‘ఏఆర్‌’ పెయింట్‌తో బస్సులు!

చాలా నగరాల్లో బస్సులపైన ప్రకటనల పెయింట్స్‌ వేయడం చూసుంటాం. అయితే... దానికే చెన్నైలో ఓ కొత్త హంగుని అద్దింది ఏషియన్‌ పెయింట్స్‌ సంస్థ. తమిళనాడు సంస్కృతి వైభవాన్ని చాటేట్టూ అక్కడి ఆలయ గోపురాలూ, భరతనాట్యం వంటి కళల్ని ప్రతిబింబించేట్టూ బస్సుల్ని తీర్చిదిద్దుతోంది. కేవలం బయటే కాదు- బస్సులోపలా ఆ రాష్ట్రంలో ప్రసిద్ధిచెందిన అత్తంగుడి టైల్స్‌తో చక్కగా అలంకరిస్తోంది. బస్సు ఎక్కబోయే ప్రయాణికులు ఎవరైనా తమ ఫోన్‌ కెమెరాని ఇక్కడి చిత్రాల్లోని కొన్ని భాగాలపైన చూపితే చాలు- ఒకటిన్నర నిమిషం పాటు ఉర్రూతలూగించే పాట ఒకటి కనిపిస్తుంది. అన్నట్టు, ఆ మధ్య కోల్‌కతాలోని ట్రామ్‌ సర్వీసులకి వందేళ్ళు పూర్తయిన సందర్భంగా కూడా ఓ ట్రామ్‌బండిని ఇలాగే కళాత్మకంగా తీర్చిదిద్దింది ఏషియన్‌ పెయింట్‌ సంస్థ. కాకపోతే- అక్కడ ఒక్క ‘ట్రామ్‌’కే పరిమితమైతే చెన్నైలో 22 బస్సుల్ని అచ్చం ఓ కళాఖండంలాగే మార్చేసింది.