప్పెడు మెతుకుల కోసం అలమటించే నిర్భాగ్యులెందరో ! ఆప్తులను వదిలి నగరబాట పట్టిన ఇలాంటి వారికి ట్రాఫిక్‌ డివైడర్లు, బస్టాండు, రైల్వే స్టేషన్‌ ఆవరణలే పూలపాన్పులు. గురువారం అర్ధరాత్రి ఒంటిగంట ప్రాంతంలో ఒంగోలు బస్టాండ్‌ ఆవరణలో నిద్రిస్తున్న శ్రమజీవులు.

19/08/2023 07:31(IST)

ఐకమత్యం చాటి.. ముప్పేట దాడి

కర్నూలు-నందికొట్కూరు రహదారిలో ఓ టర్కీ కోడి కాకి పిల్లను నోట కరుచుకుని చంపేందుకు ప్రయత్నిస్తుండగా కాకులన్నీ ఏకమయ్యాయి. టర్కీ కోడిని వెంబడించడంతో బెదిరిపోయి కాకి పిల్లను వదిలేసింది. బతుకుజీవుడా అంటూ కాకి పిల్ల తల్లి చెంతకు చేరిన దృశ్యాలను అటుగా వెళ్తున్నవారు ఆసక్తిగా తిలకించారు.

19/08/2023 07:31(IST)

కదలని బస్సు.. సాగని ప్రయాణం

రాష్ట్రంలో అభివృద్ధి మూలన పడింది. నిత్యం ఆదాయాన్నిచ్చే ఆర్టీసీ బస్సులను సైతం బాగు చేయించలేని పరిస్థితి నెలకొంది. కౌతాళం ఆర్టీసీ బస్టాండు వద్ద ఆదోనికి వెళ్లే బస్సు ఆగిపోయి ముందుకు కదలలేదు. దీంతో బస్సులో ఎక్కిన ప్రయాణికులు కిందకు దిగి బస్సును కొంతదూరం వరకు తోశారు.

19/08/2023 07:30(IST)

బతుకు ‘చిత్రం’!

ఫొటో.. ప్రకృతి అందాలను.. మనసులోని ఆనందాలను.. మనుషుల మధ్య బంధాలను సుందరంగా ఆవిష్కరించేది. తన మనసులో ఎంతటి వేదన రగిలినా.. తన గుండెలో ఎంత అలజడి రేగినా.. ఫొటోగ్రాఫర్‌ వాటన్నింటినీ దిగమింగుకుని తన ముందున్న దృశ్యానికి ఒక్క ‘క్లిక్‌’తో జీవంపోస్తాడు. అలాంటి వృత్తినే ఎన్నుకుని కుటుంబకష్టాలను గట్టెక్కిస్తోంది ఈ మహిళా ఫొటోగ్రాఫర్‌! భద్రాద్రి కొత్తగూడెం జిల్లా భద్రాచలంలోని జగదీశ్‌కాలనీకి చెందిన జి.శ్రీదేవి 18 ఏళ్లుగా ఫొటోగ్రఫీ వృత్తిలో రాణిస్తున్నారు. భద్రాద్రి రాముడిని దర్శించుకుని గోదావరికి వచ్చే భక్తుల ఫొటోలు తీస్తూ కుటుంబాన్ని పోషిస్తున్నారు. భర్త కృష్ణ కొన్నేళ్లక్రితం అనారోగ్యానికి గురవగా.. శ్రీదేవి ఫొటోగ్రఫీ ద్వారా వచ్చే ఆదాయంతోనే తమ ఇద్దరు కుమార్తెలను చదివించారు. వివాహాలు జరిపించారు.

19/08/2023 07:30(IST)

ఊరూ పల్లెటూరు.. దీని తీరే అమ్మ తీరు..!

‘‘ఊరూ పల్లెటూరు.. దీని తీరే అమ్మ తీరు.. కొంగులోనా దాసిపెట్టి.. కొడుకుకిచ్చే ప్రేమ వేరు..’ అంటూ ఓ సినీకవి పల్లె అందాలను హృద్యంగా ఆవిష్కరించారు. చెంగుచెంగున పరుగులెత్తే లేడిపిల్లల్లె.. నురుగులై పొంగే పాలధారల్లే.. సాక్షాత్కరించే స్వచ్ఛమైన పల్లెఅందాలను చూస్తే మురిసిపోని మనసంటూ ఉండదు! అలాంటి అందాలను ఇముడ్చుకుని పచ్చదనంతో కళకళలాడుతున్నదే ఈ ఊరు!! ఆదిలాబాద్‌ జిల్లా తాంసి మండలం లీమ్‌గూడ గిరిజన గ్రామం.. చుట్టూ కొండలు, పచ్చని చెట్ల మధ్య ఆహ్లాదం పంచుతోంది. జలపాతాల గలగలలు, పక్షుల కిలకిలారావాలతో ప్రకృతి ఆరాధకుల మనసులను కట్టిపడేస్తోంది..

19/08/2023 07:29(IST)

సాగు మాట దేవుడెరుగు.. నారు ఎండి గుండెబరువు!

జులైలో వర్షాలు కురుస్తాయన్న ఆశతో ఉమ్మడి నల్గొండ జిల్లా మిర్యాలగూడ, హుజూర్‌నగర్‌, కోదాడ నియోజకవర్గాల్లోని కొన్ని ప్రాంతాల రైతులు వరి సాగుకు నారు పోసుకున్నారు. కానీ ఇప్పటి వరకూ ఆయా ప్రాంతాల్లో ఆశించిన మేరకు వర్షాలు కురియలేదు. దీనికితోడు ఎండల తీవ్రత పెరిగింది. దీంతో వరి సాగు మాట దేవుడెరుగు.. పొలాలు బీటలువారి నారు ఎండిపోతోంది. వర్షాలు కరవై ఈ సీజన్‌లో పంటలు సాగుచేయలేక నష్టపోతున్నామని రైతులు ఆవేదన వ్యక్తం చేస్తున్నారు. సూర్యాపేట జిల్లా హుజూర్‌నగర్‌ శివారులో కనిపించిన చిత్రమిది..

App

బ్యాంకు ఖాతాలు స్తంభించిన రైతులకూ రుణమాఫీ: నిరంజన్‌రెడ్డి

తాజా వార్తలు (Latest News)

ఆంధ్ర వర్సిటీలో పోస్టల్‌ ఓటు కోల్పోయిన 150 మంది

మూసేవాలా హత్యకేసు నిందితుడు గోల్డీబ్రార్‌ మృతి

చందమామ ఆవలి భాగం నుంచి నమూనాల సేకరణ!

మృత్యువుతో గెలిచి.. పదిలో మెరిసి

వాట్సప్‌లో కొత్త ఖాతాల నుంచి సందేశాలు రావిక..?

#ఆఫీస్‌ పికాకింగ్‌.. కార్పొరేట్ ప్రపంచంలో మరో ట్రెండ్‌.. ఏమిటిది?

సుఖీభవ

చదువు