శ్రీచైతన్య అధినేత బి.ఎస్‌.రావు కన్నుమూత

ఇంట్లో తీవ్ర అస్వస్థత
ఆసుపత్రికి తరలించేలోపు మృతి
రేపు విజయవాడలో అంత్యక్రియలు

ఈనాడు, హైదరాబాద్‌: శ్రీచైతన్య విద్యా సంస్థల అధినేత...బి.ఎస్‌.రావుగా ప్రఖ్యాతులైన డాక్టర్‌ బొప్పన సత్యనారాయణరావు (75) ఇకలేరు. గురువారం ఆయన తుదిశ్వాస విడిచారు. కొంతకాలం క్రితం అనారోగ్యానికి గురై హైదరాబాద్‌లోని బంజారాహిల్స్‌ కేర్‌ ఆసుపత్రిలో చికిత్స పొంది కోలుకున్నారు. అప్పటినుంచి జూబ్లీహిల్స్‌లోని తమ నివాసంలో ఉంటున్నారు. గురువారం మధ్యాహ్నం 3 గంటలకు గుండెపోటు రావడంతో తీవ్ర అస్వస్థతకు గురయ్యారు. కుటుంబ సభ్యులు హుటాహుటిన జూబ్లీహిల్స్‌లోని అపోలో ఆసుపత్రికి తరలించారు. పరీక్షించిన వైద్యులు అప్పటికే మృతి చెందినట్లు ప్రకటించారు. అనంతరం పార్థివదేహాన్ని విజయవాడ శివారులోని తాడిగడపకు తరలించారు. అక్కడి సరస్వతీ సౌధం వద్ద ఉన్న సొంతింటి వద్ద శుక్రవారం ప్రజల సందర్శనార్థం ఉంచనున్నారు. బి.ఎస్‌.రావు చిన్న కుమార్తె సీమ ప్రస్తుతం అమెరికాలో ఉన్నారు. ఆమె వచ్చాక.. శనివారం అంత్యక్రియలను నిర్వహించేందుకు ఏర్పాట్లు చేస్తున్నట్లు బంధువులు తెలిపారు.