Breaking | Feedback | ePratibha | E-PAPER | Pratibha

కాంగ్రెస్‌లో చేరనున్న ఎమ్మెల్యే రేఖా నాయక్‌

Updated : 21 Aug 2023 22:51 IST

సంక్షిప్త వార్తలు - చిత్ర వార్తలు

21/08/2023 23:35(IST)

సాఫ్ట్‌వేరు ఇంజినీరు ఆత్మహత్య

ఏలూరు జిల్లాలోని ఉప్పుటేరులో సాఫ్ట్‌వేరు ఇంజినీరు ఆత్మహత్య చేసుకున్నాడు. కలిదిండి మండలం మద్వానిగూడెంలో ఈ ఘటన జరిగింది. మృతుడు పశ్చిమగోదావరి జిల్లాకు చెందిన దుర్గా నాగేశ్వరరావుగా గుర్తించారు.

21/08/2023 23:33(IST)

విలేకరిపై సర్పంచ్‌ కుమారుడు దాడి

అనకాపల్లి జిల్లా పెదముషిడివాడ సర్పంచి కుమారుడు అప్పారావు ఓ విలేకరిపై దాడి చేశాడు. వ్యతిరేక వార్తలు రాస్తున్నానని తనపై దాడి చేశారని బాధిత విలేకరి ఆరోపించాడు. పోలీసులకు ఫిర్యాదు చేశాడు. సర్పంచి కుమారుడు అప్పారావుతో సహా మరో 8 మందిపై పోలీసులు కేసు నమోదు చేశారు.

21/08/2023 23:16(IST)

భాజపా నేత అదృశ్యం.. మాదాపూర్‌ పోలీసులకు ఫిర్యాదు

హైదరాబాద్‌ మాదాపూర్‌లో భాజపా నేత శరణ్‌ చౌదరి అదృశ్యమయ్యారు. సోమవారం మధ్యాహ్నం నుంచి కనిపించట్లేదని ఆయన భార్య మాదాపూర్‌ పోలీసులకు ఫిర్యాదు చేశారు. డ్రైవర్‌, సహాయకుడి ఫోన్లు స్విచ్చాఫ్ వస్తున్నాయని ఆమె తన ఫిర్యాదులో పేర్కొన్నారు.

21/08/2023 23:00(IST)

హైదరాబాద్‌లో దారుణం.. తమ్ముడి ముందే బాలికపై సామూహిక అత్యాచారం

హైదరాబాద్‌: మీర్‌పేట్‌లో దారుణం చోటుచేసుకుంది. కత్తులతో బెదిరించి బాలికపై గంజాయి బ్యాచ్‌ సామూహిక అత్యాచారానికి పాల్పడింది. ఇంట్లో పెద్దవాళ్లు ఎవరూ లేని సమయంలో బాలిక ఇంట్లోకి చొరబడి తమ్ముడి ముందే ఈ దారుణానికి ఒడిగట్టారు. పోలీసులు కేసు నమోదు చేసుకొని దర్యాప్తు చేపట్టారు. అత్యాచార ఘటనపై రాచకొండ సీపీ డీఎస్‌ చౌహాన్‌ ఆరా తీశారు. దారుణానికి పాల్పడిన ఎనిమిది మంది పరారీలో ఉన్నారు. వారి కోసం పోలీసులు ముమ్మరంగా గాలింపు చర్యలు చేపట్టారు.

21/08/2023 22:28(IST)

కాంగ్రెస్‌లో చేరనున్న ఎమ్మెల్యే రేఖా నాయక్‌

నిర్మల్‌ జిల్లా ఖానాపూర్‌ ఎమ్మెల్యే రేఖా నాయక్‌ మంగళవారం ఉదయం కాంగ్రెస్‌లో చేరనున్నారు. ఆమె భర్త శ్యామ్‌ నాయక్‌ సోమవారం కాంగ్రెస్‌లో చేరారు. పీసీసీ అధ్యక్షుడు రేవంత్‌ రెడ్డి శ్యామ్‌ నాయక్‌కు కండువా కప్పి పార్టీలోకి ఆహ్వానించారు. భారాస అధ్యక్షుడు, ముఖ్యమంత్రి కేసీఆర్‌ సోమవారం ప్రకటించిన అసెంబ్లీ ఎన్నికల అభ్యర్థుల మొదటి జాబితాలో రేఖా నాయక్‌ పేరు లేకపోవడంతో ఆమె అసంతృప్తికి గురయ్యారు. దీంతో ఆమె తన అసంతృప్తి వ్యక్తం చేస్తూ పార్టీ మారేందుకు నిర్ణయించుకున్నట్లు సమాచారం.

21/08/2023 22:11(IST)

భాజపా జాతీయ కౌన్సిల్‌ సభ్యులను ప్రకటించిన కిషన్ రెడ్డి

హైదరాబాద్‌: భాజపా రాష్ర్ట అధ్యక్షుడు కిషన్‌ రెడ్డి.. పలువురు నేతలను జాతీయ కౌన్సిల్‌ సభ్యులుగా నియమించారు. మొత్తం 18 మందిని జాతీయ కౌన్సిల్‌ సభ్యులుగా నియమిస్తూ ప్రకటన జారీ చేశారు. మాజీ మంత్రులు మర్రి శశిధర్ రెడ్డి, రవీంద్ర నాయక్‌, పీ చంద్రశేఖర్‌, మాజీ ఎమ్మెల్యేలు టీ రాజేశ్వరరావు, వి. జయపాల్‌, వన్నాల శ్రీరాములు, జీ రామకృష్ణా రెడ్డి, బొడిగె శోభ, రేవూరి ప్రకాశ్ రెడ్డి, ఏనుగు రవీందర్‌ రెడ్డి, మహేశ్వర్‌ రెడ్డి, జయసుధ, ఆకుల రాజేందర్‌, మాజీ ఎమ్మెల్సీ దిలీప్‌ కుమార్‌, మాజీ ఎంపీ బూర నర్సయ్య గౌడ్‌, కొండా విశ్వేశ్వరరెడ్డి, రమేష్‌ రాథోడ్, చాడ సురేష్‌ రెడ్డిలను జాతీయ కౌన్సిల్ సభ్యులుగా ప్రకటించారు.

21/08/2023 22:03(IST)

సీఎం వ్యాఖ్యలపై సీపీఎస్ ఉద్యోగుల సంఘం అధ్యక్షుడు అసంతృప్తి

అమరావతి: సీఎం వ్యాఖ్యలపై సీపీఎస్ ఉద్యోగుల సంఘం అధ్యక్షుడు అప్పలరాజు అసంతృప్తి వ్యక్తం చేశారు. సీపీఎస్‌ ఉద్యోగులను మోసం చేసేలా సీఎం మాట్లాడారని ఆయన ఆరోపించారు. జీపీఎస్ ఆర్డినెన్స్‌తో మమ్మల్ని నెట్టేందుకు ప్రయత్నం చేస్తున్నారని వివరించారు.

21/08/2023 22:00(IST)

కైకలూరులో గంజాయి పట్టివేత

ఏలూరు: కైకలూరులో గంజాయి క్రయ, విక్రయాలపై సెబ్‌ అధికారులు స్పందించారు. గంజాయి విక్రయిస్తున్న నలుగురిని సెబ్ పోలీసులు అదుపులోకి తీసుకున్నారు. నిందితులంతా 21 నుంచి 23 ఏళ్ల యువకులని అధికారులు తెలిపారు. వారి నుంచి 400 గ్రాముల గంజాయి, 3 సెల్‌ఫోన్లను స్వాధీనం చేసుకున్నారు.

21/08/2023 21:40(IST)

బేగంపేట విమానాశ్రయానికి చేరుకున్న అమర జవాన్‌ చంద్రశేఖర్ భౌతికకాయం

హైదరాబాద్‌: అమర జవాన్‌ చంద్రశేఖర్‌ భౌతికకాయం బేగంపేట విమానాశ్రయానికి చేరుకుంది. భౌతికకాయాన్ని మృతుని స్వగ్రామం షాద్‌నగర్‌లోని తిరుమలదేవునికి తరలించారు. లద్దాఖ్‌లో శనివారం జరిగిన ట్రక్కు ప్రమాదంలో జవాన్‌ నీరటి చంద్రశేఖర్ మృతి చెందాడు.

21/08/2023 21:15(IST)

రెండు గంటలుగా అంధకారంలో పల్లెలు

అమరావతి: ఆంధ్రప్రదేశ్‌లోని పలు జిల్లాల్లో అప్రకటిత విద్యుత్‌ కోతలతో ప్రజలు అల్లాడిపోతున్నారు. రాత్రి 7 గంటల నుంచి పల్లెలు అంధకారంలో ఉన్నాయి. అమరావతి రాజధాని గ్రామాల్లో అప్రకటిత విద్యుత్ కోతలు విధించారు. ఎమర్జెన్సీ లోడ్‌ రిలీఫ్‌ వల్ల విద్యుత్‌ కోతలు విధించాల్సి వచ్చిందని ఆ శాఖ అధికారులు చెబుతున్నారు. బాపట్ల జిల్లా పర్చూరు, మార్టూరులో రెండు గంటలుగా విద్యుత్‌ సరఫరా నిలిచిపోయింది. చినగంజాం, చెరుకుపల్లి మండలాలు, ప్రకాశం జిల్లాలోని పలు మండలాల్లోనూ అప్రకటిత విద్యుత్‌ కోతలు విధించారు. రాత్రి 7 గంటల నుంచి కరెంట్‌ లేకపోవడంతో పలు గ్రామాలు పూర్తిగా అంధకారంలో ఉండిపోయాయి. కాకుమాను, వలేటివారిపాలెం, పెదనందిపాడు మండలాల్లో విద్యుత్‌ సరఫరా నిలిపేయడంతో ప్రజలు తీవ్ర ఇబ్బందులు పడుతున్నారు.

21/08/2023 21:02(IST)

లోకేశ్‌ పాదయాత్ర.. గన్నవరంలో స్వల్ప ఉద్రిక్తత

గన్నవరం: గన్నవరంలో ఉద్రిక్తత చోటు చేసుకుంది. నారా లోకేశ్‌ పాదయాత్ర రూట్‌ను పోలీసులు మార్చారు. లోకేశ్‌ పాదయాత్ర ఎమ్మెల్యే వల్లభనేని వంశీ ఆఫీస్ ముందు నుంచి వెళ్లాల్సి ఉంది. ఎమ్మెల్యే వంశీ ఆఫీస్‌లో ఉన్నందున పాదయాత్ర అటువైపు వెళ్లకుండా పోలీసులు బారీకేడ్లు అడ్డు పెట్టారు. తమ రూట్ ప్రకారం వెళ్లాల్సిందేనని తెదేపా నేతలు చెప్పారు. ఈక్రమంలో తెదేపా నేతలు, పోలీసులకు మధ్య తీవ్ర వాగ్వాదం చోటుచేసుకుంది.

21/08/2023 20:38(IST)

గరుడ పంచమి.. తిరుమలలో వైభవంగా గరుడ సేవ

తిరుమల: గరుడ పంచమి పర్వదినాన్ని పురస్కరించుకొని సోమవారం రాత్రి తిరుమలలో శ్రీమలయప్పస్వామివారు గరుడునిపై తిరుమాడ వీధులలో ఊరేగి భక్తులను కటాక్షించారు. రాత్రి 7నుంచి 9 గంటల నడుమ గరుడ వాహనసేవ అత్యంత రమణీయంగా జరిగింది. కార్యక్రమంలో ఆలయ అధికారులు, పెద్దఎత్తున భక్తులు పాల్గొన్నారు

21/08/2023 20:23(IST)

తాండూరు నియోజకవర్గంలో భారాసను గెలిపించేందుకు కృషి చేస్తా: రోహిత్‌ రెడ్డి

హైదరాబాద్: వికారాబాద్ జిల్లా తాండూరు నియోజకవర్గంలో భారాసను గెలిపించేందుకు కలిసికట్టుగా కృషి చేస్తామని ఆ నియోజకవర్గ ఎమ్మెల్యే పైలెట్ రోహిత్ రెడ్డి అన్నారు. తనకు ఎమ్మెల్యే అభ్యర్థిగా అవకాశం కల్పించిన ముఖ్యమంత్రికి రోహిత్‌రెడ్డి కృతజ్ఞతలు తెలిపారు. హైదరాబాద్‌లో ఎమ్మెల్సీ మహేందర్ రెడ్డి నివాసానికి చేరుకొని ఆయన ఆశీస్సులు తీసుకున్నారు.

21/08/2023 20:21(IST)

హైకోర్టు ప్రధాన న్యాయమూర్తిని కలిసిన సీఎం కేసీఆర్‌

హైదరాబాద్: హైకోర్టు ప్రధాన న్యాయమూర్తిని సీఎం కేసీఆర్‌ కలిశారు. మర్రి చెన్నారెడ్డి మానవ వనరుల అభివృద్ధి కేంద్రంలో సీజే జస్టిస్‌ అలోక్‌ అరాధేతో కేసీఆర్‌ భేటీ అయ్యారు. రాష్ట్రవ్యాప్తంగా కోర్టుల్లో మౌలిక వసతులు, సంబంధిత అంశాలపై చర్చించినట్లు సమాచారం.

21/08/2023 19:50(IST)

చిరంజీవికి పుట్టిన రోజు శుభాకాంక్షలు తెలిపిన పవన్‌ కల్యాణ్‌

జనసేన అధినేత పవన్‌ కల్యాణ్‌ తన అన్నయ్య చిరంజీవికి పుట్టిన రోజు శుభాకాంక్షలు తెలిపారు. ఆగస్టు 22న చిరంజీవి పుట్టిన రోజు సందర్భంగా జనసేన ప్రెస్‌నోట్‌ను విడుదల చేసింది. ‘అన్నయ్య చిరంజీవికి ప్రేమపూర్వక జన్మదిన శుభాకాంక్షలు. మీ తమ్ముడిగా పుట్టినందుకు ఆ భగవంతునికి కృతజ్ఞతలు తెలుపుతున్నాను’ అని చెప్పారు.

21/08/2023 19:16(IST)

హైదరాబాద్ ఓటరు ముసాయిదా జాబితా విడుదల

హైదరాబాద్‌: హైదరాబాద్ జిల్లాలో మొత్తం 43 లక్షల 989 మంది ఓటర్లు ఉన్నట్లు అధికారులు ఓటరు ముసాయిదా జాబితా విడుదల చేశారు. పురుషులు 22 లక్షల 9వేల 972, మహిళలు 20 లక్షల 90 వేల 727, ట్రాన్స్ జెండర్లు 290 ఉన్నట్లు వివరించారు. అత్యధికంగా జూబ్లీహిల్స్ నియోజకవర్గంలో 3 లక్షల 56 వేల 995, అత్యల్పంగా ఛార్మినార్‌లో 2 లక్షల 16 వేల 648 మంది ఓటర్లు ఉన్నట్లు తెలిపారు. హైదరాబాద్ జిల్లాలో 3986 పోలింగ్ కేంద్రాలు ఉన్నాయని వివరించారు. అక్టోబర్ నాలుగో తేదీన తుది జాబితా విడుదల చేయనున్నట్లు అధికారులు తెలిపారు.

21/08/2023 19:11(IST)

రజక సామాజికవర్గ ప్రతినిధులతో నారా లోకేశ్‌ భేటీ

విజయవాడ: గూడవల్లి సెంటర్‌లో రజక సామాజికవర్గ ప్రతినిధులతో నారా లోకేశ్‌ భేటీ అయ్యారు. ఈ మేరకు సంఘం సభ్యులు లోకేశ్‌కు వినతిపత్రం అందించారు. జనాభా ప్రకారం చట్టసభల్లో రజకులకు అసెంబ్లీ సీట్లు కేటాయించాలని వారు కోరారు.

21/08/2023 19:07(IST)

దొంగ ఓట్లు నిర్మూలిస్తే మా పార్టీ అవుట్: రఘురామ కృష్ణంరాజు

అమరావతి: మన ఓట్లను మనం రక్షించుకుంటూ, దొంగ ఓట్లను నిర్మూలిస్తే రానున్న ఎన్నికల్లో మా పార్టీ అవుటని ఎంపీ రఘురామ కృష్ణంరాజు పేర్కొన్నారు. దొంగ ఓట్లపై ఆధారపడే మా పార్టీ నాయకులు విజయంపై ఒకింత నమ్మకాన్ని పెట్టుకున్నారన్నారు. దొంగ ఓట్ల నిర్మూలనపై కేంద్ర ఎన్నికల సంఘం ఆదేశాల మేరకు ఇద్దరు అధికారులను సస్పెండ్ చేసిన శుభవార్త విన్నట్లు వివరించారు. రానున్న రోజుల్లో మరిన్ని ఇదే తరహా శుభవార్తలను వింటామని ఆయన అన్నారు.

21/08/2023 19:03(IST)

తెలంగాణలో తక్షణమే ఎన్నికల నియమావళి అమలు కోసం అభ్యర్థన

హైదరాబాద్‌: తెలంగాణలో తక్షణమే ఎన్నికల నియమావళిని (Model Code Of Conduct) అమలు చేయాలని ఎన్నికల సంఘాన్ని రాష్ట్ర కాంగ్రెస్‌ అభ్యర్థించింది. ఈ మేరకు ప్రధాన ఎన్నికల కమిషనర్‌ రాజీవ్‌కుమార్‌కు టీపీసీసీ ఉపాధ్యక్షుడు నిరంజన్‌ లేఖ రాశారు. భారాస ఇప్పటికే అభ్యర్థులను ప్రకటించిన నేపథ్యంలో ఆ పార్టీ నేతలు అధికార దుర్వినియోగానికి పాల్పడే అవకాశం ఉందని, అందువల్ల రాష్ట్రంలో వెంటనే ఎన్నికల నియమావళిని అమలు చేయాలని ఆయన కోరారు.

21/08/2023 18:56(IST)

41 సంవత్సరాలుగా కష్టపడి రాజకీయాల్లో కొనసాగుతున్నా: జగ్గారెడ్డి

సంగారెడ్డి: సంగారెడ్డి ఎమ్మెల్యే జగ్గారెడ్డి మీడియాతో మాట్లాడారు. మీడియా సమావేశంలో తాను చెప్పినప్పటికీ కొంతమంది గుసగుసలు పెడుతున్నారని అన్నారు. అనుమానించే వారికి.. వేరే పని ఏం లేదా?అని ప్రశ్నించారు. 41 సంవత్సరాలుగా కష్టపడి రాజకీయాల్లో కొనసాగుతున్నానని చెప్పారు. గుసగుసలు ఆడుకునే వారు ఇప్పటికైనా బంద్ చేయాలని అన్నారు. అప్పు చేసి 3 సార్లు ఎమ్మెల్యే అయ్యానని జగ్గారెడ్డి వివరించారు.

21/08/2023 18:39(IST)

భాజపా అభ్యర్థిగా గోషామహల్ నుంచి పోటీ చేస్తా: రాజా సింగ్‌

హైదరాబాద్‌: భారాస అభ్యర్థుల తొలి జాబితా ప్రకటనపై గోషామహల్‌ ఎమ్మెల్యే రాజాసింగ్ మీడియాతో మాట్లాడారు. ముఖ్యమంత్రి కేసీఆర్ నాలుగు స్థానాలకు తప్ప అన్నింటికీ అభ్యర్థులను ప్రకటించినట్లు వివరించారు. కేసీఆర్ ప్రకటించని నాలుగు స్థానాల్లో గోషామహల్‌ ఉందని పేర్కొన్నారు. గోషామహల్ అభ్యర్థిని నిర్ణయించేది కేసీఆర్ కాదు మజ్లీస్ అని చెప్పారు. మజ్లీస్ పార్టీ ఎవరి పేరు చెబితే కేసీఆర్ ఆ పేరు ప్రకటిస్తారని వివరించారు. 2018 ఎన్నికల్లో ప్రజల ఆశీర్వాదంతో గెలిచినట్లు ఆయన గుర్తు చేశారు. వచ్చే అసెంబ్లీ ఎన్నికల్లోనూ భాజపా అభ్యర్థిగా గోషామహల్ నుంచి పోటీ చేస్తానన్నారు.

21/08/2023 17:58(IST)

సంతనూతలపాడు ఎమ్మెల్యే సుధాకర్‌ బాబు పీఏపై ఆరోపణలు

ప్రకాశం: సంతనూతలపాడు ఎమ్మెల్యే సుధాకర్‌ బాబు పీఏపై ఆరోపణలు వచ్చాయి. ఉద్యోగాల పేరుతో ముగ్గురిని మోసం చేశారని పీఏ బండారు సురేశ్‌పై ఆరోపణలు వచ్చాయి. బాధితులు స్పందన కార్యక్రమంలో ఆయనపై ఫిర్యాదు చేశారు.

21/08/2023 17:52(IST)

తిరుమల మొదటి ఘాట్‌రోడ్డులో ప్రమాదం.. ఐదుగురికి గాయాలు

తిరుమల: తిరుమల మొదటి ఘాట్‌రోడ్డులో టెంపో వాహనం రెయిలింగ్‌ను ఢీకొట్టింది. ఈ ప్రమాదంలో తమిళనాడుకు చెందిన ఐదుగురికి గాయాలయ్యాయి. క్షతగాత్రులను రుయా ఆసుపత్రికి తరలించారు.

21/08/2023 17:31(IST)

అసెంబ్లీలో 119 స్థానాల్లో భారాస ఏడుగురు మహిళలకే టికెట్లు ఇచ్చింది: రాణి రుద్రమ

హైదరాబాద్‌: అసెంబ్లీలో 119 స్థానాల్లో మహిళలకు ఏడుగురికే టికెట్లు ఇచ్చిన భారాస మహిళా రిజర్వేషన్‌ బిల్లు కోసం మాట్లాడే అర్హత లేదని భాజపా అధికార ప్రతినిధి రాణి రుద్రమ అన్నారు. భారాస అభ్యర్థుల లిస్టు చూశాక ఎమ్మెల్సీ కవిత తెలంగాణ మహిళలకు క్షమాపణ చెప్పాలని డిమాండ్ చేశారు. లిక్కర్ స్కాం నుంచి దేశ ప్రజలను పక్కదారి పట్టించేందుకే కవిత మహిళా రిజర్వేషన్ డ్రామా అనేది ఈ లిస్టులో రుజువైందని మండిపడ్డారు.

21/08/2023 17:26(IST)

ఎమ్మెల్సీ కవిత ఇంటి వద్ద వ్యక్తి ఆత్మహత్యాయత్నం

హైదరాబాద్‌: బంజారాహిల్స్‌లోని ఎమ్మెల్సీ కవిత ఇంటి వద్ద నజీరుద్దీన్ అనే టోలిచౌకికి చెందిన వ్యక్తి ఆత్మహత్యాయత్నం చేశాడు. దీంతో సెక్యూరిటీ, స్థానిక నేతలు ఆయన్ను అడ్డుకున్నారు. తన కుమార్తెకు ఆరోగ్యం బాగాలేదని, ఎక్కడికి తిరిగినా నయం కాకపోవడంతో ప్రభుత్వం తరఫున సహాయం అందించాలని కోరుతూ తన వెంట తెచ్చుకున్న కిరోసిన్‌తో నజీరుద్దీన్‌ ఆత్మహత్యాహత్యం చేశాడు. అక్కడే ఉన్న సెక్యూరిటీ సిబ్బంది, స్థానిక నేతలు ఆయన్ను ఆపారు. అతడి పరిస్థితిపై ఎమ్మెల్సీ కవిత రాగానే తెలియజేస్తామని అన్నారు.

21/08/2023 17:09(IST)

ఉమ్మడి నల్గొండ భారాసకు కంచు కోట.. అన్ని సీట్లు గెలుస్తాం: జగదీశ్‌రెడ్డి

మరోసారి ఎమ్మెల్యే టికెట్‌ ఇచ్చినందుకు మంత్రి జగదీశ్‌రెడ్డి సీఎం కేసీఆర్‌కు కృతజ్ఞతలు తెలిపారు. ఉమ్మడి నల్గొండ భారాసకు కంచు కోట అని, అన్ని సీట్లు గెలుస్తామని చెప్పారు.

21/08/2023 17:05(IST)

దర్శిలో మహిళపై దాడి ఘటన కలచివేసింది: గిడుగు రుద్రరాజు

విజయవాడ: దర్శిలో ఎస్సీ మహిళపై దాడి జరిగిన ఘటన కలచివేసిందని ఏపీసీసీ అధ్యక్షుడు గిడుగు రుద్రరాజు అన్నారు. ఈ ఘటనపై సీఎం, హోం మంత్రి, డీజీపీ ఎందుకు స్పందించలేదని ప్రశ్నించారు. విజయవాడ ఆంధ్రరత్న భవన్‌లో నిర్వహించిన మీడియా సమావేశంలో ఆయన మాట్లాడారు. రాష్ట్రంలో ఎస్సీ, ఎస్టీలపై దాడులు పెరిగిపోతున్నాయన్నారు. దళితులపై జగన్ కపట ప్రేమ చూపుతున్నారని తెలిపారు. రాష్ట్రంలో శాంతి భద్రతలు అదుపు తప్పాయని విమర్శించారు. మౌనికపై దాడి ఘటన గురించి మానవ హక్కుల సంఘానికి ఫిర్యాదు చేస్తామన్నారు.

21/08/2023 16:47(IST)

కరీంనగర్‌లో భారాస సంబరాలు

కరీంనగర్‌: గంగుల కమలాకర్‌కు ఎమ్మెల్యే టికెట్ ఖరారు కావడంతో కరీంనగర్‌లోని తెలంగాణ చౌక్‌లో సోమవారం సాయంత్రం మేయర్ సునీల్ రావు, కార్పొరేటర్ల ఆధ్వర్యంలో సంబరాలు నిర్వహించారు.

21/08/2023 16:46(IST)

ఎమ్మెల్యే టికెట్లు దక్కించుకున్న వారికి కేటీఆర్‌ విషెస్‌

ఎమ్మెల్యే టికెట్లు దక్కించుకున్న భారాస అభ్యర్థులకు మంత్రి కేటీఆర్‌ ట్విటర్‌ వేదికగా అభినందనలు తెలిపారు. తనకు సిరిసిల్ల టికెట్‌ ఇచ్చినందుకు సీఎం కేసీఆర్‌కు కృతజ్ఞతలు తెలిపారు.

తన కుటుంబ సభ్యుడికి టికెట్‌ నిరాకరించినందుకు ఓ ఎమ్మెల్యే.. మంత్రి హరీశ్‌రావుపై దురుసు వ్యాఖ్యలు చేశారని.. వాటిని ఖండిస్తున్నట్లు కేటీఆర్‌ తెలిపారు. తాము హరీశ్‌రావు వెంట ఉన్నట్లు చెప్పారు.

21/08/2023 16:42(IST)

విడదల రజిని నాపై హత్యాయత్నం చేయించారు: శ్రీనివాస్‌రెడ్డి

మంత్రి విడదల రజిని తనపై హత్యాయత్నం చేయించారని వైకాపా నాదెండ్ల మండల మాజీ కన్వీనర్ గొంటు శ్రీనివాస్ రెడ్డి ఆరోపించారు. ఆసుపత్రిలో చికిత్స పొందుతున్న శ్రీనివాసరెడ్డి సోమవారం మీడియా సమావేశం నిర్వహించి మాట్లాడారు. రజినిని జగన్ ఆదేశాలతో చిలకలూరిపేటలో గెలిపించామన్నారు. కానీ ఆమె నియోజకవర్గంలో గెలిపించిన కార్యకర్తలను విభజించి గ్రూపు రాజకీయాలు చేయిస్తున్నారని ఆవేదన వ్యక్తం చేశారు. నాదెండ్ల మండలంలోని చందవరంలో ‘గడప గడపకు మన ప్రభుత్వం’ కార్యక్రమానికి గైర్హాజరైన వాలంటీర్లను మంత్రి సస్పెండ్ చేయించారని ఆరోపించారు. మంత్రికి వ్యతిరేకంగా ఉంటున్నందుకు.. జయభరత్ రెడ్డిని చేరదీసి తన హత్యకు ఉసిగొల్పిందని చెప్పారు. మంత్రికి ఎదురు తిరిగినందుకే కక్షగట్టి తనమీద హత్యాయత్నం చేయించినట్లు శ్రీనివాసరెడ్డి తెలిపారు.

21/08/2023 16:40(IST)

సూర్యాపేటలో నటి మృణాల్‌ సందడి

సినీనటి మృణాల్‌ ఠాకూర్‌ సూర్యాపేటలో సందడి చేశారు. ఓ వస్త్ర దుకాణం ప్రారంభోత్సవంలో ఆమె పాల్గొన్నారు. ఆమెను చూసేందుకు అభిమానులు భారీ సంఖ్యలో తరలివచ్చారు. మృణాల్ డ్యాన్స్‌ చేసి అలరించారు.

21/08/2023 16:36(IST)

కంటైనర్‌ లారీ బోల్తా.. రెండు ఆవులు మృతి

కాకినాడ జిల్లా: గొల్లప్రోలు మండలం వన్నెపూడి గ్రామ శివారు 16వ నెంబరు జాతీయ రహదారిపై కంటైనర్ లారీ బోల్తా పడింది. ఆ వాహనంలో అక్రమంగా రవాణా చేస్తున్న రెండు ఆవులు చనిపోగా.. మిగిలిన దూడలు పొలాలకు చెదిరి పోయాయి. సంఘటనా స్థలాన్ని అధికారులు పరిశీలిస్తున్నారు.

21/08/2023 16:27(IST)

బహుజనులపై పోలీసులు క్రూరమైన దాడులకు పాల్పడుతున్నారు: ఆర్‌ఎస్‌ ప్రవీణ్‌కుమార్‌

హైదరాబాద్‌: రాష్ట్రంలో మహిళలకు రక్షణ లేదని బీఎస్పీ రాష్ట్ర అధ్యక్షుడు డాక్టర్ ఆర్‌ఎస్ ప్రవీణ్‌కుమార్ అన్నారు. హైదరాబాద్‌లోని సోమాజిగూడ ప్రెస్‌క్లబ్‌లో సోషల్ డెమొక్రటిక్ ఫోరం ఆధ్వర్యంలో ‘పేదలపై పోలీసుల దౌర్జన్యాలు - ప్రభుత్వ నిర్లక్ష్య వైఖరి’పై జరిగిన రౌండ్ టేబుల్‌ సమావేశానికి ఆయన ముఖ్య అతిథిగా హాజరయ్యారు. ఎల్బీనగర్‌ పోలీసులు బాధిత మహిళపై వ్యవహరించిన తీరు అత్యంత క్రూరంగా ఉందని, బాధ్యులైన అధికారులను శాశ్వతంగా ఉద్యోగాల నుంచి తొలగించాలని డిమాండ్ చేశారు. ఆ గిరిజన మహిళపై పోలీసులు థర్డ్ డిగ్రీ ప్రయోగించడాన్ని తీవ్రంగా ఖండిస్తున్నట్లు ప్రకటించారు. హైదరాబాద్ పాత బస్తీకి చెందిన సామజిక కార్యకర్త షేక్ సయీద్ బావజీర్ హత్యకు గురయ్యారని, ఖదీర్‌ఖాన్, మరియమ్మ లాకప్ మరణాలు కూడా పోలీసుల హత్యలేనని ఆరోపించారు. పలుకుబడి లేని వర్గాలైన బహుజనులపై పోలీసులు క్రూరమైన దాడులకు పాల్పడుతున్నారని ఆరోపించారు.

21/08/2023 16:16(IST)

రెండు నియోజకవర్గాలో కేసీఆర్‌ ఓడిపోబోతున్నారు: రేవంత్‌రెడ్డి

హైదరాబాద్: గాంధీభవన్‌లో నిర్వహించిన మీడియా సమావేశంలో టీపీసీసీ చీఫ్‌ రేవంత్‌రెడ్డి మట్లాడారు. గజ్వేల్‌లో గెలుపుపై నమ్మకం లేకనే కేసీఆర్‌ కామారెడ్డిలో పోటీ చేస్తున్నారని.. రెండు నియోజకవర్గాల్లో ఆయన ఓడిపోబోతున్నారని రేవంత్‌రెడ్డి అన్నారు.

షబ్బీర్‌ అలీ మాట్లాడుతూ.. కేసీఆర్ పొరపాటు చేస్తున్నారని, కామారెడ్డి ప్రజలు ఆయన్ను ఓడిస్తారని తెలిపారు. కామారెడ్డి అభివృద్ధికి సీఎం కేసీఆర్ చేసిందేమి లేదని విమర్శించారు. మైనారిటీ డిక్లరేషన్ కమిటీకి ఛైర్మన్‌గా తనను నియమించారని షబ్బీర్ అలీ తెలిపారు. సోమవారం కమిటీ సభ్యులతో డిక్లరేషన్ పై చర్చించినట్లు చెప్పారు. మైనార్టీలకు 4 శాతం రిజర్వేషన్ కాంగ్రెస్ ఇచ్చిందని గుర్తుచేశారు. కేసీఆర్ వచ్చి 12 శాతం రిజర్వేషన్ చేస్తామని చెప్పి అమలు చేయలేదని విమర్శించారు.

21/08/2023 16:08(IST)

ఒక కుటుంబం చేసే దోపిడీకి తెలంగాణ రాష్ట్రం బలైపోతోంది: కిషన్‌రెడ్డి

నిర్మల్‌: ఎంతో మంది ప్రాణ త్యాగాలు చేసి సాధించుకున్న తెలంగాణ ఇవాళ ఒక కుటుంబం చేతిలో ఉండిపోయిందని భాజపా తెలంగాణ రాష్ట్ర అధ్యక్షుడు, కేంద్ర మంత్రి కిషన్‌ రెడ్డి విమర్శించారు. ఆ కుటుంబం చేసే దోపిడీకి తెలంగాణ రాష్ట్రం బలైపోతోందని ఆవేదన వ్యక్తం చేశారు. నిర్మల్‌లో కిషన్‌ రెడ్డి మీడియాతో మాట్లాడారు.

21/08/2023 16:03(IST)

యువశక్తిని రాజకీయ వ్యవస్థ నిర్వీర్యం చేస్తోంది: జయప్రకాశ్‌ నారాయణ

హైదరాబాద్‌: యువశక్తిని రాజకీయ వ్యవస్థ నిర్వీర్యం చేస్తోందని లోక్‌సత్తా పార్టీ వ్యవస్థాపకుడు జయప్రకాశ్ నారాయణ అన్నారు. చాలా మంది యువత రాజకీయాలంటూ సరైన నాయకుడిని ఎంచుకోకుండా గుడ్డిగా తిరిగి జీవితాలు పాడు చేసుకుంటున్నారని తెలిపారు. ఆ విషయం గుర్తొచ్చినప్పుడల్లా తనకు బాధ కలుగుతోందని ఆవేదన వ్యక్తం చేశారు. యువతకు భవిష్యత్తుపై అవగాహన పెంచాలన్నారు. అభయ్ నవీన్ కథానాయకుడిగా నటిస్తూ దర్శకత్వం వహించిన రామన్న యూత్ విడుదల తేదీ పోస్టర్‌ను సోమవారాం జయప్రకాశ్ నారాయణ ఆవిష్కరించారు.

21/08/2023 15:58(IST)

ఎమ్మెల్యే జోగు రామన్న అభిమానుల సంబరాలు

ఆదిలాబాద్ పట్టణం: ఆదిలాబాద్ ఎమ్మెల్యే జోగురామన్నకు భారాస టికెట్ ఖరారు కావడంతో పార్టీ కార్యకర్తలు, అయన అభిమానులు సంబరాలు నిర్వహించారు. ఎమ్మెల్యే క్యాంపు కార్యాలయం ఎదుట బ్యాండు మేళాల మధ్య నృత్యాలు చేశారు. పెద్దఎత్తున టపాసులు కాల్చి సందడి చేశారు. ఒకరికొకరు మిఠాయిలు తినిపించుకున్నారు. పార్టీ పట్టణ అధ్యక్షుడు అజయ్, మున్సిపల్ వైస్ ఛైర్మన్‌ జహీర్ రంజాని, ఎంపీపీ మార్షెట్టి గోవర్ధన్, గండ్రత్ రమేష్, సాజీద్ తదితరులు పాల్గొన్నారు.

21/08/2023 15:52(IST)

జలసౌధలో కేఆర్ఎంబీ త్రిసభ్య కమిటీ సమావేశం

హైదరాబాద్‌: కృష్ణా నదిలో నీరు తక్కువగా ఉన్నందున సాగునీటి కోసం కాకుండా తాగునీటి అవసరాలకే వినియోగించుకోవాలని నదీ యాజమాన్య బోర్డు త్రిసభ్య కమిటీ అభిప్రాయపడింది. హైదరాబాద్ జలసౌధలో కేఆర్ఎంబీ త్రిసభ్య కమిటీ సమావేశం నిర్వహించారు. బోర్డు సభ్య కార్యదర్శి రాయిపురే, ఆంధ్రప్రదేశ్ జలవనరుల శాఖ ఈఎన్సీ నారాయణరెడ్డి సమావేశంలో పాల్గొన్నారు. తెలంగాణ ఈఎన్సీ మురళీధర్ సమావేశానికి హాజరు కాలేదు. వేరే కార్యక్రమాలు ఉన్నందున త్రిసభ్య కమిటీ సమావేశాన్ని వాయిదా వేయాలని మురళీధర్ రెండు రోజుల క్రితం బోర్డుకు లేఖ రాశారు. సమావేశానికి హాజరైన ఏపీ ఈఎన్సీ నారాయణరెడ్డి తమ ప్రతిపాదనలను వివరించారు. ఏపీ అవసరాల కోసం హంద్రీనీవా, పోతిరెడ్డిపాడు, నాగార్జున సాగర్‌ ఎడమ కాల్వకు సంబంధించి 30 టీఎంసీల నీళ్లు కావాలని అడిగారు. నీరు తక్కువగా ఉన్నందున ఉన్న నీటిని చాలా జాగ్రత్తగా తాగునీటికి మాత్రమే వినియోగించుకోవాలని సభ్య కార్యదర్శి రాయిపురే తెలిపారు. ఛైర్మన్‌ను సంప్రదించి నీటి విడుదల ఉత్తర్వులు ఇస్తామని అన్నారు.

21/08/2023 15:27(IST)

లోకేశ్‌ సమక్షంలో తెదేపాలో చేరిన యార్లగడ్డ వెంకట్రావు

తెదేపా జాతీయ ప్రధాన కార్యదర్శి నారా లోకేశ్‌ సమక్షంలో యార్లగడ్డ వెంకట్రావు తెదేపాలో చేరారు. లోకేశ్ ఆయనకు పసుపు కండువా కప్పి పార్టీలోకి ఆహ్వానించారు. యార్లగడ్డ చేరికతో పార్టీకి అదనపు బలం వచ్చిందని తెదేపా శ్రేణులు తెలిపాయి.

21/08/2023 15:26(IST)

తప్పుడు విధానాలతో ఓట్లు తొలగించే ఏ అధికారికైనా ఇదే పరిస్థితి: బొండా ఉమ

దొంగ ఓట్లతో వైకాపా ఎన్నికల్లో గెలవాలని చూస్తోందని తెదేపా నేత బొండా ఉమ ఆరోపించారు. ఏపీలో పెద్దఎత్తున తెదేపా సానుభూతిపరుల ఓట్లు తొలగించడానికి చూస్తోందని విమర్శించారు. తెదేపా సానుభూతి ఓట్లను తొలగించడానికి సజ్జల ఆధ్వర్యంలో పెద్ద టీమ్ పని చేస్తోందని, అధికారులను ఇష్టం వచ్చినట్లు వాడుకుంటున్నారని ధ్వజమెత్తారు. వైకాపా చెప్పినట్లు చేసి అనంతపురం జడ్పీ సీఈవో భాస్కరరెడ్డి సస్పెండ్ అయ్యాడని ఎద్దేవా చేశారు. పాత జడ్పీ సీఈవో శోభ స్వరూపారాణి కూడా సస్పెండ్ అయ్యారని చెప్పారు. వైకాపా మాటలు విని తప్పుడు విధానాలతో ఓట్లు తొలగించే ఏ అధికారికైనా ఇదే పరిస్థితి వస్తుందని హెచ్చరించారు.

21/08/2023 15:12(IST)

శివశంకర్‌రెడ్డి బెయిల్‌ పిటిషన్‌పై విచారణ 24కు వాయిదా

హైదరాబాద్‌: వివేకా హత్య కేసులో ఏ5 నిందితుడిగా ఉన్న శివశంకర్ రెడ్డి బెయిల్‌ పిటిషన్‌పై సీబీఐ కోర్టు విచారించింది. పిటిషనర్ తరఫు న్యాయవాది అందుబాటులో లేకపోవడంతో విచారణను ఈ నెల 24కు వాయిదా వేసింది.

21/08/2023 14:50(IST)

కామారెడ్డి, గజ్వేల్‌ నుంచి పోటీ చేయనున్న సీఎం కేసీఆర్‌

హైదరాబాద్‌: అసెంబ్లీ ఎన్నికలకు భారాస అభ్యర్థుల జాబితాను ప్రకటించింది. ఈ మేరకు కేసీఆర్ మీడియా సమావేశంలో మాట్లాడారు. సీఎం కేసీఆర్‌ కామారెడ్డి, గజ్వేల్‌ నుంచి పోటీ చేయనున్నట్లు తెలిపారు. 7 స్థానాల్లో మాత్రమే సిట్టింగ్ అభ్యర్థులను మారుస్తున్నట్లు తెలిపారు. వేములవాడ, మెట్‌పల్లి, ఉప్పల్‌ సిట్టింగ్‌ ఎమ్మెల్యేలను మారుస్తున్నట్లు కేసీఆర్‌ ప్రకటించారు.

21/08/2023 14:40(IST)

క్షేత్రస్థాయిలో భాజపాను బలోపేతం చేయాలి: కె. లక్ష్మణ్‌

హైదరాబాద్: తెలంగాణ రాష్ట్రం సాధించింది నాలుగు కోట్ల మంది ప్రజల కోసమా లేక నలుగురి కోసమా అంటూ భాజపా ఓబీసీ మోర్చా జాతీయ అధ్యక్షుడు కె. లక్ష్మణ్‌ విమర్శించారు. రాష్ట్రంలో ఉన్న ఓబీసీ మోర్చా ముఖ్యులతో భాజపా ఏర్పాటు చేసిన సమావేశంలో ఆయన పాల్గొన్నారు. కార్యక్రమంలో రాష్ట్ర ఓబీసీ మోర్ఛా నాయకులు, సభ్యులంతా సమావేశమయ్యారు. తెలంగాణ రాష్ట్రంలో పార్టీని సమన్వయం చేస్తూ.. సంస్థాగతంగా, క్షేత్రస్థాయిలో పార్టీని బలోపేతం చేసి అధికారం సాధించాలని లక్ష్మణ్ అన్నారు.

21/08/2023 14:32(IST)

విద్యా వాలంటీర్ల నిరసనకు రఘునందన్‌ రావు మద్దతు

హైదరాబాద్: ప్రభుత్వ పాఠశాలల్లో విద్యా వాలంటీర్లను రెన్యువల్‌ చేయాలని, పెండింగ్‌లో ఉన్న మూడు నెలల వేతనాలు చెల్లించాలని భాజపా ఎమ్మెల్యే రఘునందన్ రావు డిమాండ్ చేశారు. ఇదే డిమాండ్‌తో లక్డీకాపూల్‌లోని పాఠశాల విద్యాశాఖ కమిషనర్ కార్యాలయం ఎదుట విద్యావాలంటీర్లు ఆందోళన నిర్వహించారు. వీరికి మద్దతుగా ఎమ్మెల్యే రఘునందన్ రావు ఆందోళనలో పాల్గొన్నారు.పోలీసులు లోపలికి అనుమతించకపోవడంతో.. విద్యా వాలంటీర్లతో కలిసి గేటు లోపల రఘునందన్ రావు బైఠాయించారు.

21/08/2023 14:27(IST)

దోర్నాల బస్టాండ్‌లో ఆడ శిశువు లభ్యం

ప్రకాశం: దోర్నాల బస్టాండ్‌లో ఆడ శిశువు లభ్యమైంది. ఆడ శిశువును సంచిలో ఉంచి గుర్తు తెలియని వ్యక్తులు బస్సులోనే వదిలి వెళ్లారు. మార్కాపురం ప్రభుత్వ వైద్యశాలకు ఆడ శిశువును తరలించారు. పోలీసులు ఘటనాస్థలికి చేరుకొని దర్యాప్తు చేస్తున్నారు.

21/08/2023 14:23(IST)

శంషాబాద్ విమానాశ్రయంలో బంగారం పట్టివేత

శంషాబాద్‌ గ్రామీణం: అక్రమంగా తరలిస్తున్న బంగారాన్ని శంషాబాద్ విమానాశ్రయంలో కస్టమ్స్‌ అధికారులు పట్టుకున్నారు. షార్జా నుంచి హైదరాబాద్‌కు వచ్చిన వ్యక్తి దగ్గర రూ. 20.59 లక్షల విలువ చేసే బంగారాన్ని అధికారులు సీజ్‌ చేశారు. నిందితుడి నుంచి బంగారం, గోల్డ్ చైన్‌లు, ఇతర ఆభరణాలను స్వాధీనం చేసుకున్నారు. ప్రయాణికుడిపై కేసు నమోదు చేసి దర్యాప్తు చేస్తున్నట్లు అధికారులు తెలిపారు.

21/08/2023 14:19(IST)

అట్లూరు కార్యాలయం ఎదుట ప్రజాసంఘాల ధర్నా

వైఎస్‌ఆర్‌ కడప జిల్లా అట్లూరు కార్యాలయం ఎదుట ప్రజాసంఘాలు ధర్నా చేశాయి. లంచాలు ఇవ్వకుంటే కార్యాలయంలో పనులు చేయట్లేదని ప్రజాసంఘాల సభ్యులు ఆరోపించారు. అసైన్‌మెంట్‌ కమిటీలో అనర్హులు పేర్లు వెంటనే తొలగించాలని డిమాండ్‌ చేశారు. ఇంటి పట్టాలకు కమీషన్లు తీసుకుంటున్నారని ఆగ్రహం వ్యక్తం చేశారు.

21/08/2023 14:16(IST)

కార్మికుల మృతికి కారణాలు చెప్పాలని ఒడిశా ప్రభుత్వం లేఖ

అనకాపల్లి: అచ్యుతాపురం సెజ్‌లో డయేరియాతో అనారోగ్యానికి గురై ముగ్గురు వలస కార్మికులు మృతి చెందారు. కార్మికుల మృతికి కారణాలు చెప్పాలని ఏపీ ప్రభుత్వానికి ఒడిశా ప్రభుత్వం లేఖ రాసింది.

21/08/2023 14:13(IST)

జగన్‌ ప్రజల విశ్వాసాన్ని, నమ్మకాన్ని కోల్పోయారు: ధూళిపాళ్ల నరేంద్ర

పద్మవిభూషణ్ రామోజీ రావు తెలుగు ప్రజల ఆస్తి అని, ఆయన స్థాపించిన సంస్థలు మనకు కీర్తి అని తెదేపా సీనియర్‌ నేత ధూళిపాళ్ల నరేంద్ర అన్నారు. పాలకులంటే ప్రజల ప్రగతి పై దృష్టిపెట్టాలి కానీ.. పగ సాధించడంపై కాదని ముఖ్యమంత్రి జగన్‌కు హితవు పలికారు. ప్రభుత్వ అసమర్థతను, అధికార పార్టీ అకృత్యాలను ప్రజల దృష్టికి తెస్తున్న మీడియాపై కక్షపూరిత చర్యలు జగన్ రాక్షసత్వాన్ని చూపిస్తున్నాయని విమర్శించారు. కుట్రలు, కుతంత్రాలతో మార్గదర్శిపై చిన్న మరక కూడా వేయలేరని స్పష్టం చేశారు. జగన్‌ ప్రజల విశ్వాసాన్ని, నమ్మకాన్ని కోల్పోయారని అన్నారు.

21/08/2023 14:08(IST)

తిరుమల శ్రీ‌వారికి రెండు బ్ర‌హ్మోత్స‌వాలు

తిరుమల శ్రీ‌వారికి రెండు బ్ర‌హ్మోత్స‌వాలు నిర్వహించనున్నట్లు తితిదే ఓ ప్రకటనలో తెలిపింది. సెప్టెంబ‌ర్‌ 18 నుంచి 26 వ‌రకు సాల‌క‌ట్ల బ్ర‌హ్మోత్స‌వాలు, అక్టోబ‌రు 15 నుంచి 23 వ‌రకు న‌వ‌రాత్రి బ్ర‌హ్మోత్స‌వాలు నిర్వహించనున్నట్లు ప్రకటించింది.

21/08/2023 14:06(IST)

ప్రొద్దుటూరు ఎమ్మెల్యే సలహాతోనే రాజారెడ్డి హత్య: వరదరాజుల రెడ్డి

ప్రొద్దుటూరు నేరవార్తలు: వైఎస్‌ఆర్‌ జిల్లాలోని ప్రొద్దుటూరు మాజీ ఎమ్మెల్యే వరదరాజుల రెడ్డి కీలక వ్యాఖ్యలు చేశారు. ప్రొద్దుటూరు పూజా పాఠశాల అధినేత రాజారెడ్డి హత్య వైకాపా ఎమ్మెల్యేకు ముందే తెలుసన్నారు. ప్రొద్దుటూరు ఎమ్మెల్యే రాచమల్లు శివ ప్రసాద్ రెడ్డి సలహాతోనే రాజారెడ్డిని హత్య చేశారని ఆరోపించారు. హత్య కేసులో ఒకటిన్నర రోజులోనే ఐదుగురు నిందితులను అరెస్టు చేసిన పోలీసులు అంతటితోనే సరిపెట్టరాదన్నారు. రాజారెడ్డి హత్యతో రాజుపాలెం మండలానికి చెందిన కొందరికి సంబంధం ఉందని తెలిపారు. కేసును సీఐడీతో విచారణ జరిపించాలని వరదరాజుల రెడ్డి డిమాండ్‌ చేశారు.

21/08/2023 14:03(IST)

ప్రభుత్వ వేధింపులతో కంపెనీలు పక్క రాష్ట్రాలకు వెళ్తాయి: నేతి మహేశ్వరరావు

ప్రొఫెషనల్‌ ఫోరం అధ్యక్షుడు నేతి మహేశ్వరరావు ప్రెస్‌ నోట్‌ విడుదల చేశారు. మార్గదర్శి చందాదారులను భయపెడుతున్నారని ఆయన తెలిపారు. చిట్‌ఫండ్‌ వ్యాపారాన్ని దెబ్బతీసేలా ప్రభుత్వ చర్యలున్నాయని విమర్శించారు. ప్రభుత్వ వేధింపులతో కంపెనీలు పక్క రాష్ట్రాలకు వెళ్తాయని చెప్పారు. కొందరు అధికారులు పార్టీలకు అనుగుణంగా పనిచేస్తున్నారని ఆరోపించారు.

21/08/2023 13:57(IST)

బుచ్చయ్యకు టికెట్‌ ఇవ్వకపోతే మూకుమ్మడి రాజీనామా చేస్తాం: భద్రాచలం నేతలు

ఖమ్మం: భద్రాచలం సీటు బుచ్చయ్యకు ఇవ్వాలని కోరుతూ భద్రాచలం భారాస నేతలు మంత్రి పువ్వాడ అజయ్‌ని కలిశారు. తెల్లం వెంకట్రావు అవకాశవాద రాజకీయాలు చేస్తున్నారని వారు ఆరోపించారు. ఆయన వల్ల పార్టీకి నష్టం జరుగుతోందని తెలిపారు. బుచ్చయ్యకు టికెట్‌ ఇవ్వకపోతే మూకుమ్మడి రాజీనామా చేస్తామన్నారు.

21/08/2023 13:50(IST)

మదనపల్లెలో మహిళ ఆత్మహత్యాయత్నం

అన్నమయ్య జిల్లా మదనపల్లెలో మహిళ ఆత్మహత్యాయత్నం చేసింది. రెండు రోజుల క్రితం ఎగువకురవంకలో భర్త ఇంటి ముందు శివజ్యోతి ఆందోళన చేపట్టింది. పోలీసులు పట్టించుకోవట్లేదనే మనస్తాపంతో నిద్రమాత్రలు మింగింది. బాధితురాలిని కుటుంబ సభ్యులు ప్రభుత్వాసుపత్రికి తరలించారు.

21/08/2023 13:45(IST)

ఆసియా క్రికెట్‌ కప్‌ జట్టును ప్రకటించిన బీసీసీఐ

దిల్లీ: ఆసియా క్రికెట్‌ కప్‌ జట్టును బీసీసీఐ ప్రకటించింది. జట్టు వివరాలు: రోహిత్‌(కెప్టెన్‌), గిల్‌, విరాట్‌ కోహ్లీ, శ్రేయస్‌ అయ్యర్‌, సూర్యకుమార్, తిలక్‌ వర్మ, కేఎల్‌ రాహుల్‌, ఇషాన్‌ కిషన్‌, హార్దిక్‌ పాండ్య(వైస్‌ కెప్టెన్‌), రవీంద్ర జడేజా, శార్దూల్‌ ఠాకూర్‌, అక్షర్‌ పటేల్‌, కుల్దీప్ యాదవ్‌, బుమ్రా, షమీ, సిరాజ్‌, ప్రసిద్ కృష్ణ. సంజూ శాంసన్‌ స్టాండ్‌ బైలో ఉండనున్నాడు.

21/08/2023 13:44(IST)

సజ్జల రామకృష్ణారెడ్డి కార్యాలయం వద్ద అతిథి అధ్యాపకులు ఆందోళన

తాడేపల్లిలో ప్రభుత్వ సలహాదారు సజ్జల రామకృష్ణారెడ్డి కార్యాలయం వద్ద ఏపీ జూనియర్ కళాశాల అతిథి అధ్యాపకులు ఆందోళన చేపట్టారు. రెండేళ్లుగా ప్రభుత్వం సక్రమంగా వేతనాలు చెల్లించలేదని నిరసన తెలిపారు. అంతకుముందు జీతభత్యాలు పెంపును డిమాండ్‌ చేస్తూ ముఖ్యమంత్రిని కలవడానికి విఫలయత్నం చేశారు. సాధ్యం కాకపోవడంతో ప్రభుత్వ సలహాదారు సజ్జల కార్యాలయం వద్ద ఆందోళన చేపట్టారు.

21/08/2023 13:37(IST)

జగన్‌ అప్పుల కోసం చూడటం తప్ప రైతులను పట్టించుకోవడంలేదు: ప్రత్తిపాటి

పల్నాడు: తరతరాలకు గుర్తుండేలా నారా లోకేశ్‌ యువగళం పాదయాత్ర సాగుతోందని తెదేపా నేత ప్రత్తిపాటి పుల్లారావు అన్నారు. పల్నాడు జిల్లా చిలకలూరిపేటలో నిర్వహించిన మీడియా సమావేశంలో ఆయన మాట్లాడారు. తెదేపా అధికారంలోకి వస్తుందనడానికి సంకేతమే యువగళమని తెలిపారు. గన్నవరం బహిరంగ సభ మరో ముందడుగు కాబోతోందని చెప్పారు. జగన్‌ అప్పుల కోసం చూడటం తప్ప రైతులను పట్టించుకోవడంలేదని విమర్శించారు.

21/08/2023 13:27(IST)

రేవంత్ రెడ్డి సమక్షంలో కాంగ్రెస్‌లో చేరికలు

హైదరాబాద్‌: టీపీసీసీ చీఫ్ రేవంత్ రెడ్డి సమక్షంలో వర్ధన్నపేట, బాన్సువాడ నియోజకవర్గాలకు చెందిన పలువురు భారాస నేతలు కాంగ్రెస్‌లో చేరారు. వర్ధన్నపేట నియోజకవర్గం ఐనవోలు మండలానికి చెందిన పలువురు వార్డు సభ్యులు, కార్యకర్తలు కాంగ్రెస్‌లో చేరారు. బాన్సువాడ నియోజకవర్గానికి చెందిన జిల్లా డిస్ట్రిబ్యూట్ కమిటీ ఛైర్మన్ వెంకట్ రెడ్డి, మాజీ మార్కెట్ కమిటీ డైరెక్టర్ భాగారెడ్డి, పలువురు వార్డు సభ్యులు, మాజీ వార్డు సభ్యులు కాంగ్రెస్‌లో చేరారు. జూబ్లీహిల్స్‌లోని తన నివాసంలో రేవంత్‌రెడ్డి వారికి కండువా కప్పి పార్టీలోకి ఆహ్వానించారు.

21/08/2023 13:26(IST)

అక్రమంగా ఆవులను తరలిస్తున్న లారీ పట్టివేత

కృష్ణా: అక్రమంగా ఆవులను తరలిస్తున్న లారీని గన్నవరం మండలం కేసరపల్లి వద్ద పోలీసులు స్వాధీనం చేసుకున్నారు. బజరంగ్‌దళ్‌ గో సంరక్షణ బృందం సమాచారంతో విజయనగరం నుంచి చిలకలూరిపేట వెళ్తున్న లారీని పోలీసులు అదుపులోకి తీసుకున్నారు. గోవులను గోశాలకు అప్పగించారు.

21/08/2023 13:24(IST)

పడవ బోల్తా ఘటనలో ముగ్గురి మృతదేహాలు లభ్యం

బాపట్ల: పడవ బోల్తా ఘటనలో ముగ్గురి మృతదేహాలు లభ్యమయ్యాయి. ఆదివారం నిజాంపట్నం హార్బర్‌ వద్ద అలల ఉద్ధృతికి పడవ బోల్తాపడింది. ఈ ప్రమాదంలో తల్లి, ఇద్దరు పిల్లలు గల్లంతయ్యారు. సోమవారం నిజాంపట్నం సముద్ర తీరానికి తల్లి సాయివర్ణిక, కుమారులు తనీష్‌, తరుణేశ్వర్‌ మృతదేహాలు కొట్టుకొచ్చాయి. మృతులు నాగాయలంక మండలం ఈలచెట్లదిబ్బ వాసులు.

21/08/2023 13:20(IST)

వాలంటీర్ల ద్వారా ఓటర్ల జాబితాలో మార్పులు చేస్తున్నారు: పురందేశ్వరి

విజయవాడ: ఓటర్ల జాబితా విషయంలో ఏపీలో అవకతవకలు చోటు చేసుకున్నాయని భాజపా ఏపీ రాష్ట్ర అధ్యక్షురాలు పురందేశ్వరి తెలిపారు. తమకు వ్యతిరేక ఓట్లను అధికార పార్టీ తొలగిస్తోందని ఆరోపించారు. ఉరవకొండలో అక్రమాలకు పాల్పడిన ఇద్దరు ఉద్యోగులు సస్పెండ్‌ అయ్యారని గుర్తు చేశారు. ఓటర్ల జాబితా పర్యవేక్షణ కోసం కమిటీలు వేయాలని కోరారు. వాలంటీర్ల ద్వారా ఓటర్ల జాబితాలో నిబంధనలకు విరుద్ధంగా మార్పులు చేస్తున్నారని పురందేశ్వరి ఆరోపించారు.

21/08/2023 13:13(IST)

వైకాపాకు చెందిన నలుగురు వార్డు సభ్యుల రాజీనామా

నంద్యాల జిల్లా చాగలమర్రి మండలం బ్రాహ్మణపల్లి పంచాయతీలో విభేదాలు చోటు చేసుకున్నాయి. వైకాపాకు చెందిన నలుగురు పంచాయతీ వార్డు సభ్యులు సుబ్బలక్ష్మమ్మ, అనురాధ, సుధారాణి, స్వర్ణలత రాజీనామా చేశారు.

21/08/2023 13:00(IST)

వైఎస్ వివేకా హత్య కేసు.. సునీల్ యాదవ్ బెయిల్ పిటిషన్

హైదరాబాద్‌: వైఎస్ వివేకా హత్య కేసులో ఏ2 నిందితుడిగా ఉన్న సునీల్ యాదవ్ తెలంగాణ హైకోర్టులో బెయిల్ పిటిషన్ దాఖలు చేశారు. ఇప్పటికే జస్టిస్ లక్ష్మణ్ బెంచ్ వద్ద భాస్కర్ రెడ్డి, ఉదయ్ కుమార్ రెడ్డి బెయిల్ పిటిషన్లు ఉన్నాయి. అదే బెంచ్‌కు సునీల్ యాదవ్ బెయిల్ పిటిషన్ బదిలీ చేయాలని జస్టిస్ సురేందర్ రావు రిజిస్ట్రీని ఆదేశించారు.

21/08/2023 12:56(IST)

సోషల్ మీడియాలో జరుగుతున్న ప్రచారం అవాస్తవం: ప్రజారోగ్య శాఖ డైరెక్టర్

కొత్తగూడెంలో రాజకీయ కామెంట్లు చేయొద్దని మంత్రి హరీశ్‌రావు తనకు సూచించినట్లుగా, ఫోన్ చేసి క్లాస్ తీసుకున్నట్లుగా సోషల్ మీడియాలో జరుగుతున్న ప్రచారం పూర్తిగా అవాస్తవమని రాష్ట్ర ప్రజారోగ్య శాఖ డైరెక్టర్‌ శ్రీనివాస రావు తెలిపారు. డాక్టర్ జీఎస్‌ఆర్ ట్రస్టు సేవా కార్యక్రమాల్లో పాల్గొనేందుకు ఆదివారం తాను కొత్తగూడెంలోనే ఉన్నట్లు చెప్పారు. అక్కడి ప్రజల కష్టాలు తెలుసుకునేందుకు ‘గడప గడపకు గడల’ కార్యక్రమాన్ని ప్రారంభించినట్లు తెలిపారు. ఈ కార్యక్రమానికి ప్రజల నుంచి మంచి స్పందన వచ్చిందని వివరించారు. ఈక్రమంలో గిట్టని వ్యక్తులు తప్పుడు ప్రచారాలు చేయిస్తున్నారని ఆరోపించారు. ప్రజలు ఈ ప్రచారాలను నమ్మొద్దని విజ్ఞప్తి చేశారు.

21/08/2023 12:52(IST)

మధ్యాహ్నం 2.30 గంటలకు సీఎం కేసీఆర్‌ మీడియా సమావేశం

హైదరాబాద్‌: సోమవారం మధ్యాహ్నం 2.30 గంటలకు సీఎం కేసీఆర్‌ తెలంగాణ భవన్‌లో మీడియా సమావేశం నిర్వహించనున్నారు. భారాస ఎమ్మెల్యే అభ్యర్థుల ప్రకటన చేయనున్న నేపథ్యంలో ఈ సమావేశానికి ప్రాధ్యాన్యత సంతరించుకుంది.

21/08/2023 12:46(IST)

తిరుమల శ్రీవారి సేవలో కళా వెంకట్రావు

తిరుమల శ్రీవారిని మాజీ మంత్రి కళా వెంకట్రావు దర్శించుకున్నారు. సోమవారం వీఐపీ ప్రారంభ విరామ దర్శన సమయంలో ఆయన కుటుంబ సభ్యులతో కలిసి స్వామివారి సేవలో పాల్గొన్నారు. అంతకుముందు తితిదే ఆలయ అధికారులు ఆయనకు స్వాగతం పలికి దర్శన ఏర్పాట్లు చేశారు. అనంతరం గర్భాలయంలో స్వామివారిని దర్శించుకున్న ఆయనకు రంగనాయకుల మండపంలో పండితులు ఆశీర్వచనాలిచ్చారు.

21/08/2023 12:35(IST)

ప్రజల్లో వ్యతిరేకతతో జగన్‌లో ఫ్రస్టేషన్‌ పెరిగింది: చంద్రబాబు

వ్యవస్థల ధ్వంసంలో ఆరితేరిన సీఎం జగన్‌ ఇప్పుడు మీడియాపై పడ్డారని తెదేపా అధినేత చంద్రబాబు ఆరోపించారు. నియంతలా మారిన జగన్‌.. మీడియాను వేధించే స్థాయికి దిగజారారని విమర్శించారు. మీడియా తనకు భజన చేయాలని జగన్‌ భావిస్తున్నారని అన్నారు. ప్రజల్లో వ్యతిరేకత పెరగడంతో జగన్‌లో ఫ్రస్టేషన్‌ పెరిగిందని ఎద్దేవా చేశారు.

21/08/2023 12:26(IST)

మెదక్‌, మల్కాజిగిరి టికెట్లు ఇస్తేనే భారాస తరఫున పోటీ చేస్తాం: మైనంపల్లి హన్మంతరావు

తిరుమల శ్రీవారిని మైనంపల్లి హన్మంతరావు దర్శిచుకున్నారు. దర్శనానంతరం ఆయన మాట్లాడుతూ.. తన కుమారుడిని మెదక్‌ ఎమ్మెల్యే చేయడమే లక్ష్యమని తెలిపారు. మెదక్‌, మల్కాజిగిరి టికెట్లు ఇస్తేనే భారాస తరఫున పోటీ చేస్తామని స్పష్టం చేశారు. ఇద్దరికి టికెట్‌ ఇవ్వకుంటే స్వతంత్రులుగా పోటీ చేస్తామని వివరించారు.

21/08/2023 12:17(IST)

రాష్ట్రం అభివృద్ధి చెందడకూడదనే ఆటవిక దృక్పథం జగన్‌ది: నల్లమిల్లి రామకృష్ణారెడ్డి

అమరావతి: ఎందరో రెడ్డి రాజులు గతంలో రాష్ట్రాన్ని పాలించారని.. జగన్‌రెడ్డిలా ఏ రెడ్డి రాజు కొన్ని కులాలను అణగదొక్కలేదని తెదేపా నేత నల్లమిల్లి రామకృష్ణారెడ్డి విమర్శించారు. రెడ్డి కులస్థులకు నలుగురికి మంచి చేసే దృక్పథం ఉంటుందని చెప్పారు. రెడ్లకు చెడ్డపేరు తెచ్చేలా జగన్‌ చర్యలు ఉన్నాయని అన్నారు. సీమ పాలెగాళ్ల సంస్కృతిని ఆయన అమలు చేస్తున్నారని తెలిపారు. రాష్ట్రం అభివృద్ధి చెందడకూడదనే ఆటవిక దృక్పథం జగన్‌ది అని మండిపడ్డారు.

21/08/2023 12:09(IST)

ప్రభుత్వ వ్యవస్థలు బాగుంటేనే ప్రజలు, ఉద్యోగులు బాగుంటారు: జగన్‌

విజయవాడలోని ఇందిరాగాంధీ మున్సిపల్ స్టేడియంలో ఏపీ ఎన్జీవోల బహిరంగ సభ నిర్వహించారు. సీఎం జగన్‌ మోహన్‌ రెడ్డి, మంత్రులు బొత్స సత్యనారాయణ, బుగ్గన రాజేంద్రనాథ్‌రెడ్డి, ఆదిమూలపు సురేష్, జోగి రమేష్‌, ప్రభుత్వ సలహాదారు సజ్జల రామకృష్ణారెడ్డి హాజరయ్యారు. ఈ సందర్భంగా సీఎం జగన్‌ మోహన్‌ రెడ్డి మాట్లాడుతూ.. నాడు-నేడు ద్వారా ప్రభుత్వ పాఠశాలలను తీర్చిదిద్దుతున్నట్లు తెలిపారు. కార్పొరేట్‌ పాఠశాలలకు దీటుగా తీర్చిదిద్దుతున్నట్లు చెప్పారు. ప్రభుత్వ వ్యవస్థలు బాగుంటేనే ప్రజలు, ఉద్యోగులు బాగుంటారని చెప్పారు. సీపీఎస్‌ సమస్య పరిష్కారానికి చిత్తశుద్ధితో కృషి చేసినట్లు తెలిపారు. అన్ని రాష్ట్రాలకు ఆదర్శంగా జీపీఎస్‌ తీసుకువచ్చినట్లు గుర్తుచేశారు.

దసరా పండగ రోజు ఒక డీఏ ఇస్తామని, మహిళా ఉద్యోగులకు 5 రోజుల అదనపు సీఎల్‌ ఇస్తామని సీఎం జగన్‌ తెలిపారు.

21/08/2023 12:05(IST)

భాజపా కార్యాలయంలో ఓటరు అవగాహన రాష్ట్రస్థాయి కార్యశాల

విజయవాడ: ఏపీలోని భాజపా రాష్ట్ర కార్యాలయంలో పార్టీ ఏపీ రాష్ట్ర అధ్యక్షురాలు పురందేశ్వరి అధ్యక్షతన ఓటరు అవగాహన రాష్ట్రస్థాయి కార్యశాల ప్రారంభమైంది. ముఖ్య అతిథిగా భాజపా జాతీయ ప్రధాన కార్యదర్శి బండి సంజయ్‌ హాజరయ్యారు. క్షేత్రస్థాయి ఓటరు జాబితాల స్థితిగతులపై ఇందులో విస్తృతంగా చర్చిస్తున్నారు.

21/08/2023 11:59(IST)

సబ్‌ కలెక్టర్‌ కార్యాలయం ఎదుట వేరుశనగ బస్తాలతో రైతు ధర్నా

సత్యసాయి జిల్లా సబ్‌ కలెక్టర్‌ కార్యాలయం ఎదుట సోమందేపల్లి మండలం నడిమిపల్లి రైతు ధర్నా చేశాడు. నకిలీ వేరుశనగ విత్తనాలపై ఫిర్యాదు చేసినా పట్టించుకోవట్లేదని వేరుశనగ విత్తన బస్తాలతో ఆందోళన చేశాడు. తనకు న్యాయం చేయాలని డిమాండ్ చేశాడు.

21/08/2023 11:50(IST)

వ్యవసాయ క్షేత్రంలో వరినాట్లు వేసిన సీబీఐ మాజీ జేడీ లక్ష్మీనారాయణ

తూర్పు గోదావరి: ప్రత్తిపాడు మండలం రాచపల్లి అడ్డ రోడ్డు సమీపంలో తాను కౌలుకు తీసుకున్న వ్యవసాయ క్షేత్రంలో సీబీఐ మాజీ జేడీ లక్ష్మీనారాయణ వరినాట్లు వేశారు. విద్యార్థులతో కలిసి పొలంబాట నిర్వహించారు. ఈ సందర్భంగా ఆయన మాట్లాడుతూ.. ఇంటి పెరట్లో, పాఠశాల ప్రాంగణంలో కూరగాయల మొక్కల పెంపకం చేపట్టి సాగు విశిష్టత తెలుసుకోవాలని కోరారు. జై కిసాన్, జై జవాన్, జై విజ్ఞాన్ నినాదంతో రాణించాలని కోరారు.

21/08/2023 11:40(IST)

ఓట్ల తొలగింపు వ్యవహారంలో మరో ఉన్నతాధికారి సస్పెన్షన్‌

ఉరవకొండ నియోజకవర్గంలో ఓట్ల తొలగింపు వ్యవహారంలో మరో ఉన్నతాధికారి సస్పెన్షన్‌కు గురయ్యారు. అనంతపురంలో గతంలో జడ్పీ సీఈవోగా పనిచేసిన శోభా స్వరూపారాణిని సస్పెండ్ చేస్తూ ప్రభుత్వం ఉత్తర్వులు జారీ చేసింది. ఇప్పటికే జడ్పీ సీఈవో భాస్కర్ రెడ్డి సస్పెన్షన్ కాగా.. ఆయన కంటే ముందు అదే స్థానంలో పనిచేసిన స్వరూపారాణి పైనా సస్పెన్షన్ వేటు పడింది. గతంలో అనంతపురం జడ్పీ సీఈఓగా పని చేసిన సమయంలో ఉరవకొండ నియోజకవర్గంలో అక్రమంగా ఓట్ల తొలగింపునకు బాధ్యురాలిని చేస్తూ సస్పెన్షన్ చేశారు. ప్రస్తుతం స్వరూపారాణి బాపట్ల జిల్లాలో ఎక్స్‌టెన్షన్‌ ట్రైనింగ్ సెంటర్‌కు గెజిటెడ్ ఇన్‌స్ట్రక్టర్‌గా విధులు నిర్వర్తిస్తున్నారు.

21/08/2023 11:37(IST)

ఎమ్మెల్సీ కవితను కలిసిన పలువురు భారాస నేతలు

ఎమ్మెల్సీ కవితను పలువురు భారాస నేతలు, సిట్టింగ్‌ ఎమ్మెల్యేలు కలిశారు. కవితను రేఖా నాయక్‌, ఎన్‌.సంజయ్‌, ముత్తిరెడ్డి యాదగిరిరెడ్డి, ఎల్‌.రమణ, సునీత లక్ష్మారెడ్డి, బొంతు రామ్మోహన్‌, చంద్రావతి, మంత్రులు ఎర్రబెల్లి దయాకర్‌ రావు, కొప్పుల ఈశ్వర్ కలిశారు. బారాస ఎమ్మెల్యే టికెట్‌ కోసం ఆశావహులు ఇంకా ప్రయత్నిస్తున్నారు.

21/08/2023 11:32(IST)

ఉద్యోగ భద్రత కల్పించాలని ఒప్పంద ఉద్యోగుల ధర్నా

మంగళగిరి: ఉద్యోగ భద్రత కల్పించాలని ఉన్నత విద్యామండలి కార్యాలయం వద్ద ఒప్పంద అధ్యాపకులు ధర్నా చేశారు. రాష్ట్రంలోని అన్ని వర్సిటీల నుంచి ఒప్పంద అధ్యాపకులు ఇక్కడికి వచ్చారు. ఒప్పంద అధ్యాపకుల ఉద్యోగాలను క్రమబద్ధీకరించాలని డిమాండ్‌ చేశారు.

21/08/2023 11:27(IST)

ప్రజల శ్రేయస్సు కోసమైతే పోలవరం కట్టండి.. అమరావతిని నిర్మించండి: లోకేశ్‌

ప్రజల శ్రేయస్సు కోసమైతే పోలవరం కట్టాలని, అమరావతిని నిర్మించాలని తెదేపా జాతీయ ప్రధాన కార్యదర్శి నారా లోకేశ్ డిమాండ్‌ చేశారు. ఎస్సీలను చంపి డోర్‌ డెలివరీ చేసిన వైకాపా నేతలపై చర్యలు తీసుకోవాలని కోరారు. ప్రజలను చైతన్యం చేస్తున్న మీడియా అధిపతులను వేధించొద్దని చెప్పారు. మీడియా సంస్థలపై జగన్‌ కక్ష సాధింపును ఖండిస్తూ ఆయన ఈ మేరకు ట్వీట్‌ చేశారు.

21/08/2023 11:13(IST)

బైక్‌ను ఢీకొన్న కారు.. ఇద్దరు మృతి

రంగారెడ్డి: మహేశ్వరం మండలం తుక్కుగూడ వద్ద బైక్‌ను కారు ఢీకొంది. ఈ ఘటనలో ఇద్దరు మృతి చెందారు. మరొకరికి తీవ్రగాయాలు కాగా ఆసుపత్రికి తరలించారు. మృతులను మంకల్‌లోని శ్రీనాథ్‌ రోటో ప్యాక్‌ కంపెనీ కార్మికులుగా గుర్తించారు.

21/08/2023 10:58(IST)

పంజాబ్‌ సరిహద్దులో భారీగా హెరాయిన్‌ పట్టివేత

పంజాబ్‌ సరిహద్దులో అక్రమంగా తరలిస్తున్న 29.26 కిలోల హెరాయిన్‌ను స్వాధీనం చేసుకున్నారు. ఈ ఘటనలో ఇద్దరు పాక్‌ జాతీయులను భారత బలగాలు అరెస్ట్‌ చేశాయి. బీఎస్‌ఎఫ్‌, పంజాబ్‌ పోలీసులు సంయుక్తంగా ఈ కార్యాచరణను చేపట్టాయి. పోలీసుల కాల్పుల్లో పాక్‌కు చెందిన వ్యక్తికి గాయాలయ్యాయి.

21/08/2023 10:46(IST)

బైక్‌పై వెళ్తుండగా కేబుల్‌ తీగలు తగిలి వ్యక్తి మృతి

నాగోల్‌: ద్విచక్రవాహనంపై వెళ్తున్న ఓ వ్యక్తి కేబుల్‌ తీగలు తగిలి కిందపడి అక్కడికక్కడే మృతి చెందాడు. ఈ ఘటన సోమవారం హైదరాబాద్‌ నగరంలోని చైతన్యపురి ఠాణా పరిధిలో చోటు చేసుకుంది. పోలీసులు తెలిపిన వివరాల ప్రకారం.. కొత్తపేటలో నివసించే బోయిని చంద్రకాంత్‌(35) స్థానిక పండ్ల మార్కెట్‌లో వ్యాపారం చేస్తున్నాడు. సోమవారం ఉదయం చంద్రకాంత్‌ తన ద్విచక్రవాహనంపై మార్కెట్‌కు బయలుదేరాడు. మార్గమధ్యలో మారుతీనగర్‌లోని జైన్‌మందిర్‌ రోడ్డులో వేలాడుతున్న కేబుల్‌ తీగలు తలకు తగిలి కింద పడ్డాడు. సుమారు 30 మీటర్ల దూరం వరకు బైక్‌తో సహా జారుతూ వెళ్లాడు. ఈ ప్రమాదంలో చంద్రకాంత్‌ తలకు తీవ్రగాయాలై అక్కడికక్కడే మృతి చెందాడు. సమాచారం అందుకున్న చైతన్యపురి పోలీసులు మృతదేహాన్ని ఉస్మానియా మార్చురీకి తరలించారు. మృతుడికి భార్య, ఇద్దరు పిల్లలు ఉన్నారు.

21/08/2023 10:32(IST)

సరుబుజ్జిలిలో ఓ పక్క కూలిన కల్వర్టు

శ్రీకాకుళం: సరుబుజ్జిలి మండలం చిన్నషలంత్రి కూడలి వద్ద కల్వర్టు శిథిలావస్థకు చేరడంతో వాహనదారులు ఇబ్బందులు పడుతున్నారు. ఉదయం కల్వర్టు మొత్తం ఓ పక్క కూలి రక్షణ గోడ ఒరిగిపోయింది. ఏ క్షణంలో కల్వర్టు కూలుతుందోనని ప్రయాణికులు ఆందోళన చెందుతున్నారు. అధికారులు స్పందించి రాకపోకలకు సౌకర్యం కల్పించాలని వారు కోరుతున్నారు.

21/08/2023 10:28(IST)

ఆటో బోల్తా.. 12 మంది కూలీలకు గాయాలు

టంగుటూరు: ఆటో బోల్తాపడి 12 మంది కూలీలు గాయపడిన ఘటన సోమవారం ఉదయం ప్రకాశం జిల్లా కొండపి మండలంలో చోటు చేసుకుంది. స్థానికులు తెలిపిన వివరాల ప్రకారం.. పొదిలి మండంలోని కొత్తపాలం గ్రామానికి చెందిన 12 మంది మహిళా కూలీలు నూము కోతలు కోసేందుకు ఆటోలో జరుగుమల్లి మండలంలోని వావిలేటిపాడు గ్రామానికి బయలుదేరారు. ఈ క్రమంలో వావిలేటిపాడు గ్రామ సమీపంలోని మలుపు వద్దకు రాగానే ఆటో అదుపుతప్పి బోల్తాపడి పల్టీలు కొట్టి పక్కనే ఉన్న తాటి చెట్టును ఢీకొంది. ఈ ప్రమాదంలో ఆటోలో ఉన్న 12 మంది కూలీలు స్వల్పంగా గాయపడ్డారు. గమనించిన స్థానికులు క్షతగాత్రులను కొండపి పీహెచ్‌సీకి తరలించి చికిత్స అందించారు.

21/08/2023 10:26(IST)

ఇటుకలతో కొట్టి యువకుడి హత్య

జగిత్యాల జిల్లా మెట్‌పల్లిలో అర్ధరాత్రి ఓ యువకుడు దారుణ హత్యకు గురయ్యాడు. పట్టణ శివారులో యువకుడిని గుర్తుతెలియని వ్యక్తులు ఇటుకలతో కొట్టి చంపారు. విషయం తెలుసుకున్న పోలీసులు సంఘటనా స్థలికి చేరుకొని ఘటనకు గల కారణాలను ఆరా తీస్తున్నారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. మృతుడిని పట్టణంలోని చావిడి ప్రాంతానికి చెందిన సతీష్‌గా పోలీసులు గుర్తించారు. నిందితుల కోసం పోలీసులు గాలిస్తున్నారు. మృతుడికి భార్య, కుమారుడు ఉన్నారు.

21/08/2023 10:20(IST)

యువతే దేశ భవిష్యత్తు: వెంకయ్య నాయుడు

గుంటూరు: పదవిలో ఉన్నా లేకపోయినా ప్రజలను కలవడం, మాట్లాడటం తనకు అలవాటని మాజీ ఉపరాష్ట్రపతి వెంకయ్య నాయుడు తెలిపారు. గుంటూరులోని భాష్యం విద్యాసంస్థల్లో ప్రతిభ చూపిన విద్యార్థులను ఆయన సన్మానించారు. ఈ సందర్భంగా ఆయన మాట్లాడుతూ.. యువతే ఈ రాష్ట్రానికి, దేశానికి భవిష్యత్తు అని తెలిపారు. మాతృభాషను మరిచిపోవద్దని, అందరూ మాతృభాషలో మాట్లాడాలని కోరారు.

21/08/2023 10:16(IST)

గన్నవరం నియోజకవర్గంలో సాగనున్న లోకేశ్‌ యువగళం

గన్నవరం నియోజకవర్గంలో సోమవారం తెదేపా జాతీయ ప్రధాన కార్యదర్శి నారా లోకేశ్‌ యువగళం పాదయాత్ర సాగనుంది. సుమారు 16 కిలోమీటర్లు పాదయాత్ర సాగనుంది. ఇందులో భాగంగా లోకేశ్‌ నిడమనూరు క్యాంప్‌ సైట్‌లో బీసీలు, చేతివృత్తిదారులతో ముఖాముఖి నిర్వహించనున్నారు. మధ్యాహ్నం 3 గంటలకు నిడమనూరు క్యాంప్‌ సైట్‌ నుంచి పాదయాత్ర ప్రారంభం కానుంది.

21/08/2023 10:13(IST)

బహదూర్‌పురాలో ఒరిగిన భవనం కూల్చివేత ప్రారంభం

హైదరాబాద్‌: బహదూర్‌పురాలో ఒరిగిన భవనాన్ని భారీ యంత్రాలతో కూల్చుతున్నారు. చుట్టూ ఉన్న 7 భవనాల్లోని 30 కుటుంబాలను ఖాళీ చేయించారు. మాలిక్‌ ట్రేడింగ్‌ డెమోలిషన్‌ కంపెనీ కూల్చివేత పనులు చేపట్టింది.

21/08/2023 10:06(IST)

పడవ బోల్తా ఘటనలో బాలుడి మృతదేహం లభ్యం

బాపట్ల జిల్లా: పడవ బోల్తా ఘటనలో బాలుడి మృతదేహం లభ్యమైంది. ఆదివారం నిజాంపట్నం హార్బర్‌ వద్ద అలల ఉద్ధృతికి పడవ బోల్తా పడింది. ఈ ఘటనలో తల్లి, ఇద్దరు పిల్లలు గల్లంతయ్యారు. సోమవారం నిజాంపట్నం సముద్ర తీరానికి బాలుడు తరుణేశ్వర్‌(11 నెలలు) మృతదేహం కొట్టుకొచ్చింది. గల్లంతైన తల్లి సాయి వర్ణిక, కుమారుడు తనీష్‌ కోసం గాలింపు చేపట్టారు.

21/08/2023 10:01(IST)

ఇన్‌స్టాగ్రామ్‌లో బాలికను వేధిస్తున్న వ్యక్తిపై పోక్సో కేసు

హైదరాబాద్‌: మధురానగర్ పోలీసు స్టేషన్ పరిధిలో మైనర్ బాలికను ఇన్‌స్టాగ్రామ్‌లో వేధిస్తున్న వ్యక్తిపై కేసు నమోదైంది. దుండగుడు ఇన్‌స్టాగ్రామ్‌లో తనకు మెసేజ్ చేయకపోతే ఫోటోలు మార్ఫింగ్ చేస్తానని బాలికను బెదిరించాడు. యువకుడిపై మధురానగర్‌ పోలీసులు పోక్సో కేసు నమోదు చేశారు.

21/08/2023 09:55(IST)

బైక్‌ను ఢీకొన్న ట్రావెల్స్‌ బస్సు.. ఇద్దరి మృతి

నల్గొండ జిల్లా మిర్యాలగూడ అన్నపురెడ్డిగూడెం స్టేజి వద్ద బైక్‌ను ట్రావెల్స్‌ బస్సు ఢీకొని అదుపుతప్పి పొలాల్లోకి దూసుకెళ్లింది. ప్రమాదంలో ఇద్దరు మృతి చెందగా మరొకరికి తీవ్ర గాయాలయ్యాయి. చనిపోయిన ఇద్దరిని చత్తీస్‌గఢ్‌కు చెందిన వలస కూలీలుగా గుర్తించారు.

21/08/2023 09:51(IST)

ఎమ్మెల్యే మంచిరెడ్డి కిషన్‌రెడ్డి ఫామ్‌హౌస్‌లో చోరీ

హైదరాబాద్‌: ఎమ్మెల్యే మంచిరెడ్డి కిషన్‌రెడ్డి ఫామ్‌హౌస్‌లో రెండ్రోజుల క్రితం చోరీ జరిగింది. ఇబ్రహీంపట్నం మండలం వెలిమినేడులోని ఫామ్‌హౌస్‌లో రూ.50 వేలు, రూ.10 వేల విలువైన వాచ్‌ పోయిందని పోలీసులు ఫిర్యాదు చేశారు. ఇబ్రహీంపట్నం పోలీసులు దర్యాప్తు చేస్తున్నారు.

21/08/2023 09:47(IST)

హయత్‌నగర్‌లో పరీక్ష కేంద్రం ఎదుట ఆందోళన

హైదరాబాద్‌: హయత్‌నగర్‌లో పరీక్ష కేంద్రం ఎదుట పీజీటీ అభ్యర్థులు ఆందోళన చేపట్టారు. అభ్యర్థుల ఆందోళనతో రహదారిపై వాహనాలు భారీగా స్తంభించాయి. హైదరాబాద్‌-విజయవాడ జాతీయ రహదారిపై ట్రాఫిక్‌జామ్‌ ఏర్పడింది.

21/08/2023 09:39(IST)

మసాలా దుబ్బగూడ అటవీ ప్రాంతంలో యువకుడి దారుణ హత్య

ఆదిలాబాద్ నేర విభాగం: ఆదిలాబాద్ జిల్లా బేల మండలంలోని భవానిగూడ గ్రామానికి చెందిన కొడప జీవన్ (22) మసాలా దుబ్బగూడ అటవీ ప్రాంతంలో దారుణ హత్యకు గురయ్యాడు. ఆదివారం సాయంత్రం స్నేహితులు ద్విచక్ర వాహనంపై తీసుకెళ్లి కర్రతో దాడిచేసి హత్య చేసినట్లు సమాచారం. సోమవారం ఈ సంఘటన వెలుగు చూసింది. సెల్ ఫోన్ వివాదమే హత్యకు కారణమని తెలిసింది. పోలీసులు కేసు నమోదు చేసి దర్యాప్తు చేస్తున్నారు.

21/08/2023 08:45(IST)

సాంకేతిక సమస్య.. ఇంకా ప్రారంభం కాని పీజీటీ గురుకుల పరీక్ష

హైదరాబాద్‌: పీజీటీ గురుకుల ఆన్‌లైన్‌ పరీక్ష నిర్వహణలో సాంకేతిక సమస్య ఏర్పడింది. సర్వర్‌లో సమస్య తలెత్తిందని పరీక్ష కేంద్రాల నిర్వాహకులు చెబుతున్నారు. దీంతో ఉదయం 8:30 గంటలకు ప్రారంభం కావాల్సిన పరీక్ష ఇంత వరకు మొదలు కాలేదు.అభ్యర్థులను ఇంకా పరీక్ష కేంద్రాల్లోకి సిబ్బంది అనుమతించలేదు. పీజీటీ ఇంగ్లీష్‌ పరీక్ష కోసం కేంద్రాలకు అభ్యర్థులు భారీగా చేరుకున్నారు.

21/08/2023 08:23(IST)

పట్టాలెక్కిన ట్రాక్టర్‌

కొమరాడ : పట్టాలపై రైలు పరుగులు తీయడం చూస్తుంటాం. ఆ పట్టాలపై ట్రాక్టర్‌ను ఎక్కించారు. మూడో లైను పనుల్లో భాగంగా వివిధ అవసరాల నిమిత్తం ఇలా వినియోగిస్తున్నారు. చూపరులు మాత్రం ఎవరో ట్రాకుపై ట్రాక్టర్‌ వదిలి వెళ్లిపోయారేమోనని భావిస్తున్నారు. మండలంలోని సోమినాయుడువలస సమీపంలో కనిపించిన వాహనాన్ని అందరూ విచిత్రంగా పరిశీలించారు.

21/08/2023 08:21(IST)

అదిరిందప్పా..అంబూరు చేప!

చిక్కమగళూరు, న్యూస్‌టుడే: మంగళూరు తీరంలోని అరేబియా సముద్ర జలాల్లో మత్స్యకారుల వలలో పడిన 340 కిలోల ‘అంబూరు సముద్ర చేప’ను ఆదివారం స్థానిక వ్యాపారి ఒకరు చిక్కమగళూరు ఉప్పళ్లి లేఅవుట్లోని తన దుకాణానికి తీసుకువచ్చారు. చేపను చూసేందుకు స్థానికులు ఆసక్తి చూపించారు. కిలో చేప మాంసాన్ని రూ.600కు విక్రయించారు. డిమాండ్‌ ఎక్కువ కావడంతో ఆ తర్వాత రూ.వెయ్యికి విక్రయించారు. అంబూరు సముద్ర చేప సాధారణంగా భారత్‌ నుంచి సౌదీ అరేబియాతో పాటు కొన్ని గల్ఫ్‌ దేశాలకు ఎగుమతి అవుతుందని స్థానిక వ్యాపారులు తెలిపారు.

21/08/2023 08:13(IST)

కరెంటు కారు.. ఎందుకు కంగారు

శంషాబాద్‌ విమానాశ్రయానికి వచ్చే విద్యుత్తు వాహనాలకు ఛార్జింగ్‌ పాయింట్లు లేక వాహనదారులు ఇబ్బందిపడేవారు. ప్రస్తుతం వీటి కోసం ప్రత్యేకంగా ఎయిర్‌పోర్టు పార్కింగ్‌ కేంద్రంలో ఛార్జింగ్‌ పాయింట్లు ఏర్పాటు చేశారు. అక్కడ ఛార్జింగ్‌ అవుతున్న కార్లను చిత్రంలో చూడొచ్చు

21/08/2023 08:13(IST)

ఆగకపోతే.. బతుకులు ఆగమే

ఖైరతాబాద్‌ రైల్వే ట్రాక్‌ వద్ద గేటు వేసినా.. హెచ్చరిక బోర్డు పెట్టినా నిర్లక్ష్యంగా వాహనదారులు ఇలా దాటేసి వెళ్తున్నారు. మరికొందరు రైలు కూత వినబడుతున్నా సరే.. ప్రమాదకరంగా దాటుతూ ప్రాణాల మీదకు తెచ్చుకుంటున్నారు.

21/08/2023 08:12(IST)

రామ్మాచిలకమ్మా.. గూడు కట్టుకోవమ్మా

జంక్షన్ల అభివృద్ధిలో భాగంగా జేఎన్‌టీయూ సిగ్నల్స్‌ వద్ద ఏర్పాటు చేసిన టవర్‌ ఇది. ఇక్కడి విద్యుత్తు స్తంభాలపై పక్షులు ప్రమాదకరంగా గూళ్లు కట్టుకొని ప్రాణాలు కోల్పోతున్నాయి. అలా జరగకుండా టవర్‌ ఏర్పాటు చేసి.. చిలుక, తేనెటీగల బొమ్మలతో ఆకట్టుకొనేలా రూపొందించారు. ఇది ఇక్కడి చౌరస్తాకు అందం తీసుకురావడమే కాకుండా పక్షులకు ఆవాసంగా మారనుంది.

21/08/2023 08:12(IST)

అరణ్యంలో బహుళ అంతస్తులా?

దట్టమైన అడవి ప్రాంతంలో బహుళ అంతస్తుల భవనాలు వెలిశాయా అన్నట్లు ఉంది కదూ ఈ చిత్రం.. కాదండోయ్‌.. కూకట్‌పల్లిలోని ఐడీఎల్‌ రంగధాముని చెరువు వద్ద ఇలా కనిపించింది. చెరువు సమీపంలో పెద్దఎత్తున చెట్లు ఉండడం, వాటి పక్కనే పెద్దప్దెద్ద బిల్డింగులు రూపుదిద్దుకోవడంతో ఇలా దర్శనమిచ్చింది.

21/08/2023 08:11(IST)

విశ్రాంత పోలీస్‌ జాగిలాలకు వృద్ధాశ్రమం

సమాజంలో శాంతిభద్రతల పరిరక్షణకు సేవలందించిన విశ్రాంత పోలీసు జాగిలాల కోసం మధ్యప్రదేశ్‌ పోలీసుశాఖ వృద్ధాశ్రమాన్ని నిర్మించింది. భోపాల్‌లోని పోలీసు జాగిలాల శిక్షణ కేంద్రంలోనే.. ఈ ఆశ్రమాన్ని అత్యున్నత ప్రమాణాలతో తీర్చిదిద్దింది. జాగిలాలను పదవీ విరమణ చేయించిన తర్వాత ఇక్కడికి తరలిస్తున్నారు. ఇక్కడి 6 గదుల్లో ప్రస్తుతం వివిధ జాతులకు చెందిన 18 జాగిలాలు విశ్రాంత జీవితం గడుపుతున్నాయి. వాటికోసం పరుపులు, కూలర్లు, ఫ్యాన్లు, నడక యంత్రాలు వంటివి సమకూర్చారు. సంగీతం వినేందుకు ప్రత్యేక ఏర్పాట్లూ చేశారు. ఎముకల నొప్పులతో బాధపడే శునకాల కోసం ప్రత్యేకంగా బెడ్లను అందుబాటులో ఉంచారు.

21/08/2023 08:10(IST)

తుక్కుగా మారిన కారుకు.. వేలంలో రూ.15 కోట్లు

వింటేజ్‌ కార్లకు విశేష ఆదరణ ఉంటుంది. వేలం నిర్వహణలో అవి రికార్డు ధర పలుకుతుంటాయి. కానీ, టైర్లు ఊడిపోయి.. ఎక్కడికక్కడ కాలిపోయి.. తుక్కుగా మారిన ఓ రేస్‌ కారు ఏకంగా రూ.15 కోట్ల(1.87 మిలియన్‌ డాలర్లు)కు పైగా ధర పలకడం గమనార్హం. అమెరికాలోని కాలిఫోర్నియాలో ‘ఆర్‌ఎం సోథిబే’ సంస్థ నిర్వహించిన వేలంలో ఓ వ్యక్తి ఈ ‘ఫెరారీ 500 మాండియల్‌ స్పైడర్‌ సిరీస్‌-1’ మోడల్‌ కారును భారీ ధరకు సొంతం చేసుకున్నారు. ఇటాలియన్‌ రేసింగ్‌ డ్రైవర్‌ అల్బెర్టో అస్కరీ.. 1952, 53ల్లో వరుసగా సాధించిన ‘ఫార్ములా వన్‌ వరల్డ్‌ డ్రైవర్స్‌ ఛాంపియన్‌షిప్‌’ విజయాలకు గుర్తుగా ఫెరారీ సంస్థ ఈ రేస్‌ కారును తయారు చేసింది. ప్రఖ్యాత ఇటాలియన్‌ డిజైన్‌ సంస్థ ‘పినిన్‌ ఫరీనా’ దీని బాడీ రూపొందించింది. ఫెరారీకి మొట్టమొదటి రేసింగ్‌ విజయాన్ని అందించిన డ్రైవర్‌ ఫ్రాంకో కోర్టేస్‌.. 1954లో ఈ కారును కొనుగోలు చేశారు. అనంతరం 1958లో ఇది అమెరికాకు తరలిపోయింది. 1960ల్లో ఓ రేసులో ప్రమాదానికి గురైన ఈ కారు మంటల్లో కాలిపోయింది. 1978 వరకు చేతులు మారుతూ వచ్చింది. ఆ తర్వాత ఓ వ్యక్తి దాన్ని కొనుగోలు చేసి 45 ఏళ్లపాటు అలాగే ధ్వంసమైన స్థితిలో భద్రపరిచారు. తాజాగా వేలంలో ఈ కారును సొంతం చేసుకున్న వ్యక్తి.. దాన్ని బాగు చేసి మళ్లీ రేసింగ్‌ ట్రాక్‌పై పరుగులు పెట్టిస్తానని చెప్పడం విశేషం.

కాంగ్రెస్‌లో చేరనున్న ఎమ్మెల్యే రేఖా నాయక్‌

తాజా వార్తలు (Latest News)

నాపై కాల్పులు జరిగిన చోటే ర్యాలీ నిర్వహిస్తా: ట్రంప్‌

ఏపీకి ఐపీఎస్‌ కేడర్‌ స్ట్రెంత్‌ పెంపు

‘రాయన్‌’ సక్సెస్‌.. ఫొటో వైరల్‌

నీతి ఆయోగ్‌ భేటీ.. వికసిత్‌ ఏపీ-2047లోని అంశాలను ప్రస్తావించనున్న చంద్రబాబు

ప్రధాని మోదీ అధ్యక్షతన నీతి ఆయోగ్‌ సమావేశం ప్రారంభం

‘కల్కి’లో రాజమౌళి ఎలా భాగమయ్యారు..?: నాగ్‌అశ్విన్‌ ఏం చెప్పారంటే

సుఖీభవ

చదువు