Amalapuram: బందోబస్తుతో వెళ్లి ఓటేసిన కుటుంబం.. అమలాపురంలో ఆలస్యంగా వెలుగులోకి..

ఈనాడు, రాజమహేంద్రవరం: డా.బీఆర్‌ అంబేడ్కర్‌ కోనసీమ జిల్లా కేంద్రం అమలాపురంలో ఓ కుటుంబం పోలీసు, రెవెన్యూ అధికారుల బందోబస్తు నడుమ ఈ నెల 13న ఓటు హక్కు వినియోగించుకుంది. ఈ అంశం ఆలస్యంగా వెలుగులోకి వచ్చింది. పట్టణంలోని ఓ కుటుంబానికి స్థానికులతో రహదారి వివాదం ఉంది. ఆ మార్గంలో రాకపోకలకు తమను అనుమతించరని, ఓటేసే అవకాశం కోల్పోతామని ఆ కుటుంబసభ్యులు కేంద్ర ఎన్నికల సంఘానికి ఫిర్యాదుచేశారు. అక్కడి నుంచి ఆ వివరాలు కలెక్టరేట్‌కు చేరాయి. విషయం ఎన్నికల పరిశీలకుడి దృష్టికి వెళ్లింది. పోలింగ్‌ రోజున ఓ కానిస్టేబుల్, రెవెన్యూ సిబ్బంది పర్యవేక్షణలో ఆ దంపతులు పోలింగ్‌ కేంద్రానికి వెళ్లి ఓటు వేశారు. ఈ మొత్తం ప్రక్రియను వీడియో తీసి భద్రపరిచినట్లు పోలీసు వర్గాలు తెలిపాయి.