అలలు విసిరిన శిల!

అదో బండ! అంటే ఏదో చిన్నది అనుకునేరు! అది ఏకంగా ఓ కొండంత పరిమాణంలో ఉంటుంది. కొన్ని లక్షల కిలోల బరువున్న ఆ రాయి సముద్రం నుంచి నేల మీదకు ఎలా వచ్చిందో తెలుసా?! దాన్ని అలలు విసిరేశాయంట! అంతపెద్ద బండరాయినే కదిలించే ఆ రాకాసి అలలు ఎలా ఏర్పడ్డాయో తెలుసా...! సునామీ వల్ల!! అసలు ఆ సునామీ ఎందుకు వచ్చిందో తెలుసా..! సముద్రంలోని అగ్నిపర్వతం బద్దలు కావడం వల్లనట!! వినడానికి వింతగా, హాలీవుడ్‌ సినిమాను తలపించేలా ఉన్నా.. ఇదంతా వాస్తవం అంటున్నారు శాస్త్రవేత్తలు. దీనంతటికీ నిలువెత్తు నిదర్శనంలా నిలుస్తోంది ఈ సునామీ రాయి. మరి ఈ కొండంత బండ ఎక్కడుంది?దాని కథ ఏంటో తెలుసుకుందామా ఫ్రెండ్స్‌. అయితే ఇంకెందుకాలస్యం... ఈ కథనం చదివేయండి.  

టోంగా.. పసిఫిక్‌ మహాసముద్రంలోని ఓ ద్వీప దేశం. జనాభా సుమారు లక్ష మాత్రమే. మనం చెప్పుకుంటున్న ఆ బండ ఇదిగో ఈ దేశంలోనే ఉంది. దీన్ని ‘టోంగో సునామీ రాయి’ అని పిలుస్తారు. దీన్ని సందర్శించడానికి విదేశాల నుంచి ఏటా పెద్ద సంఖ్యలో పర్యాటకులు వస్తుంటారు. ఈ రాయి ఎత్తు దాదాపు 30 అడుగులు. బరువేమో దాదాపు 16 లక్షల కిలోలు ఉంటుందని అంచనా!

సునామీకి సాక్ష్యం!

పసిఫిక్‌ మహాసముద్రంలో అప్పుడెప్పుడో 1883లో వచ్చిన సునామీకి సాక్ష్యంగా ఈ రాయి నిలుస్తోంది. అప్పట్లో టోంగా తీరానికి కేవలం 20 నుంచి 30 కిలోమీటర్ల దూరంలో సముద్రగర్భంలో ఉన్న అగ్నిపర్వతం విస్ఫోటనం చెందింది. దీని వల్ల పెద్ద ఎత్తున అలలు ఎగసిపడ్డాయి. ఈ రాకాసి అలల తాకిడికి ఈ ‘టోంగా సునామీ రాయి’ సముద్రం నుంచి తీరం మీదుగా కొన్ని వందల మీటర్ల దూరానికి కొట్టుకువచ్చిందని శాస్త్రవేత్తలు అంచనా వేస్తున్నారు. ఈ రాయి అగ్నిపర్వతానికి సంబంధించిన భాగమై ఉంటుందని కూడా మరికొందరు అభిప్రాయపడుతున్నారు.

దశలవారీగా...!

సునామీ వల్ల స్థానభ్రంశం చెందిన రాళ్లలో బహుశా ఇదే పెద్దదై ఉండవచ్చని పరిశోధకులు చెబుతున్నారు. ఈ సంఘటన ఒక్కసారిగా జరిగింది కాదని, దశలవారీగా కూడా సంభవించి ఉండవచ్చని అభిప్రాయపడుతున్నారు. ఈ అతిపెద్ద రాయి టోంగాలోని నేల స్వభావానికి భిన్నంగా ఉంటుంది. దీనికి పగడపు రాయికి ఉండే లక్షణాలూ ఉన్నాయి. ఇక్కడ నేల చదునుగా ఉంది కాబట్టి, పై నుంచి దొర్లుకువచ్చే అవకాశాలూ లేవు. మరో వింత ఏంటంటే.. ఈ పే..ద్ద రాయి నిత్యం పచ్చదనంతో కళకళలాడుతూ కనిపిస్తుంటుంది.

జానపద కథల్లో...

ఈ రాయి ప్రస్తావన అక్కడి స్థానిక జానపద కథల్లోనూ ఉంది. ఒక పురాణం ప్రకారం... మౌయ్‌ అనే దేవుడు పే...ద్ద నరమాంస భక్షక కోడిని చంపి, మానవులను రక్షించాలనుకున్నాడు. ఆ ప్రయత్నంలో భాగంగా సముద్రం నుంచి కొన్ని బండరాళ్లను ఒడ్డుకు విసిరాడు. వాటిలో ఈ టోంగా సునామీ రాయి ఒకటి! ఇది నిజమని చాలా మంది టోంగా ప్రజలు నమ్ముతుంటారు. నేస్తాలూ... మొత్తానికి ఇవీ ఈ కొండంత బండరాయి విశేషాలు. భలే ఉన్నాయి కదూ!