వరద మింగిన రైతు కష్టం

ఈనాడు, ఏలూరు: మిగ్‌జాం తుపాను అన్నదాతను నిలువునా ముంచేసింది. ఏలూరు జిల్లా పెదపాడు మండలం వట్లూరుకు చెందిన కౌలు రైతు పల్నాటి అర్జునరావు 46 ఎకరాల్లో వరి సాగు చేశారు. తుపానుకు ముందు 23 ఎకరాల్లో  పంట కోశారు. వర్షాలకు పనలు తడిసిపోయాయి. శుక్రవారం కూలీలతో పనలను తిరగవేయించి చూస్తే కంకుల నిండా మొలకలొచ్చాయి. పెట్టుబడి, కౌలు కలిపి ఎకరాకు రూ.60 వేల చొప్పున ఖర్చయిందని రైతు తెలిపారు. నేలపాలైన పంటను ఒడ్డుకు చేర్చడానికి రెట్టింపు ఖర్చవుతోందని తెలిపారు. కోతకు ముందు ఎకరాకు 15 కిలోల పెసలు చల్లామని, అవన్నీ కొట్టుకుపోవడం, కుళ్లిపోవడంతో రెండోసారీ వేశామని అన్నారు. అధికారులు నష్టపరిహారం అందించాలని కోరుతున్నారు.