Breaking | Feedback | ePratibha | E-PAPER | Pratibha

సెమీస్‌కి దూసుకెళ్లిన ప్రణయ్‌

Updated : 26 Aug 2023 00:39 IST

సంక్షిప్త వార్తలు - చిత్ర వార్తలు

26/08/2023 00:17(IST)

సెమీస్‌కి దూసుకెళ్లిన ప్రణయ్‌

కొపెన్‌హెగెన్‌: ప్రపంచ బ్యాడ్మింటన్‌ ఛాంపియన్‌షిప్ పురుషుల సింగిల్స్ సెమీస్‌కు భారత స్టార్‌ షట్లర్‌ హెచ్‌.ఎస్‌ ప్రణయ్‌ దూసుకెళ్లాడు. కోపెన్‌హెగెన్‌లో శుక్రవారం జరిగిన క్వార్టర్‌ ఫైనల్‌లో డెన్మార్క్‌కి చెందిన‌ డిఫెండింగ్ ఛాంపియన్ విక్టర్ అక్సెల్‌సెన్‌ను 21-13, 15-21, 16-21 తేడాతో ఓడించాడు. దీంతో ఈ మెగా టోర్నీలో పతాకాన్ని ఖాయం చేశాడు.

26/08/2023 00:10(IST)

మడగాస్కర్‌లో తొక్కిసలాట.. 12 మంది మృతి

అంటననారివో: ఆఫ్రికా ద్వీప దేశమైన మడగాస్కర్‌లో ఘోర ప్రమాదం చోటుచేసుకుంది. ఆదేశ రాజధాని అంటననారివోలో స్టేడియంలో తొక్కిసలాట చోటుచేసుకుని 12 మంది చనిపోయారు. సుమారు 80 మంది గాయపడ్డట్లు ఆదేశ ప్రధాని క్రిస్టియన్‌ ఎన్ట్సే తెలిపారు.

25/08/2023 23:33(IST)

కొండను ఢీకొట్టిన వ్యాన్‌.. ఇద్దరు మహిళలు మృతి

అన్నమయ్య జిల్లా: అన్నమయ్య జిల్లా చిట్వేలు మండలంలో జరిగిన రహదారి ప్రమాదంలో ఇద్దరు మహిళలు మృతి చెందారు. మరో ఆరుగురికి గాయాలయ్యాయి. చిట్వేలు - రాపూర్‌ రహదారిలో ఎదురుగా వస్తున్న వాహనాన్ని తప్పించబోయి ఓ వ్యాన్‌ కొండను ఢీకొట్టింది. ప్రమాదంలో తీవ్ర గాయాలపాలైన ఇద్దరు మహిళలు చికిత్స పొందుతూ మృతి చెందగా.. మరో ఆరుగురు ఆసుపత్రిలో చికిత్స పొందుతున్నారు.

25/08/2023 23:12(IST)

భవనంపై నుంచి దూకి యువకుడి ఆత్మహత్య

హైదరాబాద్‌: హైదరాబాద్‌లోని మూసాపేట్‌లో శుక్రవారం సాయంత్రం ఓ యువకుడు ఆత్మహత్యకు పాల్పడ్డాడు. మూసాపేటలోని మరీనా స్కైస్‌ టవర్‌ భవనం పైనుంచి దూకి వినీత్‌రెడ్డి అనే యువకుడు ఆత్మహత్య చేసుకున్నాడు. వినీత్‌రెడ్డి మాదాపూర్‌ హిల్‌టాప్‌ అవెన్యూలో ఉంటూ కాంట్రాక్టర్‌గా పనిచేసేవాడని గుర్తించారు. ఆత్మహత్యకు సంబంధించిన కారణాలు తెలియాల్సి ఉంది.

25/08/2023 22:56(IST)

మోకిలలో మూడో రోజు 60 ప్లాట్లకు వేలం

హైదరాబాద్: హైదరాబాద్‌ శివారు మోకిలలో ప్రభుత్వం మూడో రోజు ప్లాట్ల వేలం కొనసాగిచింది. ఈ ప్లాట్లను దక్కించుకునేందుకు పలువురు పోటాపోటీగా వేలంలో పాల్గొన్నారు. శుక్రవారం రెండు సెషన్లలో మొత్తం 60 ప్లాట్లకు వేలం నిర్వహించారు. ఇందులో గరిష్ఠంగా గజం ధర రూ.76 వేలు, కనిష్ఠంగా రూ.55 వేలుగా పలికింది. సరాసరిన ఒక్క గజం రూ.64 వేలు పలికినట్లైంది. మోకిలలో గత మూడు రోజుల్లో ప్రభుత్వం మొత్తం 180 ప్లాట్లను విక్రయించటం ద్వారా రూ.381.11 కోట్ల ఆదాయాన్ని సమకూర్చుకుంది. మరో 120 ప్లాట్లకు సంబంధించి సోమ, మంగళవారాల్లో వేలం నిర్వహించనున్నారు.

25/08/2023 22:08(IST)

ఉరేసుకుని యువకుడు ఆత్మహత్య

హైదరాబాద్‌: తన ప్రేమను ఒప్పుకోలేదని ఉరేసుకుని ఓ యువకుడు ఆత్మహత్య చేసుకున్నాడు. మధురానగర్‌ పీఎస్‌ పరిధి కార్మిక నగర్‌లో శ్యామ్‌(19) ఆత్మహత్య చేసుకున్నాడు. యువతి తన ప్రేమను నిరాకరించడంతో శ్యామ్‌ ఆత్మహత్య చేసుకున్నాడు. యువకుడి తల్లిదండ్రుల ఫిర్యాదుతో కేసు నమోదు చేసుకుని పోలీసులు దర్యాప్తు చేస్తున్నారు.

25/08/2023 22:04(IST)

అన్నను హత్య చేసిన తమ్ముడు

కుమురం భీం: జిల్లాలోని బెజ్జురు మండలం కాటేపల్లిలో ఓ తమ్ముడు అన్నను హత్య చేశాడు. అన్న తిరుపతి(45)ని తమ్ముడు దేవాజి గొడ్డలితో నరికి చంపాడు. తల్లి గంగక్కపై దాడికి యత్నించడంతో అన్నను తమ్ముడు హత్య చేశాడు.

25/08/2023 22:02(IST)

రెండు లారీలు ఢీ.. డ్రైవర్‌ మృతి

పెద్దపల్లి: పెద్దపల్లి జిల్లా సుల్తానాబాద్‌ మండలం కాట్నపల్లి వద్ద ప్రమాదం జరిగింది. రెండు లారీలు ఢీకొని మంటలు ఎగసి పడుతున్నాయి. ఈ మంటల్లో చిక్కుకొని లారీ డ్రైవర్‌ సజీవ దహనమయ్యాడు. క్యాబిన్‌లో నుంచి దూకి క్లీనర్‌ ప్రాణాలు దక్కించుకున్నాడు.

25/08/2023 21:52(IST)

2023 వైఎస్‌ఆర్‌ లైఫ్‌టైమ్‌ అవార్డుల దరఖాస్తుల స్వీకరణ ప్రక్రియ

అమరావతి: 2023 వైఎస్‌ఆర్‌ లైఫ్‌టైమ్‌ అవార్డుల దరఖాస్తుల స్వీకరణ ప్రక్రియ మొదలైంది. వ్యక్తులు, సంస్థలు నామినేషన్లు పంపాలని స్రీనింగ్ కమిటీ కోరింది. కళలు, సామాజిక సేవ, శాస్త్రసాంకేతిక రంగంలో రాణించిన వారికి ఈ అవార్డులు అందించనున్నారు. వైద్యం, సాహిత్యం, పౌరసేవలు, క్రీడారంగాల్లో రాణించినవారికి పురస్కారాలు అందించనున్నారు.

25/08/2023 21:41(IST)

తితిదే పాలకమండలి సభ్యులను ప్రకటించిన ప్రభుత్వం

తిరుపతి: ప్రభుత్వం తితిదే పాలకమండలి సభ్యులను ప్రకటించింది. 24 మంది పేర్లతో తితిదే పాలకమండలి జాబితాన విడుదల చేసింది. తితిదే సభ్యులుగా సామినేని ఉదయభాను, పొన్నాడ సతీశ్‌కుమార్‌, తిప్పేస్వామి, అశ్వత్థ నాయక్‌, నాగసత్యం యాదవ్‌, తదితరులను నియమించింది.

25/08/2023 21:21(IST)

TS: కొత్త రెవెన్యూ డివిజన్.. సిద్ధమైన ప్రతిపాదనలు

హైదరాబాద్‌: తెలంగాణలో మరో కొత్త రెవెన్యూ డివిజన్‌ ఏర్పాటుకు ప్రతిపాదనలు సిద్ధమయ్యాయి. భూపాలపల్లి జిల్లాలోని కాటారం డివిజన్‌ ఏర్పాటుకు అధికారులు ప్రతిపాదనలు సిద్ధం చేశారు. ఈ డివిజన్‌ పరిధిలో కాటారం, మహదేవ్‌పూర్‌, మహాముత్తారం, మల్హర్‌రావు, పలిమెల మండలాలతో కొత్త డివిజన్‌ ఏర్పాటు కానుంది. ఈ మేరకు రాష్ట్ర ప్రభుత్వం ప్రాథమిక నోటిఫికేషన్‌ జారీ చేసింది. దీనిపై అభ్యంతరాలు, వినతుల స్వీకరణకు 15 రోజుల గడువు ఇచ్చారు.

25/08/2023 21:12(IST)

వ్యవసాయరంగ వ్యవహారాల సలహాదారుగా చెన్నమనేని రమేశ్‌ బాబు

హైదరాబాద్‌: వ్యవసాయరంగ వ్యవహారాల సలహాదారుగా చెన్నమనేని రమేశ్‌ బాబు నియమితులయ్యారు. కేబినెట్‌ హోదా గల పదవిలో ఆయన ఐదేళ్లు కొనసాగనున్నారు. సీఎం నిర్ణయం మేరకు చెన్నమనేనిని నియమిస్తూ ప్రభుత్వం ఉత్తర్వులు జారీ చేసింది.

25/08/2023 20:41(IST)

జీహెచ్ఎంసీ కమిషనర్‌, హైదరాబాద్‌, రంగారెడ్డి కలెక్టర్లతో సీఈవో భేటీ

హైదరాబాద్: జీహెచ్ఎంసీ కమిషనర్‌, హైదరాబాద్‌, రంగారెడ్డి కలెక్టర్లతో సీఈవో భేటీ అయ్యారు. ఈ సమావేశానికి నాంపల్లి, శేరిలింగంపల్లి ఆర్‌వోలు, ఈఆర్‌వోలు, ఏఈఆర్‌వోలు, ఇతర అధికారులు హజరయ్యారు. ఓటర్ల జాబితాకు వచ్చిన అభ్యంతరాలు, వినతులపై సమీక్ష నిర్వహించారు.

25/08/2023 20:35(IST)

కొండను ఢీకొట్టిన వ్యాన్‌.. పది మందికి గాయాలు

అన్నమయ్య జిల్లా: అన్నమయ్య జిల్లా చిట్వేలు మండలంలో ప్రమాదం జరిగింది. ఎదురుగా వస్తున్న వాహనాన్ని తప్పించబోయి ఓ వ్యాన్‌ కొండను ఢీకొట్టింది. ఈ ప్రమాదంలో ఇద్దరు పది మందికి గాయాలయ్యాయి. బాధితులను ఆసుపత్రికి తరలించి వైద్య సేవలు అందిస్తున్నారు.

25/08/2023 20:33(IST)

తెలంగాణ ఏర్పాడ్డాక మూడుసార్లు అంగన్‌వాడీ వేతనాలు పెంపు: సత్యవతి రాథోడ్‌

హైదరాబాద్‌: ప్రభుత్వం అంగన్‌వాడీ టీచర్లు, హెల్పర్లకు పదవీ విరమణ తర్వాత ఆసరా పింఛన్‌ మంజూరు చేసింది. ఈ మేరకు మంత్రి సత్యవతి రాథోడ్‌ సీఎం కేసీఆర్‌కు శుభాకాంక్షలు తెలిపారు. తెలంగాణ ఏర్పాడ్డాక మూడు సార్లు అంగన్‌వాడీ వేతనాలు పెంచారని గుర్తు చేశారు.

25/08/2023 20:00(IST)

రైతులను మోసం చేసిన శనగ వ్యాపారి

అనంతపురం: జిల్లాలోని కనేకల్ మండలం హనకనహాల్‌లో శనగ వ్యాపారి కృష్టారెడ్డి రైతులను మోసం చేశాడు. రైతుల నుంచి రూ. 15 కోట్ల విలువైన శనగ సేకరించి పరారయ్యాడు. వ్యాపారి ఇంటికి తాళం వేసి వెళ్లిపోవడంతో రైతులు ఆందోళన చెందుతున్నారు.

25/08/2023 19:38(IST)

రాష్ట్ర సీఈవో వికాస్‌ రాజ్‌ను కలిసిన భాజపా ప్రతినిధి బృందం

హైదరాబాద్‌: భాజపా ప్రతినిధి బృందం.. రాష్ట్ర సీఈవో వికాస్‌ రాజ్‌ను కలిసింది. భాజపా నేతలు మర్రి శశిధర్‌ రెడ్డి, ఓంపాఠక్‌, ఇతర నేతలు సీఈవోను కలిశారు. ఒకే కుటుంబ ఓట్లు వివిధ పోలింగ్ కేంద్రాల్లో రావడాన్ని సీఈవో దృష్టికి తీసుకెళ్లారు. ఒకే కుటుంబ ఓట్లను ఒకే పోలింగ్‌ కేంద్రంలోకి మార్చాలని వారు విజ్ఞప్తి చేశారు.

25/08/2023 19:17(IST)

మండలి బుద్ధప్రసాద్‌ దీక్షకు సంఘీభావం తెలిపిన చలసాని శ్రీనివాస్‌

అమరావతి: మండలి బుద్ధప్రసాద్‌ చేపట్టిన దీక్షకు చలసాని శ్రీనివాస్‌ సంఘీభావం తెలిపారు. ఆయన మాట్లాడారు. రైతులు కన్నీరు పెడితే రాష్ట్రానికి మంచిది కాదన్నారు. 25 ఎంపీలు ఇస్తే కేంద్రం మెడలు వంచుతామన్నారు. ఇప్పుడు జగన్‌ అమరావతి, పోలవరాన్ని ప్రభుత్వం పట్టుంచుకోట్లేదని వివరించారు. కడప ఉక్కు పరిశ్రమ, కోస్తా కారిడార్‌ను పట్టించుకోవడం లేదని ఎద్దేవా చేశారు.

25/08/2023 19:00(IST)

చంద్రుడిపై దిగ్విజయంగా పని ప్రారంభించిన రోవర్ ప్రగ్యాన్‌: ఇస్రో

చంద్రుడిపై దిగ్విజయంగా రోవర్‌ ప్రగ్యాన్‌ పని ప్రారంభించింది. జాబిల్లిపై రోవర్‌ 8 మీటర్లు నడిచినట్లు ఇస్రో ప్రకటించింది. అన్ని పేలోడ్స్‌ సక్రమంగా పని చేస్తున్నాయని ఇస్రో తెలిపింది.

25/08/2023 18:18(IST)

రాష్ట్రంలో ఈరోజు అత్యధిక విద్యుత్‌ డిమాండ్

హైదరాబాద్‌: రాష్ట్రంలో ఈరోజు అత్యధిక విద్యుత్‌ డిమాండ్ నమోదైంది. ఉదయం 11 గంటలకు అత్యధిక విద్యుత్‌ డిమాండ్ నమోదైనట్లు అధికారులు తెలిపారు. ఈ విద్యుత్‌ డిమాండ్ వేసవి కాలాన్ని అధిగమించిందని చెప్పారు. ఈరోజు రాష్ట్రంలో 14,136 మెగావాట్ల విద్యుత్‌ డిమాండ్ ఏర్పడిందని తెలిపారు.

25/08/2023 18:16(IST)

తరిగొండ వెంగమాంబ బృందావనంలో ఘనంగా పుష్పాంజలి

తిరుమల: మాతృశ్రీ తరిగొండ వెంగమాంబ 206వ వర్ధంతిని పురస్కరించుకొని తిరుమలలోని వెంగమాంబ బృందావనంలో తితిదే అధికారులు శుక్రవారం ఘనంగా పుష్పాంజలి సమర్పించారు. ఈ సందర్భంగా వెంగమాంబ వంశీయులు ప్రత్యేక పూజలు నిర్వహించారు. కార్యక్రమంలో వెంగమాంబ వంశీయులు శ్రీ విశ్వమూర్తి, వెంగమాంబ ప్రాజెక్టు అధికారులు, భక్తులు పాల్గొన్నారు.

25/08/2023 18:13(IST)

గన్నవరం పరిసరాల్లో భారీ వర్షం

కృష్ణా: గన్నవరం పరిసరాల్లో భారీ వర్షం కురిసింది. సుమారు అరగంట నుంచి ఈదురుగాలులతో కూడిన వర్షం కురిసింది. శ్రీలక్ష్మి తిరుపతమ్మ ఆలయ వార్షికోత్సవంలో భాగంగా ప్రభల ఊరేగింపుతో ట్రాఫిక్‌ స్తంభించింది. చెన్నై- కోల్‌కతా జాతీయ రహదారిపై సుమారు 4 కిలోమీటర్ల మేర వాహనాలు నిలిచిపోయాయి.

25/08/2023 18:02(IST)

జిల్లా అభివృద్ధి కోసం నా జీవితం అంకితం చేశా: తుమ్మల

ఖమ్మం: తుమ్మల నాగేశ్వరరావు ఖమ్మంలో కార్యకర్తలతో సమావేశమయ్యారు. ఆయన మాట్లాడుతూ.. జిల్లా అభివృద్ధి కోసం తన జీవితం అంకితం చేశానని చెప్పారు. ఈ ఎన్నికలు తనకు పెద్దగా అవసరం లేదన్నారు. జిల్లా కోసం పని చేస్తానని వివరించారు. గోదావరి జలాలతో ప్రజల పాదాలు కడిగేందుకు ఎమ్మెల్యేగా వస్తానని ఆశాభావం వ్యక్తం చేశారు.

25/08/2023 17:54(IST)

సైబర్‌ నేరగాళ్ల ఆగడాలకు విశాఖ పోలీసుల అడ్డుకట్ట

విశాఖపట్నం: సైబర్‌ నేరగాళ్ల ఆగడాలకు విశాఖ పోలీసులు అడ్డుకట్ట వేశారు. ఇద్దరు సైబర్‌ నేరగాళ్లను అరెస్ట్‌ చేసినట్లు సీపీ త్రివిక్రమవర్మ తెలిపారు. టాస్క్‌ గేమ్స్‌ పేరుతో ఈ ఏడాది రూ. 9 కోట్లకు పైగా కాజేసినట్లు సీసీ వివరించారు.

25/08/2023 17:34(IST)

లోయలోకి దూసుకెళ్లిన జీపు.. 8 మంది మృతి!

తిరువనంతపురం: కేరళలో ఘోర రోడ్డు ప్రమాదం చోటుచేసుకుంది. ఇక్కడి వాయనాడ్‌ జిల్లాలో ఓ జీపు.. లోయలోకి దూసుకెళ్లిన ఘటనలో ఎనిమిది మంది మృతి చెందారు. మృతుల్లో మహిళలే అధికులని పోలీసులు తెలిపారు.

25/08/2023 17:34(IST)

హైదరాబాద్‌లో ఓటరు నమోదు, సవరణలకు ప్రత్యేక కార్యక్రమాలు

హైదరాబాద్: హైదరాబాద్‌లో ఓటరు నమోదు, సవరణలకు ప్రత్యేక కార్యక్రమాలు నిర్వహించనున్నారు. శనివారం, ఆదివారం జీహెచ్‌ఎంసీ ఆధ్వర్యంలో ప్రత్యేక కార్యక్రమాలు ఏర్పాటు చేయనున్నారు. సెప్టెంబర్‌ 2, 3 తేదీల్లో ఓటరు నమోదు, సవరణకు అవకాశం కల్పించినట్లు హైదరాబాద్ జిల్లా ఎన్నికల అధికారి, జీహెచ్ఎంసీ కమిషనర్ రోనాల్డ్ రోస్ తెలిపారు.

25/08/2023 17:28(IST)

రక్షణ కల్పించాల్సిన పోలీసులే మహిళలపై దాడులు చేస్తున్నారు: రఘునందన్‌ రావు

హైదరాబాద్: బెల్ట్ షాపుల రహిత ఎల్బీనగర్ కోసం.. గంజాయి, డ్రగ్స్ రహిత ఎల్బీనగర్ కోసం భాజపా నాయకుడు సామ రంగారెడ్డి చేపట్టిన 48 గంటల నిరసన దీక్షకు దుబ్బాక ఎమ్మెల్యే రఘునందన్ రావు సంఘీభావం తెలిపారు. సామ రంగారెడ్డికి నిమ్మరసం ఇచ్చి దీక్షను విరమింపజేశారు. ఈ సందర్భంగా రఘునందన్‌రావు మాట్లాడుతూ.. ఎల్బీనగర్ పోలీసుల చేతిలో గిరిజన మహిళ దాడికి గురైన ఘటన మరవక ముందే నందనవనంలో దళిత మైనర్ బాలికపై సామూహిక అత్యాచారం జరగడం బాధాకరమన్నారు. నిందితులను కఠినంగా శిక్షించి, మహిళకు న్యాయం జరగాలని డిమాండ్ చేశారు. రక్షణ కల్పించాల్సిన పోలీసులే మహిళలపై దాడులు చేస్తున్నారని ఆరోపించారు. బార్లు, బీర్లు గంజాయిని అడ్డు పెట్టుకొని భారాస అధికారంలోకి రావాలని చూస్తోందని విమర్శించారు.

25/08/2023 17:23(IST)

26న ఫారెస్ట్‌ ట్రెక్‌ పార్కు ప్రారంభం

రంగారెడ్డి: మంచిరేవులలో శనివారం ఫారెస్ట్‌ ట్రెక్‌ పార్కును ప్రారంభించనున్నారు. పార్కులో సీఎం కేసీఆర్‌ మొక్క నాటనున్నారు. మరోవైపు శనివారం రాష్ట్రవ్యాప్తంగా కోటి మొక్కలు నాటే కార్యక్రమం చేపట్టనున్నారు.

25/08/2023 17:16(IST)

లోకేశ్ సమక్షంలో తెదేపాలో చేరికలు

నూజివీడు: తెదేపా జాతీయ ప్రధాన కార్యదర్శి నారా లోకేశ్‌ నేతృత్వంలో వైకాపా నుంచి తెదేపాలోకి వలసలు కొనసాగుతున్నాయి. యువగళం పాదయాత్రలో భాగంగా నూజివీడులో పలువురు వైకాపా నాయకులు, కార్యకర్తలు లోకేశ్‌ సమక్షంలో తెదేపాలో చేరారు. మంగళగిరి నియోజకవర్గం, దుగ్గిరాలకు చెందిన వైకాపా ముఖ్య నేతలు గురివిందపల్లి రాజీవ్, నన్నేపాగ ప్రభాకర్ వైకాపాను వీడి తెదేపా తీర్థం పుచ్చుకున్నారు. వీరి ఆధ్వర్యంలో దుగ్గిరాలకు చెందిన మరో 30 వైకాపా కుటుంబాలు లోకేశ్‌ సమక్షంలో తెదేపాలో చేరాయి. వీరందరికీ ఆయన కండువాలు కప్పి పార్టీలోకి ఆహ్వానించారు.

25/08/2023 17:14(IST)

ప్రజాస్వామ్యాన్ని జగన్‌ ప్రభుత్వం పాతిపెట్టింది: రామకృష్ణ

మచిలీపట్నం: రాష్ట్రంలో ప్రజాస్వామ్యాన్ని జగన్‌మోహన్‌రెడ్డి నాయకత్వంలోని వైకాపా ప్రభుత్వం పాతిపెట్టిందని సీపీఐ రాష్ట్ర కార్యదర్శి కె.రామకృష్ణ అన్నారు. మచిలీపట్నంలో ఆయన మాట్లాడుతూ.. రాజ్యాంగ, ప్రజాస్వామ్య విలువలకు పాతరేసి పోలీసుల ద్వారా అధికారాన్ని చలాయించడం సిగ్గుచేటన్నారు. వైకాపా అధికారంలోకి వచ్చిన నాటి నుంచి సమస్యలపై పోరాటం చేయకుండా ప్రజా సంఘాలను అడ్డుకోవడం దారుణమన్నారు. ఎక్కడికక్కడ గృహనిర్బంధాలు చేస్తున్నారని, చివరకు ప్రతిపక్ష నేత చంద్రబాబును సైతం జిల్లాలో తిరగనీయకుండా అడ్డుకోవడం అమానుషమన్నారు. ఆయనపై హత్యాయత్నం కేసు పెట్టే నీచస్థితికి దిగజారారని విమర్శించారు.

25/08/2023 17:10(IST)

అగనంపూడి టోల్‌గేట్‌ను తొలగించాలని డిమాండ్‌

విశాఖ: అగనంపూడి టోల్‌గేట్‌ను తొలగించాలని విశాఖ ఎంపీని కార్పొరేటర్‌ గంగారావు కోరారు. కాలపరిమితి తీరిన టోల్‌గేట్‌ను తొలగించాలని డిమాండ్‌ చేశారు. అగనంపూడి టోల్‌గేట్‌తో వాహనదారులను దోపిడీ చేస్తున్నారని ఆరోపించారు.

25/08/2023 17:03(IST)

కేబుల్ వంతెన పైనుంచి దూకి మహిళ ఆత్మహత్యాయత్నం

హైదరాబాద్‌: ఓ మహిళ గురువారం కేబుల్ వంతెన పైనుంచి దూకి ఆత్మహత్యాయత్నం చేసింది. ఆమెను పోలీసులు కాపాడి కౌన్సెలింగ్‌ ఇచ్చి భర్తకు అప్పగించారు. బాధితురాలిని జీడిమెట్ల చింతల్‌ వాసి భాగ్యలక్ష్మిగా గుర్తించారు.

25/08/2023 17:00(IST)

సెప్టెంబర్‌ 7న మిలియన్‌ మార్చ్‌: ప్రేమేందర్‌ రెడ్డి

హైదరాబాద్‌: సెప్టెంబర్‌ 7న మిలియన్‌ మార్చ్‌కు పిలుపునిచ్చినట్లు భాజపా నేత ప్రేమేందర్‌ రెడ్డి తెలిపారు. కలెక్టరేట్ల వద్ద అరెస్ట్ చేసిన భాజపా నేతలను విడుదల చేయాలని డిమాండ్‌ చేశారు. ఆయన మాట్లాడుతూ.. భారాస అప్రజాస్వామికంగా ప్రవర్తిస్తోందని ఆరోపించారు. ఎమ్మెల్యేల క్యాంపు కార్యాలయాలను ఖాళీ చేసే రోజు వస్తుందని ఎద్దేవా చేశారు. పోలీసులు అధికార పార్టీకి తొత్తులుగా మారారని అన్నారు.

25/08/2023 16:56(IST)

నూజివీడు ఘర్షణపై పోలీసులకు తెదేపా నేతల ఫిర్యాదు

నూజివీడు ఘర్షణపై పోలీసులకు తెదేపా నేతలు ఫిర్యాదు చేశారు. తొలుత తెదేపా నేతల వద్ద ఫిర్యాదు తీసుకునేందుకు పోలీసులు నిరాకరించారు. పోలీసు స్టేషన్ ఎదుట నేతలు, శ్రేణులు ధర్నాకు దిగడంతో పోలీసులు ఫిర్యాదు తీసుకున్నారు. పోలీసులకు జవాహర్ తనయుడు కొత్తపల్లి ఆశిష్, గిరిజన నేత వెంకటప్ప ఫిర్యాదు చేశారు. నూజివీడు నియోజకవర్గం తుక్కులూరు బైపాస్ జంక్షన్ వద్ద వైకాపా నేతలు పాలడుగు విజయ్ కుమార్, యలమర్తి చిట్టిబాబు, కొండాలి వెంకటేశ్వరరావు, రాజా మరికొందరు ఉద్దేశపూర్వకంగా పాదయాత్రలోకి చొరబడి బీరు సీసాలు, రాళ్లు పట్టుకుని దాడి చేశారని ఫిర్యాదులో పేర్కొన్నారు. వైకాపా జెండాలతో కూడిన పదునైన ఇనుపరాడ్లు పట్టుకుని వచ్చిన పాలడుగు విజయ్ కుమార్, కొడాలి వెంకటేశ్వరరావులు.. లోకేశ్‌, చంద్రబాబులను దూషించారని ఫిర్యాదులో తెలిపారు. ఎస్సీ, ఎస్టీలమైన తమను కులం పేరుతో బూతులు తిట్టి దాడి చేశారని వాపోయారు. ఫిర్యాదు ప్రతులను తెలుగుదేశం నేతలు జిల్లా ఎస్పీ, డీఎస్పీలకు పంపారు.

25/08/2023 16:53(IST)

చంద్రయాన్‌-3 విజయం.. 750 అడుగుల జాతీయ జెండాతో ప్రదర్శన

చంద్రయాన్-3 విజయవంతం సందర్భంగా కాకినాడ రామచంద్రాపురం ప్రధాన రోడ్డులో మోడ్రన్‌ విద్యాసంస్థలకు చెందిన 750 మంది విద్యార్థులు 750 అడుగుల పొడవు గల జాతీయ పతాకాన్ని ప్రదర్శించారు.

25/08/2023 16:40(IST)

సెప్టెంబర్‌ 7న ‘జవాన్‌’!

షారుక్‌ ఖాన్‌ హీరోగా అట్లీ తెరకెక్కిస్తున్న చిత్రం ‘జవాన్‌’. నయనతార, విజయ్‌ సేతుపతి, ప్రియమణి కీలక పాత్రలు పోషిస్తున్నారు. ఈ సినిమాను సెప్టెంబరు 7న విడుదల చేయనున్నారు. ఈ మేరకు షారుక్‌ ఖాన్‌కు సంబంధించిన ఓ ఫొటోను చిత్రబృందం ట్విటర్‌లో పంచుకుంది.

25/08/2023 16:39(IST)

భారాస-కమ్యూనిస్టుల పొత్తు ఉంటే బాగుండేది: గుత్తా సుఖేందర్‌ రెడ్డి

హైదరాబాద్‌: భారాస-కమ్యూనిస్టుల పొత్తు ఉంటే బాగుండేదని శాసనమండలి ఛైర్మన్‌ గుత్తా సుఖేందర్‌ రెడ్డి తెలిపారు. కమ్యూనిస్టులు ఇండియా కూటమిలో ఉన్నందునే పొత్తు కుదరనట్టుందని అభిప్రాయపడ్డారు. ఉమ్మడి నల్గొండ జిల్లాలోని అన్ని స్థానాల్లో భారాస గెలుస్తుందని ధీమా వ్యక్తం చేశారు.

25/08/2023 16:35(IST)

ప్రధాని నరేంద్ర మోదీకి గ్రీస్‌ అత్యున్నత పురస్కారం

గ్రీస్‌లో పర్యటిస్తున్న ప్రధాని నరేంద్ర మోదీ ఆ దేశ అత్యున్నత పురస్కారాన్ని అందుకున్నారు. మోదీకి గ్రాండ్‌ క్రాస్‌ ఆఫ్‌ ది ఆర్డర్‌ ఆఫ్‌ హానర్‌ పురస్కారాన్ని ఆ దేశ అధ్యక్షురాలు కాటెరినా సకెల్లారోపౌలౌ అందజేశారు. ఈ సందర్భంగా మోదీ మాట్లాడుతూ.. గ్రీస్‌, భారత్‌.. ప్రపంచంలోనే పురాతన నాగరికతలు అని తెలిపారు. రక్షణ, సాగు, విద్యా రంగాల్లో పరస్పర సహకారానికి అంగీకరించినట్లు చెప్పారు.

25/08/2023 16:27(IST)

విశాఖలో ఉరేసుకొని మెడికో ఆత్మహత్య

విశాఖ: టూ టౌన్‌ పరిధిలో కేరళకు చెందిన మెడికో ఆత్మహత్య చేసుకుంది. లాడ్జిలో ఉరేసుకొని రమేష్‌ కృష్ణ ఆత్మహత్య చేసుకుంది. కేరళ యువతి రమేష్‌ కృష్ణ చైనాలో ఎంబీబీఎస్‌ చదువుతోంది. మలయాళంలో సూసైడ్‌ నోట్‌ రాసినట్లు పోలీసులు గుర్తించారు. జీవితంలో ఓడానని, తన చావుకు ఎవరూ బాధ్యులు కాదని లేఖలో వెల్లడించింది.

25/08/2023 16:21(IST)

లాడ్జిలో అనుమానాస్పద స్థితిలో యువకుడి మృతి

చిత్తూరు: కుప్పంలోని లాడ్జిలో యువకుడు అనుమానాస్పద స్థితిలో మృతి చెందాడు. లాడ్జిలో గుడిపల్లి మండలం గుడికొత్తూరుకు చెందిన వినోద్‌కుమార్‌(26) చనిపోయాడు. యువకుడి మృతదేహాన్ని ఇద్దరు మహిళలు ఇంటికి తరలించారు. కుప్పం పోలీసులు మహిళలను అదుపులోకి తీసుకొని ప్రశ్నిస్తున్నారు.

25/08/2023 16:11(IST)

గురుకులాల్లో ఒప్పంద టీచర్ల క్రమబద్ధీకరణకు ప్రభుత్వ ఆమోదం

హైదరాబాద్‌: సాంఘిక సంక్షేమ గురుకులాల్లో ఒప్పంద టీచర్ల క్రమబద్ధీకరణకు తెలంగాణ ప్రభుత్వం ఆమోదం తెలిపింది. ఇందులో భాగంగా రాష్ట్రంలో 567 మంది ఒప్పంద ఉపాధ్యాయులను క్రమబద్ధీకరించనున్నారు. ఒకట్రెండు రోజుల్లో ప్రభుత్వం ఉత్తర్వులు జారీ చేయనుంది. సీఎం కేసీఆర్‌ నిర్ణయంపై మంత్రి కొప్పుల ఈశ్వర్‌ హర్షం వ్యక్తం చేశారు.

25/08/2023 16:06(IST)

ప్రజాకంటక పాలకులను ప్రశ్నిస్తే నేరమెలా అవుతుంది: లోకేశ్‌

యువగళం సభలో రెచ్చగొట్టే వ్యాఖ్యలంటూ కేసులు నమోదు చేశారని నారా లోకేశ్‌ అన్నారు. ప్రజాకంటక పాలకులను ప్రశ్నిస్తే నేరమెలా అవుతుందని ప్రశ్నించారు. ఇప్పుడు రెచ్చగొట్టే వ్యాఖ్యలంటే.. నాడు సీఎంగా ఉన్న చంద్రబాబుపై జగన్‌ చేసినవి ఏంటని మండిపడ్డారు. నాడు చంద్రబాబును కాల్చి చంపండి.. ఉరేయండని జగన్‌ ప్రసంగించారని గుర్తుచేశారు.

25/08/2023 16:00(IST)

ఆర్మూర్‌లో ఎమ్మెల్సీ కవిత, ఎమ్మెల్యే జీవన్‌రెడ్డి ర్యాలీ

నిజామాబాద్‌: ఆర్మూర్‌లో ఎమ్మెల్సీ కవిత, ఎమ్మెల్యే జీవన్‌రెడ్డి ర్యాలీ చేశారు. ర్యాలీకి వచ్చిన నాయకులు, కార్యకర్తలకు అంకాపూర్‌లో జీవన్‌రెడ్డి నివాసం వద్ద భోజనాలు ఏర్పాటు చేశారు. ఒక్కసారిగా కార్యకర్తలు రావడంతో రాకపోకలు స్తంభించాయి. దీంతో ఆర్మూర్‌ మండలం అంకాపూర్ వద్ద ట్రాఫిక్‌జామ్‌ ఏర్పడింది. నిజామాబాద్‌-ఆర్మూర్‌ మార్గంలో వాహన రాకపోకలు నిలిచిపోయాయి.

25/08/2023 15:50(IST)

హైటెక్స్‌లో 11వ సీఎన్‌సీ ఎక్స్‌పో ప్రారంభం

హైదరాబాద్‌: హైటెక్స్‌లో 11వ సీఎన్‌సీ ఎక్స్‌పోను ఏపీ ఫైబర్‌నెట్‌ ఛైర్మన్‌ గౌతమ్‌రెడ్డి ప్రారంభించారు. మూడు రోజుల పాటు కేబుల్‌ నెట్‌ కాన్సెప్ట్‌ ప్రదర్శన జరగనుంది. 200కు పైగా స్టాళ్లలో సరికొత్త కేబుల్‌, బ్రాడ్‌బ్యాండ్‌, డిజిటల్‌ టెక్నాలజీ పరిచయం చేయనున్నారు. దేశంలో కేబుల్‌, బ్రాడ్‌బ్యాండ్‌, ఓటీటీ రంగాల్లో మార్పులపై సెమినార్లు ఇవ్వనున్నారు. కార్యక్రమంలో సీఎన్‌సీ అధినేత రాము పల్లా పాల్గొన్నారు.

25/08/2023 15:40(IST)

సచివాలయ ముట్టడికి పీడీఎస్‌యూ కార్యకర్తల యత్నం

హైదరాబాద్‌: సచివాలయ ముట్టడికి పీడీఎస్‌యూ కార్యకర్తలు యత్నించారు. వారిని పోలీసులు అడ్డుకొని అరెస్ట్‌ చేశారు. పెండింగ్‌ ఉపకార వేతనాలు, బోధనా రుసుములు చెల్లించాలని డిమాండ్‌ చేశారు.

25/08/2023 15:33(IST)

5,089 ఉపాధ్యాయ పోస్టుల భర్తీకి ప్రభుత్వం అనుమతి

హైదరాబాద్‌: డీఎస్సీ ద్వారా 5,089 ఉపాధ్యాయ పోస్టుల భర్తీకి తెలంగాణ ప్రభుత్వం అనుమతి ఇచ్చింది. ఈమేరకు ఆర్థిశాఖ ఉత్తర్వులు జారీ చేసింది. 2,575 ఎస్‌జీటీ, 1,739 స్కూల్‌ అసిస్టెంట్‌, 611 భాషా పండితులు, 164 పీఈటీ పోస్టుల భర్తీకి గ్రీన్‌ సిగ్నల్‌ ఇచ్చారు.

25/08/2023 15:32(IST)

గోకుల్‌ చాట్‌ పేలుళ్ల మృతులకు నివాళి

హైదరాబాద్: గోకుల్ చాట్, లుంబినీ పార్క్ పేలుళ్లకు 16 ఏండ్లు నిండాయి. 2007 ఆగస్టు 25వ తేదీన కోఠిలోని గోకుల్ చాట్ వద్ద ముష్కర ముఠా జరిపిన బాంబు దాడులలో 42 మంది మృతి చెందారు. ఎంతో మంది తీవ్ర గాయాలపాలయ్యారు. వారిలో కొంతమంది వైకల్యం బారిన పడి నేటికీ జీవన్మరణ సమస్యను ఎదుర్కొంటున్నారు. ఈ నేపథ్యంలో మృతులకు నివాళి అర్పించేందుకు ప్రతి సంవత్సరం మాదిరిగానే గోకుల్ చాట్‌ను యాజమాన్యం మూసివేసింది. గోకుల్‌చాట్‌ వద్ద పేలుళ్ల బాధితులు, వారి కుటుంబ సభ్యులు కొవ్వొత్తులు వెలిగించి మృతులకు నివాళి అర్పించారు.

25/08/2023 15:27(IST)

కృష్ణా నదిలోనూ రోడ్లు వేసి ఇసుక తోడేశారు: చంద్రబాబు

మంగళగిరి: సీఎం జగన్‌ రూ.40 వేల కోట్ల ఇసుక దోపిడీకి పాల్పడ్డారని తెదేపా నేత చంద్రబాబు నాయుడు ఆరోపించారు. వైకాపా నేతలు ఎక్కడ చూసినా ఇసుక దోపిడీ చేస్తున్నారని విమర్శించారు. 2022 ఆగస్టు నుంచి వైకాపా నేతలకే ఇసుక దందా అప్పగించారని ఆరోపించారు. ఇసుకలో వాటాల కోసం విచ్చలవిడిగా వ్యవహరించారని తెలిపారు. కృష్ణా నదిలోనూ రోడ్లు వేసి ఇసుకను తోడేశారని చంద్రబాబు తెలిపారు.

25/08/2023 15:20(IST)

కొడంగల్‌లో మంత్రి మహేందర్‌రెడ్డికి ఘన స్వాగతం

మంత్రి మహేందర్‌రెడ్డి కొడంగల్‌ నియోజకవర్గానికి వెళ్లారు. మంత్రిగా ప్రమాణ స్వీకారం చేసిన తర్వాత తొలిసారి కొడంగల్‌కు రావడంతో.. భారాస నేతలు ఆయనకు ఘన స్వాగతం పలికారు. అనంతరం భారీ ర్యాలీ నిర్వహించారు. ర్యాలీలో మంత్రి శ్రీనివాస్‌ గౌడ్‌, బండ ప్రకాశ్‌, మన్నె శ్రీనివాస్‌రెడ్డి, పట్నం నరేందర్‌రెడ్డి పాల్గొన్నారు.

25/08/2023 15:16(IST)

ఏపీలో రాజకీయాలు అధ్వానంగా ఉన్నాయి: రాఘవులు

ఏపీలో రాజకీయాలు అధ్వానంగా ఉన్నాయని సీపీఎం పొలిట్ బ్యూరో సభ్యుడు రాఘవులు అన్నారు. పెదనందిపాడులో శుక్రవారం ఆయన తేళ్ల నారాయణ విజ్ఞాన కేంద్రాన్ని ప్రారంభించారు. ఈ సందర్భంగా ఆయన మాట్లాడుతూ.. అమరావతిలో కత్తులు దూసుకుంటున్నారని ఆరోపించారు. విశాఖపట్నం కబ్జాల కేంద్రంగా మారిందని విమర్శించారు. తెదేపా పాలనలో చేయని పనులు పీకలకు చుట్టుకున్నాయని చెప్పారు. శాసనసభ భవనాలు శాశ్వతంగా నిర్మిస్తే మూడు రాజధానుల పంచాయితీ ఉండేది కాదని అన్నారు.

25/08/2023 15:11(IST)

మధిర అసెంబ్లీ స్థానం కోసం భట్టి విక్రమార్క దరఖాస్తు

మధిర అసెంబ్లీ స్థానంలో కాంగ్రెస్‌ టికెట్‌ కోసం సీఎల్పీ నేత భట్టి విక్రమార్క దరఖాస్తు చేసుకున్నారు. భట్టి తరఫున గాంధీభవన్‌ ఇన్‌ఛార్జి కుమార్‌రావు దరఖాస్తు సమర్పించారు.

25/08/2023 14:54(IST)

రైలు ఢీకొని జనసేన పార్టీ మండలశాఖ అధ్యక్షుడు దుర్మరణం

కొత్తవలస: జనసేన పార్టీ కొత్తవలస మండల శాఖ అధ్యక్షుడు నక్కరాజు సతీష్ (36) రైలు ఢీకొని దుర్మరణం చెందారు. ఇదే మండలం దేవాడ గ్రామానికి చెందిన సతీష్‌ కొత్తవలస వచ్చి బహిర్భూమికి వెళ్లేందుకు డాబాలుగెడ్డ వద్ద రైలుపట్టాలు దాటుతుండగా విజయనగరం నుంచి విశాఖపట్నం వెళ్తున్న బొకారో ఎక్స్‌ప్రెస్‌ రైలు ఢీకొంది. మృతదేహం తునా తునకలైంది. విజయనగరం ప్రభుత్వ రైల్వే పోలీస్ స్టేషన్ ఎస్ఐ రఘువర్మ కేసు నమోదు చేశారు. పోస్టుమార్టం కోసం మృతదేహాన్ని శృంగవరపుకోట ప్రాంతీయ ఆసుపత్రికి తరలించారు. మృతునికి భార్య, తల్లి, ఇద్దరు పిల్లలు ఉన్నారు. ఆయన మృతిపై కుటుంబసభ్యులతో పాటు జనసైనికులు దిగ్భ్రాంతికి లోనయ్యారు.

25/08/2023 14:44(IST)

రామ్‌నగర్‌ ఆశ్రమ బాలికల హాస్టల్‌లో విద్యార్థులకు అస్వస్థత

నిర్మల్‌: రామ్‌నగర్‌ ఆశ్రమ బాలికల హాస్టల్‌లో విద్యార్థులు అస్వస్థతకు గురయ్యారు. రెండు రోజుల క్రితం విద్యార్థులకు బోదకాలు మాత్రలు పంపిణీ చేశారు. గురువారం రాత్రి సుమారు పది మంది విద్యార్థులు అస్వస్థతకు గురయ్యారు. దీంతో సిబ్బంది విద్యార్థులకు చికిత్స అందించి వసతి గృహానికి పంపారు. శుక్రవారం మరోసారి విద్యార్థులు అస్వస్థతకు గురయ్యారు. చికిత్స నిమిత్తం వారిని జిల్లా ప్రభుత్వ ఆసుపత్రికి తరలించారు.

25/08/2023 14:43(IST)

కంటోన్మెంట్ అసెంబ్లీ సెగ్మెంట్‌కు కేంద్ర మాజీ మంత్రి దరఖాస్తు

హైదరాబాద్‌: కంటోన్మెంట్ అసెంబ్లీ సెగ్మెంట్‌ కాంగ్రెస్‌ టికెట్‌ కోసం కేంద్ర మాజీ మంత్రి సర్వే సత్యనారాయణ దరఖాస్తు చేసుకున్నారు. గతంలో పార్టీ నుంచి సస్పెండ్ చేశారంటూ దూరంగా ఉంటున్న సర్వే ఈరోజు గాంధీ భవన్‌కు వచ్చి కంటోన్మెంట్ అసెంబ్లీకి దరఖాస్తు చేసుకున్నారు.

25/08/2023 14:36(IST)

వర్గం, పార్టీ పేరు చెప్పి ఓట్లు తొలగించడం సరికాదు: కేశినేని నాని

అమరావతి: ఈ నెల 27న తమ పార్టీ అధినేత చంద్రబాబుతో కలిసి దిల్లీకి వెళ్తున్నట్లు తెలుగుదేశం విజయవాడ ఎంపీ కేశినేని నాని తెలిపారు. ఓట్ల తొలగింపుపై 28వ తేదీన సీఈసీని కలిసి ఫిర్యాదు చేయనున్నట్లు వెల్లడించారు. ఆయన మాట్లాడారు. వర్గం, పార్టీ పేరు చెప్పి ఓట్లు తొలగించడం సరి కాదన్నారు. ఎవరి ఓట్లు తొలగించినా తప్పే అని స్పష్టం చేశారు. ఎంపీ నిధులు రూ. 13 కోట్లతో జిల్లాలో నీటి సదుపాయం కల్పిస్తున్నామన్నారు. దేశంలో ఎక్కడా లేని విధంగా విజయవాడ పార్లమెంటులో ఎంపీ నిధులు ఎక్కువగా ఖర్చు పెట్టామని వివరించారు.

25/08/2023 14:22(IST)

పథకాల పేరుతో భారాస ఎమ్మెల్యేలు దోచుకున్నారు: లక్ష్మణ్‌

హైదరాబాద్‌: సెప్టెంబర్ 7వ తేదీలోపు అర్హులందరికీ రెండుపడక గదుల ఇళ్లు, బీసీ బంధు, దళిత బంధు ఇవ్వాలని భాజపా రాజ్యసభ సభ్యుడు లక్ష్మణ్ డిమాండ్ చేశారు. లేని పక్షంలో సెప్టెంబర్ 7న మిలియన్ మార్చ్ తరహాలో హైదరాబాద్‌ను ముట్టడిస్తామని హెచ్చరించారు. ఆయన మీడియాతో మాట్లాడారు. ఉత్తరప్రదేశ్‌లో యోగీ ప్రభుత్వం ఐదేళ్లలో 50లక్షల మందికి ఇళ్లు కట్టించిందన్నారు. కేసీఆర్ మాత్రం రూ. 16వందల కోట్లు ఖర్చు పెట్టి సచివాలయం కట్టుకున్నారని ఎద్దేవా చేశారు. ఎమ్మెల్యేల క్యాంపు కార్యాలయాలు, పార్టీ కార్యాలయాలు కట్టుకున్నారు తప్పితే నిరుపేదలకు ఇళ్లు ఇవ్వలేదని ఆగ్రహం వ్యక్తం చేశారు. పథకాల పేరుతో భారాస ఎమ్మెల్యేలు దోచుకున్నారని ఆరోపించారు.

25/08/2023 14:14(IST)

ఎమ్మెల్యే భాగ్యలక్ష్మికి సొంత పార్టీ నుంచి నిరసన సెగ

అల్లూరి: పాడేరు వైకాపా ఎమ్మెల్యే భాగ్యలక్ష్మికి సొంత పార్టీ నుంచి నిరసన సెగ ఎదురైంది. జి.మాడుగుల మండలం పులుసుమామిడిలో గడప గడపకు మన ప్రభుత్వం కార్యక్రమం చేపట్టారు. ఇందులో భాగంగా పులుసుమామిడికి ఆమె వెళ్లగా.. ఓట్లు వేసి గెలిపించిన వారి వద్ద ముఖం చూపలేకపోతున్నామని తోకగరువు వార్డు సభ్యుడు ఆవేదన వ్యక్తం చేశాడు. జీవో నంబర్‌ 3పై ఎలా సంతకం పెట్టారని ఎమ్మెల్యేను నిలదీశారు.

25/08/2023 14:08(IST)

అల్లు అర్జున్‌కు అవార్డు వచ్చినందుకు ఎంతో గర్వపడుతున్నా: బాలకృష్ణ

అల్లు అర్జున్‌కు అవార్డు వచ్చినందుకు ఎంతో గర్వపడుతున్నట్లు సినీనటుడు బాలకృష్ణ తెలిపారు. తెలుగు సినిమా దేశవిదేశాల్లో సత్తా చాటడం సంతోషకరమని తెలిపారు. విదేశీయులు కూడా తెలుగు సినిమా చూసే స్థాయికి రావడం హర్షణీయమని చెప్పారు.

25/08/2023 14:03(IST)

తుమ్మల నాగేశ్వర్‌రావు ర్యాలీలో కనిపించని భారాస జెండాలు

భారాస నేత తుమ్మల నాగేశ్వర్‌రావు నాయకన్‌గూడెం నుంచి ఖమ్మం వరకు ర్యాలీగా బయలుదేరారు. తుమ్మల ర్యాలీలో ఎక్కడా భారాస జెండాలు కనిపించలేదు. ర్యాలీలో కేవలం తుమ్మల ఫొటో ఉన్న ఫ్లెక్సీ, జెండాలు ప్రదర్శించారు.

25/08/2023 14:00(IST)

విద్యుత్‌ ఉపకేంద్రం గేటుకు తాళం వేసి రైతుల నిరసన

సత్యసాయి జిల్లాలోని తాడిమర్రి విద్యుత్‌ ఉప కేంద్రాన్ని రైతులు ముట్టడించారు. విద్యుత్‌ కోతలతో పంటలు ఎండిపోతున్నాయని 4 గ్రామాల రైతులు ఆందోళన చేశారు. విద్యుత్‌ ఉపకేంద్రం గేటుకు తాళం వేసి ముళ్ల కంచె అడ్డుగా పెట్టారు.

25/08/2023 13:56(IST)

వస్త్ర దుకాణంలో పూజా హెగ్డే సందడి

కడప నగరంలో నూతనంగా ఏర్పాటు చేసిన ఓ వస్త్ర దుకాణాన్ని సినీ నటి పూజా హెగ్డే ప్రారంభించారు. ఈ సందర్భంగా ఆమె ఫొటోలకు పోజులిస్తూ సందడి చేశారు. పూజాను చూసేందుకు అభిమానులు పెద్దఎత్తున తరలివచ్చారు.

25/08/2023 13:54(IST)

ముషీరాబాద్‌ కాంగ్రెస్‌ టికెట్‌ కోసం తండ్రీకుమారుల దరఖాస్తు

హైదరాబాద్‌: ముషీరాబాద్‌ కాంగ్రెస్‌ టికెట్‌ కోసం తండ్రీకుమారులు దరఖాస్తు చేసుకున్నారు. ఈ స్థానం కోసం అంజన్‌ కుమార్‌, అనిల్ కుమార్‌ దరఖాస్తు చేసుకున్నారు. కరీంనగర్‌ స్థానానికి కేసీఆర్‌ అన్న కుమార్తె రమ్యారావుతో పాటు.. ఆమె కుమారుడు రితేశ్‌ రావు దరఖాస్తు చేసుకున్నారు.

25/08/2023 13:44(IST)

వాన్‌పిక్‌ కేసులో ఏపీ ప్రభుత్వానికి సుప్రీంకోర్టు నోటీసులు

దిల్లీ: వాన్‌పిక్‌ కేసులో ఏపీ ప్రభుత్వానికి సుప్రీంకోర్టు నోటీసులు జారీ చేసింది. తదుపరి విచారణ, ఉత్తర్వులిచ్చే వరకు ‘స్టేటస్‌ కో’ అమలు చేయాలని ఆదేశించింది. వాన్‌పిక్‌కు అనుకూలంగా ఇచ్చిన హైకోర్టు తీర్పుపై ఈడీ సుప్రీంకోర్టును ఆశ్రయించింది. ఇప్పటికే 15 ఏళ్లు వృథాగా గడిచిపోయాయని వాన్‌పిక్‌ ప్రాజెక్ట్‌ తరఫు న్యాయవాది వాదనలు వినిపించారు. విచారణలో జాప్యంతో ప్రాజెక్టు ముందుకు కదలట్లేదని చెప్పారు. మొత్తం ప్రాజెక్టు భూములను ఈడీ అటాచ్‌ చేయడం తగదని అన్నారు.

25/08/2023 13:36(IST)

కాసేపట్లో అనుచరులను కలవనున్న తుమ్మల నాగేశ్వర్‌రావు

ఖమ్మం: కాసేపట్లో తుమ్మల నాగేశ్వర్‌రావు ఖమ్మం జిల్లాకు చేరుకోనున్నారు. భారాస టికెట్ల ప్రకటన తర్వాత తొలిసారి ఆయన ఖమ్మం వెళ్తున్నారు. ఆయనకు భారాస ఎమ్మెల్యే టికెట్‌ దక్కలేదు. తుమ్మల అనుచరులు ఆయన్ను తప్పక పోటీ చేసి తీరాలని కోరుతున్నారు. అనుచరులను కలిసేందుకు తుమ్మల నాగేశ్వరరావు ఖమ్మం వెళ్తున్నారు. ఆయనకు స్వాగతం పలికేందుకు భారీగా కార్యకర్తలు చేరుకున్నారు.

25/08/2023 13:32(IST)

తెలంగాణ తొలి దళిత ఉప ముఖ్యమంత్రికి మళ్లీ టికెట్‌ ఇవ్వలేదు: ఉత్తమ్‌ కుమార్‌ రెడ్డి

హైదరాబాద్‌: ఈ 9 ఏళ్లలో తెలంగాణ అప్పులు భారీగా పెరిగాయని ఎంపీ ఉత్తమ్ కుమార్‌ రెడ్డి ఆరోపించారు. హైదరాబాద్‌లోని గాంధీ భవన్‌లో నిర్వహించిన మీడియా సమావేశంలో ఆయన మాట్లాడారు. రూ.90 వేల కోట్ల నుంచి రూ.4 లక్షల కోట్లకు పైగా అప్పు పెరిగిందని చెప్పారు. ఎన్నో మోసపూరిత హామీలు ఇచ్చి కేసీఆర్‌ అధికారంలోకి వచ్చారని విమర్శించారు. తెలంగాణ తొలి దళిత ఉప ముఖ్యమంత్రికి మళ్లీ టికెట్‌ ఇవ్వలేదని ఎద్దేవా చేశారు. తెలంగాణ వస్తే దళితుడే తొలి ముఖ్యమంత్రి అని కేసీఆర్‌ అన్నారని గుర్తుచేశారు. సాండ్‌, ల్యాండ్‌, మైన్స్‌, వైన్స్‌ మాఫియాగా భారాస ఎమ్మెల్యేలు ఎదిగారని ఆయన ఆరోపించారు.

25/08/2023 13:23(IST)

భిక్షాటన చేసి డీఎస్సీ-98 అభ్యర్థుల నిరసన

తాడేపల్లిలో డీఎస్సీ-98 అభ్యర్థులు జోలె పట్టి భిక్షాటన చేసి నిరసన తెలిపారు. అర్హులందరికీ ఉద్యోగాలివ్వాలని వారు డిమాండ్‌ చేశారు. మెరిట్‌ ప్రాతిపదికన నియామకాలతో నష్టపోయినట్లు తెలిపారు. ఎస్సీ, ఎస్టీ, బీసీ, మైనార్టీ అభ్యర్థులు నష్టపోయారని చెప్పారు. సీఎం స్పందించి అర్హులందరికీ ఉద్యోగాలివ్వాలని కోరారు.

25/08/2023 13:15(IST)

గోరపల్లిలో కుటుంబం ఆత్మహత్యాయత్నం

విశాఖ: పెందుర్తి మండలం గోరపల్లిలో ఓ కుటుంబం ఆత్మహత్యాయత్నం చేసింది. కేజీహెచ్‌లో చికిత్స పొందుతూ కుటుంబ పెద్ద సత్తిబాబు(57) మృతి చెందాడు. ఆయన భార్య సూర్యకుమారి, కుమార్తె నీలిమ పరిస్థితి విషమంగా ఉంది.

25/08/2023 12:59(IST)

ఆ 16 నియోజకవర్గాల్లో వైకాపాకు డిపాజిట్ లేకుండా చేస్తాం: కొల్లు రవీంద్ర

స్వార్థం కోసం కొడాలి నాని జగన్‌కు కూడా ద్రోహం చేస్తాడని తెదేపా పొలిట్‌బ్యూరో సభ్యుడు కొల్లు రవీంద్ర ఆరోపించారు. ఓటమి భయం వైకాపా నేతల్లో స్పష్టంగా కనిపిస్తోందని దుయ్యబట్టారు. బీసీలు పెయిడ్ ఆర్టిస్టులంటూ వైకాపా నేతలు మాట్లాడుతున్నారని ధ్వజమెత్తారు. తమ మీద కేసులు పెడితే భయపడే పరిస్థితి లేదని స్పష్టం చేశారు. రంగన్నగూడెంలో పోలీసుల వైఫల్యం స్పష్టంగా కనిపిస్తోందని విమర్శించారు. పేర్ని నాని బందరు పిచ్చోడని ఎద్దేవా చేశారు. ఉమ్మడి కృష్ణా జిల్లా 16 నియోజకవర్గాల్లో వైకాపాకు డిపాజిట్ లేకుండా తెలుగుదేశం దెబ్బ చూపిస్తామని హెచ్చరించారు.

25/08/2023 12:53(IST)

జాతీయ చలనచిత్ర అవార్డు విజేతలకు మంత్రి అభినందనలు

తెలుగు సినిమా చరిష్మాను జాతీయ స్థాయిలో నిలబెట్టి ఉత్తమ నటుడిగా ఎంపికైన అల్లు అర్జున్‌కు ఏపీ సినిమాటోగ్రఫీ శాఖ మంత్రి చెల్లుబోయిన వేణుగోపాలకృష్ణ అభినందనలు తెలిపారు. తెలుగు సినిమా ఖ్యాతిని ఇప్పటికే అంతర్జాతీయ స్థాయిలో నిలబెట్టిన ఆర్ఆర్ఆర్ సినిమా.. జాతీయ స్థాయిలోనూ ఉత్తమ పాపులర్ మూవీగా నిలవడంతో తెలుగు సినిమా అభిమానిగా ఎంతో గర్విస్తున్నట్లు తెలిపారు. అవార్డులు పొందిన వారందరికీ ఆయన శుభాకాంక్షలు చెప్పారు.

25/08/2023 12:37(IST)

చర్చి, మసీదు ప్రారంభోత్సవంలో పాల్గొన్న సీఎం, గవర్నర్‌

హైదరాబాద్‌: సచివాలయం ప్రాంగణంలో చర్చి ప్రారంభోత్సవ వేడుకలో గవర్నర్‌ తమిళిసై సౌందర రాజన్‌, సీఎం కేసీఆర్‌ పాల్గొని కేక్‌ కోశారు. దీంతో పాటు వారు మసీదును ప్రారంభించారు.

25/08/2023 12:28(IST)

కాంగ్రెస్‌ టికెట్ల కోసం జానారెడ్డి ఇద్దరు కుమారుల దరఖాస్తు

హైదరాబాద్‌: కాంగ్రెస్‌ టికెట్ల కోసం జానారెడ్డి ఇద్దరు కుమారులు దరఖాస్తు చేసుకున్నారు. జానారెడ్డి పెద్ద కుమారుడు రఘువీర్‌రెడ్డి నాగార్జునసాగర్‌, మిర్యాలగూడ స్థానాల్లో టికెట్‌ ఆశిస్తున్నారు. చిన్న కుమారుడు జైవీర్‌రెడ్డి నాగార్జునసాగర్‌ టికెట్‌ ఆశిస్తున్నారు. ఎమ్మెల్యే టికెట్‌ కోసం సీనియర్‌ నేత జానారెడ్డి దరఖాస్తు చేసుకోలేదు. ఈసారి ఆయన ప్రత్యక్ష ఎన్నికలకు దూరంగా ఉండనున్నారు.

25/08/2023 12:18(IST)

కేసీఆర్‌ పాలనపై ప్రజలు విసుగు చెందారు: ఈటల రాజేందర్‌

ఖమ్మంలో భాజపా సభ ఏర్పాట్లను ఈటల రాజేందర్‌ పరిశీలించారు. ఈ సందర్భంగా ఆయన మాట్లాడుతూ.. కేసీఆర్‌ పాలనపై ప్రజలు విసుగు చెందారని తెలిపారు. మళ్లీ కేసీఆర్‌కు అధికారమిస్తే రాష్ట్రం అధోగతి పాలవుతుందని విమర్శించారు. కేసీఆర్‌ అహంకారాన్ని తుంగలో తొక్కి తనను గెలిపించారని గుర్తు చేశారు. కేసీఆర్‌ను ఎదుర్కొనే శక్తి భాజపాకు తప్ప మరో పార్టీకి లేదని చెప్పారు.

25/08/2023 12:14(IST)

యువగళం పాదయాత్రపై వైకాపా కార్యకర్తల రాళ్ల దాడి

నూజివీడు: ఏలూరు జిల్లా తుక్కులూరు వద్ద తీవ్ర ఉద్రిక్తత చోటు చేసుకుంది. యువగళం పాదయాత్రపై వైకాపా కార్యకర్తలు రాళ్లు విసిరారు. వైకాపా కార్యకర్తలను పోలీసులు అడ్డుకోవట్లేదని తెదేపా ఆరోపిస్తోంది. ఈక్రమంలో వైకాపా కార్యకర్తలను అడ్డుకునేందుకు తెదేపా కార్యకర్తలు యత్నించారు. తెదేపా కార్యకర్తలపై పోలీసులు లాఠీఛార్జి చేశారు.

25/08/2023 12:11(IST)

నల్లపోచమ్మ ఆలయాన్ని ప్రారంభించిన సీఎం, గవర్నర్‌

హైదరాబాద్‌: సచివాలయం ప్రాంగణంలో నిర్మించిన నల్లపోచమ్మ ఆలయాన్ని సీఎం కేసీఆర్‌, గవర్నర్‌ తమిళిసై సౌందర రాజన్‌ ప్రారంభించారు. ఈ సందర్భంగా ఆలయంలో ఏర్పాటు చేసిన పూర్ణాహుతి కార్యక్రమానికి వారు హాజరయ్యారు.

25/08/2023 12:05(IST)

ఐఏఎస్‌ అధికారిణి శ్రీలక్ష్మికి సుప్రీంకోర్టు నోటీసులు

దిల్లీ: ఐఏఎస్‌ అధికారిణి శ్రీలక్ష్మికి సుప్రీంకోర్టు నోటీసులు ఇచ్చింది. తెలంగాణ హైకోర్టు శ్రీలక్ష్మికి క్లీన్‌ చిట్‌ ఇవ్వడంపై సీబీఐ సుప్రీంకోర్టును ఆశ్రయించింది. ఓబులాపురం మైనింగ్‌ కేసులో సీబీఐ అభియోగాలను గతంలో హైకోర్టు కొట్టివేసింది. ప్రస్తుతం శ్రీలక్ష్మి ఏపీ ప్రభుత్వ ప్రత్యేక ప్రధాన కార్యదర్శిగా విధులు నిర్వర్తిస్తున్నారు.

25/08/2023 12:00(IST)

మంత్రి సబితా ఇంద్రారెడ్డి క్యాంపు ఆఫీస్‌ ముట్టడికి భాజపా యత్నం

రంగారెడ్డి: మీర్‌పేట్‌ పరిధి జిల్లెలగూడలోని మంత్రి సబితా ఇంద్రారెడ్డి క్యాంపు ఆఫీస్‌ వద్ద ఉద్రిక్తత నెలకొంది. మంత్రి క్యాంపు ఆఫీస్‌ ముట్టడికి భాజపా కార్యకర్తలు యత్నించారు. మహిళలు, బాలికలపై దాడులు, లైంగిక దాడులను ఖండిస్తూ నిరసన చేపట్టారు. భాజపా నేతలు, కార్యకర్తలను మీర్‌పేట పోలీసులు అరెస్ట్‌ చేశారు.

25/08/2023 11:48(IST)

భాగ్యలక్ష్మి అమ్మవారిని దర్శించుకున్న గవర్నర్‌

హైదరాబాద్‌: శ్రావణ శుక్రవారం సందర్భంగా గవర్నర్‌ తమిళిసై సౌందర రాజన్‌ చార్మినార్‌ వద్ద ఉన్న భాగ్యలక్ష్మి అమ్మవారిని దర్శించుకొని ప్రత్యేక పూజలు చేశారు.

25/08/2023 11:46(IST)

కేంద్రీయ గిరిజన వర్సిటీకీ సీఎం శంకుస్థాపన

విజయనగరం జిల్లా మెంటాడ మండలం చిన్న మేడపల్లి వద్ద కేంద్రీయ గిరిజన వర్సిటీకీ సీఎం జగన్‌మోహన్‌రెడ్డి, కేంద్రమంత్రి ధర్మేంద్ర ప్రధాన్‌ శంకుస్థాపన చేశారు. మెంటాడ, దత్తిరాజేరు మండలాల పరిధిలో వర్సిటీ నిర్మాణం చేపట్టనున్నారు. శంకుస్థాపన అనంతరం సీఎం, కేంద్ర మంత్రి మరడాం చేరుకున్నారు. మరడాం బహిరంగ సభలో జగన్‌ పాల్గొన్నారు. ఈ సందర్భంగా జగన్‌ మోహన్‌ రెడ్డి మాట్లాడుతూ.. గిరిజన వర్సిటీ మంజూరు చేసిన ప్రధానికి ప్రత్యేక ధన్యవాదాలు తెలిపారు. రాష్ట్రంలో రెండో గిరిజన వర్సిటీకి శంకుస్థాపన చేసినట్లు తెలిపారు. గిరిపుత్రుల జీవితాల్లో ఉన్నత విద్య కాంతులు నింపేందుకు వర్సిటీ ఉపయోగపడుతుందని వివరించారు.

25/08/2023 11:40(IST)

గద్దర్‌ పాటలు బడుగుల జీవితం, సమస్యలను ప్రతిబింబిస్తాయి: నరేంద్ర మోదీ

హైదరాబాద్‌: గద్దర్‌ భార్య గుమ్మడి విమలకు ప్రధాని నరేంద్ర మోదీ లేఖ రాశారు. గద్దర్‌ కుటుంబ సభ్యులకు సానుభూతి తెలిపారు. గద్దర్ మృతి చెందారని తెలిసి చాలా బాధపడ్డట్లు చెప్పారు. గద్దర్‌ పాటలు బడుగుల జీవితం, సమస్యలను ప్రతిబింబిస్తాయని తెలిపారు. గద్దర్‌ రచనలు ప్రజలకు ఎంతో స్ఫూర్తిని అందించాయని ప్రధాని మోదీ పేర్కొన్నారు.

25/08/2023 11:37(IST)

తెదేపా నేతలపై కేసు.. హత్యాయత్నం సెక్షన్‌ను చేర్చిన పోలీసులు

గన్నవరం: కృష్ణా జిల్లా రంగన్నగూడెం ఫ్లెక్సీల వివాదంలో తెదేపా నేతలు దేవినేని ఉమ, కొల్లు రవీంద్ర, కొనకళ్ల నారాయణ, రావి వెంకటేశ్వరరావు, యార్లగడ్డ వెంకట్రావు సహా పలువురు నాయకులపై నమోదైన కేసుల్లో హత్యాయత్నం సెక్షన్‌ను కూడా పోలీసులు చేర్చారు. గన్నవరం నియోజకవర్గం రంగన్నగూడెం ఘర్షణల్లో పోలీసులు, తెలుగుదేశం శ్రేణులపై హత్యాయత్నం ఘటనలో ఎస్సీ, ఎస్టీ అట్రాసిటీ కేసులు నమోదు చేశారు. 3 కేసుల్లో దాదాపు 50మందితోపాటు ఇతరులు అంటూ కేసులో పేర్కొన్నారు. అమెరికాలో ఉన్న ఆళ్ల గోపాల కృష్ణ రంగన్నగూడెం ఘర్షణల్లో పాల్గొన్నాడంటూ ఆయనపైనా వివిధ సెక్షన్ల కింద 2కేసులు నమోదు చేశారు. గన్నవరం తెదేపా ఇన్‌ఛార్జి యార్లగడ్డ వెంకట్రావుని ఏ1గా చేర్చారు. కృష్ణాజిల్లా తెలుగుదేశం నేతలు దేవినేని ఉమా, కొల్లురవీంద్ర, కొనకళ్ల నారాయణలపైనా కేసులు నమోదయ్యాయి. గన్నవరం తెలుగుదేశం కీలక నేతలే లక్ష్యంగా పోలీసులు కేసులు నమోదు చేశారు.

25/08/2023 11:31(IST)

విద్యుత్‌ ఉపకేంద్రం ఎదుట రైతులు, తెదేపా నేతల ధర్నా

నంద్యాల: అప్రకటిత విద్యుత్‌ కోతలను నిరసిస్తూ నంద్యాల జిల్లాలోని ఆత్మకూరు విద్యుత్‌ ఉపకేంద్రం ఎదుట రైతులు, తెదేపా నేతలు ధర్నా చేశారు. వారంతా రహదారిపై బైఠాయించడంతో భారీగా ట్రాఫిక్‌ జామ్‌ ఏర్పడింది. కోతలు లేకుండా పగటిపూట విద్యుత్‌ సరఫరా చేయాలని నిరసనకారులు డిమాండ్‌ చేస్తున్నారు.

25/08/2023 11:28(IST)

డీఎస్సీ కార్యాలయ ముట్టడికి డీఎడ్, బీఎడ్ అభ్యర్థుల యత్నం

హైదరాబాద్‌: 13,500 టీచర్ పోస్టులు ఖాళీగా ఉన్నప్పటికీ కేవలం 5 వేల టీచర్ పోస్టులు భర్తీ చేస్తామని ప్రభుత్వం చెప్పడాన్ని నిరసిస్తూ డీఎడ్, బీఎడ్ అభ్యర్థులు డీఎస్సీ కార్యాలయ ముట్టడికి యత్నించారు. అసెంబ్లీలో సీఎం కేసీఆర్‌ చెప్పిన లెక్కల ప్రకారం 13,500 పోస్టులతో డీఎస్సీ నోటిఫికేషన్ జారీ చేయాలని డిమాండ్ చేశారు. ప్రమోషన్స్ ద్వారా ఏర్పడే ఖాళీలను ఇప్పుడే డీఎస్సీలో జత చేయాలని కోరారు.

25/08/2023 11:23(IST)

పేర్ని నాని ఫిర్యాదు.. తెదేపా నేతలపై కేసులు

యువగళం గన్నవరం సభ ప్రసంగాల విషయంలో తెదేపా నేతలపై కేసులు నమోదు చేశారు. మాజీ మంత్రి పేర్ని నాని ఫిర్యాదు మేరకు అయన్న, బుద్ధా వెంకన్నపై కేసులు నమోదు చేశారు. సభలో రెచ్చగొట్టే వ్యాఖ్యలు చేశారంటూ ఆత్కూరు పోలీసు స్టేషన్‌లో పేర్ని నాని ఫిర్యాదు చేశారు.

25/08/2023 11:19(IST)

షాద్‌నగర్ కాంగ్రెస్‌ టికెట్‌ కోసం ఈర్లపల్లి శంకర్ దరఖాస్తు

హైదరాబాద్‌: షాద్‌నగర్ కాంగ్రెస్‌ టికెట్‌ కోసం ఈర్లపల్లి శంకర్ దరఖాస్తు చేశారు. భారీగా అనుచరులతో గాంధీ భవన్‌కు వచ్చి దరఖాస్తు దాఖలు చేశారు. టికెట్ తనకే వస్తుందని ఆయన ధీమా వ్యక్తం చేశారు. పీసీసీ తలపెట్టిన అన్ని కార్యక్రమాలకు చిత్తశుద్ధితో పనిచేసినట్లు తెలిపారు. కాంగ్రెస్ భారీ బహిరంగ సభల విజయవంతం కోసం తన నియోజకవర్గ ప్రజలు కృషి చేశారని చెప్పారు. షాద్‌నగర్‌లో ఎగిరేది కాంగ్రెస్ జెండా అని అన్నారు.

25/08/2023 11:14(IST)

వీఆర్‌ఏల ఆందోళన.. విజయవాడ ధర్నా చౌక్‌ వద్ద మోహరించిన పోలీసులు

విజయవాడ ధర్నా చౌక్‌ వద్ద పోలీసులు భారీగా మోహరించారు. డిమాండ్లు పరిష్కరించాలంటూ అక్కడ వీఆర్‌ఏలు ఆందోళన చేపట్టారు. ఎన్నికల సమయంలో జగన్ ఇచ్చిన హామీలు నెరవేర్చాలని డిమాండ్‌ చేశారు. మరోవైపు చలో విజయవాడకు అనుమతి లేదని పోలీసులు తెలిపారు. విజయవాడకు చేరుకున్న పలువురు వీఆర్‌ఏలను అదుపులోకి తీసుకున్నారు. ధర్నాచౌక్‌ మార్గంలో ఎవరూ వెళ్లకుండా బారికేడ్లు ఏర్పాటు చేశారు.

25/08/2023 11:08(IST)

కవితకు ఇస్తే.. 33 శాతం మహిళలకు టికెట్‌ ఇచ్చినట్లే: బండి సంజయ్‌

కవితకు కేసీఆర్‌ టికెట్‌ ఇస్తే 33 శాతం మహిళలకు టికెట్‌ ఇచ్చినట్లే అని కరీంనగర్‌ ఎంపీ బండి సంజయ్‌ విమర్శించారు. ప్రకటించిన 115 మందిలో సగం మందికి కేసీఆర్‌ బీఫామ్‌ ఇవ్వరు అని ఆరోపించారు. క్యాడర్‌ను కాపాడుకునేందకు కేసీఆర్‌ జిమ్మిక్కులు చేస్తున్నారని తెలిపారు. భారాస నేతల్లో చాలా మంది భాజపాలో చేరేందుకు సిద్ధంగా ఉన్నారని వివరించారు. సర్వేలన్నీ భారాస ఓడిపోతుందని చెబుతున్నాయని పేర్కొన్నారు. భారాసకు 25 సీట్లు మాత్రమే వస్తాయని సర్వేలు చెబుతున్నాయని బండి సంజయ్‌ అన్నారు.

25/08/2023 10:58(IST)

తిరుపతి నుంచి సికింద్రాబాద్‌ వచ్చిన ప్రత్యేక రైలులో చోరీ

తిరుపతి నుంచి సికింద్రాబాద్‌ వచ్చిన ప్రత్యేక రైలులో చోరీ జరిగింది. ముగ్గురు మహిళల మెడలోంచి దొంగలు 10 తులాల బంగారు నగలు అపహరించారు. బంగారం మాయంపై బాధితులు జీఆర్‌పీ పోలీసులకు ఫిర్యాదు చేశారు. రైల్వే పోలీసులు కేసు నమోదు చేసి దర్యాప్తు చేస్తున్నారు.

25/08/2023 10:54(IST)

27న ఖమ్మం రానున్న అమిత్‌ షా

కేంద్ర హోం మంత్రి అమిత్‌ షా 27న ఖమ్మం రానున్నారు. ‘రైతు గోస - బీజేపీ భరోసా’ సభలో పాల్గొననున్నారు. అమిత్‌ షా 27న దిల్లీ నుంచి బయలుదేరి మధ్యాహ్నం 1.25 గంటలకు గన్నవరం ఎయిర్‌పోర్ట్‌కు చేరుకోనున్నారు. గన్నవరం నుంచి హెలికాప్టర్‌లో 2.10 గంటలకు కొత్తగూడెం చేరుకుంటారు. కొత్తగూడెం నుంచి రోడ్డు మార్గంలో భద్రాచలం వెళ్లి 2.25 నుంచి 2.40 గంటల మధ్య రామాలయంలో పూజలు చేస్తారు. భద్రాచలం నుంచి రోడ్డు మార్గాన కొత్తగూడెం చేరుకోనున్నారు. కొత్తగూడెం నుంచి హెలికాప్టర్‌లో బయలుదేరి‌ ఖమ్మం చేరుకొని బహిరంగ సభలో పాల్గొననున్నారు. బహిరంగ సభ తర్వాత గంట పాటు తెలంగాణ భాజపా నేతలతో సమావేశం కానున్నారు. సాయంత్రం 5.45 గంటలకు హెలికాప్టర్‌లో బయలుదేరి గన్నవరానికి చేరుకుంటారు. సాయంత్రం 6.20 గంటలకు అమిత్‌షా దిల్లీకి తిరుగు ప్రయాణం అవుతారు.

25/08/2023 10:47(IST)

నేటితో ముగియనున్న కాంగ్రెస్‌ ఆశావహుల దరఖాస్తుల స్వీకరణ

హైదరాబాద్‌: కాంగ్రెస్‌ ఆశావహుల దరఖాస్తుల స్వీకరణ ప్రక్రియ శుక్రవారంతో ముగియనుంది. ఇప్పటి వరకు 723 దరఖాస్తులు వచ్చాయి. చివరి రోజు కావడంతో నేడు పెద్ద సంఖ్యలో దరఖాస్తులు వచ్చే అవకాశం ఉంది. ఇల్లందు నియోజకవర్గ టికెట్ కోసం 36 మంది ఆశావాహులు దరఖాస్తులు సమర్పించారు. ఇప్పటికే రేవంత్‌రెడ్డి, కోమటి రెడ్డి వెంకట్ రెడ్డి, జీవన్ రెడ్డి, పొన్నాల లక్ష్మయ్య, షబ్బీర్ అలీ తదితరులు దరఖాస్తులు ఇచ్చారు. శుక్రవారం భట్టి విక్రమార్క, ఉత్తమ్ కుమార్‌ రెడ్డి, శ్రీధర్ బాబు, సీతక్క, జగ్గారెడ్డి తదితరులు అర్జీలు ఇవ్వనున్నారు. శనివారం నుంచి పీసీసీ దరఖాస్తుల పరిశీలన చేయనుంది.

25/08/2023 10:43(IST)

26న తెలంగాణకు రానున్న మల్లికార్జున ఖర్గే

హైదరాబాద్: కాంగ్రెస్‌ పార్టీ జాతీయ అధ్యక్షుడు మల్లికార్జున ఖర్గే శనివారం హైదరాబాద్‌కు రానున్నారు. చేవెళ్ల జనగర్జన బహిరంగ సభకు ఆయన ముఖ్య అథితిగా హాజరు కానున్నారు. సభలో ఎస్సీ, ఎస్టీ డిక్లరేషన్ ప్రకటించనున్నారు. మల్లికార్జున ఖర్గే శనివారం సాయంత్రం 4.50 గంటలకు బెంగళూరు నుంచి హైదరాబాద్ చేరుకుంటారు. 5.30 గంటలకు చేవెళ్ల బహిరంగ సభకు హాజరు కానున్నారు.

25/08/2023 10:37(IST)

హైదరాబాద్‌లో గ్లోబల్‌ కెబాబిలిటీ కేంద్రాన్ని ఏర్పాటు చేయనున్న ఆమనికాం

ప్రముఖ కార్పొరేట్ కమ్యూనికేషన్స్ సంస్థ ఆమనికాం హైదరాబాద్‌లో గ్లోబల్ కెబాబిలిటీ కేంద్రాన్ని ఏర్పాటు చేయనున్నట్లు ప్రకటించింది. ఈ కేంద్రం ఏర్పాటుతో 2,500 మందికి పైగా ఉద్యోగ అవకాశాలు లభించనున్నాయి.

25/08/2023 10:34(IST)

రూ.13.25 లక్షల విలువైన కరెన్సీ నోట్లతో అమ్మవారికి అలంకరణ

తూర్పుగోదావరి జిల్లా కడియం మండలం కడియపులంకలోని ముసలమ్మ తల్లి ఆలయంలో అమ్మవారు శ్రావణ శుక్రవారం రోజున ప్రత్యేక అలంకరణలో భక్తులకు దర్శనమిచ్చారు. సుమారు 13.25 లక్షల విలువైన కరెన్సీ నోట్లతో అమ్మవారిని ప్రత్యేకంగా అలంకరించారు.

25/08/2023 10:31(IST)

వరంగల్‌లో భూ ప్రకంపనలు

వరంగల్‌లో శుక్రవారం తెల్లవారుజామున భూ ప్రకంపనలు వచ్చాయి. తెల్లవారుజామున 4.43 గంటలకు భూమి స్వల్పంగా కంపించింది. దీని తీవ్రత రిక్టర్ స్కేల్‌పై 3.6గా నమోదైనట్లు నేషనల్ సెంటర్ ఫర్ సిస్మోలజి తెలిపింది. భూ అంతర్భాగంలో 30 కిలోమీటర్ల లోపల కదలికలు సంభవించినట్లు వెల్లడించింది. తెల్లవారుజామున భూమి కంపించడంతో ప్రజలు ఒక్కసారిగా ఉలిక్కిపడి ఇళ్ల నుంచి బయటకు పరుగులు తీశారు.

25/08/2023 10:27(IST)

సచివాలయం ప్రాంగణంలో నల్ల పోచమ్మ ఆలయం ప్రారంభ వేడుకలు

హైదరాబాద్‌: సచివాలయం ప్రాంగణంలో నల్ల పోచమ్మ ఆలయం ప్రారంభ వేడుకలు నిర్వహిస్తున్నారు. పూజల్లో మంత్రి ప్రశాంత్‌రెడ్డి దంపతులు పాల్గొన్నారు. సీఎస్‌ శాంతికుమారి పూజలు చేశారు. మధ్యాహ్నం పూర్ణాహుతికి గవర్నర్‌ తమిళిసై సౌందర రాజన్‌, సీఎం కేసీఆర్‌ హాజరు కానున్నారు.

25/08/2023 10:23(IST)

ఎన్నికల్లో మమ్మల్ని ఎదుర్కోలేక కుట్రలు చేస్తున్నారు: ప్రత్తిపాటి పుల్లారావు

నూజివీడు: ఎన్నికల్లో తమను ఎదుర్కోలేక కుట్రలు చేస్తున్నారని తెదేపా నేత ప్రత్తిపాటి పుల్లారావు ఆరోపించారు. నూజివీడు యువగళం బస కేంద్రం వద్ద ఆయన మీడియాతో మాట్లాడారు. తప్పుడు కేసులతో సంస్కార హీనులుగా మిగిలిపోతున్నారని విమర్శించారు.

25/08/2023 10:21(IST)

స్టేషన్‌కు వెళ్లి ఫిర్యాదు చేసినందుకు మాపై కేసు పెట్టారు: దేవినేని ఉమ

పోలీసు స్టేషన్‌కు వెళ్లి ఫిర్యాదు చేసినందుకు తమపై కేసు పెట్టారని దేవినేని ఉమ ఆరోపించారు. నూజివీడు యువగళం బస కేంద్రం వద్ద ఆయన మీడియాతో మాట్లాడారు. అమెరికాలో ఉన్న నాయకులపైనా తప్పుడు కేసులు పెట్టారని చెప్పారు. ఎన్నికల సమయంలో బ్లాక్‌మెయిల్‌ చేసే కుట్రలో భాగంగానే తప్పుడు కేసులు పెడుతున్నారని విమర్శించారు.

25/08/2023 10:13(IST)

తెలుగు చిత్ర పరిశ్రమ మరిన్ని ఉన్నత శిఖరాలకు చేరుకోవాలి: వెంకయ్య నాయుడు

జాతీయ చలనచిత్ర అవార్డు విజేతలకు మాజీ ఉపరాష్ట్రపతి వెంకయ్య నాయుడు అభినందనలు తెలిపారు. తెలుగు చిత్ర పరిశ్రమ 11 పురస్కారాలు గెలుచుకోవడం ఆనందంగా ఉందని అన్నారు. ఆర్‌ఆర్‌ఆర్‌, పుష్ప, ఉప్పెన చిత్రబృందాలకు అభినందనలు తెలిపారు. తెలుగు చిత్ర పరిశ్రమ మరిన్ని ఉన్నత శిఖరాలకు చేరుకోవాలని వెంకయ్య నాయుడు ఆకాంక్షించారు.

25/08/2023 10:09(IST)

భద్రకాళి అమ్మవారి ఆలయానికి పోటెత్తిన భక్తులు

వరంగల్‌: శ్రావణ శుక్రవారం కావడంతో భద్రకాళి అమ్మవారి ఆలయానికి భక్తులు పోటెత్తారు. రాజరాజేశ్వరి ఆలయంలో సామూహిక వరలక్ష్మీ వ్రతాలు చేపట్టారు. కన్యకా పరమేశ్వరి గుడిలో అమ్మవారికి గాజులతో ప్రత్యేక అలంకరణ చేశారు.

25/08/2023 10:01(IST)

కృష్ణా ఎక్స్‌ప్రెస్‌లో పొగలు

తిరుపతి నుంచి సికింద్రాబాద్‌కు వెళ్తున్న కృష్ణా ఎక్స్‌ప్రెస్‌లో పొగలు వచ్చాయి. రైలు చక్రాల నుంచి పొగలు రావడంతో ప్రయాణికులు గుర్తించారు. ఈక్రమంలో ప్రయాణికులు వెంకటగిరి, ఎల్లకూరు మధ్య చైన్‌ లాగి సుమారు 20 నిమిషాలు రైలును నిలిపేశారు. రైల్వే సిబ్బంది మరమ్మతులు చేయడంతో.. వెంకటగిరి నుంచి 8.20 గంటలకు కృష్ణా ఎక్స్‌ప్రెస్‌ తిరిగి బయలుదేరింది.

25/08/2023 09:58(IST)

చెరువులో చేపలు మాయం చేసిన వైకాపా నాయకులు

గుంటూరు: అనంతవరప్పాడులోని గ్రామ పంచాయతీ చెరువులో గురువారం అర్ధరాత్రి చేపలు మాయమయ్యాయి. వైకాపా నాయకులే చేపలు పట్టించారని ఉన్నతాధికారులకు గ్రామస్థులు ఫిర్యాదు చేశారు. ప్రశ్నించిన పంచాయతీ సిబ్బందిపైనా దౌర్జన్యం చేశారని ఆరోపించారు.

25/08/2023 09:51(IST)

ఐఎంఎస్‌ కుంభకోణంలో అభియోగపత్రాలు దాఖలు చేసిన ఈడీ

హైదరాబాద్‌: ఐఎంఎస్‌ కుంభకోణంలో ఈడీ అభియోగపత్రాలు దాఖలు చేసింది. ఐఎంఎస్‌లో రూ.211 కోట్ల కుంభకోణం కేసులో ఛార్జిషీట్‌ దాఖలు చేసింది. ఛార్జిషీట్‌లో దేవికారాణితో పాటు 15 మందిని నిందితులుగా పేర్కొన్నారు. గతంలో నిందితులకు చెందిన రూ.144 కోట్ల ఆస్తులను ఈడీ జప్తు చేసింది.

25/08/2023 09:46(IST)

కోనాపురం విద్యుత్‌ ఉపకేంద్రాన్ని ముట్టడించిన రైతులు

అనంతపురం: కోనాపురం విద్యుత్‌ ఉపకేంద్రాన్ని రైతులు ముట్టడించారు. వ్యవసాయానికి సక్రమంగా విద్యుత్‌ సరఫరా చేయాలని డిమాండ్‌ చేశారు. విద్యుత్‌ కోతలతో పంటలు ఎండిపోతున్నాయని రైతులు ఆవేదన వ్యక్తం చేశారు. చిన్న ముష్టూరు, పెద్ద ముష్టూరు, మోపిడి, ఇంద్రావతి రైతులు ఆందోళనలో పాల్గొన్నారు.

25/08/2023 09:42(IST)

ప్రైవేటు ట్రావెల్స్ బస్సు బోల్తా.. ఐదుగురికి గాయాలు

నందిగామ: విజయవాడ-హైదరాబాద్ జాతీయ రహదారిపై నందిగామ సమీపంలోని మునగచర్ల అడ్డరోడ్డు వద్ద ప్రైవేటు ట్రావెల్స్ బస్సు అదుపుతప్పి బోల్తా పడింది. ప్రమాద సమయంలో బస్సులో 38 మంది ప్రయాణికులు ఉన్నారు. మయూరి ట్రావెల్స్‌కు చెందిన బస్సు హైదరాబాద్ నుంచి విజయనగరం వైపు బయలుదేరింది. ఈ క్రమంలో గురువారం అర్ధరాత్రి ఒంటి గంట సమయంలో మునగచెర్ల అడ్డ రోడ్డు వద్దకు రాగానే అదుపుతప్పి బోల్తాపడింది. ప్రమాదంలో బస్సులోని ఐదుగురు ప్రయాణికులకు గాయాలయ్యాయి. వారిని నందిగామ ప్రభుత్వ వైద్యశాలకు తరలించి చికిత్స అందిస్తున్నారు. నందిగామ ఏసీపీ సంఘటనా స్థలానికి చేరుకొని క్షతగాత్రులను వైద్యశాలకు తరలించారు. దీనిపై కేసు నమోదు దర్యాప్తు చేస్తున్నట్లు ఆయన తెలిపారు.

25/08/2023 09:38(IST)

బుద్ధ ప్రసాద్‌ దీక్ష.. ఫ్లెక్సీలతో అధికార పార్టీ నేతల కవ్వింపు చర్యలు

అవనిగడ్డ: దివిసీమ ఎదుర్కొంటున్న సమస్యలపై శుక్రవారం బుద్ధ ప్రసాద్‌ దీక్ష చేయనున్నారు. ఈ నేపథ్యంలో కృష్ణా జిల్లాలోని పులిగడ్డలో పలువురు అధికార పార్టీ నేతలు ఫ్లెక్సీలు ఏర్పాటు చేసి కవ్వింపు చర్యలకు పాల్పడుతున్నారు. బుద్ధ ప్రసాద్‌ను కించపరిచేలా పులిగడ్డ నాలుగు రోడ్ల కూడలిలో ఫ్లెక్సీలు కడుతున్నారు. ఫ్లెక్సీలు వేసి రెచ్చగొట్టేందుకు కుట్ర జరుగుతోందని, పార్టీ కార్యకర్తలు, రైతులు సంయమనంతో వ్యవహరించి సత్యాగ్రహ కార్యక్రమం విజయవంతం చేయడం పైనే దృష్టి పెట్టాలని బుద్ధ ప్రసాద్‌ సూచించారు.

25/08/2023 09:31(IST)

తిరుమల శ్రీవారి దర్శనానికి 15 గంటల సమయం

తిరుమలలో టోకెన్లు లేని భక్తులకు శ్రీవారి దర్శనానికి 15 గంటల సమయం పడుతోంది. సర్వ దర్శనానికి భక్తులు 18 కంపార్టుమెంట్లలో వేచిఉన్నారు. గురువారం శ్రీవారిని 67,308 మంది భక్తులు దర్శించుకున్నారు. 26,674 మంది భక్తులు తలనీలాలు సమర్పించారు. తిరుమలలో గురువారం శ్రీవారి హుండీ ఆదాయం రూ.3.82 కోట్లు సమకూరింది.

25/08/2023 09:22(IST)

మణుగూరులో మరోసారి భూప్రకంపనలు

భద్రాద్రి: మణుగూరు మండలంలో మరోసారి భూప్రకంపనలు వచ్చాయి. తెల్లవారుజామున 4.45 గంటలకు భూమి స్వల్పంగా కంపించింది. నాలుగు రోజుల క్రితం కూడా మణుగూరులో భూమి కంపించింది. దీంతో మణుగూరు వాసులు భయాందోళన చెందుతున్నారు.

25/08/2023 09:12(IST)

జాబిల్లిపై దిగింది.. రావిలో ఒదిగింది!

ఇస్రో చేపట్టిన చంద్రయాన్‌-3 ఘన విజయం సాధించడంతో నారాయణఖేడ్‌ మండలం అనంతసాగర్‌కు చెందిన ప్రముఖ పత్ర చిత్రకారుడు గుండు శివకుమార్‌ రావి ఆకులపై విక్రమ్‌ ల్యాండర్, ఇస్రో ఛైర్మన్‌ ఎస్‌.సోమనాథ్‌ చిత్రాలను మలచి శుభాకాంక్షలు తెలిపారు.

25/08/2023 09:11(IST)

కుర్రకారు తోసుకెళ్లారు..!

ఖమ్మం నగరంలోని ఖానాపురం సెంటర్‌లో గురువారం ఓ కారు మరమ్మతులకు గురై మొరాయించింది. కారు యజమాని ఇచ్చిన సమాచారంతో రెండు ద్విచక్రవాహనాలపై వచ్చిన ఇద్దరు స్నేహితులు ఎంచక్కా ఇలా కారును వెనుక నుంచి ముందుకు తోసుకెళ్లారు. రద్దీ రహదారిలో ఈ ప్రయోగం వికటిస్తే ప్రమాదమే మరి. కారుకు చెరోవైపు ఇద్దరు యువకులు తీసుకెళ్తున్న ఈ దృశ్యాన్ని ‘న్యూస్‌టుడే’ క్లిక్‌ మనిపించింది.

25/08/2023 09:11(IST)

కవర్లు కప్పి.. పంట కాపాడి

బజార్‌హత్నూర్, న్యూస్‌టుడే: బజార్‌హత్నూర్‌కు చెందిన రైతు చట్ల గజ్జయ్య రెండెకరాల్లో పత్తి వేశారు. కలుపు పెరగడంతో జులైలో కూలీలతో తీయించారు. పది మంది కూలీలకు ఒక్కొక్కరికి రోజుకు రూ.250 చొప్పున మూడు రోజులకు రూ.7,500 ఖర్చు చేశారు. ఇటీవల కురిసిన వర్షాలకు మళ్లీ గడ్డి పెరిగింది. కూలీల ఖర్చు ఎక్కువ కావడంతో గురువారం రూ.750 వెచ్చించి.. 2 లీటర్ల గడ్డి మందు పిచికారీ చేయించారు. ఆ మందు పత్తి మొక్కల మీద పడకుండా ప్రతి మొక్కకు ఇలా పాలిథిన్‌ కవర్‌ను తొడిగి పిచికారీ చేశారు.

25/08/2023 08:25(IST)

మిన్నంటిన సంబరాలు

చంద్రయాన్‌-3 ప్రయోగం విజయవంతం కావడంతో గురువారం జిల్లావ్యాప్తంగా సంబరాలు మిన్నంటాయి. పాఠశాలలు, స్వచ్ఛంద సంస్థల ఆధ్వర్యంలో ప్రదర్శనలు, ర్యాలీలు నిర్వహించారు. భారత్‌మాతాకీ జై అంటూ నినాదాలతో హోరెత్తించారు. ఇస్రో శాస్త్రవేత్తలకు అభినందనలు తెలిపారు. ఈ సందర్భంగా ఆమదాలవలసలో గేదెల హరికృష్ణ రూపొందించిన సైకత శిల్పం ఆకట్టుకుంది.

25/08/2023 08:24(IST)

షార్‌ చిత్రం... 47 లక్షలమంది షేర్‌

శ్యామలాసెంటర్‌: చంద్రయాన్‌-3 విజయవంతం కావాలని ఆకాంక్షిస్తూ నగరానికి చెందిన హరి తాడోజు జూలై నెలలో వేసిన చిత్రం ప్రపంచవ్యాప్తంగా 47 లక్షల మంది షేర్‌ చేయటం, వాటికి అత్యధికంగా లైక్‌ చేయటం జరిగిందని ఆయన ఒక ప్రకటనలో పేర్కొన్నారు.

25/08/2023 08:24(IST)

భద్ర దుస్తులు

మంగళూరు అంతర్జాతీయ విమానాశ్రయంలో సీఐఎస్‌ఎఫ్‌ సెక్యూరిటీ సిబ్బందికి ప్రత్యేక సూట్లు (చిత్రంలో) అందుబాటులోకి వచ్చాయి. బాంబు బెదిరింపులు ఇచ్చినప్పుడు ఈ సూట్లు ధరించి వాటిని నిష్క్రియం చేస్తారని అధికారులు తెలిపారు. మొదటి బ్యాచ్‌ సూట్లను ఇప్పటికే భద్రత సిబ్బందికి అందజేశామని విమానాశ్రయం అధికారులు తెలిపారు.

25/08/2023 08:23(IST)

చెరువు కాదు.. ప్రధాన రహదారి

ఈ చిత్రం చూశారా.. ఇది పార్వతీపురం నుంచి ఒడిశాలోని గుణుపూర్‌తో పాటు పలు మండలాలకు ప్రధాన రహదారి. దీన్ని తోటపల్లి నుంచి కురుపాం వరకు విస్తరిస్తున్నారు. బీటీ పూర్తయినా సీసీ పనులు నిలిచిపోయాయి. పెదమేరంగి కూడలి వద్ద సీసీ పనులు చేయక వర్షం కురిస్తే రోడ్డుపై గోతుల్లో నీరు నిలిచిపోతోంది. దీంతో చోదకులు అవస్థలు పడుతున్నారు. గురువారం కురిసిన జోరు వర్షానికి ఇలా చెరువును తలపించింది.

25/08/2023 08:23(IST)

ప్రయాణం... నిత్యనరకం

గుంటూరు నగరం పట్నంబజార్‌లోని మార్కెట్‌ రహదారి నిత్యం ట్రాఫిక్‌తో కిక్కిరిసి వాహనదారులకు నరకం చూపిస్తోంది. ఇరుకైన దారుల్లో నిర్లక్ష్యంగా వాహనాలు నిలపడమే సమస్యగా మారుతోంది. ఇంత దారుణంగా ఉన్నా ట్రాఫిక్‌ క్రమబద్ధీకరణకు చర్యలు తీసుకోవడం లేదని వాహనదారులు వాపోతున్నారు.

25/08/2023 07:53(IST)

విమానం.. ఇదో రెస్టారెంట్‌

ఇది ఎయిర్‌పోర్టులో నిలిపిన విమానం అనుకుంటే పప్పులో కాలేసినట్లే. శామీర్‌పేట మండలం అలియాబాద్‌ చౌరస్తాలోని సీఎంఆర్‌ కన్వెన్షన్‌ సమీపంలో ఏర్పాటు చేస్తున్న ప్లేన్‌ రెస్టారెంట్‌ ఇది. ప్రస్తుతం ఇందులో ఫర్నిచర్‌ ఏర్పాట్లు జరుగుతున్నాయి. త్వరలోనే ప్రజలు విమానమెక్కి విందు ఆరగించేందుకు అంతా సిద్దం చేస్తున్నారు.

25/08/2023 07:53(IST)

సైకిల్‌ ట్రాక్‌పై సౌర కాంతులు

హైదరాబాద్‌ నగరంలో నార్సింగి నుంచి కొల్లూరు వరకు మూడు వరుసల్లో 4.5 మీటర్ల వెడల్పు, 23 కి.మీ పొడవుతో నిర్మిస్తున్న ఆధునాతన సోలార్‌ రూఫ్‌ సైకిల్‌ ట్రాక్‌ పనులు వేగంగా పూర్తవుతున్నాయి. కొన్నిచోట్ల సౌర పలకలు ఏర్పాటు చేసి దీపాలు వెలిగించారు. మరోవైపు ట్రాక్‌ వెంట వివిధ ఆకృతుల్లో సైక్లింగ్‌ బొమ్మలను ఏర్పాటు చేస్తున్నారు.ఈ నిర్మాణం పూర్తయితే దేశంలోనే ఆధునాతన సైక్లింగ్‌ ట్రాక్‌గా నిలుస్తుంది. సెప్టెంబరులో ప్రారంభించేందుకు ఏర్పాట్లు చేస్తున్నారు.

25/08/2023 07:52(IST)

ఈ ట్రాక్టరు.. తీరే వేరు

మంథని గ్రామీణం: సాగులో వ్యయాన్ని తగ్గించడానికి పెద్దపల్లి జిల్లా మంథని మండలం నాగారం గ్రామానికి చెందిన మూల శశిరథ్‌రెడ్డి(25) విద్యుత్‌ ట్రాక్టరు తయారు చేశారు. మెకానికల్‌ ఇంజినీరింగ్‌ చదివిన శశిరథ్‌.. ఈ ఏడాది ఫిబ్రవరిలో ఎలక్ట్రికల్‌ ట్రాక్టర్‌ తయారీని ప్రారంభించి, మే నెలలో పూర్తి చేశారు. దీని తయారీకి రూ.4 లక్షల నుంచి రూ.5 లక్షల ఖర్చు అయిందని తెలిపారు. ట్రాక్టరులో 32 చిన్న లిథియం ఫాస్ఫేట్‌ బ్యాటరీలు, స్మార్ట్‌ కంట్రోలర్‌, 26 హెచ్‌పీ మోటారు బిగించారు. ఒకసారి బ్యాటరీలను బిగించాక.. 10-12 ఏళ్ల వరకు మార్చాల్సిన అవసరం ఉండదని ఆయన తెలిపారు. పూర్తిగా ఛార్జ్‌ అయిన తర్వాత 4 గంటలపాటు ట్రాక్టర్‌ నడుస్తుందన్నారు. సాధారణ ట్రాక్టరు 4 గంటలపాటు పనిచేయాలంటే 20 లీటర్ల డీజిల్‌ పోయాలని.. ఎలక్ట్రికల్‌ ట్రాక్టర్‌ను రూ.250 ఖర్చుతోనే అంతసేపు నడపవచ్చని పేర్కొన్నారు. స్వాతంత్య్ర దినోత్సవం నాడు జిల్లా కలెక్టర్‌ నుంచి శశిరథ్‌రెడ్డి ప్రశంసాపత్రం, షీల్డు అందుకున్నారు.

25/08/2023 07:51(IST)

చేపను ఎగరేసి.. గబుక్కున మింగేసి

మహబూబ్‌నగర్‌: గత నెలలో కురిసిన వర్షాలతో చెరువులు, కుంటలు జలకళ సంతరించుకున్నాయి. జలచరాలు పెరిగాయి. వాటిని వేటాడేందుకు పలు పక్షులు చెరువుల వద్దకు వస్తున్నాయి. మహబూబ్‌నగర్‌ మండలం కోడూరులోని కర్నాల కుంటలో చేపను ముక్కుతో పట్టుకున్న ఓ నీటిపక్షి గాలిలోకి ఎగరేసి మింగుతున్న దృశ్యమిది.