పేద పిల్లలకూ బడి బస్సు!

హలో ఫ్రెండ్స్‌.. ప్రైవేటు స్కూల్‌ పిల్లల కోసం రోజూ బస్సులో, ఆటోలో, వ్యాన్లో వస్తుంటాయి. వాళ్లు ఎంచక్కా.. ఇంటి ముందే ఆయా వాహనాల్లో ఎక్కేసి.. బడికి వెళ్లి వస్తుంటారు. కానీ, ప్రభుత్వ పాఠశాలల్లో ఆ పరిస్థితి ఉండదు. వాటిలో చదివే విద్యార్థులకూ అంత స్తోమత ఉండదు. ఎక్కువమంది నడుచుకుంటూనో, సైకిళ్ల మీదనో రోజూ బడికి వెళ్తుంటారు. ఓ ప్రభుత్వ బడి విద్యార్థులకు మాత్రం ఇకనుంచి ఆ ఇబ్బంది లేదు. అదెలాగో ఇది చదివి తెలుసుకోండి మరి..

కర్ణాటక రాష్ట్రంలో మిత్తూరు అనే గ్రామం ఉంది. అక్కడి ప్రభుత్వ పాఠశాలలో 120 మంది చదువుకుంటున్నారు. ఆ విద్యార్థుల కోసం ఇటీవలే ఒక బస్సును కొనుగోలు చేశారు. దీని వెనక ఉపాధ్యాయులు, గ్రామస్థుల కృషి ఉంది. కొత్తగా బస్సు అందుబాటులోకి రావడంతో ప్రైవేటు కంటే మేమేమన్నా తక్కువా అన్నట్లు.. ఆ బడి పిల్లలంతా ఎంచక్కా.. అందులో ఎక్కేసి తరగతులకు హాజరవుతున్నారు.  

అయిదేళ్ల క్రితం ఆలోచన  

మిత్తూరు ప్రభుత్వ పాఠశాలకు ఆనుకొనే నాలుగెకరాల స్థలం ఉంది. అది బడికి చెందినదే కావడంతో.. అయిదేళ్ల క్రితం అంటే 2017లో పాఠశాల అభివృద్ధి కమిటీ ఆధ్వర్యంలో ఆ స్థలంలో పోక వక్కల మొక్కలు నాటాలని నిర్ణయించారు. వెంటనే, సమీపంలోని పట్టణం నుంచి దాదాపు 628 పోక మొక్కలను కొనుగోలు చేసి.. బడి పక్కనున్న స్థలంలో నాటారు. రెండేళ్ల క్రితం ఆ తోట పర్యవేక్షణ బాధ్యతను ఓ గుత్తేదారుకు అప్పగించారు. అంతేకాదు.. పాఠశాలకు సదరు గుత్తేదారు ఏడాదికి రూ.2.5 లక్షలు చెల్లించేలా ఒప్పందం కూడా కుదుర్చుకున్నారు.

రెండేళ్ల ఆదాయంతో..

గతేడాదితోపాటు ఈ సంవత్సరం తోట నుంచి వచ్చిన ఆదాయం రూ.5 లక్షలతో.. ఇటీవలే ఓ బస్సును కొనుగోలు చేశారు. పాఠశాల అభివృద్ధి కమిటీ ఆధ్వర్యంలో కొన్న ఈ బస్సులో మొత్తం 26 సీట్లు ఉన్నాయట. ఇంతకీ అక్కడి ఉపాధ్యాయులు, గ్రామస్థులకు ఆ ఆలోచన ఎలా వచ్చిందంటే.. ప్రతి రోజూ కొందరు విద్యార్థులు ఆలస్యంగా తరగతులకు హాజరవుతుండటం, ఇంకొందరు ప్రమాదకరంగా ప్రయాణిస్తూ వస్తుండటంతో.. స్కూల్‌కే ప్రత్యేకంగా బస్సు ఉంటే బాగుంటుందని అనుకున్నారు. వారి ఆలోచనను పోక వక్కల తోట రూపంలో ఆచరణలోకి తీసుకొచ్చారు. ఆ బస్సును స్థానిక ఎమ్మెల్యే చేతుల మీదుగా ఇటీవలే ప్రారంభించారు. అంతేకాదు.. ఆ స్కూల్‌కి మరో అదనపు తరగతి గది నిర్మాణానికి కూడా ఆయన హామీనిచ్చారట. ఇంకో విషయం ఏంటంటే.. ఆ బస్సుకు అవసరమైన డీజిల్‌ ఖర్చును భరించేందుకు గ్రామస్థులే ముందుకొచ్చారు. కొత్తగా బస్సు రావడంతో పిల్లల్లోనూ స్కూల్‌కి వెళ్లాలనే ఆసక్తి మరింత పెరిగిందట. సర్కారు బడికి బస్సు అంటేనే.. ఆశ్చర్యంగా ఉంది కదూ!