Vizag: మేయర్‌ కారైతే ఏంటి.. కల్వర్టుకు తెలియదు కదా!

గాజువాక, న్యూస్‌టుడే: కల్వర్టు పునరుద్ధరణ పనుల ప్రారంభానికి వచ్చిన ప్రజాప్రతినిధి కారు.. ఆ శిథిలాల్లోనే ఇరుక్కుపోయింది. విశాఖపట్నంలోని 65వ వార్డు కాకతీయ కూడలి సమీపంలో పనుల శంకుస్థాపనకు శుక్రవారం గాజువాక ఎమ్మెల్యే నాగిరెడ్డి, మేయర్‌ జి.హరి వెంకటకుమారి, ఇతర అధికారులు, నాయకులు వచ్చారు. మేయర్‌ కారు దిగి కొబ్బరికాయ కొట్టేందుకు వెళ్లారు. డ్రైవర్‌ కల్వర్టుపైనున్న వాహనాన్ని వెనక్కి తీసే ప్రయత్నం చేశారు. ఈ క్రమంలో కల్వర్టుపై మ్యాన్‌హోల్‌లా ఉన్న గుంతలో కారు ముందు చక్రం ఇరుక్కుపోయింది. గుంతపై ఉన్న మూత శిథిలమైపోవడంతో చక్రం పూర్తిగా అందులో దిగబడింది. అప్రమత్తమైన జీవీఎంసీ సిబ్బంది, స్థానికులు అతికష్టం మీద వాహనాన్ని అందులోంచి లాగారు.