Breaking | Feedback | ePratibha | E-PAPER | Pratibha

జనాభా గణన కేంద్ర అంశం.. సుప్రీంకోర్టుకు తెలిపిన కేంద్రం

Updated : 29 Aug 2023 00:16 IST

సంక్షిప్త వార్తలు - చిత్ర వార్తలు

29/08/2023 00:35(IST)

ఉట్నూర్‌ ఐటీడీఏ ఎదుట బైఠాయించిన ఆదివాసీలు

ఉట్నూరు గ్రామీణం: తాము సాగు చేస్తున్న పోడు భూములను సర్వే చేసి పట్టాలిచ్చే వరకు ఇక్కడి నుంచి కదిలేది లేదని ఆదిలాబాద్‌ జిల్లా ఉట్నూర్ ఐటీడీఏ ఎదుట ఆదివాసీలు సోమవారం బైఠాయించారు. ఉట్నూర్ ఐటీడీఏలో నిర్వహించిన ప్రజా ఫిర్యాదు విభాగంలో భాగంగా మంచిర్యాల జిల్లా నెన్నెల మండలానికి చెందిన కోలార్ ఆదివాసీ మహిళలు, పురుషులు ఐటీడీఏ పీవో చాహత్ బాజ్ పాయ్ కలిసి వినతిపత్రం సమర్పించారు. నెన్నల మండలం నాలుగు గ్రామాలకు చెందిన తాము గత కొన్నేళ్ల నుంచి పోడు భూములు సాగు చేస్తున్నామని, గతంలో అధికారుల నిర్లక్ష్యంతో భూములను సర్వే చేయలేదని విన్నవించారు. దీంతో ఐటీడీఏ పీఓ వెంటనే సంబంధిత ఎంపీడీవోను కార్యాలయానికి రావాలని ఆదేశాలు జారీ చేశారు. సోమవారం రాత్రి వరకు ఎంపీడీవో రాకపోవడంతో బాధితులు ఐటీడీఏ కార్యాలయ ఆవరణలో తిష్ట వేశారు. తెలంగాణ ఆదివాసి గిరిజన సంఘం మహిళ రాష్ట్ర నాయకురాలు లక్ష్మి వారికి మద్దతు తెలిపారు. సంబంధిత ఎంపీడీవోను రేపు పిలిపిస్తానని వారికి పీవో హామీ ఇచ్చారు.

29/08/2023 00:11(IST)

జనాభా గణన కేంద్ర అంశం.. సుప్రీంకోర్టుకు తెలిపిన కేంద్రం

దిల్లీ: బిహార్‌ రాష్ట్ర ప్రభుత్వం తీసుకున్న కుల గణన సర్వే నిర్ణయాన్ని కేంద్రం వ్యతిరేకించింది. జనాభా గణన అనేది కేంద్రానికి సంబంధించిన అంశమని పేర్కొంది. ఈ మేరకు కేంద్ర ప్రభుత్వం సుప్రీంకోర్టుకు తెలిపింది. ‘‘జనాభా గణన అనేది కేంద్ర జాబితాలోకి వస్తుందని, కేవలం కేంద్ర ప్రభుత్వానికి మాత్రమే ఈ అధికారం ఉందని’’ కేంద్ర హోం వ్యవహారాల మంత్రిత్వ శాఖ సుప్రీంకోర్టులో అఫిడవిట్‌ దాఖలు చేసింది. జనాభా గణన చట్టబద్ధమైన ప్రక్రియ అని, జనాభా గణన చట్టం 1948 ప్రకారం దీన్ని చేపడతారని కేంద్రం పేర్కొంది. దీన్ని భారత రాజ్యాంగం ఏడవ షెడ్యూల్‌లోని కేంద్ర జాబితాలో చేర్చినట్లు తెలిపింది. రాజ్యాంగంలోని నిబంధనలు, వర్తించే చట్టానికి అనుగుణంగా దేశంలోని ఎస్సీ, ఎస్టీ, ఓబీసీ వర్గాల అభ్యున్నతి కోసం కేంద్ర ప్రభుత్వం సరైన చర్యలు తీసుకుంటుందని పేర్కొంది.

కులాల వారీగా జనాభా లెక్కించేందుకు బిహార్‌ కేబినెట్‌ నిర్ణయించింది. ఈ నిర్ణయానికి వ్యతిరేకంగా పట్నా హైకోర్టులో పిటిషన్లు దాఖలు అయ్యాయి. పట్నా హైకోర్టు ఇటీవల బిహార్‌ ప్రభుత్వం తీసుకున్న నిర్ణయాన్ని సమర్థించింది. దీంతో ఈ నిర్ణయాన్ని సవాల్‌ చేస్తూ ‘ఏక్‌ సోచ్‌ ఏక్‌ ప్రయాస్‌’ అనే స్వచ్ఛంద సంస్థ సుప్రీంకోర్టును ఆశ్రయించింది.

28/08/2023 23:10(IST)

తెలంగాణ సాంస్కృతిక సారథి ఉద్యోగులకు శుభవార్త

తెలంగాణ సాంస్కృతిక సారథి (టీఎస్‌ఎస్‌) ఉద్యోగులకు పీఆర్‌సీ అమలు చేయాలని ప్రభుత్వం నిర్ణయించింది. ఈ మేరకు సాంస్కృతిక, యువజన సర్వీసులు, పర్యాటక శాఖ ఉత్తర్వులు జారీ చేసింది. పీఆర్‌సీ 2020 ప్రకారం టీఎస్‌ఎస్‌ ఉద్యోగులకు పీఆర్‌సీ అమలు చేయనున్నారు. పెంచిన పీఆర్‌సీ 2021, జూన్‌ 1 నుంచి వర్తింపజేస్తారు. పీఆర్‌సీ అమలుకు చర్యలు తీసుకోవాలని భాషా సాంస్కృతిక శాఖ డైరెక్టర్‌ను ప్రభుత్వం ఆదేశించింది. మూడు నెలల కిత్రం టీఎస్‌ఎస్‌ ఉద్యోగుల పీఆర్‌సీకి ఆర్థికశాఖ అనుమతి ఇచ్చింది. సీఎం కేసీఆర్‌ ఆమోదంతో ఈ రోజు ఉత్తర్వులు జారీ అయ్యాయి. తెలంగాణ సాంస్కృతిక సారథిలో మొత్తం 583 ఉద్యోగులు ఉన్నారు. పేస్కేల్‌పై 30 శాతం పీఆర్‌సీ అమలు చేయనున్నారు. దీంతో ఉద్యోగులకు రూ.7300 మేర జీతాలు పెరిగే అవకాశం ఉంది.

28/08/2023 22:18(IST)

చేబ్రోలులో విశ్రాంత ఉద్యోగి హత్య

గుంటూరు: జిల్లాలోని చేబ్రోలు మండలం శేకూరులో విశ్రాంత ఉద్యోగి సుందరరావు హత్య జరిగింది. ఆదివారం రాత్రి హత్య జరిగి ఉంటుందని పోలీసులు అనుమానిస్తున్నారు. డబ్బు, నగల కోసం చంపి ఉంటారని పోలీసులు అనుమానం వ్యక్తం చేశారు.

28/08/2023 22:04(IST)

టీఎన్‌ఎస్‌ఎఫ్‌ రాష్ట్ర అధ్యక్షుడు ప్రణవ్‌ గోపాల్‌పై కేసు నమోదు

విశాఖపట్నం: టీఎన్‌ఎస్‌ఎఫ్‌ రాష్ట్ర అధ్యక్షుడు ప్రణవ్‌ గోపాల్‌పై కేసు నమోదైంది. సీఎంను ఉద్దేశించి ఆదివారం పోస్టర్‌ విడుదల, ప్రదర్శనపై కేసు నమోదైంది. ప్రణవ్‌ సహా ముగ్గురిపై కేసు నమోదు చేసినట్లు విశాఖ మూడో పట్టణ పోలీసులు తెలిపారు.

28/08/2023 22:02(IST)

భర్తను గొడ్డలితో నరికి చంపేసిన భార్య

నిజామాబాద్‌: నిజామాబాద్‌ పట్టణ పరిధిలోని చంద్రశేఖర్‌ కాలనీలో దారుణం జరిగింది. కుటుంబ కలహాల వల్ల తల్లిదండ్రులతో కలిసి భార్య.. భర్త కృష్ణను గొడ్డలితో నరికి చంపేసింది. వెంటనే సమాచారం అందుకున్న పోలీసులు సంఘటనా స్థలానికి చేరుకొని మృతదేహాన్ని నిజామాబాద్‌ ప్రభుత్వ ఆస్పత్రికి తరలించారు. నిందితురాలిని అదుపులోకి తీసుకున్నట్లు పోలీసులు తెలిపారు.

28/08/2023 21:34(IST)

గుంటూరు రేంజ్ పరిధిలో జరగవలసిన ఎస్‌ఐ దేహదారుఢ్య పరీక్షలు వాయిదా

గుంటూరు: ఈరోజు గుంటూరు రేంజ్ పరిధిలో జరగవలసిన ఎస్‌ఐ దేహదారుఢ్య పరీక్షలను వచ్చే నెల 9కి వాయిదా వేసినట్లు రేంజ్ ఐజీ శ్రీ పాల్ రాజు తెలిపారు. పోలీసు పరేడ్ గ్రౌండ్స్ మైదానంలో వర్షం కారణంగా ఫిజికల్ టెస్ట్‌లను వాయిదా వేసినట్లు ఆయన చెప్పారు.

28/08/2023 21:17(IST)

కామారెడ్డి జిల్లాలో మరో మండలం ఏర్పాటుకు ప్రతిపాదనలు

కామారెడ్డి: కామారెడ్డి జిల్లాలో మరో మండలం ఏర్పాటుకు ప్రతిపాదనలు అందించారు. నిజాంసాగర్ మండలానికి చెందిన 18 గ్రామాలతో మండలం ఏర్పాటు చేయాలని ప్రతిపాదనలు వచ్చినట్లు అధికారులు తెలిపారు.

28/08/2023 20:58(IST)

నల్గొండ డీసీఎంఎస్‌ ఛైర్మన్‌ జానయ్యపై 9 కేసులు: డీఎస్పీ

సూర్యాపేట: నల్గొండ డీసీఎంఎస్‌ ఛైర్మన్‌ జానయ్యపై 9 కేసులు నమోదయ్యాయని సూర్యాపేట డీఎస్పీ నాగభూషణం తెలిపారు. ఈ నెల 20న జానయ్య తుపాకీతో బెదిరించినట్లు ఫిర్యాదు అందిందని డీఎస్పీ చెప్పారు. తుపాకీతో బెదిరించి చేపల చెరువు లూటీ చేసినట్లు జానయ్యపై ఫిర్యాదు చేశారు.

28/08/2023 20:55(IST)

సాయిచంద్‌ కుటుంబానికి రూ. కోటి ఆర్థిక సాయం

హైదరాబాద్‌: గిడ్డంగుల కార్పొరేషన్ ఛైర్మన్‌ సాయిచంద్‌ కుటుంబానికి ఆర్థిక సాయం అందించారు. జూన్‌లో నాగర్‌కర్నూల్‌ జిల్లాలో సాయిచంద్ గుండెపోటుతో మృతి చెందారు. మంత్రి సబిత సాయిచంద్ సతీమణి రజినికి రూ. కోటి చెక్కును అందజేశారు. దాసోజు శ్రవణ్‌, మంచిరెడ్డి కిషన్‌ రెడ్డి హాజరయ్యారు.

28/08/2023 20:45(IST)

ఏపీపీఎస్సీ గ్రూప్‌-1, గ్రూప్‌-2లో 597 పోస్టుల భర్తీకి అనుమతి

అమరావతి: ఏపీపీఎస్సీ గ్రూప్‌-1, గ్రూప్‌-2లో 597 పోస్టుల భర్తీకి ప్రభుత్వం అనుమతి తెలిపింది. వివిధ శాఖలు, సచివాలయంలో పోస్టులు భర్తీ చేసేందుకు ప్రభుత్వం అనుమతినిచ్చింది.

28/08/2023 20:38(IST)

దిల్లీ మద్యం కేసులో కీలక అధికారులపై సీబీఐ కేసులు

దిల్లీ: దిల్లీ మద్యం కేసులో కీలక అధికారులపై సీబీఐ కేసులు నమోదు చేసింది. ఈడీ అసిస్టెంట్ డైరెక్టర్‌ పవన్‌ ఖాత్రి, ఎయిరిండియా ఉద్యోగి దీపక్‌ సంగ్వాన్‌లపై సీబీఐ కేసు నమోదు చేసింది. నేరపూరిత కుట్రలకు పాల్పడ్డారన్న ఆరోపణలతో కేసు నమోదు చేశారు.

28/08/2023 20:28(IST)

విదేశాల్లో ఉద్యోగాల పేరిట మోసగిస్తున్న కన్సల్టెన్సీపై డీజీపీకి ఫిర్యాదు

హైదరాబాద్‌: విదేశాల్లో ఉద్యోగాల పేరిట మోసగిస్తున్న కన్సల్టెన్సీపై బాధితులు డీజీపీకి ఫిర్యాదు చేశారు. హైదరాబాద్‌ కూకట్‌పల్లిలో అబ్రాడ్‌ స్టడీ ప్లాన్‌ పేరుతో నకిలీ కన్సల్టెన్సీ నిర్వహిస్తున్నారు. కన్సల్టెన్సీ ఎండీ అనిల్‌ మోసాలకు పాల్పడుతున్నారని బాధితులు డీజీపీకి ఫిర్యాదు చేశారు.

28/08/2023 20:25(IST)

రేవంత్ 3 గంటల కరెంటు మాటలతో కాంగ్రెస్‌ తగ్గిపోయింది: ఎర్రబెల్లి

హైదరాబాద్‌: కాంగ్రెస్‌ను బోగస్‌ పార్టీగా మంత్రి ఎర్రబెల్లి దయాకర్‌ రావు అభిర్ణించారు. భారాస కార్యకర్తల సమావేశంలో మంత్రులు ఎర్రబెల్లి దయాకర్‌ రావు, సత్యవతి రాథోడ్‌ పాల్గొని ప్రసంగించారు. దయాకర్‌ రావు మాట్లాడుతూ.. కర్ణాటక ఎన్నికల తర్వాత కాంగ్రెస్‌ గ్రాఫ్‌ కొంత పెరిగిందని మంత్రి తెలిపారు. రేవంత్ 3 గంటల కరెంటు మాటలతో కాంగ్రెస్‌ తగ్గిపోయిందని అన్నారు. రాష్ట్రంలో మళ్లీ అధికారంలోకి వచ్చేది భారాసనే అని ఆశాభావం వ్యక్తం చేశారు.

28/08/2023 20:22(IST)

గ్రూప్‌ - 4 ప్రాథమిక కీ విడుదల

హైదరాబాద్‌: గ్రూప్‌ -4 పరీక్షకు సంబంధించి ప్రాథమిక కీని టీఎస్‌పీఎస్సీ విడుదల చేసింది. ఆన్‌లైన్‌ ద్వారా ఈనెల 30 నుంచి సెప్టెంబర్ 4 వరకు అభ్యంతరాల స్వీకరణ ఉంటుందని టీఎస్‌పీఎస్సీ తెలిపింది. ఓఎంఆర్‌ షీట్ల డిజిటల్‌ కాపీలు వెబ్‌సైట్‌లో అందుబాటులో ఉన్నాయని అధికారులు వెల్లడించారు. సెప్టెంబర్‌ 27 వరకు ఓఎంఆర్‌ షీట్లు వెబ్‌సైట్‌లో అందుబాటులో ఉంటాయని తెలిపారు.

28/08/2023 20:05(IST)

హత్య కేసులో ముగ్గురికి జీవిత ఖైదు విధించిన కోర్టు

జగిత్యాల: హత్య కేసులో ముగ్గురికి జగిత్యాల కోర్టు జీవిత ఖైదు విధించింది. 2019లో బీర్పూర్‌ మండలం కల్లుమండువలో గంగాధర్ హత్య జరిగింది. హత్య కేసులో నారాయణ, రవి, దేవరాజం దోషులుగా తేలింది. నేరం రుజువు కావడంతో కోర్టు ముగ్గురికి యావజ్జీవ కారాగార శిక్ష విధించింది. రూ. 5 వేల చొప్పున జరిమానా కూడా విధించింది.

28/08/2023 19:45(IST)

ఏసీఏ 70 వసంతాల వేడుకల్లో రోజర్‌ బిన్నీ

విశాఖ: దేశంలో క్రికెట్‌కు ఎదురవుతున్న ప్రధాన సమస్యల్లో ఆటగాళ్ల ఫిట్‌నెస్‌ ఒకటని బీసీసీఐ అధ్యక్షుడు రోజర్‌ బిన్నీ తెలిపారు. దీనిని అధిగమించేందుకు అవసరమైన సహకారాన్ని బీసీసీఐ వారికి అందిస్తోందన్నారు. ఆంధ్రా క్రికెట్ అసోసియేషన్ (ఏసీఏ) 70 వసంతాల వేడుకల్లో రోజర్‌ బిన్నీతో పాటు వెటరన్ క్రీడాకారుడు మదన్ లాల్, ఉప ముఖ్యమంత్రి బూడి ముత్యాల నాయుడు పాల్గొన్నారు. ఏసీఏ కార్యవర్గంతో కలిసి పైలాన్‌ను ఆవిష్కరించారు. ఈ సందర్భంగా బిన్నీ మాట్లాడారు.

28/08/2023 19:43(IST)

హైటెక్‌ సిటీలోని ఓ ఈవెంట్‌కు హాజరైన పుల్లెల గోపీచంద్‌

బ్యాడ్మింటన్‌ కోచ్‌ పుల్లెల గోపీచంద్‌, ఐటీ ప్రిన్సిపల్‌ సెక్రటరీ జయేశ్‌ రంజన్‌, ఇతర ప్రముఖులు హైదరాబాద్‌లోని హైటెక్ సిటీ హోటల్ ట్రైడెంట్‌లో ఫిల్ట్ప్‌లను ప్రారంభించారు.

28/08/2023 19:26(IST)

రాష్ట్ర ఫుడ్‌ కమిషన్‌ ఛైర్మన్‌గా గోలి శ్రీనివాస రెడ్డి

హైదరాబాద్: రాష్ట్ర ఫుడ్‌ కమిషన్‌ ఛైర్మన్‌గా గోలి శ్రీనివాస రెడ్డి నియమితులయ్యారు. రాష్ట్ర ఫుడ్‌ కమిషన్‌ సభ్యురాలిగా భూక్యా జ్యోతిని నియమించారు. ఈ మేరకు ప్రభుత్వం ఉత్తర్వులు జారీ చేసింది.

28/08/2023 19:03(IST)

యూకే పర్యటనకు అనుమతి కోసం సీబీఐ కోర్టులో సీఎం జగన్ పిటిషన్

అమరావతి: యూకే పర్యటనకు అనుమతి కోసం సీబీఐ కోర్టులో సీఎం జగన్ పిటిషన్ దాఖలు చేశారు. దేశం విడిచి వెళ్లరాదన్న బెయిల్ షరతులు సడలించాలని జగన్‌ కోరారు. జగన్ పిటిషన్‌పై కౌంటరు దాఖలుకు సీబీఐ సమయం కోరింది. కోర్టు విచారణ ఈనెల 30కి వాయిదా వేసింది. విదేశీ పర్యటనకు అనుమతి కోరుతూ సీబీఐ కోర్టులో విజయసాయిరెడ్డి పిటిషన్ దాఖలు చేశారు. బెయిల్ షరతులు సడలించాలని కోరుతూ ఎంపీ విజయసాయిరెడ్డి పిటిషన్ వేశారు. యూకే, యూఎస్ఏ, జర్మనీ, దుబాయ్, సింగపూర్ పర్యటనకు ఆయన అనుమతి కోరారు.

28/08/2023 18:59(IST)

తుంగతుర్తి ఎమ్మెల్యే గాదరి కిషోర్ ఎన్నికపై హైకోర్టులో విచారణ

హైదరాబాద్‌: తుంగతుర్తి ఎమ్మెల్యే గాదరి కిషోర్ ఎన్నికపై హైకోర్టులో విచారణ జరిగింది. ఓట్ల లెక్కింపులో అవకతవకలు జరిగాయంటూ 2019లో హైకోర్టులో అద్దంకి దయాకర్ పిటిషన్ దాఖలు చేశారు. వీవీ ప్యాట్‌లు లెక్కించాలని కాంగ్రెస్ నేత అద్దంకి దయాకర్ వేసిన పిటిషన్‌పై విచారణ జరిగింది. అద్దంకి దయాకర్ పిటిషన్‌ను తిరస్కరించాలన్న గాదరి కిషోర్ అభ్యర్థనను హైకోర్టు తోసిపుచ్చింది.

28/08/2023 18:57(IST)

బస్సు నడిపిన మంత్రి పువ్వాడ

భద్రాద్రి జిల్లా: ఇల్లందులో పలు అభివృద్ధి కార్యక్రమాల్లో మంత్రి పువ్వాడ్ అజయ్‌ కుమార్‌ పాల్గొన్నారు. ఇల్లందు బస్సు డిపోను మంత్రి ప్రారంభించారు. మంత్రి స్వయంగా బస్సు నడిపి సందడి చేశారు.

28/08/2023 18:55(IST)

ఎన్టీఆర్‌ స్మారక నాణెం విడుదల మాకు గర్వకారణంగా ఉంది: నందమూరి రామకృష్ణ

ఎన్టీఆర్‌ స్మారక నాణెం విడుదలపై నందమూరి రామకృష్ణ స్పందించారు. ఎన్టీఆర్‌ స్మారక నాణెం విడుదల తమకు గర్వకారణంగా ఉందన్నారు. తమ కుటుంబంతో పాటు తెలుగు ప్రజలందరికీ గర్వకారణం అని వివరించారు. రాష్ట్రపతి, కేంద్ర ప్రభుత్వానికి ధన్యవాదాలు తెలిపారు.

28/08/2023 18:51(IST)

కొచ్చి-బెంగళూరు ఇండిగో విమానానికి బాంబు బెదిరింపు

కొచ్చి-బెంగళూరు ఇండిగో విమానానికి బాంబు బెదిరింపు వచ్చింది. దీంతో సిబ్బంది కొచ్చి విమానాశ్రయంలో తనిఖీలు నిర్వహించారు. బాంబు లేదని నిర్ధారించాక విమానం టేకాఫ్‌కు అనుమతినిచ్చారు.

28/08/2023 18:16(IST)

ముగిసిన దుర్గగుడి పాలకమండలి సమావేశం

విజయవాడ: దుర్గగుడి పాలకమండలి సమావేశం ముగిసింది. పలు కీలక తీర్మానాలకు ఆమోదం తెలిపినట్లు దుర్గగుడి పాలకమండలి ఛైర్మన్ కర్నాటి రాంబాబు చెప్పారు. శివాలయాన్ని త్వరితగతిన భక్తులకు అందుబాటులోకి తెస్తామని ఆయన వివరించారు.

28/08/2023 18:15(IST)

కృష్ణా నదిలో శవమై తేలిన డిగ్రీ విద్యార్థిని

కోడూరు: ఇంటి నుంచి శనివారం రాత్రి బయటకు వెళ్లిన డిగ్రీ విద్యార్థిని పరిశే కృపా కృష్ణా నదిలో శవమై తేలింది. విద్యార్థిని కోసం సోమవారం కోడూరు ఎస్సై వి. రాజేంద్రప్రసాద్ నేతృత్వంలో చేపట్టిన గాలింపు చర్యలలో హంసలదీవి పుష్కర ఘాట్ సమీపంలో విద్యార్థిని మృతదేహం కనిపించినట్లు తెలిపారు. పోస్టుమార్టం అనంతరం మృతదేహాన్ని యువతి కుటుంబసభ్యులకు అప్పగించనున్నట్లు తెలిపారు.

28/08/2023 18:10(IST)

ఆర్మీ జవాన్‌ కుటుంబాన్ని పరామర్శించిన ఈటల రాజేందర్‌

హైదరాబాద్‌: భాజపా ఎమ్మెల్యే ఈటల రాజేందర్‌ ఆర్మీ జవాన్‌ చంద్రశేఖర్‌ కుటుంబాన్ని పరామర్శించారు. అమర జవాన్‌ చంద్రశేఖర్ ఘాట్‌ వద్ద ఈటల నివాళి అర్పించారు. జవాన్‌ కుటుంబంలో ఒకరికి ఉద్యోగం ఇవ్వాలని ఈటల డిమాండ్‌ చేశారు.

28/08/2023 18:06(IST)

అసోంలో రాష్ట్ర నిటీపారుదల శాఖ అధికారుల పర్యటన

అసోంలో రాష్ట్ర నిటీపారుదల శాఖ అధికారులు పర్యటించారు. ప్రత్యేక ప్రధాన కార్యదర్శి రజత్‌ కుమార్‌, ఈఎన్సీ మురళీధర్‌ పర్యటించారు. బ్రహ్మపుత్ర నదికి చేపట్టిన వరద పరిరక్షణ చర్యలపై అధ్యయనం చేశారు.

28/08/2023 18:06(IST)

రాఖీ పౌర్ణమి.. టి-9 టికెట్లు తాత్కాలికగా నిలిపివేత

హైదరాబాద్‌: రాఖీ పౌర్ణమికి ప్రయాణికుల రద్దీ దృష్ట్యా టి-9 టికెట్లను తాత్కాలికగా నిలిపివేస్తున్నట్లు టీఎస్‌ఆర్టీసీ (TSRTC) ప్రకటించింది. రేపటి నుంచి 4 రోజుల పాటు టి-9 టికెట్ల నిలుపుదల అమల్లో ఉంటుందని ఆర్టీసీ అధికారులు తెలిపారు. సెప్టెంబర్ 2 నుంచి ఈ టికెట్లు యథాతథంగా కొనసాగుతాయని సంస్థ స్పష్టం చేసింది. పల్లె వెలుగు బస్సుల్లో ప్రయాణికులకు టి-9 పేరుతో రెండు టికెట్లను సంస్థ జారీ చేస్తోంది. 60 కిలోమీటర్ల పరిధిలో రానుపోను ప్రయాణానికి టి-9-60ని, 30 కిలో మీటర్లు టి-9-30 టికెట్లను ఆర్టీసీ అందుబాటులోకి తీసుకువచ్చింది. టి-9-60 టికెట్‌ను రూ.100కు, టి-9-30 టికెట్‌ను రూ.50కి ప్రయాణికులకు అందజేస్తోంది.

28/08/2023 18:02(IST)

పరకాల ఎస్‌బీఐ వద్ద రూ. 80 వేల చోరీ

హనుమకొండ: పరకాల ఎస్‌బీఐ వద్ద చోరీ జరిగింది. వృద్ధురాలి వద్ద రూ. 80 వేలను దుండగులు అపహరించారు. స్వాతంత్ర్య సమరయోధురాలు రాజమ్మ వద్ద నుంచి ఈ నగదును అపహరించారు. ఈ మేరకు పోలీసులు ఘటనా స్థలానికి చేరుకొని విచారణ చేపట్టారు.

28/08/2023 17:56(IST)

గగన్‌పహాడ్‌లో బాలిక అదృశ్యం ఘటన విషాదాంతం

హైదరాబాద్‌: బాలిక అదృశ్యం ఘటన విషాదాంతమైంది. ఈ నెల 25న గగన్‌పహాడ్‌లో పదేళ్ల బాలిక అదృశ్యమైంది. గగన్‌పహాడ్‌ శ్రీరాంకాలనీలో బాలిక మృతదేహాన్ని సోమవారం గుర్తించారు. అనుమానాస్పద మృతిగా కేసు నమోదు చేసుకొని పోలీసులు దర్యాప్తు చేస్తున్నారు.

28/08/2023 17:51(IST)

తెలుగువారి ఆత్మగౌరవానికి ప్రతీక.. ఎన్టీఆర్‌: వెంకయ్య నాయుడు

ఎన్టీఆర్‌ రూ. 100 స్మారక నాణెం విడుదల చేయడం సంతోషకరమని మాజీ ఉపరాష్ట్రపతి వెంకయ్య నాయుడు అన్నారు. తెలుగువారి ఆత్మగౌరవానికి ఎన్టీఆర్‌ ప్రతీక అని కొనియాడారు. ఎన్టీఆర్‌ నటుడిగానే కాక నాయకుడిగానూ తనదైన ముద్ర వేశారని వివరించారు.

28/08/2023 17:46(IST)

KA Paul: విశాఖలో కేఏ పాల్ నిరాహార దీక్ష

విశాఖ: స్టీల్ ప్లాంట్‌ ప్రైవేటీకరణను వ్యతిరేకిస్తూ ప్రజాశాంతి పార్టీ అధ్యక్షుడు కేఏ పాల్.. విశాఖలో నిరాహార దీక్ష చేపట్టారు. లాభాల్లో నడుస్తున్న స్టీల్ ప్లాంట్‌ను అధోగతిపాలు చేసి అదానీకి చౌకగా కట్టబెట్టే ప్రయత్నం చేస్తున్నారని ఆయన మండిపడ్డారు. రూ.8 లక్షల కోట్ల విలువైన పరిశ్రమను కేవలం రూ.4 వేల కోట్లకు తన మిత్రుడికి అప్పగించాలనే ప్రధాని మోదీ ప్రయత్నాన్ని ఎట్టి పరిస్థితుల్లోనూ సఫలం కానివ్వబోమని స్పష్టం చేశారు.

28/08/2023 17:40(IST)

ఖమ్మం సభలో అమిత్‌ షా వ్యాఖ్యలను ఖండించిన కొప్పుల ఈశ్వర్‌

హైదరాబాద్‌: ఖమ్మం సభలో అమిత్‌ షా వ్యాఖ్యలను మంత్రి కొప్పుల ఈశ్వర్‌ ఖండించారు. భారాసకు ఓటు వేస్తే మజ్లిస్‌కి వేసినట్టేనన్న షా వ్యాఖ్యలను మంత్రి ఖండించారు. ప్రజలను తప్పుదోవ పట్టించేలా మాట్లాడడం సరికాదన్నారు.

28/08/2023 17:37(IST)

రాష్ట్ర రైస్‌ మిల్లర్లకే ధాన్యం అమ్మాలి: ఎంపీ అర్వింద్‌

హైదరాబాద్‌: రాష్ట్ర రైస్‌ మిల్లర్లకే ధాన్యం అమ్మాలని.. సర్కారును ఎంపీ అర్వింద్‌ డిమాండ్‌ చేశారు. ఎంఎస్‌పీ ధరకే ధాన్యం కొనేందుకు రైస్‌ మిల్లర్లు సిద్ధంగా ఉన్నారని ఆయన వివరించారు. తక్కువ ధరకు కార్పొరేట్‌ కంపెనీలకు అమ్మేందుకు యత్నిస్తున్నారని ఆరోపించారు.

28/08/2023 17:29(IST)

తితిదే బోర్డ్ మెంబర్స్ నియామకాలను సవాల్ చేస్తూ హైకోర్టులో పిల్

అమరావతి: తితిదే బోర్డ్ మెంబర్స్ నియామకాలను సవాల్ చేస్తూ చింతా వెంకటేశ్వర్లు హైకోర్టులో పిల్ దాఖలు చేశారు. నేర చరిత్ర, మద్యం వ్యాపారాలు చేస్తున్న వారిని నియమించడం సరికాదని పిటిషన్‌లో పేర్కొన్నారు. ఎమ్మెల్యే సామినేని ఉదయభాను, కేతన్ దేశాయ్, శరత్ చంద్రారెడ్డి నియామకాలను సవాల్ చేస్తూ పిల్ దాఖలు చేశారు. ఈ ముగ్గురిని తితిదే బోర్డ్ మెంబర్లుగా తొలగించాలని పిటిషన్‌లో పేర్కొన్నారు.

28/08/2023 17:27(IST)

శ్రీవారి ఆలయంలో శాస్త్రోక్తంగా పవిత్ర సమర్పణ

తిరుమల: తిరుమల శ్రీవారి ఆలయ పవిత్రోత్సవాల్లో భాగంగా రెండో రోజు శాస్త్రోక్తంగా ప‌విత్ర సమర్పణ జరిగింది. ఈ సందర్భంగా యాగశాలలో హోమాలు తదితర వైదిక కార్యక్రమాలు చేపట్టారు. ఆ తరువాత సంపంగి ప్రాకారంలో వేడుకగా స్నపన తిరుమంజనం నిర్వహించారు.

28/08/2023 17:19(IST)

29న జీపీఎస్‌ ప్రతిపాదనలపై మంత్రివర్గ ఉపసంఘం సమావేశం

అమరావతి: గ్యారెంటీడ్ పెన్షన్ స్కీమ్ ప్రతిపాదనలపై మంగళవారం సచివాలయంలో మంత్రివర్గ ఉపసంఘం సమావేశం జరగనుంది. సచివాలయం రెండో బ్లాక్‌లో ఉద్యోగ సంఘాలతో మంత్రుల కమిటీ సమావేశం కానుంది. మధ్యాహ్నం 3 గంటలకు చర్చలకు రావాలని జాయింట్ స్టాఫ్ కౌన్సిల్‌లోని ఉద్యోగ సంఘాలను ప్రభుత్వం పిలిచింది. జీపీఎస్ ప్రతిపాదనలపై సమావేశాన్ని ఉపాధ్యాయ సంఘాలు బహిష్కరించాయి. సీపీఎస్ ఉద్యోగులనూ చర్చలకు పిలవాలని ఉద్యోగ సంఘాలు డిమాండ్ చేస్తున్నాయి.

జీపీఎస్‌ను కేబినెట్ ఆమోదించిన విషయం ఉద్యోగ సంఘాలెవరికీ తెలియదని ఏపీ సచివాలయ ఉద్యోగుల సంఘం అధ్యక్షుడు కె.వెంకట్రామిరెడ్డి తెలిపారు. జీపీఎస్‌పై ప్రభుత్వం ఏం ప్రతిపాదిస్తుందో ఏ ఉద్యోగ సంఘానికీ స్పష్టత లేదని చెప్పారు.

28/08/2023 17:13(IST)

ఉచిత కరెంటును ఉత్త కరెంటు చేసిన పార్టీ కాంగ్రెస్‌: హరీశ్‌రావు

హైదరాబాద్‌: కాంగ్రెస్‌ వస్తే మళ్లీ ఎరువులు, విద్యుత్‌ కోతలు ఉంటాయని మంత్రి హరీశ్‌రావు విమర్శించారు. ఉచిత కరెంటును ఉత్త కరెంటు చేసిన పార్టీ కాంగ్రెస్‌ అంటూ ఎద్దేవా చేశారు. కేసీఆర్‌ నాయకత్వంలో పాలమూరు జిల్లా పచ్చగా కళకళలాడుతోందని చెప్పారు. తెలంగాణ తరహా పథకాలు దేశానికి మార్గదర్శకంగా ఉన్నాయని తెలిపారు. కేసీఆర్‌ నాయకత్వంలో 24 గంటల విద్యుత్‌ వస్తోందని వివరించారు.

28/08/2023 17:05(IST)

అస్వస్థతకు గురైన వసతిగృహం విద్యార్థులు

నిర్మల్‌: తానూరు మండలం బోసి గ్రామంలోని బీసీ వసతి గృహంలో విద్యార్థులు అస్వస్థతకు గురయ్యారు. మధ్యాహ్న భోజనం తర్వాత విద్యార్థులు అస్వస్థతకు గురయ్యారు. విద్యార్థులకు వసతిగృహంలో చికిత్స అందిస్తున్నారు.

28/08/2023 16:59(IST)

మెహదీపట్నంలో స్నేహితుల గొడవ.. ఒకరికి గాయాలు

హైదరాబాద్‌: మెహదీపట్నంలో ఆదివారం రాత్రి స్నేహితుల మధ్య గొడవ జరిగింది. మద్యం తాగాక ముజాహిద్‌పై ముగ్గురు స్నేహితులు దాడి చేశారు. దీంతో గాయాల పాలైన ముజాహిద్‌కు ఆసుపత్రిలో చికిత్స అందిస్తున్నారు.

28/08/2023 16:57(IST)

ఆర్గానిక్ కూరగాయలు అందించాలి: తితిదే ఈవో

తిరుమల: తిరుమ‌ల శ్రీవారి దర్శనార్థం వచ్చే భక్తులకు వడ్డించేందుకు అన్న‌ప్ర‌సాదాల త‌యారీకి గానూ క్రమంగా ఆర్గానిక్ కూరగాయల సరఫరాను పెంచాలని తితిదే ఈవో ధర్మారెడ్డి దాతలను కోరారు. తిరుమల అన్నమయ్య భవనంలో సోమవారం కూరగాయల దాతలతో స‌మావేశం నిర్వ‌హించారు. ఈ సంద‌ర్భంగా ఈవో మాట్లాడుతూ.. సెప్టెంబరు 18 నుంచి 26వ తేదీ వ‌ర‌కు శ్రీ‌వారి సాలకట్ల బ్ర‌హ్మోత్స‌వాలు, అక్టోబరు 15 నుంచి 23వ తేదీ వరకు నవరాత్రి బ్రహ్మోత్సవాలు ఉండ‌డంతో భ‌క్తుల‌కు రుచిక‌ర‌మైన అన్న‌ప్ర‌సాదాలు అందించేందుకు అన్ని ర‌కాల కూర‌గాయ‌లు స‌ర‌ఫ‌రా చేయాల‌ని కోరారు.

28/08/2023 16:53(IST)

పొత్తులపై వామపక్షాలతో అధికారికంగా చర్చలు జరగలేదు: మాణిక్‌రావు ఠాక్రే

హైదరాబాద్‌: పొత్తులపై వామపక్షాలతో అధికారికంగా చర్చలు జరగలేదని కాంగ్రెస్‌ తెలంగాణ రాష్ట్ర వ్యవహారాల ఇన్‌ఛార్జి మాణిక్‌రావు ఠాక్రే తెలిపారు. పీసీసీ, సీఎల్పీ నాయకులు లేకుండా చర్చలు జరగవని చెప్పారు. ఇండియా కూటమి పార్టీలతో మాట్లాడటం సర్వసాధారణమని చెప్పారు. కమ్యూనిస్టులు, ఆర్‌.కృష్ణయ్యతో భేటీపై రేవంత్‌రెడ్డి, భట్టి విక్రమార్కకు చెప్పి వెళ్లినట్లు వివరించారు. పార్టీ అంశాలు పీసీసీ అధ్యక్షుడి ఆధ్వర్యంలోనే జరుగుతాయని స్పష్టం చేశారు. తనను నేరుగా చర్చలు జరపమని అధిష్ఠానం చెప్పలేదని తెలిపారు. కాంగ్రెస్‌కు మద్దతు కోసం చాలా పార్టీలు వస్తున్నాయని వివరించారు.

28/08/2023 16:52(IST)

Hyderabad: ‘తిరగబడరసామీ...’ టీజర్‌ లాంచ్‌.. మెరిసిన నటీనటులు!

రాజ్‌ తరుణ్‌, మాల్వీ మల్హోత్రా, మన్నారా చోప్రా ప్రధాన పాత్రల్లో తెరకెక్కుతున్న చిత్రం ‘తిరగబడరసామీ...’ (Thiragabadara Saami). ఎ.ఎస్‌.రవికుమార్‌ చౌదరి తెరకెక్కించారు. హైదరాబాద్‌లో ఈ సినిమా టీజర్‌ లాంచ్‌ ఈవెంట్‌ను నిర్వహించారు. ఈ సందర్భంగా చిత్ర నటీనటులు ఫొటోలు దిగి సందడి చేశారు.

28/08/2023 16:46(IST)

కాంగ్రెస్ కర్ణాటకలో ఇచ్చిన హామీలను నెరవేర్చడం లేదు: కవిత

నిజామాబాద్‌ జిల్లాలో మంత్రులు ప్రశాంత్‌రెడ్డి, ఇంద్రకరణ్‌రెడ్డి ఎమ్మెల్సీ కవిత పర్యటించారు. కమ్మర్‌ పల్లి మండలం చౌట్‌పల్లిలో పలు పనులకు శంకుస్థాపనలు, ప్రారంభోత్సవాలు చేశారు. ఈ సందర్భంగా ఎమ్మెల్సీ కవిత మాట్లాడుతూ.. కాంగ్రెస్‌ హయాంలో తెలంగాణకు నిధులు ఇవ్వలేదని తెలిపారు. కాంగ్రెస్‌కు ఓటేస్తే మురికి కూపంలో వేసినట్లే అని విమర్శించారు. మిగతా పార్టీలు గెలిస్తే అభివృద్ధి ఆగిపోతుందని తెలిపారు. కాంగ్రెస్ కర్ణాటకలో ఇచ్చిన హామీలను నెరవేర్చడంలేదని చెప్పారు.

28/08/2023 16:39(IST)

ఏలూరు దక్షిణపు వీధిలో వివాహిత దారుణ హత్య

ఏలూరు దక్షిణపు వీధిలో వివాహిత దారుణ హత్యకు గురైంది. కేసు నమోదు చేసి పోలీసులు దర్యాప్తు చేపట్టారు. నూజివీడులో దిమ్మిటి సత్యనారాయణ అనే వ్యక్తి రైలు కిందపడి ఆత్మహత్య చేసుకున్నాడు. సత్యనారాయణే మహిళను హత్య చేశాడని పోలీసులు అనుమానిస్తున్నారు. వివాహేతర సంబంధమే హత్యకు కారణమని సందేహం వ్యక్తం చేస్తున్నారు.

28/08/2023 16:37(IST)

ఎన్టీఆర్‌కు భారతరత్న ఇవ్వాలి: చంద్రబాబు నాయుడు

దిల్లీ: తెదేపా నేత చంద్రబాబు నాయుడు సుమారు గంటపాటు ఈసీ అధికారులతో సమావేశం నిర్వహించారు. ఆయన మాట్లాడుతూ.. ఎన్టీఆర్‌ స్మారక నాణెం తీసుకురావడంపై అభినందనలు తెలిపారు. ఎన్టీఆర్‌కు భారతరత్న ఇవ్వాలని కోరుతున్నామన్నారు. దేశ రాజకీయాలకు దశ, దిశ నిర్దేశించిన వ్యక్తి.. ఎన్టీఆర్‌ అని కొనియాడారు. రాష్ట్రంలో వింత సమస్య వచ్చిందని చెప్పారు. ఒక పార్టీ ఓట్లు తొలగించాలనే ఆలోచన గతంలో ఎవరికీ రాలేదని వివరించారు.

28/08/2023 16:29(IST)

సహకార బ్యాంకును మోసగించిన కేసులో దంపతుల అరెస్ట్‌

హైదరాబాద్‌: సహకార బ్యాంకును మోసగించిన కేసులో దంపతులను అరెస్ట్‌ చేశారు. 14 ఏళ్లుగా పరారీలో ఉన్న దంపతులను సీఐడీ అరెస్ట్‌ చేసింది. 2009లో కూకట్‌పల్లి కన్యకా పరమేశ్వరి సహకార బ్యాంకులో అక్రమాలు చోటు చేసుకున్నాయి. బినామీ పేర్లతో బ్యాంకు డైరెక్టర్‌, ఉద్యోగులు రుణాలు తీసుకున్నారు. రూ.2.86 కోట్ల రుణాలను నిందితులు సొంత ఖాతాలకు మళ్లించుకున్నారు. బ్యాంకులో అక్రమాలపై ఇప్పటికే పలువురిని అరెస్ట్‌ చేశారు. బ్యాంకు డైరెక్టర్‌ పద్మ, ఆమె భర్త(బ్యాంకు ఉద్యోగి)పై 2016లో నాన్‌ బెయిలబుల్‌ వారెంట్‌ జారీ అయింది. ఈ క్రమంలో సోమవారం ఇద్దరిని అరెస్ట్‌ చేసి రిమాండ్‌కు తరలించారు.

28/08/2023 16:26(IST)

జంట నగరాల్లోని పలు ప్రాంతాల్లో వర్షం

హైదరాబాద్‌: జంట నగరాల్లోని పలు ప్రాంతాల్లో వర్షం కురిసింది. సికింద్రాబాద్‌, చిలకలగూడ, మారేడుపల్లి, బోయిన్‌పల్లి, అల్వాల్‌, ప్యాట్నీ, బేగంపేట్‌, కూకట్‌పల్లి, హైదర్‌నగర్‌, ప్రగతి నగర్‌, బాచుపల్లిలో వర్షం కురిసింది.

28/08/2023 16:16(IST)

గిరిజనుల వెనుకబాటుకు కారణం కాంగ్రెస్‌: హరీశ్‌రావు

హైదరాబాద్‌: గిరిజనుల వెనుకబాటుకు కారణం కాంగ్రెస్‌ పార్టీ అని మంత్రి హరీశ్‌రావు విమర్శించారు. బీఆర్‌ అంబేడ్కర్‌ను ఓడించిన పార్టీ కాంగ్రెస్‌ అని ఆరోపించారు. అంబేడ్కర్‌ చనిపోయాక భారతరత్న ఇవ్వని పార్టీ కాంగ్రెస్‌ అని మండిపడ్డారు. జగ్జీవన్‌రామ్‌ ప్రధాని కాకుండా అడ్డుకున్న పార్టీ కాంగ్రెస్‌ అని విమర్శించారు. కాంగ్రెస్‌కు ఎస్సీలపై ప్రేమ ఉన్నట్లు మాట్లాడితే అది మొసలి ప్రేమే అని ఎద్దేవా చేశారు. భారాస ప్రభుత్వం గిరిజనుల కోసం తండాలను పంచాయతీలుగా మార్చిందని గుర్తుచేశారు. గిరిజనులకు 10 శాతం రిజర్వేషన్లు కల్పించినట్లు తెలిపారు.

28/08/2023 16:05(IST)

కుప్పంలో మంగళవారం నారా భువనేశ్వరి పర్యటన

కుప్పం పట్టణం: చిత్తూరు జిల్లా కుప్పంలో చంద్రబాబు నాయుడు సతీమణి నారా భువనేశ్వరి మంగళవారం పర్యటించనున్నారు. కుప్పం ప్రజలకు ఉచిత వైద్య సేవలు అందించేందుకు ఎన్టీఆర్ ట్రస్ట్ ఆధ్వర్యంలో సంజీవిని క్లినిక్, సంజీవిని మొబైల్ మెడికల్ వాహనాన్ని ఆమె ప్రారంభించనున్నారు.

28/08/2023 16:02(IST)

ఓట్ల అవకతవకలపై సీఈసీకి చంద్రబాబు ఫిర్యాదు

దిల్లీ: తెదేపా అధినేత చంద్రబాబు నాయుడు సీఈసీ కార్యాలయానికి చేరుకున్నారు. ఆంధ్రప్రదేశ్‌ రాష్ట్రంలోని ఓట్ల అవకతవకలపై ఆయన సీఈసీకి ఫిర్యాదు చేశారు. వాలంటీర్ల ద్వారా అధికార దుర్వినియోగానికి పాల్పడుతున్నారని ఫిర్యాదులో పేర్కొన్నారు. తెదేపా సానుభూతిపరుల ఓట్లు తొలగిస్తున్నారని ఆరోపించారు. ఉరవకొండ, పర్చూరు, విజయవాడ, విశాఖ ఘటనలను సీఈసీ దృష్టికి తీసుకెళ్లారు. తెదేపా ఫిర్యాదులను అధికారులు పట్టించుకోవడంలేదని తెలిపారు. బాధ్యులైన అధికారులపై ఉరవకొండ తరహా చర్యలు తీసుకోవాలని కోరారు.

28/08/2023 16:01(IST)

వైకాపా ప్రభుత్వంలో ఇసుక దోపిడీ: పరిటాల సునీత

వైకాపా ప్రభుత్వంలో ఇసుక దోపిడీ జరుగుతోందని మాజీ మంత్రి పరిటాల సునీత, ధర్మవరం నియోజకవర్గ తెదేపా ఇన్‌ఛార్జి పరిటాల శ్రీరామ్ ఆరోపించారు. ధర్మవరం నియోజకవర్గంలోని బత్తలపల్లి మండలం నల్ల బోయినపల్లిలో ఇసుక రీచ్ వద్ద తెదేపా ఆధ్వర్యంలో నిరసన తెలిపారు. పరిటాల శ్రీరామ్ ఇసుక నిల్వల వద్ద సెల్ఫీ తీసుకొని ఛాలెంజ్ చేశారు. నిబంధనలకు విరుద్ధంగా ఇసుక తవ్వకాలు చేస్తున్నారని, అక్రమంగా అమ్మకాలు చేసి వైకాపా నాయకులు సొమ్ము చేసుకుంటున్నారని శ్రీరామ్ ఆరోపించారు.

28/08/2023 15:54(IST)

ఏలూరు కలెక్టరేట్‌లో మహిళ ఆత్మహత్యాయత్నం

ఏలూరు కలెక్టరేట్‌లోని స్పందన కార్యక్రమం వద్ద మండవల్లి మండలం దెయ్యంపాడుకు చెందిన సైదు బేబీకుమారి ఆత్మహత్యాయత్నం చేసింది. ఆమెను చికిత్స నిమిత్తం ఆసుపత్రికి తరలించారు. భూ వివాదంలో చాలా కాలంగా న్యాయం జరగడం లేదని ఆమె ఆత్మహత్యాయత్నం చేసింది.

28/08/2023 15:47(IST)

బయోమెట్రిక్‌ యంత్రాన్ని దుర్వినియోగం చేసిన ఎస్‌జీటీపై సస్పెన్షన్‌ వేటు

నాగర్‌కర్నూల్: తిమ్మాజీపేట మండలం లొట్లోనిపల్లి తండాలోని ఏకోపాధ్యాయ పాఠశాల ఎస్‌జీటీ సాయిరెడ్డిపై సస్పెన్షన్‌ వేటు పడింది. బయోమెట్రిక్‌ యంత్రాన్ని దుర్వినియోగం చేశారని సాయిరెడ్డిపై ఆరోపణలున్నాయి. కలెక్టర్‌ ఆదేశాలతో సాయిరెడ్డిని డీఈవో గోవిందరాజులు సస్పెండ్‌ చేశారు.

28/08/2023 15:38(IST)

మా డిక్లరేషన్‌.. ఎస్సీ, గిరిజనుల జీవితాల్లో గుణాత్మక మార్పునకు కన్ఫర్మేషన్‌

హైదరాబాద్‌: తమ డిక్లరేషన్‌ ఎస్సీ, గిరిజనుల జీవితాల్లో గుణాత్మక మార్పునకు కన్ఫర్మేషన్‌ అని టీపీసీసీ చీఫ్‌ రేవంత్‌రెడ్డి తెలిపారు. తమ డిక్లరేషన్‌.. ఎస్సీని సీఎం చేస్తామని మోసగించడం కాదని ఎద్దేవా చేశారు. గిరిజన రిజర్వేషన్లు పెంచుతామని మోసగించడం కాదని మండిపడ్డారు. తమ డిక్లరేషన్‌.. గిరిజన రైతులకు బేడీలు వేసి అవమానించడం కాదని విమర్శించారు.

28/08/2023 15:28(IST)

సీఈసీ కార్యాలయానికి చేరుకున్న చంద్రబాబు

దిల్లీ: తెదేపా అధినేత చంద్రబాబు నాయుడు సీఈసీ కార్యాలయానికి చేరుకున్నారు. ఆంధ్రప్రదేశ్‌ రాష్ట్రంలోని ఓట్ల అవకతవకలపై ఆయన సీఈసీకి ఫిర్యాదు చేయనున్నారు. తెదేపా సానుభూతిపరుల ఓట్లు తొలగిస్తున్నారని సీఈసీ దృష్టికి తీసుకెళ్లనున్నారు.

28/08/2023 15:22(IST)

లారీ ఇసుకను రూ.15 వేలకు అమ్ముకుంటున్నారు: ప్రత్తిపాటి

ఇసుక తోడేళ్లు రూ.40 వేల కోట్ల ప్రజా సంపదను కొల్లగొట్టాయని ప్రత్తిపాటి పుల్లారావు ఆరోపించారు. ఒప్పందం ముగిసినా ఇసుక తవ్వకాలు చేస్తున్నారని విమర్శించారు. జేపీ పవర్ వెంచర్స్‌ అనే బినామీ సంస్థతో ఇసుక దోపిడీ చేస్తున్నారని ఆగ్రహం వ్యక్తం చేశారు. వైకాపా నేతల సొంత లారీల్లో పక్క రాష్ట్రాలకు ఇసుక రవాణా జరుగుతోందని మండిపడ్డారు. లారీ ఇసుకను రూ.15 వేలకు అమ్ముకుంటున్నారని విమర్శించారు. ఇసుక దోపిడీని ప్రశ్నిస్తే వేధింపులు, అట్రాసిటీ కేసులు పెడుతున్నారని ఆరోపించారు.

28/08/2023 15:16(IST)

తెలంగాణలో ఘనంగా గణేశ్‌ ఉత్సవాలు నిర్వహిస్తాం: తలసాని శ్రీనివాస్‌ యాదవ్‌

హైదరాబాద్‌: తెలంగాణలో గణేశ్‌ ఉత్సవాలను రాష్ట్ర ప్రభుత్వం ఘనంగా నిర్వహిస్తుందని మంత్రి తలసాని శ్రీనివాస్ యాదవ్‌ వెల్లడించారు. హైదరాబాద్‌ నగరంతోపాటు చుట్టుపక్కల 32,500 గణేశ్‌ మండపాలు ఉండనున్నాయని మంత్రి తెలిపారు. హైదరాబాద్‌ ఎంసీహెచ్‌ఆర్డీలో గణేష్‌ ఉత్సవాలపై ఆయన సమీక్షా సమావేశం నిర్వహించారు. ఈ సమావేశానికి హోంమంత్రి మహమూద్‌ అలీ, ఎమ్మెల్యే దానం నాగేందర్, జీహెచ్‌ఎంసీ మేయర్ గద్వాల విజయలక్ష్మి, డిప్యూటీ మేయర్, పోలీసు ఉన్నతాధికారులతోపాటు ఇతర శాఖల అధికారులు హాజరయ్యారు. వచ్చే నెల 19వ తేదీ నుంచి గణేష్‌ నిమజ్జనం జరిగేంత వరకు ఉత్సవాలకు బందోబస్తు ఉంటుందని మంత్రి తలసాని స్పష్టం చేశారు.

28/08/2023 15:10(IST)

రూ.90 వేలు లంచం తీసుకుంటూ పట్టుబడ్డ ఎక్సైజ్‌ కోర్టు ఏపీపీ విజయలక్ష్మి

మచిలీపట్నంలోని న్యాయస్థానాల ప్రాంగణంలో అనిశా తనిఖీలు చేసింది. తనిఖీల్లో రూ.90 వేలు లంచం తీసుకుంటూ ఎక్సైజ్‌ కోర్టు ఏపీపీ విజయలక్ష్మి, కానిస్టేబుల్‌ బాలకృష్ణ పట్టుబడ్డారు. అనిశా అదనపు ఎస్పీ స్నేహిత నేతృత్వంలో ఈ తనిఖీలు చేశారు. 498ఏ కేసులో బాధితుడు మురళీకృష్ణ నుంచి విజయలక్ష్మి రూ.90 వేలు డిమాండ్‌ చేశారు. రూ.90 వేలను కానిస్టేబుల్‌ బాలకృష్ణకు ఇవ్వాలని ఆమె కోరారు. ఏపీపీ ఆదేశాల మేరకు బాధితుడు కానిస్టేబుల్‌ బాలకృష్ణకు రూ.90 వేలు ఇచ్చారు. బాధితుడి ముందస్తు సమాచారం మేరకు అనిశా అధికారులు పట్టుకున్నారు.

28/08/2023 14:56(IST)

రాష్ట్ర సంపదను కేసీఆర్‌ మహారాష్ట్రలో ఖర్చు చేస్తున్నారు: షబ్బీర్‌ అలీ

కామారెడ్డి: రాష్ట్ర సంపదను కేసీఆర్‌ మహారాష్ట్రలో ఖర్చు చేస్తున్నారని కాంగ్రెస్‌ నేత షబ్బీర్‌ అలీ ఆరోపించారు. భారాస మహిళలకు 33 శాతం టికెట్లు ఎందుకివ్వలేదని ప్రశ్నించారు. ఎస్సీల గురించి మాట్లాడే నైతిక హక్కు భారాసకు లేదని ఎద్దేవా చేశారు. ఎస్సీలకు ఇచ్చిన హామీలను కేసీఆర్‌ నెరవేర్చలేదని అన్నారు.

28/08/2023 14:50(IST)

‘ఎన్టీఆర్ స్మారక నాణెం’ విడుదల చేసిన రాష్ట్రపతికి కృతజ్ఞతలు: చంద్రబాబు

‘ఎన్టీఆర్ స్మారక నాణెం’ విడుదల చేసిన భారత రాష్ట్రపతికి తెలుగుదేశం అధినేత చంద్రబాబు నాయుడు హృదయపూర్వక కృతజ్ఞతలు తెలిపారు. తెలుగువారందరికీ ఈ కార్యక్రమం ఎంతో గర్వకారణమన్నారు. భిన్నాభిప్రాయాలు, హద్దులు, రాజకీయ అనుబంధాలకు అతీతంగా ఎన్టీఆర్‌ తెలుగువారందరినీ ఏకం చేశారని కొనియాడారు.

28/08/2023 14:40(IST)

తితిదే ధర్మకర్తల మండలి సభ్యుడిగా దేశ్ పాండే ప్రమాణ స్వీకారం

తిరుమల: తితిదే ధర్మకర్తల మండలి సభ్యుడిగా కర్ణాటక రాష్ట్రానికి చెందిన శ్రీ రఘునాథ్ విశ్వనాథ్ దేశ్ పాండే సోమవారం శ్రీవారి ఆలయంలో ప్రమాణ స్వీకారం చేశారు. శ్రీవారి ఆలయంలోని స్వామివారి సన్నిధిలో తితిదే జేఈవో వీరబ్రహ్మం ఆయనతో ప్రమాణ స్వీకారం చేయించారు.

28/08/2023 14:31(IST)

‘ఎన్టీఆర్ స్మారక నాణెం’ ఆవిష్కరించ‌డం తెలుగుజాతికి ద‌క్కిన గొప్ప గౌర‌వం: లోకేశ్‌

అమరావతి: ఎన్టీఆర్ శత జయంతిని పురస్కరించుకొని కేంద్ర ప్రభుత్వం ‘ఎన్టీఆర్ స్మారక నాణెం’ ఆవిష్కరించ‌డం తెలుగుజాతికి ద‌క్కిన గొప్ప గౌర‌వమని తెదేపా జాతీయ ప్రధాన కార్యదర్శి నారా లోకేశ్‌ అన్నారు. తెలుగువాడిగా, తెలుగుదేశం పార్టీ వాడిగా, నంద‌మూరి తార‌క‌రామారావు మ‌న‌వ‌డిగా గ‌ర్విస్తున్నానని తెలిపారు. ఎన్టీఆర్ క‌థానాయ‌కుడు, ప్రజాసేవ‌కుడు, తెలుగుజాతిని ఒక్కతాటిపై న‌డిపించిన మ‌హానాయ‌కుడని కొనియాడారు. కోట్లాది హృద‌యాల్లో దేవుడై కొలువైన ఎన్టీఆర్ తమ స్ఫూర్తి అని పేర్కొన్నారు.

28/08/2023 14:25(IST)

భారతదేశం అగ్రగామి దేశంగా ఎదుగుతోంది: ముకేశ్‌ అంబానీ

భారతదేశం అగ్రగామి దేశంగా ఎదుగుతోందని ముకేశ్‌ అంబానీ అన్నారు. రిలయన్స్‌ సంస్థ వార్షిక సమావేశంలో ఆయన మాట్లాడారు. నవ భారతం ఆత్మవిశ్వాసంతో నిండి ఉందన్నారు. భారత్‌ చరిత్రాత్మక జీ20 సదస్సుకు వేదికైందని అన్నారు. 4జీ వినియోగదారులంతా 5జీకి వెళ్లేలా ప్రణాళికలు చేస్తున్నట్లు తెలిపారు.

28/08/2023 14:22(IST)

రహదారులకు మరమ్మతులు చేయాలని 5 గ్రామాల ప్రజల ధర్నా

విజయనగరం: శృంగవరపుకోట మండలం కృష్ణాపురంలో గ్రామస్థులు ఆందోళన చేపట్టారు. జీవీఎంసీ నీటి శుద్ధి కేంద్రం ఎదుట 5 గ్రామాల ప్రజలు ధర్నా చేశారు. తాడిపూడి-కొత్తూరు వరకు ఉన్న గోతుల రహదారిని బాగుచేయాలని డిమాండ్‌ చేశారు.

28/08/2023 14:09(IST)

పుంగనూరు, అంగళ్లు ఘటనలు.. తెదేపా నేతలకు హైకోర్టులో ఊరట

చిత్తూరు జిల్లా పుంగనూరు, అంగళ్లు ఘటనల్లో తెదేపా నేతలకు ఏపీ హైకోర్టులో ఊరట లభించింది. మాజీమంత్రి దేవినేని ఉమ, కిషోర్ కుమార్, పులివర్తి నాని, చల్లా బాబుకు ముందస్తు బెయిల్ మంజూరు చేస్తూ హైకోర్టు ఉత్తర్వులు జారీ చేసింది. ఇటీవల తేదేపా అధినేత నారా చంద్రబాబు నాయుడు పర్యటన నేపథ్యంలో పుంగనూరు, అంగళ్లు ప్రాంతాల్లో ఘర్షణలు జరిగాయి. ఈ ఘటనల్లో తేదేపా నేతలపై హత్యాయత్నం కేసు నమోదు చేశారు. ఈ కేసుల్లో ముందస్తు బెయిల్ మంజూరు చేయాలని తేదేపా నేతలు దేవినేని ఉమ, పులివర్తి నాని, చల్లా బాబు, కిషోర్‌కుమార్‌ పిటిషన్ దాఖలు చేశారు. దురుద్దేశ పూర్వకంగా తమపై కేసులు నమోదు చేశారని వాదనలు వినిపించారు. మరోవైపు చల్లా బాబుపై మొత్తం ఏడు కేసులు నమోదు కాగా.. నాలుగు కేసుల్లో ముందస్తు బెయిల్ మంజూరు చేసి.. మిగతా 3 పిటిషన్లను హైకోర్టు కొట్టేసింది.

28/08/2023 13:58(IST)

మెడికల్ సీట్లు అమ్ముకోవద్దని డిమాండ్ చేస్తూ సంతకాల సేకరణ

విశాఖ: ఆంధ్రప్రదేశ్‌లో మెడికల్ సీట్లు అమ్ముకోవద్దని డిమాండ్ చేస్తూ ప్రజారోగ్య వేదిక విశాఖలో సంతకాల సేకరణ చేపట్టింది. రాష్ట్రంలో నూతన మెడికల్ కళాశాలలు రావడం హర్షించదగ్గ విషయమే అయినా.. మెడికల్ సీట్లను అమ్ముకోవడం అన్యాయమని ప్రజారోగ్య వేదిక రాష్ట్ర కార్యదర్శి కామేశ్వరరావు ఆవేదన వ్యక్తం చేశారు. మెడికల్ సీట్ల కేటాయింపు అంశంపై రాష్ట్ర ప్రభుత్వం విడుదల చేసిన జీవో నెంబర్ 107, 108లను వెంటనే రద్దు చేయాలని కోరుతూ జీవీఎంసీ గాంధీ పార్కులో సంతకాల సేకరణ నిర్వహించారు. ఈ కార్యక్రమానికి ప్రజలు పెద్ద సంఖ్యలో స్వచ్ఛందంగా హాజరై మెడికల్ సీట్లు అమ్ముకోవడాన్ని వ్యతిరేకిస్తూ సంతకాలు చేశారు. ప్రభుత్వం తీసుకున్న నిర్ణయం వల్ల పేద విద్యార్థులు వైద్య విద్యకు దూరమయ్యే ప్రమాదం ఉందని వాపోయారు.

28/08/2023 13:46(IST)

జగన్ అధికారంలోకి వచ్చాక విద్యను వ్యాపారంగా మార్చారు: గిడుగు రుద్రరాజు

జగన్ అధికారంలోకి వచ్చిన తర్వాత విద్యను వ్యాపారంగా మార్చారని ఏపీసీసీ అధ్యక్షుడు గిడుగు రుద్రరాజు ఆరోపించారు. 107, 108 జీవోల ప్రకారం మెడికల్ కళాశాలల్లో ఫీజులను మార్చేశారని విమర్శించారు. లక్షల కోట్ల రాష్ట్ర బడ్జెట్ ఉండగా.. ఈ విధంగా ఫీజులు వసూలు చేయడం అన్యాయమన్నారు. బీసీ, ఎస్సీ, ఎస్టీలు, మైనారిటీలకు జగన్ ప్రభుత్వం అన్యాయం చేస్తోందని ఆగ్రహం వ్యక్తం చేశారు. ఇప్పటికే రాష్ట్రంలో వైద్యుల కొరత ఉందని, ఈ పరిస్థితుల్లో మెడికల్ సీట్లతో వ్యాపారం చేయడం దుర్మార్గమని మండిపడ్డారు. 107, 108 జీవో రద్దు చేయాలని సీఎంకు బహిరంగ లేఖ రాసినట్లు చెప్పారు.

28/08/2023 13:36(IST)

ఏపీలోని పాఠశాలల్లో మొబైల్‌ ఫోన్ల వాడకంపై నిషేధం

అమరావతి: ఏపీ రాష్ట్రవ్యాప్తంగా పాఠశాలల్లో మొబైల్‌ ఫోన్ల వాడకంపై ఏపీ పాఠశాల విద్యాశాఖ నిషేధం విధించింది. పాఠశాలలకు విద్యార్థులు మొబైల్‌ ఫోన్లు తేవడంపై పూర్తి నిషేధం విధించింది. టీచర్లు తరగతి గదుల్లోకి మొబైల్‌ ఫోన్లు తీసుకురావడంపైనా నిషేధం విధించింది. టీచర్లు ఫోన్లను పాఠశాల ప్రధానోపాధ్యాయుడికి అప్పగించాలని సూచించింది.

28/08/2023 13:36(IST)

యువతకు పారదర్శకంగా ఉద్యోగ అవకాశాలు: భగవంత్‌ కుభా

విశాఖ: పోర్టు సాగరమాల ఆడిటోరియంలో రోజ్‌గార్‌ మేళా నిర్వహించారు. మేళాకు కేంద్ర మంత్రి భగవంత్‌ కుభా ముఖ్య అతిథిగా హాజరయ్యారు. ఉద్యోగులుగా ఎంపికైన 200 మందికి ఆయన నియామక పత్రాలు అందజేశారు. ఈ సందర్భంగా భగవంత్‌ కుభా మాట్లాడుతూ.. యువతకు పారదర్శకంగా ఉద్యోగ అవకాశాలు కల్పిస్తున్నట్లు తెలిపారు. యువత బంగారు భవిష్యత్తుకు బీజాలు వేశామన్నారు.

28/08/2023 13:31(IST)

రెండు కార్లను ఢీకొన్న ఆర్టీసీ బస్సు

కాకినాడ: జాతీయ రహదారిపై జరిగిన రోడ్డు ప్రమాదంలో ఆర్టీసీ బస్సు రెండు కార్లును ఢీకొంది. హైవే పోలీసులు తెలిపిన వివరాల ప్రకారం.. విజయవాడ డిపోనకు చెందిన ఆర్టీసీ బస్సు విశాఖపట్నం వైపు నుంచి విజయవాడ వైపునకు బయలుదేరింది. కాకినాడ జిల్లా గండేపల్లి మండలం మల్లేపల్లి శివారుకు వచ్చేసరికి బస్సుకు బ్రేక్ ఫెయిల్ అయ్యింది. దీంతో ముందు వెళ్తున్న రెండు కార్లను ఆర్టీసీ బస్సు ఢీకొంది. ఈ ప్రమాదంలో రెండు కార్లు, బస్సు స్వల్పంగా ధ్వంసం అయ్యాయి. ఎవరికీ ఎటువంటి గాయాలు కాలేదు.

28/08/2023 13:23(IST)

ఎన్టీఆర్‌ స్మారక నాణేలు మార్కెట్‌లో చలామణి కోసం కాదు: మింట్‌ చీఫ్‌ మేనేజర్‌

హైదరాబాద్‌: ఎన్టీఆర్‌ స్మారక నాణెం హైదరాబాద్‌లోనే తయారీ అయిందని హైదరాబాద్‌ మింట్‌ చీఫ్‌ మేనేజర్‌ వి.ఎన్‌.ఆర్‌.నాయుడు తెలిపారు. ఇది మార్కెట్‌లో చలామణి కోసం కాదని చెప్పారు. తొలి విడతలో 12 వేల స్మారక నాణేలు ముద్రించినట్లు చెప్పారు. నాణేల ధర రూ.3,500 నుంచి రూ.4,850 వరకు ఉంటుందని వివరించారు.

28/08/2023 13:20(IST)

జగన్‌ సమక్షంలో బయటపడిన నగరి వైకాపా నేతల విబేధాలు

చిత్తూరు: సీఎం జగన్‌ సమక్షంలో నగరి వైకాపా నేతల విబేధాలు బయటపడ్డాయి. మంత్రి రోజా, కేజే శాంతి చేతులు కలిపేందుకు సీఎం జగన్‌ యత్నించారు. సీఎం చొరవ చూపినా చేతులు కలిపేందుకు రోజా, శాంతి అఇష్టత చూపారు. దీంతో సీఎం జగన్‌ బలవంతంగా ఇద్దరు మహిళా నేతల చేతులు కలిపారు.

28/08/2023 13:12(IST)

జగన్‌ నుంచి కిందిస్థాయి నాయకుడి వరకు ఇసుక సొమ్ములో వాటాలు: నక్కా ఆనంద్‌ బాబు

బాపట్ల: ఇసుక తవ్వకాల పేరిట రాష్ట్రంలో రూ.40 వేల కోట్ల దోపిడీ జరిగిందని తెదేపా నేత నక్కా ఆనంద్‌ బాబు ఆరోపించారు. జగన్‌ నుంచి కిందిస్థాయి నాయకుడి వరకు ఇసుక సొమ్ములో వాటాలున్నాయని విమర్శించారు. ఇప్పటికీ ఇసుక డంపింగ్‌ యార్డుల్లో 3 కోట్ల టన్నల ఇసుక నిల్వ ఉందని చెప్పారు. ఇప్పటి వరకు 13 కోట్ల టన్నుల ఇసుక తవ్వారని విమర్శించారు.

28/08/2023 13:07(IST)

ప్రత్తిపాటి పుల్లారావు, కొమ్మాలపాటి అరెస్ట్‌

పల్నాడు జిల్లా: ఇసుక రీచ్‌ల వద్ద ఆందోళనకు వెళ్తున్న తెదేపా నేతలను అరెస్ట్‌ చేశారు. అమరావతి ఇసుక రీచ్‌ల వద్ద తెదేపా ఆందోళనలపై పోలీసులు ఆంక్షలు విధించారు. ఇసుక రీచ్‌ల వద్ద నిరసనకు వెళ్తున్న మాజీ మంత్రి ప్రత్తిపాటి పుల్లారావును అరెస్ట్‌ చేశారు. అమరావతిలో మాజీ ఎమ్మెల్యే కొమ్మాలపాటిని అరెస్ట్‌ చేశారు. అమరావతి పోలీసు స్టేషన్‌కు వారిని తరలించారు.

28/08/2023 13:01(IST)

రాష్ట్ర ఎన్నికల అధికారికి అచ్చెన్నాయుడి లేఖ

రాష్ట్ర ఎన్నికల అధికారి ముఖేష్‌ కుమార్‌ మీనాకు తెదేపా ఏపీ రాష్ట్ర అధ్యక్షుడు అచ్చెన్నాయుడు లేఖ రాశారు. తప్పులతడకగా ఉన్న ఓటర్ల జాబితాపై చర్యలు తీసుకోవాలని లేఖలో కోరారు. తాడికొండ నియోజకవర్గంలో ఓటర్ల జాబితాను నిబంధనలకు విరుద్ధంగా చేస్తున్నారని తెలిపారు. ఒకే వార్డులో ఉన్న వాళ్లను 8 వేర్వేరు బూత్‌లకు కేటాయించారని చెప్పారు.

28/08/2023 12:57(IST)

గనిఆత్కూర్‌లో ఉద్రిక్తత.. తెదేపా నేతలను అడ్డుకున్న పోలీసులు

ఎన్టీఆర్‌ జిల్లా: కంచికర్ల మండలం గనిఆత్కూర్‌లో ఉద్రిక్తత చోటు చేసుకుంది. కృష్ణా నది వద్ద ఇసుక రీచ్‌కు వెళ్లకుండా ఎమ్మెల్యే గద్దె రామ్మోహన్‌, తంగిరాల సౌమ్య, ఇతర నేతలను పోలీసులు అడ్డుకున్నారు.

28/08/2023 12:51(IST)

జేపీ సంస్థ గడువు పూర్తయినా ఇసుక రవాణా చేస్తారా?: బుద్ధ ప్రసాద్‌

కృష్ణా జిల్లా శ్రీకాకుళంలో తెదేపా చేపట్టిన ఇసుక సత్యాగ్రహంలో ఉద్రిక్తత నెలకొంది. తెదేపా నాయకుల ప్రసంగాలను ఘంటసాల ఎస్సై శ్రీనివాస్‌ అడ్డుకున్నారు. ఈ సందర్భంగా మండలి బుద్ధ ప్రసాద్‌ మాట్లాడుతూ.. మేలో జేపీ సంస్థ గడువు పూర్తయినా ఇసుక రవాణా చేస్తారా అని ప్రశ్నించారు. ఇసుక తరలింపునకు అనుమతులు చూపాలని డిమాండ్‌ చేశారు. సాయంత్రంలోగా ఎస్సై బాధ్యత తీసుకొని అన్ని అనుమతులు చూపాలని నిలదీశారు.

28/08/2023 12:43(IST)

పొత్తులపై సంప్రదింపులకు కాంగ్రెస్‌ నుంచి సీపీఎంకు పిలుపు

హైదరాబాద్‌: పొత్తులపై సంప్రదింపులకు కాంగ్రెస్‌ నుంచి సీపీఎంకు పిలుపు వచ్చింది. సోమవారం భేటీకి రావాలని ఆహ్వానించినా సీపీఎం ఇంకా స్పష్టత ఇవ్వలేదు. లెఫ్ట్‌కు ఇచ్చే సీట్లపై కాంగ్రెస్‌ స్పష్టత ఇవ్వాలని సీపీఎం కోరుతోంది. కాంగ్రెస్‌ స్పష్టత ఇస్తేనే వెళ్లాలని సీపీఎం నేతలు నిర్ణయించారు. ఈరోజు కాంగ్రెస్‌ నేతలతో భేటీ ఉండదని సీపీఎం వర్గాలు స్పష్టం చేశాయి.

28/08/2023 12:34(IST)

జగన్‌ను ఇసుకాసురుడు అనడంలో తప్పేముంది: లోకేశ్‌

గతంలో ట్రాక్టర్‌ ఇసుక రూ.1500కు దొరికినప్పుడు తెదేపాను విమర్శించారని తెదేపా జాతీయ ప్రధాన కార్యదర్శి నారా లోకేశ్‌ తెలిపారు. జగన్‌ పాలనలో ట్రాక్టర్‌ ఇసుక ధర రూ.5 వేలకు పెరిగిందని విమర్శించారు. జగన్‌ను ఇసుకాసురుడు అనడంలో తప్పేముందని ప్రశ్నించారు. జేపీ వెంచర్స్‌తో ఒప్పందం ముగిసినా అదే పేరుతో ఇసుక అమ్మకాలా? అని నిలదీశారు.

28/08/2023 12:30(IST)

కాంగ్రెస్‌ వాళ్లను కాల్చి పడేస్తా: మర్రి జనార్ధన్‌రెడ్డి

కాంగ్రెస్‌పై ఎమ్మెల్యే మర్రి జనార్ధన్‌రెడ్డి వివాదాస్పద వ్యాఖ్యలు చేశారు. కాంగ్రెస్‌ వాళ్లను కాల్చి పడేస్తానని తెలిపారు. తన జోలికి వస్తే ఒక్కొక్కరిని కాల్చి పడేస్తానని హెచ్చరించారు. కాంగ్రెస్‌ నేతలను గ్రామాల్లో తిరగకుండా చేస్తానన్నారు.

28/08/2023 12:20(IST)

భాజపా, కాంగ్రెస్‌కు రాష్ట్రంలో ఎమ్మెల్యే అభ్యర్థులే లేరు: కవిత

కామారెడ్డి: కాంగ్రెస్‌ విడుదల చేసిన ఎస్సీ డిక్లరేషన్‌ ఒక బూటకమని ఎమ్మెల్సీ కవిత అన్నారు. కామారెడ్డిలో భారాస కార్యకర్తలతో నిర్వహించిన సమావేశంలో ఆమె మాట్లాడారు. ఎస్సీల మీద కాంగ్రెస్‌ ఎక్కడా లేని ప్రేమ ఒలకబోస్తోందని ఎద్దేవా చేశారు. కాంగ్రెస్‌ ఎన్నో ఏళ్లుగా ఎస్సీలను పేదరికంలోనే ఉంచిందని ఆరోపించారు. సీఎం కేసీఆర్‌ అన్నివర్గాల ప్రజలను ఆదుకుంటున్నారని వివరించారు. భారాస చేస్తున్న పనులనే కాంగ్రెస్‌ కాపీ కొడుతోందని విమర్శించారు. భాజపా, కాంగ్రెస్‌కు రాష్ట్రంలో ఎమ్మెల్యే అభ్యర్థులే లేరని ఎద్దేవా చేశారు.

28/08/2023 12:13(IST)

విద్యార్థుల చదువులకు పేదరికం అడ్డు కాకూడదు: సీఎం జగన్‌

నగరి: విద్యార్థుల చదువులకు పేదరికం అడ్డు కాకూడదని సీఎం జగన్‌ తెలిపారు. నగరిలో నిర్వహించిన విద్యాదీవెన పథకం నిధుల విడుదల కార్యక్రమంలో ఆయన మాట్లాడారు. విద్యార్థుల తల్లిదండ్రులు అప్పుల పాలయ్యే పరిస్థితి రాకూడదని చెప్పారు. స్కూళ్లు తెరిచేనాటికి విద్యా కానుక కింద అన్ని వస్తువులు ఇస్తున్నట్లు వివరించారు.

28/08/2023 12:06(IST)

రూ.90 లక్షల విలువైన విదేశీ సిగరెట్లు స్వాధీనం

విజయవాడ: రామవరప్పాడు వద్ద విజిలెన్స్‌ అధికారులు విదేశీ సిగరెట్లు స్వాధీనం చేసుకున్నారు. బిహార్‌ నుంచి కంటైనర్‌లో విజయవాడకు అక్రమంగా విదేశీ సిగరెట్లు తరలిస్తున్నట్లు గుర్తించారు. విజిలెన్స్‌ అధికారులు రూ.90 లక్షల విలువైన 75 సిగరెట్‌ బాక్సులను స్వాధీనం చేసుకున్నారు. విజిలెన్స్‌ తనిఖీలతో ప్రధాన నిందితుడు కారు వదిలి పరారయ్యాడు. ఇద్దరిని అరెస్ట్‌ చేశారు.

28/08/2023 11:55(IST)

ఆదాల ప్రభాకర్ రెడ్డి సమక్షంలో వైకాపాలో చేరికలు

నెల్లూరు కలెక్టరేట్‌: నెల్లూరు ఎంపీ ఆదాల ప్రభాకర్ రెడ్డి సమక్షంలో సోమవారం 40 మంది వైకాపాలో చేరారు. ఇందిరమ్మ కాలనీకి చెందిన 40 మంది ఉడత మురళీ యాదవ్, రాఘవేంద్ర నాయకత్వంలో పార్టీలో చేరారు. గడికుమారి, రూతమ్మ, శాంతి కుమారి, లక్ష్మమ్మ, నారాయణమ్మ తదితరులు పార్టీలో చేరిన వారిలో ఉన్నారు. ఈ సందర్భంగా వారు స్థానిక సమస్యలను ఎంపీ ఆదాల దృష్టికి తీసుకెళ్లగా ఆయన సానుకూలంగా స్పందించారు. వెంటనే వాటిని పరిష్కరిస్తామని హామీ ఇచ్చారు.

28/08/2023 11:52(IST)

ఎమ్మెల్యే కోటంరెడ్డి శ్రీధర్ రెడ్డి గృహ నిర్బంధం

నెల్లూరు: సంగం వద్ద తెదేపా నాయకులను పోలీసులు అదుపులోకి తీసుకున్నారు. దుకాణం వద్ద నిల్చొని ఉన్న తెదేపా నేతలను పోలీసు స్టేషన్‌కు తరలించారు. నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డిని కార్యాలయం వద్ద హౌస్ అరెస్ట్ చేశారు. మినగల్లు ఇసుక రీచ్‌కు బయలుదేరుతున్న ఎమ్మెల్యే శ్రీధర్ రెడ్డిని పొలీసులు అడ్డుకున్నారు.

28/08/2023 11:47(IST)

పర్లాం ఇసుక రేవు వద్ద తెదేపా నేతలను అడ్డుకున్న పోలీసులు

శ్రీకాకుళం: జలమూరు మండలం పర్లాం ఇసుక రేవు వద్ద పోలీసులు మోహరించారు. ఇసుక రేవు వద్దకు వెళ్లకుండా తెదేపా నేతలను అడ్డుకున్నారు. దీంతో పోలీసులు, తెదేపా నేతల మధ్య వాగ్వాదం చోటు చేసుకుంది.

28/08/2023 11:41(IST)

మైలవరం ఇసుక నిల్వ కేంద్రం వద్ద తెదేపా ధర్నా

ఎన్టీఆర్ జిల్లా మైలవరం ఇసుక నిల్వ కేంద్రం వద్ద తెదేపా ధర్నా నిర్వహించింది. మాజీ మంత్రి దేవినేని ఉమ, తెదేపా తిరువూరు ఇన్‌ఛార్జి దేవదత్తు పాల్గొన్నారు. వైకాపా ఇసుక మాఫియాను అరికట్టాలని డిమాండ్ చేశారు.

28/08/2023 11:23(IST)

రాముడు, కృష్ణుడి రూపాలను ప్రజలు ఎన్టీఆర్‌లో చూసుకున్నారు: రాష్ట్రపతి

దిల్లీ: భారత చలనచిత్ర రంగం ఉన్నతిలో ఎన్టీఆర్‌ పాత్ర కీలకమని రాష్ట్రపతి ద్రౌపదీ ముర్ము అన్నారు. ఎన్టీఆర్‌ స్మారక నాణెం విడుదల కార్యక్రమంలో ఆమె ప్రసంగించారు. రాముడు, కృష్ణుడి రూపాలను ప్రజలు ఆయనలో చూసుకున్నారని తెలిపారు. భారతీయ సినిమా చరిత్రలో ఎన్టీఆర్‌ ఎంతో ప్రత్యేకమని చెప్పారు. రాజకీయాల్లోనూ ఎన్టీఆర్‌ ప్రత్యేకత చాటుకున్నారని తెలిపారు.

28/08/2023 11:20(IST)

ఎన్టీఆర్‌ ఒక తరం హీరో కాదు.. అన్ని తరాలకు ఆదర్శ హీరో: పురందేశ్వరి

దిల్లీ: ఎన్టీఆర్‌ స్మారక నాణెం విడుదల కార్యక్రమంలో భాజపా ఏపీ రాష్ట్ర అధ్యక్షురాలు పురందేశ్వరి పాల్గొన్నారు. దీన్ని ఎన్టీఆర్‌కు దక్కిన గొప్ప గౌరవంగా భావిస్తున్నట్లు చెప్పారు. మహిళలకు ఆస్తిలో హక్కు ఉండాలని ఎన్టీఆర్‌ చెప్పారని గుర్తుచేశారు. ఆయన తిరుపతిలో మహిళా వర్సిటీ ఏర్పాటు చేశారని తెలిపారు. ఎన్టీఆర్‌ ఒక తరం హీరో కాదు, అన్ని తరాలకు ఆదర్శ హీరో అని చెప్పారు. సినీ, రాజకీయ రంగాల్లో ఎన్టీఆర్‌ తనదైన ముద్ర వేశారని కొనియాడారు.

28/08/2023 11:04(IST)

ఎన్టీఆర్ స్మారక 100 రూపాయల నాణెం విడుదల

దిల్లీ: ఎన్టీఆర్‌ శత జయంతి సందర్భంగా రూ.100 స్మారక నాణేన్ని రాష్ట్రపతి ద్రౌపదీ ముర్ము విడుదల చేశారు. కార్యక్రమానికి జేపీ నడ్డా, చంద్రబాబు నాయుడు, పురందేశ్వరి తదితరులు హాజరయ్యారు. హైదరాబాద్‌ మింట్‌ కాంపౌండ్‌లో ఈ ఎన్టీఆర్‌ స్మారక నాణేన్ని తయారు చేశారు.

28/08/2023 10:56(IST)

సింగరేణి ఓసీపీ-3 ప్రాజెక్టులో బుల్డోజర్‌ ఢీకొని కార్మికుడు మృతి

పెద్దపల్లి: రామగుండం సింగరేణి ఓసీపీ-3 ప్రాజెక్టులో ప్రమాదం చోటు చేసుకుంది. బుల్డోజర్‌ ఢీకొని ప్రైవేటు ఓబీ ప్రాజెక్టు కార్మికుడు మృతి చెందాడు. మృతుడిని మధ్యప్రదేశ్‌ సింగ్రోలికి చెందిన గంగా ప్రసాద్‌(24)గా గుర్తించారు.

28/08/2023 10:51(IST)

ఎన్ని డిక్లరేషన్‌లు పెట్టినా.. కేసీఆర్ మూడోసారి అధికారం చేపట్టడం ఖాయం: దానం నాగేందర్‌

హైదరాబాద్‌: తెలంగాణలో కాంగ్రెస్, భాజపా మనుగడ పోయిందని.. వచ్చేది భారాస ప్రభుత్వమే అని ఖైరతాబాద్ ఎమ్మెల్యే దానం నాగేందర్ అన్నారు. కాంగ్రెస్, భాజపా ప్రభుత్వం అధికారంలో ఉన్న రాష్ట్రాల్లో దళిత బంధు, బీసీ బంధు, డబుల్ బెడ్‌రూమ్‌లు ఇచ్చే దమ్ముందా అని సవాల్ విసిరారు. దిల్లీ నుంచి పెద్ద నాయకులు వచ్చి ప్రగల్భాలు పలుకుతున్నారని, వారు గెలిచిన రాష్ట్రాల్లో పరిస్థితులు ఎలా ఉన్నాయో తెలుసుకోవాలని హితవు పలికారు. ఎన్ని డిక్లరేషన్‌లు పెట్టినా రానున్న ఎన్నికల్లో ముఖ్యమంత్రి కేసీఆర్ మూడోసారి అధికారం చేపట్టడం ఖాయమన్నారు. ఖైరతాబాద్ నియోజకవర్గంలోని పీజేఆర్ నగర్‌లో యువత పెద్దఎత్తున దానం నాగేందర్ ఆధ్వర్యంలో భారాస పార్టీలో చేరారు.

28/08/2023 10:41(IST)

పెంచిన విద్యుత్‌ ఛార్జీలను తగ్గించాలని ఆందోళన

విజయవాడ: పెంచిన విద్యుత్‌ ఛార్జీలను తగ్గించాలని విజయవాడలోని అజిత్‌సింగ్‌ నగర్‌ విద్యుత్‌ ఉపకేంద్రం వద్ద సీపీఎం ఆధ్వర్యంలో ఆందోళన చేపట్టారు. కార్యక్రమంలో సీపీఎం నాయకుడు సీహెచ్‌ బాబూరావు పాల్గొన్నారు.

28/08/2023 10:34(IST)

జీహెచ్‌ఎంసీ కార్మికురాలు సునీత కుటుంబాన్ని ఆదుకుంటాం: మేయర్ విజయలక్ష్మి

హైదరాబాద్‌: జీహెచ్‌ఎంసీ కార్మికురాలు సునీత మృతికి హైదరాబాద్‌ మేయర్‌ గద్వాల విజయలక్ష్మి సంతాపం వ్యక్తం చేశారు. సునీత కుటుంబాన్ని ఆదుకుంటామని చెప్పారు.

28/08/2023 10:16(IST)

సీఎం సభా ప్రాంగణం వద్ద అల్పాహారం కోసం పోలీసుల తిప్పలు

చిత్తూరు: నగరిలో సీఎం సభా ప్రాంగణం వద్ద అల్పాహారం కోసం పోలీసులు తిప్పలు పడ్డారు. ఉదయం నుంచి ఆహారం కోసం పోలీసులు ఎదురు చూశారు. అల్పాహారంతో ఆటో రావడంతో ఆహార పొట్లాల కోసం ఎగబడ్డారు. పోలీసుల తోపులాటను అడ్డుకున్న అధికారులు.. ఆటోను వెనక్కి పంపారు.

28/08/2023 10:07(IST)

వీఆర్‌ఎస్‌కు దరఖాస్తు చేసుకున్న దిశా కేసు విచారణ అధికారి సురేంద్ర

హైదరాబాద్‌: దిశా కేసులో విచారణ అధికారిగా పనిచేసిన సురేంద్ర స్వచ్ఛంద పదవీ విరమణకు దరఖాస్తు చేసుకున్నారు. వీఆర్ఎస్ కోసం సురేంద్ర డీజీపీకి దరఖాస్తు సమర్పించారు. దిశా నిందితుల ఎన్‌కౌంటర్ సమయంలో ఆయన షాద్‌నగర్ ఏసీపీగా ఉన్నారు. ఇటీవల తరచూ బదిలీలపై అసంతృప్తితో ఉన్నారు. సురేంద్ర కొన్నాళ్లు ట్రాన్స్‌కో విజిలెన్స్ అండ్ ఎన్‌ఫోర్స్‌మెంట్‌ డీఏస్పీగా పనిచేశారు. ఇటీవలే సైబరాబాద్ సైబర్ క్రైమ్ విభాగానికి బదిలీ అయ్యారు.

28/08/2023 09:59(IST)

సుందరరావుపేట క్యాంప్‌ సైట్‌ నుంచి ప్రారంభమైన యువగళం పాదయాత్ర

ఏలూరు: 197వ రోజు చింతలపూడి నియోజకర్గంలో తెదేపా జాతీయ ప్రధాన కార్యదర్శి నారా లోకేశ్‌ యువగళం పాదయాత్ర ప్రారంభమైంది. ఏలూరు జిల్లా సుందరరావుపేట క్యాంప్‌ సైట్‌ నుంచి యాత్ర ప్రారంభమైంది. లింగపాలెంలో లోకేశ్‌ స్థానికులతో సమావేశం కానున్నారు. వెలగపల్లిలో స్థానికులతో మాటామంతీ నిర్వహించనున్నారు. ఫాతిమాపురం జంక్షన్‌లో రైతులతో సమావేశం కానున్నారు. సాయంత్రం చింతలపూడి వద్ద స్థానికులతో లోకేశ్ సమావేశం నిర్వహించనున్నారు. రాత్రికి తీగలవంచ శివారు విడిది కేంద్రంలో లోకేశ్‌ బస చేయనున్నారు.

28/08/2023 09:50(IST)

కూలిన ఐదు విద్యుత్‌ స్తంభాలు.. నిలిచిన సరఫరా

హైదరాబాద్‌: కుత్బుల్లాపూర్ నియోజకవర్గంలోని జగద్గిరిగుట్ట డివిజన్ సీసాల బస్తీలో ఆదివారం ఇంటి నిర్మాణం కోసం కొబ్బరి చెట్టును జేసీబీతో తొలగించే ప్రయత్నం చేశారు. ఈ క్రమంలో చెట్టు కూలి విద్యుత్ తీగలపై పడటంతో వరుసగా ఐదు విద్యుత్ స్తంభాలు విరిగి పడిపోయాయి. ఆదివారం కావడంతో అధికారులు మరమ్మతులు చేయలేదు. దీంతో ఆదివారం రాత్రి నుంచి విద్యుత్‌ సరఫరా నిలిచిపోయింది. సోమవారం ఉదయానికి కూడా విద్యుత్ సరఫరా కాకపోవడంతో త్వరగా మరమ్మతులు చేపట్టాలని స్థానికులు కోరుతున్నారు.

28/08/2023 09:45(IST)

ఇసుక రీచ్‌ల వద్ద తెదేపా ఆందోళనలపై పోలీసుల ఆంక్షలు

గుంటూరు: ఇసుక రీచ్‌ల వద్ద తెదేపా ఆందోళనలపై పోలీసులు ఆంక్షలు విధించారు. కొన్ని చోట్ల తెదేపా నేతలను గృహ నిర్బంధం చేశారు. వైకుంఠపురం ఇసుక రీచ్ వద్దకు వెళ్లకుండా గుంటూరులో పెదకూరపాడు మాజీ ఎమ్మెల్యే కొమ్మాలపాటి శ్రీధర్‌ను గృహ నిర్బంధం చేశారు. తాడికొండ నియోజకవర్గంలో తెదేపా నేతలను హౌస్‌ అరెస్టు చేశారు. ఉద్ధండరాయినిపాలెంలో సోమవారం ఆందోళన చేయాలని తెదేపా నిర్ణయించింది. దీంతో రాజధాని ప్రాంతంలో తెదేపా నేతలను హౌస్‌ అరెస్టు చేశారు.

28/08/2023 09:40(IST)

బాలిక లక్షితపై ఏ చిరుత దాడి చేసిందో ఇంకా తేలలేదు: సీసీఎఫ్‌వో

తిరుమల: బోనులో చిక్కిన చిరుతను తిరుపతి జూపార్క్‌కు తరలించినట్లు సీసీఎఫ్‌వో నాగేశ్వరరావు తెలిపారు. చిరుత రక్త నమూనాలు సేకరించి డీఎన్‌ఏ పరీక్షలు నిర్వహిస్తామని చెప్పారు. జూ క్వారంటైన్‌లో ఇటీవల పట్టుబడిన 2 చిరుతలున్నాయని వివరించారు. బాలిక లక్షితపై దాడి చేసింది ఏ చిరుత అనేది ఇంకా తేలలేదని అన్నారు. ఏ చిరుత దాడి చేసిందో వైద్య పరీక్షల నివేదికలో తెలుస్తుందని చెప్పారు. తిరుమల నడకమార్గాల్లో ఆపరేషన్‌ చిరుత కొససాగుతోందని పేర్కొన్నారు.

28/08/2023 09:37(IST)

శ్రీవారిని దర్శించుకున్న సుప్రీంకోర్టు విశ్రాంత సీజేఐ జస్టిస్‌ ఎన్‌.వి.రమణ

తిరుమల: తిరుమల శ్రీవారిని పలువురు ప్రముఖులు దర్శించుకున్నారు. సుప్రీంకోర్టు విశ్రాంత ప్రధాన న్యాయమూర్తి జస్టిస్‌ ఎన్‌.వి.రమణ దంపతులు, సినీనటి జాన్వీకపూర్‌, తమిళనాడు మంత్రి అన్బుమణి రామదాస్ స్వామివారిని వేర్వేరుగా దర్శించుకున్నారు.

28/08/2023 09:28(IST)

కాలేజ్‌ బస్సు ఢీకొని జీహెచ్‌ఎంసీ కార్మికురాలు మృతి

హైదరాబాద్‌: అయాన్‌ వైద్యకళాశాలకు చెందిన బస్సు ఢీకొని జీహెచ్‌ఎంసీ కార్మికురాలు మృతిచెందింది. నగరంలోని రాంకోఠిలో కార్మికురాలు రోడ్డు ఊడుస్తుండగా ఈ ఘటన చోటుచేసుకుంది. మృతిచెందిన కార్మికురాలిని సునీత (35)గా గుర్తించారు.

28/08/2023 09:01(IST)

రైలు ప్రయాణం.. బాధలు వర్ణనాతీతం

రైల్వేశాఖ ప్యాసింజర్‌ రైళ్లను కొన్ని నెలలుగా రద్దు చేయడంతో సామాన్య ప్రయాణికుల పరిస్థితి దారుణంగా మారింది. కాజిపేట నుంచి విజయవాడ, కాగజ్‌నగర్‌ వెళ్లే వారి బాధలు వర్ణనాతీతం. దూర ప్రాంతాల నుంచి వచ్చే ఎక్స్‌ప్రెస్‌లలో జనరల్‌ బోగీలు రెండు, మూడు మాత్రమే ఉంటుండటంతో రిజర్వేషన్‌ బోగిల్లోకి ఎక్కేస్తున్నారు. ఆదిలాబాద్‌ నుంచి తిరుపతి వెళ్లే కృష్ణా ఎక్స్‌ప్రెస్‌ రిజర్వేషన్‌ 6వ బోగీలో ఆదివారం వరంగల్‌ వద్ద తీసిన చిత్రమిది. కాలుపెట్టడానికి కూడా జాగా లేనంతగా ప్రయాణికులు కిక్కిరిసిపోయారు. సామగ్రి పెట్టుకొనే స్థలంలోనూ ఇబ్బందిగా పడుకొని ప్రయాణించారు.

28/08/2023 09:01(IST)

కొండముచ్చుపై భక్తితో..

ప్రమాదవశాత్తు మూగజీవి కొండముచ్చు చనిపోవడంతో మనిషికి చేసినట్లుగా అంత్యక్రియలు చేసి అందుకు గుర్తుగా ఓ భక్తుడు ఇలా విగ్రహాన్ని తన పొలంలో ఏర్పాటు చేసుకున్నాడు. డోంగ్లీ మండలం ధోతి గ్రామ సమీపంలో రైతు మోహన్‌రావు పొలం వద్ద కనిపించిన చిత్రం ఇది.

28/08/2023 09:00(IST)

సంకల్ప వృక్షం

మనం చేసే పనిలో కష్టాలు ఉన్నా వెనుకంజ వేయకుండా ముందుకు సాగితే అది తప్పకుండా నెరవేరుతుందని పెద్దలు చెబుతుంటారు. దానికి నిదర్శనం ఈ చిత్రం. మద్నూర్‌ మండలం మేనూర్‌ శివారులో పెద్ద బండరాయిని చీల్చుకొని చెట్టు ఇలా పెరుగుతోంది. ఈ దృశ్యం చూపరులను ఎంతో ఆకట్టుకుంటుంది.

28/08/2023 08:18(IST)

టికెట్‌ లేని రైలు.. బిల్లు కడితే భోజనం

చిత్రంలో కనిపిస్తున్న రైలు బోగీని చూసి ఏదో స్టేషన్‌ అనుకుంటున్నారా..? ఇది రైల్వేస్టేషన్‌ కాదు.. అసలు ఇది రైలు కాదు.. పది రోజులు ఆగితే ఒక రెస్టారెంట్‌గా దర్శనం ఇవ్వనుంది. సౌత్‌ సెంట్రల్‌ రైల్వేలో నిరుపయోగంగా ఉన్న ఏసీ కోచ్‌లను ఇండియన్‌ రైల్వే కాటరింగ్‌ అండ్‌ టూరిజం కార్పొరేషన్‌ (ఐఆర్‌సీటీసీ) సేకరించి పలు రైల్వే స్టేషన్‌ల వెలుపల ప్రత్యేక ప్లాట్‌ఫామ్‌లపై ఉంచి టెండర్ల ద్వారా అద్దెకు ఇస్తోంది. అందులో భాగంగా నెక్లెస్‌ రోడ్డులోని ఎంఎంటీఎస్‌ స్టేషన్‌ వద్ద ‘రైలు రెస్టారెంట్‌’ ఏర్పాట్లు చురుగ్గా సాగుతున్నాయి.

28/08/2023 08:18(IST)

చుట్టూ ఇళ్లు..మెట్రో చూడ కనువిందు

చూడగానే ఇళ్ల మీదుగా దూసుకెళ్తున్నట్లు కనిపిస్తుంది కదూ. ఎల్బీ నగర్‌ పరిధిలో మెట్రో పరుగులివి. గతంతో పోల్చితే మెట్రో చుట్టూ నిర్మాణాలు పెరగడంతో భవనాలపై నుంచి వెళ్తున్నట్లు కనిపిస్తోంది.

28/08/2023 08:18(IST)

తీసుకెళ్తే.. మోసుకెళతా

భారీ బరువులు మోసే ట్రాలీ అది. వివిధ ప్రాంతాలకు వెళ్లాలంటే మాత్రం మరో వాహనం కావాల్సిందే. మధిర పట్టణంలో ఒకరు తన ద్విచక్రవాహనానికి కట్టి ఇలా తరలించారు. ప్రధాన వీధిలో ఆదివారం కన్పించిన ఈ దృశ్యాన్ని ‘న్యూస్‌టుడే’ క్లిక్‌మనిపించింది.

28/08/2023 08:17(IST)

బారులు కట్టి..సైకిల్‌ తొక్కి

వీరంతా సినిమా టికెట్ల కోసం బారులు తీరారనుకుంటే పొరపాటే... ఆదివారం సాయంత్రం కొత్తగూడలోని పాలపిట్ట సైక్లింగ్‌ పార్క్‌లో సైకిల్‌ తొక్కేందుకు వచ్చిన జనం. టికెట్లు తీసుకొని లోపలికి వెళ్లేందుకు ఇలా క్యూ కట్టారు. శని, ఆదివారాలు ఇక్కడ సైక్లింగ్‌ చేసేందుకు సందర్శకులు అధిక సంఖ్యలో వస్తున్నారు. ఇక్కడ సైకిళ్లు అద్దెకు ఇస్తున్నారు. గంటకు రూ.50 చెల్లించి పార్క్‌లో సైక్లింగ్‌ చేయవచ్చు. - న్యూస్‌టుడే, మాదాపూర్‌

28/08/2023 08:17(IST)

రైతుకు లాభం.. వినియోగదారులకు మిగులు

తనే రైతు.. డ్రైవర్‌.. వ్యాపారి. వెరసి తనకు ఆదాయం, కొనుగోలుదారుకు కొంత పొదుపు. అనంతపురం జిల్లాకు చెందిన రైతు నాగేశ్వర్‌రావు ఒక చిన్నలారీ కొనుగోలు చేసి స్వయంగా నడుపుతూ బత్తాయిలను తీసుకువచ్చి కొంపల్లి-బోయినపల్లి రహదారిపై పెట్టి ఇలా స్వయంగా విక్రయిస్తూ కనిపించారు.

28/08/2023 08:16(IST)

భారీ మట్టి వినాయక ప్రతిమకు శ్రీకారం

మరో ఇరవై రోజుల్లో వినాయక చవితి వస్తుండడంతో మండప ఉత్సవ కమిటీలు ఏర్పాట్లలో నిమగ్నమయ్యాయి. కొన్నాళ్లుగా పర్యావరణ హిత గణపయ్యలను ఏర్పాటు చేయాలని ప్రచారం చేస్తున్నారు. నగరంలో మట్టి వినాయకుల ప్రతిమలను తయారు చేసి విక్రయిస్తున్నారు. కరీంనగర్‌ రాంనగర్‌లోని ఒక మండపంలో వారం రోజుల నుంచే మట్టి వినాయకుని ప్రతిమను తయారు చేసేందుకు కళాకారులు కృషి చేస్తున్నారు. పూర్తిగా వరి గడ్డి, మట్టితోనే 28 అడుగుల ఎత్తుతో భారీ విగ్రహాన్ని తయారు చేస్తున్నారు.

28/08/2023 08:15(IST)

విద్యార్థి సమస్యలపై ఫ్లెక్సీల అస్త్రం!

విశాఖపట్నం (ఎం.వి.పి.కాలనీ), న్యూస్‌టుడే : సీఎం జగన్‌ ఫొటో పెట్టి దాని కింద ‘ఈ వ్యక్తిని చూశారా..?’ అంటూ ముద్రించిన ఫ్లెక్సీలు ఆదివారం విశాఖ నగరంలో కనిపించాయి. జగన్‌ వివరాలు పేర్కొంటూ.. ‘జాబ్‌ క్యాలెండర్‌, కేజీ నుంచి పీజీ వరకు ఉచిత విద్య వంటి సమస్యలేవీ ఆయనకు కనిపించవు, వినిపించవు. చివరిసారిగా అసెంబ్లీ ఎన్నికల ర్యాలీలో చూశాం’ అంటూ వ్యంగ్యంగా అందులో పేర్కొన్నారు. తెలుగునాడు స్టూడెంట్‌ ఫెడరేషన్‌ (టీఎన్‌ఎస్‌ఎఫ్‌) ఏర్పాటు చేసిన ఈ ఫ్లెక్సీలపై స్థానికంగా చర్చ మొదలవ్వగానే.. అధికారులు గుర్తించి తొలగించారు. విద్యార్థి, నిరుద్యోగుల సమస్యలపై రాష్ట్ర ప్రభుత్వ నిర్లక్ష్య ధోరణి ప్రజలకు తెలియజేయాలని ఇలా ఏర్పాటు చేసినట్లు సంఘం నేతలు పేర్కొన్నారు.

28/08/2023 08:15(IST)

‘సెంటు’ భూమి.. ఎలా చేరేది?

గుంటూరు జిల్లా కురగల్లు ప్రాంతంలోని ఎస్‌ఆర్‌ఎం యూనివర్సిటీ సమీపంలో సెంటు స్థలాల్లో ఇళ్ల నిర్మాణానికి సీఎం జగన్‌ ఇటీవల శంకుస్థాపన చేశారు. దీని పక్కనే గత ప్రభుత్వ హయాంలో సీడ్‌యాక్సిస్‌ రోడ్డుకు అనుసంధానంగా నిర్మించిన రోడ్లు, భూగర్భ డ్రైనేజీల కోసం తవ్విన కాలువల్లో ప్రస్తుతం భారీగా నీరు చేరి మట్టి జారిపోయింది. భూకంపం వచ్చినట్టుగా రహదారి ధ్వంసమైనా ఎవరూ పట్టించుకోవడం లేదు. రోడ్డును ముళ్లపొదలు ఆక్రమించాయి. సెంటు స్థలాల భూమిని మాత్రం ఆగమేఘాలపై ప్రభుత్వం చదును చేయించి లబ్ధిదారులకు అందజేసింది.

28/08/2023 08:15(IST)

300 మీటర్ల ఎత్తులో 450 డ్రోన్లతో షో

సిద్దిపేట, న్యూస్‌టుడే: సిద్దిపేటలోని కోమటిచెరువు వేదికగా ఆదివారం రాత్రి నిర్వహించిన ‘మెగా డ్రోన్‌ షో’ అబ్బురపరిచింది. చెరువు పైభాగంలో 300 మీటర్ల ఎత్తులో షో ఉత్సాహంగా సాగింది. 450 డ్రోన్లతో దిల్లీ సాంకేతిక ఆవిష్కర్తల బృందం 13 అంశాలను పట్టణ ప్రతిరూపాలుగా ప్రదర్శించింది. గాయని గీతామాధురి బృందం పాటలతో ఆకట్టుకుంది. మంత్రి హరీశ్‌రావు, శ్రీనిత దంపతులు, మరో మంత్రి శ్రీనివాస్‌గౌడ్‌ హాజరయ్యారు.

28/08/2023 08:14(IST)

పచ్చదనం విరిసె.. దుర్గంధం తొలగె

ఈనాడు, మహబూబ్‌నగర్‌: ఏడేళ్ల క్రితం మహబూబ్‌నగర్‌ మున్సిపాలిటీకి చెందిన డంపింగ్‌ యార్డులో ముక్కుపుటాలదిరే దుర్వాసన వచ్చేది. అక్కడ పనిచేసే సిబ్బంది నరకయాతన అనుభవించేవారు. 2016 జులైలో హరితహారంలో భాగంగా ఎకరా విస్తీర్ణంలో రెండు వేల మొక్కలు నాటారు. యార్డులో పనిచేసే సిబ్బంది వంతుల వారీగా రెండు పూటలా నీరందించి, సంరక్షించారు. మొక్కలకు సేంద్రియ ఎరువు అందించారు. ప్రస్తుతం ఏపుగా పెరిగిన చెట్లు చిట్టడవిని తలపిస్తున్నాయి. ఆహ్లాదం పంచుతున్నాయి.

App

జనాభా గణన కేంద్ర అంశం.. సుప్రీంకోర్టుకు తెలిపిన కేంద్రం

తాజా వార్తలు (Latest News)

ధోనీ రనౌట్‌.. నెట్టింట జితేశ్‌ శర్మపై ట్రోలింగ్‌

ఏపీలో ఆరోగ్యశ్రీ సేవలు నిలిపివేస్తాం: నెట్‌వర్క్‌ ఆసుపత్రుల లేఖ

బోయింగ్‌ విజిల్‌ బ్లోయర్‌ ఆకస్మిక మృతి.. 2 నెలల వ్యవధిలో రెండోది

‘పుష్ప2’ స్టెప్‌పై డేవిడ్‌ వార్నర్‌ కామెంట్.. చాలా ఈజీ అంటూ రిప్లై ఇచ్చిన బన్నీ

విరాట్ స్ట్రైక్‌రేట్‌ను విమర్శించే స్థాయి మీకుందా?: ఏబీ డివిలియర్స్‌

ఈనాడు.నెట్‌లో టాప్‌ 10 వార్తలు @ 5 PM

సుఖీభవ

చదువు