అయిదు అంతస్తుల అగ్గిపెట్టెంత ఇల్లు!

ఇల్లు విశాలంగా ఉండాలి... అప్పుడే తగినంత గాలి, సూర్యరశ్మి వస్తాయి. అయితే పట్టణాలు, నగరాల్లో మారుతున్న పరిస్థితుల నేపథ్యంలో కాస్త ఇరుకు ఇళ్లలో నివసించడం తప్పడం లేదు. కానీ, నేస్తాలూ... టోక్యోలో ఓ ఇల్లు మాత్రం అచ్చంగా అగ్గిపెట్టెను గుర్తుకు తెస్తోంది. అది కూడా అయిదు అంతస్తుల భవనం! ఈ వింత భవంతి గురించి ఓ యూట్యూబర్‌ తీసిన వీడియో వల్ల ప్రపంచానికి తెలిసింది. ఇంకేముంది దీన్ని వీక్షించిన వారంతా నోరెళ్లబెడుతున్నారు. మరి మనమూ ఆ విచిత్ర భవనం గురించి తెలుసుకుందామా!

నార్మ్‌ నకమురా అనే అంకుల్‌ ఓ యూట్యూబ్‌ ఛానల్‌ నిర్వహిస్తున్నారు. ఇందులో ఆయన చిన్న చిన్న ఇళ్లు, దుకాణాలకు సంబంధించిన ఆసక్తికరమైన వీడియోలు అప్‌లోడ్‌ చేస్తుంటారు. కొన్ని రోజుల క్రితమే ఆయన టోక్యోలోని ఈ అతి చిన్న అయిదంతస్తుల భవనం వీడియోను పోస్ట్‌ చేశారు. ఇలా అప్‌లోడ్‌ చేశారో లేదో... అది అలా వైరల్‌గా మారింది. అక్టోబర్‌ 8న పోస్ట్‌ చేసిన ఈ వీడియోను 19వ తేదీ మధ్యాహ్నం 3.00 గంటల వరకు దాదాపు 55 లక్షల మంది వీక్షించారు. సుమారు పదివేల వరకు కామెంట్లు వచ్చాయి.

ఎంత ఇరుకో...

ఈ బుజ్జి ఇల్లు వెడల్పు 2.5 మీటర్లు మాత్రమే. ఇందులోనే వంటగది, షవర్‌తో కూడిన స్నానాల గది, టాయిలెట్‌, చిన్న ఫ్రిజ్‌, ఏసీ ఉన్నాయి. ఫర్నిచర్‌ పెట్టుకోవడానికి మాత్రం అంతగా స్థలం లేదు. నిజానికి ఈ భవంతిలోకి వెళ్లేటప్పుడు మెట్లెక్కడమూ నరకప్రాయమే! కానీ జపాన్‌ రాజధాని నగరమైన టోక్యోలో తక్కువ అద్దెలో కావాలంటే మాత్రం ఈ ఇల్లే దిక్కట! ఇందులో తలదాచుకోవాలనుకుంటే భారత కరెన్సీలో నెలకు కేవలం 22,230 రూపాయలు చెల్లిస్తే సరిపోతుందట. ‘అమ్మో.. అంత మొత్తమా!?’ అని మీరనుకోవచ్చు కానీ, ఆ నగరంలో ఉన్న అద్దెలతో పోల్చుకుంటే ఇది చాలా తక్కువట.

చెవులకు చిల్లులే!

జేబుకు పడే చిల్లులు తప్పించుకుందామని ఎవరైనా అనుకుంటే మాత్రం తమ చెవులకు పడే చిల్లులను భరించాల్సిందే. ఎందుకంటే ఈ బుజ్జి భవంతికి రెండు పక్కల ఉన్న రోడ్ల మీద తిరిగే వాహనాల నుంచి వచ్చే రణగొణ ధ్వనులు చాలా తీవ్రంగా ఉంటాయట. ఈ వీడియోను చూసి కామెంట్‌ చేసిన వారిలోనూ చాలా మంది దీన్నో ‘చెత్త ఇల్లు’గా అభివర్ణిస్తున్నారు. ఇది అసలేమాత్రం నివాసయోగ్యం కాదంటున్నారు. నేస్తాలూ.. మొత్తానికి ఇవీ అయిదు అంతస్తుల అగ్గిపెట్టెంత భవనం విశేషాలు. భలే ఉన్నాయి కదూ!