వాలంటీర్లకు ఉచిత బీమా ఎర!

కురిచేడు, న్యూస్‌టుడే: ఎన్నికల వేళ అధికార పార్టీ నాయకులు వాలంటీర్లను మచ్చిక చేసుకునేందుకు వారిపై వరాలు కురిపిస్తున్నారు. ప్రకాశం జిల్లా కురిచేడులో గురువారం ‘వాలంటీర్లకు వందనం’ కార్యక్రమం నిర్వహించారు. ఇందులో జడ్పీ ఛైర్‌పర్సన్‌ బూచేపల్లి వెంకాయమ్మ, ఆమె కుమారుడు, వైకాపా నియోజకవర్గ ఇన్‌ఛార్జి శివప్రసాదరెడ్డి మాట్లాడారు. మండలంలోని 209 మంది వాలంటీర్లకు బూచేపల్లి సుబ్బారెడ్డి-వెంకాయమ్మ ఛారిటబుల్‌ ట్రస్టు ద్వారా రూ.5 లక్షల ప్రమాద బీమాను ఉచితంగా కల్పిస్తామని హామీ ఇచ్చారు. ఐదుగురు వాలంటీర్లకు సేవారత్న అవార్డులు అందజేశారు. స్థానిక ప్రాథమిక ఆరోగ్య కేంద్రంలో రూ.10లక్షల విలువైన వైద్య పరికరాలను ప్రారంభించారు.