టెడ్డీబేర్‌ బొమ్మ! ఈ రోజు నీదే సుమా!!

టెడ్డీబేర్‌ బొమ్మ! ఈ రోజు నీదే సుమా!!

టెడ్డీబేర్‌లంటే మనకు భలే ఇష్టం... మళ్లీ మళ్లీ చూడాలనిపిస్తాయి... ఇంకా ఇంకా కొనుక్కోవాలనిపిస్తాయి... మరి వీటికీ ఓ రోజుందని తెలుసా? మరి ఆ సంగతులేవో చదువుకుందామా!

మీ ఇంట్లో టెడ్డీబేర్‌ ఉందా? అయితే ఈ రోజు దాన్ని ఒళ్లొకి తీసుకుని, దాని మెత్తటి జూలు దువ్వుతూ ‘శుభాకాంక్షలు’ చెప్పండి. ఎందుకంటే ఇవాళ ‘టెడ్డీబేర్‌ డే’. అంటే దాని కోసం ప్రత్యేకంగా కేటాయించిన రోజన్నమాట. ఇవాళ సెప్టెంబరు 9 కదా? చాలా దేశాల్లో ఈ రోజును ‘టెడ్డీబేర్‌ డే’గా జరుపుకుంటారు.

* అమెరికాలో అయితే టెడ్డీబేర్లను బహుమతులుగా ఇచ్చి పుచ్చుకుంటారు. ఇంట్లో వాడకుండా ఉన్న పాతవాటిని స్థానికంగా ఉండే స్వచ్ఛంద సంస్థల్లో ఇచ్చేస్తారు. వాళ్లు వాటిని శుభ్రం చేసి అనాథ పిల్లలకు పంచుతారన్నమాట.

* బేర్‌ అంటే ఎలుగుబంటని తెలుసుగా? వాటి గురించి పిల్లలకు బోలెడు విషయాలు చెప్పేందుకు అక్కడ జూల్లో ఈ వారమంతా ప్రత్యేకమైన కార్యక్రమాలు నిర్వహిస్తారు. వీటి కార్టూన్‌ సినిమాలు, పుస్తకాల్లాంటి వాటినీ ప్రదర్శిస్తారు.
* ఎలుగుబంటి బొమ్మకి ‘టెడ్డీ బేర్‌’ అనే పేరు రావడానికి ఓ కథుందని తెలుసా?
* 1902లో థియోడర్‌ రూజ్‌వెల్ట్‌ అమెరికాకి అధ్యక్షుడిగా పనిచేసేవారు. అక్కడ మిస్సిసిపీలో ఉన్న ఓ అడవికి ఆయన వేటకెళ్లారు. అక్కడ అందంగా ఉన్న ఓ ఎలుగు బంటి పిల్ల కనిపించింది. తుపాకీ గురిపెట్టినా, దాన్ని చంపేందుకు ఆయన మనసొప్పుకోక ప్రాణాలతో విడిచిపెట్టేశారు. అప్పుడు ఆ వార్త అన్ని పత్రికల్లోనూ వచ్చింది. ఓ పత్రిక దాన్ని టెడ్డీబేర్‌ అని రాసిందట. అందుకు గుర్తుగానే ఈ రోజు జరుపుకుంటారనీ చెబుతారు.
* తర్వాత అమెరికాలో ఓ బొమ్మల తయారీ సంస్థ టెడ్డీబేర్‌ పేరుతో బొమ్మల్ని తయారు చెయ్యడం ప్రారంభించింది. మరికొంత కాలానికి మరో జర్మన్‌ సంస్థా ఈ బొమ్మల తయారీ మొదలుపెట్టింది.
* అంటే మన బుజ్జి టెడ్డీలు పుట్టి 114 ఏళ్లయ్యిందన్నమాట.

మీకు తెలుసా?

* ప్రపంచంలోనే ఎక్కువ టెడ్డీబేర్లు పోగేసిన మహిళ జాకీ మెలెయ్‌. ఆమె దగ్గర ఏకంగా ఎనిమిది వేలకుపైగా బొమ్మలున్నాయి. ఇది గిన్నిస్‌ రికార్డు కూడా.
* అతిపెద్ద టెడ్డీబేర్‌ దక్షిణ కొరియాలోని ఇంచెన్‌లో ఉంది. అది 32 అడుగుల పొడవుంది.
* అతి చిన్న టెడ్డీబేర్‌ పరిమాణం 4.5 మిల్లీమీటర్లు. అంటే అది మన గోటి కంటే చిన్నగానే ఉంటుంది. దక్షిణాఫ్రికాలో తయారైన ఇది ఇప్పుడు దక్షిణ కొరియాలోని ఓ మ్యూజియంలో ఉంది.
* ప్రపంచంలో మొదటి టెడ్డీబేర్‌ మ్యూజియంని ఇంగ్లండ్‌లోని పీటర్స్‌ఫీల్డ్‌లో 1984లో ప్రారంభించారు. అయితే అది 2006లో మూతపడింది.