చెట్టు నుంచి జలధార

దేవీపట్నం, న్యూస్‌టుడే: అల్లూరి సీతారామరాజు జిల్లా రంపచోడవరం మండలం కింటుకూరు అటవీ ప్రాంతంలో ఆసక్తికర అంశం వెలుగుచూసింది. ఓ నల్ల మద్ది చెట్టు మొదలు వద్ద రంధ్రం చేయగా సుమారు పది లీటర్ల నీరు బయటకు వచ్చింది. జిల్లా అటవీశాఖాధికారి జి.జి.నరేంద్రియన్‌, ఇందుకూరు రేంజ్‌ అధికారి దుర్గాకుమార్‌, సిబ్బంది  కింటుకూరు అటవీ ప్రాంతంలో పర్యటించిన సమయంలో ఈ ఘటన చోటుచేసుకుంది. పాపికొండల నేషనల్‌ పార్కు పరిధిలో నల్ల మద్ది చెట్లు వేల సంఖ్యలో ఉన్నాయని, నీరు వచ్చే చెట్లు మాత్రం చాలా అరుదుగా కనిపిస్తాయని రేంజర్‌ తెలిపారు. ఈ చెట్లు మొదలు భాగం నుంచి నాలుగు అడుగుల ఎత్తులో ఉబ్బినట్లు ఉంటాయని, వీటి నుంచి నీరు వస్తుందని చెప్పారు. కొన్ని చెట్లు వాటికి కావాల్సిన నీటిని భూమి నుంచి తీసుకుని కాండంలో నిల్వ ఉంచుకుంటాయని పేర్కొన్నారు.