అహో.. అందాల గిరివిల్లు!

ఆకాశంలో హరివిల్లు భలే కనువిందు చేస్తుంది! పిల్లలమైన మనకు ఇంద్రధనస్సు అంటే భలే ఇష్టం కదూ! కానీ కొండలు రంగులతో కనిపిస్తే ‘గిరి’విల్లులా భలేగా ఉంటుంది కదా. ఇప్పుడు మనం అలాంటి గుట్టల గురించే తెలుసుకోబోతున్నాం. ఈ కథనం చదివేయండి.. ఆ వివరాలేంటో మీకూ తెలుస్తాయి.

కొన్ని వేల సంవత్సరాల క్రితమే ఏర్పడిన ఈ రంగుల గిరులు అమెరికాలో ఉన్నాయి. ఈ ప్రాంతం పురాతన నది పరివాహక ప్రాంతానికి చెందింది. వీటిని పెయింటెడ్‌ హిల్స్‌ అని పిలుస్తారు. ఇవి వీలర్‌కౌంటీ, ఓరగాన్‌లో ఉన్నాయి. ఈ రంగుల కొండలు దాదాపు 3,132 ఎకరాల్లో విస్తరించి ఉన్నాయి. ఓరగాన్‌లోని మిచెల్‌కు సుమారు 14 కిలోమీటర్ల దూరంలో కొలువుతీరి ఉన్నాయి.

ప్రకృతి వింత...

ఓరగాన్‌ ఏడు వింతల్లో ఈ పెయింటెడ్‌ హిల్స్‌ కూడా స్థానం పొందాయి. కొండలకున్న పలు రంగురంగుల లేయర్స్‌ వల్ల దీనికి ఆ పేరు వచ్చింది. పురాతన నదికి వరదలు వచ్చినప్పుడు కొండలకు ఈ రంగులు ఏర్పడ్డాయని శాస్త్రవేత్తలు చెబుతున్నారు. 35 మిలియన్‌ సంవత్సరాల క్రితం పర్యావరణంలోని మార్పుల కారణంగా ఈ రంగు పొరలు ఏర్పడ్డాయి.

ఎరుపు. పసుపు.. మైమరుపు..!

ఈ కొండలు ఎరుపు, పసుపు పొరలతో నిండి ఉన్నాయి. వీటిని చూడగానే సందర్శకులు ఒక రకమైన తన్మయత్వానికి లోనవుతారు. ఈ ప్రకృతి వింతకు పరవశించిపోతుంటారు. ప్రపంచం నలుమూలల నుంచి ఈ పెయింటెడ్‌ హిల్స్‌ను వీక్షించడానికి పెద్ద సంఖ్యలో పర్యాటకులు వస్తుంటారు. ఈ నేలలో లాటరైట్లు, ఇనుము, అల్యూమినియం ఎక్కువగా ఉంటాయి. అవి వాతావరణంతో జరిపే చర్యల వల్లే ఈ రంగులు ఏర్పడుతున్నాయి. నేస్తాలూ.. మొత్తానికి ఈ ప్రకృతి వింత భలేగా ఉంది కదూ!