ది గ్రేట్‌.. తులిప్స్‌!

హాయ్‌ నేస్తాలూ.. పువ్వుల్లో ‘తులిప్స్‌’ది ప్రత్యేక స్థానం. తలలో పెట్టుకునేందుకు, పూజలకు ఉపయోగపడకపోయినా.. డెకరేషన్లలో మాత్రం ఇవి కచ్చితంగా ఉండాల్సిందే. అతి శీతల ప్రాంతాల్లో మాత్రమే పెరిగే ఈ పూల మొక్కలు.. మన దేశంలో జమ్మూ కశ్మీర్‌లో మాత్రమే కనిపిస్తుంటాయి. శ్రీనగర్‌లోని ‘ఇందిరా గాంధీ తులిప్‌ గార్డెన్‌’ సందర్శనకు నేటి నుంచి పర్యాటకులను అనుమతించనున్నారు. ఈ సందర్భంగా ఆ ఉద్యానవనం, తులిప్‌ పుష్పాలకు సంబంధించిన కొన్ని ఆసక్తికర వివరాలివీ..

* శ్రీనగర్‌లోని ‘ఇందిరాగాంధీ తులిప్‌ గార్డెన్‌’ ఆసియాలోనే అతి పెద్దది. ప్రపంచ ప్రసిద్ధ దాల్‌ సరస్సు తీరాన.. దాదాపు 75 ఎకరాల్లో ఈ గార్డెన్‌ విస్తరించి ఉంది.

* ఇక్కడ 68 రకాలకు చెందిన మొత్తం 16 లక్షల మొక్కలు ఉన్నాయి. అవి వివిధ రంగుల్లో సందర్శకులను ఆకట్టుకుంటాయి. ఈ గార్డెన్‌ నిర్వహణకు దాదాపు 100 మంది సిబ్బంది పనిచేస్తుంటారు.

* ఏటా రెండు లక్షల మంది ఈ గార్డెన్‌ను సందర్శిస్తుంటారు. 2020లో రికార్డు స్థాయిలో 3.60 లక్షల మంది పర్యాటకులు వచ్చారు.

* ప్రపంచంలోనే అతిపెద్ద తులిప్‌ గార్డెన్‌ నెదర్లాండ్స్‌లో ఉంది. ఈ దేశంలో ఏటా దాదాపు 300 కోట్లకు పైగా ఈ పువ్వులను సాగు చేస్తుంటారు.

* తులిప్‌ అంటే లాటిన్‌ భాషలో తలపాగా అని అర్థం. ఇవి లిల్లీ జాతికి చెందినవి. తులిప్స్‌లో దాదాపు 150 జాతులూ, మళ్లీ వాటిలో 3000 రకాలూ ఉన్నాయి.

* తులిప్స్‌లో చాలా వరకూ ఒక మొక్కకు ఒక పువ్వు మాత్రమే పూస్తుంది. కొన్ని రకాల్లో మాత్రం నాలుగు పూస్తాయి. అవన్నీ దాదాపు ఒకే రకమైన ఆకృతితో ఉంటాయి.

* ఈ పూలు వసంత కాలంలో మూడు వారాల నుంచి అయిదు వారాలపాటు మాత్రమే విరబూస్తుంటాయి.

* తులిప్స్‌లో ప్రతి రంగుకూ ఒక అర్థం ఉంటుంది. ఎరుపు రంగు పూలు స్వచ్ఛమైన ప్రేమకు, ఊదా రంగువి విధేయతకు చిహ్నంగా చెబుతుంటారు.

* ఎవరినైనా క్షమాపణ అడగాలనుకున్నప్పుడు, వారికి తెలుపు రంగు పువ్వులను ఇస్తుంటారు.

* వాస్తవానికి ఈ తులిప్‌ పుష్పాలు మధ్య ఆసియాకు చెందినవి. కానీ, ఇవి నెదర్లాండ్స్‌కు చేరిన తర్వాతే.. ప్రపంచవ్యాప్తంగా మంచి ఆదరణ పొందాయి.

* పార్కిన్‌సన్‌ వ్యాధి నివారణకు కృషి చేసే ఓ ఫౌండేషన్‌, తమ సంస్థ చిహ్నంగా తులిప్‌ పుష్పాలనే ఎంచుకొంది.

* తులిప్‌ పుష్పాలు చాలా ఖరీదైనవి. 1600 సంవత్సరంలో నెదర్లాండ్స్‌లో ఒక ఉద్యోగి సగటు జీతం కంటే ఈ పువ్వుల ధరే పది రెట్లు ఎక్కువట.

* ఈ తులిప్‌ పువ్వుల రేకులను తినొచ్చట. ఇప్పటికీ కొన్ని వంటకాల్లో ఉల్లిపాయలకు బదులుగా తులిప్‌ రెబ్బలనే వాడుతుంటారు.

* తులిప్‌ పుష్పాలు కాంతి పడే దిశగా పెరుగుతుంటాయి.