వలయం కాదు వంతెనే!

హాయ్‌ ఫ్రెండ్స్‌... ఈ చిత్రాలు చూస్తే.. ఏదో శిలా తోరణంలా కనిపిస్తోంది కదూ. ప్రకృతి వింతలా అనిపిస్తోంది కదా! కానీ కాదు...!! అవును నేస్తాలూ.. ఇది మానవ నిర్మిత రాతి వంతెన. నీటిలో పడిన ప్రతిబింబం వల్ల వలయం ఆకారంలో కనిపిస్తున్న ఈ వారధి గురించి కొన్ని విషయాలు తెలుసుకుందామా మరి.

ఈ విచిత్ర వంతెన 19వ శతాబ్దంలో నిర్మితమైంది. ఇది జర్మనీలో ఉంది. దీని పేరు రాకోట్జ్‌బ్రూకే వంతెన. పలకడానికి కాస్త ఇబ్బందిగా ఉంది కదూ! దీన్ని స్థానికంగా అందరూ ‘డెవిల్‌ బ్రిడ్జి’ అని పిలుస్తారు. మనమూ అలానే అంటే సరి.

పెద్ద సంఖ్యలో...

ఈ వంతెన జర్మనీలోని సాక్సోనీలోని ఒక చిన్న పార్కులో ఉంది. ఇది ఏ ప్రధాన నగరానికీ సమీపంలో లేదు. కాబట్టి ఇక్కడికి రావడం కాస్త కష్టమే. అయినా పర్యాటకులు వ్యయప్రయాసలకోర్చి మరీ ఈ వింత వంతెనను చూడ్డానికి పెద్ద సంఖ్యలో వస్తుంటారు. రాకోట్జ్‌బ్రూకే వంతెన నిర్మాణం 1860లో జరిగింది. దీని నిర్మాణం ఇప్పటికీ ఓ వింతే. కేవలం రాళ్లతో దీన్ని నిర్మించారు. ఇది చాలా సున్నితమైన నిర్మాణం. అందుకే దీని రక్షణ కోసం ఎవరినీ దీనిపైకి అనుమతించరు. అలాగే దీనికి రక్షణ గోడలు సైతం లేవు. ఈ కారణంగానే వంతెన మీదకు ఎవరూ చేరుకోకుండా, ఇరువైపులా కంచెలను ఏర్పాటు చేసి దీన్ని పరిరక్షిస్తున్నారు.

సోషల్‌ మీడియాలో...

ఈ వంతెన ఈ మధ్య మరింత ఫేమస్‌ అయింది. కారణం సోషల్‌ మీడియా! ఇక్కడికి వచ్చిన పర్యాటకులు ఫొటోలు, వీడియోలు తీసుకుని సోషల్‌మీడియాలో అప్‌లోడ్‌ చేస్తుంటారు. అవి తక్కువ సమయంలోనే వైరల్‌ అవుతుండటంతో, ఈ వంతెనకు ఒక్కసారిగా క్రేజ్‌ వచ్చింది. దీన్ని వీక్షించేందుకు వచ్చే సందర్శకుల సంఖ్య పెరుగుతోంది.

ప్రతిబింబం పడితే... 

డెవిల్స్‌ బ్రిడ్జి చెరువు మీద నిర్మితమైంది.  నీటిలో ఈ వంతెన ప్రతిబింబం పడినప్పుడు.. కచ్చితంగా ఓ వృత్తంలా కనిపించడం దీని ప్రత్యేకత. శీతాకాలం ముగిసిన తర్వాత వీక్షించడానికి పర్యాటకులు ఎక్కువగా ఆసక్తి చూపుతుంటారు. అప్పుడే ఈ వంతెన మరింత అందంగా కనిపిస్తుంది! ఈ బ్రిడ్జి గురించి కొన్ని మూఢనమ్మకాలు కూడా వ్యాప్తిలో ఉన్నాయి. నేస్తాలూ.. మొత్తానికి ఇవీ వింత వంతెన విశేషాలు. మీకు నచ్చాయి కదూ!