కలిసి తిరిగితే కలదు చైతన్యం

జాగ్రత్తలూ ముఖ్యం

  సరదా, సేవ.. ఉద్దేశం ఏదైనా సభ్యుడు తప్పకుండా కొన్ని నిబంధనలు పాటించాలంటారు మోటోవింగ్స్‌ సహవ్యవస్థాపకుడు శ్రీధర్‌. ఎక్కువగా యువతే వీటిల్లో ఉంటుండడంతో ప్రతీ ఒక్కరూ ఫాలో అవ్వాల్సిందే అంటున్నారు. 
* నూటాయాభై సీసీ దాటిన బైక్‌లతోనే పర్యటించాలి.
* ప్రతి గ్రూప్‌లో బైక్‌ని పూర్తిగా మరమ్మతులు చేయగలిగినవారుండాలి.
* పర్యటన మొదలవడానికి ముందే బండిని సర్వీస్‌ చేయించాలి. టూల్‌కిట్‌, అదనపు బ్యాటరీ అందుబాటులో ఉంచుకోవాలి.
* రైడింగ్‌లో ఉన్నపుడు ఒకర్నొకరు ఓవర్‌టేక్‌ చేయకూడదు. ఫొటోలు, సాహసాలు నిషిద్ధం. 
* హెల్మెట్‌, షూస్‌, మోకాలి ప్యాడ్స్‌, జాకెట్స్‌ తప్పనిసరి. 
* అగ్రెసివ్‌ రైడర్లకు చోటు లేదు. వారి రైడింగ్‌ తీరు, వ్యక్తిగత ప్రవర్తన ముందే పరీక్షిస్తారు.
* ఐదు, పదిమంది సభ్యులకు ఒకరు చొప్పున లీడర్లుంటారు. వీళ్లు ముందు, వెనక, మధ్యలో ఉంటారు. వీళ్ల ఆజ్ఞల్ని తప్పకుండా పాటించాల్సిందే.
* వెనక కూర్చొని ప్రయాణించేవారైనా శిరస్త్రాణం (హెల్మెట్‌) తప్పనిసరిగా ధరించాలి.
* వేగ నియంత్రణ తప్పనిసరిగా పాటించాలి.

250 టూర్లు చేశా

  ఓసారి సరదాగా సూర్యలంక బీచ్‌కి వెళ్లాలనుకున్నా. ఒంటరిగానే బైక్‌ మీదే బయల్దేరా. ‘మాతో చెబితే మేమూ వచ్చేవాళ్లం కదా’ అన్నారు స్నేహితులు. అదే మాటతో హైదరాబాద్‌ బైకర్స్‌ క్లబ్‌ ప్రారంభించా. తొలిసారి హైదరాబాద్‌ నుంచి సొంతూరు నాందేడ్‌కి లాంగ్‌టూర్‌ చేశా. ఇప్పుడు రెండువందలమంది సభ్యులయ్యారు. ఫేస్‌బుక్‌లో నాలుగువేల మంది అనుసరిస్తున్నారు. చుట్టుపక్కల ప్రాంతాల నుంచి లేహ్‌, లద్దాఖ్‌లాంటి ప్రాంతాలు తిరిగాం. మా క్లబ్‌లో ఏ బైక్‌ వాళ్లైనా సభ్యులుగా చేరొచ్చు. ప్రతివారం ఏదో ఒక టూర్‌కి వెళ్తుంటాం. ఏదీ కుదరనపుడు సరదాగా యాభై, అరవై కిలోమీటర్ల దూరంలో ఉన్న ఏదైనా ఒక ప్రాంతానికి వెళ్లి వస్తుంటాం. నేను హోగ్‌లో కూడా సభ్యుడిని. మొత్తం 250కిపైగా టూర్లలో పాల్గొన్నా. మా ప్రతి ర్యాలీకి ఏదో నినాదం ఉంటుంది. సేఫ్టీ ర్యాలీలు చేస్తున్నాం. సామాజిక దురాచారాల్ని నిరసిస్తూ యాత్రలు చేస్తున్నాం. 

ప్రతి టూర్‌కి సామాజిక చైతన్యం

మూడేళ్ల కిందట మా గ్రూప్‌ మొదలైంది. హోండా సీబీఆర్‌ బైక్‌ యజమానుల్ని ఒక్కచోటికి తీసుకురావాలనే ఉద్దేశంతో అవినాష్‌, నేను, శ్యాం, సాయి దీన్ని ప్రారంభించాం. మొదట్నుంచే మా ప్రతి టూర్‌కి ఓ పర్పస్‌ ఉండాలనే నియమం పెట్టుకున్నాం. కొత్తగా మా క్లబ్‌లో చేరినవాళ్లకి హెల్మెట్‌లు కొనిచ్చాం. చిన్నచిన్న ర్యాలీల్లో రైడింగ్‌ జాగ్రత్తల ప్రచారం నిర్వహించాం. హెల్మెట్‌, షూస్‌, ధరించకుండా మేం బయటికి వెళ్లం. గతంలో ‘ఆర్ట్‌ ఆఫ్‌ రైడింగ్‌’ అని ఒక పెద్ద కార్యక్రమం చేశాం. ప్రమాదాల బారిన పడకుండా ఎలా బైక్‌ రైడింగ్‌ చేయాలో చెప్పాం. వర్షాకాలం మొదలవుతుంటే మొక్కలు నాటుతున్నాం. విరాళాలు సేకరించి అనాథ పిల్లలకు సాయం చేశాం. లంబసింగి, లక్నవరం, అరకు, గోవా.. నుంచి లేహ్‌, లద్దాఖ్‌ సహా ఇప్పటివరకు నలభైవరకు టూర్‌లు వెళ్లాం. అసిఫా దారుణ సంఘటనని నిరసిస్తూ త్వరలో కశ్మీర్‌ టూర్‌ చేయబోతున్నాం.