వ్యాయామం చేసేటప్పుడు ‘క్రీమ్‌’ వద్దు!

కొందరు ముఖానికి ఏదో ఒక క్రీములేనిదే బయటకు రారు. ఈ అలవాటున్నవాళ్ళు క్రీము రాసుకుని వ్యాయామాలు చేయకూడదని చెబుతున్నారు పరిశోధకులు. మామూలుగా వ్యాయామం చేసేటప్పుడు చర్మగ్రంథులు వ్యాకోచించి సీబమ్‌ ద్రవాలని స్రవిస్తాయి. అది చర్మ ఆరోగ్యానికి మంచిది కూడా. కానీ ముఖంపైన ఫౌండేషన్‌ క్రీమ్‌లాంటిది ఉంటే ఆ గ్రంథుల్ని కప్పేస్తుంది. దాంతో సీబమ్‌ ద్రవం లోపలే ఉండిపోయి చర్మ సమస్యలకి దారితీస్తుందని చెబుతున్నారు పరిశోధకులు. అమెరికాలోని టెక్సాస్‌ ఏ అండ్‌ ఎమ్‌ పరిశోధకులు తమ క్యాంపస్‌లోని 50 మంది యువతీయువకులపైన దీన్ని ప్రయోగాత్మకంగానే నిరూపించి చూపారు. వాళ్ళ నుదురు, గడ్డంపైన సన్నగా ‘ఫౌండేషన్‌’ వేయించి- అర్ధగంటపాటు ట్రెడ్‌మిల్‌పైన పరుగెత్తించారు. వ్యాయామం అయ్యాక చర్మాన్ని పరీక్షిస్తే- మేకప్‌ వేసిన చోట సీబమ్‌ ద్రవాలే లేవని తేల్చారు. అది క్రీమ్‌ని దాటుకుని రాలేక లోపలే ఉండిపోవడం చర్మ సమస్యలకి దారితీస్తుందని హెచ్చరిస్తున్నారు. ముఖానికి  క్రీమ్‌వాడి వ్యాయామాలకి వెళ్ళొద్దంటున్నారు.