AP Cabinet: విశాఖ అభివృద్ధికి కీలక అడుగులు

పలు సంస్థలకు భూముల కేటాయింపులు
పంప్డ్‌ స్టోరేజ్‌ ప్రాజెక్టుల ఉపసంహరణకు అదానీ గ్రీన్‌ ఎనర్జీకి అనుమతి 
మంత్రిమండలి నిర్ణయాలు

క్యాబినెట్‌ నిర్ణయాలను వెల్లడిస్తున్న మంత్రి పార్థసారథి

ఈనాడు, అమరావతి: విశాఖలో ఐటీ రంగం అభివృద్ధికి మంత్రిమండలి సమావేశం కీలక నిర్ణయాలను తీసుకుంది. పలు సంస్థలు పెట్టుబడులు పెట్టేందుకు వీలుగా భూములను కేటాయించింది. పెట్టుబడుల ప్రోత్సాహక మండలి ఆమోదం మేరకు ఈ నిర్ణయాలు తీసుకుంది. వివరాలు ఇలా ఉన్నాయి. 

• మధురవాడ, రుషికొండ ఐటీ పార్కులలో ఫీనమ్‌ పీపుల్‌ సంస్థకు 4.45 ఎకరాల కేటాయింపు. ఎకరానికి రూ.4.05 కోట్ల చొప్పున వసూలు. రూ.207.50 కోట్ల విలువైన పెట్టుబడులు, 2,500 ఉద్యోగాలు కల్పించే ప్రాజెక్టులకు ప్రోత్సాహకాలు అందించేందుకు ఆమోదం. 12 నెలల్లో ఈ సంస్థ కార్యకలాపాలు ప్రారంభించాలి. తొలి ఏడాది 1,250, తర్వాత రెండేళ్లలో 1,250 ఉద్యోగాలు ఇవ్వాలి. 
• మధురవాడ ఐటీ హిల్‌ 3పై 3.6 ఎకరాలు ఎకరం రూ.కోటి చొప్పున, పరదేశిపాలెంలో ఎకరం రూ.50 లక్షల చొప్పున 50 ఎకరాలు సిఫీ ఇన్ఫినిట్‌ స్పేసెస్‌ లిమిటెడ్‌కు కేటాయింపు. వారి రూ.16,466 కోట్ల పెట్టుబడుల ప్రతిపాదన, 600 ఉద్యోగాల కల్పనకు ఆమోదం. 
• మధురవాడ ఐటీ హిల్‌పై 30 ఎకరాల భూమి సత్య డెవలపర్స్‌కు ఎకరం రూ.1.50 కోట్ల ధరకు అప్పగించేందుకు ఆమోదం. రూ.1,500 కోట్ల పెట్టుబడులతో 25 వేల ఉద్యోగాల కల్పన లక్ష్యం. 
• మధురవాడ ఐటీ హిల్‌ నంబరు 3పై 2.5 ఎకరాలు, హిల్‌ నంబరు 4పై 7.79 ఎకరాలు ఏఎన్‌ఎస్‌ఆర్‌ గ్లోబల్‌ కార్పొరేషన్‌కు కేటాయింపులు. రూ.1,000 కోట్ల పెట్టుబడులు, 10,000 ఉద్యోగాల కల్పన ప్రాజెక్టు ప్రతిపాదనకు ఆమోదం. ప్రోత్సాహకాల అందజేతకు నిర్ణయం. 
• ఎండాడలో 30 ఎకరాల భూమి ఎకరం 1.5 కోట్ల చొప్పున బీవీఎం ఎనర్జీ అండ్‌ రెసిడెన్సీ సంస్థకు కేటాయింపు. రూ.1,250 కోట్ల పెట్టుబడులు, 15 వేల ఉద్యోగాల కల్పన లక్ష్యం. 
• ఆంధ్రప్రదేశ్‌ అధీకృత లే అవుట్లు, ప్లాట్ల నియంత్రణ చట్టం 2020 సవరణలకు ఆమోదం. 
• అనకాపల్లి జిల్లా చెర్లోపల్లికందం గ్రామంలో 2007లో ప్రారంభించిన 58.18 ఎకరాల భూ సమీకరణ కొనసాగించేందుకు విశాఖ మెట్రోపాలిటన్‌ కమిషనర్‌కు అనుమతి. 
• ఖనిజాభివృద్ధి సంస్థ రూ.5,526.18 కోట్ల సబ్‌స్క్రిప్షన్‌ స్వీకరించడానికి 9.3% కూపన్‌ ధరతో బిడ్‌ చేయడం తదితర కార్యకలాపాలకు ఆమోదం. 
• అంతర రాష్ట్ర సరిహద్దు వివాదాలతో ప్రభావితమైన కురుకుట్టి పీఎస్‌పి (1200 మెగావాట్లు), కర్రివలస పంప్డ్‌ స్టోరేజ్‌ ప్రాజెక్టు (1,000 మెగావాట్లు) కేటాయింపుల రద్దుకు ఆమోదం. అదానీ గ్రీన్‌ ఎనర్జీ సంస్థ వాటిని ఉపసంహరించుకునేందుకు ప్రతిపాదించింది.
• ఆంధ్రప్రదేశ్‌ గ్రీన్‌ హైడ్రోజన్‌ వ్యాలీ తీర్మాన ప్రతిపాదనలకు ఆమోదం. 
• నీటి పన్ను బకాయిలపై రూ.85.81 కోట్ల అసాధారణ వడ్డీ మొత్తాన్ని రైతుల నుంచి బకాయిలు వసూలు చేసేటప్పుడు మాఫీ చేసే ప్రతిపాదనకు ఆమోదం.