ITI: 10 తర్వాత.. ఐటీఐతో అవకాశాలెన్నో !

అత్యున్నత సంస్థల్లో పేరున్న కోర్సులు చేస్తేనే మేటి అవకాశాలు లభిస్తాయనేది అవాస్తవం. ఆసక్తి, తపన ఉంటే ఇండస్ట్రియల్‌ ట్రెయినింగ్‌ ఇన్‌స్టిట్యూట్‌లో చదివినా మెరుగైన భవిష్యత్తు సొంతం చేసుకోవచ్చు. విదేశీ అవకాశాలూ అందుకోవచ్చు. సొంతంగా యూనిట్‌ నెలకొల్పి, పదిమందికి ఉపాధి కల్పించే స్థాయికీ ఎదగవచ్చు. రెండు తెలుగు రాష్ట్రాల్లోనూ 700కు పైగా సంస్థలు సుమారు 50 ట్రేడుల్లో ఐటీఐల్లో ప్రవేశానికి దరఖాస్తులు ఆహ్వానిస్తున్నాయి.

Published : 23 May 2024 00:12 IST

అత్యున్నత సంస్థల్లో పేరున్న కోర్సులు చేస్తేనే మేటి అవకాశాలు లభిస్తాయనేది అవాస్తవం. ఆసక్తి, తపన ఉంటే ఇండస్ట్రియల్‌ ట్రెయినింగ్‌ ఇన్‌స్టిట్యూట్‌లో చదివినా మెరుగైన భవిష్యత్తు సొంతం చేసుకోవచ్చు. విదేశీ అవకాశాలూ అందుకోవచ్చు. సొంతంగా యూనిట్‌ నెలకొల్పి, పదిమందికి ఉపాధి కల్పించే స్థాయికీ ఎదగవచ్చు. రెండు తెలుగు రాష్ట్రాల్లోనూ 700కు పైగా సంస్థలు సుమారు 50 ట్రేడుల్లో ఐటీఐల్లో ప్రవేశానికి దరఖాస్తులు ఆహ్వానిస్తున్నాయి.

క్కువ వ్యవధిలోనే ఏదైనా అంశంలో నైపుణ్యం పెంపొందించుకుని, వెంటనే అందులో ఉపాధి పొందడానికి పారిశ్రామిక శిక్షణ సంస్థ (ఐటీఐ) దారిచూపుతుంది. ఈ కోర్సు పూర్తిచేసుకున్నవారికి ప్రభుత్వ రంగ సంస్థలు.. ముఖ్యంగా పరిశ్రమలు, ఉత్పత్తి, తయారీ కేంద్రాల్లో అవకాశాలు అనేకం. వీరి సేవలు అన్ని రంగాల్లోనూ కీలకం. అందువల్ల ఆసక్తి ఉన్నవారు మరో సందేహం లేకుండా ఐటీఐలో చేరిపోవచ్చు. ఆ తర్వాత ఉన్నత విద్యనూ అభ్యసించవచ్చు. కొన్నేళ్ల అనుభవంతో, తక్కువ పెట్టుబడితోనే యూనిట్‌ నెలకొల్పవచ్చు. భారత్‌లో తయారీ (మేక్‌ ఇన్‌ ఇండియా) వృద్ధి చెందడం, స్కిల్‌ డెవలప్‌మెంట్‌ కౌన్సిల్‌ ఏర్పాటుతో ఐటీఐ ట్రేడుల్లో పట్టున్నవారికి గిరాకీ పెరిగింది. 

టీఐల సిలబస్‌ స్కిల్‌ డెవలప్‌మెంట్‌ అండ్‌ ఆంత్రప్రెన్యూర్‌షిప్‌ ఆధ్వర్యంలో డైరెక్టర్‌ జనరల్‌ ఆఫ్‌ ట్రైనింగ్‌ (డీజీటీ), న్యూదిల్లీ రూపొందిస్తుంది. ఐటీఐల్లో పదోతరగతి అర్హతతో ఏడాది, రెండేళ్ల వ్యవధితో పలు ఇంజినీరింగ్, నాన్‌ ఇంజినీరింగ్‌ ట్రేడుల్లో కోర్సులు అందిస్తున్నారు. రెండు తెలుగు రాష్ట్రాల్లోనూ సుమారు 50 స్పెషలైజేషన్లు లభిస్తున్నాయి. ఏపీలో దాదాపు 450, తెలంగాణలో 274 ఐటీఐలు ప్రభుత్వ, ప్రైవేటు ఆధ్వర్యంలో నడుస్తున్నాయి. వీటిలో ప్రవేశానికి ఎలాంటి పరీక్షా రాయనవసరం లేదు. పదిలో సాధించిన గ్రేడ్‌ పాయింట్లు/ మార్కులతో సీట్లు కేటాయిస్తారు. ప్రభుత్వ ఐటీఐల్లో దాదాపు ఉచితంగానే చదువుకోవచ్చు. ప్రైవేటు సంస్థల్లో ట్రేడు బట్టి రూ.12,000 నుంచి రూ.17,000 వరకు ఫీజు చెల్లించాలి.

ఉపాధి ఎక్కడ?

టీఐ శిక్షణ పూర్తిచేసినవారికి ఎక్కువగా పరిశ్రమలు, ఉత్పాదక, తయారీ సంస్థల్లో ఉద్యోగాలు ఉంటాయి. రైల్వేలు, కేంద్ర స్థాయి సంస్థలు, పబ్లిక్‌ సెక్టార్‌ కంపెనీల్లో పెద్ద మొత్తంలో వీరి సేవలు అనివార్యం. సాంకేతిక (టెక్నికల్‌) పోస్టుల్లో సింహభాగం సంబంధిత ట్రేడుల్లో ఐటీఐ చదువుకున్నవారితోనే భర్తీ చేస్తున్నారు. ఆర్మీ, ఆర్మ్‌డ్‌ ఫోర్సుల్లోనూ కొన్ని ఉద్యోగాలు వీరికోసమే ఉన్నాయి.

రైల్వే: వేల సంఖ్యలో ఉండే అసిస్టెంట్‌ లోకో పైలట్‌ (అసిస్టెంట్‌ డ్రైవర్‌), టెక్నీషియన్‌ పోస్టులకు నిర్దేశిత ట్రేడుల్లో ఐటీఐ పూర్తిచేసుకున్నవారు అర్హులు. ఎలక్ట్రీషియన్‌/ మెకానిక్‌/ ఫిట్టర్‌/ టర్నర్‌/ వైర్‌మెన్‌...తదితర విభాగాలవారు అసిస్టెంట్‌ లోకో పైలట్‌ పోస్టులకు పోటీ పడవచ్చు. సంబంధిత లేదా అనుబంధ విభాగాల్లో ఐటీఐ ఉంటే టెక్నీషియన్‌ ఉద్యోగాలకు దరఖాస్తు చేసుకోవచ్చు. ఇలా ఎంపికైనవారు రైల్వే వర్కుషాపులు, లోకో షెడ్, రైల్వే క్యాబిన్లలో విధులు నిర్వర్తిస్తారు. వీరిని ఎక్కువగా లెవెల్‌-2 పోస్టుల్లోకి తీసుకుంటారు. వీరు ఉద్యోగంలో చేరిన మొదటి నెల నుంచే సుమారు రూ.35 వేల వేతనం అందుకోవచ్చు.  

రాష్ట్ర స్థాయిలో: ఎలక్ట్రికల్‌ లేదా వైర్‌మెన్‌ ట్రేడుల్లో ఐటీఐ పూర్తిచేసుకున్నవారు జూనియర్‌ లైన్‌మెన్‌ పోస్టులకు దరఖాస్తు చేసుకోవచ్చు. తెలంగాణ/ఆంధ్రప్రదేశ్‌లోని విద్యుత్తు పంపిణీ, నిర్వహణ కేంద్రాలు రెండు మూడేళ్లకు ఒకసారి ప్రకటనలు విడుదల చేస్తున్నాయి. సర్వేయింగ్‌ ఒక సబ్జెక్టుగా డ్రాఫ్ట్స్‌మన్‌ (సివిల్‌) రెండేళ్ల కోర్సు పూర్తిచేసుకున్నవారు డిప్యూటీ సర్వేయర్‌ పోస్టులకు సిద్ధం కావచ్చు.  

ఆర్మీ: సోల్జర్‌ ట్రేడ్స్‌మెన్‌ విభాగంలోని కొన్ని పోస్టులకు ఐటీఐ ఉత్తీర్ణత తప్పనిసరి. ఈ ప్రకటనలు ఏటా వెలువడుతున్నాయి. బోర్డర్‌ సెక్యూరిటీ ఫోర్స్‌ (బీఎస్‌ఎఫ్‌), సశస్త్ర సీమాబల్‌ (ఎస్‌ఎస్‌బీ), ఇండో టిబెటన్‌ బోర్డర్‌ పోలీస్‌ ఫోర్స్‌ (ఐటీబీపీ), సెంట్రల్‌ రిజర్వ్‌ పోలీస్‌ ఫోర్స్‌ (సీఆర్‌పీఎఫ్‌), సెంట్రల్‌ ఇండస్ట్రియల్‌ సెక్యూరిటీ ఫోర్స్‌ (సీఐఎస్‌ఎఫ్‌)...తదితర సెంట్రల్‌ ఆర్మ్‌డ్‌ విభాగాల్లో ఐటీఐ చదివినవారికి అవకాశాలు లభిస్తున్నాయి.

  • స్టీల్‌ ప్లాంట్లు, నేవల్‌ డాక్‌యార్డులు, నౌకాయాన సంస్థలు, పోర్టులు, షిప్పులు, ప్రజా రవాణా సంస్థలు, యంత్రాలతో నడిచే అన్ని రకాల పరిశ్రమల్లోనూ ఐటీఐ చదివినవారికి ఉద్యోగాలున్నాయి. మహారత్న, నవరత్న, మినీరత్న, పబ్లిక్‌ సెక్టార్‌ కంపెనీల్లో పలు కొలువులకు
  • వీరే అర్హులు.
  • పాతతరం ప్రభుత్వ ఐటీఐల్లో ప్రాంగణ నియామకాలూ జరుగుతున్నాయి. బహుళజాతి సంస్థలూ, స్థానికంగా నెలకొల్పిన సంస్థలూ వీరికి అవకాశాలు కల్పిస్తున్నాయి.
  • నిర్మాణ రంగ సంస్థలు, ఉత్పత్తి, తయారీ పరిశ్రమల్లో ఎక్కువ అవకాశాలుంటాయి.
  • నైపుణ్యం ఉన్న ప్లంబర్, కార్పెంటర్, ఎలక్ట్రీషియన్, ఏసీ, రెఫ్రిజిరేటర్‌ మెకానిక్‌లకు పట్టణాలు, నగరాలతోపాటు పల్లెల్లోనూ డిమాండ్‌ పెరుగుతోంది. అందువల్ల ట్రేడుల్లో పట్టు ఉంటే ఉపాధికి ఎలాంటి ఢోకా లేదు. అలాగే వీరు సొంతంగా వర్క్‌షాప్‌/మెకానిక్‌ షెడ్‌ పెట్టుకుని భవిష్యత్తులో ఎంతోమందికి ఉపాధీ కల్పించవచ్చు.
  • బిగింపు, మరమ్మతు సేవల నిమిత్తం పలు ఆన్‌లైన్‌ సంస్థలూ తెలుగు రాష్ట్రాలతోపాటు దేశవ్యాప్తంగా సేవలు అందిస్తున్నాయి. అలాంటివాటిలో పేరు నమోదు చేసుకుని, చేతినిండా పనితో దూసుకుపోవచ్చు.  

విదేశాల్లో...

తెలుగు రాష్ట్రాల్లో తెలంగాణ ఓవర్‌సీస్‌ మ్యాన్‌ పవర్‌ కంపెనీ లిమిటెడ్‌ (టామ్‌కామ్‌), ఓవర్‌సీస్‌ మ్యాన్‌ పవర్‌ కంపెనీ ఆంధ్రప్రదేశ్‌ లిమిటెడ్‌ (ఓమ్‌క్యాప్‌) విదేశీ ఉద్యోగాలకు దారి చూపుతున్నాయి. ఇవి శిక్షణ అందించి, సర్టిఫికెట్లు ప్రదానం చేస్తున్నాయి. వీటిని పొందినవారు కేంద్రంలోని మినిస్ట్రీ ఆఫ్‌ ఎక్స్‌టర్నల్‌ అఫైర్స్‌ ద్వారా విదేశీ ఉద్యోగాలకు ప్రయత్నించవచ్చు. ఫిట్టర్‌ ట్రేడ్‌ పూర్తిచేసుకున్నవారికి చమురు ఉత్పత్తిచేస్తోన్న దేశాల్లో ఎక్కువ అవకాశాలు లభిస్తున్నాయి. ఎలక్ట్రీషియన్లు, ప్లంబర్లు.. సింగపూర్, మలేసియాలతోపాటు పలు దేశాల్లో ఉద్యోగాలు పొందవచ్చు. నైపుణ్యం, కమ్యూనికేషన్‌ స్కిల్స్‌ ఉంటే విదేశాల్లో ఆకర్షణీయ వేతనంతో అవకాశాలు సొంతం చేసుకోవచ్చు.

ఇవీ ట్రేడులు

రెండేళ్ల వ్యవధితో: అటెండెంట్‌ ఆపరేటర్‌ (కెమికల్‌ ప్లాంట్‌), డ్రాఫ్ట్స్‌మన్‌ (సివిల్‌/ మెకానికల్‌), ఎలక్ట్రీషియన్, ఎలక్ట్రానిక్స్‌ మెకానిక్, ఫిట్టర్, ఇన్ఫర్మేషన్‌ కమ్యూనికేషన్‌ టెక్నాలజీ సిస్టమ్‌ మెయింటెనన్స్, ఇన్‌స్ట్రుమెంట్‌ మెకానిక్, ఇన్‌స్ట్ర్టుమెంట్‌ మెకానిక్‌ (కెమికల్‌ ప్లాంట్‌), మెషినిస్ట్, మెషినిస్ట్‌ (గ్రైండర్‌), మెరైన్‌ ఫిట్టర్, మెకానిక్‌ (మోటార్‌ వెహికల్‌/ రెఫ్రిజరేషన్‌ అండ్‌ ఎయిర్‌ కండిషనింగ్‌), మెకానిక్‌ మెషిన్‌ టూల్‌ మెయింటెనన్స్, పెయింటర్‌ జనరల్, టర్నర్, వెసెల్‌ నేవిగేటర్, వైర్‌మెన్‌.

ఏడాది వ్యవధితో: కార్పెంటర్, కంప్యూటర్‌ ఆపరేటర్‌ అండ్‌ ప్రోగ్రామింగ్‌ అసిస్టెంట్, డ్రెస్‌ మేకింగ్, ఫౌండ్రీమెన్, మాసన్‌ (బిల్డింగ్‌ కన్‌స్ట్రక్టర్‌), ప్లాస్టిక్‌ ప్రాసెసింగ్‌ ఆపరేటర్, ప్లంబర్, వెల్డర్, సెక్రటేరియల్‌ ప్రాక్టీస్‌ (ఇంగ్లిష్‌), సూయింగ్‌ టెక్నాలజీ, షీట్‌ మెటల్‌ వర్కర్,
స్టెనోగ్రాఫర్‌ అండ్‌ సెక్రటేరియల్‌ అసిస్టెంట్‌ (ఇంగ్లిష్‌), మెకానిక్‌ (డీజిల్‌/ఆటో బాడీ పెయింటింగ్‌/ ఆటో బాడీ రిపేర్‌).. ఇలా వివిధ ట్రేడులు ఐటీఐల్లో అందుబాటులో ఉన్నాయి.

ఉన్నత విద్య

ఐటీఐ తర్వాత మేటి నైపుణ్యం ఆశించేవాళ్లు డిప్లొమా కోర్సుల్లో చేరడానికి తొలి ప్రాధాన్యం ఇవ్వవచ్చు. కొన్ని బ్రాంచీల్లో లేటరల్‌ ఎంట్రీతో నేరుగా ద్వితీయ సంవత్సరం కోర్సుల్లో చేరిపోవచ్చు. డిప్లొమా అనంతరం ఆసక్తి ఉంటే ఈసెట్‌ ద్వారా నేరుగా రెండో సంవత్సరం బీటెక్‌/బీఈ కోర్సుల్లో ప్రవేశం పొందవచ్చు. నాన్‌ ఇంజినీరింగ్‌ బ్రాంచీల్లో ఐటీఐ ట్రేడ్‌లు పూర్తిచేసుకున్నవారు డిగ్రీ (బీఏ) ఆ తర్వాత పీజీ (ఎంఏ) కోర్సులు చదువుకోవచ్చు.

ఇన్‌స్ట్రక్టర్‌గానూ....

ఐటీఐల్లో కోర్సు విజయవంతంగా పూర్తిచేసుకున్నవారు నేషనల్‌ స్కిల్‌ ట్రెయినింగ్‌ ఇన్‌స్టిట్యూట్‌ (ఎన్‌ఎస్‌టీఐ)ల్లో శిక్షణ పొందవచ్చు. విద్యానగర్‌ (హైదరాబాద్‌)లో ఎలక్ట్రీషియన్, వైర్‌మెన్, ఫిట్టర్, టర్నర్, మెషినిస్ట్, ఎలక్ట్రానిక్‌ మెకానిక్, మోటార్‌ వెహికల్‌ మెకానిక్, వెల్డర్‌ ట్రేడ్‌ల్లో ఏడాది వ్యవధితో ఇన్‌స్ట్రక్టర్‌ కోర్సు అందిస్తున్నారు. ట్రేడుల్లో మరింత ప్రావీణ్యానికి షార్ట్‌ టర్మ్‌ విధానంలో అడ్వాన్స్‌డ్‌ ఒకేషనల్‌ ట్రైనింగ్‌ కోర్సులూ ఉన్నాయి.  

అప్రెంటిస్‌

పని నేర్చుకోవడానికి అవకాశం లభించడంతోపాటు, ఉద్యోగ నియామకాల్లో అప్రెంటిస్‌ల ప్రాధాన్యం పెరుగుతోంది. భారతీయ రైల్వే వేల సంఖ్యలో అప్రెంటిస్‌లను తీసుకుంటోంది. మహారత్న, నవరత్న, మినీరత్న సంస్థలు ఎక్కువమందికి అప్రెంటిస్‌షిప్‌ అవకాశం కల్పిస్తున్నాయి. ఈ ప్రకటనలు తరచూ వెలువడుతున్నాయి. ఈ విధానంలో చేరినవారికి ప్రతి నెలా స్టైపెండ్‌ చెల్లిస్తారు. నియామకాల్లో కొన్ని (పది నుంచి ఇరవై శాతం) పోస్టులను అప్రెంటిస్‌ పూర్తిచేసుకున్నవారితోనే భర్తీ చేస్తున్నారు. మరికొన్ని సంస్థలు అప్రెంటిస్‌షిప్‌ పూర్తయితేనే ఉద్యోగంలోకి తీసుకుంటున్నాయి. స్కిల్‌ ఇండియా కార్యక్రమం, మినిస్ట్రీ ఆఫ్‌ స్కిల్‌ డెవలప్‌మెంట్‌ అండ్‌ ఆంత్రప్రెన్యూర్‌షిప్‌ ద్వారా నైపుణ్యాలు మెరుగుపరచుకోవడం, అప్రెంటిస్‌షిప్‌ చేసుకునే అవకాశం ఉంది. ఐటీఐ పూర్తయిన తర్వాత అప్రెంటిస్‌ అవకాశం కోసం https://apprenticeshipindia.org లో వివరాలు నమోదు చేసుకోవచ్చు.

దరఖాస్తు ఇలా..

ఏపీ, తెలంగాణలో ఐటీఐ ప్రవేశాలకు దరఖాస్తులు ఆహ్వానిస్తున్నారు. ఆసక్తి ఉన్నవారు జూన్‌ 10లోగా ఆన్‌లైన్‌లో వివరాలు నమోదు చేసుకోవచ్చు.

వెబ్‌సైట్లు:

ఏపీ: https://iti.ap.gov.in/

తెలంగాణhttps://iti.telangana.gov.in/


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని