మంచుగోడల మధ్య రహదారి!

ఎండల్లో చల్లని విహారానికి ఏదైనా మంచు ప్రాంతాలకు వెళితే... కనుచూపు మేర మాత్రమే మంచు కొండలు కనిపిస్తాయేమో- కానీ జపాన్‌లోని ‘తతేయామ కురోబ్‌ ఆల్పిన్‌ రూట్‌’కి వెళ్లామంటే... పైన నీలాకాశం తప్ప అంతా హిమమయయే. మొత్తం 37 కిలోమీటర్ల ఈ ప్రయాణంలో ఇంచుమించు కిలోమీటరు పొడవున ఉండే ‘స్నో కారిడార్‌’ మరీ ప్రత్యేకం. రహదారికి ఇరువైపులా 65 అడుగుల ఎత్తులో పెద్ద పెద్ద మంచుగోడల మధ్య సాగే ఆ ప్రయాణం... గొప్ప సాహసమే. ఎప్పుడూ మంచుతో కప్పబడి ఉండే ఈ ప్రదేశంలో ఏటా ఏప్రిల్‌ నుంచి జూన్‌ వరకూ ‘యుకి నో ఒటానీ’ పేరుతో స్నో కారిడార్‌ ఫెస్టివల్‌ జరుగుతుంది. ఈ సమయంలోనే గడ్డ కట్టే చలిలో మంచుకొండల్ని సందర్శించడానికి దేశవిదేశాల నుంచి ఎందరెందరో బారులు కడుతుంటారు. పర్యటకుల కోసం ప్రత్యేక బస్సులూ, నడకదార్లూ ఉంటాయి. ఆ దేశంలోనే స్నో వరల్డ్‌గా పేరున్న ఈ ప్రాంతాన్ని 1971 నుంచీ పర్యటక ప్రాంతంగా మార్చారు. ఇంకేముంది, మంచు అన్నా సాహసమన్నా ఇష్టపడేవారు ‘మంచు కొండల్లోన చంద్రమా చందనాలు చల్లిపో’ అంటూ తమతమ భాషల్లో రాగాలు తీసుకుంటూ మంచుదారుల్లో విహరిస్తున్నారు!