మెడ చుట్టే మెరుపుల్‌

చలికాలం తరుముకొస్తోంది. దాన్ని కాచుకునేలా, మరోవైపు స్టైలిష్‌గా కనిపించాలంటే కుర్రకారుకి ‘టర్టిల్‌ నెక్‌’ స్వెటర్లు, చొక్కాలు మంచి ఎంపిక. తాబేలు మెడలాంటి డిజైన్‌తో మెడను పూర్తిగా కప్పేయడంతో ఆ పేరొచ్చింది. తారలు బాగా ఆదరిస్తున్న ఈ సీజనల్‌ ఫ్యాషన్‌ని అబ్బాయిలు, అమ్మాయిలు సైతం అప్పుడే అందిపుచ్చుకుంటున్నారు. జీన్స్‌, ట్రౌజర్‌, ఫార్మల్‌ ప్యాంట్‌.. జతగా ఏది వేసినా అందంగా కనిపించడం ఈ టర్టిల్‌ నెక్‌ ఫ్యాషన్‌ ప్రత్యేకత. ఇందులో హాఫ్‌ జిప్పర్‌, ఫుల్‌ స్లీవ్‌, టీ షర్ట్‌, స్లిమ్‌ ఫిట్‌ అంటూ రకరకాలున్నాయి.

* టర్టిల్‌ నెక్‌ చొక్కాలు, స్వెటర్లను డెనిమ్‌ ప్యాంట్‌తో కలిపి వేసుకుంటే బాగుంటుంది. ప్యాంట్‌కి బెల్ట్‌, మెడలో మఫ్లర్‌ లేదా స్టోల్‌ వేసుకుంటే మరింత స్టైలిష్‌గా కనిపిస్తారు.

* భారీకాయులు, పొడుగ్గా ఉన్నవారు ఈ స్వెటర్‌, చొక్కాలపై లెదర్‌ జాకెట్‌ వేసుకుంటే సాలిడ్‌గా, హుందాగా కనిపిస్తారు.

* ఫార్మల్‌గా కనిపించాలనుకుంటే టర్టిల్‌ నెక్‌కి జోడీగా ట్రౌజర్‌, ఫార్మల్‌ జాకెట్‌ వేసుకోవాలి.

* పాతికేళ్లలోపు కుర్రాళ్లు ఆధునికంగా, క్యాజువల్‌గా ఉండాలంటే చినోస్‌ ప్యాంటు, డెనిమ్‌ జాకెట్‌ ధరించాల్సిందే.