Breaking | Feedback | ePratibha | E-PAPER | Pratibha

యాదాద్రిలో మొదలైన పవిత్రోత్సవాలు

Updated : 26 Aug 2023 21:19 IST

సంక్షిప్త వార్తలు - చిత్ర వార్తలు

26/08/2023 21:52(IST)

పీఆర్‌సీ డిమాండ్లపై విద్యుత్‌ ఉద్యోగుల నిరసనకు అనుమతి నిరాకరణ

అమరావతి: విద్యుత్‌ ఉద్యోగుల స్ట్రగుల్‌ కమిటీ విజయవాడలో సోమవారం నిరసనకు పిలిపునిచ్చింది. పీఆర్‌సీ డిమాండ్లపై విద్యుత్‌ ఉద్యోగుల నిరసనకు పోలీసులు అనుమతి నిరాకరించారు. శాంతియుతంగా చేపట్టే నిరసనకూ అనుమతి ఇవ్వలేదు.

26/08/2023 21:27(IST)

తగరంపూడిలో రెండేళ్ల క్రితం జరిగిన బాలిక అపహరణ కేసు ఛేదన

అనకాపల్లి: తగరంపూడిలో రెండేళ్ల క్రితం జరిగిన బాలిక అపహరణ కేసును అనకాపల్లి గ్రామీణ పోలీసులు ఛేదించారు. బాలికకు మాయమాటలు చెప్పి గౌహతి తీసుకెళ్లిన వ్యక్తిని పోలీసులు అరెస్ట్‌ చేశారు.

26/08/2023 21:17(IST)

138 కిలోల గంజాయి స్వాధీనం

నర్సీపట్నం గ్రామీణం: అనకాపల్లి జిల్లా నర్సీపట్నంలో గ్రామీణ పోలీసులు ఆరుగురు వ్యక్తులను అరెస్టు చేసి 138 కిలోల గంజాయిని స్వాధీనం చేసుకున్నారు. ఈ మత్తు పదార్థం విలువ ₹ 11 లక్షలు ఉంటుందని సీఐ రమణయ్య తెలిపారు.

26/08/2023 21:11(IST)

యాదాద్రిలో మొదలైన పవిత్రోత్సవాలు

యాదగిరిగుట్ట: తెలంగాణలో ప్రసిద్ధిగాంచిన యాదాద్రి పంచనారసింహుల మహాదివ్య పుణ్యక్షేత్రంలో వార్షిక ఆలయ పవిత్రోత్సవాలు శనివారం రాత్రి పాంచారాత్రాగమ విధానాలతో మొదలయ్యాయి. దైవారాధనల్లో ఏవైనా పొరపాట్లు ఏర్పడితే, వాటి నివారణకై ఈ ఉత్సవాలను ఏటేటా నిర్వహిస్తారు. ఆ క్రమంలోనే మూడ్రోజులుగా కొనసాగే పవిత్రోత్సవాల నిర్వహణలో ఎలాంటి విజ్ఞాలు కలగకుండా దీవించాలంటూ విష్వక్సేన ఆళ్వారుడిని ఆరాధిస్తూ ప్రత్యేక పూజ చేపట్టారు. ఆదిపూజగా విష్వక్సేనుడికి నిర్వహించి, వేడుకలకు అంకురార్పణం చేశారు. ఆలయ మహాముఖ మండపంలో పవిత్రోత్సవాలకు శ్రీకారం చుట్టారు. ప్రబంధ పారాయణం, హవనం నిర్వహించారు. ప్రత్యేక ఆరాధనలతో వివిధ వర్ణాలకు చెందిన 108 నూలు పోగులతో పవిత్రలు సిద్ధం చేసి, వాటిని మంత్రోచ్చారణల మధ్య సోమవారం గర్భాలయంలోని మూలవరులకు ధరింపజేస్తామని ఆలయ ప్రధాన పూజారులు తెలిపారు. ఈ ఉత్సవాల సందర్భంగా శ్రీలక్ష్మీనరసింహస్వామి నిత్యకల్యాణం ఆది, సోమ వారాలలో నిర్వహించమని ఈవో తెలిపారు. అనుబంధంగా కొనసాగుతున్న పాతగుట్ట ఆలయంలోనూ వార్షిక పవిత్రోత్సవాలు శనివారం రాత్రి సంప్రదాయ పూజలతో మొదలయ్యాయి.

26/08/2023 21:07(IST)

కారులో తరలిస్తున్న రూ. 6.4 కోట్ల విలువైన బంగారం పట్టివేత

విజయవాడ: బంగారాన్ని కారులో చెన్నై నుంచి విజయవాడకు తరలిస్తున్న వ్యక్తిని అరెస్ట్‌ చేశారు. కారులో తరలిస్తున్న రూ. 6.4 కోట్ల విలువైన బంగారాన్ని కస్టమ్స్‌ అధికారులు స్వాధీనం చేసుకున్నారు. బొల్లాపల్లి టోల్‌ప్లాజా వద్ద కస్టమ్స్‌ అధికారులు ఈ బంగారాన్ని పట్టుకున్నారు. 4.3 కిలోల బంగారం, రూ. లక్షన్నర విదేశీ కరెన్సీని స్వాధీనం చేసుకున్నారు.

26/08/2023 21:00(IST)

‘స్కంద’ ప్రీ రిలీజ్‌ ఈవెంట్‌లో సందడి చేసిన బాలకృష్ణ

రామ్‌ పోతినేని, శ్రీలీల జంటగా నటించిన మాస్‌ యాక్షన్‌ ఎంటర్‌టైనర్‌ ‘స్కంద’ (Skanda). బోయపాటి శ్రీను దర్శకుడు. ఈ సినిమా సెప్టెంబరు 15న ప్రేక్షకుల ముందుకు రానుంది. ఈ సందర్భంగా హైదరాబాద్‌లో సినిమా ప్రీ రిలీజ్‌ ఈవెంట్‌ను ఏర్పాటు చేశారు. బాలకృష్ణ ముఖ్య అతిథిగా హాజరై సందడి చేశారు.

26/08/2023 20:48(IST)

ప్రియుడు మోసం చేశాడనే మనస్తాపంతో విద్యార్థిని ఆత్మహత్య

నిజామాబాద్: అర్సపల్లిలో పదో తరగతి విద్యార్థిని ఆత్మహత్య చేసుకుంది. ప్రియుడు మోసం చేశాడనే మనస్తాపంతో విద్యార్థిని ఆత్మహత్య చేసుకున్నట్లు పోలీసులు తెలిపారు. ఈ మేరకు ఓ సూసైడ్ నోట్‌ను పోలీసులు స్వాధీనం చేసుకున్నారు.

26/08/2023 20:28(IST)

నిలువెత్తు నిజాయితీ శ్రీ గూడపాటి సీతారామస్వామి పుస్తక ఆవిష్కరణ

హైదరాబాద్‌: హైదరాబాద్‌లోని దసపల్లా హోటల్‌లో నిలువెత్తు నిజాయితీ శ్రీ గూడపాటి సీతారామస్వామి పుస్తకాన్ని మాజీ ఉపరాష్ట్రపతి వెంకయ్యనాయుడు ఆవిష్కరించారు. డాక్టర్ గూడపాటి రమేష్, రచయిత పాలకోడేటి సత్యనారాయణ రావు, గూడపాటి సీతారామస్వామి, సుప్రీంకోర్టు మాజీ ప్రధాన న్యాయమూర్తి జస్టిస్ ఎన్వీ రమణ, నటుడు మురళీ మోహన్, సుధా, సునీత, ప్రముఖులు హాజరయ్యారు.

26/08/2023 20:18(IST)

భార్య మెడకు ఛార్జింగ్ వైరు బిగించి హత్య చేసిన భర్త

కృష్ణా: తోట్లవల్లూరు మండలం కుమ్మమూరులో దారుణం జరిగింది. భర్త.. భార్య మెడకు ఛార్జింగ్ వైరు బిగించి చంపాడు. పోలీసులు తెలిపిన వివరాల ప్రకారం.. కుమ్మమూరుకు చెందిన రమ్యతేజను రామకృష్ణ ప్రేమ వివాహం చేసుకున్నాడు. వీరికి ఇద్దరు కుమార్తెలు ఉన్నారు. చెడు వ్యసనాలకు బానిసై గత కొంతకాలంగా భర్త భార్యను వేధిస్తున్నాడు. భార్య మెడకు ఛార్జింగ్ వైరు బిగించి చంపాడు. అనంతరం నిందితుడు పోలీసుల వద్ద లొంగిపోయాడు. కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.

26/08/2023 19:57(IST)

ఉప్పాడ హార్బర్‌లో వలకు చిక్కిన అరుదైన చేప

కొత్తపల్లి: కాకినాడ జిల్లా యు. కొత్తపల్లి మండలం ఉప్పాడ హార్బర్‌లో చేపల వేటకెళ్లిన ఓ మత్స్యకారుడి వలకు అరుదుగా లభించే కొమ్ముకొనెం జాతి చేప చిక్కింది. దీనిని అందరూ ఆసక్తిగా తిలకించారు. సందర్శకులు ఈ చేపతో ఫొటోలు తీసుకున్నారు.

26/08/2023 19:30(IST)

శ్రీవారి పవిత్రోత్సవాలకు శాస్త్రోక్తంగా అంకురార్పణ

తిరుమల: శ్రీవారి ఆలయంలో పవిత్రోత్సవాలకు శనివారం రాత్రి శాస్త్రోక్తంగా అంకురార్పణ జరిగింది. ముందుగా సేనాధిపతివారిని ఆలయ మాడవీధుల గుండా ఊరేగింపుగా వసంతమండపానికి తీసుకెళ్లారు. అనంతరం మృత్సంగ్రహణం, ఆస్థానం నిర్వహించారు. ఆ తరువాత ఆలయంలోని పవిత్ర మండపంలో అంకురార్పణ వైదిక కార్యక్రమాలు చేపట్టారు. ఈవో ఎ.వి.ధ‌ర్మారెడ్డి పాల్గొన్నారు. శ్రీవారి ఆలయంలో ఆగస్టు 27 నుంచి 29వ తేదీ వరకు పవిత్రోత్సవాలు జరుగనున్నాయి. ఇందులో భాగంగా శ్రీవారి మూలవిరాట్‌ ఎదుట ఆచార్య రుత్విక్‌వరణం నిర్వహించారు.

26/08/2023 19:11(IST)

తెలంగాణ కోసం అన్ని వర్గాల ప్రజలు పోరాటం చేశారు: ఖర్గే

రంగారెడ్డి: చేవెళ్ల కేవీఆర్‌ మైదానంలో కాంగ్రెస్‌ ప్రజాగర్జన సభ నిర్వహించారు. పలువురు నేతలు ఏఐసీసీ అధ్యక్షుడు మల్లికార్జున ఖర్గే సమక్షంలో కాంగ్రెస్‌లో చేరారు. ఎస్సీ, ఎస్టీ డిక్లరేషన్ పోస్టర్‌ను ఖర్గే విడుదల చేశారు. ఈ సందర్భంగా ఖర్గే మాట్లాడారు. కేసీఆర్‌ ప్రభుత్వాన్ని సాగనంపేందుకు ప్రజలు సిద్ధమయ్యారని అన్నారు. తెలంగాణ కోసం అన్ని వర్గాల ప్రజలు పోరాటం చేశారని వివరించారు. ఇక్కడి ప్రజల మనసు తెలుసుకొని సోనియా గాంధీ తెలంగాణ ఇచ్చారని అన్నారు.

26/08/2023 19:07(IST)

విశాఖలో ట్రావెన్‌కోర్‌ అయ్యప్ప స్వామి దేవస్థానం సమాచార కేంద్రం ప్రారంభం

విశాఖపట్నం: విశాఖలో ట్రావెన్‌కోర్‌ అయ్యప్ప స్వామి దేవస్థానం సమాచార కేంద్రం ప్రారంభమైంది. ట్రావెన్‌కోర్‌ దేవస్థానం అధ్యక్షుడు అనంత గోపన్‌ ఈ కేంద్రాన్ని ప్రారంభించారు. శబరిమల వచ్చేవారికి కచ్చితమైన వివరాలు అందుతాయని అనంత గోపన్‌ తెలిపారు.

26/08/2023 19:04(IST)

ఏసీఏ ప్లాటినం జూబ్లీ వేడుకలకు ఏర్పాట్లు: ఏసీఏ కార్యదర్శి

విశాఖపట్నం: విశాఖపట్నంలో ఏసీఏ ప్లాటినం జూబ్లీ వేడుకలకు ఏర్పాట్లు చేస్తున్నట్లు ఏసీఏ కార్యదర్శి గోపీనాథ రెడ్డి తెలిపారు. వేడుకల్లో కే శ్రీకాంత్, మదన్‌లాల్‌, రోజర్‌ బిన్నీ పాల్గొంటారని చెప్పారు. ఏసీఏ అభివృద్ధికి కృషి చేసిన అందరికీ ఆయన అభినందనలు తెలిపారు.

26/08/2023 18:57(IST)

కేసీఆర్‌ చేతిలో దళితులు, గిరిజనులు మోసపోయారు: రేవంత్‌ రెడ్డి

రంగారెడ్డి: చేవెళ్ల కేవీఆర్‌ మైదానంలో కాంగ్రెస్‌ ప్రజాగర్జన సభ జరుగుతోంది. పలువురు నేతలు మల్లికార్జున ఖర్గే సమక్షంలో కాంగ్రెస్‌లో చేరారు. ఈ సందర్భంగా రేవంత్ రెడ్డి మాట్లాడారు. పార్టీకి నష్టం జరుగుతుందని తెలిసినా సోనియాగాంధీ తెలంగాణను ఇచ్చినట్లు చెప్పారు. దళితులు, గిరిజనులను ఆదుకోవడానికి ఎస్సీ, ఎస్టీ డిక్లరేషన్‌ను ప్రకటిస్తున్నట్లు తెలిపారు. చేవెళ్ల గడ్డ మీద నుంచి ఎస్సీ, ఎస్టీ డిక్లరేషన్‌ను ప్రకటిస్తున్నామన్నారు. కేసీఆర్‌ చేతిలో దళితులు, గిరిజనులు మోసపోయారని ఆరోపించారు.

ఎస్సీ, ఎస్టీ డిక్లరేషన్‌లో ప్రకటించిన అంశాలివే..

అంబేడ్కర్‌ అభయహస్తం పథకం కింద ఎస్సీ, ఎస్టీ కుటుంబాలకు రూ.12లక్షలు ఇస్తాం.

కాంట్రాక్టు పనుల్లో ఎస్సీ, ఎస్టీలకు రిజర్వేషన్లు కల్పిస్తాం.

పోడు భూములకు పట్టాలిస్తాం. ఎస్సీ, ఎస్టీలకు 3 కార్పొరేషన్లు ఏర్పాటు చేస్తాం.

ఇందిరమ్మ ఇళ్ల పథకం కింద ఎస్సీ, ఎస్టీలకు రూ.6లక్షలు ఇస్తాం.

రాష్ట్రంలో కొత్తగా ఐదు ఐటీడీఏలు ఏర్పాటు చేస్తాం.

ఎస్సీ, ఎస్టీ విద్యార్థులు పదో తరగతి పాస్‌ అయితే రూ.10వేలు ఇస్తాం.

ప్రతి మండలంలో గురుకుల పాఠశాల ఏర్పాటు చేస్తాం.

గ్రాడ్యుయేషన్‌, పీజీ చదివే ఎస్సీ,ఎస్టీ విద్యార్థులకు వసతి కల్పిస్తాం.

26/08/2023 18:37(IST)

చేవెళ్ల సభలో ఎస్సీ, ఎస్టీ డిక్లరేషన్‌ను ప్రకటించనున్న కాంగ్రెస్‌

రంగారెడ్డి: చేవెళ్ల కేవీఆర్‌ మైదానంలో కాంగ్రెస్‌ ప్రజాగర్జన సభ జరుగుతోంది. ఈ సభలో ఎస్సీ, ఎస్టీ డిక్లరేషన్‌ను కాంగ్రెస్‌ ప్రకటించనుంది. సభ ప్రధాన వేదికపై గద్దర్‌ చిత్రపటాన్ని ఏర్పాటు చేశారు. గద్దర్‌ చిత్ర పటానికి నాయకులు నివాళి అర్పించారు. పార్టీ కార్యకర్తలు, ప్రజలు భారీఎత్తున హాజరయ్యారు.

26/08/2023 17:56(IST)

తితిదే సభ్యులు జాతి రత్నాలని వంగలపూడి అనిత ఎద్దేవా

అమరావతి: జగన్ నియమించిన తితిదే సభ్యులు జాతి రత్నాలని తెలుగు మహిళా అధ్యక్షురాలు వంగలపూడి అనిత ఎద్దేవా చేశారు. ఆమె మీడియాతో మాట్లాడారు. ఇలాంటి బోర్డు వేస్తే పులులు తరమడానికి కర్రలు ఇవ్వాలనే నిర్ణయాలే వస్తాయని విమర్శించారు. నడక మార్గంలో పులులు వస్తున్నాయి కాబట్టి నడక మార్గం మూసేసినా ఆశ్చర్యం పోనక్కర్లేదన్నారు. డబ్బు కోసం ఎంత వరకైనా వెళ్లే వ్యక్తులు తితిదే బోర్డులో ఉన్నారని ధ్వజమెత్తారు.

26/08/2023 17:53(IST)

విద్యార్థులకు రూ. 5,500 స్కాలర్‌షిప్‌ చాలా తక్కువ: ఆర్‌. కృష్ణయ్య

హైదరాబాద్: ఆంధ్రప్రదేశ్‌లో ఇంటర్, డిగ్రీ విద్యార్థులకు రూ. 20 వేల స్కాలర్షిప్‌ను ఇస్తే ధనిక రాష్ట్రమైన తెలంగాణలో విద్యార్థులకు రూ.5,500 ఇవ్వడమేంటని రాజ్యసభ సభ్యుడు, బీసీ సంక్షేమ సంఘం జాతీయ అధ్యక్షుడు ఆర్. కృష్ణయ్య ప్రశ్నించారు. హైదరాబాద్ దోమలగూడలోని ఇందిరాపార్క్ ధర్నా చౌక్ వద్ద విద్యార్థులు చేపట్టిన మహా ధర్నా కార్యక్రమానికి ఆయన హాజరయ్యారు. అనంతరం ఆయన ప్రసంగించారు. విద్యార్థులకు రూ. 5,500 స్కాలర్‌షిప్‌ చాలా తక్కువే అన్నారు.

26/08/2023 17:31(IST)

శ్రీ బాల త్రిపుర సుందరీ దేవి దేవాలయంలో కేజీ బంగారు కలశ తాపడం మాయం

కృష్ణాజిల్లా: గుడివాడ రూరల్ మండలంలోని శ్రీ బాల త్రిపుర సుందరీ దేవి దేవాలయంలో కేజీ బంగారు కలశ తాపడం మాయం కావడం సంచలనం సృష్టించింది. మండలంలోని సిద్ధాంతం గ్రామంలో గల బాల త్రిపుర సుందరి దేవి దేవస్థాన శిఖర కలశంపై కేజీకి పైగా బరువు ఉన్న బంగారు తాపడాన్ని కమిటీ సభ్యులు ఏర్పాటు చేశారు. శనివారం దేవస్థానం సిబ్బంది గమనించేసరికి బంగారు తాపడం మాయం కావడంతో దేవస్థాన ధర్మకర్తల కమిటీ సభ్యులు పోలీసులకు సమాచారం అందించారు.

26/08/2023 17:27(IST)

17 నెలల చిన్నారిని బావిలో పడేసిన తండ్రి

పెద్దపల్లి: ఎలిగేడు మండలం రావులపల్లి గ్రామానికి చెందిన కల్వల తిరుపతిరెడ్డి తన 17 నెలల చిన్నారిని బావిలో పడేశాడు. అనంతరం చిన్నారి తండ్రి పురుగుల మందు తాగి ఆత్మహత్యకు యత్నించాడు. ఆయన్ను ఆసుపత్రికి తరలించి చికిత్స అందించారు. చిన్నారి ఆచూకీ కోసం గాలిస్తున్నారు.

26/08/2023 17:24(IST)

ఏసీ న్యాయ కళాశాల ప్రిన్సిపల్‌ సీటుపై వివాదం.. వైస్‌ ప్రిన్సిపల్‌పై దాడి

గుంటూరు: ఏసీ న్యాయ కళాశాల ప్రిన్సిపల్‌ సీటుపై వివాదం నెలకొంది. ఈ విషయమై ప్రిన్సిపల్‌, వైస్‌ ప్రిన్సిపల్‌ మధ్య వైరం కొనసాగుతోంది. సింగిల్‌ జడ్జి ఆదేశాలతో గురువయ్య ప్రిన్సిపల్‌గా కొనసాగుతున్నారు. గురువయ్య నియామకం చెల్లదంటూ వైస్‌ ప్రిన్సిపల్‌ అమృత వర్షిణి కోర్టుకు వెళ్లారు. హైకోర్టు బెంచ్‌ ఆదేశంతో ఛార్జ్‌ తీసుకునేందుకు అమృత వర్షిణి వచ్చారు. ఈక్రమంలో అమృత వర్షిణిపై గురువయ్య వర్గం దాడి చేసింది. వైస్‌ ప్రిన్సిపల్‌ అమృత వర్షిణికి గాయాలు కావడంతో జీజీహెచ్‌కు తరలించారు.

26/08/2023 17:18(IST)

భారాసకు రాజీనామా చేసిన మాజీ మంత్రి కృష్ణ యాదవ్‌

హైదరాబాద్‌: భారాసకు మాజీ మంత్రి సి. కృష్ణ యాదవ్‌ రాజీనామా చేశారు. అంబర్‌పేట టికెట్‌ హామీ ఇచ్చి మరో అభ్యర్థిని ప్రకటించారని ఆయన అసంతృప్తి వ్యక్తం చేశారు. భారాస బీసీ వ్యతిరేక, పారిశ్రామికవేత్తల సానుకూల పార్టీ అని ఆయన ఆరోపించారు.

26/08/2023 17:17(IST)

శంషాబాద్‌కు చేరుకున్న మల్లికార్జున ఖర్గే

హైదరాబాద్‌: కాంగ్రెస్‌ జాతీయ అధ్యక్షుడు మల్లికార్జున ఖర్గే శంషాబాద్‌ విమానాశ్రయానికి చేరుకున్నారు. ఆయనకు టీపీసీసీ చీఫ్‌ రేవంత్‌రెడ్డి స్వాగతం పలికారు. విమానాశ్రయం నుంచి మల్లికార్జున ఖర్గే చేవెళ్ల ప్రజాగర్జన సభకు బయలుదేరనున్నారు.

26/08/2023 17:10(IST)

ఎన్నికల్లో ఇచ్చిన హామీలను భారాస నెరవేర్చలేదు: ఈటల రాజేందర్‌

భద్రాద్రి: ఇల్లెందులో భాజపా కార్యకర్తల సమావేశం నిర్వహించారు. సమావేశంలో ఈటల రాజేందర్ పాల్గొని మాట్లాడారు. భాజపాను ఎదుర్కోలేక భాజపా, భారాస ఒక్కటే అని కాంగ్రెస్‌ అసత్య ప్రచారం చేస్తోందని తెలిపారు. ఎన్నికల్లో ఇచ్చిన హామీలను భారాస నెరవేర్చలేదని విమర్శించారు.

26/08/2023 17:03(IST)

అదానీ అనుబంధ సంస్థలకు భారత్ మాలను అప్పజెప్పారు: సీపీఎం

విజయవాడ: భారత్ మాల పేరుతో కేంద్ర, రాష్ట్ర ప్రభుత్వాలు అత్యధికంగా భూములు తీసుకుంటున్నారని సీపీఎం రాష్ట్ర కార్యదర్శి వి.శ్రీనివాసరావు ఆరోపించారు. విజయవాడలో నిర్వహించిన మీడియా సమావేశంలో ఆయన మాట్లాడుతూ.. ఏమాత్రం చట్టబద్ధమైన ప్రాతిపదిక లేని అదానీ అనుబంధ సంస్థలకు భారత్ మాలను అప్పజెప్పారని మండిపడ్డారు. భూసేకరణ చట్టాన్ని పక్కన పెట్టి బేరసారాలు చేసి భూములు లాక్కుంటున్నారన్నారని ఆరోపించారు. రైతులు, వ్యవసాయ కూలీలను కూడగట్టి ఆందోళన చేస్తామన్నారు. రైతుల భూములను రియల్టర్లకు, కార్పొరేట్ కంపెనీలకు కట్టబెడుతున్నారని ఆరోపించారు.

26/08/2023 16:51(IST)

లోకేశ్‌ పాదయాత్రకు లేనంత పోలీసు భద్రత ఫ్లెక్సీ కోసం పెట్టారు: తెదేపా

తెదేపా జాతీయ ప్రధాన కార్యదర్శి నారా లోకేశ్‌ పాదయాత్రకు లేనంత పోలీసు భద్రత శుక్రవారం నూజివీడులో ఫ్లెక్సీని కాపాడేందుకు పెట్టారని తెదేపా నేతలు మాగంటి బాబు, ముద్రబోయిన వెంకటేశ్వరరావు ఆరోపించారు. లోకేశ్‌ పాదయాత్రకు ఏలూరు నుంచి సీసాల బ్యాచ్‌ను, బ్లేడ్ బ్యాచ్‌ను నూజివీడుకు తరలించారని ఆరోపించారు. నూజివీడు పట్టణంలో వైకాపా కుట్రలను ముందస్తుగానే దీటుగా తిప్పికొట్టినట్లు తెలిపారు. కుట్రపూరితంగానే లోకేశ్‌ పాదయాత్రలో వైకాపా శ్రేణులు కవ్వింపు చర్యలకు పాల్పడుతున్నాయని ఆరోపించారు. ధర్నాలు చేస్తే గానీ తమ ఫిర్యాదులు తీసుకోలేని పరిస్థితి నెలకొందని నేతలు మండిపడ్డారు.

26/08/2023 16:40(IST)

తిరుమల పవిత్రతకు భంగం కలిగించడమే లక్ష్యంగా వైకాపా పని చేస్తోంది: పోతిన వెంకట మహేశ్‌

తిరుమల పవిత్రతకు భంగం కలిగించడం, హిందువుల మనోభావాలను దెబ్బ తీయడమే లక్ష్యంగా ఆంధ్రప్రదేశ్‌లో వైకాపా ప్రభుత్వం పని చేస్తోందని జనసేన రాష్ట్ర అధికార ప్రతినిధి పోతిన వెంకట మహేశ్‌ ఆగ్రహం వ్యక్తం చేశారు. తన అవినీతి కేసుల నుంచి బయటపడేందుకు ఇప్పటివరకు అన్ని రకాలుగా ప్రయత్నించిన ముఖ్యమంత్రి జగన్ మోహన్‌ రెడ్డి.. ఇప్పుడు తితిదేను సైతం స్వార్థ ప్రయోజనాల కోసం వాడుకుంటున్నారని తెలిపారు. ఇంతటి ఘోరాన్ని గతంలో ఏనాడైనా చుశామాఅని ప్రశ్నించారు.

26/08/2023 16:31(IST)

కేసీఆర్‌ రాక్షస పాలనలో ప్రజలు నలిగిపోతున్నారు: బండి సంజయ్‌

వేములవాడ రాజన్న స్వామిని కరీంనగర్‌ ఎంపీ బండి సంజయ్‌ దర్శించుకున్నారు. ఈ సందర్భంగా ఆయన మాట్లాడుతూ.. కేసీఆర్‌ రాక్షస పాలనలో ప్రజలు నలిగిపోతున్నారని విమర్శించారు. కాంగ్రెస్‌ అభ్యర్థులకు కేసీఆర్‌ డబ్బులు ఇచ్చారని ఆరోపించారు. కేసీఆర్‌ కుట్రలను ప్రజలంతా గమనించాలని బండి సంజయ్‌ సూచించారు.

26/08/2023 16:25(IST)

తెలుగు సినీ పరిశ్రమకు జాతీయ అవార్డు దక్కడం పట్ల సీఎం కేసీఆర్‌ హర్షం

హైదరాబాద్: తెలుగు సినీ పరిశ్రమకు జాతీయ అవార్డు దక్కడం పట్ల సీఎం కేసీఆర్‌ హర్షం వ్యక్తం చేశారు. జాతీయ చలన చిత్ర విజేతలకు కేసీఆర్‌ అభినందనలు తెలిపారు. జాతీయ ఉత్తమ నటుడిగా అవార్డు సాధించిన అల్లు అర్జున్‌కు ప్రత్యేక అభినందనలు తెలిపారు. అవార్డులు సాధించిన ఆర్‌ఆర్‌ఆర్‌, పుష్ప చిత్రబృందాలకు కేసీఆర్‌ అభినందనలు తెలియజేశారు.

26/08/2023 16:24(IST)

పంటలు ఎండిపోతున్నా ప్రభుత్వం పట్టించుకోవడం లేదని రైతుల నిరసన

సత్యసాయి జిల్లా సీకేపల్లి మండలం కనుముక్కల వద్ద ధర్మవరం-పుట్టపర్తి రోడ్డుపై బైఠాయించి రైతులు నిరసన తెలిపారు. రోజుకు 2 గంటల విద్యుత్‌ ఇస్తే సాగు చేయడం ఎలాగని ఆవేదన వ్యక్తం చేశారు. పంటలు ఎండిపోతున్నా ప్రభుత్వం పట్టించుకోవడం లేదని ఆగ్రహం వ్యక్తం చేశారు.

26/08/2023 16:14(IST)

మల్కాపురంలో ఇసుక తవ్వకాలు ఆపేయాలని గ్రామస్థుల ఆందోళన

విజయవాడ: గత కొంతకాలంగా జగ్గయ్యపేట మండలం మల్కాపురం వద్ద మున్నేరులో జేపీ సంస్థ ఆధ్వర్యంలో పెద్దఎత్తున ఇసుక తవ్వకాలు జరుగుతున్నాయి. నిత్యం వందలాది ట్రాక్టర్ల ఇసుకను తెలంగాణకు రవాణా చేస్తున్నారు. ఇసుకను స్థానిక అవసరాలకు ఇవ్వకుండా తెలంగాణకు తరలించడంపై గ్రామస్థులు శనివారం ఆందోళన చేపట్టారు. సర్పంచి జాన్, మరికొందరు గ్రామస్థులు కలిసి క్వారీ వద్ద ట్రాక్టర్లను అడ్డుకున్నారు. ఈ సందర్భంగా సర్పంచి జాన్ మాట్లాడుతూ.. మున్నేరులో యంత్రాలతో విచ్చలవిడిగా చేపట్టిన ఇసుక తవ్వకాల వల్ల భారీ గోతులు ఏర్పడి పశువులు, వ్యవసాయ కూలీలు ప్రమాదాలకు గురవుతున్నారని తెలిపారు. ఇసుక ట్రాక్టర్ల వల్ల రహదారులు పూర్తిగా ధ్వంసం అయ్యాయని పేర్కొన్నారు. మల్కాపురం నుంచి ఇసుక రవాణా ఆపేయాలని, లేదంటే పెద్ద ఎత్తున ఉద్యమం చేస్తామని గ్రామస్థులు హెచ్చరించారు.

26/08/2023 16:00(IST)

వారం రోజుల్లో కాంగ్రెస్‌ ఎమ్మెల్యే అభ్యర్థులు ఖరారు: కోమటిరెడ్డి వెంకట్‌రెడ్డి

నల్గొండ: ఎంపీ కోమటిరెడ్డి వెంకట్‌రెడ్డి భారాస, భాజపా కార్యకర్తలకు కండువా కప్పి కాంగ్రెస్‌లోకి ఆహ్వానించారు. వారం రోజుల్లో కాంగ్రెస్‌ ఎమ్మెల్యే అభ్యర్థులు ఖరారు అవుతారని తెలిపారు. భారాస హయాంలో చాలా మందికి రైతుబంధు అందలేదని విమర్శించారు. భారాస ప్రభుత్వం ఎనిమిదిన్నర గంటలు మాత్రమే కరెంటు ఇస్తోందని ఆరోపించారు. రాష్ట్రంలో ఈసారి అధికారంలోకి వచ్చేది కాంగ్రెస్‌ పార్టీనే అని ధీమా వ్యక్తం చేశారు.

26/08/2023 15:53(IST)

Hilife Exhibition: ఎగ్జిబిషన్‌లో మెరిసిన ముద్దుగుమ్మలు

హైదరాబాద్‌లోని హెచ్‌ఐసీసీలో హైలైఫ్‌ ఎగ్జిబిషన్‌ నిర్వహించారు. సినీ నటీమణులు కామాక్షి భాస్కర్ల, అషూ రెడ్డి, పూజా అనంత్‌, మోడల్స్‌ హాజరై నూతన వస్త్రాలతో ఫొటోలకు పోజులిచ్చారు.

26/08/2023 15:51(IST)

మంత్రి తమ్ముడినంటూ డబ్బు వసూలు.. కేసు నమోదు

ఏలూరు: మంత్రి వేణుగోపాలకృష్ణ తమ్ముడినంటూ దొంగల శ్రీధర్‌ అనే వ్యక్తి పలువురి వద్ద డబ్బు డిమాండ్‌ చేస్తున్నాడు. దీనిపై శామ్యూల్‌ అనే వ్యక్తి హనమాన్‌ జంక్షన్‌ పోలీసు స్టేషన్‌లో పోలీసులకు ఫిర్యాదు చేశాడు. దొంగల శ్రీధర్‌పై వివిధ జిల్లాల్లో కేసులున్నట్లు గుర్తించారు.

26/08/2023 15:38(IST)

వైకాపా పాలనలో తితిదే పవిత్రతను మంటగలిపారు: అచ్చెన్నాయుడు

వైకాపా పాలనలో తితిదే పవిత్రతను మంటగలిపారని తెదేపా ఏపీ రాష్ట్ర అధ్యక్షుడు అచ్చెన్నాయుడు ఆరోపించారు. శరత్‌చంద్రారెడ్డి లాంటి వ్యక్తిని తితిదే సభ్యుడిని చేశారని మండిపడ్డారు. ఇసుక సత్యాగ్రహం పేరుతో ఈ నెల 28 నుంచి మూడు రోజుల పాటు కార్యక్రమాలు నిర్వహించనున్నట్లు తెలిపారు. సెప్టెంబర్‌ 1 నుంచి నెలన్నరపాటు ‘బాబు ష్యూరిటీ.. భవిష్యత్‌ గ్యారంటీ’ ఉంటుందని చెప్పారు. కోటి ఇళ్లకు వెళ్లేలా కార్యక్రమం రూపొందించినట్లు వివరించారు.

26/08/2023 15:33(IST)

ఇంజినీరింగ్‌ విద్యార్థుల ఆందోళన.. కళాశాల అద్దాలు ధ్వంసం

అబ్దుల్లాపూర్‌మెట్‌: రంగారెడ్డి జిల్లా అబ్దుల్లాపూర్‌మెట్‌ పరిధిలోని ఇంజినీరింగ్‌ కళాశాల వద్ద విద్యార్థులు ఆందోళనకు దిగారు. ఇంజినీరింగ్‌ విద్యార్థి ఆంజనేయులు అదృశ్యమయ్యాడంటూ విద్యార్థులు ఆందోళనకు దిగారు. ఆంజనేయులు అదృశ్యానికి కళాశాల యాజమాన్యమే కారణమని విద్యార్థులు ఆరోపిస్తున్నారు. ఆందోళనకు దిగిన విద్యార్థులు కళాశాల అద్దాలు ధ్వంసం చేశారు.

26/08/2023 15:30(IST)

తహసీల్దార్‌ కార్యాలయం ఎదుట మహిళ ఆత్మహత్యాయత్నం

అనంతపురం తహసీల్దార్‌ కార్యాలయం ఎదుట జింకల నాగలక్ష్మి పురుగుల మందు తాగి ఆత్మహత్యాయత్నం చేసింది. భూ వివాదంలో రెవెన్యూ అధికారులు న్యాయం చేయాలని ఆవేదన వ్యక్తం చేసింది. ఆమెను ఆసుపత్రికి తరలించి చికిత్స అందిస్తున్నారు.

26/08/2023 15:24(IST)

నోముల భగత్‌ను మార్చకపోతే స్వతంత్ర అభ్యర్థిని నిలబెడతాం: అసమ్మతి నేతలు

నల్గొండ: నాగార్జునసాగర్‌ భారాస ఎమ్మెల్యే అభ్యర్థిని మార్చాలని అసమ్మతి నేతలు డిమాండ్‌ చేశారు. నల్గొండ జిల్లాలోని త్రిపురారం మండలం పెద్దదేవులపల్లిలోని మాజీ ఎమ్మెల్యే రామ్మూర్తి నివాసంలో భారాస అసమ్మతి నేతలు భేటీ అయ్యారు. సమావేశంలో కడారి అంజయ్య యాదవ్‌, మన్నెం రంజిత్‌ యాదవ్‌, మాజీ ఎమ్మెల్యే రామ్మూర్తి తనయులు పాల్గొన్నారు. నోముల భగత్‌ను మార్చకపోతే స్వతంత్ర అభ్యర్థిని నిలబెడతామని నేతలు హెచ్చరించారు.

26/08/2023 15:17(IST)

రాంపూర్‌లో భారాసకే ఓటు వేస్తామంటూ గ్రామస్థుల ఏకగ్రీవ తీర్మానం

సిద్దిపేట: రాంపూర్‌లో మంత్రి హరీశ్‌రావుకు గ్రామస్థులు బోనాలతో స్వాగతం పలికారు. మంత్రి హరీశ్‌రావు సరదాగా గుర్రం బండి ఎక్కి ప్రజలకు అభివాదం చేశారు. గ్రామస్థులు భారాసకే తమ ఓటు అంటూ మంత్రికి ఏకగ్రీవ తీర్మాన పత్రాలు అందజేశారు. ఈ సందర్భంగా హరీశ్‌రావు మాట్లాడుతూ.. రాంపూర్‌ వచ్చేదాకా ఏకగ్రీవ తీర్మానం చేస్తారని తెలియదని చెప్పారు. తీర్మానం చేసినందుకు ధన్యవాదాలు తెలిపారు.

26/08/2023 15:11(IST)

ఎన్టీఆర్ భవన్‌లో తెదేపా విస్తృతస్థాయి సమావేశం

ఎన్టీఆర్‌ భవన్‌లో తెదేపా అధినేత చంద్రబాబు నాయుడు నేతృత్వంలో విస్తృతస్థాయి సమావేశం ప్రారంభమైంది. సమావేశానికి ఉండవల్లి శ్రీదేవి, యార్లగడ్డ వెంకట్రావు, పార్టీ ప్రతినిధులు హాజరయ్యారు.

26/08/2023 14:54(IST)

రాష్ట్రంలో క్రీడలకు అత్యధిక ప్రాధాన్యం ఇస్తున్నాం: శ్రీనివాస్‌ గౌడ్‌

హైదరాబాద్‌: తెలంగాణ రాష్ట్రం ఏర్పడిన తర్వాత క్రీడలకు అత్యధిక ప్రాధాన్యం ఇస్తున్నామని మంత్రి శ్రీనివాస్ గౌడ్ పేర్కొన్నారు. ప్రతి గ్రామీణ ప్రాంతాల్లో క్రీడా మైదానాలు ఉండాలని సీఎం కేసీఆర్ సూచన మేరకు ప్రతి గ్రామంలో క్రీడా మైదానం, క్రీడా సామాగ్రి అందుబాటులోకి తీసుకొచ్చామన్నారు. ప్రముఖ హాకీ క్రీడాకారుడు ధ్యాన్‌చంద్ జన్మదినం సందర్బంగా ప్రతి ఏడాది ఆగస్ట్ 26వ తేదీన జాతీయ క్రీడా దినోత్సవం నిర్వహిస్తున్నట్లు తెలిపారు.

26/08/2023 14:52(IST)

ఆర్టీసీ డ్రైవర్, కండక్టర్ సమయస్ఫూర్తి.. గర్భిణికి ప్రశాంతంగా ప్రసవం!

జహీరాబాద్‌: ఆర్టీసీ డ్రైవర్, కండక్టర్ సమయస్ఫూర్తితో నిండు గర్భిణికి ప్రసవ వేదన కష్టాలు తప్పాయి. సంగారెడ్డి జిల్లా జహీరాబాద్ నుంచి బీదర్‌కు జహీరాబాద్ డిపో ఆర్టీసీ బస్సులో రాత్రి ప్రయాణిస్తున్న గర్భిణి పురిటి నొప్పులతో తల్లడిల్లింది. గుర్తించిన కండక్టర్ కరుణాకర్ డ్రైవర్ ఆనందానికి విషయం చెప్పాడు. అప్రమత్తమైన డ్రైవర్ ఆనందం దారి మధ్యలోని మిర్జాపూర్(బి) కమ్యూనిటీ ఆరోగ్య కేంద్రానికి బస్సును తీసుకెళ్లి గర్భిణిని ఆసుపత్రిలో చేర్పించారు. ఆసుపత్రి విధుల్లో ఉన్న నర్సు సుధారాణి గర్భిణికి వైద్యం అందించడంతో పండంటి మగ బిడ్డ జన్మించాడు. ప్రయాణికులను సురక్షితంగా గమ్యం చేర్చే ఆర్టీసీ సిబ్బంది ఆపద సమయాల్లోనూ అప్రమత్తమై గర్భిణిని ఆసుపత్రికి చేర్చడం పట్ల బస్సులోని ప్రయాణికులు హర్షం వ్యక్తం చేశారు. ఝరాసంగం మండలం పొట్ పల్లికి చెందిన గర్భిణి జరీనా కుటుంబీకులు డ్రైవర్, కండక్టర్‌కు కృతజ్ఞతలు తెలిపారు.

26/08/2023 14:48(IST)

సేంద్రియ ఆహార ఉత్పత్తులే ఆరోగ్యకరం: ప్రణీత

హైదరాబాద్: సేంద్రియ ఆహార ఉత్పత్తులే ఆరోగ్యానికి శ్రేయస్కరమని ప్రముఖ సినీనటి ప్రణీత అన్నారు. హైదరాబాద్‌ బంజారాహీల్స్‌లోని సింప్లీ నామధారి నిర్వహించిన చాయ్‌ అండ్‌ చర్చలు కార్యక్రమంలో ఆమె పాల్గొన్నారు. ఈ సందర్భంగా ఆరోగ్యం పరంగా ఎలాంటి జాగ్రత్తలు తీసుకోవాలో వివరించారు. ఒకవైపు కుటుంబం.. మరోవైపు సినిమాలు రెండింటికి సమ ప్రాధాన్యత ఇస్తున్నట్లు చెప్పారు. హైదరాబాద్‌ అంటే చాలా ఇష్టమని.. ఇక్కడ తరచుగా షూటింగ్‌లకు రావడంతో ఎంతో అనుబంధం ఏర్పడిందన్నారు. హైదరాబాద్‌ బిర్యానీ చాలా అద్భతంగా ఉంటుందన్నారు. ప్రస్తుతం తెలుగు చిత్రాలతో పాటు తమిళ, మాలయళం చిత్రాల్లో నటిస్తున్నట్లు వివరించారు.

26/08/2023 14:39(IST)

జల్‌ జీవన్ మిషన్‌ పనులు చాలా చోట్ల ప్రారంభం కాలేదు: కేశినేని నాని

విజయవాడ: ఎన్టీఆర్‌ జిల్లా అభివృద్ధిపై కలెక్టర్‌ కార్యాలయంలో సమావేశం నిర్వహించారు. ప్రధానమంత్రి ఆవాస్ యోజన కింద 88 వేల ఇళ్లు మంజూరయినట్లు ఎంపీ కేశినేని నాని తెలిపారు. ఇప్పటివరకు 18 వేల ఇళ్లు మాత్రమే నిర్మించినట్లు వివరించారు. జల్‌ జీవన్ మిషన్‌ పనులు చాలా చోట్ల ప్రారంభం కాలేదని చెప్పారు.

26/08/2023 14:35(IST)

ముదినేపల్లి మండలంలో అధ్వాన రోడ్డు మార్గాలపై తెదేపా నిరసన

ఏలూరు జిల్లా: ముదినేపల్లి మండలంలో అధ్వాన రోడ్డు మార్గాలపై తెదేపా నిరసన తెలిపింది. ముదినేపల్లి- గుడ్లవల్లేరు రహదారి మార్గం చెరువును తలపిస్తోంది. రహదారి నీటిలో చేపలు పడుతూ తెదేపా నాయకులు కొడాలి వినోద్‌ నిరసన తెలిపారు. వైకాపా నేతల అక్రమ మైనింగ్ కారణంగా రోడ్లకు ఈ దుస్థితి కలిగిందని ఆయన వ్యాఖ్యానించారు.

26/08/2023 14:30(IST)

వివాహితను బలవంతంగా తీసుకెళ్లే ప్రయత్నం.. అడ్డుకున్న భర్త

నందిగామ బీసీ కాలనీకి చెందిన ఓ యువకుడు నందిగామకు చెందిన ఓ వివాహితను కారులో బలవంతంగా తీసుకొని విజయవాడ వైపు బయలుదేరాడు. వివాహిత భర్త కీసర టోల్‌గేట్‌ వద్ద కారును అడ్డగించి ఆ వ్యక్తిని నిలదీశాడు. ఈక్రమంలో ఆ యువకుడు.. వివాహిత భర్తపై దాడి చేశాడు. స్థానికులు గుమికూడటంతో యువకుడు అక్కడి నుంచి పరారయ్యాడు. కారును కంచికచర్ల పోలీసు స్టేషన్‌కు తరలించారు.

26/08/2023 14:24(IST)

కాకతీయ కాల్వలో పడి హెడ్‌ కానిస్టేబుల్‌ మృతి

కరీంనగర్‌ శివారు కాకతీయ కాల్వలో పడి తిమ్మాపూర్‌కు చెందిన హెడ్‌ కానిస్టేబుల్‌ దండు మల్లయ్య మృతి చెందాడు. మల్లయ్య గతంలో శ్రీధర్‌బాబు, ఈటల రాజేందర్‌కు అంగరక్షకుడిగా పనిచేశాడు. ప్రస్తుతం ఆయన పెద్దపల్లిలో విధులు నిర్వర్తిస్తున్నాడు.

26/08/2023 14:20(IST)

రూ.కోటి విలువైన గంజాయి స్వాధీనం

అల్లూరి జిల్లాలోని జీకే వీధి మండలంలో రూ.కోటి విలువైన గంజాయిని స్వాధీనం చేసుకున్నారు. ఒడిశాలో గంజాయిని కొని తరలించే యత్నం చేస్తుండగా పట్టుకున్నారు. వ్యానులో తరలిస్తున్న 900 కిలోల గంజాయిని స్వాధీనం చేసుకొని నలుగురిని అరెస్ట్‌ చేశారు.

26/08/2023 14:16(IST)

దోపిడీదారులు, దొంగలు కావాలంటే ప్రతి జైలు వెతకండి: కిరణ్ రాయల్‌

తిరుపతి: దిల్లీ లిక్కర్‌ స్కామ్‌లో నిందితుడు శరత్‌చంద్రను సభ్యుడిగా ఎలా నియమిస్తారని జనసేన నియోజకవర్గ ఇన్‌ఛార్జి కిరణ్‌ రాయల్‌ ప్రశ్నించారు. తిరుపతిలో నిర్వహించిన మీడియా సమావేశంలో ఆయన మాట్లాడారు. దోపిడీదారులు, దొంగలు కావాలంటే ప్రతి జైలు వెతకండని ఎద్దేవా చేశారు. శరత్‌చంద్రపై అనర్హత వేటు వేసి వెంటనే తొలగించాలని డిమాండ్‌ చేశారు. తితిదేను వ్యాపార కేంద్రంగా మార్చారని మండిపడ్డారు.

26/08/2023 14:11(IST)

లిక్కర్‌, ఈడీ, సీబీఐ కేసుల్లో నిందితులను ఎలా నియమిస్తారు: భానుప్రకాష్‌ రెడ్డి

తిరుపతి: నిబంధనలకు విరుద్ధంగా తితిదే పాలకమండలిని నియామకం చేశారని భాజపా నేత భానుప్రకాష్‌ రెడ్డి ఆరోపించారు. తిరుపతిలో నిర్వహించిన మీడియా సమావేశంలో ఆయన మాట్లాడారు. నేర చరిత్ర కలిగిన వ్యక్తులకు సభ్యులుగా అవకాశమిచ్చారని విమర్శించారు. లిక్కర్‌, ఈడీ, సీబీఐ కేసుల్లో నిందితులను ఎలా నియమిస్తారని ప్రశ్నించారు. రాష్ట్ర ప్రభుత్వ దుర్మార్గపు పనులకు భక్తులు కోర్టును ఆశ్రయించాలా అని మండిపడ్డారు.

26/08/2023 14:07(IST)

చెస్‌ గ్రాండ్‌ మాస్టర్‌ ద్రోణవల్లి హారిక కుమార్తె పుట్టిన రోజు వేడుక

భారత చెస్‌ గ్రాండ్‌ మాస్టర్‌, పద్మశ్రీ అవార్డు గ్రహీత ద్రోణవల్లి హారిక తన కుమార్తె హన్విక జన్మదిన వేడుకలను ఘనంగా నిర్వహించారు. అన్వయ కన్వెన్షన్‌ హాల్లో జరిగిన ఈ వేడుకలకు పలువురు క్రీడాకారులు, స్నేహితులు హాజరయ్యారు. డైరెక్టర్‌ బాబీ కూడా ఈ వేడుకల్లో పాల్గొన్నారు. బాబీ సతీమణి అనూష.. హారిక సోదరే.

26/08/2023 14:00(IST)

ప్రశ్నించిన రైతులకే బేడీలు వేశారు: కోదండరెడ్డి

హైదరాబాద్‌: రాష్ట్రంలో రైతులు బజారున పడ్డారని జాతీయ కిసాన్‌ కాంగ్రెస్‌ ఉపాధ్యక్షుడు కోదండరెడ్డి ఆరోపించారు. గాంధీ భవన్‌లో నిర్వహించిన సమావేశంలో ఆయన మాట్లాడారు. ఖమ్మంలో గిట్టుబాటు ధరకు పంటను కొనాలన్న రైతులకు బేడీలు వేశారని తెలిపారు. ఆర్ఆర్ఆర్ విషయంలో రైతులు ప్రశ్నిస్తే రైతులకే బేడీలు వేశారని గుర్తుచేశారు. అధికారంలోకి వచ్చిన తరువాత కిసాన్ కాంగ్రెస్ రైతుల కోసం పని చేస్తుందని తెలిపారు.

కిసాన్ కాంగ్రెస్ రాష్ట్ర ఛైర్మన్‌ అన్వేష్ రెడ్డి మాట్లాడుతూ.. సోమవారం ఉదయం 10 గంటలకు గాంధీ భవన్‌లో కిసాన్ కాంగ్రెస్ సమావేశం నిర్వహించనున్నట్లు తెలిపారు. దళితుల భూములు, ధరణితో భూ హక్కులు కోల్పోయిన అంశం, పంట నష్టంపై చర్చ జరుగుతుందని తెలిపారు.

26/08/2023 13:50(IST)

ఎస్సీ, ఎస్టీల అభివృద్ధికి కాంగ్రెస్ పార్టీ కట్టుబడి ఉంది: మల్లు రవి

హైదరాబాద్‌: చేవెళ్లలో శనివారం నిర్వహిస్తున్న సభలో ఏఐసీసీ జాతీయ అధ్యక్షుడు మల్లికార్జున ఖర్గే పాల్గొంటారని మాజీ ఎంపీ మల్లు రవి తెలిపారు. మల్లికార్జున ఖర్గేను అభినవ అంబేడ్కర్‌ అని అభివర్ణించారు. చారిత్రాత్మక సమయంలో ఖర్గే కాంగ్రెస్ పార్టీకి నాయకత్వం వహించాడని తెలిపారు. నేటి సభలో కాంగ్రెస్‌ పార్టీ ఎస్సీ, ఎస్టీ డిక్లరేషన్ చేయనుందని తెలిపారు. కాంగ్రెస్ అధికారంలోకి వస్తే ఏం చేస్తామో చేవెళ్లలో ప్రకటిస్తామని వివరించారు. ఎస్సీ, ఎస్టీల అభివృద్ధికి కాంగ్రెస్ పార్టీ కట్టుబడి ఉందని చెప్పారు.

26/08/2023 13:45(IST)

కాంగ్రెస్ ఆశావహుల నుంచి 1,025 దరఖాస్తులు

హైదరాబాద్‌: కాంగ్రెస్ ఆశావహుల నుంచి భారీగా దరఖాస్తులు వచ్చాయి. 119 నియోజకవర్గాల నుంచి 1,025 దరఖాస్తులు వచ్చాయి. ఆదివారం నుంచి దరఖాస్తుల పరిశీలన ప్రక్రియ ప్రారంభం కానుంది. ఒకటి, రెండు రోజుల్లో ప్రదేశ్ ఎలక్షన్ కమిటీ భేటీ అయి దరఖాస్తుదారుల అర్హతపై చర్చించనుంది. కొడంగల్ నియోజకవర్గం నుంచి రేవంత్‌రెడ్డికి సంబంధించిన ఒక్క దరఖాస్తు మాత్రమే వచ్చింది. మిగిలిన అన్ని నియోజకవర్గాల్లో పదుల సంఖ్యలో దరఖాస్తులు వచ్చాయి. రాష్ట్రంలో అత్యధికంగా ఇల్లెందు ఎస్టీ రిజర్వుడు నియోజకవర్గానికి 38 మంది దరఖాస్తు చేసుకున్నారు.

26/08/2023 13:38(IST)

ఫెమా నిబంధనల ఉల్లంఘన కింద బ్రైట్ కామ్‌పై కేసు

హైదరాబాద్‌: బ్రైట్ కామ్ కంపెనీలో సోదాలపై ఈడీ ప్రకటన విడుదల చేసింది. ఈ నెల 23న ఐదు చోట్ల తనిఖీలు చేసినట్లు చెప్పింది. బ్రైట్ కామ్ సీఈవో, సీఎఫ్‌వో, ఆడిటర్ ఇళ్లు, కార్యాలయాల్లో సోదాలు చేసినట్లు పేర్కొంది. తనిఖీల్లో రూ.3.3 కోట్ల నగదుతో పాటు రూ.9.3 కోట్ల విలువ చేసే బంగారు ఆభరణాలు, కీలక పత్రాలు, లాప్‌టాప్‌లు, హార్డ్ డిస్క్‌లు స్వాధీనం చేసుకున్నట్లు వివరించింది. ఫెమా నిబంధనల ఉల్లంఘన కింద బ్రైట్ కామ్‌పై ఈడీ కేసు నమోదు చేసింది.

26/08/2023 13:31(IST)

మాట మార్చిన వ్యక్తిగా జగన్‌ చరిత్రలో నిలిచిపోతారు: రామకృష్ణ

తుళ్లూరు: మాట మార్చిన వ్యక్తిగా జగన్‌ చరిత్రలో నిలిచిపోతారని సీపీఐ రాష్ట్ర కార్యదర్శి రామకృష్ణ అన్నారు. తుళ్లూరులో రైతులతో నిర్వహించిన సమావేశంలో ఆయన మాట్లాడారు. అమరావతిని ఏకైక రాజధానిగా గతంలో అందరూ అంగీకరించారని గుర్తుచేశారు. కులం పేరుతో దుష్ప్రచారాలు చేస్తారా అని ప్రశ్నించారు. సీఎం హోదాలో ఉన్న వ్యక్తి ఒక కులానికి వ్యతిరేకంగా మాట్లాడతారా అని మండిపడ్డారు. నాలుగేళ్ల కాలంలో అన్ని రంగాలు నష్టపోయాయని వివరించారు.

26/08/2023 13:26(IST)

జగన్‌ నొక్కే బటన్‌కు కరెంట్‌ లేదు: నారా లోకేశ్‌

నూజివీడు: జగన్‌ నొక్కే బటన్‌కు కరెంట్‌ లేదని తెదేపా జాతీయ ప్రధాన కార్యదర్శి నారా లోకేశ్‌ విమర్శించారు. కరెంట్‌ లేని బటన్‌ ఎన్నిసార్లు నొక్కినా డబ్బులు పడవని ఎద్దేవా చేశారు. కరెంటు కోతలతో రాష్ట్రమంతా చీకట్లు అలుముకున్నాయని విమర్శించారు. వ్యవసాయానికి, పరిశ్రమలకు కరెంటు కోతలు శాపంగా మారాయన్నారు.

26/08/2023 13:16(IST)

వారం తర్వాత భవిష్యత్తు కార్యాచరణ ప్రకటిస్తా: మైనంపల్లి

మల్కాజిగిరిలో పర్యటిస్తూ అనుచరులందరితో మాట్లాడతానని మైనంపల్లి హన్మంతరావు అన్నారు. కార్యకర్తలతో మాట్లాడిన తర్వాత నిర్ణయం తీసుకుంటానని చెప్పారు. వారం తర్వాత మీడియాను పిలిచి భవిష్యత్తు కార్యాచరణ ప్రకటిస్తానని అన్నారు. మెదక్‌ ప్రజలు తనకు రాజకీయ ప్రాణభిక్ష పెట్టారని పేర్కన్నారు. అంతా కలిస్తేనే తెలంగాణ సాకారమైందని గుర్తుచేశారు. తాను ఎప్పుడూ కాంగ్రెస్‌, భారాస, భాజపాను తిట్టను అని తెలిపారు. ఏ పార్టీలో ఉన్నా వెన్నుపోటు పొడిచే అలవాటు లేదని చెప్పారు.

26/08/2023 13:14(IST)

పల్లా రాజేశ్వర్‌రెడ్డి తన వ్యాఖ్యలు ఉపసంహరించుకోవాలి: ముత్తిరెడ్డి

ఎమ్మెల్సీ పల్లా రాజేశ్వర్‌ రెడ్డిపై జనగామ ఎమ్మెల్యే ముత్తిరెడ్డి యాదగిరిరెడ్డి ఆగ్రహం వ్యక్తం చేశారు. సీఎంకు, భారాసకు నష్టం జరిగేలా రాజేశ్వర్‌రెడ్డి మాట్లాడారని విమర్శించారు. తెలంగాణ స్థిరత్వం కోసం సీఎం తీసుకున్న నిర్ణయాన్ని వక్రీకరించారని చెప్పారు. పల్లా రాజేశ్వర్‌రెడ్డి తన వ్యాఖ్యలు ఉపసంహరించుకోవాలని ముత్తిరెడ్డి డిమాండ్‌ చేశారు.

26/08/2023 13:07(IST)

రెండు పడక గదుల ఇళ్ల విషయంలో అక్రమాలు జరుగుతున్నాయి: ఎన్వీఎస్‌ఎస్‌ ప్రభాకర్‌

హైదరాబాద్‌: పేదలకు పంపిణీ చేసే రెండు పడక గదుల ఇళ్ల విషయంలో అక్రమాలు జరుగుతున్నాయని భాజపా రాష్ట్ర ఉపాధ్యక్షుడు ఎన్వీఎస్‌ఎస్‌ ప్రభాకర్‌ ఆరోపించారు. వారికి నచ్చిన వారికి మాత్రమే ఇచ్చే విధంగా ప్రయత్నాలు జరుగుతున్నాయని విమర్శించారు. సరైన పద్ధతిలో పరిశీలన లేదని, అర్హులకు కాకుండా భారాస ఎమ్మెల్యేల అనుచరులకు కేటాయించడం బాధాకరమని తెలిపారు. దళిత బంధు, మైనారిటీ బంధు విషయంలో కూడా అక్రమాలకు పాల్పడుతున్నారని మండిపడ్డారు. హైకోర్టు సుమోటోగా తీసుకుని భారాసపై చర్యలు తీసుకోవాలని డిమాండ్ చేశారు.

26/08/2023 13:03(IST)

మానవాళి సంక్షేమం కోసం తిరుమలలో హోమం: భూమన కరుణాకర్‌రెడ్డి

తిరుమల: ప్రపంచ మానవాళి సంక్షేమం కోసం కారీరిష్టి-వరుణ జపం-పర్జన్యశాంతి హోమం నిర్వహించినట్లు తితిదే ఛైర్మన్‌ భూమన కరుణాకర్‌రెడ్డి తెలిపారు. శ్రీవారి దయతో సమృద్ధిగా వర్షాలు కురవాలని ప్రార్థించినట్లు ఆయన చెప్పారు. తిరుమల ధర్మగిరి వేద పాఠశాలలో ఐదు రోజుల పాటు నిర్వహించిన యాగాలు శనివారం మహా పూర్ణాహుతితో ముగిశాయని అన్నారు. వరుణదేవుని ఆశీస్సులు కోరుతూ 32 మంది రుత్వికులు ధర్మగిరిలో ఎంతో నిష్టగా, అత్యంత అంకితభావంతో యాగాలు నిర్వహించారని తెలిపారు.

26/08/2023 12:56(IST)

లక్ష్మీతాయారు అమ్మవారికి కిరీటం వితరణ

భద్రాచలంలోని లక్ష్మీతాయారు అమ్మవారికి రాగిపై బంగారు పూతతో తయారు చేసిన రూ.లక్ష విలువైన కిరీటాన్ని కాకినాడకు చెందిన గుమ్మల సత్య నారాయణ, సాయి అనురాధ అందజేశారు.

26/08/2023 12:50(IST)

వైద్య రంగంలో వస్తున్న నూతన సాంకేతిక పరిజ్ఞానాన్ని అందిపుచ్చుకోవాలి: వెంకయ్య నాయుడు

హైదరాబాద్‌: గ్రామీణ ప్రాంతాల ప్రజలకు మెరుగైన వైద్యం అందించడంపై వైద్యులు దృష్టి సారించాలని మాజీ ఉపరాష్ట్రపతి వెంకయ్య నాయుడు తెలిపారు. వ్యవసాయం మీద ఆధారపడి జీవిస్తున్న వారికి చేయూత అందించాల్సిన అవసరం ఉందని అన్నారు. బంజారాహిల్స్ రోడ్డు నంబర్ 10లోని కేర్ ఆసుపత్రిలో నిర్వహించిన 8వ అంతర్జాతీయ ఫేషియల్ ప్లాస్టిక్ సర్జరీ వర్క్‌షాప్‌ ప్రారంభోత్సవంలో వెంకయ్యనాయుడు ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ.. వైద్య రంగంలో వస్తున్న నూతన సాంకేతిక పరిజ్ఞానాన్ని, ఒరవడిని అందిపుచ్చుకోవాలన్నారు. ఎప్పటికప్పుడు నైపుణ్యాలను మెరుగుపరుచుకోవాలని వైద్యులకు సూచించారు.

26/08/2023 12:40(IST)

బాలానగర్‌-జడ్చర్ల మధ్య భారీగా ట్రాఫిక్‌ జామ్‌

హైదరాబాద్‌: బాలానగర్‌-జడ్చర్ల మధ్య భారీగా ట్రాఫిక్‌ జామ్‌ ఏర్పడింది. హైదరాబాద్‌-బెంగళూరు హైవేపై వాహనాల రాకపోకలు స్తంభించాయి. జాతీయ రహదారిపై 5 కిలోమీటర్ల మేర వాహనాల రాకపోకలు నిలిచిపోయాయి. హైదరాబాద్‌ వైపు వాహనాలు నెమ్మదిగా కదులుతున్నాయి. రోడ్ల మరమ్మతుల వల్ల ఒక వైపు మాత్రమే రాకపోకలు సాగుతున్నాయి.

26/08/2023 12:37(IST)

నంద్యాల జిల్లా వైకాపాలో వర్గ విభేదాలు

నంద్యాల జిల్లా వైకాపాలో వర్గ విభేదాలు బయటపడ్డాయి. కౌన్సిలర్‌ భర్త భూకబ్జాలు చేస్తున్నాడని వైకాపా నాయకుడు పుల్లయ్య ఆరోపించారు. ఆలయం, కమ్యూనిటీ హాల్‌ నిర్మాణ స్థలాన్ని కాజేస్తున్నారని ఎమ్మెల్యే శిల్పా రవిచంద్రకిషోర్‌రెడ్డి దృష్టికి పుల్లయ్య తీసుకొచ్చారు. గడపగడపకు మన ప్రభుత్వం కార్యక్రమానికి నంద్యాలకు వచ్చిన ఎమ్మెల్యే ఎదుటే కౌన్సిలర్‌ భర్త రమణ, పుల్లయ్య వాగ్వాదానికి దిగారు.

26/08/2023 12:31(IST)

జడ్పీ సర్వసభ్య సమావేశంలో సభ్యుల ఆవేదన

అనంతపురం: జడ్పీ సాధారణ సర్వసభ్య సమావేశంలో సభ్యులు ఆవేదన వ్యక్తం చేశారు. ఆసుపత్రుల్లో సేవలు సరిగ్గా లేవంటూ సభ్యులు చెప్పారు. ఉరవకొండ ఆసుపత్రిలో 14 మంది సిబ్బందికి 10 మందే ఉన్నారని ఎంపీపీ తెలిపారు.

26/08/2023 12:27(IST)

మదర్ థెరిసా చిత్రపటానికి చంద్రబాబు నివాళి

మదర్‌ థెరిసా జయంతి సందర్భంగా తెదేపా అధినేత చంద్రబాబు నాయుడు ఆమె చిత్రపటానికి నివాళి అర్పించారు. సమాజాన్ని కుటుంబంగా భావించి ఆమె ప్రేమతో సేవలు అందించారని తెలిపారు. అభాగ్యుల జీవితాల్లో వెలుగులు నింపిన కరుణామయి అని కొనియాడారు.

26/08/2023 12:20(IST)

అమరావతికి చేరుకున్న సీపీఐ బస్సు యాత్ర

తుళ్లూరు: సీపీఐ బస్సు యాత్ర అమరావతికి చేరుకుంది. తుళ్లూరులో బస్సు యాత్రకు రాజధాని రైతులు స్వాగతం పలికారు. తుళ్లూరు దీక్షా శిబిరం నుంచి సీపీఐ రాష్ట్ర కార్యదర్శి రామకృష్ణ రైతులతో కలిసి ర్యాలీ నిర్వహించారు. అమరాతి రైతులతో ఆయన ముఖాముఖి నిర్వహించారు.

26/08/2023 12:16(IST)

చెట్టును ఢీకొన్న ఆర్టీసీ బస్సు

ఆసిఫాబాద్‌: కెరమెరి మండలం ఘాట్‌ ప్రాంతంలో ఆర్టీసీ బస్సు అదుపుతప్పి చెట్టును ఢీకొంది. ప్రయాణికులకు ప్రమాదం తప్పడంతో అంతా ఊపిరి పీల్చుకున్నారు. ఆసిఫాబాద్‌ డిపోనకు చెందిన ఆర్టీసీ బస్సు ఆదిలాబాద్‌ నుంచి కాగజ్‌నగర్‌కు బయలుదేరింది. ఈక్రమంలో ఘాట్‌ ప్రాంతంలో అదుపుతప్పి చెట్టును ఢీకొంది. ఆ సమయంలో బస్సులో 36 మంది ప్రయాణికులు ఉన్నారు. ఎవరికీ ఎలాంటి ప్రమాదం జరగలేదు. ప్రయాణికులను మరో బస్సులో వారి గమ్యస్థానాలకు పంపించారు.

26/08/2023 12:15(IST)

బైక్‌తో ఎస్సైని ఢీ కొట్టిన మైనర్‌లు

సికింద్రాబాద్‌ రసూల్‌పురాలో ట్రాఫిక్‌ ఎస్సైని బైక్‌ ఢీ కొట్టింది. బైక్‌పై వేగంగా వెళ్తున్న ముగ్గురు మైనర్‌లను ఎస్సై ఆపేందుకు ప్రయత్నించారు. ఈ క్రమంలో బాలురు ఎస్సైని ఢీ కొట్టి కిందపడ్డారు. వారికి గాయాలు కావడంతో సమీప ఆస్పత్రికి తరలించారు.

26/08/2023 12:13(IST)

పరీక్షలో ఫెయిల్‌ అవుతాడనే భయంతో బీటెక్‌ విద్యార్థి ఆత్మహత్య

హైదరాబాద్‌: మధురానగర్‌లో బీటెక్‌ రెండో సంవత్సరం విద్యార్థి ద్రితేక్షణ్‌ వర్మ ఇంట్లో ఆత్మహత్య చేసుకున్నాడు. ఓ ప్రైవేటు కళాశాలలో ద్రితేక్షణ్‌ బీటెక్‌ చదువుతున్నాడు. పరీక్షలో ఫెయిల్‌ అవుతాననే భయంతో విద్యార్థి సూసైడ్‌ నోట్‌ రాసి ఆత్మహత్య చేసుకున్నాడు.

26/08/2023 12:08(IST)

మంచిరేవులలో కోటి వృక్షార్చన ప్రారంభం

రంగారెడ్డి: రంగారెడ్డి జిల్లా మంచిరేవులలో ఫారెస్ట్ ట్రెక్ పార్క్‌ను ప్రారంభించి, కోటి వృక్షార్చనలో భాగంగా మంత్రులు ఇంద్రకరణ్‌ రెడ్డి, సబితా ఇంద్రారెడ్డి, మహేందర్ రెడ్డి, రాజ్యసభ సభ్యుడు జోగినపల్లి సంతోష్ కుమార్, చేవెళ్ల ఎంపీ రంజిత్ రెడ్డి మొక్కలు నాటారు.

26/08/2023 12:07(IST)

తెలంగాణను ఆకుపచ్చని రాష్ట్రంగా మార్చిన ఘనత కేసీఆర్‌ది: గుత్తా సుఖేందర్‌రెడ్డి

హైదరాబాద్‌: కోటి వృక్షార్చన కార్యక్రమంలో భాగంగా శనివారం తెలంగాణ అసెంబ్లీ ప్రాంగణంలో శాసన మండలి ఛైర్మన్ గుత్తా సుఖేందర్ రెడ్డి, డిప్యూటీ ఛైర్మన్ బండ ప్రకాశ్‌, మంత్రి సింగిరెడ్డి నిరంజన్ రెడ్డి, ఎమ్మెల్సీ తక్కెళ్లపల్లి రవీందర్ రావు మొక్కలు నాటారు. ఈ సందర్భంగా గుత్తా సుఖేందర్ రెడ్డి మాట్లాడుతూ.. తెలంగాణ ప్రభుత్వం ఏర్పడిన తరువాత హరితహారం అనే మహోన్నత కార్యక్రమాన్ని నిర్వహిస్తోందని తెలిపారు. ముఖ్యమంత్రి కేసీఆర్ ప్రత్యేక దృష్టితో తెలంగాణలో అటవీ శాతం, పచ్చదనం పెరిగిందని చెప్పారు. తెలంగాణను ఆకుపచ్చని రాష్ట్రంగా మార్చిన ఘనత ముఖ్యమంత్రి కేసీఆర్‌కు దక్కిందని వివరించారు. దేశానికే అన్నం పెట్టే అన్నపూర్ణగా తెలంగాణ రాష్ట్రం ఎదగడం గర్వకారణమని తెలిపారు.

26/08/2023 12:00(IST)

మైనంపల్లి హన్మంతరావు ఇంటికి భారీగా తరలివచ్చిన కార్యకర్తలు

మేడ్చల్‌: ధూలపల్లిలోని మైనంపల్లి హన్మంతరావు ఇంటికి కార్యకర్తలు భారీగా చేరుకున్నారు. మల్కాజిగిరి, మెదక్‌ నియోజకవర్గాల నుంచి అనుచరులు, కార్పొరేటర్లు, మాజీ కార్పొరేటర్లు తరలివచ్చారు. మైనంపల్లి హన్మంతరావు తన అనుచరులతో సమావేశమై భవిష్యత్తు కార్యాచరణపై చర్చించనున్నారు.

26/08/2023 11:52(IST)

తప్పతాగి కారుతో కూరగాయల వ్యాన్‌ను ఢీకొన్న సీఐ

సికింద్రాబాద్: బొల్లారం పోలీసు స్టేషన్ పరిధిలో కమాండ్ కంట్రోల్ సీఐ శ్రీనివాస్ తప్పతాగి కారు నడిపి కూరగాయల లోడుతో వెళ్తున్న వాహనాన్ని ఢీ కొట్టాడు. రాత్రి సమయంలో ఎదురుగా వస్తున్న కూరగాయల వ్యాన్‌ను ఢీ కొనడంతో ప్రమాదం జరిగింది. శ్రీనివాస్ ప్రస్తుతం కమాండ్ కంట్రోల్ సెంటర్‌లో సీఐగా విధులు నిర్వహిస్తున్నట్లు పోలీసులు తెలిపారు. ఈ ప్రమాదంలో కూరగాయల వ్యాన్‌లో ఉన్న శ్రీధర్‌కు తీవ్ర గాయాలయ్యాయి. ఆయన్ను హుటాహుటిన ఆసుపత్రికి తరలించారు.

26/08/2023 11:48(IST)

అమిత్ షా పర్యటన నేపథ్యంలో భద్రాచలం చేరుకున్న ప్రత్యేక బృందం

భద్రాద్రిలో ఆదివారం కేంద్ర హోంమంత్రి అమిత్ షా పర్యటించనున్న నేపథ్యంలో దిల్లీ నుంచి ప్రత్యేక బృందం భద్రాచలం చేరుకుంది. భద్రాచలం సీతారామచంద్ర స్వామి వారిని అమిత్ షా దర్శించుకోనున్న నేపథ్యంలో ఆ పరిసరాలను బృందం పరిశీలించింది. అమిత్‌ షా హెలికాప్టర్ నుంచి ముందుగా బూర్గంపాడు మండలం సారపాకలోని ఐటీసీ గెస్ట్ హౌస్ వద్దకు రానున్నారు. అక్కడి నుంచి రోడ్డు మార్గం గుండా సారపాక నుంచి భద్రాచలం వచ్చి భద్రాద్రి రామయ్యను దర్శించుకోనున్నారు. పర్యటన నేపథ్యంలో అమిత్ షా తిరిగే ప్రాంతాలను ప్రత్యేక బృందం పరిశీలించింది.

26/08/2023 11:38(IST)

వీధికుక్కల దాడిలో వృద్ధురాలి మృతి

జగిత్యాల: గొల్లపల్లి మండలం దమ్మన్నపేటలో పలువురిపై వీధికుక్కలు దాడి చేస్తున్నాయి. కుక్కల దాడిలో గాయపడిన రాజమల్లవ్వ(70) ఆసుపత్రిలో మృతి చెందారు. మరోవైపు కుక్కల దాడిలో గాయపడిన సాహిత్య(12) వారం క్రితం మృతి చెందింది.

26/08/2023 11:34(IST)

మాదాపూర్‌లో గంజాయి ముఠా అరెస్ట్‌

హైదరాబాద్‌: మాదాపూర్‌లో గంజాయి ముఠాను ఎస్‌వోటీ పోలీసులు అరెస్ట్‌ చేశారు. వారి నుంచి 90 కిలోల గంజాయిని స్వాధీనం చేసుకున్నారు. గంజాయిని ఒడిశా నుంచి హైదరాబాద్‌కు తరలిస్తుండగా పోలీసులు వారిని అరెస్ట్‌ చేశారు.

26/08/2023 11:29(IST)

ఓట్లు తొలగించాలని మంత్రి చెప్పడమేంటి: నక్కా ఆనంద్‌బాబు

ఓటర్ల జాబితా రివిజన్‌ ప్రక్రియలో అధికార పార్టీ జోక్యం పెరిగిందని తెదేపా నేత నక్కా ఆనంద్‌బాబు అన్నారు. ప్రజలు ఓటు ఉందా అని ప్రతిరోజు తనిఖీ చేసుకోవాల్సిన పరిస్థితి ఏర్పడిందని తెలిపారు. ఇతర పార్టీల వారి ఓట్లు తొలగించాలని వైకాపా నేతలు చెబుతున్నారని దుయ్యబట్టారు. ప్రతి మండలంలో 4 నుంచి 5 వేల ఓట్లు తొలగించాలని మంత్రి నాగార్జున చెప్పారని మండిపడ్డారు. ప్రభుత్వ కార్యాలయంలో సమావేశం పెట్టినందుకు చర్యలు తీసుకోవాలని డిమాండ్‌ చేశారు. ఓట్లు తొలగించాలని మంత్రి చెప్పడమేంటని ప్రశ్నించారు.

26/08/2023 11:23(IST)

వంశధార కాలువపై కుప్పకూలిన కల్వర్టు

శ్రీకాకుళం: శ్రీజగన్నాథపురం వద్ద వంశధార కాలువపై కల్వర్టు కుప్పకూలింది. ఎవరూ లేని సమయంలో కూలడంతో ప్రాణ నష్టం తప్పింది. దీంతో ఎస్‌బీ కొత్తూరు, ఉప్పాడపేట, ఆర్‌హెచ్‌ పురం గ్రామాలకు రాకపోకలు నిలిచిపోయాయి.

26/08/2023 11:18(IST)

జగన్‌కు దోపిడీపై ఉన్న శ్రద్ధ ప్రాజెక్టులపై లేదు: లోకేశ్‌

నూజివీడు: నారా లోకేశ్‌-బ్రాహ్మణిల వివాహ వార్షికోత్సవం శనివారం ఉండటంతో యువగళం వాలంటీర్లు, తెలుగుదేశం శ్రేణులు లోకేశ్‌తో కేక్ కట్ చేయించారు. పోతిరెడ్డిపల్లి వద్ద అరిసెలతో తయారు చేసిన గజమాలతో గ్రామస్థులు ఘనస్వాగతం పలికారు. చింతలపూడి ఎత్తిపోతల పథకం పూర్తిచేసి, పిట్టలవారి పాలెం వద్ద లిఫ్ట్ ఇరిగేషన్ నిర్మించాలని పోతిరెడ్డిపల్లి గ్రామస్థులు లోకేశ్‌కు వినతి పత్రం ఇచ్చారు. ఈ సందర్భంగా లోకేశ్‌ మాట్లాడుతూ.. ముఖ్యమంత్రి జగన్‌కు అడ్డగోలు దోపిడీపై ఉన్న శ్రద్ధ తాగు, సాగునీటి ప్రాజెక్టులపై లేదని మండిపడ్డారు. తెదేపా హయాంలో సాగునీటి ప్రాజెక్టులపై రూ.68,294 కోట్లు ఖర్చు చేస్తే, వైకాపా ప్రభుత్వం వచ్చాక నాలుగో వంతు ఖర్చు చేయలేదని విమర్శించారు. తెదేపా అధికారంలోకి వచ్చాక చింతలపూడి ప్రాజెక్టు, పిట్టలవారిపాలెం వద్ద ఎత్తిపోతల ప్రాజెక్టు నిర్మిస్తామని తెలిపారు. గ్రామ ఎస్సీ కాలనీలో నిలిచిపోయిన అభివృద్ధి పనులను పునరుద్ధరిస్తామన్నారు.

26/08/2023 11:01(IST)

ఓటర్ల జాబితా అవకతవకలపై జడ్పీ సీఈవోకు తెదేపా ఫిర్యాదు

గుంటూరు: ఓటర్ల జాబితా అవకతవకలపై జడ్పీ సీఈవోకు తెదేపా ఫిర్యాదు చేసింది. వేమూరు నియోజకవర్గంలో తెదేపా సానుభూతిపరుల ఓట్లు తొలగించాలన్న మంత్రి నాగార్జున వ్యాఖ్యలపై ఫిర్యాదులో పేర్కొన్నారు.

26/08/2023 10:56(IST)

వాంబే కాలనీలో వరుస దొంగతనాలు

విజయవాడ నగర శివారు వాంబే కాలనీలో వరుస దొంగతనాలతో కాలనీవాసులు బెంబేలెత్తుతున్నారు. కాలనీలోని డి బ్లాక్‌లో తాళం వేసి ఉన్న ఇంటిలో ఆగంతుకులు చోరీకి పాల్పడ్డారు. శనివారం స్థానికంగా కిరాణ దుకాణం నిర్వహిస్తున్న దుర్గాప్రసాద్ అనే వ్యాపారి ఇంట్లో చోరీ జరిగింది. ఇటీవల వ్యాపారి దుర్గా ప్రసాద్ భార్య చనిపోవడంతో ఇంటికి తాళం వేసి తాను నిర్వహిస్తున్న కిరాణ దుకాణంలోనే ఉంటున్నాడు. ఇంటికి తాళం వేసి ఉండటం గమనించి ఆగంతుకులు చోరీకి పాల్పడ్డారు. కిలో వెండి, 11 గ్రాముల బంగారు ఆభరణాలు చోరీ అయినట్లు ఇంటి యజమాని గుర్తించారు. నున్న గ్రామీణ పోలీసులు సంఘటనా స్థలానికి చేరుకొని విచారిస్తున్నారు. ఇదే వారంలో వరుస చోరీల సంఘటనలు జరగడంతో కాలనీవాసులు బెంబేలెత్తుతున్నారు.

26/08/2023 10:47(IST)

జగన్‌కు స్వామి సేవ కన్నా సొంతవారి సేవే ప్రాధాన్యమైంది: లంకా దినకర్‌

తితిదే పాలకమండలి సభ్యుల నియామకాల్లో సామాజిక సమతుల్యత దెబ్బతిందని భాజపా అధికార ప్రతినిధి లంకా దినకర్‌ ఆరోపించారు. ముఖ్యమంత్రి జగన్‌మోహన్‌ రెడ్డికి స్వామి సేవ కన్నా తన సొంతవారి సేవ ప్రాధాన్యం అయిందని దుయ్యబట్టారు. తిరుమల తిరుపతి దేవస్థానం ప్రాశస్త్యాన్ని దెబ్బతీయడం రాష్ట్ర ప్రభుత్వానికి నిత్యకృత్యం అయిందని ధ్వజమెత్తారు. మద్యం కుంభకోణంలో నిందితుడు శరత్‌చంద్రారెడ్డికి, అనేక మంది ఆరోపణలు ఎదుర్కొంటున్న కళంకితులకు పదవులను కట్టబెట్టారని ఆరోపించారు.

26/08/2023 10:39(IST)

గుంటూరులో సీపీఐ బస్సు యాత్ర

గుంటూరు జిల్లాలో శనివారం సీపీఐ రాష్ట్ర కార్యదర్శి రామకృష్ణ నేతృత్వంలో బస్సు యాత్ర సాగనుంది. మరి కాసేపట్లో తుళ్లూరులో అమరావతి రైతులతో ముఖాముఖి నిర్వహించనున్నారు. సాయంత్రం మంగళగిరిలో బహిరంగ సభ ఏర్పాటు చేయనున్నారు.

26/08/2023 10:33(IST)

తితిదే బోర్డును రాజకీయ పునరావాస కేంద్రమని మళ్లీ నిరూపించారు: పురందేశ్వరి

తితిదే బోర్డును రాజకీయ పునరావాస కేంద్రమని మళ్లీ నిరూపించారని భాజపా ఏపీ రాష్ట్ర అధ్యక్షురాలు పురందేశ్వరి విమర్శించారు. బోర్డు సభ్యులుగా శరత్‌ చంద్రారెడ్డి, కేతన్‌ దేశాయ్‌ నియామకమే నిదర్శనమని విమర్శించారు. దిల్లీ మద్యం స్కామ్‌లో శరత్‌చంద్రారెడ్డి పాత్రధారిగా ఉన్నారని ఆమె తెలిపారు. ఎంసీఐ స్కామ్‌లో దోషిగా తేలి కేతన్‌ దేశాయ్‌ పదవి కోల్పోయారని అన్నారు. తిరుమల పవిత్రతకు మచ్చ తెచ్చే విధానాన్ని భాజపా ఖండిస్తోందని తెలిపారు.

26/08/2023 10:21(IST)

నూజివీడు నియోజకవర్గంలో యువగళం పాదయాత్ర

తెదేపా జాతీయ ప్రధాన కార్యదర్శి నారా లోకేశ్‌ యువగళం పాదయాత్ర 195వ రోజు ప్రారంభమైంది. నూజివీడు నియోజకవర్గంలో యాత్ర కొనసాగుతోంది. నేడు పాదయాత్ర 2,600 కిలోమీటర్ల మైలురాయిని చేరుకోనుంది. సింహాద్రిపురం కొర్లగుంట వద్ద లోకేశ్‌ స్థానికులతో సమావేశం కానున్నారు. చెక్కపల్లి క్రాస్‌ వద్ద బీసీ సామాజిక వర్గీయులతో సమావేశం నిర్వహించనన్నారు. మధ్యాహ్నం ముసునూరులో రచ్చబండ కార్యక్రమం ఏర్పాటు చేయనున్నారు. రాత్రికి వలసపల్లి విడిదికేంద్రంలో బస చేయనున్నారు.

26/08/2023 10:00(IST)

లారీని ఢీకొన్న ఆర్టీసీ బస్సు

ఏలూరు జిల్లా కొయ్యలగూడెం పులివాగు వంతెన వద్ద లారీని ఆర్టీసీ బస్సు ఢీకొంది. ఈ ఘటనలో బస్సులో ప్రయాణిస్తున్న పలువురికి తీవ్ర గాయాలయ్యాయి. జంగారెడ్డిగూడెం డిపోనకు చెందిన ఆర్టీసీ బస్సులో కోనసీమ జిల్లాలోని వాడపల్లి వేంకటేశ్వర స్వామి ఆలయానికి సుమారు 52 మంది ప్రయాణికులు శనివారం ఉదయం బయలుదేరారు. ఈక్రమంలో కొయ్యలగూడెం గ్రామ సమీపంలోని పులివాగు వంతెన వద్దకు రాగానే ముందు వెళుతున్న లారీని ఓవర్ టేక్ చేస్తూ.. ఎదురుగా వస్తున్న లారీని ఆర్టీసీ బస్సు బలంగా ఢీకొంది. ఈ ప్రమాదంలో ఆర్టీసీ బస్సులో ప్రయాణిస్తున్న సుమారు 32 మంది ప్రయాణికులు గాయాల పాలయ్యారు. స్థానికులు ఇచ్చిన సమాచారంతో 108 వాహనం అక్కడికి చేరుకుని క్షతగాత్రులను కొయ్యలగూడెం ప్రభుత్వాసుపత్రికి తరలించారు. ప్రథమ చికిత్స చేసిన అనంతరం తీవ్రగాయాల పాలైన వారిని రాజమహేంద్రవరం, జంగారెడ్డిగూడెం ప్రభుత్వ ఆసుపత్రులకు తరలించారు.

26/08/2023 09:56(IST)

మంగళగిరిలోని ఓ ఇంట్లో చోరీ

మంగళగిరిలోని ఎల్బీ నగర్‌లో వడ్డే సురేష్ కుమార్ ఇంట్లో రాత్రి దొంగలు చోరీ చేశారు. మెయిన్ డోర్ లాక్‌ను స్క్రూ డ్రైవర్‌తో తెరిచి ఇంట్లోకి ప్రవేశించి హాల్‌లో ఉన్న పర్సును తీసుకెళ్లారు. పర్సులో ఉన్న రూ.10 వేల నగదుతో పాటు అక్కడే ఉన్న 50 గ్రాములు బంగారు నగలు అపహరించుకు పోయారు. సురేష్ కుమార్ ఇచ్చిన ఫిర్యాదు మేరకు మంగళగిరి పట్టణ పోలీసులు విచారణ చేపట్టారు.

26/08/2023 09:51(IST)

తెలంగాణలో పెట్టుబడులను రెట్టింపు చేస్తున్న కోకా కోలా

హైదరాబాద్‌: కోకా కోలా సంస్థ తెలంగాణ రాష్ట్రంలో పెట్టుబడులను రెట్టింపు చేస్తోంది. సిద్దిపేటలోని ప్లాంట్‌ను విస్తరించాలని సంస్థ నిర్ణయించింది. ప్లాంట్‌లో అదనంగా రూ.647 కోట్ల పెట్టుబడి పెట్టేందుకు నిర్ణయానికి వచ్చింది. వరంగల్‌ లేదా కరీంనగర్‌లో రెండో తయారీ యూనిట్‌ ఏర్పాటుకు సంసిద్ధత వ్యక్తం చేసింది. ఇప్పటి వరకు రాష్ట్రంలో కోకా కోలా రూ.2,500 కోట్లు పెట్టుబడి పెట్టింది.

26/08/2023 09:45(IST)

కళాశాల భవనంపై నుంచి దూకి విద్యార్థిని ఆత్మహత్యాయత్నం

నంద్యాల: కళాశాల భవనంపై నుంచి దూకి ఇంటర్మీడియట్‌ విద్యార్థిని ఆత్మహత్యాయత్నానికి పాల్పడిన ఘటన నంద్యాల జిల్లాలో చోటు చేసుకుంది. చాగలమర్రిలోని కస్తూర్బా గురుకుల బాలికల పాఠశాలలో దీపిక ఇంటర్మీడియట్‌ రెండో సంవత్సరం చదువుతోంది. ఉదయం భవనంపై నుంచి దూకి ఆత్మహత్యాయత్నానికి పాల్పడింది. వెంటనే గమనించిన అధ్యాపకులు స్థానిక కేరళ ఆసుపత్రికి తరలించారు. మెరుగైన వైద్యం కోసం నంద్యాల సర్వజన వైద్యశాలకు తరలించాలని వైద్యులు సూచించారు. దీపిక స్వగ్రామం అవుకు మండలం ఉప్పలపాడు. ఆత్మహత్యాయత్నానికి గల కారణాలు తెలియాల్సి ఉంది.

26/08/2023 09:40(IST)

తుంగభద్ర ఎగువ కాల్వకు గండి

తుంగభద్ర ఎగువ కాల్వకు కొలగల్లు వద్ద వాగు సమీపంలో గండి పడింది. కర్ణాటకలోని 78వ కిలోమీటర్‌ కొలగల్లు వద్ద అర్ధరాత్రి వాగు సమీపంలో గండి పడింది. దీంతో ఆంధ్రా సరిహద్దులో బొమ్మనహళ్‌ వద్ద నీరు తగ్గుతోంది. తుంగభద్ర ఎగువ కాల్వ ఆయకట్టు రైతులు ఆందోళన చెందుతున్నారు.

26/08/2023 09:31(IST)

విజయవాడలోని కేంద్రీయ విశ్వవిద్యాలయం వద్ద కారు బీభత్సం

విజయవాడలోని బీఆర్టీఎస్‌ రోడ్డులోని కేంద్రీయ విశ్వవిద్యాలయం వద్ద కారు బీభత్సం సృష్టించింది. కారు బారికేడ్లను ఢీకొట్టి డివైడర్ మీదికి దూసుకువెళ్లింది. ఈ ప్రమాదంలో ముగ్గురు విద్యార్థులకు గాయాలయ్యాయి. విద్యార్థుల తల్లిదండ్రులు కారు డైవర్‌ను పట్టుకొని పోలీసులకు అప్పగించారు. గాయపడిన విద్యార్థులను ఆసుపత్రికి తరలించారు.

26/08/2023 08:26(IST)

రైలులో గ్యాస్ సిలిండర్‌ పేలి 8 మంది మృతి!

మధురై: తమిళనాడులోని మధురైలో ఘోర రైలు ప్రమాదం జరిగింది. లఖ్‌నవూ నుంచి రామేశ్వరం వెళ్తున్న ప్రత్యేక రైలులో గ్యాస్‌ సిలిండర్‌ పేలి మంటలు చెలరేగాయి. ఈ ఘటనలో రైలు బోగీ పూర్తిగా దగ్ధమవ్వగా.. ఎనిమిది మంది మృత్యువాతపడ్డారు. మరో 20 మంది తీవ్రంగా గాయపడ్డారు. క్షతగాత్రులను సమీప ఆస్పత్రికి తరలించి చికిత్స అందిస్తున్నారు. ప్రమాద సమయంలో రైలులో 63 మంది యాత్రికులు ఉన్నట్లు సమాచారం.

26/08/2023 07:56(IST)

అరకులోయ అందాలకు కొత్త వన్నెలు

ఆంధ్రాఊటీ అరకులోయలోని పద్మాపురం ఉద్యానం కాటేజీల్లో దిగే పర్యాటకులకు పాడేరు ఐటీడీఏ ప్రకృతి అందాలను తనివి తీరా ఆస్వాదించే అవకాశాన్ని కల్పిస్తోంది. పాడేరు ఐటీడీఏ పీవో అభిషేక్‌ చొరవ తీసుకొని ఇక్కడ ఆరు ట్రీ కాటేజీలను నిర్మించారు. కాటేజీల్లో దిగే సందర్శకులకు విభిన్నంగా ప్రకృతి సోయగాలు ఆస్వాదించే అవకాశం కల్పించారు. పగోడాలు, పచ్చని మొక్కలతో పూల ఉద్యానాన్ని ఏర్పాటు చేశారు. వాటర్‌ ఫౌంటెన్‌ను అందుబాటులోకి తెచ్చారు.

26/08/2023 07:55(IST)

తిరుమలలో శిఖర్‌ధావన్‌ వీరాభిమాని

తిరుమల, న్యూస్‌టుడే: భారత క్రికెటర్‌ శిఖర్‌ధావన్‌ వీరాభిమాని శుక్రవారం తిరుమల శ్రీవారిని దర్శించుకున్నారు. బెంగళూరుకు చెందిన శంకర్‌గీత ధావన్‌ భారత క్రికెటర్‌ శిఖర్‌ధావన్‌ వీరాభిమాని. ఈ నేపథ్యంలో తన శరీరంపై శిఖర్‌ధావన్‌ బ్యాటింగ్‌ చిత్రాలతో పాటు పేరు, ముఖ్యమైన తేదీలను పచ్చబొట్టు పొడిపించుకున్నారు. అభిమానంతోనే శరీరంపై పూర్తిగా పచ్చబొట్లు పొడిపించుకున్నట్లు తెలిపారు.

26/08/2023 07:55(IST)

మునగ.. కాయలు ఘనంగా

మండంలోని రాయలపురం పంచాయతీ వెంకటంపేటలో నివసిస్తున్న పార్వతి ఇంటి ఆవరణలో రెండేళ్ల వయసున్న మునగ చెట్టు కొమ్మలు విస్తరించి గుత్తులుగా కాయలు కాసింది. కాయల బరువుకు కొమ్మలు విరిగిపోకుండా కట్టెలను ఆదరువుగా ఉంచారు. చెట్టు చిన్నదైనా సుమారు 1000కి పైగా కాయలు కాసి ఉండడంతో అటుగా వెళ్లేవారు ఔరా మునగచెట్టు అంటూ ఆశ్చర్యంగా చూస్తున్నారు.

26/08/2023 07:44(IST)

ఎంత పెద్ద రెక్కలో

అద్దంకి- నార్కెట్‌పల్లి రాష్ట్రీయ రహదారిపై శుక్రవారం లారీలపై తరలిస్తున్న గాలిమరల రెక్కలు ఆకట్టుకున్నాయి. దూరం నుంచి చూస్తే రహదారిపై విమానం నిలిచినట్లు కనిపించింది. నెల్లూరు నుంచి కర్నూలుకు మూడు ప్రత్యేక వాహనాల్లో వీటిని తరలిస్తున్నారు. ఇందుకు ప్రత్యేక బృందాలు పని చేస్తున్నాయి. నెల్లూరు నుంచి కర్నూలుకు వెళ్లే రహదారి సౌకర్యంగా లేకపోవటంతో ఈ మార్గం మీదుగా వెళుతున్నట్లు వాహనదారులు చెప్పారు.

26/08/2023 07:44(IST)

బొమ్మలో దైవం.. కళా వైభవం

ఉప్పల్, న్యూస్‌టుడే: ఉప్పల్‌లోని పలు ప్రాంతాల్లో గణపతి ప్రతిమలను తయారు చేస్తున్నారు. వినాయక చవితికి సమయం దగ్గర పడుతుండటంతో కళాకారులు విగ్రహాల తయారీ వేగవంతం చేశారు. రాజస్థాన్, తదితర రాష్ట్రాల నుంచి వచ్చిన కళాకారులు ఏడాదంతా ఇక్కడే ఉంటూ విగ్రహాలను తయారు చేస్తున్నారు.

26/08/2023 07:41(IST)

ప్రయాణానికి కాదు.. పనికి పడిగాపులు

రంగారెడ్డి, నల్గొండ, మెదక్, మేడ్చల్, సూర్యాపేట జిల్లాల నుంచి వలస వచ్చిన కూలీలు పని కోసం విజయవాడ హైదరాబాద్‌ జాతీయ రహదారి పక్కన హయత్‌నగర్‌ వద్ద ఇలా బారులు తీరారు. రోజూ ఉదయం 7 నుంచి అడ్డాకు వచ్చి పని కోసం పడిగాపులు కాస్తుంటారు. ఉదయం 11 వరకు వేచి చూసి పని దొరక్కపోతే ఇంటికి వెళ్తారు. నిత్యం వెయ్యి మందికిపైగా కూలీలు ఇక్కడ కనిపిస్తారు. వారిలో సగానికిపైగా కూలీలకు నిత్యం పని దొరకదు.

26/08/2023 07:41(IST)

గుట్టలపై సిరుల సాగు

సారవంతమైన నేలల్లో పంటలు పండించడం సులువే. కానీ.. కామారెడ్డి జిల్లా గాంధారి, సదాశివనగర్‌ మండలాల్లోని గిరిజనులు తమ గ్రామాలకు ఆనుకొని ఉన్న గుట్ట ప్రాంతాల్లో వ్యవసాయం చేస్తూ సిరులు పండిస్తున్నారు. వర్షాకాలం వస్తోందంటే.. గుట్టలను చదును చేసి వర్షాధారంగా మొక్కజొన్న వేస్తున్నారు. చిత్రంలో సదాశివనగర్‌ మండలం యాచారం గ్రామ శివారులో మొక్కజొన్న సాగు చేస్తున్న దృశ్యం.

యాదాద్రిలో మొదలైన పవిత్రోత్సవాలు

తాజా వార్తలు (Latest News)

కిషన్‌రెడ్డి హైదరాబాద్‌కు రూపాయి తీసుకు రాలేదు: మంత్రి పొన్నం

‘యానిమల్‌ పార్క్‌’.. ఆ విషయం నేను చెప్పలేను: త్రిప్తి దిమ్రీ

పారిస్‌ ఒలింపిక్స్‌లో హిందీకి అరుదైన గౌరవం

ఆగస్టు 23న.. ఉక్రెయిన్‌ పర్యటనకు ప్రధాని మోదీ..!

భద్రాచలం వద్ద మళ్లీ పెరుగుతున్న గోదావరి నీటి మట్టం

రివ్యూ: బ్లడీ ఇష్క్‌: అవికా గోర్‌ సినిమా థ్రిల్‌ చేసిందా?

సుఖీభవ

చదువు