కార్ల కోసం అయస్కాంత పరదాలు!

ఏసీ చల్లదనం ఎంతలా ఉన్నా ఎండల్లో కారు అద్దాల్లోంచి వేడి తగులుతూనే ఉంటుంది. దాన్నుంచి రక్షించుకోవడానికి చాలావరకూ సన్‌షేడ్స్‌లాంటివి పెట్టుకుంటుంటారు. కానీ వాటికన్నా ఎక్కువ సౌకర్యాన్ని ఇస్తాయీ ‘మ్యాగ్నటిక్‌ కార్‌ కర్టెన్స్‌’. ఈ నైలాన్‌ క్లాత్‌ పరదాల పైన అయస్కాంతపు కడ్డీ ఉంటుంది. దీనివల్ల కారు కిటికీకి నచ్చినట్టు అమర్చుకోవచ్చు. అంతేకాదు, కావాల్సినప్పుడు పెట్టుకుని మళ్లీ సులువుగా తీసుకోవచ్చు కూడా. ఇంకా అవసరమైనంత వరకే పరదాను తెరుచుకోవచ్చు. ఎండల్లో ఎక్కువ దూరం ప్రయాణం చేసేటప్పుడు చల్లదనాన్ని ఇస్తూ ఈ పరదాలు కచ్చితంగా ఉపయోగపడతాయి. నచ్చితే ఓసారి ట్రై చేసి చూడండి మరి!