గులకరాయి కేసు నిందితుడి కస్టడీ కోసం పోలీసుల పిటిషన్‌

ఈనాడు, అమరావతి: గులకరాయి కేసులో అరెస్టయి రిమాండ్‌లో ఉన్న నిందితుడు సతీష్‌ కుమార్‌ కస్టడీ కోసం పోలీసులు సోమవారం కోర్టులో పిటిషన్‌ దాఖలు చేశారు. కుట్రకోణంపై నిందితుణ్ని మరింత లోతుగా విచారించాల్సి ఉందని ప్రిన్సిపల్‌ జూనియర్‌ సివిల్‌ జడ్జి కమ్‌ మెట్రోపాలిటన్‌ మేజిస్ట్రేట్‌ కోర్టును కోరారు. బాధితుడు జగన్‌మోహన్‌రెడ్డి ముఖ్యమంత్రి అయినందున.. ఈ ఘటనలో కుట్రకోణాన్ని వెలికితీయాల్సి ఉందని అందులో పేర్కొన్నారు. ఏడు రోజుల కస్టడీకి అనుమతివ్వాలని కోరారు. న్యాయాధికారి రమణారెడ్డి విచారణను మంగళవారానికి వాయిదా వేశారు.

వాంగ్మూలం నమోదు పిటిషన్‌పై 29న వాదనలు

నిందితుడి వాంగ్మూలాన్ని 164 సీఆర్పీసీ కింద నమోదు చేయాలని పోలీసులు దాఖలు చేసిన పిటిషన్‌.. సోమవారం నాలుగో ఏసీఎంఎం కోర్టులో విచారణకు వచ్చింది. కేసు తీవ్రత, తదుపరి దర్యాప్తు దృష్ట్యా సతీష్‌ వాంగ్మూలాన్ని రికార్డు చేయాలని పిటిషన్‌లో కోరారు. కౌంటర్‌ దాఖలు చేసేందుకు నిందితుడి తరఫు న్యాయవాది సలీం సమయం కోరారు. దీనిపై న్యాయాధికారి రామ్మోహన్‌ స్పందిస్తూ ఈనెల 29కి వాయిదా వేశారు.