చంద్రబాబుకు కేంద్రమంత్రి గడ్కరీ శుభాకాంక్షలు

ఈనాడు, అమరావతి: తెదేపా అధినేత చంద్రబాబు జన్మదినం సందర్భంగా కేంద్ర మంత్రి నితిన్‌ గడ్కరీతో పాటు కేంద్ర మాజీ మంత్రి సురేష్‌ప్రభు, భాజపా నేత మురళీధర్‌రావు తదితరులు శుభాకాంక్షలు తెలిపారు.

• చంద్రబాబునాయుడి జన్మదిన వేడుకలను మాజీ ఎంపీ కనకమేడల రవీంద్రకుమార్‌ దిల్లీలోని తన నివాసంలో నిర్వహించారు. ఆయన తెదేపా అభిమానులతో కలిసి కేక్‌ కట్‌ చేశారు. ఈ సందర్భంగా విలేకర్లతో మాట్లాడుతూ ఏపీ రాజకీయాలపై చంద్రబాబునాయుడు చెరగని ముద్ర వేశారన్నారు.
• చంద్రబాబు నాయకత్వంలో ఏపీ భవిష్యత్తులో మరింత అభివృద్ధి చెందాలని లోకేశ్‌ అభిలషించారు. ‘హ్యాపీ బర్త్‌డే బాబు’ హ్యాష్‌ట్యాగ్‌ ఎక్స్‌ టాప్‌-1లో శనివారం కొంతసేపు ట్రెండ్‌ అయ్యింది.
• తెదేపా ఎన్నారై విభాగం ఆధ్వర్యంలో చంద్రబాబు పుట్టిన రోజు వేడుకల్ని ఆ పార్టీ కేంద్ర కార్యాలయంలో శనివారం నిర్వహించారు. ఎన్నారై తెదేపా గల్ఫ్‌ విభాగం అధ్యక్షుడు రావి రాధాకృష్ణ, శేషుబాబు, కోడూరి వెంకట్‌ తదితరులు కేకు కోసి శుభాకాంక్షలు తెలిపారు. కార్యక్రమంలో బుచ్చిరాంప్రసాద్‌, చలసాని కిశోర్‌ తదితరులు పాల్గొన్నారు.
•  తెదేపా న్యాయ విభాగం ఆధ్వర్యంలో నిర్వహించిన వేడుకల్లో శాసనమండలి మాజీ ఛైర్మన్‌ ఎంఏ షరీఫ్‌, మాజీ అడ్వొకేట్‌ జనరల్‌ దమ్మాలపాటి శ్రీనివాస్‌ కేకు కోసి శుభాకాంక్షలు తెలిపారు.
•  ‘నా రాజకీయ గురువు చంద్రబాబే. అందులో ఏ మాత్రం సందేహం లేదు’ అని కేంద్ర మాజీ మంత్రి, విజయవాడ పశ్చిమ భాజపా అభ్యర్థి సుజనాచౌదరి ఎక్స్‌ వేదికగా పేర్కొన్నారు.