చూపు... మళ్ళీ తెప్పిస్తున్నారు!

గ్లకోమా... చూపు కోల్పోయే ఈ పరిస్థితికి మధుమేహం కూడా ఒక కారణం. మన కళ్ళ వెనకాల- రెటీనాలో అతిసున్నితమైన దృశ్యనాడులు (ఆప్టికల్‌ నెర్వ్స్‌) ఉంటాయి. వీటిల్లోని ‘రెటినల్‌ గాంగ్లియన్‌’ అనే ప్రత్యేక కణాలే మనం చూసే దృశ్యాలని మెదడుకి చేరవేస్తాయి. మధుమేహం కారణంగా రక్తంలో నిండిపోయిన చక్కెర్లు- ఈ కణాలని చంపేస్తాయి. దాంతో చూపు పోతుంది. దెబ్బతిన్న ఆ ‘రెటినల్‌ గాంగ్లియన్‌’ కణాల స్థానంలో కొత్తవాటిని సృష్టించగలిగితే అంధులకి మళ్ళీ చూపు తెప్పించవచ్చు. ఈ దిశగా ప్రపంచవ్యాప్తంగా ఎన్నో పరిశోధనలు సాగుతున్నా... దానికి సంబంధించి ఇటీవల ఓ కీలకమైన ముందడుగు పడింది. అమెరికాలో కాలిఫోర్నియాలోని ‘చిల్డ్రన్‌ హాస్పిటల్‌ లాస్‌ ఏంజిలస్‌’కి చెందిన- భారతీయ మూలాలున్న పరిశోధకుడు బిరాజ్‌ మహతో దీన్ని సాధించాడు. ఇందుకోసం ఎనిమిది రసాయనాలతో కూడిన ప్రత్యేక ద్రవ మిశ్రమాన్ని రూపొందించాడు. ఆ మిశ్రమంలో- కంట్లో ఉండే ‘మ్యూలర్‌ గ్లియా’ అనే మామూలు కణాలని ఉంచాడు. రెండువారాల తర్వాత- ఆ మామూలు కణాలే ప్రత్యేక ‘రెటినల్‌ గాంగ్లియన్‌’ కణాలుగా ఎదిగాయట! ఇలా పెరిగిన కణాలని- దృశ్యనాడులు దెబ్బతిన్న ఎలుకల కళ్ళలో ఉంచి పరీక్షిస్తే 45 రోజుల్లో వాటికి చూపు తిరిగొచ్చిందట. ఇక, ఈ పరీక్ష మానవుల్లోనూ విజయం సాధిస్తే- గ్లకోమా కారక అంధత్వాన్ని పూర్తిగా అరికట్టవచ్చని చెబుతున్నారు!